1. Yoolakelela taani yoochuneya achu oothene anaphwanelaaya opaka?

 ACHU oothene olelo aakhalano yoolakelela yoochuneya anaphwanelaaya opaka. Apwanne awo anahaala omukhaviherya Yehova Muluku yoowo ori Mulamuleli a elapo yoothene, naari anahaala omukhaviherya mwiicani oonanara murima, Satana Musaserya? Muchu ori oothene onanwerya othanla nikupa onaphwaneleiye okhalavo ni ohititelela opaka makupa a elapo. Nyenya yoolakelela ela awo anapakaaya enahaala ovolowela omwaahiyu aya. (Mat. 25:31-33, 46) Variyari va “yohósha etokotoko,” awo anahaala weeyeriwa eneneeryo waakhanle wi anahaala ovuluxiwa naari otoloxiwa.—Wup. 7:14, NN; 14:9-11; Ezek. 9:4, 6.

2. (1) Tiheeni Ahebri 10:35-39 onanceenyeryeiye opaka? (2) Ti mwawiihai liivuru a Wupulula onahaaleiye onikhaviherya?

² Mwaalakhanye Ahebri 10:35-39. Waakhanle wi moothanla okhaviherya olamulelo wa Yehova, nyuwaano moopaka yoolakelela ya miruku. Vano munnachuna waakhaviherya akina opaka yoothanla yoophwanelela. Nyuwaano munanwerya opharihela yooleeliherya ya liivuru a Wupulula wi mwaakhaviherye yaawo. Liivuru yoola onnooniherya yeeyo enahaala weereya ni yaale anamwaakaaha Yehova, nyenya tho onnooniherya mareeliho mancipale anoorwa ntakhara yaale anakhaviherya olamulelo awe moororomeleya. Hiyaano nnamweerano phaama othokororya eparipari yeela yoochuneya. Wakhala wi noheerano yeela nnahaala olipiha yoolakelela ahu ya otitelela omurumeela Yehova. Mwawaaceererya, nnaphwanela opharihela yeeyo nihusenryaahu wi naakhaviherye akina olakelela omurumeela Yehova ni otitelela omurumeela yoowo.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya makoho ala: Tiheeni enahaala weereya ni yaale anakhaviherya olamulelo wa Muluku? Mmakupa makina, tiheeni enahaala weereya ni yaale  anathanla omukhaviherya mwaaxinama oophilivila, yoowo onatharihiwa mu liivuru a Wupulula?

4. Nikhuuru taani Yohani oonneiye nri ni Yesu wirimu?

⁴ Mu yawoona, murummwa Yohani aahoona makhuuru meeli yaawo anakhaviherya olamulelo wa Yehova ni yaakhelaka mareeliho a okumi woohimala. Nikhuuru noopacerya ti na achu 144.000. (Wup. 7:4) Awo athanliwe veelaponi ya vathi wi yapake makupa mu olamulelo naari Omwene ni Yesu wirimu. Vamoha ni yoowo, awo anahaala olamulela elapo ya vathi. (Wup. 5:9, 10; 14:3, 4) Mu yawoona yeela, Yohani aawoona awo yeemenle ni Yesu va Mwaako Siyoni wirimu.—Wup. 14:1.

5. Tiheeni enahaala weereya moohilekela ni oothanliwa yaawo nivano ahanle veelaponi yavathi?

⁵ Ovinyerya elukuluku ya arummwa ophiyerya hiihaano, macikhwi a achu annathanliwa wi epake makupa a 144.000. (Luka 12:32; Aro. 8:17) Nyenya, Yohani aaloca wi yaawo ahanle, naari wi oothanliwa a vakhaani, yaahaala okhala veelaponi yavathi variyari va mahiku ookuchula. Yaale ‘ahanle’ anahaala waakhela “eneneeryo” yookuchula ya weemereryiwa ni Yehova ehaakumve opacerya yoohoosa etokotoko. (Wup. 7:2, 3; 12:17) Elukuluku vakhaani variyari va yoohoosa etokotoko, oothanliwa yaale ahanle anahaala okerihiwa wirimu wi yapwexeheryane ni akina a 144.000, yaawo akhwile moororomeleya. Awo anahaala opacerya olamulela ni Yesu mu Omwene wa Muluku.—Mat. 24:31; Wup. 5:9, 10

6-7. (1) Nikhuuru taani Yohani oonneiye voocharela, nave tiheeni nnahuseryaahu orweela wa nenlo? (2) Ntakhara heeni Wupulula ekapitulu 7 eryaaya yoochuneya wa makhuuru oomeeli, oothanliwa ahanle veelaponi ya vathi ni “mucici muncipale?”

⁶ Amanle woona nikhuuru nnaya wirimu, Yohani aahoona “mucici muncipale.” Moohiyana ni a 144.000, nikhuuru nenla naari noohaalakhanyeya. (Wup. 7:9, 10) Tiheeni nnahuseryaahu vooloca sa yaawo? Yohani ooloca: “Ala, ti yaawo avinre mmakacamiho matokotoko, evasa soowara saya, yiiseeliha mu nikhamini na Epucepuche.” (Wup. 7:14) Omanle okophola mu yoohoosa etokotoko, “mucici muncipale” yoola onahaala okhala veelaponi yavathi ni opuha mareeliho ootikhiniha.—Sal. 37:9-11, 27-29; Masi. 2:21, 22; Wup. 7:16, 17.

⁷ Moohipwacha waakhanle wi noothanliwa wi nakhaleke wirimu naari veelaponi yavathi, apwanne ninnawerya wiisaanyiherya mu otharihiwa onalociwa mu liivuru a Wupulula ekapitulu 7? Nnaphwanela wiisaanyiherya. Ela enahaala okhala elukuluku yoohakalaliha wa makhuuru oomeeli a alapeli a Muluku! Hiyaano nnahaala ohakalala vancipale nthowa na othanla okhaviherya olamulelo wa Yehova. Echu taani ekina liivuru a Wupulula onanleeleiye vooloca sa yoohoosa etokotoko?—Mat. 24:21.

8. Yoohoosa etokotoko eni epacerye hai, nave enahaala waavolowela hai achu?

⁸ Ntoko etharihiwaaya mmwaha ovirale, alamuleli a epoliitika a elapo yeela moohilekela anahaala omuhiphela Papulu Mutokotoko, malapelo oothene atheru a elapo yeela. (Wup. 17:16, 17) Yaweereya yeela enahaala okhala mapacereryo a yoohoosa etokotoko. Nyenya apwanne ela enahaala weeriha wi achu ancipale epacerye omurumeela Yehova? Hooye. Moohiyana, Wupulula ekapitulu 6 onnooniherya wi elukuluku yeela, yaale ahinamulapela Yehova anahaala waavya okhapelela orweela wa ipoliitika ni marehereryo a nakoso a elapo yeela, yaawo analikanyihiwa ni miyaako. Mwawiihiiha yaale ahinakhaviherya Omwene wa Muluku, Yehova onahaala owoonaka ntoko amwiicani.—Luka 11:23; Wup. 6:15-17.

9. Ti mwawiihai achu a Yehova aneeraaya ekhale aweemeleleya variyari va yoohoosa etokotoko, nave ni yookhumelela taani?

 ⁹ Moohikhwa minikwa, alapeli oororomeleya a Yehova anahaala okhala aweemeleleya variyari va elukuluku yeeyo yookacamihaxa ya yoohoosa etokotoko. Awo anahaala okhala nikhuuru nimoha pahiru na achu nni nimulapeke Yehova Muluku veelaponi nave nni nikhooce okhaviherya “enama yawopiha.” (Wup. 13:14-17, BNM) Wanthowa na otitelela okhala oororomeleya wa Yehova, yaale anamwaakaaha Yehova anahaala onyeenyeya vancipale. Ntoko yookhumelela, nikhuuru na maloko nnahaala waahiphela achu a Muluku a veelaponi yoothene yavathi. Piipiliya oniichana ohiphela yoola ntoko ohiphela wa Koki a Makoki.—Ezek. 38:14-16.

10. Ntoko enalociwaaya mu Wupulula 19:19-21, ti mwawiihai Yehova onahaaleiye waakhulela ohipheliwa wa achu awe?

¹⁰ Yehova oni aakhulele hai ohiphela yoola? Owo onnanleela: “Kinamutepa onyènyeya.” (Ezek. 38:18, 21-23, BNM) Wupulula ekapitulu 19 onnathariha yeeyo enahaala weereya voocharela. Yehova onahaala omurumiha Mwanawe wi awaakihe achu awe ni waatoloxa amwiicani awe. “Anakhoco a wirimu,” yaawo ari ankeelo oororomeleya vamoha ni a 144.000, anahaala okhala vamoha ni Yesu wi ewane ni Koki a Makoki. (Wup. 17:14; 19:11-15) Teevi enahaala okhala yookhumelela ya ekhoco yeela? Achu oothene ni makhuuru yaawo anamwaakaaha Yehova anahaala otoloxiwa moomalela!—Mwaalakhanye Wupulula 19:19-21.

11. Yaweereya taani yavameekhaaya enahaala wooniherya waakhwaniheryeya wa liivuru a Wupulula?

¹¹ Mwaanyiherye mukhalelo achu oororomeleya veelaponi yavathi anahaalaaya wiisoona emanle ovuluxiwa mu otoloxiwa moomalela wa amwiicani a Muluku! Mweeparipari, ela enahaala okhala elukuluku yoohakalaliha! Naamwi ohaalaka okhalawo ohakalala wirimu vaavaa Papulu Mutokotoko oneereiye atoloxiwe, yookhalavo tho echu ekina yeeyo enahaala oruuhela ohakalala otokweene. (Wup. 19:1-3) Ela chiryene eni ekhale waakhwaniheryeya wa liivuru a Wupulula—“othela wa Epucepuche.”—Wup. 19:6-9.

12. Ntoko etharihiwaaya mu Wupulula 21:1, 2, othela wa Epucepuche onahaala weereya liini?

¹² Othela ola onaya weereya liini? A 144.000 oothene anahaala okhala wirimu ehaakumve owaniwa ekhoco ya Armaketo. Nyenya, ela tahi wi enahaala okhala elukuluku ya othela wa Epucepuche. (Mwaalakhanye Wupulula 21:1, 2.) Othela wa Epucepuche onahaala weereya emanle owaniwa ekhoco ya Armaketo nave amwiicani oothene a Muluku emanle otoloxiwa.—Sal. 45:3, 4, 13-17.

13. Othela wa Epucepuche onataphulela eheeni wa yaale anapaka makupa?

¹³ Othela wa Epucepuche onavolowela eheeni wa yaale anapaka makupa? Mweeparipari, hiihaa ntoko othela onaaphitaanyaaya mulopwana ni muthiyana, othela yoola woosiphela onahaala omphitaanya Mwene, Yesu Kristu, ni “mwali” awe, a 144.000. Yaweereya yeela yoochuneya enahaala otikitherya olamulelo ovyaani yoowo onahaala olamulela veelaponi yavathi mu iyaakha 1.000.—Wup. 20:6.

14-15. Wupulula ekapitulu 21 onaalikanyiha a 144.000 ni eheeni? (Moone eruku ya ekaapa.)

¹⁴ Voocharela, Wupulula ekapitulu 21 onnaalikanyiha a 144.000 ni epooma yooreeraxa eniichaniwa “Yerusalemu ahihano.” (Wup. 21:2, 9) Epooma yeela yaakhalano mathipelo a maluku 12 yaawo yaarempwe “masina a arummwa khumi neeli a Epucepuche.” Ntakhara heeni yawoona yeela yaaryaaya yoochuneya wa Yohani?  Nthowa nawi owo aahoona nsina nawe nrempwe va nluku nimoha na maluku yaale. Ela yaari ekari etokweene!—Wup. 21:10-14; Éfe. 2:20.

¹⁵ Epooma yeela yoosiphela henalikana ni epooma ekina. Eyo yaakhalano rampha yoowo aapakiwe ni ewooro yaphaama, milako 12, mukuso ni mathipelo a maluku oowalamela, nave yaaphwimmwe ni mphimo wawaakhwanela. (Wup. 21:15-21) Naamwiihiiha, Yohani aahoona wi yookhala echu yaahalela! Moone yeeyo Yohani onanleeleiye voocharela: “Mu epooma yeele nkoonneru nipuro naweela na Muluku, ntakhara Apwiya Muluku, mwaneene a ikuru soothesene vamoha ni Epucepuche tari nipuro naya naweela. Epooma yeele honakhweleyamo nsuwa nari mweeri wi imwaleelekemo. Tiwi ncicimiho na Muluku tinnamwaleelamo nave Epucepuche yeele ti muthuko ene.” (Wup. 21:22, 23) Yaale anapaka makupa a Yerusalemu ahiihaano anahaala okhalaka vamoha ni Yehova. (Ahe. 7:27; Wup. 22:3, 4) Mwawiihiiha, Yehova ni Yesu taari empa ya epooma yeeyo.

16. Tiheeni enahaala weereya ni achu variyari va Olamulelo wa Iyaakha 1.000 wa Omwene wa Muluku?

¹⁶ Oothanliwa annahakalala vaavaa anuupuwelaaya sa epooma yeela. Nyenya yaale arino ewehereryo ya okhala veelaponi yavathi aakhalano tho mathowa a ohakalala ni yeeyo. Variyari va olamulelo wa Iyaakha 1.000 mu Omwene wa Muluku, Yerusalemu ahiihaano onahaala oruuha mareeliho oohaalakhanyeya. Yohani aahoona mareeliho yaala ethekuwaka ntoko “muhice wa maahi ookumi.” Nave ikhopela soopiili sa muhice saakhalamo ‘miri sa okumi’ seiho saarino makukhu ‘a openushano maloko.’ (Wup. 22:1, 2) Voocharela achu oothene anahaala okhala mummo anahaala okhalano ekari ya opuha ichu soothene saphaama. Vakhaani-vakhaani, achu oothene yaale anamwiiwelela Yehova anahaala okhala oophaameya. Hokhalawo wiiceliwa, winla, ikucho ni othanana.—Wup. 21:3-5.

17. Ntoko yooniheryiwaaya mu Wupulula 20:11-13, taani onahaala ophura Olamulelo wa Iyaakha 1.000?

¹⁷ Taani anahaala ophura soovaha seiha sootikhiniha? Oopacerya wa yaawo, mucici muncipale yoowo onahaala ovuluwa mu Armaketo, ni anamwane yaawo anahaala oyariwa mu elapo evyaani. Nyenya Wupulula ekapitulu 20 onnaroromeliha tho wi yaale akhwile anahaala oviihiwa mookhwani. (Mwaalakhanye Wupulula 20:11-13.) Achu “ékhaikhai” yaale akhwile khalai ni achu “óhikhala ékhaikhai,” yaawo yahaarino ekari ya ohuserya vooloca sa Yehova, anahaala okookela okhalano okumi veelaponi yeela  yavathi. (Saw. 24:15, NN; Yoh. 5:28, 29) Apwanne ela enataphulela wi achu oothene anahaala oviihiwa mookhwani wi evahiwe ekumi veelaponi yavathi variyari va Olamulelo wa Iyaakha 1.000? Hooye. Oothene yaale yaakhooca ekari ya omurumeela Yehova ehaakumve okhwa, hanahaala oviihiwa mookhwani. Awo yaakhalano ekari nave yaahooniherya wi hanaphwanela okhala mu Parataiso veelaponi yavathi.—Mat. 25:46; 2 Tes. 1:9; Wup. 17:8; 20:15.

18. Achu enahaala okhala mmukhalelo taani omakuchuwelo wa iyaakha 1.000?

¹⁸ Omakuchuwelo wa iyaakha 1.000, oothene yaale anahaala okhalaka veelaponi yavathi anahaala okhala oophaameya. Haavo mmoharu mano onahaala ovoloweliwa ni yoocheka yeeyo aaramveiye orweela wa Atamu. (Aro. 5:12) Yoocheka yoothene nramvaahu orweela wa Atamu enahaala omalihiwa moomalela. Mmukhalelo yoola, yaawo eni ekhale veelaponi yavathi anahaala ‘okhalatho akumi’ ntoko achu oophaameya omakuchuwelo wa iyaakha 1.000.—Wup. 20:5, NN.

19. Ntakhara heeni oryaaya woochuneya ohoolela yaweeha yookuchula?

¹⁹ Hiyaano ninnasuwela wi Yesu aahititelela okhala oororomeleya wa Muluku naamwi Satana aamwenhe owo. Nyenya apwanne achu oothene oophaameya anahaala otitelela okhala oororomeleya wa Yehova vaavaa Satana onahaaleiye oweeha yaawo? Muchu ori oothene onahaala waakhula nikoho nenla mukhateiye vaavaa Satana onahaaleiye okumihiwa mukariposo omakuchuwelo wa iyaakha 1.000. (Wup. 20:7) Yaale anahaala okhala oororomeleya variyari va yaweeha yeela yookuchula anahaala waakhela okumi woohimala nave wookuchulani anahaala opuha otaphuwa weeparipari. (Aro. 8:21) Yaale anahaala omuchara Satana ni ommwareela Yehova, anahaala otoloxiwa okhala wookhala, vamoha ni Musaserya ni masololo awe.—Wup. 20:8-10.

20. Muniisoona hai vooloca sa sooloherya sootikhiniha seiho sinaphwanyeya mu liivuru a Wupulula?

²⁰ Muniisoona hai vaavaa nimanlaahu othokororya mukwasu yoola wa liivuru a Wupulula? Apwanne moosiveliwa wiisaanyiherya mu sooloherya seiha sootikhiniha? Apwanne ela henaweerihaani ochuna waawopa akina wi nikhale vamoha mmalapelo aweela a Muluku ahu? (Wup. 22:17) Vano nimanlaahu othokororya ichu seiha sinahaala weereya omwaahiyu, nri oohakalala nave ninnachuna oloca hiihaa ntoko murummwa Yohani aalonceiye: “Aamee. Rwaani, Apwiya Yeesu!”—Wup. 22:20.