1. Echu taani etokweene enavolowela omuchu ahu?

 MOOHIPWACHA naapatisiwe hiihaanoru naari iyaakha sincipale muculi, oothene ahu ninnachuna okhalano omuchu yoowo Yehova onasiveliweiyeno. Wi niwerye okhwaaniherya yeela, nnaphwanela ovareryela mukhalelo ahu wa wuupuwela. Ntakhara heeni? Nthowa nawi echu etokweene yeeyo enavolowela omuchu ahu ori muupuwelo ahu. Wakhala wi ilukuluku soothene nnuupuwela minkhela sahu sa mwiili, nnahaala olocaka ni weeraka ichu soonanara. (Éfe. 4:17-19) Nyenya wakhala wi ninnuupuwela ichu saphaama, ti yawooneya wi nnahaala olocaka ni weeraka ichu seiho inamuhakalaliha Tiithi ahu, Yehova.—Gal. 5:16.

2. Makoho taani nnahaalaahu othokororya mmwaha yoola?

² Ntoko elociwaaya mmwaha ovirale, hiyaano hiniwerya ohiiha muupuwelo ahu woothene woonanara. Nyenya nnanwerya othanla oheera ichu mwawiiwanana ni muupuwelo yoowo. Nihaakumve opatisiwa, hiyaano naaphwanela ohiya oloca ni weera ichu mmukhalelo yoowo Yehova oniiceiye. Ola mukhalelo woopacerya ni woochuneyaxa wa omurula muchu akhalai. Nyenya wi nimuhakalalihe Yehova moomalela, nnaphwanela tho wiiwelela nlamulo nla: ‘Munware muchu ahiihaano.’ (Kol. 3:10) Mmwaha yoola, nnahaala othokororya makoho anacharela: “Muchu ahihano” tiheeni? Nni niwerye hai onwara muchu ahiihaano ni ohimurula?

3. Mwawiiwanana ni Galasya 5:22, 23, “muchu ahihano” tiheeni, nave ti mwawiihai muchu onanwareiye?

³ “Muchu ahihano” mukhalelo wa wuupuwela ni weera ichu onooniherya omuchu wa Yehova. Muchu onanwara muchu ahiihaano moorweela wa wooniherya yawiima ya munepa wa Muluku, ni weemererya wi munepa waweela ovolowela muupuwelo awe, miyoonelo sawe ni saweera sawe. (Mwaalakhanye Galasya 5:22, 23.) Ntoko yootakiherya, owo onnamusivela  Yehova ni achu Awe. (Mat. 22:36-39) Muchu ntoko yoola, onnahakalala naamwi akumanaka ni makacamiho. (Tiy. 1:2-4) Owo onnakhapelela murecele. (Mat. 5:9) Owo tooreera murima ni oopixa murima ni akina. (Kol. 3:13) Owo onnasivela yeeyo eri yaphaama nave onneerano yeeyo. (Luka 6:35) Owo onnooniherya moorweela wa saweera sawe wi ookhalano nroromelo noolipa mwa Tiithi awe awirimu. (Tiy. 2:18) Owo onnatitelela okhala oomaala vaavaa onaroxiweiye nave onnooniherya wiihiiha vaavaa oneehiweiye.—1 Kor. 9:25, 27; Tito 3:2.

4. Wi ninware muchu ahiihaano, ntakhara heeni ninnaphwanela wooniherya mikhalelo soothene inalociwa mu Galasya 5:22, 23 ni mmakupa makina a Piipiliya?

⁴ Wi ninware muchu ahiihaano, nnaphwanela wunnuwiha mikhalelo soothene inalociwa mu Galasya 5:22, 23 ni mmakupa makina a Piipiliya. * Mikhalelo seiha hisiri ntoko soowara seiho nnawaraahu emoha ti emoha mu ekwaha aya. Mweeparipari, mincipale sa mikhalelo seiha ti soolikana ni mikina. Ntoko yootakiherya, wakhala wi munnamusivela mweeparipari mwaacamani anyu, munahaala okhala oopixa murima ni ooreera murima ni yoowo. Nave wi mukhale muchu aphaama chiryene, munaphwanela okhala oomaala ni wooniherya wiihiiha.

5. Enataphulela eheeni ‘okhalano muupuwelo wa Kristu,’ nave ntakhara heeni ninnaphwanela ohuserya vooloca sa okumi wa Yesu? (1 Korinto 2:16)

⁵ Mwaalakhanye 1 Korinto 2:16. Wi ninware muchu ahiihaano, nnaphwanela ‘okhalano muupuwelo wa Kristu.’ Mmasu makina, nnaphwanela ohuserya mukhalelo wa wuupuwela wa Yesu nave voocharela nimutakiherye yoowo. Yesu ohooniherya sawiima sa munepa wa Muluku moophaameya. Moolikana ni eweheryo yaphaama, owo onnooniherya mikhalelo sa Yehova moophaameya. (Ahe. 1:3) Wakhala wi ninnuupuwela ntoko Yesu, nnahaala weeraka ichu moolikana ni yoowo nave nnahaala onwara muchu ahiihaano.—Fil. 2:5.

6. Tiheeni nnaphwanelaahu wuupuwela vaavaa nneereryaahu onwara muchu ahiihaano?

⁶ Apwanne chiryene ti wooweryeya wa hiyo ochara yootakiherya ya Yesu? Nnanwerya wuupuwela: ‘Yesu toophaameya. Nkirwa kikhala ntoko yoowo moomalela!’ Waakhanle wi munniisoona mmukhalelo yoola, muupuwele iparipari iha: Yoopacerya, nyuwaano mwaaputuxiwe wi mulikaneke ni Yehova ni Yesu. Mwawiihiiha munanwerya othanla waatakiherya yaawo ophiyerya munaweryelaanyuvo, nave munahaala okhumelela phaama. (Map. 1:26) Yanaawiili, munepa waweela wa Muluku ti wakuruxa opwaha echu eri yoothene  veelaponi yavathi. Nnikhaviheryo na munepa yoola, nyuwaano munanwerya waakhwaniherya ichu seiho mwahaahaalaanyu owerya weera mukhatiinyu. Yaneeraru, Yehova hanaweherya wi mooniheryeke sawiima sa munepa moophaameya hiihaano. Mweeparipari, Tiithi ahu oosivela onahaala waavaha yaawo arino ewehereryo ya okhala veelaponi ya vathi okhala wookhala iyaakha 1.000 wi ewerye okhala oophaameya. (Wup. 20:1-3) Echu Yehova onachuneiye wa hiyaano hiihaano tiyawi neererye opaka owetha wahu ni omuroromela yoowo wi anikhaviherye.

7. Tiheeni nnahaalaahu othokororya hiihaano?

⁷ Ti mwawiihai xaxaxa nneeraahu nimutakiherye Yesu? Nnahaala othokororya mwawaakuveya mikhalelo mixexe inarweela wa munepa wa Muluku. Mmakupa ti makupa, nnahaala woona yeeyo nnahuseryaahu orweela wa mukhalelo Yesu oonihenryeiye mikhalelo seiha. Nave tho nnahaala othokororya makoho makina yaawo anahaala onikhaviherya orehererya omuchu ahu wahiihaano.

8. Ti mwawiihai Yesu oonihenryeiye osivela?

⁸ Osivela wawiiseela wa Yesu ntakhara Yehova waamuceenyerya owo opaka owetha wawe ntakhara Atiithi awe ni hiyaano. (Yoh. 14:31; 15:13) Yesu aahooniherya osivela wawe wawiiseela ntakhara achu moorweela wa mukhalelo owo aakhanleiye veelaponi yavathi. Nihiku ti nihiku, owo aari oosivela ni oopisa murima, naamwi vaavaa achu akina yaamwaakaahaaya. Mukhalelo mmoha woochuneyaxa owo oonihenryeiye osivela wawe ntakhara achu waari moorweela wa waahusiha yaawo vooloca sa Omwene wa Muluku. (Luka 4:43, 44) Yesu tho aahooniherya osivela wawe wawiikhooca ntakhara Muluku ni achu moorweela wa weemererya ohooxiwa ni wiiphiwa ni alipa oocheka. Moorweela wa weerano yeela, owo oheeriha okhala wooweryeya wa oothene ahu okhalano okumi woohimala.

9. Nni niwerye hai wooniherya osivela hiiha ntoko Yesu enreiye?

⁹ Hiyaano naahiiveleela wa Yehova ni opatisiwa nthowa nawi ninnamusivela Tiithi ahu awirimu. Mwawiihiiha, ntoko Yesu, nnaphwanela wooniherya osivela ntakhara Yehova moorweela wa mukhalelo nnaakhalihaahu achu. Murummwa Yohani oorepa: “Yoowo ohinamukhwela munnawe onamooneiye, hawerya omukhwela Muluku, yoowo ohinamooneiye.” (1 Yoh. 4:20) Nnanwerya wiikoha: ‘Apwanne kinninnuwiha osivela waka ntakhara achu? Apwanne kinnooniherya opixa murima wa akina naamwi vaavaa awo anakinyeenyeihaaya? Apwanne osivela onnakiceenyerya opharihela elukuluku ni sookhalano saka wi kaakhaviherye akina ohuserya vooloca sa Yehova? Apwanne kinnasiveliwano weerano yeela naamwi achu ancipale ehithamalelaka wiilipixerya waka naari vaavaa anakaakaahaaya? Apwanne kinanwerya waavya mikhalelo mikina sa waaceererya elukuluku mmuteko wa waapaka oohuserya?’—Éfe. 5:15, 16.

10. Ti mwawiihai Yesu aapakeiye murecele?

¹⁰ Yesu aanapaka murecele. Vaavaa achu yaamukhalihaaya moonanara, owo haakookiherya yoonanara ni yoonanara. Nyenya owo aanapaka sincipale opwaha yeeyo. Owo aanapaka murecele nave aanaaceenyerya akina omaliha ohiiwanana waya. Ntoko yootakiherya, owo aahaahusiha awo wi yaaphwanela opaka murecele ni annaya wakhala wi awo yaanachuna wi Yehova eemererye malapelo aya. (Mat. 5:9, 23, 24) Nave mwawuuluulela owo aahaakhaviherya arummwa awe ohiya waakhulana vooloca sa taani aari mutokweene variyari va yaawo.—Luka 9:46-48; 22:24-27.

11. Nni niwerye hai okhala a murecele?

¹¹ Wi nikhale a murecele, nnaphwanela opaka sincipale ohiya pahiru osepa omutannya namvutuka. Nnaphwanela wiilipixerya opaka murecele ni akina ni waaceenyerya anna ni arokora  ahu omaliha ohiiwanana waya. (Fil. 4:2, 3; Tiy. 3:17, 18) Nnaphwanela wiipakela makoho ntoko ala: ‘Mmakupa taani makina kinaphwanelaaka wiilipixerya wi kiweryeke opaka murecele ni akina? Vaavaa munna naari murokora onakinyeenyeiheiye, apwanne kinnatitelela okhala oonyeenyeya ni yoowo? Apwanne kinnaweherya wi muchu mukina akhale tanii apacerye okookiherya murecele, naari kinnapacerya opaka murecele, naamwi kisuwelaka wi owo tokironxe? Wakhala woochuneya, apwanne kinnaaceenyerya yaale ari oohiiwanana wi epake murecele mukina ni mukhwaawe?’

12. Ti mwawiihai Yesu oonihenryeiye oreera murima?

¹² Yesu aari ooreera murima. (Mat. 11:28-30) Owo aahooniherya oreera murima moorweela wa okhala ooreheryeya okhaviherya ni oophimelela naamwi aari variyari va makacamiho oovila. Ntoko yootakiherya, vaavaa muthiyana o Fenisiya aamvenkeiye wi ampenuxe mwanawe, owo woopaceryani, haachuna weera yeeyo muthiyana owo amvekeiye, nyenya vaavaa owo oonihenryeiye nroromelo ntokweene, owo mooreera murima aampenuxa mwanawe. (Mat. 15:22-28) Naamwi owo aari ooreera murima, Yesu hoovelela ovaha ekano. Ilukuluku ikina owo hoovelela waavaha ekano yaale aasiveleiye. Ntoko yootakiherya, vaavaa Pedro eerenryeiye omuceecheiha Yesu wi ahipake yookhwela ya Yehova, Yesu aamusamela owo ohoolo wa oohuserya akina. (Mar. 8:32, 33) Owo aaheerano yeela ohiya wi amuulihe muru Pedro, nyenya wi amuvyakihe ni waalopola oohuserya akina wi ehikhale awiichuna mukhataaya. Moohikhwa minikwa, Pedro aahuuliheya muru nyenya owo aaphuravo orweela wa olaka yoole.

13. Nni niwerye hai okhala ooreera murima chiryene?

¹³ Wi mukhale ooreera murima chiryene wa yaale munaasivelaanyu, ilukuluku ikina munaphwanela waavaha ekano. Vaavaa muneeraanyuno yeela, mmutakiherye Yesu moorweela wa ovaha ekano yeeyo enathipeleya mmalakiheryo anaphwanyeya Mmasu a Muluku. Mukhale ooreheryeya okhaviherya. Muroromele wi awo annachuna opaka yeeyo eri yaphaama, nave mulekecheye wi yaale anamusivela Yehova nave anoosivelaani enahaala waakhulela phaama ekano anyu yoosivela. Mwiipakele makoho ntoko ala: ‘Apwanne kinnakhala oolipa murima olocavo echu vaavaa kinamoonaaka muchu yoowo kinamusivelaaka eeraka echu yoonanara? Wakhala wi kinnachuna ovaha ekano, apwanne kinaloca mooreera murima, naari kinaloca moowali? Tiheeni enakiceenyerya ovaha ekano? Apwanne kinavaha ekano nthowa nawi kiri oonyeenyeya ni muchu yoowo, naari nthowa nawi kinachuna omukhaviherya?’

14. Ti mwawiihai Yesu oonihenryeiye ikharari?

¹⁴ Tahi wi pahiru Yesu oona osuwela yeeyo yaari yaphaama nyenya tho aaneerano yeeyo. Yesu onnaasivela Atiithi awe, mwawiihiiha owo ilukuluku soothene onnapaka yeeyo eri yaphaama ni mathowa aphaama. Muchu a ikharari ilukuluku soothene onnaavya mikhalelo sa waakhaviherya akina nave onnapaka ichu saphaama wa yaawo. Henaakhwana pahiru osuwela echu yeeyo eri yoophwanelela weera, nnaphwanela weera yeeyo eri yoophwanelela ni mathowa aphaama. Akhweya nnanwerya wiikoha: ‘Apwanne ti wooweryeya weera echu yaphaama ni mathowa oonanara?’ Aai ti wooweryeya. Ntoko yootakiherya, Yesu aaloca sa yaale yaavaha samahala wa achu oohaawa, nyenya yeerihaka wi achu akina yoone yeeyo anapakaaya nave ewerye waacicimiha yaawo. Naamwi miteko seiha siri saphaama, hasinamuhakalaliha Yehova.—Mat. 6:1-4.

15. Nni niwerye hai okhala a ikharari?

¹⁵ Hiyaano nnanwerya okhala aikharari chiryene wakhala wi ninnapaka echu yaphaama ni mathowa oophwanelela. Mwawiihiiha munaphwanela wiikoha: ‘Apwanne miyaano  nkinamoona osuwela echu yaphaama weera nyenya tho kinneerano yeeyo? Tiheeni enakiceenyerya opaka ichu saphaama?’

16. Tiheeni nnaphwanelaahu weera nihiku ti nihiku, nave ntakhara heeni?

¹⁶ Hannaphwanela wuupuwela wi vaavaa naapatisiwaahu, noonwara muchu ahiihaano moomalela nave wi hannaphwanela tho wiilipixerya. Muchu ahiihaano ori ntoko yoowara evyaani yeeyo nnaphwanelaahu okhapelela. Mukhalelo mmoha wa weerano yeela ori moorweela wa waavya mikhalelo sa wooniherya sawiima sa munepa wa Muluku nihiku ti nihiku. Ntakhara heeni? Nthowa nawi Yehova, Muluku onapaka ichu nave munepa awe ikuru. (Map. 1:2) Mwawiihiiha mikhalelo soothene sa sawiima sa munepa inanwerya nave inaphwanela onceenyerya weeravo echu. Ntoko yootakiherya, murummwa Yakopo oorepa: “Nroromelo tho noohikhalano muteko ti nookhwa nene.” (Tiy. 2:26) Masu mamohamoha ananwerya olociwa wa mikhalelo soothene sa sawiima sa munepa wa Muluku. Elukuluku yoothene nnooniheryaahu seiho ninnooniherya wi munepa wa Muluku onnaphara muteko mwa hiyaano.

17. Ti mwawiihai nnaphwanelaahu waakhulela wakhala wi noohesa wooniherya sawiima sa munepa?

¹⁷ Naamwi Akristu yaale apatisiwe mu iyaakha sincipale, ilukuluku ikina awo annahesa wooniherya sawiima sa munepa. Onachuneya wiilipixerya wooniherya mikhalelo seiha. Muthokororye niphwanaphwaniho nla. Wakhala wi yoowara enoosivelaani yoohaahuwa, apwanne munnariha mwawaakuveya? Hooye. Mwawooneya mwaahaala osona vachu waahunwevo wakhala wooweryeya. Nave voocharela mwaahaala okhapelelaka phaama. Moolikana, wakhala wi mu ekwaha ekina moohesa weera ichu mooreera murima, moopisa murima, naari moosivela ntakhara muchu mukina, hamunaphwanela oceecheya. Mumveke nikhurumuwelo ni murima anyu woothene, nave mweerano hiihaa munahaala okhalano onthamwene woolipa ni muchu yoowo. Mulakelele ohuuluula opaka echu emohamoha omwaahiyu.

18. Tiheeni nnaphwanelaahu ororomela?

¹⁸ Ninnathamalela vancipale okhalano yootakiherya yaphaama etikitheryiwe ni Yesu! Vaavaa nniilipixeryaahu otakiherya muupuwelo ni moonelo awe, onamukhala wookhweya weera ichu ntoko yoowo. Wakhala wi ninneera ichu moolikana ni Yesu, nnahaala onwara muchu ahiihaano. Mmwaha yoola, noonne pahiru mikhalelo mixexe sa sawiima sa munepa wa Muluku. Yaahaala okhala yaphaama waavya elukuluku wi muhuserye mikina sa sawiima sa munepa ni wuupuwela vooloca sa mukhalelo muneeraanyu mooniherye mikhalelo seiho. Munanwerya ophwanya miyaha mu Guia de Pesquisa para Testemunhas de Jeová vathi va muru oni “Vida cristã” nave voocharela “Fruto do espírito.” Muroromele wi wakhala wi moopaka makupa anyu, Yehova onahaala wookhaviheryaani onwara muchu ahiihaano ni ohimurula.