1. Ntakhara heeni achu annaphwanela ncicimiho, nave tiheeni nnayaahu ohuserya mmwaha yoola?

NNI naacicimihe hai akina? Nneerano yeela moorweela wa waapwacha ni waacicimiha. Ikwaha sincipale ninnaacicimiha yaale apanke echu yoocicimiheya naari arino murici wavameekhaaya. Mmwaha yoola, nnahaala ohuserya taani nnaphwanelaahu omucicimiha nave ntakhara heeni.

2, 3. (a) Ntakhara heeni Yehova onnaphwanela ncicimiho navameekhaaya? (Moone eruku yoopacerya.) (b) Epucepuche enalociwa mu Wupulula 5:13 taani, nave ntakhara heeni nnaphwanelaahu omucicimiha?

² Wupulula 5:13 onnaloca ariki: “Wa yole okiranthe vehitxheni” ni “eputxeputxhe” onnaphwanelela ncicimiho. “Wa yole okiranthe vehitxheni” onahimmwa Yehova. Mu Wupulula ecima 4, soopatusiwa wirimu sinnanooniherya ntakhara heeni Yehova “onakhala mahiku othene,” onnaphwanelela ocicimihiwa. Iho saaloca: “Òphwanela ti weyo Pwiya Muluku ahu wakhela ovuwa, ntxitximiho ni owerya wona wi opatunse itxhu sothene nave sopatusiwa sinnakhala wa nthowa na okhwela wà.”—Wupulula 4:9-11.

³ “Eputxeputxhe” enalociwa mu Wupulula 5:13 ti Yesu  Kristu. Nnasuwela hai? Vaavaa aareiye veelaponi yavathi, Yesu iichaniwa “eputxeputxhe ya Muluku, enatxipiha yotxheka ya elapo.” (Yohani 1:29) Mwene taani mukina otonko wiivaha okhwa wi awoopole achu awe? Chiri, nla nthowa noophwanelela na omucicimiha yoowo. Yesu onnaphwanela ocicimihiwa ntakhara wi owo “mwene a mamwene ni Pwiya a asipwiya.” (1 Timóteo 6:14-16) Akhweya munnoona ntoko soopatusiwa wirimu seiyo siipale iriki: “Eputxeputxhe yiphiwe ennaphwanela wakhela owerya, orèla, miriku, ikuru, ntxitximiho, ovuwa ni nthamalelo.”—Wupulula 5:12.

4. Ntakhara heeni ti yamiruku wa hiyaano omucicimiha Yehova ni Kristu?

⁴ Yoorepa ya Yohani 5:22, 23 enaloca wi Yehova oomweera Yesu muthoriha aachu oothene. Nla nthowa ntokweene nnaneeriha omucicimiha Yesu. Nave vaavaa nneeraahu yeela, ninnamucicimihatho Yehova. Vaavaa nnathanlaahu omucicimiha Yesu ni Atiithi awe, nnahaala okhalano ekumi yoohimala.—Mwaalakhanye Salumu 2:11, 12.

5. Ntakhara heeni achu oothene annaphwanela ncicimiho?

⁵ Achu apatuxiwe “vomulatxa Muluku.” (Maphatxuwelo 1:27) Ela enataphulela wi achu aakhalano mavyakelo a wooniherya mikhalelo inalikana ni seiyo Muluku oreiyeno. Ntoko yootakiherya, achu ananwerya wooniherya osivela, mahala, ni ikharari. Achu tho apatuxiwe ni oleela-wa-murima ni mukhalelo wa osuwela yaphaama ni yoonanara. (Aroma 2:14, 15) Achu ancipale annasiveliwa ni ichu saphaama ni sooreera nave annachuna okhalano murecele ni akina. Ela tahi echu yookhwa minikwa, ntakhara wi Yehova ti Muluku oorehererya ni a murecele. Mweevelevelo, achu oothene apatuxiwe ni mavyakelo a omutakiherya Yehova mmikhalelo soohiyana. Wa nthowa nenla, awo annaphwanela waakhela ncicimiho nahu.—Salumu 8:6.

6, 7. Anamoona a Yehova anahiyana hai ni achu ancipale vaavaa anooniheryaaya ncicimiho wa akina?

⁶ Noosuwela wi achu akina annaphwanela ocicimihiwa, nyenya onamukhala woovila osuwela ncicimiho na mukhalelo taani nnaphwanelaahu waavaha nave ophiyerya mweeryo taani. Nthowa nawi achu ancipale ohiphaameya annavoloweliwa ni mikhalelo sa elapo ya Satana. Achu ancipale annaapaka alopwana naari athiyana okhala soophwaniherya saya. Ohiya waavaha ncicimiho ntoko Yehova onachuneleiye, awo annaacicimiha vancipale achu, yaakhalihaka ntoko amuluku. Awo annatakiherya soowara, makhalelo aya ni meerelo vooloca sa opaka makupa a elapo ni ahooleli a ikerexa, alipa oochimaka, ixilema ni achu akina oovuwa.

⁷ Akristu eeparipari annasuwela wi waahaala okhala woonanara waacicimiha vancipale achu. Variyari va achu oothene yaakhanle, pahiru Yesu tonivanhe yootakiherya yaphaama ya omutakiherya. (1 Pedro 2:21) Nnaphwanela wuupuwela wi “atxhu othene àtxheka ni àthoiwa ovuwa wa Muluku.” (Aroma 3:23) Haavo muchu onaphwanelela olapeliwa. Vaavaa nnaavahaahu achu ncicimiho nincipale, Yehova hanahakalala.

8, 9. (a) Anamoona a Yehova anawoona hai alamuleli? (b) Mmikhalelo taani nihinaphwanelaahu owiiwelela alamuleli?

 ⁸ Akhalawo achu akina yaawo anaphwanela ocicimihiwa nthowa na muteko aya. Ntoko yootakiherya, muupuwele sa alamuleli ni yeeyo anapakaaya. Awo annakhaviherya okhapeleleya wa amwaacamani ni waakhwaniherya soochuna sa achu aya. Wookhalavo mphurelo mutokweene wa muteko aya. Murummwa Paulo ooloca wi nnaphwanela owoonaka alamuleli awo ntoko “asitokwene a elapo.” Owotho ooloca wi nnaphwanela ocharihaka malamulo aya: “Tiva wa mutxhu ti mutxhu eri yophwanelela: muliveke musoko ni itxhu ikina munaphwanelanyu” nave “mwavuwihe yale anaphwanela ovuwihiwa.”—Aroma 13:1, 7.

⁹ Sintoko Anamoona a Yehova, ninnapaka soothene nnaweryaahu wi niwooniherye wi ninnaacicimiha. Mweeparipari, elapo ti elapo yookhalano yookhovelela emoha, mwawiihiiha yeeyo alamuleli anaweheryaaya wa hiyo mu ekulucu emoha enamuhiyana ni yeeyo anaweheryaaya mu ekulucu ekina. Naamwi hiiha, ninnaakhaviherya alamuleli vaavaa analapaaya muteko aya. Nyenya, wakhala wi aaniveka opaka echu yeeyo enahaala oneeriha ohimwiiwelela Yehova, hannapaka echu ene yeeyo. Mmikhalelo seiyo, nnamwiiwelela ni omucicimiha Yehova wapwaha achu.—Mwaalakhanye 1 Pedro 2:13-17.

10. Akapuro a Yehova akhalai anihiyenre hai yootakiherya yaphaama?

¹⁰ Nnanwerya ohuserya orweela wa akapuro a Yehova akhalai, yaawo yaaciciminhe alamuleli aya. Yosefe ni Mariya yootakiherya yaphaama. Vaavaa alamuleli o Roma yaachunaaya osuwela achu ahai yaakhala mu elapo yeele, Yosefe ni Mariya yaahipaka mukwaha eyaaka o Petelehemu wi yarepeliwe naamwi Mariya ahalaka vakhaani oyara. (Luka 2:1-5) Murummwa Paulo yootakiherya ekina ya muchu yoowo aaciciminhe olamulelo wa achu. Vaavaa ootheriweiye opaka ichu soonanara, moocicimiheya ahiisaakiha vamiithoni va Mwene Herote Akripa ni Festo, mulamuleli o Roma, muceche wa Yuteya.—Saweriwa T’arummwa 25:1-12; 26:1-3.

11, 12. (a) Ntakhara heeni hannaphwanela waavaha ahooleli a malapelo ncicimiho navameekhaaya? (b) Tiheeni yeeren’ye vaava Namoona o Australiya oonihenryeiye ncicimiho wa mulamuleli?

¹¹ Hanka vooloca sa ahooleli a malapelo? Apwanne ninnaphwanela waavaha ncicimiho navameekhaaya? Nnaavaha ncicimiho nimohamoha naahaalaahu omvaha muchu vyakala. Nyenya waahaala okhala woonanara waavaha ncicimiho navameekhaaya, naamwi echunaka. Ntakhara heeni? Nthowa nawi ikerexa sawootha hasinahusiha eparipari vooloca sa Muluku ni Masu awe Piipiliya. Yesu aahaalokoha ahusiha a ikerexa sawootha nave aawiichana ntoko anawiisootherye ni ahooleli oowoka. (Mateu 23:23, 24) Mmukhalelo mukina, hiwaahaala okhala woonanara wooniherya ncicimiho navameekhaaya wa alamuleli. Ntoko yookhumelela ya weerano yeeyo, veelukulukuni vaya annanikhaviherya.

¹² Mulamuleli mmoha aari Dr. Heinrich Gleissner, o Australiya. Variyari va Ekhoco Etokweene Yanawiili, owo aahiphariwa ni anakhoco a wa Alemanya. Vaavaa aawelihiweiye mu khompoiyu wi akerihiwe o nikhuuru na alipa oophariwa, aahimusuwela  Leopold Engleitner yoowo aari Namoona a mvai o Australiya. Munna Engleitner moocicimiheya aahimutharihela Dr. Gleissner soororomela sawe, yoowo anwiriyanne moomaaleleya. Vaavaa ekhoco yaamanlaaya, wiiliwiili Gleissner aahipharihela olamulelo awe wi aakhaviherye Anamoona o Australiya. Akhweya moosuwela sootakiherya ikina wa ichu saphaama seeren’ye nthowa na Akristu wooniherya ncicimiho wa alamuleli.

13. Taani xaxaxa onaphwanela ncicimiho nahu, nave ntakhara heeni?

¹³ Anna ni arokorahu annaphwanela ncicimiho. Ela eparipari xaxaxa wa anna yaale ari ahooleli mmulokoni, ntoko atokweene, ooweherya aweececa, anna a Nikhuuru na Efiliyale, ni a Nikhuuru Noolamulela. (Mwaalakhanye 1 Timóteo 5:17.) Oothene yaawo annakhapelela soochuna sa achu a Muluku nave Piipiliya onaaloca akapuro awo ntoko samahala sa “atxhu.” (Éfeso 4:8) Mwawiihiiha ti woophwanelela waacicimiha moohipwacha elapo aya, ohusihiwa waya, muteko, naari waaca wa muhakhu aya. Akristu oopacerya aanihiyerya yootakiherya yaphaama. Awo yaanaacicimiha achu yaale yaahoolela, navetho ninneera emohamoha olelo. Wakhala wi nri ni alopwana yaawo, hannaacicimiha ntoko ankeelo, eyo ti wi, ntoko anakuru. Nyenya ninnaacicimiha ntakhara muteko aya wakuru ni wiiyeviha.—Mwaalakhanye 2 Korinto 1:24; Wupulula 19:10.

14, 15. Atokweene Eekristu anahiyana hai ni ahooleli ancipale a ikerexa?

¹⁴ Atokweene yaala analikana ni akukhula awiiyeviha. Awo hanachuna okhalihiwa ntoko achu oovuwa. Toohiyana ni ahooleli  a ikerexa satheru, hiiha ntoko ahooleli a ikerexa mmahiku a Yesu. Owo aahiloca sa yaawo ariki: “Onnàsivela okirathi va nipuroni wotxitximiheya molyani ni mmathukumaneloni, onnàsivelatho olotxeliwa mumphironi.”—Mateu 23:6, 7.

¹⁵ Atokweene Eekristu anniiwelela masu a Yesu: “Nto nyuwo muhitxhaniweke muhusiha, wona wi muhusihanyu ori mmoharu, ni nyuwo othene onnanyu. Mwilaponi ahikhalevo muneranyu mmwitxhaneke tithi, wona wi Tithinyu ori mmoharu, yowo a wirimu. Nave muhitxhaniweke muhusiha, wona wi muhusiha anyu ori mmoharu, Kristu. Yole ori mutokwene anyu akhale mulapeli anyu. Yole onisunnuwiha onarwa ayevihiwa. Nave yole oniyeviha onarwa annuwihiwa.” (Mateu 23:8-12) Vaavaa atokweene a miloko soothene orukurerya elapo anakhalaaya awiiyeviha ni wiiwelela masu a Yesu, anna ni arokoraya anahaala waasivela, owiiwelela ni waacicimiha.

16. Ntakhara heeni nnaphwanelaahu otitelela wiilipiherya wooniherya ncicimiho?

¹⁶ Akhweya enamviravo elukuluku yincipale wi nihuserye mukhalelo wa waacicimiha akina. Ela yaaritho eparipari wa Akristu oopacerya. (Saweriwa T’arummwa 10:22-26; 3 Yohani 9, 10) Nyenya nnaphwanela wiilipiherya. Vaavaa nnaacicimihaahu akina mmukhalelo Yehova onachuneleiye, nnahaala waakhela mareeliho mancipale.

17. Miphurelo taani nnakhalaahuno mu waacicimiha achu arino olamulelo?

¹⁷ Vaavaa nnaacicimihaahu ni owiiwelela achu arino olamulelo mmuceche ahu, awo annaakiha muteko ahu woolaleerya. Ophiyerya wi annakhalano moonelo wooreera vooloca sa muteko ahu woolaleerya. Ti yeeyo yeeren’ye iyaakha sincipale muculi wa Alemanya vaavaa piyoneera iichaniwa Pirkit aakeleiye woona okwaaxa wa exikola ya mwanawe mwaamuthiyana. Ahusiha yaahimuleela Pirkit wi waari woohakalaliha okhalano anamwane a Anamoona oxikola mu iyaakha ivirale. Awo yaahoona wi anamwane a Anamoona yaaheeriha exikola okhala nipuro naphaama. Pirkit aahaaleela wi, “Anamwanaahu annahusihiwa ochara meecelo a malakiheryo a Muluku, nave eyo enavolowela waacicimiha ni owiiwelela ahusihaaya.” Muhusiha mmoha aaloca wi waakhanle wi anamwane oothene yaari ntoko Anamoona, ohusiha waahaala okhala wookhweya. Awo yaahikhalano moonelo yoowo wa anamwane a Anamoona, ophiyerya wi isumana sincipale ohoolo waya, mmoha a ahusiha yaale aahiphiya va muthukumano wa muceche.

18, 19. Tiheeni nnaphwanelaahu wuupuwelela vaavaa nnaacicimihaahu atokweene?

¹⁸ Malakiheryo anaphwanyeya mu Masu a Muluku annanikhaviherya wiiwexexa mukhalelo wa waacicimiha atokweene a  mmulokoni. (Mwaalakhanye Ahebri 13:7, 17.) Nnanwerya nave nnaphwanelela waathamalela ntakhara muteko aya wakuru. Vaavaa nniiwelelaahu ohoolela ananivahaaya, eyo enahaala waakhaviherya orumeela moohakalala. Piipiliya tho onnaloca wi nnaphwanela otakiherya weemererya naari nroromelo naya. Nyenya eyo henataphulela wi nnaphwanelela weererya otakiherya mikhalelo soothene, ntoko mawarelo aya, malocelo, naari ohusiha waya. Wakhala wi ninnapaka hiiha, enakhala ntoko wi nnaachara achu opwaha Kristu. Nihicuwale wi atokweene toohiphaameya hiiha ntoko hiyaano.

¹⁹ Wakhala wi ninnaacicimiha atokweene ni ohaakhaliha ntoko achu oochuneyaxa, eyo enahaala waakhaviherya. Mwawiihai? Onamukhala wookhweya wa yaawo okhala awiiyeviha ni osepa muupuwelo wawi awo taphaama waapwaha akina, naari wi yeeyo anapakaaya wiiliwiili ti yoophwanelela.

20. Nnaphura hai vaavaa nnaacicimihaahu akina?

²⁰ Waacicimiha akina ennanikhaviherya osepa okhala a nrima nave ennanikhaviherya otitelela wiiyeviha vaavaa nnavahiwaahu ncicimiho navameekhaaya. Eyotho ennanaakiha woona wi ennanikhaviherya ohikwaculeya wakhala wi muchu nnamucicimihaahu ooninyeenyeiha. Mphurelo mukina ti wawi ennaneeriha okhala awaataana ni marehereryo a Yehova. Marehereryo a Yehova hanamvaha muchu ncicimiho noopwaha mphimo, moohipwacha aakhanle Mukristu naari hooye.

21. Mphurelo taani ori woochuneyaxa wa waacicimiha akina?

²¹ Mphurelo woochuneyaxa wa waacicimiha akina ti yawi ninnamuhakalaliha Muluku. Nnahaala otitelela opaka yeeyo owo onachuneiye wa hiyo ni otitelela oororomeleya wa yene. Voocharela, Yehova onahaala omwaakhula Satana, yoowo olonce wi haavo onawerya okhala oororomeleya. (Masiposipo 27:11) Achu ancipale haniiwexexa mukhalelo wa waacicimiha akina moophwanelela. Ninnathamalela osuwela ocicimiha mmukhalelo Yehova onachuneiye!