MWAHA WOOHUSERYA 18
NCIPO 1 Mikhalelo sa Yehova
Muroromele Ikharari sa ‘Muthoriha a Elapo Yoothene ya Vathi!’
“Nyuwo munathoriha elapo yoothene ya vathi, munathoriha mwawookololowa!”—MAP. 18:25, PMM.
IPONTU SA VASULU
Nnahaala ohuserya wiiwexexa wahu ikharari ni wookololowa wa Yehova vooloca sa oviihiwa wa achu oohikhala eekhaikhai.
1. Nihusiheryo taani noohakararya nenlo Yehova aamuhusinheiye Aparahamu?
WAARI ochekula yoowo Aparahamu ahintonkeiye ocuwala. Orweela wa munkelo, Muluku aahimuleela Aparahamu wi aahaala otoloxa epooma yo Sotoma ni Komora. Mulopwana yoole oororomeleya aahikhala awaakanyeryeya. Owo aakoha: “Akhweya munaya waatolosha vamoha achu aphaama ni oocheka? . . . Nyuwo munathoriha elapo yoothene ya vathi, munathoriha mwawookololowa!” Yehova moopixa murima aahimuhusiha nthamwene awe oosiveliwa oomwiilini nihusiheryo nenlo nnanruuhela mphurelo ni onihakararya oothene ahu: Muluku harwa aatoloxa achu awookololowa.—Map. 18:23-33, PMM.
2. Tiheeni enanlipiha wi othoriha wa Yehova ti wawookololowa ni wa ikharari?
2 Ti mwawiihai nnahaalaahu ororomela wi vaavaa Yehova onaathoriheiye achu onneerano mwawookololowa? Nthowa nawi noosuwela wi ‘Yehova onavarerya mirima’ sa achu. (1 Sam. 16:7, PMM) Mweeparipari, owo onnasuwela ‘mirima soothene sa achu.’ (1 Mam. 8:39; 1 Math. 28:9, PMM) Ela eparipari yootikhiniha. Othoriha wa Yehova ti woohikota nave onnapwaha wiiwexexa wahu. Murummwa Paulo aahiveereliwa vooloca sa Yehova Muluku wi: “Othoriha wawe ti wootikhiniha!”—Aro. 11:33.
3-4. Mu ikwaha ikina tiheeni nnaphwanelaahu wiikoha nave tiheeni nnahaalaahu othokororya mmwaha yoola? (Yohani 5:28, 29)
3 Naamwi nsuwelaka wi Yehova ilukuluku soothene oneerano yeeyo eri yawookololowa, nnanwerya okhalano makoho yaawo ntoko Aparahamu aareiyeno. Nnanwerya tho wiikoha: ‘Apwanne ti wooweryeya wi achu yaawo Yehova aatolonxeiye, ntoko o Sotoma ni Komora, enanwerya okhala wanaawiili? Akina a yaawo enanwerya ophitaanyeryiwa mu “ovinya muukhwani wa. . . oohookololowa”?’—Saw. 24:15.
4 Vano hankooni naalikhele wa yeeyo niiwexenxaahu vooloca sa ovinya mookhwani. Hihaanoru, nohaakhela wiiwexexa ovyaani otharinhe mookwakwaleya vooloca sa “oviihiwa mookhwani wi yaakhele ekumi” ni “oviihiwa mookhwani wi ethorihiwe.” a (Mwaalakhanye Yohani 5:28, 29.) Otharihiwa wuuwu wookwakwaleya woheeriha opaka matorokelo mavyaani mu wiiwexexa wahu, yoowo nnahaalaahu othokororya mmwaha yoola ni onacharela. Mwawiiwanana ni othoriha wawookololowa wa Yehova, voopacerya nnahaala othokororya wa yeeyo nihisuwenlaahu nave voocharela wa yeeyo nisuwenlaahu.
TIHEENI NIHISUWENLAAHU?
5. Tiheeni naalocaahu khalai vooloca sa achu yaawo Yehova aatolonxeiye o Sotoma ni Komora?
5 Khalai, soolaleeryiwa sahu saanathariha wa yeeyo eneereya wa yaale Yehova onaathoriheiye ntoko oohookololowa. Naaloca wi achu yaawo etoloxiwe ni Yehova, ntoko o Sotoma ni Komora, hiyaanono ewehereryo ya ovinya mookhwani. Nyenya nimanle ohuserya mwawiixeela ni ovekela vooloca sa mwaha yoola, tiyawooneya wi haniwerya olocaka yeeyo moolekecheya. Ntakhara heeni?
6. Tisivi siri sootakiherya ikina sa othoriha wa Yehova ntakhara achu oohookololowa, nave tiheeni nihisuwenlaahu?
6 Muthokororye makoho enacharela vooloca sa yeela. Saweereya soohiyanahiyana sa Mpiipiliyani sinnaloca othoriha wa Yehova vooloca sa achu oohookololowa, ntoko waaca wa achu yaawo yaakhwile ni Maahi Mancipale naari wa maloko mathanu napiili a mu Elapo Yanlakano yeeyo Yehova aalamulenleiye wi achu awe yiiveleele mu otoloxa naari okhwa wa anakhoco 185.000 a Asiriya yaawo munkelo a Yehova aawiiphaleiye mu ohiyu omoha. (Map. 7:23; Malam. 7:1-3; Yes. 37:36, 37) Apwanne Piipiliya oonleela wi Yehova oolakelela wi mmoha ti mmoha a achu yaala enamukhala ookhweene okhala wookhala nave wi haaviiha yaawo? Hooye. Ntakhara heeni nnalocaahu yeela?
7. Tiheeni nihisuwenlaahu vooloca sa achu yaawo yaatoloxiwe ni Maahi Mancipale naari achu yaale yaatoloxiwe vaavaa Aisarayeli yaakuxaaya elapo ya Okanani? (Moone ya ekaapa.)
7 Hanisuwenle mukhalelo Yehova aathorinheiye wa mmoha ti mmoha a achu yaala; naari hanisuwenle wa yaale yaakhwile wi yaakhalano ekari ya ohuserya vooloca sa Yehova ni ocharuwa. Vooloca sa elukuluku ya Maahi Mancipale, Piipiliya onnaloca wi Nowa aari “mulaleeryi a sawookololowa.” (2 Pet. 2:5) Nyenya halonce wi, vaavaa owo aamutekeiye mwaaceya mutokotoko, iiha tho eereryaka waalaleerya achu oothene yaawo yaahaala ohoolela mu otoloxa wa Maahi mancipale. Mmukhalelo mmohamoha, nloko na Okanani, hannasuwela waakhanle wi achu oothene oonanara murima yaarimwi yaarino ekari ya ohuserya vooloca sa Yehova ni otoroka meecelo aya.
Nowa ni emusi awe empakaka mwaaceya mutokotoko. Henasuwanyeya waakhanle wi Nowa aahihoolela muteko woolaleerya waarehereryiwe variyari va elukuluku ya ompaka mwaaceya wi aakhwanihe wa achu oothene a veelaponi yavathi ehaakumve ophiya Maahi Mancipale (Moone eparakrafu 7)
8. Tiheeni nihisuwenlaahu vooloca sa achu o Sotoma ni Komora?
8 Hanka vooloca sa achu o Sotoma ni Komora? Mulopwana mmoha awookololowa awiicaniwa Loti, aakhala veeri va achu yaawo. Apwanne noosuwela wi Loti aahaalaleerya achu oothene yaawo? Hooye. Mweeparipari oothene yaari oonanara murima, apwanne yaanasuwela yeeyo yaari yaphaama? Muupuwele wi muloko wa achu a epooma yeele, yaachuna okonano alopwana yaale yaahan’ye vaate va Loti. Piipiliya onnaloca wi ophiyerya variyari va muloko yoowo yaakhalavo “amiravo ni awuuluvala.” (Map. 19:4; 2 Pet. 2:7, PMM) Apwanne noosuwela chiryene wi Muluku a ikharari Yehova aahaathorihela okhwa wa mmoha ti mmoha a achu yaale ehirivo ewehereryo ya ovinya mookhwani? Yehova aahimulipiha Aparahamu alocaka wi mu epooma yeele hiyaarimo achu awookololowa naari mano khumi. (Map. 18:32) Mwawiihiiha, awo yaari oohookololowa nave Yehova mweeparipari aahaatoloxa moorweela wa saweera saya. Apwanne mweeparipari nnanwerya oloca wi haavo a yaale onahaala “oviihiwa mookhwani wa . . . oohookololowa”? Hooye, hannaphwanela olocaka moolekecheya!
9. Tiheeni nihisuwenlaahu vooloca sa Solomoni?
9 Makupa makina, ninnaalakhanya Mpiipiliyani sa achu yaari awookololowa ohoolo waya ekhala oohookololowa. Mwene Solomoni yootakiherya emoha. Owo aahihusihiwa moomalela iphiro sa Muluku nave Yehova aahimureeliha vancipale; mwawiihiiha, ohoolo waya aahimuhiya Yehova anaalapela amuluku atheru. Soocheka sawe saahimweeriha Yehova okhala oonyeenyeya nave saahikumiherya sookhumelela soowaawa seiho saamalinhe masana masaneene. Eparipari wi soorepa sinnaloca wi Solomoni ‘aavithiwa ni makholo awe’, ophitaanyeryavo alopwana oororomeleya ntoko Mwene Tavite. (1 Mam. 11:5-9, 43; 2 Mam. 23:13, PMM) Nyenya mukhalelo owo aavithiweiye, apwanne eyo enooniherya wi onahaala oviihiwa mookhwani? Piipiliya hanaloca. Akina ananwerya wuupuwela wi “yoole okhwile ooleveleliwa yoocheka awe.” (Aro. 6:7) Eparipari, nyenya tahi wi enataphulela wi oothene yaale ekhwile enahaala oviihiwa, ntoko wi ewerye ophwanyeryavo ekari ya okhalano ekumi wanaawiili. Ovinya mookhwani ti yamahala ya Muluku oosivela. Owo onnaavaha yaale yiiveleenle wi emurumeele okhala wookhala. (Yupu 14:13, 14; Yoh. 6:44) Apwanne Solomoni onahaala waakhela yamahala yeela? Yehova tosuwenle naakhulo nene; Hiyaano hanisuwenle. Nyenya pahiru noosuwela wi Yehova onahaala opaka yeeyo eri yawookololowa.
TIHEENI NISUWENLAAHU?
10. Yehova onoona hai vooloca sa waatoloxa achu? (Esekiyeli 33:11) (Moone tho eruku.)
10 Mwaalakhanye Esekiyeli 33:11. Mukhalelo onaakhaliheiye ni mukhalelo onaathoriheiye achu, Yehova onnanooniherya mukhalelo owo oniisooneiye. Murummwa Petru aahiveereliwa wi iiwananihe yeeyo mulipa a miririmu Esekiyeli aarempeiye, ariki “Yehova . . . hanachuna wi muchu mmoharu mano atoloxiwe.” (2 Pet. 3:9) Nuupuwelelaka sa eparipari yeela yoolipiha, ennaneeriha osuwela wi Yehova hanaakuvela waatoloxa achu mu elukuluku emoha. Owo taikharari nave onnooniherya ikharari mahiku oothene wakhala wooweryeya.
Mu oviihiwa wa oohookololowa achu oohiyanahiyana anamukhalano ekari ya ohuserya vooloca sa Yehova (Moone eparakrafu 10)
11. Taani oni ahiviihiwe nave nnasuwela hai yeeyo?
11 Tiheeni nnasuwelaahu vooloca sa achu yaale eni ehiviihiwe? Piipiliya onnavaha sootakiherya savakhaani. b Yesu oothariha wi Yutasi Isikariyoti haviihiwa. (Mar. 14:21; mmoone tho Yohani 17:12 ni enoota ya ohuserya.) Yutasi aalakelela mwaayini opaka ichu saahiiwanana ni yookhwela ya Yehova Muluku ni Mwana Awe. (Mmoone Marku 3:29 ni enoota ya ohuserya.) Mmukhalelo woolikana, Yesu aaloca wi ahooleli akina a malapelo yaawo yaamuhoonxe yaahaala okhwa nave hiyaahaala okhalano ewehereryo ya ovinya mookhwani. (Mat. 23:33; mmone Yohani 19:11 ni enoota) Nave murummwa Paulo aaloca wi alipa oomwareya ni oohicharuwa heviihiwa tho mookhwani.—Ahe. 6:4-8; 10:29.
12. Tiheeni nnasuwelaahu vooloca sa ikharari sa Yehova? Mvahe sootakiherya.
12 Nyenya, tiheeni nsuwenlaahu vooloca sa ikharari sa Yehova? Ti mwawiihai owo oonihenryeiye wi “hanachuna wi muchu mmoharu mano atoloxiwe?” Muthokororye ikharari sawe moorweela wa yaale yaapanke soocheka itokweene. Mwene Tavite aahiivoliiherya mu soocheka itokweene, ophitaanyerya mararuwo ni wiipha. Mwawiihiiha, Tavite aahicharuwa nave mwa ikharari Yehova aahimulevelela. (2 Sam. 12:1-13) Mu elukuluku yincipale ya okumi, Mwene Manase aari oonanara murima. Naamwi mu elukuluku yoovila, Yehova aahooniherya ikharari ni amulevelela Manase woona wi owo aahicharuwa. (2 Math. 33:9-16) Sootakiherya seiya sinnanuupuxerya wi ilukuluku soothene Yehova onnooniherya ikharari vaavaa owo onooneiye wi aakhalavo mathowa aweerano yeeyo. Owo onahaala waaviha achu yaawo nthowa nawi awo yaahiiwexexa wi yaahipaka soocheka itokweene nave echaruwa.
13. (1) Ntakhara heeni Yehova oonihenryeiye ikharari wa a Ninive? (2) Tiheeni Yesu aalonceiye moovira wa elukuluku vooloca sa a Ninive?
13 Nave tho noosuwela vooloca sa ikharari sa Yehova ni wa achu o Ninive. Muluku aahi wa Yona: ‘Koosuwela soonanara aneeraaya.’ Nyenya vaavaa awo yaacharunwaaya soocheka saya, Yehova mooreera murima aahaakhurumuwela. Owo aari aikhararixa ompwaha Yona. Muluku aaphwanela omuupuxerya mulipa a miririmu oonyeenyeya wi a Ninive yaale ‘hiyaasuwela ohiyaniha yaphaama ni yoonanara.’ (Yona 1:1, 2; 3:10; 4:9-11, PMM) Ohoolo waya, Yesu aapharihela sootakiherya seiya wi ahusihe vooloca sa wookololowa ni ikharari sa Yehova. Yesu ooloca wi a Ninive yaale yaacharunwe yaahaala ovinya mu “nihiku na othoriha.”—Mat. 12:41.
14. Enataphulela eheeni wi a Ninive anahaala ovinya mu “nihiku na othoriha?”
14 Enataphulela eheeni wi a Ninive anahaala ovinya mu “nihiku na othoriha?” Yesu aahusiha vooloca sa ‘oviihiwa mookhwani ntakhara othorihiwa’ wa omwaahiyu. (Yoh. 5:29) Owo aaloca sa olamulelo awe wa iyaakha ncikhwi, variyari vaavo “awookololowa ni oohookololowa” eneeraaya eviihiwe. (Saw. 24:15) Wa oohookololowa, oni okhale ‘oviihiwa mookhwani wa othoriha.’ Naari wi, Yehova ni Yesu anampharihela ni waalikhela muupuwelo aya nave yoone tho mukhalelo eneeraaya yaakhulele mahusiheryo a Muluku. Wakhala wi mmoha a Aninive ooviihiwa mookhwani anakhooca omulapela Yehova, Yehova heemererya wi owo atitelele okhala. (Yes. 65:20) Nyenya wa oothene yaale anahaala othanla omulapela Yehova moororomeleya, othorihiwa waya onahaala okhala wamphurelo. Awo anamukhalano ewehereryo ya okhalano okumi okhala wookhala!—Tan. 12:2.
15. (1) Ntakhara heeni nnaphwanelaahu osepa oloca wi haavo wa yaale yaatoloxiwe o Sotoma ni Komora enahaala oviihiwa? (2) Nni niwerye hai wiiwexexa masu arempwe mu Yuta 7? (Moone ekaaxa “ Tiheeni Yuta Aachuneiye Oloca?”)
15 Alocaka sa achu o Sotoma ni Komora, Yesu ooloca wi awo yaahaala okhumelela phaama “mu Nihiku na Othoriha” ohiyana ni achu yaawo yii ekhooce mahusiheryo awe. (Mat. 10:14, 15; 11:23, 24; Luka 10:12) Tiheeni owo aachuneiye oloca? Nnanwerya wuupuwela wi Yesu aaloca mu elukuluku yeele wi atepihe. Mweeparipari ela henooniherya yeeyo, hiiha ntoko vaavaa owo aaloceiye sa Aninive. c Moohiyana, onakhala ntoko wi Yesu aachuna oloca yeeyo olonceiye vooloca sa achu o Sotoma ni Komora. Mu “Nihiku na Othoriha” nenlo owo otharinheiye mmakupa oothene, mweeparipari yaari echu emohamoha. Hiiha ntoko a Ninive, achu o Sotoma ni Komora yaahipaka ichu soonanara. Nyenya wa Aninive yaahikhalano ekari ya ocharuwa. Ohiya yeeyo, muupuwele sa yeeyo Yesu olonceiye sa ‘oviihiwa mookhwani ntakhara othorihiwa.’ Onahaala waaphitaanyerya ‘yaale epanke ichu soonanara ntoko Aninive, ni achu o Sotoma ni Komora.’ (Yoh. 5:29) Mwawiihiiha, onakhala ntoko wi yookhalavo ewehereryo wa achu o Sotoma ni Komora. Ti wooweryeya wi achu avakhaani a yaawo enahaala oviihiwa mookhwani nave nnanwerya okhalano ekari ya waahusiha yaawo vooloca sa Yehova ni Yesu Kristu!
16. Tiheeni nsuwenlaahu vooloca sa mukhalelo Yehova onahaaleiye olakelela sa taani onahaaleiye omviiha? (Yeremiya 17:10)
16 Mwaalakhanye Yeremiya 17:10. Eversikulu ela ennanikhaviherya opaka mukwasu wa yeeyo nsuwenlaahu: Pahiru ti Yehova yoowo ‘aavarerya murima, aalikhela muupuwelo wawiixeela.’ Vaavaa onalociwaaya sa ovinya mookhwani wa muhoolo, owo ‘onahaala omvaha mmoha ti mmoha mwawiiwanana ni meecelo awe.’ Yehova onahaala okhala oohicikinyeya wakhala woochuneya, nyenya a ikharari elukuluku yoothene wakhala wooweryeya. Mwawiihiiha, hannaphwanela ophiyerya makuchuwelo awi muchu haanono ewehereryo ya ovinya mookhwani, voohikhala wi noosuwela mwaha ene!
‘MUTHORIHA A ELAPO YOOTHENE’ ONAHAALA ‘OPAKA YEEYO ERI YAWOOKOLOLOWA’
17. Tiheeni enahaala weereya omwaahiyu wa yaale akhwile?
17 Ovinyerya vaavaa Atamu ni Eva yaamwiiwelenlaaya Satana nave emmwareela Yehova Muluku, macikhwi macikhweene a achu aakhwa. “Mwiicani, okhwa”, woopaka ohaca otokweene! (1 Ako. 15:26) Tiheeni enarwa ohoolo wa achu oothene yaala? Achu awaalakhanyeya, 144.000 a oomuchara a Kristu oororomeleya anamwaakhela oviihiwa mookhwani ntakhara okumi woohikhwa wirimu. (Wup. 14:1) Waaca wa achu oororomeleya alopwana ni athiyana yaawo anamusivela Yehova, anampaka makupa mu “ovinya muukhwani wa awookololowa”, nave wi ekhale ni okumi okhala wookhala veelaponi ya vathi yatitelela okhala awookololowa variyari va Olamulelo wa Kristu Iyaakha Ncikhwi ni variyari va yaweeha yookuchula. (Tan. 12:13; Ahe. 12:1) Nave tho variyari va iyaakha ncikhwi, “oohookololowa”—ophitaanyerya yaale ahintonko omurumeela Yehova naari mano ‘epanke ichu soonanara’—enamukhalano ekari ya otoroka meecelo aya ni okhala oororomeleya. (Luka 23:42, 43) Mwawiihiiha, achu akina yaari oonanaraxa ni oolakelela ommwareela Yehova ni yookhwela awe, owo oolakelela wi hiwaahaala okhalavo ovinya mookhwani ntakhara yaawo.—Luka 12:4, 5.
18-19. (1) Ntakhara heeni nnaphwanelaahu ororomela mu othoriha wa Yehova vooloca sa yaale akhwile? (Yesaya 55:8, 9) (2) Tiheeni nnahaalaahu othokororya mmwaha onacharela?
18 Apwanne nnanwerya ororomela moomalela wi vaavaa Yehova onaathoriheiye achu, owo ilukuluku soothene onapaka yoolakelela yawookololowa? Aai! Hiiha ntoko Aparahamu, iiwexenxeiye, Yehova toophaameya, a osuwela woothene nave a ikharari ‘muthoriha a elapo yoothene ya vathi.’ Owo oomuvyakiha Mwanawe ni amvaha othoriha woothene. (Yoh. 5:22) Yehova ni Mwanawe annawerya waalikhela murima wa mmoha ti mmoha wa muchu. (Mat. 9:4) Mmikhalelo soothene, anahaala opaka ‘yeeyo eri yawookololowa!’
19 Nikhale oolakelela omuroromela Yehova ni soolakelela sawe. Ninniiwexexa wi hanivahiwe ophwanelela wa othoriha—nyenya pahiru yoowo! (Mwaalakhanye Yesaya 55:8, 9.) Mwawiihiiha ninnahiya moororomeleya othoriha woothene wa owo ni Mwanawe, Mwene yoowo onuupuwelela moophaameya, awookololowa ni a ikharari sa Atiithi awe. (Yes. 11:3, 4) Tiheeni nnahaalaahu oloca vooloca sa mukhalelo wa Yehova ni Yesu eneeraaya yaathorihe achu mu yoohooxa etokotoko? Tiheeni nihisuwenlaahu? Nave tiheeni nisuwenlaahu? Mu yoohuserya ahu enacharela enahaala othariha ipontu seiho.
NCIPO 57 Mwaalaleerye Achu Oothene
b Vooloca sa Atamu, Eva ni Kayini, mmoone Mulipeleli, 1 a Yaneru a 2013, epaaxina 12 ni enoota.
c Wakhala wi muchu onnaloca masu oosiviha onatepiha yeeyo onaloceiye wi aceenyerye epontu ene, nyenya hanakhalano yoolakelela wi masu awe yiiwexexiwe mmukhalelo wookwakwaleya. Nyenya vooloca sa masu Yesu olonceiye sa achu o Sotoma ni Komora yaari ooluluwanya, mwawiihiiha tahi wi yaari oosiviha.
