MWAHA WOOHUSERYA 21
NCIPO 107 Yootakiherya ya Muluku ya Osivela
Muni Nwerye Hai Omphwanya Oothelana Oophwanelela?
“Taani onawerya omphwanya muthiyana oowerya wi amuthele? Okhweleya wawe toopwahasha maluku awaarya!”—MAS. 31:10, PMM.
IPONTU SA VASULU
Nnahaala woona malakiheryo a Mpiipiliyani yaawo aniiwanana ni mukhalelo muchu onahaaleiye omphwanya oothelana oophwanelela ni mukhalelo achu akina mmulokoni anahaalaaya waakhaviherya aciye yaawo anachuna othela naari otheliwa.
1-2. (1) Mikhalelo taani Akristu yaawo ari aciye anaphwanelaaya othokororya ehaakumve opacerya ompwana? (2) Enataphulela eheeni vaavaa nnalocaahu “ompwana”? (Moone “Masu Atharihiwe.”)
NYUWAANO munnachuna othela naari otheliwa? Naamwi ohiri othela naari otheliwa pahiru onamuruuhela muchu ohakalala, Akristu ancipale ehithenle amiravo naari awunnuwelavo, annawehererya omphwanya muchu oothelanano. Ti yawooneya wi nyuwaano mwaachunaka waakamela munaphwanela okhala awunnuwa omunepani, mmuupuweloni ni ooreheryeya ntakhara othela. a (1 Ako. 7:36) Waakhanle wi muri ooreheryeya mmukhalelo yoola, tiyawooneya wi munahaala okhalano othela woohakalaliha.
2 Nyenya, tahi wookhweya omphwanya nthamwene oophwanelela a othelanano. (Mas. 31:10) Nave naamwi nyuwaano mumphwannye muchu yoowo munachunaanyu omusuwela phaama, onanwerya okhala woovila opaceryiha ompwana. b Mwaha yoola, nnahaala othokororya yeeyo enahaala waakhaviherya Akristu eri aciye omphwanya muchu yoowo ari oophwanelela onahaala othelana ni yaawo. Nave tho nnahaala ohuserya mukhalelo achu akina mmulokoni anahaalaaya waakhaviherya yaale anachuna othela.
OMPHWANYA OOTHELANA OOPHWANELELA
3. Mikhalelo taani Mukristu yoowo ori muciye onaphwaneleiye othokororya vaavaa onamwaavyeiye muchu wi athelaneno?
3 Waakhanle wi nyuwaano munnachuna othela, ti woochuneya osuwela mikhalelo seiyo mwaahaalaanyu omphwanyano muchu yoowo munayaanyu othelanano, muhaakumve opaceryiha ompwana. c Vakina vaya, nyuwaano munammukhooca muchu yoowo ori oophwanelela wa nyuwaano naari munampaceryiha ompwana ni muchu yoowo ohiri oophwanelela othelanano. Ti yawooneya wi muchu vyakala oophwanela othelanano onaphwanela okhala Mukristu opatisiwe. (1 Ako. 7:39) Nyenya tho, tahi wi muchu ori oothene opatisiwe onahaala okhala oophwanelela othelana ni nyuwaano. Munanwerya wiikoha: ‘Tisivi siri soolakelela saka sa okumi? Mikhalelo taani sa muchu yoowo kinayaaka othelanano kinoonaka okhala soochuneya? Apwanne soowehererya saka ti saphaama?’
4. Sooveka taani akina yaaphitaanyenryaaya mmavekelo aya vooloca sa omphwanya oothelana oophwanelela?
4 Moohikhwa minikwa, nyuwaano moovekela wi mumphwanye oothelana anyu oophwanelela waakhanle wi eyo ti yoolakelela anyu. (Afi. 4:6) Ti yawooneya wi Yehova hanamwaavya muchu yoowo onaya othelana ni nyuwaano. Nyenya owo onnuukhuwa ni soochuna sanyu ni muupuwelo anyu, nave owo onamookhaviheryaani vaavaa munamwaavyaanyu muchu oothelanano. Mwawiihiiha mutitelele okawana soolakelela sanyu ni muupuwelo anyu ni yoowo. (Sal. 62:8) Mvekele mvekaka opixa murima ni miruku. (Tiy. 1:5) Yohani d munna yoowo ori muciye onakhala Ostatu Unitu, oothariha yeeyo onaphitaanyeryeiye mmavekeloni mwawe: “Miyaano kinnamuleela Yehova mikhalelo kinachunaaka wa muchu yoowo kinayaaka othelanano. Kinnavekela ntakhara ekari ya omphwanya oothelana oophwanelela. Nave tho kinnamveka Yehova wi akikhaviherye wunnuwiha mikhalelo seiho inahaala okeeriha okhala mulopwana aphaama.” Tanya, murokora onakhala o Sri Lanka ooloca: “Vaavaa kinamwaavyaaka oothelana oophwanelela, kinnamveka Yehova wi akikhaviherye otitelela okhala oororomeleya, ootikitheryeya ni oohakalala.” Naamwi nyuwaano muhimphwannye oothelana oophwanelela mwawaakuveya, Yehova onnaroromeliha otitelela okhapelela soochuna sanyu soomwiilini ni sa mmuupuweloni.—Sal. 55:22.
5. Ikari taani Akristu yaawo ari aciye aryaayano ya omusuwela muchu yoowo onamusivela Yehova? (1 Akorintu 15:58) (Moone tho eruku.)
5 Piipiliya onnanceenyerya ‘opharaka muteko wa Apwiya.’ (Mwaalakhanye 1 Akorintu 15:58.) Wakhala wi nri ooweiwa mmuteko wa Yehova ni omaliha elukuluku vamoha ni anna ni arokora oohiyanahiyana, nyuwaano ohiya pahiru opuha onthamwene yoowo woolipiha munahaala tho okhalano ekari yawaasuwela aciye akina yaawo ntoko nyuwaano eri ooweiwa mu omurumeela Yehova. Vaavaa munapakaanyu owetha wanyu wi mmuhakalalihe Yehova, nyuwaano munamulawiha ohakalala weeparipari.
Wakhala wi nyuwaano munnaweiwa mmuteko wa Yehova ni omaliha elukuluku ni anna oohiyanahiyana, nyuwaano munanwerya waaphwanya akina yaawo anachuna othela naari otheliwa (Moone eparakrafu 5)
6. Vaavaa munamwaavyaanyu oothelana oopwanelela, tiheeni Akristu yaawo ari aciye anaphwanelaaya wuupuwela?
6 Mukhaleno ephoole: Wi omwaavya wanyu oothelana ehikhale echu yoochuneyaxa mu okumi anyu. (Afi. 1:10) Ohakalala weeparipari hori moorweela wa mukhalelo anyu mwaari muciye naari mutheli, nyenya mu onthamwene anyu ni Yehova. (Mat. 5:3) Nave vaavaa nyuwaano muryaanyu muciye, munanwerya okhalano otaphuwa wawaaca wi munnuwihe muteko anyu woolaleerya. (1 Ako. 7:32, 33) Mpake owetha wanyu wi mpharihele phaama elukuluku yeeyo. Jessica murokora mmoha Ostatu Unitu otheliwe mu iyaakha 30, ooloca: “Miyaano kaahikhala ooweiwa mmuteko woolaleerya, nave eyo yookikhaviherya okhala oohakalala moohipwacha ochuna otheliwa.”
MWAAVYE ELUKULUKU WI MVARERYE VOOLOCA SA MUCHU MUKINA
7. Ntakhara heeni ti yamiruku omaliha elukuluku mumvareryaka muchu muhaakumve wooniherya nchuno wa yoowo? (Masiposipo 13:16)
7 Hanka wakhala wi nyuwaano munoona wi muchu owo onanwerya okhala oophwanelela mu othela? Apwanne munapwanela wooniherya mwawaakuveya nchuno mwa muchu yoowo? Piipiliya onnaloca wi muchu a miruku haneerano ahuupuwelenle. (Mwaalakhanye Masiposipo 13:16.) Mwawiihiiha, yaamukhala yamiruku omvareryela muchu moovitheya mu elukuluku vakhaani muchu ahaakumve wooniherya nchuno wa muchu yoowo. Aschwin yoowo onakhala o Olanta ooloca: “Nchuno nnanwerya wunnuwa mwawaakuveya, nyenya tho ncakanele mwawaakuveya. Mwawiihiiha vaavaa munamalihaanyu elukuluku wi mumvarerye muchu, nyuwaano hampaceryiha ompwana yoowo onathipeleya mu nchuno na elukuluku vakhaani.” Ohiya yeeyoru, vaavaa munamvareryaanyu muchu munanwerya wiiwexexa wi muchu owo tahi oophwanelela wi muthelane ni yoowo.
8. Ti mwawiihai muchu aneereiye awerye omvarerya muchu moovitheya yoowo ari oophwanelela? (Moone tho eruku.)
8 Ti mwawiihai nyuwaano mwahaalaanyu omvarerya muchu mukina moovitheya? Mmithukumano sa muloko naari vaavaa munakhalaanyu vamoha ni asinthamwene ancipale, nyuwaano munanwerya ovarerya ichu vooloca sa omunepani, omuchu ni meecelo a muchu yoowo. Taavi eri asinthamwene awe nave tiheeni onasiveliweiyeno oloca? (Luka 6:45) Soolakelela sawe sinnalikana ni sawaka? Nyuwaano munanwerya oloca ni atokweene a muloko anyu naari anna akina awiichwelavo makupa oomunepani yaawo mwaasuwenlaanyu phaama. (Mas. 20:18) Munanwerya waakoha vooloca sa meecelo ni mikhalelo sa muchu yoowo. (Ruti 2:11) Vaavaa nnamvareryaahu muchu yoowo, niilipixerye wi nsepe omuceecheiha. Mucicimihe miyoonelo sawe musepe okhala vakhiviru elukuluku yoothene wa muchu yoowo naari weererya osuwela soothene vooloca sa yoowo.
Muhaakumve wooniherya nchuno, moovitheya mmalihe elukuluku mumvareryaka muchu yoowo (Moone iparakrafu 7-8)
9. Muhaakumve omwaacamela muchu oophwanelela yoowo munachunaayu othelanano, echu taani munaphwanelaanyu olekecheyano?
9 Ophiyerya elukuluku taani munaphwanelaanyu omaliha mumvareryaka muchu muhaakumve wooniherya nchuno nanyu? Wakhala wi nyuwaano mootepa waakuvela oloca ni muchu, owo onanwerya woona wi nyuwaano hamunuupuwela mweephoole muhaakumve opaka yoolakelela. (Mas. 29:20) Mmakupa makina, wakhala wi nyuwaano moolekela vancipale onahaala okhala ntoko wi himwaano yoolakelela yeeparipari, xaxaxa wakhala wi muchu mukina oosuwela yoolakelela anyu. (Ekl. 11:4) Muupuwele, muhaakumve oloca ni muchu hamunaphwanela olekecheya wi munahaala okhala ni muchu yoowo. Nyenya munaphwanela olekecheya wi muri ooreheryeya ntakhara othela nave wi muchu mukina toophwanelela ntakhara nyuwo.
10. Tiheeni munaphwanelaanyu weera wakhala wi ookhala onoochunaani, nyenya muupuwelo anyu ohiniiwanana ni yeeyo?
10 Hanka wakhala wi nyuwaano mohoona wi ookhala onoochunaani? Waakhala wi hamunachuna opaka ompwana, mooniherye moorweela wa meerelo anyu. Yaahaala okhala yoonanara omweeriha muchu wuupuwela wi yookhalavo ekari ya opakano ompwana eniiha ehiri yeeyo.—1 Ako. 10:24; Aef. 4:25.
11. Mu ilapo seiho ompwana naari othela achu anaamwaavyeryiwaaya ni akina, ichu taani inaphwanela wuupuweleliwa mweephoole?
11 Mmakupa makina a elapo, asiithi naari achu awuunuwelavo annawaavyerya amusi aya yaawo eri aciye muchu oothelanano. Mu ilapo ikina, amusi naari asinthamwene ennamwaavya muchu oophwanelela ntakhara mmusi aya yoowo ohithenle naari ohitheliwe, voocharela annarehererya nihiku wa oopiili yaala wi yoonane waakhanle wi annaphwanelelana. Wakhala wi nyuwaano moovekiwa wi murehererye ompwana naari othela, muthokororye soochuna naari soothowa sa mulopwana ni sa muthiyana. Wakhala wooweryeya mmanle omphwanya muchu oophwanelela, mpake owetha wanyu wakhala wooweryeya wi musuwele vooloca sa omuchu awe, mikhalelo sawe nave opwaha soothene makupa awe oomunepani. Onthamwene wawaacameleyaxa ni Yehova ti woochuneyaxa opwaha ikhorowa, mahusiheryo naari mpuro yoowo niyariwaahuwo. Mwawiihiiha, muupuwele wi anna ni arokora yaawo ari aciye tanaphwanela opaka yoolakelela eri yookuchula vooloca sa othela.—Aka. 6:5.
OPACERYA WA OMPWANA
12. Wakhala wi nyuwaano munnachuna opaka ompwana, ti mwawiihai mwaahaalaanyu weeriha wi musuweliwe wa muchu yoowo?
12 Waakhanle wi nyuwaano munnachuna opaceryiha ompwana ni muchu, ti mwawiihai mwaahaalaanyu opacerya wooniherya nchuno nanyu? e Munanwerya olakelela nihiku wi muchekule ni muchu yoowo, mu nipuro nawaaciwavo naari moorweela mu telefoni. Muloce mookwakwaleya soochuna sanyu. (1 Ako. 14:9) Wakhala woochuneya, mumvahe elukuluku muchu yoowo wi uupuwelele mukhalelo onahaaleiye waakhula. (Mas. 15:28) Wakhala wi muchu owo hanachuna opaka ompwana mucicimihe miyoonelo sawe.
13. Tiheeni munaphwanelaanyu weera wakhala wi ookhala onoochunaani? (Akolose 4:6)
13 Hanka wakhala wi muchu ohooniherya nchuno wa nyuwaano? Akhweya waari woochuneya olipa murima wi muchu owo awaacameleeni, mwawiihiiha mukhale ooreera murima ni ancicimiho. (Mwaalakhanye Akolose 4:6.) Wakhala wi nyuwaano munnachuna elukuluku wi muthokororye waakhanle wi munneemererya wi mpacerye ompwana, muloce yeeyo. Mwawiihiiha mweererye ovaha naakhulo mwawaakuveya wakhala wooweryeya. (Mas. 13:12) Wakhala wi nyuwaano hamunachuna, muloce sa yeeyo mooreera murima ni mookwakwaleya. Moone mukhalelo Hans, munna mmoha o Austriya, aakhunleiye vaavaa murokora mmoha aamwaacamenleiye yoowo: “Kaahimutharihela yoolakelela aka moolipa, nyenya mookwakwaleya. Kaaheerano mwawaakuveya nthowa nawi nkaachuna omvaha ewehereryo yatheru. Kaaphwanela okhalano ephoole wi miyaano kihiloce naari opaka echu yeeyo yaahaala omweeriha wuupuwela wi kaahaala otoroka muupuwelo.” Mmakupa makina wakhala wi nyuwaano munnachuna opaka ompwana ni muchu, nwanihe ni miyoonelo sanyu ni nchuno ntokweene nenlo muryaanyuno vooloca sa opaka ompwana. Soolakelela sanyu inanwerya okhala soohiyana ni muchu mukina, mwawiiwanana ni sookhovelela naari ichu ikina.
TI MWAWIIHAI AKINA ANAHAALAAYA WAAKHAVIHERYA AKRISTU ARI ACIYE?
14. Ti mwawiihai nneeraahu naakhaviherye Akristu yaawo eri aciye moorweela wa masu ahu?
14 Ti mwawiihai oothene ahu nnahaalaahu waakhaviherya Akristu yaawo eri aciye yaawo anachuna othela naari otheliwa? Mukhalelo mmoha ori okhalano ephoole wa yeeyo nnalocaahu. (Aef. 4:29) Nnanwerya wiikoha: ‘Apwanne miyaano kinnathata ni yaale anachuna othela naari otheliwa? Vaavaa kinamoonaaka munna ni murokora yaawo eri aciye echekulaka, kinnaphiyerya makuchuwelo awi awo annachunana mukina ni mukhwaawe?’ (1 Tim. 5:13) Ohiya yeeyo, nihirwe niweerihe Akristu yaawo ari aciye wiisoona wi awo hari awaakhwanela nthowa nawi hethenle. Hans yoowo olociwe woopaceryani, ooloca: “Anna akina yaanaloca: ‘Ntakhara heeni weyaano honathela? Weyaano hotempe okhala mmiravo.’ Masu ntoko yaala ennaweeriha aciye wiisoona ohikhala echu enevo nave ennaakhinyererya wi yiisooneke wi eri ooreheryeya wi ethele.” Ti woochuneya vancipale waavya ikari wi niwerye waathamalela Akristu yaawo eri aciye!—1 Ate. 5:11.
15. (1) Mwawiiwanana ni masu anaphwanyeya mu Aroma 15:2, tiheeni nnaphwanelaahu wuupuwela mweephoole nihaakumve omukhaviherya muchu omphwanya yoowo oneereiye athelaneno? (Moone tho eruku.) (2) Mahusiheryo taani oochuneya muhusenryaanyu orweela wa exilema?
15 Hanka wakhala wi nohuupuwela wi munna ammori ni murokora ammori ananwerya opaka othela waphaama? Piipiliya onnanleela wi nthokororyeke soochuna sa akina. (Mwaalakhanye Aroma 15:2.) Aciye ancipale hanasiveliwa wi akina yaakuxe wi ewooniherye achu yaawo eri oophwanelela othelanano, nave nnaphwanela ocicimiha yoolakelela aya. (2 Ate. 3:11) Aciye akina ananwerya othamalela nikhaviheryo nammori, nyenya hannaphwanela wiivoleiherya wakhala wi hanivekiwe weerano yeeyo. f (Mas. 3:27) Akina annoona okhala yaphaama okuxiwa wi yooniheryiwe achu yaawo eri aciye. Litiya, murokora yoowo onakhala o Alemanya ooloca: “Nyuwaano munanwerya omphitaanya munna ni murokora mu nikhuuru ntokweene. Pahiru wakhala wi moopaka echu yeeyo enahaala omvaha ekari munna ni murokora omaliha elukuluku vamoha ni voocharela waahiya olakelela opaka yeeyo anachunaaya.”
Achu ancipale annavaha ekari wi Akristu yaawo eri aciye ewerye okhala vamoha (Moone eparakrafu 15)
16. Tiheeni Akristu yaawo eri aciye anaphwanelaaya wuupuwela?
16 Oothene ahu—Aciye naari atheli—nnanwerya okhalano okumi woohakalalliha ni wamphurelo! (Sal. 128:1) Mwawiihiiha, wakhala wi munnachuna othela naari otheliwa nyenya nlelo hamumphwannye muchu, mutitelele otikitheryeya mmuteko anyu wa Yehova. Murokora mmoha awiichaniwa Sin Yi onakhala o Makawo ooloca: “Nalikanyiha elukuluku yeeyo munahaalaanyu omaliha ni oothelana anyu Mparataiso, elukuluku muryaanyu muciye enakhala yookhuveya. Mvahe esisapo elukuluku yeeyo nave mpharihele phaama.” Nyenya hanka waakanle wi moomphwanya muchu oophwanelela nave mpacerya opaka ompwana? Mu yoohuserya enacharela, nnahaala oloca mukhalelo nyuwaano muneeraanyu mukhaleno ompwana yoowo oni okhumelele phaama.
NCIPO 137 Athiyana a Nroromelo
a Wi mukhaviheryeye waakhanle wi muri ooreheryeya moone mu jw.org mwaha oni “Namoro—Parte 1: Será que estou pronto para namorar?”
b MASU ATHARIHIWE: Mu yoohuserya yeela ni enacharela, “ompwana” enaahiwa elukuluku variyari va mulopwana ni muthiyana enasuwelanaaya phaama wi elakelele osuwela waakhanle wi awo enamukhala mulopwana aphaama ni muthiyana aphaama wa mukina ni mukhwaawe. Mu ilapo ikina, ennalociwa tho wi ompwana omusuwela muchu naari okhalano wiiwanana woochunana. Ompwana onapacerya vaavaa mulopwana ni muthiyana anooniheryaaya wi annachunana mukina ni mukhwaawe, nave onnatitelela ophiyerya wi awo elakelenle othelana naari omaliha ompwana.
c Wi nikhweiye, mu iparakrafu sinacharela nnahaala oloca sa muchu oophwanelela ntoko munna. Eparipari wi yoohuserya yeela tho ennaphariheleya wa arokora.
d Masina makina aatorokiwa.
e Mmakupa oohiyanahiyana munna tonaloca ni murokora wi apaceryiheno ompwana. Nave tho murokora onanwerya othanla moophwanelela omwaacamela munna. (Ruti 3:1-13) Wa sooleeliherya sincipale, moone mwaha “Os Jovens Perguntam . . . Como Contar-Lhe Tudo O Que Sinto Por Ele?” mu Vinyani!, 22 a Otupuru a 2004, a ekunya.
f Moone exilema mu jw.org Mwaatakiherye Achu a Nroromelo, Ohiya Ahirino Nroromelo—Akristu Ari Aciye.
