MUCHU ti muchu a hiyo onnachuna wi akina emooneke okhala muchu aphaama. Nyenya, wooniherya oreera murima ti woovila mu elapo yamutano. Achu ancipale “amwiicani a saphaama.” (2 Tim. 3:3) Awo annakhooca malakiheryo a Yehova. Yeeyo owo onaloceiye wi ti yaphaama, awo analoca wi ti “yoonanara” yeeyo onaloceiye wi ti yoonanara awo analoca wi ti “yaphaama.” (Isa. 5:20) Ti woovilatho okhala aphaama nthowa nawi noovoloweliwa moonanara nave naachu oohiphaameya. Mwawiihiiha, nnamwiisoona ntoko Ana,  * murokora yoowo onamurumeela Yehova mu iyaakha sincipale. Owo ooloca: “Ti yoovila wa miyo weemererya wi kinanwerya okhala muchu aphaama.”

Yoohakalaliha tiyawi, oothene ahu nnanwerya okhala oreera murima! Oreera murima onarweela wa munepa waweela wa Muluku, nave munepa awe ti wakuruxa opwaha echu eri yoothene yeeyo yaahaala onihiiha wunnuwiha mukhalelo yoola. Hankooni nthokororye vooloca sa oreera murima nave nihuserye mukhalelo wa wooniherya mukhalelo yoola moopwahaxa.

Oreera murima onavolowela muupuwelo ni meecelo aphaama, ohikhanlevo onanara naari otakhala. Oreera murima onooneya orweela mwa waakhaviherya akina.

Apwanne munoona wi muchu yoowo onapaka ichu saphaama wa amusi awe ni asinthamwene awe, tooreera murima nave owo onaphwanela okotela vaavaa? Mweeparipari, haavo a hiyo yoowo onakhala aphaama ilukuluku soothene, ntakhara wi Piipiliya ooloca: “Haamo muchu awookololowa murima mweelaponi oneera saphaama ohintonko ocheka.” (Ekle. 7:20) Murummwa Paulo ooloca: “Koosuwela wi mwa miyo, mu omuchu aka, homankemo yaphaama.” (Aro. 7:18) Mwawiihiiha, ti yawooneya wi nnaphwanela ohuserya orweela wa Yehova, yoowo ori Ehime ya oreera murima wakhala wi ninnachuna wunnuwiha mukhalelo yoola.

Yehova Muluku onnatikitherya malamulo wa yeeyo eri yaphaama. Piipiliya ooloca sa Yehova ariki: “Nyuwo mwa aphaama ni aweera saphaama. Mukihusihe ikano sanyu.” (Sal. 119:68) Hankooni nthokororye ichu piili vooloca sa oreera murima wa Yehova oromoliwe mu ecima ela.

Yehova taphaama. Oreera murima ori mukhalelo yoowo onapaka makupa a omuchu wa Yehova. Muthokororye yeeyo yeren’ye elukuluku Yehova aamulenleiye Mose: “Kinarwa kimmorela ikharari yoowo kinachunaaka ommorela.” Yehova aahimooniherya Mose ovuwa ni oreera wawe murima. Mose aahiwa nsu nenlo naamuthariha Yehova mmukhalelo ola: “[Yehova] Muluku, a ikharari, a mahala, oohaakuva onanariwa, oosivelasha ni oororomeleya. Osivela waka oniikhalelaru wa achu ancipale kinakhurumuwela opahuwa ohiiwelela ni ocheka nto nkinamuhiya yoowo ochekenle.” (Muk. 33:19; 34:6, 7) Ela enneeriha okhala yookwakwaleya wi Yehova taphaama mwawaakhwanela mmukhalelo ori woothene. Naamwi Yesu aari muchu aphaama ntoko aaphwaneleiye okhala, owo ooloca: “Haavo aphaama, voohikhala Muluku!”—Luka 18:19.

Miteko sa Yehova ti saphaama. Echu eri yoothene Yehova opankeiye ti yaphaama. “Apwiya [Yehova] taphaama wa oothene nave annavaha mahala awe  wa soopatusiwa sawe soothene.” (Sal. 145:9) Woona wi Yehova taphaama nave haano nthalu, owo onnaavaha achu oothene ekumi ni yeeyo awo anachunaaya wi etitelele okhala ni ekumi. (Saw. 14:17) Owotho onnooniherya wi taphaama vaavaa onanleveleleiye. Mulipa masalumu oorepa: “Nyuwo Apwiya [Yehova], mwa aphaama ni oolevelela.” (Sal. 86:5) Nnaphwanela ororomela wi Yehova “Hanawateeliha saphaama wa yaale aneeca ni murima waphaama.”—Sal. 84:11.

Nipatuxiwe moophwanaphwana ni Muluku, mwawiihiiha nookhalano ophwanelela wa opaka yaphaama ni weerano mwaphaama. (Map. 1:27) Nyenya eyo heneereya mwaayiini. Yehova onnanleela yeeyo nnaphwanelaahu weera ariki, “huseryani weera saphaama.” (Isa. 1:17) Nyenya nni nihuserye hai weera saphaama? Muthokororye mikhalelo miraru nneeraahu neereno yeela.

Mukhalelo woopacerya, nnaphwanela ovekela ntakhara munepa waweela, yoowo onaakhaviherya Akristu wooniherya oreera murima weeparipari. (Gal. 5:22) Aai, munepa waweela onamunikhaviherya osivelaka yeeyo eri yaphaama ni wiica yeeyo eri yoonanara. (Aro. 12:9) Mweeparipari, Piipiliya onnooniherya wi Yehova onamuneeriha okhala ‘ootikitheryeya mu saphaama soothene nneeraahu.’—2 Tes. 2:16, 17.

Mukhalelo wanawiili, nnaphwanela waalakhanya Masu ooveereliwa a Muluku. Vaavaa nnamwaalakhanyaahu Piipiliya, Yehova onnanihusiha “meecelo oothene aphaama” nave onnanrehererya “mmiteko soothene saphaama.” (Masi. 2:9; 2 Tim. 3:17) Vaavaa nnamwaalakhanyaahu Piipiliya ni wuupuwelela seiyo nnaalakhanyaahu, ninnasareiha murima ahu ni ichu saphaama vooloca sa Muluku ni yookhwela awe. Mwaweerano yeeyo ninnaaceererya muhakhu yoowo onahaala onikhaviherya ohoolo waya. —Luka 6:45; Éfe. 5:9.

Mukhalelo waneeraru, ninniilipiserya ‘otakiherya yaphaama.’ (3 Yoh. 11) Mpiipiliyani ninnaphwanyamo sootakiherya soophwanela ochariha. Mweeparipari, yootakiherya yaphaamaxa ti Yehova ni Yesu. Navetho nnanwerya othokororya sootakiherya sa akina yaawo yaasuwenle opaka yaphaama. Achu eeli yaawo nnaphwanelaahu owuupuwela ti Tapitha ni Parnapa. (Saw. 9:36; 11:22-24) Nyuwo munanwerya ophura orweela wa sootakiherya saya saphaama wakhala wi munnahuserya yeeyo Piipiliya olonceiye sa yaawo. Variyari va ohuserya wanyu, moone tiheeni awo yaapankaaya wi yaakhaviherye akina. Muupuwele vooloca sa yeeyo munaphwanelaanyu opaka wi mwaakhaviherye akina mu emusi anyu naari mmulokoni. Navetho moone ichu saphaama seeren’ye wa Tapitha ni Parnapa nthowa na okhala aphaama ni akina. Nyuwotho munanwerya ophura moolikana.

Nnaphwanelatho owuupuwela achu amutano yaawo anapaka yeeyo eri yaphaama. Muupuwelele  vooloca sa muteko mutokweene wa atokweene mmulokoni yaawo ari “ókhovelela saphama.” Navetho muupuwele vooloca sa arokora oororomeleya yaawo orweela wa yeeyo analocaaya ni anapakaaya ari “óhusiha sorera.” (Tito 1:8; 2:3, NN) Murokora yoowo oniichaniwa Roslyn ooloca: “Nthamwene aka aaniilipiserya wi aakhaviherye ni waalipiha akina mmulokoni. Owo onnuupuwela vooloca sa mikhalelo saya nave wiiliwiili onnaavaha samahala savakhaani naari waakhaviherya mmikhalelo sawooneya. Mweeparipari kinamoona okhala muchu aphaama.”

Yehova onnaaceenyerya achu awe ariki: “Mwaavyaavye weera saphaama.” (Amo. 5:14) Neerano hiiha, enahaala onikhaviherya osivela yeeyo Yehova onaloceiye wi yaphaama, nave enahaalatho onikhaviherya ochuna chiryene opaka yeeyo eri yaphaama.

Wi nikhale aphaama, hannaphwanela opaka ichu sootikhiniha wa akina naari waavaha ichu soowalamela. Ntoko yootakiherya: mulipa oopintaara hanapharihela etinta emoha naari piili pahi soowalamela. Ohiya yeeyo owo onnapharihela itinta sincipale. Moolikana, wakhala wi ninnapaka ichu sincipale ikhaani wi naakhaviherye akina, eyo enahaala wooniherya wi naachu aphaama.

Piipiliya onnanceenyerya okhala “ooreheryeya” ni “awiireherya” opaka yaphaama. Wakhala wi ninnaavya osuwela yeeyo eneereya ni akina, nnamoona mikhalelo sa ‘wahakalaliha akhwiihu.’ (Aro. 15:2) Eyo enavolowela ovaha ichu seiyo nryaahuno. (Masi. 3:27) Nnaphwanela onwopa muchu ntakhara yoolya vyakala naari okhala vamoha ni asinthamwene oolipiha. Wakhala wi noomusuwela muchu oniiceliwa, nnanwerya oya omuxekurya, naari olocano orweela mu telefoni. Aai, nnamphwanya ikari sincipale sa oloca masu “aphaama, oolipiha ntoko onakhweleyaaya, awaavaha mahala yaawo anawiiwa.”—Éfe. 4:29.

Moolikana ni Yehova, ninnaavya opaka saphaama wa achu oothene. Navetho ninnaakhaliha akina moohikhala nthalu. Mukhalelo mmoha wa waakhaliha akina mwaphaama hiiha ntoko Yehova oneereiye ori olaleerya michaka saphaama sa Omwene wa achu oothene. Hiiha ntoko Yesu aalamulenleiye, ninnaavya opaka saphaama ophiyeryatho wa yaale anniica. (Luka 6:27) Tahi yoonanara okhala muchu ooreera murima ni opaka saphaama ntakhara akina, woona wi “nlamulo hinaavovo nnakhoociha seiya.” (Gal. 5:22, 23) Vaavaa nnapakaahu saphaama naamwi achu enikhalihaka moonanara naari nrino makacamiho, nnanweeriha akina ovolowa mu eparipari ni omucicimihe Muluku.—1 Ped. 3:16, 17.

“Atxhu òrèra murima anamutxhuweliwa ni miteko saya.” (Masi. 14:14 BNM) Miphurelo taani irivovo? Vaavaa nnakhalaahu aphaama wa akina, awotho annakhala aphaama wa hiyo. (Masi. 14:22) Naamwi akina ehinikhalihaka aphaama, nnaphwanela otitelela weera ichu saphaama wa yaawo. Ntoko yookhumelela, awo anamutoroka muupuwelo aya nave epacerye onikhaliha moophwanelela.—Aro. 12:20.

Elukuluku nnahiyaahu opaka soonanara, ninnaphura mukhatiihu. Anna ni arokora ancipale alonce wi ela yoheereya wa yaawo. Muthokororye yaweereya ya Nancy. Owo ooloca: “Vaavaa kunnuwaaka, kaari muchu oohithokororya, oocapaheya, navetho oohicicimiha. Koma, vaavaa kaahusenryaaka ni opharihela malakiheryo a Muluku wa yeeyo eri yaphaama, kaahipacerya okhala oohakalala. Vano kamuchu oocicimiha.”

Nthowa ntokweene nnaneeriha okhala ooreera murima ti nawi weerano hiiha ennamuhakalaliha Yehova. Naamwi ancipale ehoonaka yeeyo nnapakaahu, Yehova onnoona. Owo onnasuwela vaavaa nnapakaahu ichu saphaama ni okhalano muupuwelo waphaama. (Éfe. 6:7, 8) Ni yookhumelela taani? “Muchu aphaama, Apwiya annamuhakalalela.” (Masi. 12:2) Mwawiihiiha hankooni ntitelele wooniherya oreera murima. Yehova onnaaroromeliha “ovuwa, ncicimiho ni murecele wa oothene yaale aweera saphaama.”—Aro. 2:10.