1. Ti mwawiihai Piipiliya onathariheiye osivela weeparipari?

 OSIVELA “onnavarela ntoko mooro woowali . . . wa Apwiya [Yehova]. Maahi a mphareya hanaakhwana oshipihano osivela. Maahi oothene a mmihiceni hanawerya omaaliha.” b (Nci. 8:6, 7, PMM) Ola otharihiwa wooreera wa osivela weeparipari! Masu ala annaalipiha atheli: Nyuwaano munanwerya okhalano osivela weeparipari mukina ni mukhwaawe.

2. Tiheeni atheli anaphwanelaaya weera wi osivela waya ohiriirye?

² Onnachuneya wiilipixerya wi atheli etitelele osivelana. Wi niphwanaphwanihe: Wi mooro otitelele ovarela phaama, onnachuneya wi muchu atitelele ohelavo ikhuuni. Wakhala wi muchu henreno yeeyo, mooro onahaala oxipha. Moolikana, osivela variyari va mulopwana ni mwaariye onanwerya tho otitelela okhala woolipa wakhala wi awo annalipiha onthamwene aya. Ikwaha ikina, mutheli onanwerya woona wi osivela waya onnariirya, xaxaxa vaavaa anahoolelaaya makacamiho a ikhorowa, a okumi, naari okhinyererya mu waaphuwa anamwane. Waakhanle wi mwa atheli, ti mwawiihai muneeraanyu mweerihe wi ‘mooro wa Yehova’ otitelele ovarela mu othela wanyu? Mmwaha yoola, nnahaala othokororya mikhalelo miraru wi mulipihe onthamwene anyu ni okhala oohakalala mu othela. c

3. Ti mwawiihai onthamwene woolipa ni Yehova onaakhaviheryeiye atheli otitelela osivelana? (Eklesiyaste 4:12) (Moone tho eruku.)

³ Wi ‘mooro wa Yehova’ otitelele ovarela, mulopwana ni mwaariye anaphwanela wiilipixerya wi elipihe onthamwene aya ni Yehova. Ti mwawiihai ela enalipihaaya othela waya? Vaavaa  atheli anavahaaya esisapo onthamwene aya ni Tiithi aya a wirimu, awo annakhala ooreheryerya opharihela ikano sawe, seiho sinaakhaviherya awo osepa ni ovootha makacamiho yaawo yaahaala weeriha wi osivela waya oriirye. (Mwaalakhanye Eklesiyaste 4:12.) Achu oolipa omunepani anniilipixerya tho omutakiherya Yehova ni wunnuwiha mikhalelo seiho owo onooniheryeiye, ntoko oreera murima, opixa murima ni okhurumuwela. (Aef. 4:32–5:1) Atheli yaawo anooniherya mikhalelo ntoko seiha, mookhweya, osivela waya onniinuwa. Murokora mmoha awiichaniwa Lena, yoowo otheliwe mu iyaakha opwaha 25, ooloca: “Onnakhala wookhweya omusivela ni omucicimiha muchu oolipa omunepani.”

4. Ntakhara heeni Yehova aamuthanla Yosefe ni Mariya wi ekhale asitiithi a Mesiya?

⁴ Muthokororye yootakiherya emoha ya Mpiipiliyani. Vaavaa Yehova aamuthanleiye mutheli wi amuyare Mesiya, Owo aahimuthanla Yosefe ni Mariya wa makholo ancipale a Tavite. Ntakhara heeni? Ooweeli yaahikhalano onthamwene woolipa ni Yehova nave Owo aanasuwela wi awo yaahaala omukuha yoowo mu nipuro noopacerya mu othela waya. Atheli nyu, tiheeni munahuseryaanyu orweela wa Yosefe ni Mariya?

5. Tiheeni alopwana athenle anahuseryaaya orweela wa Yosefe?

⁵ Yosefe aari ooreheryeya opharihela ohoolela wa Yehova, nave eyo yaahimweeriha okhala mulopwana aphaamaxa. Mu ikwaha raru, owo aahaakhela sooleeliherya soorweela wa Muluku vooloca sa echoko awe. Mu ikwaha soothene, owo aahiiwelela mwawaakuveya, naamwi eyo yaavolowela opaka matorokelo matokweene. (Mat. 1:20, 24; 2:13-15, 19-21) Moorweela wa ochariha ohoolela wa Muluku, Yosefe aanamukhaviherya Mariya nave aanamukhapelela yoowo. Mwaanyiherye mukhalelo ichu Yosefe aapakeiye yaamweerihaaya Mariya omusivela ni omucicimiha vancipale yoowo! Alopwana nyu muthenle, munanwerya omutakiherya Yosefe moorweela wa waavya ikano inathipeleya Mpiipiliyani vooloca sa okhapelela echoko anyu. d Vaavaa munapharihelaanyu ekano yeela, naamwi evolowelaka opaka matorokelo, munnooniherya osivela wa amwaarinyu nave munnalipiha othela wanyu. Murokora mmoha onakhala o Vanuatu, yoowo otheliwe mu iyaakha opwaha 20, ooloca: “Vaavaa aiyaka anaavyaaya ni opharihela ohoolela wa Yehova, kinnaacicimiha vancipale yaawo. Kinniisoona okhala ookhapeleleya nave kinnaroromela soolakelela anapakaaya.”

6. Tiheeni athiyana atheliwe anahuseryaaya orweela wa Mariya?

⁶ Mariya aahikhalano onthamwene woolipa ni Yehova, nave nroromelo nawe hinaathipeleya mu yeeyo Yosefe aapakeiye. Mariya aahisuwela phaama Soorepa. (Moone enoota ya ohuserya ya Luka 1:46, a ekunya.) Owo tho anaavya elukuluku ya wuupuwelela. (Luka 2:19, 51) Ninnaroromela wi onthamwene woolipa Mariya  aareiyeno ni Yehova waahimweeriha okhala muthiyana aphaamaxa. Olelo, athiyana ancipale atheliwe anniilipixerya opaka ichu imohamoha Mariya aapakeiye. Ntoko yootakiherya, murokora awiichaniwa Emiko, ooloca: “Vaavaa kaaryaaka muciye, kaahitikitherya yookhovelela yoomunepani yaphaama. Nave kimanle otheliwa, kaahoona wi woona wi aiyaka ti yaavekela ntakhara hiyo nave ti yaahoolela mmalapelo, nroromelo naka naathipeleya mu yeeyo awo yaapakaaya. Kaahoona wi kaaphwanela okhapelela mukhataaka onthamwene aka ni Yehova. Mwawiihiiha, olelo kinnaavya elukuluku wi kikhale meekhaaka ni Muluku aka—kivekelaka, kaalakhanyaka Soorepa ni kuupuwelelaka vooloca sa muupuwelo awe.” (Aka. 6:5) Athiyana nyu mutheliwe, vaavaa munatitelelaanyu olipiha onthamwene anyu ni Yehova, asiiyanyu anahaala okhalano mathowa mancipale a woohakalalihaani ni woosivelaani.—Mas. 31:30.

7. Tiheeni atheli anahuseryaaya orweela wa Yosefe ni Mariya vooloca sa omulapela Yehova vamoha?

⁷ Yosefe ni Mariya yaanalapa tho vamoha wi onthamwene aya ni Yehova otitelele okhala woolipa. Awo yaahiiwexexa ochuneya waya wa omulapela Yehova vamoha ntoko echoko. (Luka 2:22-24, 41; 4:16) Waanwerya okhala woovila weerano yeela, xaxaxa vaavaa echoko yunnuwaaya, nyenya awo yaari ooreheryeya weerano yeela. Ela yootakiherya yaphaamaxa wa atheli olelo! Waakhanle wi mookhalano anamwane, hiihaa ntoko Yosefe ni Mariya, akhweya onamukhala woovila wa nyuwo ophiya mmithukumano naari waavya elukuluku ntakhara malapelo a echoko. Akhweya onamukhala woovilaxa ophwanya elukuluku ya ohuserya naari ovekela vamoha ntoko mutheli. Naamwi hiihaa, muupuwele wi vaavaa munamulapelaanyu Yehova vamoha, munnamwaacamela vancipale yoowo ni mukina ni mukhwaawe. Mwawiihiiha, mukuhe mu nipuro noopacerya omulapela Yehova.

8. Tiheeni atheli yaawo anahoolela makacamiho aneeraaya ephure vancipale orweela mmalapelo a echoko?

⁸ Tiheeni munaphwanelaanyu weera wakhala wi munnahoolela makacamiho mu othela? Wuupuwela okhala vamoha mmalapelo a echoko akhweya honatannya murima ahu. Waakhanle wi ti hiihaa, mpacerye moorweela wa othokororya echu yookhuveya ni yoohakalaliha, echu yeeyo ooweeli muneemereryaanyu othokororya. Ela enanwerya wookhaviheryaani olipiha onthamwene anyu ni nchuno nanyu na opakaka ichu soomunepani vamoha ntoko mutheli.

9. Ntakhara heeni mutheli onaphwaneleiye omalihaka elukuluku vamoha?

⁹ Atheli nyu, munanwerya tho olipiha osivela wanyu moorweela wa omalihaka elukuluku vamoha. Vaavaa muneeraanyuno yeela, ela enahaala wookhaviheryaani osuwela muupuwelo ni miyoonelo sa oothelana anyu. (Map. 2:24) Moone yeeyo Lilia ni Ruslan yoonnaaya emanle othelana, mu iyaakha opwaha 15 muculi. Owo ooloca: “Naahoona wi hinaamaliha elukuluku yincipale vamoha ntoko nuupuwelaahu. Naakhala ooweiwaxa ni muteko, miteko sa vaate, nave ohoolo waya anamwanaahu. Naahoona wi, wakhala wi hannamaliha elukuluku vamoha ntoko mutheli, naahaala orakamelana mukina ni mukhwaawe.”

10. Ti mwawiihai atheli anapharihelaaya nlakiheryo nnaphwanyeya mu Aefesu 5:15, 16?

¹⁰ Tiheeni atheli anaphwanelaaya weera wi emaliheke elukuluku vamoha? Nyuwaano akhweya munaphwanela waavya elukuluku naari opaka marehereryo ntakhara okhala vamoha mukina ni mukhwaawe. (Mwaalakhanye Aefesu 5:15, 16.) Munna mmoha o Nixeriya awiichaniwa Uzondu, ooloca: “Vaavaa kinampakaaka prokrama ntakhara miteko saka, kinnaphitaanyerya elukuluku yeeyo miyaano ni mwaaraka nneeraahu nimalihe vamoha ntoko mutheli, nave kinnakuha mu nipuro noopacerya elukuluku  yeeyo.” (Afi. 1:10) Muthokororye mukhalelo Anastasiya, mwaara a ooweherya a ekulucu mmoha o Moltovia onaphariheleiye phaama elukuluku awe. Owo ooloca: “Kinneererya opaka miteko saka vaavaa aiyaka anakhalaaya ooweiwa mmirici saya. Mmukhalelo yoola, ohoolo waya ninnawerya omaliha elukuluku vamoha.” Vano tiheeni munaphwanelaanyu weera wakhala wi ti woovila wa nyuwo omaliha elukuluku vamoha?

11. Miteko taani Akila ni Priskila yaapakaaya vamoha?

¹¹ Atheli ananwerya ohuserya orweela mu yootakiherya ya Akila ni Priskila, mutheli yoowo aacicimihiwa ni Akristu oopacerya. (Aro. 16:3, 4) Naamwi Piipiliya ahivahereryaka sooleeliherya sincipale vooloca sa mutheli yoola, owo onnooniherya wi awo yaanalapa, yaanalaleerya nave yaanaakhaviherya akina vamoha. (Saw. 18:2, 3, 24-26) Mweeparipari, vaavaa Piipiliya onaloceiye sa Akila ni Priskila, owo ilukuluku soothene onaaloca yaawo vamoha.

12. Tiheeni atheli anaphwanelaaya weera wi emaliheke elukuluku yincipale vamoha? (Moone tho eruku.)

¹² Ti mwawiihai atheli aneeraaya emutakiherye Akila ni Priskila? Muupuwele vooloca sa ichu sincipale seiho nyuwaano ni oothelana anyu munaphwanelaanyu opaka. Apwanne mwanwerya opakaka miteko seiho ntoko mutheli, ohiya muchu mukhateiye? Ntoko yootakiherya, Akila ni Priskila yaanalaleerya vamoha. Apwanne munnapaka marehereryo a weerano emohamoha wiiliwiili? Akila ni Priskila yaanalapa tho vamoha. Nyuwaano ni oothelana anyu akhweya hamunapaka muteko mmohamoha, nyenya apwanne mwanwerya opakaka miteko sa vaate vamoha? (Ekl. 4:9) Vaavaa munamukhaviheryaanyu mukina mmuteko vyakala, munnakhala ntoko nikhuuru nnalapa vamoha nave munnakhalano ekari ya ochekula. Robert ni Linda arino iyaakha sa othela opwaha 50. Owo ooloca: “Oloca eparipari, hiyaano hinaano elukuluku yincipale wi nimaliheke vamoha nthataka. Nave vaavaa kinarapihaaka iparatho nave amwaaraka enatuluxa, naari vaavaa kinalimaaka vasala nave awo erwa wi ekikhaviherye, kinnahakalala vancipale. Opaka ichu vamoha onnanaacameliha. Osivela wahu onnatitelela wunnuwa.”

13. Wi ekhaleno wiiwanana weeparipari, tiheeni mulopwana ni mwaariye anaphwanelaaya weera?

¹³ Nyenya, muupuwele wi tahi wi pahiru okhala vamoha enataphulela wi ilukuluku soothene mulopwana ni mwaariye enahaala waacamelana mukina ni mukhwaawe. Muthiyana mmoha onakhala o Prasili, ooloca: “Olelo, woona wi nnakhala ooweiwaxa, onamukhala wookhweya wuupuwela wi ninnamaliha elukuluku vamoha pahiru nthowa nawi nnakhala mu empa emohamoha. Kohoona wi ti woochuneya opaka sincipale opwaha pahiru okhala vamoha. Miyaano tho kinaphwanela wooniherya opwacha yoowo oothelana aka onachuneiye.” Moone mukhalelo Pruno ni mwaariye Tais aniilipixeryaaya wooniherya opwacha mukina ni mukhwaawe. Owo ooloca: “Variyari va elukuluku yeeyo nnakhalaahu vamoha, ninnaahiya atelefoni ahu ocai nave ninnapuha phaama elukuluku yeeyo.”

14. Wakhala wi atheli hanamaliha elukuluku vamoha, tiheeni anaphwanelaaya weera?

 ¹⁴ Vano, hanka wakhala wi nyuwaano ni oothelana anyu hamunamaliha elukuluku vamoha? Akhweya murino soochuna soohiyana, naari akhweya munnanyeenyeihana mukina ni mukhwaawe. Tiheeni munaphwanelaanyu weera? Muthokororye vooloca sa mooro yoowo nloncaahu woopaceryani. Mooro honatitelela ovarela meekheiye. Nyuwaano munaphwanela otitelela ohelavo ikhuuni. Moolikana, munoona hai opacerya moorweela wa omaliha elukuluku vakhaani vamoha nihiku nnihiku? Mpakeke ichu seiho sinoosivelani oopiili, ohiya ichu seiho saahaala woonyeenyeihaani. (Tiy. 3:18) Moorweela wa opacerya opaka ichu ikhaani, akhweya munamoona osivela wa mmoha ti mmoha wunnuwaka wanaawiili.

15. Ntakhara heeni ncicimiho ti noochuneya wi osivela wa atheli otitelele okhala woolipa?

¹⁵ Ncicimiho ti noochuneya mu othela. Owo ori ntoko okisixeeniyu oneeriha mooro ovarela. Ahirivo okisixeeniyu, mooro onnaakuvela oxipha. Mmukhalelo mmohamoha, ohirivo ncicimiho, mutheli onanwerya woona wi osivela waya onnariirya mwawaakuveya. Moolikana, mulopwana ni mwaariye, yaawo anooniheryana ncicimiho mukina ni mukhwaawe, anneeriha wi osivela waya otitelele okhala woolipa. Nyenya, muupuwele wi echu yoochuneya tahi wuupuwela wi munnamucicimiha oothelana anyu, nto echu yoochuneya ori wi oothelana anyu ooneeke wi munnamucicimiha yoowo. Penny ni Aret athelanne mu iyaakha opwaha 25. Owo ooloca: “Nthowa na ocicimihana mukina ni mukhwaawe, vaate vahu woosareyavo osivela. Ninniisoona okhala ootaphuwa oloca miyoonelo sahu woona wi noosuwela wi ninnavaha esisapo miyoonelo sa mukina ni mukhwaawe.” Mwawiihiiha, tiheeni munaphwanelaanyu opaka wi mmooniherye oothelana anyu wi nyuwaano mweeparipari munnaacicimiha? Muthokororye yootakiherya ya Aparahamu ni Sara.

16. Tiheeni alopwana athenle anahuseryaaya orweela wa yootakiherya ya Aparahamu? (1 Petru 3:7) (Moone tho eruku.)

¹⁶ Aparahamu aanamukhaliha Sara mwa ncicimiho. Owo aanathokororya miyoonelo sa Sara nave aanacicimiha mukhalelo iisooneiye. Mu ekwaha emoha, Sara aahikhala awuukhuwa nave aaloca ni Aparahamu mukhalelo iisooneiye, ophiyerya omukhupanya yoowo. Apwanne Aparahamu aahinyeenyeya? Hooye. Owo aahisuwela wi Sara aari muthiyana a ncicimiho ni ookhaviherya. Aparahamu aahinwiriyana yoowo nave aaheererya orehererya nikacamiho. (Map. 16:5, 6) Tiheeni nnahuseryaahuvo? Alopwana muthenle, nyuwaano mookhalano owerya wa opaka soolakelela ntakhara emusi anyu. (1 Ako. 11:3) Mwawiihiiha, echu munaphwanelaanyu weera ori othokororya miyoonelo sa amwaarinyu muhaakumve opaka yoolakelela, xaxaxa wakhala wi yoolakelela eyo ennaavolowela yaawo. (1 Ako. 13:4, 5) Mu ilukuluku ikina, amwaarinyu ananwerya onyeenyeya nave akhweya ochuna oloca mukhalelo aniisoonaaya.  Apwanne nyuwaano munnacicimiha miyoonelo saya moorweela wa waawiriyana awo moomaaleleya? (Mwaalakhanye 1 Petru 3:7.) Anxela ni Timitri arino iyaakha waacamela 30 sa othela. Anxela oothariha mukhalelo aiyawe aneerihaaya wi owo iisoone okhala oocicimiheya: “Timitri ori ooreheryeya elukuluku yoothene wi akiwiriyane vaavaa kinakhalaaka awuukhuwa naari vaavaa pahiru kinachunaaka oloca. Awo annakhala oopixa murima ni miyaano, naamwi kiri oonyeenyeyaxa.”

17. Tiheeni athiyana atheliwe anahuseryaaya orweela wa yootakiherya ya Sara? (1 Petru 3:5, 6)

¹⁷ Sara aanamucicimiha Aparahamu moorweela wa okhaviherya soolakelela sawe. (Map. 12:5) Mu ekwaha emoha, Aparahamu aahilakelela waahayiha aleco yaawo yaaphin’ye moohiwehereryeya. Owo aahimveka Sara wi ahiyererye muteko aaphareiye wi arehererye ipaau sincipale ntakhara aleco. (Map. 18:6) Sara mwawaakuveya aaheemererya nave aakhaviherya yoolakelela ya Aparahamu. Athiyana nyu mutheliwe, munanwerya ochariha yootakiherya ya Sara moorweela wa okhaviherya soolakelela sa aiyanyu. Vaavaa muneeraanyuno yeeyo, munnalipiha othela wanyu. (Mwaalakhanye 1 Petru 3:5, 6.) Timitri, yoowo olociwe mu eparakrafo evirale, onnathariha mukhalelo amwaariye eneerihaaya wi owo iisooneke okhala oocicimiheya. Owo ooloca: “Kinnathamalela wiilipixerya wa Anxela wa okhaviherya soolakelela saka naamwi miyoonelo sawe saari soohiyana ni sawaka. Wakhala wi yookhumelela ene tahi yaphaama, owo hanakithoriha.” Ti wookhweya omusivela muchu yoowo onoocicimiha!

18. Ti mwawiihai atheli anaphuraaya orweela wa wiilipixerya wi osivela waya otitelele okhala woolipa?

¹⁸ Olelo, Satana onachuna omaliha osivela yoowo orivovo variyari va atheli Eekristu. Owo oosuwela wi wakhala wi atheli aapacerya oyeleela osivela mukina ni mukhwaawe, anahaala opacerya okhala ocai wa Yehova. Mwawiihiiha, osivela weeparipari honawerya omalihiwa! Nnachuna wi osivela mu othela wanyu okhale ntoko yoowo onatharihiwa mu Ncipo na Solomoni. Mukhale oolakelela omukuha Yehova mu nipuro noopacerya mu othela wanyu, mmaliheke elukuluku vamoha, nave mucicimiheke miyoonelo ni soochuna sa oothelana anyu. Vaavaa muneeraanyuno yeela, othela wanyu onahaala omuruuhela ncicimiho Ehime ya osivela weeparipari, Yehova, hiihaa ntoko mooro onathokororyiwa phaama, osivela wanyu onahaala ovarelaka moomalela.