1. Mwawiiwanana ni Mateu 24:9, ntakhara heeni hinnatikhina vaavaa elapo enaniicaaya?

YEHOVA onipatunxe wi nooniheryeke osivela wa achu akina nave wi awo tho enisiveleke. Mwawiihiiha, vaavaa akina ananiicaaya, ninnakhala oothanana nave akhweya ophiyerya tho woova. Ntoko yootakiherya, murokora awiichaniwa Georgina, yoowo onakhala o Europa, oriye: “Vaavaa kaaryaakano iyaakha 14, amamaaka yaanakiica nthowa na omurumeela Yehova. Kaathanana vancipale nave kaaniisoona okhala meekhaaka, kipacerya wuupuwela wi akhweya nkaari muchu aphaama.” * Munna awiichaniwa Tanylo oorepa: “Vaavaa anakhoco yaakimannaaya, ekiruwana, nave eloca wi yaahaala okihooxa nthowa na okhala mmoha a Anamoona a Yehova, kaahoova nave kaahuuliheya muru.” Ninniisoona ohikhala echweenevo vaavaa achu ananiicaaya, nyenya eyo henantikhiniha. Yesu aaloherya wi naahaala wiiciwaka.—Mwaalakhanye Mateu 24:9.

2-3. Ntakhara heeni oomuchara a Yesu aniiciwaaya?

² Elapo ennawiica oomuchara a Yesu. Ntakhara heeni? Nthowa nawi moolikana ni Yesu, ‘hanri a elapo ya vathi.’ (Yoh. 15:17-19 NN) Mwawiihiiha, naamwi naacicimihaka alamuleli, ninnakhooca waalapela yaawo naari soophwaniherya seiho inaweemelela yaawo. Pahiru nnamulapela Yehova. Ninnakhaviherya olamulelo woophwanelela wa Muluku ntakhara achu, nyenya Satana ni “nloko” nawe annaakaaha wi Muluku tori mulamuleli aphaama. (Map. 3:1-5, 15 BNM) Ninnalaleerya wi pahiru Omwene wa Muluku tonahaala orehererya makacamiho aachu navetho wi moohilekela onahaala waatoloxa yaale anammwareela. (Dan. 2:44; Wup. 19:19-21) Muchaka yoola ti waphaama wa yaale ari awookololowa  nyenya muchaka woonanara wa yaale ari oonanara murima.—Sal. 37:10, 11.

³ Ninniiciwa tho nthowa nawi ninniiwelela malamulo a Muluku. Yeeyo Muluku onaloceiye wi ti yaphaama ni ti yoonanara ti yoohiyana vancipale ni yeeyo achu a mweelaponi analocaaya wi ti yaphaama ni ti yoonanara. Ntoko yootakiherya, achu ancipale hanuupuwela wi ti yoonanara wiivoliiherya mmeerelo oocapaheya yaawo yeerinhe wi Muluku aatoloxe achu o Sotoma ni Komora! (Yuda 7) Woona wi ninniiwelela malamulo a Muluku yaawo anawatiiha meerelo ntoko yaawo, achu ancipale annaninyemula nave annaniichana achu awaakaaha!—1 Ped. 4:3, 4.

4. Mikhalelo taani inanlipiha vaavaa achu ananiicaaya?

⁴ Tiheeni enahaala onikhaviherya ovilela vaavaa achu ananiicaaya naari oniruwana? Nnaphwanela okhalano nroromelo noolipa wi Yehova onahaala onikhaviherya. Moolikana ni yawiisaakihano, nroromelo nahu nnanwerya ‘oshipiha mavaka oovarela a mulipa oonanara.’ (Éfe. 6:16) Nyenya ninnachuna sincipale ohiya pahiru nroromelo. Ninnachuna tho osivela. Ntakhara heeni? Nthowa nawi osivela “honasarasareya murima.” Onnawehererya nave onnavilelano sawiicela soothene. (1 Kor. 13:4-7, 13) Hankooni nthokororye ti mwawiihai omusivela Yehova, waasivela asinthamwene ahu a munroromeloni, nave ophiyerya tho amwiicani ahu oneeraaya onikhaviherye ovilela wiiciwa.

5. Tiheeni Yesu eenreiye nthowa nawi aanaasivela Atiithi awe?

⁵ Mu ohiyu wookuchula ahaakumve wiiphiwa ni amwiicani awe, Yesu aaloca wa oomuchara awe oororomeleya: “Kinnaakhwela Atiithi [mwawiihiiha] kinneera ntoko Atiithi akirummaaya.” (Yoh. 14:31 BNM) Woona wi Yesu aanamusivela Yehova, owo aari ooreheryeya ovilela makacamiho oovila. Osivela wahu ntakhara Yehova onanwerya onikhaviherya weerano emohamoha.

6. Mwawiiwanana ni Aroma 5:3-5, ti mwawiihai alapeli a Yehova anoonaaya vooloca sa ovilela wiica wa elapo?

⁶ Osivela ntakhara Muluku ilukuluku soothene onnaakhaviherya alapeli a Muluku ovilela wiiciwa. Ntoko yootakiherya, vaavaa arummwa yaalamuleliwaaya nnikhuce na asitokweene a Ayuta wi emaale olaleerya, osivela ntakhara Muluku waahaaceenyerya “omwiiwelela Muluku, opwaha achu.” (Saw. 5:29; 1 Yoh. 5:3) Osivela yoola woolipa ntakhara Yehova onnaakhaviherya tho anna yaawo aniikariwa ni alamuleli oonanara murima ni oowerya wi etitelele olipa munroromeloni. Vaavaa elapo enaniicaaya, hannakhala ooceecheya, ninnahakalala.—Saw. 5:41; mwaalakhanye Aroma 5:3-5.

7. Nnaphwanela woonaka hai vaavaa amusi ananiicaaya?

⁷ Vaavaa amusi ahu ananiicaaya, nnanwerya okhala nikacamiho nimoha wa makacamiho oovila ovilela. Vaavaa awo anoonaaya wi ninnachuna ohuserya sa Yehova, amusi akina ananwerya wuupuwela wi noomwareya. Akina ananwerya wuupuwela wi noosavuwa. (Mulikanyihe ni Marko 3:21.) Awo ananwerya onikhaliha moonanara. Wiica ntoko yoola honantikhiniha. Yesu aaloca: “Mwiicani oopwaha ti amusi awe a muchu.” (Mat. 10:36) Nyenya, moohipwacha mukhalelo amusi ahu ananoonaaya, hiyaano hinnaakhaliha ntoko amwiicani. Moohiyana, vaavaa osivela wahu ntakhara Yehova onannuwaaya, osivela wahu tho ntakhara achu onnannuwa. (Mat. 22:37-39) Nyenya hannahiya wiiwelela malamulo ni ochariha malakiheryo a Mpiipiliya pahiru wi naahakalalihe achu akina.

8-9. Tiheeni yaamukhavihenrye murokora mmoha okhala oolipa moohipwacha wiiciwa otokweene?

⁸ Georgina, yoowo olociwe woopaceryani, aawerya okhala oolipa murima moohipwacha wiiciwa ni amamaawe. Georgina ooloca: “Miyaano ni amamaaka naapacerya omuhuserya Piipiliya  ni Anamoona a Yehova. Nyenya ivinre miyeeri mithanu nammoha ohoolo waya vaavaa kaapacenryaaka ophiya mmithukumano amama yaapacerya okiica. Kaahisuwela wi amama yaapacerya owokiwa ni alipa oomwaryeya, nave awo yaatitelela okileela sawootha seiho. Awo yaanakiruwana, ocucha miihi aka, okeeriha okhala oohaleeliheya, ni oriha soolaleeryiwa saka. Vaavaa kaakhwaninhaaka iyaakha 15, kaapatisiwa. Amamaaka yaaheererya okimaaliha omurumeela Yehova moorweela wa okikuha nipuro nenlo yaakhapeleliwamo asimwali yaawo yahaarino meecelo aphaama, akina a yaawo yaanalya mirece nave akina yaanapaka sa nlala. Wiiciwa onnakhala woovila ovilela xaxaxa wakhala wi onarweela wa muchu yoowo aaphwanela woosivela ni wookhapelela.”

⁹ Tiheeni yaamukhavihenrye Georgina ovilela nikacamiho nawe? Owo oriye: “Nihiku amama yaakiviihalaaya vaate, kiiha kimalinhe omwaalakhanya Piipiliya oothene. Vano kaahoona wi kaaphwanya eparipari, nave kaakhalano onthamwene wawaacameleya ni Yehova. Wiiliwiili kaanavekela wa yoowo, nave aanakiwiriyana. Vaavaa kaakhala o nipuro nenle, murokora mmoha aakikuxa wi kakhaleke owannyawe, nave naanamuhuserya Piipiliya vamoha. Variyari va elukuluku yeele, kaanalipiheya ni anna ni arokora o Empa ya Omwene. Awo yaakeeriha woona wi kinnapaka makupa a imusi saya. Eyo yaakeeriha woona wi Yehova mutokweene waapwaha amwiicani ahu, moohipwacha mukhalelo aya.”

10. Tiheeni nnaroromelaahu wi Yehova Muluku onahaala waakhwaniherya?

¹⁰ Murummwa Paulo oorepa wi hiyaavo echu eni ewerye “onimwalanya ni osivela wa Muluku weiwo ori mwa Yesu ori Kristu, Pwiya ahu.” (Aro. 8:38, 39) Naamwi nihooxeyaka mu elukuluku yincipale, Yehova onahaala okhala mmakupa ahu wi anilipihe ni onihakararya. Ntoko yooniheryiwaaya mu yaweereya ya Georgina, Yehova onnanikhaviherya tho orweela wa anna ni arokora a mmulokoni.

11. Ti mwawiihai osivela yoowo Yesu aalonceiye mu Yohani 15:12, 13 waakhavihenryaaya oohuserya awe? Mvahe yootakiherya.

¹¹ Ohiyu ahaakumve okhwa, Yesu aawuupuserya oohuserya awe osivelana mukina ni mukhwaawe. (Mwaalakhanye Yohani 15:12, 13.) Owo aanasuwela wi osivela wa wiikhooca waahaala waakhaviherya okhala awiiwanana ni ovilela wiica wa elapo. Muthokororye yootakiherya ya muloko wo Tesalonika. Evinrevo elukuluku omanle otikitheryiwa, Akristu yaale yaapacerya  wiikariwa. Naamwiihiiha, anna ni arokora yaale yaavaha yootakiherya ya ororomeleya ni osivela. (1 Tes. 1:3, 6, 7) Paulo aahaalipiha awo wi etitelele wooniherya osivela “moopwaha.” (1 Tes. 4:9, 10) Osivela waahala waaceenyerya waahakararya oovolola ni waalipiha ooceecheya. (1 Tes. 5:14) Awo yaachariha malakiheryo a Paulo, nave mu ekaarata awe yanapiili, yeeyo aarempeiye mu eyaakha yoocharela, Paulo aaloca wa yaawo: “Okhwelana wanyu mukina ni mukhweiye onnaaceereryeya.” (2 Tes. 1:3-5) Osivela waya waahaakhaviherya ovilela makacamiho ni wiikariwa.

12. Variyari va ekhoco, ti mwawiihai anna ni arokora mu elapo ekina yoonihenryaaya osivela wa mukina ni mukhwaawe?

¹² Muthokororye yaweereya ya Tanylo yoowo olociwe woopaceryani vamoha ni mwaariye. Vaavaa ekhoco yaaphin’yaaya mu epooma yaakhalaayawo, awo yaatitelela ophiya mmithukumano, olaleerya ntoko yaaweryelaaya, ni okawana yoolya ni anna ni arokora aya. Nihiku nimoha, akhoco yaaphiya vaate va Tanylo yaapharenle akapwichi. Tanylo oriye: “Awo yaakilamulela wi kihiye okhala Namoona a Yehova. Vaavaa kaakhoncaaka awo yaakimana ekitetheeryela kapwichi vamuru enachuna okoopela. Vaavaa awo yaakihin’yaaya yaakoopopiha wi yaahaala okooka wi emukuxe mwaaraka. Nyenya mwawaakuveya annihu yaanihela mu ekaaro nave enikeriha mu epooma ekina. Nkirwa kicuwala osivela wa anna yaala oosiveliwa. Nave vaavaa naaphin’yaahu mu epooma yeele esyaani, anna a vanipuroni yaanivaha yoolya nave yaakikhaviherya ophwanya muteko ni empa! Mwawiihiiha kaanawerya owaakhela anna akina yaawo yaachawa ekhoco mu epooma yeele.” Saweereya ntoko seiha sinnooniherya wi osivela Weekristu onnanikhaviherya ovilela wiiciwa.

13. Ti mwawiihai munepa waweela onahaalaaya onikhaviherye otitelela omurumeela Yehova moohipwacha wiica wa achu?

¹³ Yesu aaloca wa oomuchara awe wi yaasiveleke amwiicani aya. (Mat. 5:44, 45) Apwanne ti wookhweya weerano yeeyo? Hooye, tahi wookhweya! Nyenya ti wooweryeya nnikhaviheryo na munepa waweela wa Muluku. Yawiima ya munepa wa Muluku onnaphitaanyerya osivela, ovilela, opisa murima, oreera murima ni wiisuumaaliha. (Gal. 5:22, 23) Mikhalelo seiha sinnakhaviherya ovilela wiiciwa. Achu ancipale annahiya oniica nthowa nawi iyaya, mwaaraya, mwanaya, naari amwaacamani aawooniherya mikhalelo seiya. Nave ancipale a yaawo annakhala anna ni arokora oosiveliwa. Mwawiihiiha  wakhala wi munnoona okhala woovila waasivela yaawo anawiicaani nthowa na omurumeela Yehova mvekele ntakhara munepa waweela. (Luka 11:13) Nave muroromele wi omwiiwelela Muluku ilukuluku soothene echu yoophwanelela opaka.—Masi. 3:5-7.

14-15. Ti mwawiihai Aroma 12:17-21 aamukhavihenryeiye Yasmeen wooniherya osivela wa aiyawe moohiphwacha wiica waya otokotoko?

¹⁴ Muthokororye yootakiherya ya Yasmeen, onakhala o Oriyenti Metiyu. Vaavaa owo aakhanleiye Namoona a Yehova aiyawe yuupuwela wi orimuwokiwa, nave yaaheererya ommaaliha omurumeela Muluku. Awo yaanamuruwana, nave yaahaaleela amusi, mapastore ni namuku wi emoopopiheke ni omootherya wi onnakawanya emusi awe. Ophiyerya tho aiyawe yaanaaruwana anna variyari va mithukumano sa muloko! Yasmeen aaninla ilukuluku soothene nthowa na okhalihiwa moonanara.

¹⁵ O Empa ya Omwene, emusi yoomunepani ya Yasmeen, yaanamulipiha ni yaanamuhakararya. Atokweene a mmulokoni yaamuceenyerya owo opharihela masu anaphwanyeya mu Aroma 12:17-21. (Mwaalakhanye.) Yasmeen ooloca: “Eyo yaari yoovila, nyenya kaanamveka Yehova wi akikhaviherye, nave kaanapaka owetha waka wi kipharihele yeeyo Piipiliya onaloceiye. Mwawiihiiha vaavaa aiyaka yaananarihaaya okusinya wi ekiphuce, kaanarehereryawo. Vaavaa yaakiruwanaaya kaanaakhula moopisa murima. Nave vaavaa yiiceliwaaya, kaanaakhapelela yaawo.”

16-17. Tiheeni nnahuseryaahu orweela wa yootakiherya ya Yasmeen?

¹⁶ Yasmeen aareelihiwa nthowa na wooniherya osivela ntakhara aiyawe. Owo ooloca: “Aiyaka yaapacerya okiroromela vancipale nthowa nawi awo yaahoona wi ilukuluku soothene kaanaloca eparipari. Awo yaanakiwiriyana mwancicimiho vaavaa naalocaahu sa malapelo, nave yaaheemererya opaka murecele veechokoni. Vano awo annakiceenyerya oya mmithukumano sa muloko. Miyaano ni aiyaka nookhalano onthamwene woolipa, nave nookhalano murecele veechokoni vahu. Kinnawehererya wi aiyaka anahaala weemererya eparipari nave nikhale vamoha mu omurumeela Yehova.”

¹⁷ Yootakiherya ya Yasmeen ennooniherya wi osivela “onnawethano soothene, . . . onnawehererya soothene, onnavilela soothene.” (1 Kor. 13:4, 7) Wiica onanwerya okhala wakuru ni wa wiicela, nyenya osivela ti wakuruxa. Wakhala wi ninnooniherya osivela wa akina, awo ananwerya otokoroka mukhalelo anoonaaya vooloca sa hiyo ni Yehova. Nave ela ennahakalaliha murima wa Yehova. Nyenya naamwi amwiicani etitelelaka  oniica, nnanwerya okhala oohakalala. Mwawiihai?

18. Ntakhara heeni ninnahakalala vaavaa nniciwaahu?

¹⁸ Yesu ooloca: “Ooreeriwa [oohakalala] ti nyu, achu yaawiicakani.” (Luka 6:22) Hiyaano hinnathanla wi niiciweke. Nave tho hannahakalala vaavaa nniikariwaahu nthowa na nroromelo nahu. Mwawiihiiha, ntakhara heeni nnanwerya ohakalala vaavaa nniikariwaahu? Moone mathowa mararu. Noopacerya, vaavaa nnavilelaahu, ninnakhala aweemereryeya vamiithoni va Muluku. (1 Ped. 4:13, 14) Nanawiili, nroromelo nahu ninnakhala neeparipari ni noolipa. (1 Ped. 1:7) Nave naneeraru, nnahaala waakhela nchuwelo noochuneyaxa—ekumi yoohimala.—Aro. 2:6, 7.

19. Ntakhara heeni arummwa yaahakalala emanle owaxuliwa?

¹⁹ Evinrevo elukuluku vakhaani Yesu amanle oviihiwa mookhwani, arummwa yaahoona ohakalala yoowo Yesu aalonceiye. Emanle owaxuliwa ni olamuleliwa wi ehiye olaleerya, awo yaahakalala. Ntakhara heeni? “Vawi yaacicimihiwa voonyemuliwa wa nthowa na nsina na [Yesu].” (Saw. 5:40-42) Omusivela waya Pwiyaya waari woolipa opwaha owoova amwiicani aya. Nave awo yaahooniherya osivela waya moorweela wa olaleerya michaka yaphaama ‘moohihiyererya.’ Ancipale a annihu olelo annatitelela orumeela moororomeleya moohipwacha makacamiho. Awo aasuwela wi Yehova harwa acuwala muteko aya ni osivela yoowo anooniheryaaya nsina nawe.—Ahe. 6:10.

20. Tiheeni nnahaalaahu othokororya mmwaha onacharela?

²⁰ Elapo enahaala oniicaka ophiyerya vaavaa enayaaya omalelavo. (Yoh. 15:19) Nyenya hannaphwanela okhala awoovaxa. Ntoko nnahaalaahu woona mmwaha onacharela, Yehova onahaala ‘waatikitherya ni owaakiha’ akapuro awe oororomeleya. (2 Tes. 3:3) Mwawiihiiha hankooni ntitelele omusivela Yehova, waasivela annihu ni arokora ni waasivela amwiicani ahu. Vaavaa nnacharihaahu miruku seiha, nnahaala otitelela okhala awiiwanana ni oolipa omunepani, nnahaala omuruuhela ncicimiho Yehova, nave nnahaala woona wi osivela ti wakuruxa opwaha wiica.