1. Tiheeni eri yeeparipari vooloca sa anna ari amiravo?

NYUWAANO amiravo, munanwerya opaka sincipale mmulokoni. Ancipale a nyuwo mookhalano ikuru ni ekumi yaphaama. (Masi. 20:29) Nyuwaano munnapaka sincipale wi mwaakhaviherye anna ni arokora mmulokoni. Nave akhweya mwaamusiveliwa othanliwa okhala murummwa oorumeela. Nyenya, munamuupuwela wi akina anawoonaani wi mootepa okhala mmiravo nave wi hamuri oorehererya ovahiwa mirici soochuneya. Naamwi muri mmiravo, sookhalavo ichu munaphwaneelaanyu opaka hiihaano wi muroromeliwe nave mucicimihiwe ni achu a mmulokoni mwanyu.

2. Tiheeni nnahaalaahu othokororya mmwaha yoola?

² Mmwaha yoola, nnahaala othokororya yaweereya ya mwene Tavite. Nave tho mwa mukwasu nnahaala oloca saweereya sa Asa ni Yosafati—mamwene meeli o Yuta. Nnahaala othokororya makacamiho taani alopwana yaala araru yaahoolenlaaya, mukhalelo yaakhulenlaaya, ni yeeyo anna ari amiravo eneeraaya ehuserye orweela wa yootakiherya aya.

3. Mukhalelo taani mmoha, anna ari amiravo eneeraaya yaakhaviherye anna ni arokora ahu awunnuwelavo mmulokoni?

³ Ari mmiravo, Tavite aahunnuwiha mavyakelo yaawo achu akina yoonaaya okhala oochuneya. Ti yawooneya wi Tavite aakhalano onthamwene wawaacameleya ni Yehova, nave aahinnuwiha mavyakelo awe ntoko mulipa awiipa, nave aahipharihela mavyakelo awe wi amukhaviherye Sawuli, mwene oothanliwa a Muluku. (1 Sam. 16:16, 23) Nyuwo amiravo, apwanne mookhalano mavyakelo yaawo yaahaala waakhaviherya akina a mmulokoni? Ancipale a nyuwo mookhalano. Ntoko yootakiherya, anna ni arokora awunnuwelavo annathamalela vancipale vaavaa munaakhaviheryaanyu ompharihela tapleti aya naari ekhankoonya ekina wi epharihele mu yoohuserya aya ya muchu  mukhateiye naari mmithukumano. Munanwerya waakhaviherya anna ni arokora anyu awunnuwelavo moorweela wa masuwelelo anyu a opharihela ikhankoonya.

4. Ntoko Tavite, mikhalelo taani anna ari amiravo anaphwanelaaya wunnuwiha? (Moone eruku va ekaapa.)

⁴ Mu okumi awe wa nihiku ti nihiku, Tavite aahooniherya wi aanalapa miteko nave aari oororomeleya. Ntoko yootakiherya, vaavaa aareiye mmiravo, aanalapa mwakuru wi akhapelele ipucepuche sa atiithi awe. Mmuteko awe wa okukhula owo aahihoolela makacamiho awoopiha. Ohoolo waya owo aahimutharihela Mwene Sawuli: “Miyo, kapuro anyu, kaakukhulaaka ipucepuche sa atiithi aka aarwaiye mwaco naari mwaashinama mukina aphara epucepuche, kaanamuchimakela, kimmana, kimwaakha.” (1 Sam. 17:34, 35) Tavite aanasuwela wi aaphwanela okhapelela ipucepuche, nave moolipa murima aanawaniha wi akhapelele iho. Anna ari amiravo ananwerya omutakiherya Tavite moorweela wa olapa mwakuru mmuteko avahiwaaya.

5. Mwawiiwanana ni Salumu 25:14, echu taani eri yoochuneyaxa anna ari amiravo anaphwanelaaya weera?

⁵ Mmiravo Tavite, aahunnuwiha onthamwene wawaacameleya ni Yehova. Onthamwene awe ni Yehova waari woochuneyaxa opwaha olipa wawe murima ni mavyakelo awe a omoopa pankwe. Tahi wi pahiru Yehova aari Muluku a Tavite, nyenya tho aari Nthamwene awe—Nthamwene awe awaacameleya. (Mwaalakhanye Salumu 25:14.) Anna muri amiravo, echu yoochuneyaxa munaphwanelaanyu weera ori olipiha onthamwene anyu ni Tiithi anyu a wirimu, mweerano hiiha munahaala waakhela mirici sawaacereryeya mmulokoni.

6. Moonelo taani wooheseya akina yaaraayano vooloca sa Tavite?

⁶ Tavite aaphwanela ovootha moonelo wooheseya akina yaaraayano vooloca sa yene. Ntoko yootakiherya, vaavaa Tavite iivanheiye wi awane ni Koliyati, Mwene Sawuli aaheererya omuceecheiha, moorweela wa oloca ariki: “Wa mmiravo.” (1 Sam. 17:31-33) Voopaceryani, munnawe Tavite aahimusomela owo wi haakhapelela ipucepuche. (1 Sam. 17:26-30) Naamwiihiiha, Yehova haamoona ntoko mukhaanixa naari ntoko oohikhapelela. Owo aahimusuwela phaama Tavite. Nave amuroromelaka nthamwene awe, Yehova, wi aahaala omvaha ikuru, Tavite aahiwerya omwiipha Koliyati.—1 Sam. 17:45, 48-51.

7. Tiheeni muhusenryaanyu orweela wa yaweereya ya Tavite?

⁷ Tiheeni munahuseryaanyu orweela wa  yaweereya ya Tavite? Noohuserya wi nnaphwanela okhala oopisa murima. Enamviravo elukuluku yincipale wi yaale yoosuwenleeni ntoko mwaana, epacerye owoonaani ntoko mmiravo awunnuwa. Naamwi hiihaa, munaphwanela ororomela wi Yehova hanavarerya pahiru omuchu anyu wa vaate. Owo onnoosuwelaani phaama nave onnasuwela echu munaweryaanyu opaka. (1 Sam. 16:7) Mulipihe onthamwene anyu ni Muluku. Tavite aaheerano yeela moorweela wa ovarerya soopatuxiwa sa Yehova. Tavite aahuupuwelela mwawiixeela mukhalelo soopatuxiwa saamuhusihaaya vooloca sa Mpatuxa. (Sal. 8:3, 4; 139:14; Aro. 1:20) Echu ekina munaphwanelaanyu weera ori omveka Yehova wi oovaheeni ikuru munachunaanyu. Ntoko yootakiherya, mpwanne asinthamwene anyu ooxikola annaloca ichu soonanara ntakhara nyuwo nthowa na okhala mmoha a Anamoona a Yehova? Wakhala wi tihiiha, mvekele wa Yehova wi ookhaviheryeeni wi mvilele nnikacamiho nenlo. Nave mpharihele ikano sookhaviherya sinaphwanyeya Mmasu awe, mu soolaleeryiwa ni ixilema sahu sinathipeleya Mpiipiliyani. Vaavaa munahaalaanyu omoonaka Yehova ookhaviheryakaani nnikacamiho nanyu, nroromelo nanyu mwa yoowo nnahaala wunnuwa. Mwawaaceererya, vaavaa akina anoonaaya wi munnamuroromela Yehova, awo anahaala woororomelaani.

8-9. Tiheeni yaamukhavihenrye Tavite owehererya moopisa murima ophiyerya okhala mwene, nave tiheeni anna ari amiravo anahuseryaaya orweela wa yootakiherya awe?

⁸ Muthokororye nikacamiho nikina nenlo Tavite aahoolenleiye. Amanle othanliwa wi akhale mwene, Tavite aahiweherya mu elukuluku yincipale ahaakumve olamulela ntoko mwene o Yuta. (1 Sam. 16:13; 2 Sam. 2:3, 4) Variyari va elukuluku yeele, tiheeni yaamukhavihenrye Tavite oweherya moopisa murima? Ohiya okhala ooceecheya, Tavite aahipharihela elukuluku yeele wi apake yeeyo aaweryeiye. Ntoko yootakiherya, vaavaa aakhaleiye mmuceche wa Afilisti ntoko mulipa oochawa, Tavite aapharihela elukuluku yeele wi awane ni amwiicani Aisarayeli. Mu weerano hiiha, Tavite aahikhapelela munlaano wa elapo yo Yuteya.—1 Sam. 27:1-12.

⁹ Tiheeni anna ari amiravo anahuseryaaya orweela wa yootakiherya ya Tavite? Mpharihele ikari muryaanyuno wi mwaarumeele anninyu. Muthokororye yootakiherya ya munna oniichaniwa Ricardo. * Mu elukuluku yincipale owo aanachuna orumeela ntoko piyoneero ookilaatheya. Nyenya haari ooreheryeya. Ohiya okhala ooceecheya naari oonyeenyeya, owo aanamaliha elukuluku yincipale mmuteko woolaleerya. Owo oriye: “Kaawuupuwelaka sa muculi, kinnasuwela wi kaanaphwanela oya vahoolo. Kaanaroromeliha waasekurya yaale yooniherya nchuno nave kaaniirehererya ntakhara oxekurya ori woothene. Ophiyerya tho wa oohuserya aka oopacerya a Piipiliya. Vaavaa kaalaleeryaaka vancipale, kaanavootha woova waka.” Vano Ricardo onarumeela ntoko piyoneero ookilaatheya nave tho ntoko murummwa oorumeela.

10. Mu ekwaha emoha, tiheeni Tavite enreiye ahaakumve opaka yoolakelela yoochuneya?

¹⁰ Muthokororye echu ekina yeeren’ye mookumini wa Tavite. Vaavaa Tavite ni alopwana awe yaamuchawaaya Sawuli, awo yaahiya imusi saya nave eya owaniha. Vaavaa awo yaapwanhaayavo, amwiicani akina yaaheeyela ipa saya ekuxa imusi saya ikhala akapuro. Tavite anwerya wuupuwela wi woona wi aari nakhoco amavyakelo, waahaala okhala wookhweya wiirehererya wi awaakihe achu yaale yaaphariwe. Ohiya yeeyo, Tavite aahimveka Yehova wi amuhoolele. Nnikhaviheryo na mulipa a mukucho awiichaniwa Apiyatare, Tavite aahiveka ohoolela wa Yehova ariki: “Kiwiikare  anawiiye yaale?” Yehova aamuleela Tavite wi awiikare nave aamuroromeliha wi aahaala owoopola yaale yaaphariwe. (1 Sam. 30:7-10) Tiheeni munahuseryaanyu orweela wa yaweereya yeela?

11. Tiheeni munaphwanelaanyu weera muhaakumve opaka yoolakelela?

¹¹ Mveke ohoolela muhaakumve opaka yoolakelela. Mwaakohe asitiithi anyu. Munanweryatho ophwanya ohoolela waphaama moorweela wa oloca ni asitokweene amavyakelo. Yehova onnaaroromela alopwana yaala oothanliwa, nave nyuwaano tho munanwerya weerano emohamoha. Yehova onawoona awo ntoko “samahala” sa mmulokoni. (Èfe. 4:8) Munanwerya opaka soolakelela saphaama wakhala wi munnatakiherya nroromelo naya ni owiriyana moonelo wa miruku yoowo anoovahaayaani. Vano hankooni nthokororye yeeyo nnahuseryaahu orweela wa Mwene Asa.

12. Mikhalelo taani saphaama Mwene Asa aareiyeno vaavaa aapacenryeiye olamulela?

¹² Vaavaa aareiye mmiravo, Mwene Asa aari awiiyeviha ni oolipa murima. Ntoko yootakiherya, atiithi awe Apiya, emanle okhwa, owo aahikhala mwene nave aapacerya oviihamo soophwaniherya mu elapo yeele. Owotho “aahaalamulela aAyuuta wi yaakohereryeke Apwiya Muluku a makholo aya echarihaka mathoriheryo ni malamulo aya.” (2 Math. 14:1-7) Nave vaavaa Seera a Etiyopiya ni akhoco awe 1.000.000 yaarwiilaaya owana ni Ayuta, mwa miruku Asa amveka Yehova nikhaviheryo ariki: “Nyuwo Apwiya [Yehova], yeenyuru munamukhaviherya ooceecheya owana ni akuru, haavo mukina. Munikhaviherye, Apwiya Muluku ahu, ntakhara nnoohamelaani nyuwo.” Masu yaala ooreera annooniherya wi Asa aakhalano nroromelo ntokweene wa Yehova wi aahaala omvulusa yene vamoha ni achu awe. Asa aanamuroromela Tiithi awe awirimu nave “Apwiya [Yehova] yaahaavootha aKuusi.”—2 Math. 14:8-12.

13. Tiheeni yeeren’ye ohoolo waya ni Asa, nave ntakhara heeni?

¹³ Nyuwaano munneemererya wi naari nikacamiho noovilasa owana ni akhoco 1.000.000. Nyenya nthowa nawi aanamuroromela Yehova, Asa aavootha. Moothananiha, vaavaa aahoolenleiye nikacamiho noohiyana, owo haavenke nikhaviheryo na Yehova. Vaavaa aapacenryeiye woopopihiwa ni Mwene oonanara murima o Isarayeli Paasa, Asa aaveka nikhaviheryo wa mwene a wa Asiriya. Yoolakelela yeela  yaakhalano sookhumelela soowaawa! Moorweela wa mulipa a miririmu Hanani, Yehova aaloca wa Asa: “Vawi woomuroromela mwene a aAraamu, ohiya waahaamela Apwiya Muluku aa, ti vaavanto oyeleenlaa ovootha muloko wakhoco wa mwene a Araamu.” Chiryene, ovinyerya elukuluku yeele oya ohoolo, Asa aanawaniha ikhoco moohihiyererya. (2 Math. 16:7, 9; 1 Mam. 15:32) Tiheeni nnahuseryaahuvo?

14. Muni nwerye hai omuroromela Yehova, nave mwawiiwanana ni 1 Timóteo 4:12, tiheeni eni yeereye wakhala wi moheerano hiihaa?

¹⁴ Mutitelele okhala awiiyeviha nave mmuroromele Yehova. Vaavaa mwaapatisiwaanyu, mwaahooniherya nroromelo ntokweene nave mwaanamuroromela Yehova. Nave Yehova aasiveliwa owaakhelaani ntoko mmoha a yaawo anapaka makupa a emusi awe. Vano echu munaphwanelaanyu weera ori otitelela omuroromela Yehova. Onanwerya okhala wookhweya omuroromela Yehova vaavaa munapakaanyu soolakelela sookhweleya mookumini, nyenya tiheeni munahaalaanyu weera mu ilukuluku ikina? Mweeparipari ti wookhweleya omuroromela Yehova vaavaa munapakaanyu soolakelela seiyo inaphitaanyerya mathatelo, muteko wa mulaponi ni yoolakelela munachunaanyu opaka mookumini! Muhiroromele miruku sanyu. Moohiyana, mwaavye malakiheryo a Mpiipiliya yaawo anaphariheleya wa mikhalelo sanyu, nave voocharela, mpake ichu mwawiiwanana ni ohoolela yoowo. (Masi.  3:5, 6) Wakhala wi moheerano hiiha, munahaala omuhakalaliha Yehova nave munahaala waakhela ncicimiho na akina a mmulokoni mwanyu.—Mwaalakhanye 1 Timóteo 4:12.

15. Ntoko elociwaaya mu 2 Matharihelo 18:1-3; 19:2, soohesa taani Mwene Asa aapankeiye?

¹⁵ Mweeparipari, ntoko oothene ahu, nyuwo mwa muchu oohiphaameya, nave ikwaha ikina munahaala ohesa. Nyenya, eyo ehoohiiheeni opaka soothene munachunaanyu opaka mmuteko wa Yehova. Muthokororye yootakiherya ya Mwene Yosafati. Owo aahikhalano mikhalelo mincipale saphaama. Elukuluku aareiye mmiravo, owo ‘aamukoherya Muluku a nikholo nawe. Aanachariha malamulo a Muluku.’ Ohiya yeeyoru, owo aahaaruuha asitokweene opooma yo Yuteya wi yaahusihe achu vooloca sa Yehova. (2 Math. 17:4, 7) Naamwi iilipixerya, ilukuluku ikina Yosafati aahipaka soolakelela soonanara. Ntoko yookhumelela ya emoha ya yoolakelela yeeyo, Yosafati aahivahiwa ekano ni kapuro a Yehova. (Mwaalakhanye 2 Matharihelo 18:1-3; 19:2.) Tiheeni munahuseryaanyu mu yaweereya yeela?

16. Tiheeni munahuseryaanyu orweela wa yaweereya ya Rajeevi?

 ¹⁶ Mweemererye nave mpharihele ekano. Ntoko amiravo ancipale, ti yoovila weeriha muteko wa Yehova okhala echu yookhweleyasa mu okumi anyu. Nyenya muhiceecheye. Moone yootakiherya ya munna yoowo ori mmiravo oniichaniwa Rajeevi. Alocaka sa elukuluku aareiye ponkwe oriye: “Mu ilukuluku ikina nkaasuwela tiheeni kaaphwanelaaka opaka mu okumi aka. Moolikana ni maponkwe makina, kaanakhalano nchuno na omvonya mphirya ni othata nave nkaakhalano nchuno na oya mmithukumano ni mmuteko woolaleerya.” Tiheeni yaamukhavihenrye Rajeevi? Owo onnamuupuwela mutokweene mmoha amvanhe ekano. Rajeevi onnathariha: “Owo aakikhaviherya wuupuwela nlakiheryo nnaphwanyeya mu 1 Timóteo 4:8.” Rajeevi aahaakhulela ekano mwawiiyeviha, nave aahipharihela mu okumi awe. Owo oriye: “Kaalakelela omurumeela Yehova mmikhalelo soohiyana hiyana mu okumi aka.” Teevi eri yookhumelela? Rajeevi onnathariha: “Mu iyaakha vakhaani kimanle waakhela ekano yeele kaathanliwa ntoko murummwa oorumeela.”

17. Anna awunnuwelavo anawoona hai amiravo yaawo anamurumeela Yehova?

¹⁷ Anna awunnuwelavo annaathamalela amiravo yaawo anamurumeela Yehova “ni murima mmoha” vamoha ni yaawo! (Sof. 3:9) Awo annasiveliwa ni muteko munapharaanyu mwakuru ni mwamvai. Nyuwaano munnaphwanya mahala vamiithoni vaya.—1 Yoh. 2:14.

18. Ntoko elociwaaya mu Masiposipo 27:11, Yehova onoona hai vooloca sa amiravo yaawo anamurumeela?

¹⁸ Anna muri amiravo, muhicuwale wi Yehova onnoosivelaani nave onnoororomelani. Owo aaloherya wi mmahiku ookuchula, yaahaala okhalavo anakhoco yaawo ari amiravo, yaawo yi yiiveleele mukhataaya wi yeere yoochunaawe. (Sal. 110:1-3) Owo oosuwela wi munnamusivela nave wi munnachuna omurumeela yoowo ophiyerya munawerelaanyuvo. Mwawiihiiha mukhale oopisa murima ni akina, ni opisa murima wa nyuwo mukhatiinyu. Vaavaa munapakaanyu soohesa, mweemererye ovyakiha ni olaka yoowo munaakhelaanyu, moone olaka owo ntoko onarweela wa Yehova. (Ahe. 12:6) Mulape moowetha mmurici yoowo munavahiwaanyu. Opwaha soothene, mu echu vyakala munapakaanyu, mmweerihe Tiithi anyu a wirimu ohakalala ni nyuwo.—Mwaalakhanye Masiposipo 27:11.