Mu 2012, alipa ootholathola yaaphwanya mavali a muno alekenle iyaakha 3.000. Otholathola iwo waari wootikhiniha. Ntakhara heeni? Tahi nthowa na mavali a muno nyenya masu yaaphwanyeya va mavali awo.

Vaavaa alipa ootholathola yaacopaanyenryaaya mavali oothene, yaahiwerya waalakhanya soorepa sa Akanani saarepiwe va muno. Iho saaloca: “Eshba’al Ben Beda,” seiyo sinataphulela “Esibayali, mwana a Beda.” Ela yaari ekwaha yoopacerya alipa ootholathola yaaphwannyaaya nsina nenlo nrepiwe va muno wakhalai.

Ookhalavo muchu mukina oniichaniwa Esipayali yoowo onaromoliwa Mpiipiliya. Owo aari mwaana a Mwene Sawuli. (1 Matharihelo 8:33; 9:39) Muhusiha Yosef Garfinkel, mmoha a yaawo yaaphwannye muno, ooloca: “Echu yootikhiniha osuwela wi nsina Esipayali ninnaphwanyeya Mpiipiliyani, nto alipa otholathola aphwannye pahiru variyari va olamulelo wa Mwene Tavite.” Ela yawooniherya ekina yawi alipa ootholathola annamweemererya Piipiliya!

Mpiipiliyani, mwaana a Sawuli Esipayali onniichaniwatho Isiposete. (2 Samuwele 2:10) Vano ntakhara heeni “bayali” naaraceelihiwaaya ni “boseti”? Sootholathola sinnathariha wi namarepa a Liivuru Anaawiili a Samuwele akhweya aanoovelela opharihela nsina Esipayali nthowa nawi naanawuupuxerya Aisarayeli sa Pala, muluku a echeku yoowo Akanani yaamulapelaaya. Nyenya, mu Liivuru Oopacerya a Matharihelo, ninnawerya ophwanya nsina Esipayali.