1. Nikacamiho taani ancipale a hiyo nnahoolelaahu?

 APWANNE mootikitherya yoolakelela yoomunepani nyenya onakhala woovila waakhwaniherya yeeyo? b Waakhanle wi ela enneereya ni nyuwaano, hamuri mukhatiinyu. Ntoko yootakiherya, Filipi aanachuna orehererya mukhalelo wa mavekelo awe ni ovekelaka ikwaha sincipale, nyenya waanakhala woovila wa yoowo ophwanya elukuluku wi avekele. Erika aakhalano yoolakelela ya ophiya woosiilo ene mmuthukumano ntakhara muteko woolaleerya; nyenya naamwi hiihaa, owo nlelo aanatitelela oseleliwa mmithukumano soothene. Tomas aaheererya ikwaha sincipale omwaalakhanya Piipiliya anteero. Owo ooloca: “Miyaano pahiru nkaapuha vaavaa kaamwaalakhanyaaka Piipiliya. Koheererya itila raru, nyenya mu ikwaha soothene pahiru kaaphiya mu Onamukucho, voocharela kaanahiya.”

2. Ntakhara heeni hannaphwanela okhala ooceecheya wakhala wi nookhalano yoolakelela yoomunepani yeeyo nlelo nihaakhwanihenryaahu?

² Waakhanle wi hiihava mookhalano yoolakelela yeeyo muhaakhwanihenryaanyu, khoo muhiceecheye. Ophiyerya wi waakhwaniherya yoolakelela ekhaani, wiiliwiili onnachuneya wiilipixerya nave onnaviravo elukuluku. Nthowa nawi nlelo munnachuna waakhwaniherya yoolakelela anyu, munnooniherya wi munnavaha esisapo onthamwene anyu ni Yehova nave munnachuna omvaha owetha wanyu. Yehova onnavaha esisapo wiilipixerya wanyu. Mweeparipari owo hanawehererya sincipale opwaha vaavaa munaweryelaanyuvo. (Sal. 103:14; Mik. 6:8) Nto munaphwanela okhala oophimelela mu soolakelela sanyu mwawiiwanana ni mikhalelo sanyu. Tiheeni munaphwanelaanyu  weera wi mwaakhwaniherye soolakelela sanyu? Hankooni nthokororye sooleeliherya savakhaani.

3. Ntakhara heeni ti woochuneya okhalano nchuno na waakhwaniherya yoolakelelaanyu?

³ Ti woochuneya okhalano nchuno noolipa wi mwaakhwaniherye yoolakelela anyu yoomunepani. Wakhala wi mookhalano nchuno noolipa na waakhwaniherya yoolakelela anyu munahaala wiilipixerya weerano yeeyo. Nchuno nahu na waakhwaniherya yoolakelela ahu enalikana ni echeku enamukakha mwaaceya emukerihaka weiwo onachuneiye ophiyawo. Wakhala wi echeku ennatitelela woopa, mulipa oomweeciha mwaaceya onanwerya ophiya weiwo onayeiyewo. Nave ni echeku yawuupa owo onanwerya ophiya mu elukuluku yoophwanelela. Mmukhalelo mmohamoha, wakhala wi nookhalano nchuno noolipa, nnanwerya waakhwaniherya yoolakelelaahu. Munna mmoha awiichaniwa Tavite o El Salvador ooloca: “Vaavaa munakhalaanyuno nchuno, munnapaka owetha wanyu. Nyuwaano munneererya oheemererya wi echu vyakala yoohiiheeni waakhwaniherya yoolakelela anyu.” Mwawiihiiha, tiheeni munaphwanelaanyu weera wi mwaakhwaniherye yoolakelela anyu?

4. Echu taani nnaphwanelaahu oveka mu nivekelo? (Afilipi 2:13) (Moone tho eruku.)

⁴ Mvekele mvekaka nchuno ntokweene. Moorweela wa munepa awe, Yehova onanwerya wookhaviheryaani waakhwaniherya yoolakelela anyu. (Mwaalakhanye Afilipi 2:13.) Ikwaha ikina ninnatikitherya soolakelela nthowa nawi ninnasuwela wi nnanwerya okhwaaniherya, nave eyo echu yaphaama. Nyenya akhweya hinaanoru nchuno neeparipari wi nakhwaniherye seiho. Eyo yaaheereya ni murokora mmoha o Ukanta awiichaniwa Norina. Owo aahikhalano yoolakelela ya opaceryiha yoohuserya ya Piipiliya, naamwi aayeleenle nchuno woona wi iisoona wi hari muhusiha oophwanelela. Tiheeni yaamukhavihenrye? Owo ooloca: “Kaahipacerya omveka Yehova nihiku nnihiku wi akikhaviherye waaceererya nchuno naka na weeciha yoohuserya ya Piipiliya. Mwawiiwanana ni mavekelo aka kaahiilipixerya wi kinnuwihe mavyakelo aka a ohusiha. Ivinrevo miyeeri savakhaani, kaahoona wi mavyakelo aka yaahunnuwa. Mu eyaakha ene yeele kaahipaceriha soohuserya sa Piipiliya piili.”

5. Ichu taani nnaphwanelaahu wuupuwelela wi naaceererye nchuno nahu?

⁵ Muupuwelele vooloca sa ichu seiho Yehova opankeiye ntakhara nyuwaano. (Sal. 143:5) Murummwa Paulo aanuupuwelela vooloca sa mahala matokweene a Yehova wa yoowo, nave eyo yaahimukhaviherya opaka owetha wawe ntakhara Yehova. (1 Ako. 15:9, 10; 1 Tim. 1:12-14) Moolikana, vaavaa munuupuwelelaanyu vancipale vooloca sa ichu Yehova opankeiye ntakhara nyuwaano, munahaala okhalano nchuno ntokweene na waakhwaniherya yoolakelela anyu. (Sal. 116:12) Muthokororye yeeyo yeeren’ye ni murokora mmoha onakhala o Ontura waakhwaniherya yoolakelela awe ya okhala piyoneera ookilaatheya. Owo ooloca:“Kaahuupuwela mukhalelo Yehova aakisiveleiye vancipale. Owo okikhaviherya waphwanya achu awe. Owo onnakikhaviherya ni okikhapelela. Wuupuwelela ichu seiha waahilipiha osivela waka ntakhara yoowo nave waahaaceererya nchuno naka.”

6. Tiheeni tho enahaala onikhaviherya waaceererya nchuno nahu?

 ⁶ Mutikitheryeye mu miphurelo sa waakhwaniherya yoolakelela anyu. Moone yeeyo yaamukhavihenrye Erika, yoowo olociwe woopaceryani ni yoolakelela awe ya ophiya mmithukumano woosiilo. Owo ooloca: “Kaanoona wi kanayeleela vancipale wa nthowa na oseleliwa mmuteko woolaleerya. Nyenya wa nthowa na ophiya woosiilo, kanwerya ochekula ni anna vamoha ni arokora ni omaliha elukuluku ni yaawo. Miyaano tho kanwerya owiriyana sooleeliherya soophara muteko seiho sahaala okikhaviherya opuha ni wunnuwiha muteko aka woolaleerya.” Erika aahitikitheryeya mu mphurelo onakhalavo wa ophiya woosiilo mmuthukumano, nave aahaakhwaniherya yoolakelela awe. Mmiphurelo taani munaphwanelaanyu otikitheryeya? Yaari wi yoolakelela annyu ori omwaalakhanya Piipiliya ni ovekela, muupuwele mukhalelo ichu seiha inahaalaaya olipiha onthamwene anyu ni Yehova. (Sal. 145:18, 19) Waakhanle wi yoolakelela anyu ori wunnuwiha mikhalelo Seekristu, mutikitheryeye mukhalelo eyo enahaalaaya olipiha onthamwene anyu ni akina. (Ako. 3:14) Mpake elista ya miphurelo soothene inarweela mu waakhwaniherya soolakelela sanyu. Mvareryeke elista yeeyo moohihiyererya. Tomas, yoowo olociwe woopaceryani, ooloca: “Vaavaa kinakhalaakano mathowa mancipale a waakhwaniherya yoolakelela, ennakhala woovila wa miyo ohiya kihaakhwanihenrye.”

7. Tiheeni yaamukhavihenrye Yulio ni mwaariye waakhwaniherya yoolakelela aya?

⁷ Mmaliheke elukuluku ni yaawo anahaala wooceenyeryaani. (Mas. 13:20) Moone yeeyo yaamukhavihenrye Yulio ni mwaariye waakhwaniherya yoolakelela aya ya waaceererya orummwa aya. Owo ooloca: “Naahaathanla asinthamwene yaawo yaakhaviherya yoolakelela ahu, nave naanavaanela ni yaawo vooloca sa yoolakelela ahu. Ancipale a yaawo, yaahaakhwaniherya soolakelela imohamoha, mwawiihiiha, yaanwerya onivaha sooleeliherya soophara muteko. Asinthamwene ahu tho yaananikoha vooloca sa mukhalelo apalanu ahu yeecaaya, nave yaananilipiha vaavaa naachunaahu.”

8. Tiheeni enahaala weereya wakhala wi nniilipixerya pahiru mu elukuluku yeeyo nnakhalaahuno nchuno? (Moone tho eruku.)

⁸ Oloca eparipari, oothene ahu ninnakhalano mahiku yaawo nihinakhalaahuno nchuno. Apwanne eyo enataphulela wi hanniilipixerya ntakhara yoolakelela ahu? Hooye. Wi niphwanaphwanihe: Echeku etokweene enanwerya omukhaviherya vancipale mulipa oomweeciha mwaaceya ophiya weiwo onachuneiyewo. Nyenya, ikwaha ikina wuupa wa echeku onanwerya okhala woohiyana, ophiyerya wi mahiku makina, onanwerya ohooparu echeku. Apwanne ela enataphulela wi mulipa oomweeciha mwaaceya hatitelela oya vahoolo? Hooye. Ntoko yootakiherya, amwaaceya akina aakhalano mutore, nave akina aneecihiwa ni ireemo. Mulipa oomweeciha mwaaceya onanwerya opharihela seiho wi atitelele mukwaha awe. Nchuno nahu nnalikana ni echeku. Mahiku makina ninnakhala noolipa, nto mahiku makina hooye. Nave mmahiku makina, akhweya hannakhalano nchuno na wiilipixerya ntakhara yoolakelela ahu. Mwawiihiiha, wakhala wi nniilipixerya ntakhara soolakelela sahu pahiru mu ilukuluku seiho nnakhalaahuno nchuno, hinrwa naakhwaniherya seiho. Hiihaa ntoko mulipa oomweeciha  mwaaceya onaphwanyeiye mikhalelo mikina sa otitelela mukwaha awe, hiyaano tho nnanwerya wiilipixerya ntakhara soolakelela sahu naamwi mu ilukuluku seiho nihinakhalaahuno nchuno. Mweeparipari, ela tahi yookhweya. Nyenya munahaala okhala oohakalala vaavaa muneeraanyu mwaakhwaniherye yoolakelelaanyu. Nihaakumve othokororya yeeyo nnaphwanelaahu weera, hankooni nthokororye nikoho nenlo akhweya nnahaala okhumelela.

9. Apwanne ti yoonanara wiilipixerya wi naakhwaniherye yoolakelela ahu vaavaa nihinakhalaahuno nchuno? Mutharihe.

⁹ Yehova onachuna wi nimurumeeleke yoowo moohakalala ni mootaphuwa. (Sal. 100:2; 2 Ako. 9:7) Vano, apwanne ninnaphwanela wiilipixerya wi naakhwaniherye soolakelela sahu soomunepani wakhala wi hinaanono nchuno? Muthokororye yootakiherya ya murummwa Paulo. Owo ooloca: “Kinnalaka moowali mwiili aka nave kinnakhaliha ntoko kapuro.” (1 Ako. 9:25-27,enoota ya eversikulu 27) Naamwi vaavaa Paulo ahaareiyeno nchuno na opaka yeeyo Yehova aachuneiye, owo aaniikhinyererya weerano yeeyo. Apwanne Yehova aaheemererya muteko wa Paulo? Chiryeene aai! Nave owo aahimuchuwela yoowo ntakhara wiilipixerya wawe.—2 Tim. 4:7, 8.

10. Miphurelo taani nnakhalaahuno vaavaa nniilipixeryaahu waakhwaniherya soolakelela sahu naamwi mu ilukuluku seiho nihinakhalaahuno nchuno?

¹⁰ Moolikana, Yehova onnasiveliwa onoona niilipixeryaka wi naakhwaniherye soolakelela sahu naamwi vaavaa nihinakhalaahuno nchuno na weerano yeeyo. Owo onnahakalala nthowa naawi owo oosuwela wi naamwi wiiliwiili nihisiveliwaka ni muteko yoowo, ninnaphara muteko owo nthowa na omusivela yoowo. Hiihaa ntoko Yehova aamureelinheiye Paulo, Owo onahaala onreeliha ntakhara wiilipixerya wahu. (Sal. 126:5) Nave vaavaa nnoonaahu mareeliho a Yehova, akhweya nnanwerya opacerya okhalano nchuno. Murokora mmoha awiichaniwa Lusina o Poloniya ooloca: “Ikwaha ikina nkinachuna oya mmuteko woolaleerya, xaxaxa vaavaa kinakhalaaka oovelavela. Nyenya, ohakalala kinakhalaakano kimanle oyawo, yamahala yootikhiniha.” Vano hankooni noone yeeyo nnaphwanelaahu weera vaavaa nnayeleelaahu nchuno.

11. Ti mwawiihai Yehova onanikhaviheryeiye olipiha mukhalelo ahu wa wiihiiha?

¹¹ Mvekeleke wi mukhale muchu a wiihiiha. Wiihiiha mavyakelo a ovareryela miyoonelo ni saweera sa muchu mukhateiye. Masu ala wiiliwiili anataphulela wiihiiha opaka echu yoonanara. Nyenya, wiihiiha ti woochuneya wi onceenyerye opaka yeeyo eri yaphaama, xaxaxa wakhala wi echu eyo ti yoovila naari hinaano nchuno na weerano yeeyo. Muupuwele wi wiihiiha onnapaka makupa a sawiima sa munepa, mwawiihiiha, mumveke Yehova munepa waweela wi wookhaviheryeeni wunnuwiha mukhalelo yoola woochuneya. (Luka 11:13; Aka. 5:22, 23) Tavite, yoowo olociwe woopaceryani, oothariha mukhalelo nivekelo nimukhavihenryaaya. Owo aanachuna opakaka yoohuserya ya Piipiliya ya muchu mukhateiye moohicompela. Owo ooloca: “Kaaphwanela omveka Yehova nikhaviheryo wi kikhale muchu a wiihiiha. Nnikhaviheryo nawe, kaahimpaceriha prokrama a ohuserya ni ohicompela.”

12. Ti mwawiihai nlakiheryo nnaphwanyeya mu Eklesiyaste 11:4 nniiwananaaya ni soolakelela soomunepani?

¹² Muhiweherye mikhalelo soophaameya. Mu elapo yeela, mwawooneya hinrwa nikhalano mikhalelo soophaameya. Wakhala wi ninnawehererya mikhalelo seiho, akhweya hinrwa naakhwaniherya soolakelela sahu. (Mwaalakhanye Eklesiyaste 11:4.) Munna mmoha awiichaniwa Taniyeli ooloca: “Mu elapo yeela, hisaavo mikhalelo soophaameya. Ninnakhalano mikhalelo saphaama pahiru vaavaa nnapaceryaahu.” Munna mukina awiichaniwa Paulo, onakhala o Ukanta oothariha nthowa nikina vooloca sa ntakhara heeni nihinaphwanelaahu olekelihaka ichu, owo ooloca: “Vaavaa nnapaceryaahu, ninnamvaha Yehova echu wi areelihe.”—Mal. 3:10.

13. Ntakhara heeni ti waphaama opaceryiha ni soolakelela ikhaani?

¹³ Mpacerye ni ichu ikhaani. Akhweya nnamuyeleela nchuno nthowa nawi ti woovila  waakhwaniherya soolakelela sahu. Waakhanle wi ela enneereya ni nyuwaano, apwanne mwanwerya orehererya ni oraceeliha ni soolakelela ikhaani? Waakhanle wi yoolakelela anyu ori wunnuwiha mukhalelo wammoori woomunepani, munoona hai opacerya wooniherya yoowo vakhaani-vakhaani? Waakhanle wi yoolakelela anyu ori omwaalakhanya Piipiliya anteero, munoona hai opacerya waalakhanya iversikulu savakhaani mu elukuluku yavakhaani? Tomas, yoowo oromoliwe woopaceryani, aahiilipixerya ni yoolakelela awe ya omwaalakhanya Piipiliya anteero mu eyaakha emoha. Owo ooloca: “Kaahoona wi kaahithanla waalakhanya ikapitulu sincipale. Mwawiihiiha, kaahilakelela weererya wanaawiili, nto mu ekwaha yeela, kaahithanla waalakhanya iversikulu savakhaani mahiku oothene ni wuupuwelela. Ntoko yookhumelela, kaahipacerya osiveliwa ni yeeyo kaalakhanyaaka.” Vaavaa Tomas aapuheiye vancipale, owo aahipacerya waalakhanya mu elukuluku yincipale. Mwawooneya, owo aahiwerya omwaalakhanya Piipiliya anteero. c

14. Tiheeni akhweya enahaala weeriha okhala woovila waakhwaniherya yoolakelelaanyu?

¹⁴ Moothananiha, moohipwacha nchuno naari nceenyeryo nryaahuno, nnanwerya ohoolela mikhalelo sookookiherya oculi. Ntoko yootakiherya, “ichu soohiwehereryeya” akhweya inanwerya omaliha elukuluku naachunaahu wi niilipixerye waakhwaniherya soolakelela sahu. (Ekl. 9:11, TNM) Akhweya ninnahoolela nikacamiho nnanceecheiha ni omaliha ikuru sahu. (Mas. 24:10) Woona wi na achu oohiphaameya, nnanwerya opaka soohesa seiho sinahaala weeriha okhala woovila wa hiyaano waakhwaniherya soolakelela sahu. (Aro. 7:23) Naari akhweya nnamwiisoona okhala oovelavela. (Mat. 26:43) Tiheeni enahaala onikhaviherya ovootha sooceecheiha?

15. Wakhala wi ninnahoolela sawaakanyerya, apwanne eyo enataphulela wi nri muhesa? Mutharihe. (Salmu 145:14)

¹⁵ Muupuwele wi sookookiherya muculi henataphulela wi muri muhesa. Piipiliya onnaloca wi nnanwerya ohoolela mikhalelo soovila naari makacamiho mwawuuluulela. Nyenya owo tho oohiya  mookwakwaleya wi nnanwerya ovootha, xaxaxa nnikhaviheryo na Yehova. (Mwaalakhanye Salmu 145:14.) Munna awiichaniwa Filipi, yoowo oromoliwe woopacerya, ohooniherya yootaphulela ya okhumelela phaama mmukhalelo ola: “Nkinatikitheryeya mu ilukuluku seiho kihiwenryaaka waakhwaniherya soolakelela saka. Ohiya yeeyo, kinatikitheryeya mu ilukuluku seiho kiniilipixeryaaka wanaawiili wi kaakhwaniherye soolakelela saka.” Tavite, yoowo oromoliwe woopaceryani, ooloca: “Kinneererya woona sawaakanyerya, ohiya ntoko nikacamiho, nyenya ntoko ikari sa omooniherya Yehova mukhalelo kinamusivelaaka yoowo.” Moorweela wa otitelela weererya waakhwaniherya soolakelela sanyu, naamwi muhoolelaka makacamiho, munnamooniherya Yehova wi munnachuna omuhakalaliha yoowo. Yehova onnahakalala vancipale vaavaa onawooneiyeeni mutitelelaka wiilipixerya wi mwaakhwaniherye soolakelela sanyu!

16. Tiheeni nnahuseryaahu orweela mu sawaakanyerya?

¹⁶ Muhuserye orweela mu ichu sawaakanyerya. Muupuwele vooloca sa ntakhara heeni eyo eneereyaaya, nave mwiikohe: ‘Apwanne kinnaphwanela otoroka echu vyakala wi kisepe okhalano yawaakanyerya ekina?’ (Mas. 27:12) Ikwaha ikina sawaakanyerya inanwerya wooniherya wi yoolakelela nipankaahu tahi yeeparipari ntoko nnuupuwelaahu. Wakhala wi ela enneereya ni nyuwaano, mwaalikhele soolakelela sanyu wi moone waari wi nlelo ti soophwanelela wa nyuwo. d Yehova harwa awoonaani ntoko muchu ooporora nthowa na ohiwerya waakhwaniherya yoolakelela yeeyo muhinahaalaanyu owerya waakhwaniherya.—2 Ako. 8:12.

17. Ntakhara heeni nnaphwanelaahu wuupuwela vooloca sa ichu seiho niwenryaahu waakhwaniherya?

¹⁷ Muupuweleke ichu seiho nwenryaanyu waakhwaniherya. Piipiliya onaloca wi “Muluku tahi oohookololowa wi acuwale muteko anyu.” (Ahe. 6:10) Mwawiihiiha, nyuwaano tho hamunaphwanela ocuwala ichu munapakaanyu. Muupuwele vooloca sa ichu seiho nwenryaanyu waakhwaniherya, ntoko yootakiherya, mohunnuwiha onthamwene ni Yehova, munnaloca ni akina vooloca sa yoowo, naari moopatisiwa. Hiihaa ntoko nyuwaano munnunwaanyu omunepani ni mwaakhwanihenryaanyu soolakelela soomunepani khalai, munanwerya oya vahoolo wi mwaakhwaniherye soolakelela sanyu sahiihaano.—Afi. 3:16.

18. Tiheeni nnaphwanelaahu wuupuwela vaavaa nniilipixeryaahu wi naakhwaniherye soolakelela sahu? (Moone tho eruku.)

¹⁸ Nnikhaviheryo na Yehova, nyuwaano munanwerya waakhwaniherya soolakelela sanyu hiihaa ntoko mulipa oomweeciha mwaaceya onakhaleiye oohakalala vaavaa onaphiyeiye weiwo aayeiyewo. Nyenya muupuwele, alipa oomweeciha mwaaceya ancipale annapuha mukwaha aya. Mmukhalelo mmohamoha, mutitelele wiilipixerya waakhwaniherya soolakelela sanyu soomunepani, muhicuwale ohakalala munapuhaanyu ni mukhalelo Yehova onookhaviheryeiyeni ni wooreelihaani variyari va mukwaha anyu. (2 Ako. 4:7) Wakhala wi hamukookenle muculi, munahaala waakhela mareeliho mancipale.—Aka. 6:9.