MWAHA WOOHUSERYA 22
Miruku wi Ihooleleke Ikumi Sahu
“Apwiya [Yehova] tanavaha miruku.”—MASI. 2:6.
NCIPO 89 Nwiriyane, Mwiiwelele wi Mphwanye Mareeliho
YEEYO NNAHAALAAHU OHUSERYA *
1. Ntakhara heeni oothene ahu ninnachuna miruku sa Muluku? (Masiposipo 4:7)
WAAKHANLE wi mohintoko opaka yoolakelela yoochuneyaxa, moohikhwa minikwa nyuwaano mwaavekela mvekaka miruku woona wi mwaanasuwela wi mwaaphwanela weerano yeeyo. (Tiy. 1:5) Mwene Soolomoni aarepa: “Miruku echu yoopacerya.” (Mwaalakhanye Masiposipo 4:7.) Mweeparipari Soolomoni haaloca miruku vyakala. Owo aaloca miruku sinarweela wa Yehova Muluku. (Masi. 2:6) Nyenya apwanne okhalano miruku soorweela wa Muluku onanwerya onikhaviherya ovootha makacamiho oohiyanahiyana nnahoolelaahu olelo? Aai onanwerya, ntoko nnahaalaahu woona mmwaha yoola.
2. Tuuvi ori mukhalelo mmoha nneeraahu nikhale amirukuxa?
2 Mukhalelo mmoha wa okhalano miruku seeparipari ori moorweela wa ohuserya ni opharihela mahusiheryo a alopwana eeli yaawo yaari amirukuxa. Woopaceryani, nnahaala othokororya vooloca sa Soolomoni. Piipiliya onnaloca wi “Muluku aamvaha Soolomoni miruku, oroora otokotokosha ni murima woosuwelasha wawaaca.” (1 Mam. 5:9; 4:29, TNM) Yanaawiili, nnahaala othokororya sa Yesu yoowo aari amirukusa waapwaha achu oothene ekhanle. (Mat. 12:42) Vooloca sa Yesu, yaaloheryiwa: “Munepa wa Apwiya onamwiichaala mwa yoowo; munepa wa miruku ni woosuwelasha.”—Isa. 11:2.
3. Tiheeni nnahaalaahu othokororya mmwaha yoola?
3 Epharihelaka miruku yaavahiwaaya ti Muluku, Soolomoni ni Yesu aavaha ikano soophara muteko mmiyaha seiho inanivolowela oothene ahu. Mmwaha yoola, nnahaala othokororya raru sa seiho: Ochuneya waya okhalano moonelo woophimelela vooloca sa ikhorowa, muteko wa mulaponi ni hiyo mukhatiihu.
MOONELO WOOPHIMELELA VOOLOCA SA IKHOROWA
4. Ti mwawihai sookhalano sa Soolomoni saaraaya soohiyana ni sa Yesu?
4 Soolomoni ari ooreelaxa, nave aakhala mu empa yaphaama ni yookhapeleleya. (1 Mam. 10:7, 14, 15) Moohiyana, Yesu haarino ichu sincipale, nave haarino empa. (Mat. 8:20) Nyenya ooweeli yaahikhalano moonelo woophimelela vooloca sa ichu soomwiilini woona wi miruku saya saarweela wa Yehova Muluku.
5. Moonelo taani woophimelela vooloca sa ikhorowa Soolomoni areiyeno?
5 Soolomoni aanasuwela wi ikhorowa ‘sinnaakiha.’ (Ekle. 7:12) Ni ikhorowa, nnanwerya okula ichu soochuneyaxa mu okumi ahu nave akhweya tho ikina seiyo nnachunaahu. Nyenya naamwi Soolomoni aari ooreelaxa, owo aahiiwexexa wi sahikhalavo ichu ikina saari soochuneyaxa opwaha ikhorowa. Ntoko yootakiherya, owo orepa: “Muthanle ovuwa waphaama opwaha muhakhu muncipale.” (Masi. 22:1) Soolomoni aahoona wi achu yaale anasiveliwano ikhorowa hanahakalala ni ichu seiyo eryaayano. (Ekle. 5:10, 12) Nave owo aahilopola wi hannaphwanela wuupuwela we ikhorowa echu yoochuneyaxa, woona wi moohipwacha waaca wa ikhorowa nryaahuno iho inanwerya ocakanela mwawaakuveya.—Masi. 23:4, 5.
Apwanne moonelo ahu vooloca sa ichu soomwiilini onnanihiiha okuha ichu sa Omwene mu nipuro noopacerya mu okumi ahu? (Moone iparakrafo 6-7) *
6. Moonelo taani woophimelela Yesu aareiyeno vooloca sa ichu soomwiilini? (Mateu 6:31-33)
6 Yesu ahikhalano moonelo woophimelela vooloca sa ichu soomwiilini. Owo aanapuha soolya vamoha ni soowurya. (Luka 19:2, 6, 7) Mu ekwaha emoha, owo aahimpaka viinyu aphaamaxa—yootikhiniha awe yoopacerya wa sootikhiniha sawe. (Yoh. 2:10, 11) Nave mu nihiku aakhwileiye, owo aawanre yoowara yoowalamela. (Yoh. 19:23, 24) Nyenya Yesu heemerenrye wi okumi awe otikitheryeye mu ichu soomwiilini. Owo aaloca wa oomuchara awe: “Kapuro hanawerya waalapa asaapwiya eeli . . . Nyuwo hamunawerya omulapa Muluku ni olapa muhakhu.” (Mat. 6:24) Yesu oohusiha wi wakhala wi nookuha Omwene wa Muluku mu nipuro noopacerya, Yehova onahaala onivaha seiho inanthowa.—Mwaalakhanye Mateu 6:31-33.
7. Ti mwawihai munna mmoha ophunreiye moorweela wa okhalano moonelo woophimelela vooloca sa ikhorowa?
7 Anna ni arokora ahu ancipale aaphura orweela wa opharihela miruku sa Yehova vooloca sa ikhorowa. Muthokororye yootakiherya ya munna ori muciye awiichaniwa Daniel. Owo ooloca: “Mu iyaakha saka soomiravo, kaahilakelela wi ichu soomunepani ikhale soochuneyaxa mu okumi aka.” Moorweela wa okhweiha okumi awe, Daniel aahiwerya opharihela elukuluku ni mavyakelo awe mmiteko soomuluku. Owo onnaaceererya: “Oloca eparipari nkaanono ekeerelani wa nthowa na yoolakelela yeeyo kaapankaaka. Mweeparipari, kaahaala ophwanya ikhorowa sincipale waakhanle wi kaahipaka eyo okhala echu yoochuneyaxa mu okumi aka. Nyenya nkaahaala okhalano asinthamwene aphaama yaawo kiryaakano hiihaano. Ti mwawihai kaahaalaka oraceeliha ohakalala kiryaakano moorweela wa osuwela wi kinnakuha Omwene mu nipuro noopacerya? Hiwaavo waaca wa ikhorowa waahaala olikana ni mareeliho yaawo Yehova okivanheiye.” Mweeparipari, hiyaano ninnaphura vaavaa nnatikitheryeyaahu mu ichu soomunepani ohiya mu ikhorowa.
MOONELO WOOPHIMELELA VOOLOCA SA MUTEKO WA MULAPONI
8. Nnasuwela hai wi Soolomoni aakhalano moonelo woophimelela vooloca sa muteko? (Eklesiyaste 5:18, 19)
8 Soolomoni aaloca wi olapa muteko mwakuru onanwerya omuruuhela muchu ohakalala wawaaca. Owo aahiichana eyo ntoko “yoovaha ya Muluku.” (Mwaalakhanye Eklesiyaste 5:18, 19.) Owo oorepa: “Muteko woothene woowalamela tonaphuriha echu.” (Masi. 14:23) Soolomoni aanasuwela yeeyo aaloceiye. Owo aanalapa moowetha! Owo aahiteka ipa, aahaala miri sa sawiima, aalima imaca sa ithutu nave aahipaka machiya a maahi. Owo tho aahiteka ipooma. (1 Mam. 9:19; Ekle. 2:4-6) Owo waari muteko wakuru nave moohikhwa minikwa waanamuhakalaliha. Nyenya ohakalala wa Soolomoni hiwaarweela pahiru wa miteko seiho. Owo tho aanapaka ichu sincipale ntakhara Yehova. Ntoko yootakiherya, owo aahoolela otekiwa wa empa yoocicimiheya ntakhara malapelo a Yehova—muteko yoowo waamalinhe iyaakha thanu napiili! (1 Mam. 6:38; 9:1) Amanle opaka ichu sincipale soohiyanahiyana, owo ahiiwexexa wi echu yoochuneyaxa muchu onaphwaneleiye weera ori omurumeela Yehova. Owo oorepa: “Wa soothene ilociwe, yookhweleyasha tiila: Omoova Muluku ni ochariha malamulo awe.”—Ekle. 12:13.
9. Ti mwawihai Yesu aakuheiye muteko awe wa mulaponi mu nipuro noophwanelela?
9 Yesu aanalapa moowetha. Mu iyaakha sawe soopacerya veelaponi yavathi, owo aalapa ntoko karpintero. (Mar. 6:3) Moohikhwa minikwa asitiithi awe yaanathamalela nikhaviheryo nawe vaavaa awo yeereryaaya olapa moowetha wi ekhwaaniherye soothowa sa va emusi aya yeeyo yaari etokweene. Yesu aari ophaameya nave aanawerya opaka muteko waphaama, mwa yeeyo ti yawooneya wi achu ancipale yaanasiveliwa ni muteko awe! Yesu aanasiveliwa vancipale ni muteko awe. Nyenya naamwi owo aalapa moowetha mmuteko awe wa mulaponi, Yesu aaniivaha elukuluku ntakhara ichu soomunepani. (Yoh. 7:15) Ohoolo waya, ntoko mulaleeryi a elukuluku yoothene, owo aahaavaha ekano yaawo yaanwiriyana: “Mphareke muteko, nto ohikhale wa yoolya yeeyo enuuca, okhale wa yoolya enalekela ophiyerya wookumini woohimala.” (Yoh. 6:27) Mmwaha awe wa Vamwaakoni, Yesu aaloca: “Nyuwo muthukumanyeke muhakhu wirimu.”—Mat. 6:20.
Nni niwerye hai otitelela okhala oophimelela variyari va muteko wa mulaponi ni miteko soomuluku? (Moone iparakrafo 10-11) *
10. Makacamiho taani akina anahoolelaaya omutekoni?
10 Miruku soomuluku sinnanikhaviherya okhalano moonelo woophimelela vooloca sa muteko ahu wa mulaponi. Ntoko Akristu, ninnahusihiwa ‘olapa . . . , muteko waphaama.’ (Éfe. 4:28) Vaavaa mapatarawu ahu anoonaaya wi naachu oororomeleya nave ninnalapa moowetha awo ananwerya oloca wi annavaha esisapo mukhalelo nnalapaahu. Ni mathowa aphaama, nnanwerya opacerya olapaka iwora sincipale wi niweerihe mapatarawu ahu okhalano moonelo woophwanelela vooloca sa Anamoona a Yehova. Nyenya wakhala wi noheerano yeela, nnanwerya ohikhalakano elukuluku ya okhala vamoha ni emusi ahu naari opaka ichu ikina ntakhara Yehova. Nnaphwanela opaka matorokelo wi nikhale oophimelela.
11. Tiheeni munna mmoha ohusenreiye sa okhalano moonelo woophimelela vooloca sa muteko?
11 Munna yoowo ori mmiravo oniichaniwa William, oohuserya orweela wa mutokweene yoowo aamulapeiye khalai, ochuneya waya okhalano moonelo woophimelela vooloca sa muteko wa mulaponi. William ooloca: “[Munna yoola] yootakiherya yaphaamaxa vooloca sa muchu yoowo ori oophimelela ni muteko awe. Owo aanalapa moowetha, nave aakhalano onthamwene waphaamaxa ni makiliyenti awe nthowa na muteko awe waphaama. Nyenya omakuchuwelo wa nihiku, nlelo nrikimulapa, owo aanahiya muteko awe nave aanatikitheryeya wa emusi awe ni malapelo awe ntakhara Yehova. Nave moosuwela? Owo mmoha a achu oohakalala kaasuwenlaaka!” *
OKHALA OOPHIMELELA NI NYUWO MUKHATIINYU
12. Ti mwawiihai Soolomoni oonihenryeiye wi aahikhalano moonelo woophimelela vooloca sa yene mukhateiye, nyenya ti mwawiihai owo aayeleenleiye?
12 Vaavaa aareiye mulapeli oororomeleya a Yehova, Soolomoni aari oophimelela wa yene mukhateiye. Vaavaa aareiye mmiravo, mwawiiyeviha owo aasuwela okotakota wawe nave aahiveka ohoolela wa Yehova. (1 Mam. 3:7-9) Omapacereryo wa olamulelo awe, Soolomoni aanasuwela yawoopiha ya okhala awiirumiha. Owo oorepa: “Wiisoona, ohaawiha; wiisinnuwiha, wuuwiha.” (Masi. 16:18) Moothananiha, ohoolo waya, Soolomoni haapharihenle malakiheryo awe. Mweelukuluku ekina mu olamulelo awe, owo mwawiirumiha haacharinhe sooleeliherya sa Muluku. Ntoko yootakiherya, nimoha na malamulo naaloca wi Mwene yoowo ori Muhepri haaphwanela ‘watxano athiyana, wi murima awe ohirakamele w’Apwiya.’ (Malam. 17:17, BNM) Soolomoni hiiwelenle nlamulo nenla nave aahaathela athiyana 700 ni asimpwana 300, ancipale a yaawo yaari amalapo! (1 Mam. 11:1-3) Akhweya Soolomoni uupuwela wi hinaari nikacamiho. Moohipwacha mathowa ene, mweelukuluku aya, Soolomoni aahihoolela sookhumelela soowaawa nthowa na ohimwiiwelela Yehova.—1 Mam. 11:9-13.
13. Tiheeni nnaweryaahu ohuserya vaavaa nnuupuwelelaahu mukhalelo wa wiiyeviha wa Yesu?
13 Yesu aatitelela okhalano moonelo woophimelela ni wawiiyeviha wa yene mukhateiye. Yesu ahaakumve orwa veelaponi yavathi, owo aapaka miteko sincipale sootikhiniha amurumeelaka Yehova. Moorweela wa Yesu, “soothene saapatushiwa mwa yoowo, sa wirimu ni sa veelaponi ya vathi.” (Kol. 1:16) Mu opatiso awe, Yesu mwawooneya aahuupuwelela ichu seiyo aakhwaanihenreiye vaavaa aareiye ni Atiithi awe. (Mat. 3:16; Yoh. 17:5) Nyenya masuwelelo yaawo hiyaamweerinhe Yesu okhala awiirumiha. Moohiyana, owo hintonko wiisoona okhala oochuneyaxa waapwaha akina. Owo aahaaleela oohuserya awe wi, “haarweele olampwa, nto waalapela achu ni ovaha okumi awe wi awoopole ancipale.” (Mat. 20:28) Owo tho mwawiiyeviha aaheemererya wi soothene aapakeiye, haapaka mwa yoowo mukhateiye. (Yoh. 5:19) Yesu aari awiiyeviha chiryene! Owo oonivaha yootakiherya yaphaama wi nichareke.
14. Tiheeni nnahuseryaahuvo orweela wa Yesu vooloca sa okhalano moonelo woophwanelela wa hiyo mukhatiihu?
14 Yesu aahaahusiha oomuchara awe okhalano moonelo woophwanelela vooloca sa yaawo mukhataaya. Mu ekwaha emoha, Yesu aahaaleela ariki: “Miihi oothene a mmuruni mwanyu ahaalakhanyiwa.” (Mat. 10:30) Masu yaala annanilipiha vancipale, xaxaxa wakhala wi noopacerya okhalano moonelo woohiphwanelela vooloca sa hiyo mukhatiihu. Ela enataphulela wi Tiithi ahu a wirimu onnanthokororya vancipale—wi hiyo nri asisapo vamiithoni vawe. Nihirwe nichune waakaaha othoriha wa Yehova moorweela wa ophiyerya makuchuwelo awi hanri oophwanelela okhala alapeli awe naari waakhela ekumi mu elapo awe evyaani.
Okhalano moonelo woohiphimelela wa hiyo mukhatiihu oni oniyeleelihe ikari taani ni mareeliho taani? (Moone eparakrafo 15) *
15. (1) Moonelo taani woophimelela vooloca sa hiyaano mukhatiihu Mulipeleli olonceiye nnaphwanelaahu wunnuwiha? (2) Ntoko enooniheryaaya eruku va epaaxina 24, wakhala wi nootikitheryeya wa hiyo mukhatiihu, mareeliho taani nnahaalaahu oyeleela?
15 Iyaakha 15 ivirale, Mulipeleli aahiceenyerya ochuneya waya okhalano moonelo woophwanelela vooloca sa hiyo mukhatiihu: “Mweeparipari hiyo hannaphwanela wuupuwelakaxa sa hiyo mukhatiihu ophiyerya okhala achu awiirumiha. Nyenya tho hannaphwanela wuupuwela wi naachu akhaanixa ophiyerya wiisoona wi naachu oonanara. Ohiya yeeyo, nnaphwanela weererya okhalano moonelo woophwanelela vooloca sa hiyo mukhatiihu, eyo enataphulela wi nnaphwanela osuwela owerya wahu ni okotakota wahu. Muthiyana yoowo ori Mukristu ooloca yeela mmukhalelo ola: ‘Miyaano tahi wi ka muchu oonanaraxa, nave tho tahi wi ka muchu aphaamaxa wa akina. Kookhalano makupa oomeeli aphaama ni oonanara, hiiha ntoko akina.’” * Ninnawerya woona mookwakwaleya ntakhara heeni oryaaya waphaama okhalano moonelo woophimelela vooloca sa hiyaano mukhatiihu.
16. Ntakhara heeni Yehova onanivaheiye ohoolela wa miruku?
16 Orweela Mmasu awe, Yehova onnanivaha ohoolela wamiruku. Owo onnanisivela, nave onachuna wi nikhaleke oohakalala. (Isa. 48:17, 18) Yoolakelela yaphaama nnaphwanelaahu opaka, navetho yeeyo enahaala onruuhela ohakalala weeparipari, ori otitelela weera ichu seiho inamuhakalaliha Yehova. Wakhala wi noheerano yeela, nnahaala osepa makacamiho mancipale yaawo akina ahoolenlaaya nthowa na otikitheryeyaxa mu ikhorowa, muteko wa mulaponi naari wa yaawo mukhataaya. Mmoha ti mmoha a hiyo onanwerya olakelela okhala a miruku ni ohakalaliha murima wa Yehova!—Masi. 23:15.
NCIPO 94 Othamalela Masu a Muluku
^ Soolomoni ni Yesu yaakhalano miruku sincipale. Yehova Muluku taari Ehime ya miruku saya. Mmwaha yoola, nnahaala woona yeeyo nnaweryaahu ohuserya orweela wa ikano sooveereliwa sivahiwe ni Soolomoni ni Yesu vooloca sa okhalano moonelo woophimelela vooloca sa ikhorowa, muteko wa mulaponi ni wa hiyaano mukhatiihu. Nnahaala tho woona mukhalelo anna ni arokora ahu akina aphunryaaya moorweela wa opharihela ikano inaphwanyeya Mpiipiliyani mmikhalelo seiha.
^ Moone mwaha “Como gostar do seu trabalho” mu Mulipeleli a 1 a Fevereru a 2015 (a Ekunya).
^ Moone mwaha “A Bíblia pode ajuda-lo a encontrar alegria” mu Mulipeleli a 1 a Akostu a 2005 (a Ekunya).
^ ERUKU VA EPAAXINA: John ni Tom anna yaawo ari amiravo anakhala muloko mmoha. John onnamaliha elukuluku yincipale akhapelelaka ekaaro awe. Tom onnapharihela ekaaro awe wi aakhaviherye akina oya mmuteko woolaleerya ni ophwanyeya mmithukumano sa muloko.
^ ERUKU VA EPAAXINA: John alapaka iwora sawaaceererya. Owo hanachuna waahiciha apatarau awe. Mwawiihiiha naamwi apatarau awe emveske wi alape iwora sawaaceererya, John onneemererya. Mu ohiyu yoole, Tom, yoowo ori murummwa oorumeela, onnamuhoola mutokweene mu oxekurya wookukhula. Khalai, Tom aahaaleela apatarau awe wi aahaala opharihelaka ohiyu okina variyari va esumana wi amurumeele Yehova, mwawiihiiha haahaala oweryaka olapa mu ilukuluku seiha.
^ ERUKU VA EPAAXINA: John onatikitheryeya mwa yoowo mukhateiye. Tom, onnamukuha Yehova mu nipuro noopacerya mu okumi awe. Nave ntoko yookhumelela onnaapaka asinthamwene ancipale avyaani vaavaa onakhaviheryeiye orehereryiwa wa Nipuro na Muthukumano.
