1-2. Nthowa taani noopacerya nnaphwanela oneeriha omuthokororya liivuru a Wupulula?

 APWANNE mohintoko owompwa wi moone ifootu sa muchu yoowo mukina? Vaavaa munoonaanyu ifootu, nyuwaano munnawoona achu ancipale muhinaasuwelaanyu. Nyenya mu efootu emoha nyuwaano munneemela nave munnaweha mwawiichaalela. Ntakhara heeni? Nthowa nawi muri va efootu yeeyo. Vaavaa munawehaanyu efootu, munneererya wuupuwela elukuluku efootu eyo yaakumihiwaaya nnipuro nene. Nyuwaano tho munneererya owuupuwela achu oothene ari va efootu. Xaxaxa efootu eyo ennoovolowelaani.

² Liivuru a Wupulula ori ntoko efootu yeela. Ntakhara heeni? Aakhalavo mathowa meeli. Noopacerya, liivuru yoola a Mpiipiliyani orempwe ntakhara hiyaano. Mu eversikulu yoopacerya, ninnaalakhanya: “Wupulula wa Yesu Kristu, Muluku anvanheiye wi àsuwelihe amulapeli awe itxhu inahawela wereya vohilekela.” (Wup. 1:1, BNM) Mwawiihiiha, yeeyo erempwe mu liivuru yoola henaya wa achu oothene nyenya wa hiyo, alapeli awiivelela a Muluku. Ntoko achu a Muluku, hannaphwanela otikhiniheya va woona wi ninnapaka makupa mu waakhwanela wa sooloherya sinaphwanyeya mu liivuru yoola ootikhiniha. Mmasu makina, hiyaano nri “va efootu.”

3-4. Mwawiiwanana ni liivuru a Wupulula, ti liini sooloherya saahaalaaya opacerya waakhwaniheryeya nave ti mwawiihai yaahaalaaya omvolowela mmoha ti mmoha a hiyo?

³ Nthowa nanaawiili ninnavolowela elukuluku sooloherya seiha saahaalaaya waakhwanela. Murummwa Yohani aahooniherya elukuluku sooloherya seiha saahaalaaya waakhwanela vaavaa aalonceiye: “Mwa munepa waweela kaari mu nihiku na  Apwiya.” (Wup. 1:10, TNM) Vaavaa Yohani aarempeiye masu yaala variyari va eyaakha ya 96 E.K., “nihiku na Apwiya” niiha nihaakumve opacerya. (Mat. 25:14, 19; Luka 19:12) Nyenya mwawiiwanana ni yooloherya ya Mpiipiliyani, nihiku nenla naapacenrye mu 1914 vaavaa Yesu aakhanleiye Mwene wirimu. Opacerya eyaakha yeele oya muhoolo, sooloherya sinaphwanyeya mu Wupulula, sinaavolowela achu a Muluku, saapacerya okhwaaniheryeya. Chiryene, vano nnakhala mu “nihiku na Apwiya!”

⁴ Woona wi nnakhala mu elukuluku yeela yootikhiniha, hiyaano na achu nnaphwanela okhapelela ekano yoosivela enaphwanyeya mu Wupulula 1:3: “Ooreeriwa muchu yoowo onaalakhanya masu ala a miririmo, ooreeriwa tho yoowo oniiwa ni ochariha yeeyo erempwemo, ntakhara elukuluku yohaacamela.” Mweeparipari, hiyaano nnaphwanela ‘waalakhanya masu ala a miririmo,’ ‘wiiwa’ ni “ochariha” yaawo. Masu taani makina a yaala nnaphwanelaahu wiiwelela?

5. Ti mwawiihai liivuru a Wupulula onooniheryeiye ochuneya waya ororomela wi malapelo ahu anneemereryiwa ni Yehova?

⁵ Opacerya mu Wupulula ekapitulu yoopacerya, ninnahuserya wi Yesu onnasuwela phaameene yeeyo eneereya mmiloko sa achu awe. (Wup. 1:12-16, 20; 2:1) Michaka seiho Yesu aarumihenleiye miloko 7 sa o Asiya Mukhaani sinnooniherya yeela. Mu michaka seiha, owo aahivaha ohoolela wooluluwanya wi aakhaviherye Akristu a mu nsana noopacerya ororomela wi malapelo aya yaari aweemereryiwa ni Yehova. Nave, ichu inalociwa mu michaka seiha sinnaphariheleya wa achu oothene a Muluku olelo. Tiheeni nnahuseryaahuvo? Muhooleli ahu Yesu Kristu, onnasuwela phaameene waakhanle wi hiyaano nookhalano onthamwene waphaama ni Yehova. Owo tonanihoolela ni onikhapelela nave onnoona echu eri yoothene. Owo oosuwela echu nnaphwanelaahu weera wi ntitelele okhala aweemereryiwa ni Yehova. Ohoolela taani owo onanivaheiye yoowo nnaphwanelaahu wiiwelela olelo?

6. (1) Mwawiiwanana ni masu a Yesu enaphwanyeya mu Wupulula 2:3, 4, nikacamiho taani muloko wo Efeso waaryaayano? (2) Tiheeni nnahuseryaahu orweela wa yeeyo?

⁶ Mwaalakhanye Wupulula 2:3, 4. Hannaphwanela oyeleela osivela naaryaahuno woopaceryani ntakhara Yehova. Muchaka wa Yesu ntakhara muloko wo Efeso onnooniherya wi awo yaari oovilela nave yaanatitelela omurumeela Yehova naamwi yaahoolela makacamiho oovilaxa. Naamwiihiiha, awo yaayeleela osivela yaaryaayano woopaceryani. Waakhanle wi awo hakookenle okhalano osivela yaaryaayano khalai, malapelo aya hiyaahaala weemereryiwa. Moolikana, olelo nnaphwanela opaka sincipale opwaha ovilela. Hiyaano nnaphwanela ovilela ni mathowa aphaama. Muluku ahu onnapwacha ohiya pahiru yeeyo nnapakaahu nyenya ntakhara heeni nnapakaahu yeeyo. Yeeyo enanceenyerya ti yoochuneya wa yoowo nthowa nawi owo onachuna wi malapelo ahu ethipeleyeke mu omusivela wahu mwawiiseela ni othamalela wahu ntakhara yoowo.—Masi. 16:2; Mar. 12:29, 30.

7. (1) Ntoko enooniheryiwaaya mu Wupulula 3:1-3, nikacamiho taani muloko wo Sarti waaryaayano? (2) Tiheeni nnaphwanelaahu weera?

⁷ Mwaalakhanye Wupulula 3:1-3. Nnaphwanela otitelela okhala oowehererya. Achu a muloko wo Sarti yaakhalano nikacamiho noohiyana. Naamwi yaamurumeela Yehova khalai, awo yaayeleela mvai aya mmuteko wa Muluku mu elukuluku yeele. Mwawiihiiha  Yesu aaloca wa yaawo wi ‘evinye.’ Nihusiheryo taani noolopola nnahuseryaahuvo? Mweeparipari, Yehova harwa acuwala muteko ahu. (Ahe. 6:10) Naamwiihiiha, hiyaano hannaphwanela wuupuwela wi woona wi noomurumeela Yehova khalai, hannaphwanela omurumeela hiihaano. Naamwi akhweya nri ookotakota opwaha khalai, nnaphwanela otitelela okhala ooweiwa “mmuteko wa Apwiya,” ntitelelaka okhala oolipelela ophiyerya omakuchuwelo.—1 Kor. 15:58; Mat. 24:13; Mar. 13:33.

8. Tiheeni nnahuseryaahu orweela mmasu a Yesu ntakhara anna o Lawotikeya anaphwanyeya mu Wupulula 3:15-17?

⁸ Mwaalakhanye Wupulula 3:15-17. Nnaphwanela okhala amvai ni oohikawanyeya mmalapelo ahu. Muchaka wa Yesu wa muloko wo Lawotikeya waahooniherya nikacamiho nikina. Awo yaari “oolucuwa tonto” mmalapelo aya. Nthowa na mukhalelo aya, Yesu aaloca wi awo yaari ‘ootakhaliwa ni oohasuwa.’ Awo yaaphwanela okhalano mvai ntakhara Yehova ni malapelo awe. (Wup. 3:19) Tiheeni nnahuseryaahuvo? Wakhala wi nooyeleela mvai ahu mmukhalelo vyakala, nnaphwanela othamalela ichu soothene Yehova ni marehereryo awe ananivahereryaaya. (Wup. 3:18) Hannaphwanela omalihaka elukuluku yincipale naavyaka okhalano ekumi yaphaamaxa, ophiyerya wi malapelo ahu ntakhara Yehova ekhale mu nipuro nanaawiili.

9. Ntoko enooniheryiwaaya mu michaka sa Yesu ntakhara Akristu o Perkamu ni o Tiyatira, yawoopiha taani nnaphwanelaahu osepa?

⁹ Nnaphwanela okhooca mahusiheryo a alipa oomwaryeya. Yesu aahisamela muloko wo Perkamu nthowa na okawanyeya waya. (Wup. 2:14-16) Owo aahaathamalela anna a muloko wo Tiyatira yaawo yiivalaannye ni ichu “sawisha sa Satana” nave aahaaceenyerya wi ‘epharelesha’ eparipari. (Wup. 2:24-26, NN) Akristu yaale ooceecheya yeemerenrye ovoloweliwa ni mahusiheryo atheru yaaphwanela ocharuwa. Hanka hiyaano olelo? Nnaphwanela okhooca mahusiheryo vyakala ehiniiwanana ni muupuwelo wa Yehova. Alipa oomwaryeya ananwerya okhala ntoko “achu anavekela” nyenya annooniherya wi “haanono ikuru sene sa Muluku.” (2 Tim. 3:5) Ti wookhweya osuwela ni okhooca mahusiheryo atheru vaavaa nnakhalaahu oohuserya aphaama a Masu a Muluku.—2 Tim. 3:14-17; Yuda 3, 4.

10. Nihusiheryo taani nikina nnahuseryaahu orweela wa yeeyo Yesu aalonceiye ntakhara miloko so Perkamu ni Tiyatira?

¹⁰ Nnaphwanela okhooca mukhalelo ori  woothene wa mararuwo. Naakhalawo nlelo nikacamiho nikina o Perkamu ni o Tiyatira. Yesu aahaathoriha akina a mmiloko seiho nthowa na opaka mararuwo. (Wup. 2:14, 20) Tiheeni nnahuseryaahuvo? Nihuupuwele wi Yehova onahaala onilevelela ni mukhalelo ori woothene wa mararuwo nnapakaahu, naamwi nimurumeenle yoowo mu iyaakha sincipale nave tho naamwi nrino mirici mincipale. (1 Sam. 15:22; 1 Ped. 2:16) Owo onaweherya wi ntitelele opharihela meecelo awe avasulu moohipwacha mukhalelo meecelo a elapo yeela anananraaya.—Éfe. 6:11-13.

11. Tiheeni nihusenryaahu ophiyerya vaavaa? (Moone tho ekaaxa “ Mahusiheryo wa Hiyo Olelo.”)

¹¹ Mmukhalelo taani nneeraahu nipake mukwasu wa yeeyo nihusenryaahu ophiyerya vaavaa? Nohoona ochuneya waya weeriha wi malapelo ahu ekhale aweemereryiwa ni Yehova. Waakhanle wi ninnapaka echu yeeyo yaahaala weeriha wi malapelo ahu eheemereryiwe, nnaphwanela weeravo echu mwawaakuveya wi nrehererye ichu. (Wup. 2:5, 16; 3:3, 16) Nyenya Yesu ooloca echu ekina mu michaka sawe ntakhara miloko. Echu taani yeeyo?

12. Tiheeni nnahuseryaahu orweela wa michaka sa Yesu wa anna o Esmirna ni Filadélfia?

¹² Hankooni nthokororye michaka sa Yesu ntakhara miloko sa Esmirna ni Filadélfia. Owo aahiloca wa Akristu wi awo hiyaaphwanela woova wiikariwa, woona wi ororomeleya waya waahaala okhalano nchuwelo. (Mwaalakhanye Wupulula 2:10; 3:10) Tiheeni nnahuseryaahuvo olelo? Nnaphwanela oweherya wiikariwa ni okhala ooreheryeya wi nivilele. (Mat. 24:9, 13; 2 Kor. 12:10) Ntakhara heeni olopola yoola ti woochuneya?

13-14. Saweereya sinalociwa mu Wupulula ekapitulu 12 sinaavolowela hai achu a Muluku?

¹³ Liivuru a Wupulula onnanleela wi achu a Muluku yaahaala wiikariwaka mmahiku ahu—“nihiku na Apwiya.” Wupulula ekapitulu 12 onnaloca wi Yesu amaanle okhala Mwene moohilekela yaapacerya ekhoco wirimu. Mikayeli yoowo ori Yesu Kristu—ni anakhoco awe yaawana ni Satana vamoha ni masololo. (Wup. 12:7, 8) Ntoko yookhumelela, amwiicani a Muluku yaavoothiwa nave yaavonyeryiwa veelaponi yavathi, eruuha makacamiho mancipale veelaponi ni wa achu yaawo anakhalamo. (Wup. 12:9, 12) Nyenya tiheeni yeeren’ye wa achu a Muluku nthowa na yeela?

¹⁴ Wupulula onnanleela ti mwawiihai Satana aakhanleiye. Owo haanono owerya wa oya wirimu, mwawiihiiha onnatikitherya owali awe wa Akristu oothanliwa ahanle, yaawo aneemelela Omwene wa Muluku veelaponi  yavathi ni “emweerelaka onamoona Yeesu.” (Wup. 12:17; 2 Kor. 5:20; Éfe. 6:19, 20) Yooloherya ela enaakhwanela hai?

15. Taani yaaweemelela ‘anamoona eeli’ analociwa mu Wupulula ekapitulu 11, nave tiheeni yeeren’ye ni yaawo?

¹⁵ Satana aaheeriha wi amwiicani a Muluku yaahiphele anna oothanliwa yaawo yaahoolela muteko woolaleerya michaka sa Omwene. Achu yaawo anaweemelela ‘anamoona eeli’ analociwa mu liivuru a Wupulula yaahaala wiiphiwa. * (Wup. 11:3, 7-11) Mu 1918, anna yaawo yaahoolela mmareheryo yaahootheryiwa, ethorihiwa wi aakhalano nthowa nave elakeleliwa wi ewaleliwe mu elukuluku yincipale. Mmoonelo wa achu, waakhala ntoko wi muteko wa oothanliwa yaale “waakhwa.”

16. Echu taani yoohiwehereryeya yeeren’ye mu 1919, nyenya tiheeni Satana onatiteleleiye weera ovinyerya elukuluku yeele?

¹⁶ Yooloherya ya Wupulula ekapitulu 11 ennaloca tho wi ‘anamoona eeli’ yaahaala oviihiwa mookhwani emanle elukuluku vakhaani. Yooloherya yeela yaahaakhwanela mmukhalelo wootikhiniha ehimanle eyaakha ovinyerya vaavaa anna yaale yaawaleliwaaya. Mu Marsu a 1919, anna yaala oothanliwa yaataphuliwa nave voocharela matorokelo yaapacerya. Anna mwawaakuveya yaapacerya ohoolela wanaawiili muteko woolaleerya ni ohusiha. Nyenya eyo hiyaamuhiinhe Satana waahiphela achu a Muluku. Ovinyerya elukuluku yeele, Satana onnatannya “muhice” wa owiikara achu oothene a Muluku. (Wup. 12:15) Mweeparipari, “vaavanto tonooneyaayavo ovilela ni nroromelo” wa mmoha ti mmoha a hiyo.—Wup. 13:10.

17. Nikhaviheryo taani achu a Muluku anaakhelaaya, naamwi Satana aahiphelaka?

¹⁷ Wupulula ekapitulu 12 onnaloca wi achu a Muluku yaahaala waakhela nikhaviheryo noohiwehereryeya. Ela yaahaala weereya vaavaa “elapo” yaahaalaaya omirya “muhice” wa wiikariwa. (Wup. 12:16) Ela ti yeeyo yeeren’ye chiryene. Ikwaha ikina, ichu seiho sinapaka makupa a elapo ya Satana, ntoko athoriha, annawoopola achu a Muluku. Mu ikwaha sincipale, alapeli a Yehova aavootha milacu seiho saavanhe awo otaphuwa wammoori. Ti mwawiihai awo anapharihelaaya otaphuwa yoola? Awo annapharihela elukuluku yeela mwa miruku wi ephare muteko yoowo Yehova  aavanheiye. (1 Kor. 16:9) Muteko yoola onaphitaanyerya eheeni?

18. Tuuvi ori muteko ahu woochuneyaxa mmahiku yaala ookuchula?

¹⁸ Yesu aaloherya wi achu awe yaahaala olaleya ‘michaka yaphaama ya Omwene wa [Muluku]’ orukurerya elapo, makuchuwelo ehaakumve ophiya. (Mat. 24:14) Vaavaa analaleeryaaya, awo annaakhela nikhaviheryo orweela wa munkeelo, naari nikhuuru na ankeelo, anatharihiwa ntoko arinono “michaka yaphaama yoohimala yoovuwiha veelaponi yoothene ya vathi, wa ilapo, wa mahimo, wa ilocelo ni wa maloko.”—Wup. 14:6.

19. Muchaka taani mukina achu yaawo anamusivela Yehova anaphwanelaaya olaleerya?

¹⁹ Muchaka waphaama wa Omwene tahi muchaka mmoha pahiru yoowo achu a Muluku anaphwanelaaya olaleerya. Awo tho anaphwanela okhaviherya muteko wa ankeelo yaawo analociwa mu Wupulula ekapitulu 8 ophiyerya 10. Ankeelo yaala analaleya ipahu sincipale seiho sinahaala waavolowela achu yaale anakhooca Omwene wa Muluku. Mwawiihiiha, Anamoona a Yehova annalaleerya muchaka onalikanyihiwa ni “maralala ni mooro,” nave onathariha sa othoriha wa Muluku wa makupa oohiyanahiyana a elapo yeela yoonanara ya Satana. (Wup. 8:7, 13) Achu anaphwanela osuwela wi makuchuwelo ahaacamela, mwawiihiiha ananwerya opaka matorokelo mwawaakuveya mu ikumi saya wi ekophole mu nihiku na esara ya Yehova. (Sof. 2:2, 3) Nyenya muchaka yoola tahi wawunlaana. Onahaala ochuneya olipa murima wi naaleele akina muchaka yoola. Variyari va yoohooxa etokotoko, muchaka woothoriha wookuchula onahaala okhala wooluluwanya.—Wup. 16:21.

20. Tiheeni nnahaalaahu othokororya mmiyaha miili inacharela?

²⁰ Mweeparipari hiyaano nnaphwanela wiiwelela ‘masu a miririmu’ nthowa nawi ninnapaka makupa mu waakhwanela wa yeeyo nnaalakhanyaahu mu liivuru a Wupulula. (Wup. 1:3) Nyenya nni niwerye hai ovilela moororomeleya wiikariwa ni otitelela olaleerya muchaka yoola moolipa murima? Hiyaano nnanwerya okhala oolipa moorweela wa ichu piili: yoopacerya, moorweela wa yeeyo liivuru a Wupulula onaloceiye vooloca sa amwiicani a Muluku ni yanaawiili moorweela wa mareeliho yaawo nnahaalaahu waakhela omwaahiyu wakhala wi nootitelela okhala oororomeleya. Nnahaala othokororya ichu seiha mmiyaha miili inacharela.