KINNUUPUWELA wooxixelo wa nihiku nooriirya o Brookings, South Dakota, E.U.A iyaakha sincipale ivinre. Kaanasuwela wi elukuluku yooriirya yaahala ophiya mwawaakuveya. Kaari mu nikhukwa vamoha ni aachu vakhaani, nave naanathukumela nthowa na oriirya. Naari waacamela etankhi etokweene ya maahi ooriirya! Kinachuna wooleelaani sa okumi aka wi mwiiwexexe ntakhara heeni kaaryaaka mu nipuro nenle.

Kiyariwe mu 7 a Marsu 1936. Asitiithi aka yaarino anamwane axexe, nave miyaano kaari echaako. Nakhala mu nipuro nikhaani o Brookings South Dakota. Olima waari muteko woochuneya wa emusi ahu, nto hiyaari yeeyoru. Asitiithi aka yaapatisiwa ntoko Anamoona a Yehova mu 1934. Awo yaaveleela okumi aya wa Yehova, mwawiihiiha weera yookhwela ya Muluku yaari echu yoochuneyaxa wa vaya. Apapa Clerence ni ataata Alfred yaarumeela ntoko murummwa a nikhuuru (yoowo olelo oneeriwa muhooleli a nikhuuru na atokweene) mmuloko mukhaani o Conde, South Dakota.

Emusi ahu yaanaya mmithukumano ni oya empa ni empa wi naaleele akina ewehereryo ya Mpiipiliyani. Yootakiherya yaphaama ya asitiithi ni onivyakiha waya waanikhaviherya omusivela Yehova. Miyaano ni murokora aka Dorothy naakhala alaleeryi nrino iyaakha thanu nammoha. Mu 1943 kaahiirepiha mu Exikola ya Orummwa Woomuluku yeeyo yaampaceryaru.

Mithukumano sa ekulucu ni sa muceche saanapaka makupa ookhweleya a okumi ahu. Nlelo kinnuupuwela muthukumano wa muceche wa 1949 o Sioux Falls, South Dakota. Munna  Grant Suiter aaloca mwaha waarino muru: “Elukuluku Yoomala!” Aacicimiherya wi Akristu awiiveleela oothene anaphwanela opharihela okumi aya mmuteko wa olaleerya michaka yaphaama ya Omwene wa Muluku. Voocharela kaaperekha okumi aka wa Yehova. Kaapatisiwe mmuthukumano wa ekulucu woocharela mu 12 a Novempuru a 1949. Ti nthowa nene kaaryaaka mu nikhukwa nenle nooriirya kiromonlaaka woopaceryani. Hiyaano axexe niiso niweheryaka opatisiwa mu etankhi etokweene ya muthipo.

Kaalakelela ovolowa mmuteko wa opiyoneero. Mu 1 a Yaneru a 1952 kaahipacerya muteko wa opiyoneero kirino iyaakha 15. Piipiliya oni: “Onetxa ni atxhu a miruku, onamukhala namiruku,” nave mu emusi aka yaahikhalamo achu ancipale a miruku yaawo yaakikhavihenrye ni yoolakelela aka ya opiyoneero. (Masiposipo 13:20) Ikwaha sincipale kaanalaleerya ni ataata Julius yaawo yaarino iyaakha 60. Naamwi vaya yaari mutokweene okipwaha miyaano, naanasiveliwa olaleerya vamoha. Kaahihuserya ichu sincipale moorweela wa yaawo. Ohoolo waya Dorothy aahikhalatho piyoneera.

Kaaryaaka mwaana, asitiithi aka yaanaawopa ooweherya a weeceeca ni asaaraya wi nikhale vamoha. Mutheli mmoha, Jesse ni mwaariye Lynn Cantwell, yaatepa okikhaviherya. Vaya yaanakipwacha ni okilipiha. Vaavaa yaaxekuryaaya muloko wa vakhiviru, vakina vaya yaanakiwopa wi nikhale vamoha mu olaleerya. Chiryene kaanasiveliwa okhala ni yaawo! Kaanachuna okhalaka ooweiwa ni muteko wa Yehova hiiha ntoko yaawo.

Ooweherya ahu a weeceeca oocharela aari munna Bud Miller. Vaavaa owo ni mwaariye Joan, yaaxekunryaaya muloko ahu, kiiso kirino iyaakha 18. Mweelukuluku yeeyo kaavekiwa othukumana ni alamuleli yaawo anaathanla achu wi eye okhoconi. Yaakiruma ophara muteko yoowo waari woovuhana ni nlamulo na Yesu na ohipaka makupa a elapo. Nto miyaano kaanachuna olaleerya michaka ya Omwene. (Yohani 15:19) Mwawiihiiha kaahaaveka wi ekooneke ntoko mulaleeryi.

 Kaahitepa ohakalala vaavaa Munna Miller aalonceiye wi aahaala okihoola wi naloce ni alamuleli awo. Munna Miller huuliwa muru nave achu yaanamucicimiha. Aasuwelatho phaama Soorempwa. Okhala vamoha ni yoowo yaakivaha olipa murima! Mu elimwi ya 1954, ntoko yookhumelela ya oloca ni alamuleli, awo yaaheemererya yooveka aka wi ekooneke ntoko mulaleeryi. Ohoolo waya alamuleli yaaheemererya yooveka aka nave kaataphuwa wi kimulapele phaama Yehova.

Evinre elukuluku vakhaani, kaawompwa orumeela o Peteli nave kaanalapa mu Emaca ya Torre de Vigia o Staten Island, Nova York. Kaahiphara muteko yoowo mu iyaakha raru. Kaakhalano saweereya sootikhiniha nthowa nawi kaahaasuwela anna ni arokora ancipale a miruku yaawo karumeelaakano vamoha.

Emaca eyo ya Nova York yaanaphitaanyerya tho misora sa raatiyu WBBR. Raatiyu owo aanaphariheliwa ni Anamoona a Yehova opacerya 1924 ophiyerya 1957. Pahiru achu 15 naari 20 a emusi ya Peteli, yaathanliwa wi elapeke mu emaca eyo. Ancipale a hiyo naari amiravo nave hinaarino masuwelelo. Nto aakhalavo munna mmoha awoocihiwa yoowo aalapa ni hiyo nsina nawe Eldon Woodworth. Vaiye aari ntoko tiithi nave aananihusiha ichu sincipale. Ikwaha ikina vaavaa nakhalaahuno makacamiho mukina ni mukhwaawe, munna Eldon Woodworth aanaloca ariki: “Echu Yehova oneereiye ti yootikhiniha naamwi achu ene eri oohiphaameya.”

Munna Frederick W. Franz aaritho ni hiyo nave aanikhaviherya oothene. Aari a miruku nave aanamwiiwexexa phaama Piipiliya nave aanamuthokororya mmoha ti mmoha a hiyo. Mulipa a waapeya ahu aari Harry Peterson. Waananikhweela omwiichanela nsina nawe nookuchula, ohiya nsina nawe noopacerya Papargyropoulos. Yene aari awoocihiwa nave aanasiveliwa olaleerya. Munna Peterson aanaphara phaama muteko o Peteli navetho haacompela olaleerya. Aanawerya okawa irevista masaneene mweeri ti mweeri. Vaiye aanamwiiwexexatho Piipiliya nave aanaakhula makoho ahu mancipale.

Muteko ahu mu emaca waanaphitaanyerya orehererya sawiima ni okhapelela mmapotoroni. Mu eyaakha emoha sawiima soorehereryiwa saanaakhwana iliitru 42.600 wi iphariheliwe ni emusi ya o Peteli. Kaanalapa vamoha ni murokora a miruku awiichaniwa Etta Huth. Owo aanarepa sooleeliherya sa orehererya sawiima. Arokora a vanipuroni yaanarwa wi ekhaviherye, nave Etta aanaakawela muteko. Naamwi Etta aarino masuwelelo mancipale vooloca sa okhapelela sawiima, owo aanaacicimiha anna yaawo yaari ahooleli ahu. Yene aahivaha yootakiherya yaphaama wa oothene hiyo.

Angela Romano aari murokora yoowo arwa okhaviherya. Etta aamukhaviherya vaavaa aapacenryeiye ohuserya eparipari. Miyaano ni Angela naapaka othela mu Apirili a 1958 nave noopuha omurumeela Yehova vamoha iyaakha 58. Mu iyaakha soothene ivirale, Angela omuroromela wawe Yehova onneeriha wi othela wahu okhale woolipa. Yene tamiruku, nave kinnamuroromela ni murima woothene moohipwacha makacamiho.

Vaavaa anna yaatuminhaaya misora sa WBBR mu 1957, kaarumeela o Peteli ya Brooklyn mweelukuluku vakhaani. Ohoolo waya naakhuma o Peteli. Naakhala mapiyoneero o Staten Island mu iyaakha raru. Ohoolo waya kaanalapa mmisora sa raatiyu aachu akina iichaniwa WPOW.

Miyaano ni mwaaraka naakhweiha okumi ahu wi nikhale ootaphuwa orumeela weiwo neeraahu nivekiwewo. Mu 1961 naaheemererya nwopelo wa okhala mapiyoneero avameekhaaya o Falls City, Nebraska. Naaphiyalaahu weiwo naamalinhe elukuluku vakhaani nave naarummwa oya o Lasing, Nova York wi nivolowe mu Exikola ya Orummwa wa Omwene. Naasiveliwa ni ovyakiha naavahiwaahu nave naanuupuwela wi nakwaasa exikola naahaala oya o Nebraska. Mwawiihiiha, naatikhina vaavaa naarummwalaahu okhala mamisiyonaario o Cambodia! Vaavaa naaraahu weiwo, naahoona, naahiiwa nave naaheererya ichu ivyaani wa hiyo. Hiyaano chiryene naanasiveliwa waaleela achu vooloca sa Omwene.

Nto mukhalelo o Cambodia waatorokeya nave naachawela o Vietnam. Iyaakha piili ohoolo waya kaatepa wiiceliwa nave naakookela o Estatu Unitu. Yaanachuneya elukuluku wi kipenuwe. Vaavaa kaapenunwaaka, naakookela opiyoneero.

Mu Marsu a 1965 naapacerya muteko wa weecelela miloko. Miyaano ni mwaaraka naanasiveliwa ni muteko wa weeceeca ni wa epooma mu iyaakha 33 nave naanakhaviherya mithukumano sa miceche. Kaanasiveliwa ni muteko yoowo woona wi mithukumano sa muceche yakhala elukuluku yoohakalaliha wa miyaano. Noheecelela miloko orukurerya elapo ya Nova York, nave mithukumano mincipale sa muceche seereya o Nipuro Ntokweene na Yankee.

Mu iyaakha sivinre miyaano ni mwaaraka naanaakhela miteko mivyaani ni soovila. Mu 1995, kaavekiwa okhala muhusiha a Exikola  ya Arummwa. Iyaakha raru ohoolo waya, naawompwa okookela o Peteli. Kaahakalala okookela o Peteli weiwo kaapacenryaakawo orumeela iyaakha 40 muculi. Voocharela, kaarumeela mu Nikhuuru na Muteko ni ntoko muhusiha a ixikola soohiyanahiyana. Mu 2007 Nikhuuru Noolamulela naahipaka Nikhuuru na Ixikola Soomuluku wi nihooleleke ixikola soothene sa o Peteli, nave kaakhala mulipa ooweherya a nikhuuru nenlo mu iyaakha vakhaani.

Mu iyaakha sahiihaanoru, aapakiwa matorokelo mancipale mu ixikola sa o Peteli. Exikola ya Atokweene a Muloko epacenrye mu 2008. Nave mu iyaakha piili soocharela, atokweene opwaha 12.000 aahusihiwa o Patterson ni o Peteli ya o Brooklyn. Vano isikola iho sinnatitelela opakiwa mmapuro makina. Mu 2010, Exikola ya Arummwa, yaaraceelihiwa ni Exikola ya Piipiliya ya Anna Oohithela, nave exikola ekinatho yaahipakiwa, yeeyo eniichaniwa Exikola ya Piipiliya ya Akristu Athenle.

Mu Setempuru a 2014, ixikola iha piili saahipweseherihiwa nave eniichaniwa Exikola ya Alaleeryi a Omwene. Exikola yaahaala oyaakawo atheli, ni aciye. Ancipale orukurerya elapo yaatepa ohakalala yiiwalaaya wi exikola eyo yaahaala opakiwaka mu elapo ayatho. Echu yoohakalaliha osuwela wi ancipale anahaala okhalano ekari ya opaka ixikola seiya. Nave kinnathamalela waasuwela ancipale apanke matorokelo mu ikumi saya wi ewerye waakhela ovyakiha yoola.

Kaawuupuwelaka sa okumi aka kihaakumve opatisiwa mu nipuro nenle nooriirya, ophiyerya olelo, kinnamuthamalela Yehova ntakhara achu a miruku kaasuwenlaaka. Awo aakikhaviherya omusuwela ni omurumeela phaama Yehova. Akina yaari amiravo okipwaha miyo nave akina yaari awunnuwelavo. Nave ancipale yaari a sookhovelela soohiyana ni sawaka. Nyenya koowerya woona orweela wa saweera ni moonelo aya wi yaanamusivela vancipale Yehova. Kootepa ohakalala okhalano asinthamwene ancipale amiruku variyari va Anamoona a Yehova kinaweryaaka ohuserya orweela wa yaawo.