1. Nwopelo taani Yehova onaavaheiye alapeli awe? (Moone tho eruku.)

 TAANI nnaphwanelaahu omveka nihakararyo ni ohoolela? Noosuwela naakhulo na nikoho nenla. Nnaphwanela omwaacamela Yehova Muluku mu nivekelo. Yehova pahiru onaniwopa weerano yeeyo. Nave Piipiliya onanleela wi ‘nivekeleke moohihiyererya,’ mwawiihiiha, ninnasuwela wi owo onachuna wi nivekeleke wiiliwiili. (1 Ate. 5:17) Nnanwerya ovekelaka mwa yoowo mootaphuwa ni oveka ohoolela wawe mmikhalelo soothene sa okumi ahu. (Mas. 3:5, 6) Woona wi Yehova tamahala matokweene, owo ooloca wi nnanwerya ovekela wa yoowo mu ikwaha soothene nnachunaahu.

2. Tiheeni nnahaalaahu othokororya mmwaha yoola?

² Ninnavaha esisapo yamahala ya ovekela. Nyenya, ni ichu sincipale nryaahuno wi nipake, akhweya onnakhala woovila ophwanya elukuluku wi nivekele. Akhweya tho nnanwerya woona wi nnaphwanela orehererya mikhalelo sa mavekelo ahu. Moohakalala, nnanwerya ophwanya nlipiho ntokweene ni ohoolela mu Soorempwa. Mmwaha yoola, nnahaala woona mukhalelo wa ophwanya elukuluku wi nivekeleke moorweela wa othokororya yootakiherya ya Yesu. Nnahaala tho othokororya ti mwawiihai nneeraahu nrehererye mukhalelo wa mavekelo ahu moorweela wa ophitaanyerya mmavekelo ahu miyaha thanu soochuneya.

3. Tiheeni Yesu iiwexenxeiye vooloca sa nivekelo?

³ Yesu aahiiwexexa wi Yehova onnavaha esisapo mavekelo. Mu iyaakha sincipale ahaakumve orwa veelaponi yavathi, owo aahimoona Tiithi awe aakhulaka mavekelo a alopwana ni athiyana oororomeleya. Ntoko yootakiherya, Yesu aari ni Tiithi awe vaavaa Owo aakhunleiye mavekelo a Ana, Tavite, Eliya ni akina. (1 Sam. 1:10, 11, 20; 1 Mam. 19:4-6; Sal. 32:5) Ti nthowa  nene Yesu aahusinheiye oohuserya awe otitelela ovekela ni nroromelo!—Mat. 7:7-11.

4. Tiheeni nnahuseryaahu orweela mmavekelo a Yesu?

⁴ Moorweela wa nivekelo nawe wa Yehova, Yesu ootikitherya yootakiherya wi oohuserya awe echariheke. Mu orummwa awe woothene, owo aanavekela wiiliwiili. Owo aanaavya elukuluku wi avekele woona wi aanatepa oweiwa nave aanarukureryiwa ni achu ancipale. (Mar. 6:31, 45, 46) Owo aanavinya oyaaka nooxa wi awerye okhalano elukuluku meekheiye wi avekele. (Mar. 1:35) Mu ekwaha emoha, owo aahivekela mu ohiyu woothene ahaakumve opaka yoolakelela yoochuneya. (Luka 6:12, 13) Nave owo aahivekela mwawuuluulela mu ohiyu ahaakumve okhwa vaavaa aatikithereyeiye mu waakhwaniherya nikupa noovila na murici awe veelaponi.—Mat. 26:39, 42, 44.

5. Ti mwawiihai nneeraahu nimutakiherye Yesu vaavaa nnavekelaahu?

⁵ Yootakiherya ya Yesu ennanihusiha wi moohipwacha mukhalelo nryaahu ooweiwa, nnaphwanela waavyaka elukuluku wi nivekele. Hiihaa ntoko Yesu, nnaphwanela waavyaka elukuluku wi nivekeleke—akhweya ovinya oyaaka nuuxa naari ohiyu. Vaavaa nneeraahuno yeela, ninnamooniherya Yehova wi ninnathamalela yamahala yeela yoochuneya. Murokora awiichaniwa Line onnuupuwela mukhalelo aareiye ootannyeya vaavaa aahusenryeiye mu ekwaha yoopacerya vooloca sa ekari ya ovekela. Owo ooloca: “Vaavaa kaahusenryaaka wi kinanwerya oloca ni Yehova mu elukuluku vyakala, eyo yaahikikhaviherya omoona owo ntoko nthamwene aka awaacameleya ni ochuna orehererya mavekelo aka.” Moohikhwa minikwa, ancipale a hiyo naahiisoona mmukhalelo yoola. Vano hankooni nthokororye miyaha thanu soochuneya seiho nnaphwanelaahu ophitaanyerya mmavekelo ahu.

6. Mwawiiwanana ni Wupulula 4:10, 11, tiheeni Yehova onaphwaneleiye waakhela?

⁶ Omucicimiha Yehova. Mooveereliwa, Yohani aahiwoona atokweene 24 emulapaka Yehova wirimu. Awo yaanamucicimiha Muluku, nave yaanaloca wi owo aahikhalano ophwanelela wa waakhela “ovuwa, ncicimiho ni owerya.” (Mwaalakhanye Wupulula 4:10, 11.) Ankeelo tho oororomeleya aakhalano mathowa mancipale a omucicimiha ni omvuwiha Yehova. Awo anakhala wirimu vamoha  ni yoowo nave aamusuwela phaama Yehova. Awo annoona mikhalelo sawe moorweela wa yeeyo onapakeiye. Vaavaa anamoonaaya Yehova apakaka ichu, awo annaceenyeryeya omucicimiha yoowo.—Yupu 38:4-7.

7. Mu ichu taani nnaphwanelaahu omucicimiha Yehova?

⁷ Hiyaano tho nnaphwanela omucicimiha Yehova mmavekelo ahu, nlocaka yeeyo enansivela ni yeeyo nnathamalelaahu wa yoowo. Vaavaa munamwaalakhanyaanyu ni omuhuserya Piipiliya, mweererye woona mikhalelo sa Yehova, xaxaxa seiho sinootikhinihaani. (Yupu 37:23; Aro. 11:33) Voocharela, mmuleele Yehova mukhalelo muniisoonaanyu vooloca sa mikhalelo seiho. Nnaphwanela tho omucicimiha Yehova woona wi onnanikhaviherya hiyo vamoha ni anna ni arokora ahu oothene. Owo ilukuluku soothene onnanikhapelela ni onaakiha.—1 Sam. 1:27; 2:1, 2.

8. Mathowa taani avakhaani nryaahuno wi nimuthamalele Yehova? (1 Atesalonika 5:18)

⁸ Omuthamalela Yehova. Hiyaano nookhalano mathowa mancipale a omuthamalela Yehova mmavekelo. (Mwaalakhanye 1 Atesalonika 5:18.) Nnaphwanela othamalela ntakhara echu vyakala yaphaama nryaahuno nthowa nawi yamahala yoothene yaphaama enarwa wa yoowo. (Tiy. 1:17) Ntoko yootakiherya, nnanwerya othamalela ntakhara elapo yaphaama nryaahuno ni ichu sootikhiniha opankeiye. Nnanwerya tho othamalela ntakhara ekumi ahu, emusi, asinthamwene ni ewehereryo ahu. Nave hiyaano tho ninnaphwanela omuthamalela Yehova nthowa nawi owo onnaneemererya opuha onthamwene wavameekhaaya ni yoowo.

9. Ntakhara heeni nnaphwanelaahu omuthamalela Yehova?

⁹ Akhweya onamuchuneya wiilipixerya wi nuupuwelele vooloca sa mathowa a muchu mukhateiye nryaahuno wi nimuthamalele Yehova. Ntakhara heeni? Nthowa nawi achu ancipale olelo hanathamalela. Awo wiiliwiili anatikitheryeya mu yeeyo anachunaaya ohiya mu yeeyo anaphwanelaaya weera wi yooniherye othamalela waya ntakhara ichu aryaayano. Wakhala wi mukhalelo owo woonivolowela, mavekelo ahu anahaala okhala elista ya sooveka. Wi ela eheereye, nnaphwanela otitelela wunnuwiha ni wooniherya othamalela wahu ntakhara ichu soothene Yehova onapakeiye wa hiyo.—Luka 6:45.

10. Ti mwawiihai okhala oothamalela waamukhavihenryaaya murokora mmoha ovilela? (Moone tho eruku.)

¹⁰ Okhala oothamalela onanwerya onikhaviherya ovilela makacamiho. Muthokororye yaweereya ya Kyung-sook, yeeyo enaphwanyeya mu Mulipeleli, 1 a Yaneru a 2015. Owo aahiphwanyiwano ereca etokweene ya kanser mmasaso. Owo onneemererya: “Mukhalelo wa okumi aka waakithananiha. Kaanoona wi kaayeleela ichu soothene, nave kaatepa oceecheya.” Tiheeni yaamukhavihenrye ovilela? Owo olonce wi ohiyu woothene, ahaakumve okona, aanavekela mmasu oovuwa vooloca sa ichu thanu sa nihiku aathamaleleiye. Aaniisoona okhala oomaaleleya, nave  eyo yaanamuceenyerya wooniherya othamalela wawe wa Yehova. Owo aahoona mukhalelo Yehova onaakhapeleleiye alapeli awe oororomeleya vaavaa anahoolelaaya makacamiho mookumini nave aahiroromela wi ninnakhalano mareeliho mancipale opwaha makacamiho. Hiihaa ntoko Kyung-sook, nookhalano mathowa mancipale a omuthamalela Yehova naamwi nihoolelaka makacamiho. Wooniherya othamalela wahu wa yoowo mu nivekelo enanwerya onikhaviherya ovilela ni otitelela okhala oomaaleleya.

11. Ntakhara heeni oohuserya a Yesu yaanachuna olipa murima Yesu amanle okookela wirimu?

¹¹ Mumveke Yehova olipa murima ntakhara muteko woolaleerya. Elukuluku vakhaani ahaakumve okookela wirimu, Yesu aahiwuupuxerya oohuserya awe vooloca sa murici aya wa ovaha onamoona wa yoowo “o Yerusalemu, o Yuteya woothewene ni o Samariya, ophiyerya weiwo elapo ekotenlaayawo.” (Saw. 1:8; Luka 24:46-48) Elukuluku vakhaani ohoolo waya, ahooleli a Ayuta yaahimphara murummwa Petru vamoha ni Yohani yaakeriha o Sineetriyu. Voocharela, yaahaalamulela alopwana yaale oororomeleya wi ehiye olaleerya, ophiyerya wi yaahiwoopopiha vancipale. (Saw. 4:18, 21) Vano, ti mwawiihai Petru ni Yohani yaakhulenlaaya?

12. Mwawiiwanana ni Saweeriwa ti Arummwa 4:29, 31, tiheeni oohuserya yaapankaaya?

¹² Yaakhulaka woopopiha wa ahooleli a malapelo a Ayuta, Petru ni Yohani yaahi: “Muupuwele nyuwo aneene waari waphaama vamiithoni va Muluku, owiiwelelaani nyuwo opwaha omwiiwelela Muluku. Nyenya wa hiyo, haniwerya omaala oloca ichu noonnaahu ni niiwalaahu.” (Saw. 4:19, 20) Vaavaa Petru ni Yohani yaataphulinwaaya, oohuserya yaahivekela wa Yehova vooloca sa opaka yookhwela awe. Awo yaahiloca mu nivekelo: “Mweerihe wi akapuro anyu etitelele oloca masu anyu moolipa murima.” Yehova aahaakhula nivekelo nenla nookhuma vathi va murima.—Mwaalakhanye Saweeriwa ti Arummwa 4:29, 31.

13. Tiheeni nnahuseryaahu orweela mu yootakiherya ya Jin-hyuk?

¹³ Nnanwerya waatakiherya oohuserya yaale moorweela wa otitelela olaleerya naamwi vaavaa alamuleli a elapo enanilamulelaaya wi nimaale. Muthokororye yootakiherya ya Jin-hyuk, munna yoowo aawaleliwe nthowa na okhooca okhala mukhoco. Mukariposo, owo aahivahiwa murici wa waavaha yoolya ni ichu ikina alipa oophariwa, nyenya haaweemereryiwe oloca wa yaawo echu vyakala yaahiiwanana ni murici sawe, omphitaanyerya Piipiliya. Owo aahivekela ntakhara olipa murima ni miruku wi awerye olaleerya mu ikari soothene. (Saw. 5:29) Owo ooloca: “Yehova aahaakhula mavekelo aka moorweela wa okivaha olipa murima ni miruku wi kipaceryihe soohuserya sa Piipiliya sincipale sa aminutu 5 mukariposo. Ohiyu kaanarepa ikaarata seiho kaahaalaaka waavaha alipa oophariwa mu nihiku noocharela.” Hiyaano tho nnanwerya ororomela wi Yehova onahaala onikhaviherya okhwaaniherya orummwa ahu. Hiihaa ntoko Jin-hyuk, nnanwerya ovekela ntakhara olipa murima ni miruku.

14. Tiheeni enahaala onikhaviherya vaavaa nnahoolelaahu makacamiho? (Salmu 37:3, 5)

¹⁴ Mveke nikhaviheryo na Yehova wi mvoothe makacamiho. Ancipale a hiyo ninnahoolela nikacamiho noomwiilini naari na mmuupuweloni, naari noomuyeleela oosiveliwaahu mookhwani, ninnahoolela makacamiho mu echoko, wiikariwa naari nikacamiho nikina. Nave ichu ntoko ereca yoomwaramwaxeya ni ikhoco soheeriha okhala woovila  ovilela makacamiho yaala. Vano tiheeni munaphwanelaanyu weera? Mmuleele Yehova mukhalelo muniisoonaanyu. Mmuleele owo vooloca sa mukhalelo anyu hiihaa ntoko mwaahaalaanyu omuleela nthamwene anyu avamurimani. Muroromele wi Yehova onahaala ‘wookhaviheryaani.’—Mwaalakhanye Salmu 37:3, 5, PMM.

15. Ti mwawiihai nivekelo nnanikhaviheryaaya ‘ovilela mu soohooxa’? Mvahe yootakiherya.

¹⁵ Otitelela ovekela onahaala onikhaviherya ‘ovilela mu soohooxa.’ (Aro. 12:12) Yehova oosuwela yeeyo alapeli awe anahoolelaaya—owo ‘onniiwa okhuwela waya’ ntakhara nikhaviheryo. (Sal. 145:18, 19, NN) Piyoneera orino iyaakha 29 awiichaniwa Kristie ohoona wi ela eparipari. Owo moohiwehererya aahikhalano nikacamiho ntokweene na okumi. Ntoko yookhumelela, aahikacamiheya vancipale mmuupuweloni. Voocharela, owo aahisuwela wi amamaawe yaahiphwanyiwano ereca yoohipenuxeya. Kristie ooloca: “Kaanavekela moohihiyererya wa Yehova wi akivahe ikuru kaachunaaka nihiku nnihiku. Kaaheererya otikitherya yookhovelela yaphaama yoomunepani moorweela wa ophiya mmithukumano ni opaka yoohuserya ya muchu mukhateiye.” Owo ohaaceererya: “Nivekelo naahikikhaviherya ovilela mu ilukuluku soovila. Kaahisuwela wi Yehova ilukuluku soothene aari ni miyo, nave eyo yaahikikhaviherya okhala oomaaleleya. Naamwi nikacamiho naka nahihaalaka omala mwawaakuveya, Yehova aanaakhula nivekelo naka, nave aanakivaha murecele wa mpuwa ni murima woomaaleleya.” Nihirwe ncuwale wi “Yehova oosuwela owoopola achu yaawo anamucicimiha vaavaa aneehiwaaya.”—2 Pet. 2:9.

16. Ntakhara heeni nnachunaahu nikhaviheryo na Yehova wi nivoothe saweeha?

¹⁶ Mveke nikhaviheryo na Yehova wi mvoothe saweeha. Ntoko achu oohiphaameya, wiiliwiili nnaphwanela owaniha ni yaweeha ya opaka yeeyo eri yoonanara. Satana onnapaka ichu soothene onaweryeiye wi eerihe wi saweeha seiho sikhale soovila. Mukhalelo mmoha onaphariheleiye  wi ananarihe muupuwelo ahu ori moorweela wa mathatelo ni ixilema soohiphwanelela. Ixilema ntoko seiho inanwerya oneeriha okhalano muupuwelo woohiphwanelela—muupuwelo yoowo onahaala oneeriha okhala ooriipiheya vamiithoni va Yehova ni oneeriha opaka soocheka itokweene.—Mar. 7:21-23; Tiy. 1:14, 15.

17. Ti mwawiihai nneeraahu neereno ichu mwawiiwanana ni mavekelo ahu wi nsepe saweeha? (Moone tho eruku.)

¹⁷ Ninnachuna nikhaviheryo na Yehova wakhala wi ninnawaniha ni yaweeha ya opaka yeeyo eri yoonanara. Yesu aahiphitaanyerya yooveka enacharela mu nivekelo na ntakiheryo: “Muhinihiye mu weehiwani, nyenya munaakihe wa mulipa oonanara owo.” (Mat. 6:13) Yehova onnachuna onikhaviherya, nyenya nnaphwanela omveka nikhaviheryo nawe. Nnaphwanela weeraka ichu mwawiiwanana ni mavekelo ahu. Nnaphwanela opaka owetha wahu wi nsepe waalakhanya, owiriyana ni woona ichu inavuwiha miyoonelo soonanara, seiho siri sawunlaana mu elapo ya Satana. (Sal. 97:10) Nnanwerya osareiha muupuwelo ahu ni miyoonelo saphaama moorweela wa waalakhanya ni omuhuserya Piipiliya. Othukumana ni olaleerya inanwerya tho okhapelela muupuwelo ahu. Nave Yehova onnaroromeliha wi heemererya wi neehiwe opwaha vaavaa nnaweryelaahuvo.—1 Ako. 10:12, 13.

18. Vooloca sa nivekelo, tiheeni oothene ahu nnaphwanelaahu weera?

¹⁸ Mmoha ti mmoha a hiyo onaphwanela ovekelaka moohihiyererya opwaha khalai wi atitelele okhala oororomeleya wa Yehova variyari va ilukuluku seiha sookuchula ni soovila. Mwaavyeke elukuluku nihiku nnihiku wi mpakeke nivekelo noorweela vathi va murima. Yehova anachuna wi ‘nlocekeno ni murima ahu woothene’ mu nivekelo. (Sal. 62:8, PMM) Mmucicimiheke Yehova nave mmuthamaleleke yoowo ntakhara ichu soothene onapakeiye. Mumveke wi ookhaviheryeeni okhala oolipa murima mmuteko woolaleerya. Mumvekeke tho wi ookhaviheryeeni ovilela ni nikacamiho vyakala ni ovootha yaweeha vyakala akhweya munahoolelaanyu. Muheemererye wi echu vyakala naari muchu oohiiheeni ovekela wa Yehova moohihiyererya. Vano ti mwawiihai Yehova onaakhuleiye mavekelo ahu? Nnahaala othokororya nikoho nenla noochuneya mmwaha onacharela.