1. Okumi ahu waari mmukhalelo taani nihaakumve opacerya omuhuserya Piipiliya?

 OKUMI anyu waari mmukhalelo taani muhaakumve omuhuserya Piipiliya ni Anamoona a Yehova? Ancipale a hiyaano nnanwerya ohisiveliwa naawuupuwelaka sa yeeyo. Moonelo ni omuchu ahu waavoloweliwa ni yeeyo elapo enalocaaya wi ti yaphaama ni yoonanara. Waakhanle wi ti hiihaa, ‘hinaarino owehererya naari Muluku mweelaponi ya vathi.’ (Éfe. 2:12) Nyenya nipacenrye omuhuserya Piipiliya, okumi ahu waatorokeya!

2. Tiheeni yeeren’ye vaavaa mwaapacenryaanyu omuhuserya Piipiliya?

² Mu yoohuserya anyu ya Piipiliya, nyuwaano mwaahoona wi mookhalano Tiithi anyu a wirimu yoowo onoosivelaani vancipale. Mwaahoona wi wakhala wi munnachuna omuhakalaliha Yehova ni opaka makupa a emusi ya alapeli awe, mwaaphwanela opaka matorokelo oochuneya mu okumi anyu ni mukhalelo anyu wa wuupuwela. Mwaahuserya opaka yeeyo Yehova onaloceiye wi ti yaphaama ni osepa yeeyo owo onaloceiye wi ti yoonanara.—Éfe. 5:3-5.

3. Mwawiiwanana ni Kolose 3:9, 10, tiheeni Yehova onachuneiye wi nipake, nave tiheeni nnahaalaahu othokororya mmwaha yoola?

³ Yehova Mpatuxa ahu ni Tiithi ahu a wirimu, mwawiihiiha owo ookhalano ophwanelela wa olakelela mukhalelo emusi awe enaphwanelaaya weeraka ichu. Nave owo onachuna wi nihaakumve opatisiwa niilipixerye wi ‘nimurule mutxhu akhalai ni miteko sawe.’ * (Mwaalakhanye Kolosi 3:9, 10, BNM.) Mwaha yoola onahaala waakhaviherya yaale anachuna opatisiwa waakhula makoho mararu: (1) “Mutxhu akhalai” tiheeni? (2) Ntakhara heeni Yehova onnanceenyerya omurula muchu akhalai? (3) Nni neereno hai? Wa hiyaano nri oopatisiwa, mwaha yoola onahaala  onikhaviherya ohipaka naari wuupuwela ichu seiho neeraahu nihaakumve omurula muchu akhalai.

4. Tiheeni muchu yoowo onahooleliwa ni “mutxhu akhalai” oneereiye?

⁴ Muchu yoowo onahooleliwa ni “mutxhu akhalai” mweeparipari onuupuwela ni oneera ichu mmukhalelo wa mwiili. Owo onanwerya okhala awiichuna mukhateiye, awaakuvela onyeenyeya, oohithamalela, ni awiirumiha. Owo onanwerya osiveliwa woona epwitikiri ni ixilema soocapaheya ni sa nlala. Moohikhwa minikwa owo ookhalano mikhalelo mikina saphaama, nave akhweya onniiphwanyerya mathowa wa ichu seiho onaloceiye naari onapakeiye. Nyenya haniilipixeryaxa wi atoroke muupuwelo ni saweera sawe.—Gal. 5:19-21; 2 Tim. 3:2-5.

5. Apwanne nnanwerya omurula muchu akhalai moomalela? Mutharihe. (Saw. 3:19)

⁵ Hiyaano na achu oohiphaameya, mwawiihiiha, haavo mmoha a hiyo onawerya oviihamo moomalela muupuwelo ni soolakelela soothene soonanara mmurimani ni mmuupuweloni mwahu. Ilukuluku ikina, nnanwerya opaka naari oloca echu yeeyo nnahaalaahu okhalano ekeerelani. (Yer. 17:9; Tiy. 3:2) Nyenya vaavaa nnamurulaahu muchu akhalai, miyoonelo ni saweera sa mwiili hasinanihoolela tho. Hiyaano ninnakhala muchu a mukhalelo mukina.—Isa. 55:7; mwaalakhanye Saweriwa T’arummwa 3:19.

6. Ntakhara heeni Yehova onnanceenyerya ohiya muupuwelo wooheseya ni sookhovelela sa muchu akhalai?

⁶ Yehova onnanceenyerya wi nihiye muupuwelo ni sookhovelela soonanara nthowa nawi owo onnanisivela vancipale nave onachuna wi nipuhe okumi. (Isa. 48:17, 18) Owo oosuwela wi yaale ahiniilipixerya owaniha ni sookhovelela soonanara anniihooxa mukhataaya vamoha ni yaale yaarukurenrye. Owo onnathanana vaavaa onanooneiye niihooxaka mukhatiihu ni akina.

7. Mwawiiwanana ni Aroma 12:1, 2, yoothanla taani nryaahuno?

⁷ Amusi ni asinthamwene ahu akina, woopaceryani akhweya ananwerya onitheya vaavaa nneereryaahu opaka matorokelo mu omuchu ahu. (1 Ped. 4:3, 4) Awo ananwerya oloca wi nookhalano ophwanelela wa weera echu yeeyo nnachunaahu ni wi hannaphwanela weemererya wi akina enleeleke echu yaweera. Nyenya yaawo anakhooca malakiheryo a Yehova hari  ootaphuwa. Mweeparipari awo aneemererya wi elapo enalamuleliwa ni Satana yaavolowele yaawo. (Mwaalakhanye Aroma 12:1, 2.) Oothene ahu nookhalano yoothanla: Otitelela ni omuchu ahu wakhalai, yoowo onahooleliwa ni yoocheka ni elapo ya Satana, naari weemererya wi Yehova anitoroke wi nikhale muchu aphaama hiihaano.—Isa. 64:8.

8. Tiheeni enahaala onikhaviherya osepa muupuwelo wooheseya ni sookhovelela soonanara?

⁸ Yehova onnasuwela wi ennaviravo elukuluku ni wiilipixerya mmakupa ahu wi nsepe sookhovelela sooriipiheya ni sookhovelela soonanara. (Sal. 103:13, 14) Mwawiihiiha, orweela Mmasu awe, munepa awe, ni marehereryo awe, Yehova onnanivaha miruku, ikuru, nnikhaviheryo nnachunaahu wi ntoroke omuchu ahu. Moohikhwa minikwa owo ori ooreheryeya wi ookhaviheryeeni. Vano hankooni nthokororye ichu ikina seiho munaphwanelaanyu opaka wi nwerye omurula muchu akhalai ni wi mphwanelele opatisiwa.

9. Masu a Muluku eni yookhaviheryeeni weera eheeni?

⁹ Mumpharihele Piipiliya wi mwiisaalikhele mwawiiseela. Masu a Muluku ari ntoko eweheryo; awo ananwerya wookhaviheryaani waalikhela mukhalelo anyu wa wuupuwela, oloca, ni weera ichu. (Tiy. 1:22-25) Muhusiha anyu a Piipiliya ni Akristu akina amavyakelo ananwerya woovahaani miruku. Ntoko yootakiherya, awo ananwerya opharihela Soorempwa wi yookhaviheryeeni osuwela ichu seiho munaweryaanyu opaka phaama ni soocecheya sanyu. Awo ananwerya woohusihaani mukhalelo wa ophwanya sooleeliherya sinathipeleya Mpiipiliyani seiho sinavahererya miruku soophara muteko vooloca sa mukhalelo wa ovootha sookhovelela soonanara. Nave Yehova ori ooreheryeya ilukuluku soothene wi ookhaviheryeeni. Owo oosuwela phaama mukhalelo wa wookhaviheryaani; owo oosuwela yeeyo eri mmurima mwanyu. (Masi. 14:10; 15:11) Mukhaleno yookhovelela ya ovekela wa yene ni ohuserya Masu awe mahiku oothene.

10. Tiheeni nnahuseryaahu orweela wa yaweereya ya Elie?

¹⁰ Mukhale oolekecheya wi malakiheryo a Yehova taphaamaxa. Hiyaano nnanwerya ophuravo orweela wa ichu soothene seiho Yehova onanivekeiye opaka. Yaale anakhala mwawiiwanana ni malakiheryo awe annacicimiheya, annakhalano yoolakelela mookumini, nave annakhalano ohakalala weeparipari. (Sal. 19:7-11) Moohiyana, yaale anakhooca ochariha malakiheryo a Yehova annahooxeya orweela wa sookhumelela sa miteko sa mwiili. Moone yeeyo mulopwana awiichaniwa Elie olonceiye vooloca sa okhooca ochariha malakiheryo a Muluku. Owo aphwiiwale ni asitiithi yaamusivela Yehova. Nyenya vaavaa aareiye mmiravo, Elie aathanla onthamwene woonanara. Owo aapacerya olya mirece, ocapaheya ni wiiya. Elie olonce wi owo aakhala oonyeenyeya ni a nlala. Owo onneemererya: “Mweeparipari, kaanapaka ichu soothene kaahusenryaaka wi Mukristu haaphwanela opaka.” Nyenya Elie haacuwanle yeeyo aahusenryeiye vaavaa aareiye mmiravo. Ohoolo waya, owo aapacerya omuhuserya Piipiliya wanaawiili. Owo aahiilipixerya wi ahiye sookhovelela sawe soonanara nave aapatisiwa mu 2000. Ti mwawiihai okhala mwawiiwanana ni malakiheryo a Yehova omukhavihenryaaya? Elie ooloca: “Miyaano kookhalano murecele wa mmuupuweloni ni yawuupuxerya ya murima yaphaama.” * Yootakiherya ya Elie ennanooniherya wi yaale anakhooca malakiheryo a Yehova anniihooxa mukhataaya. Naamwi  hiihaa, Yehova ori ooreheryeya waakhaviherya yaawo wi epake matorokelo.

11. Ichu taani Yehova oniiceiye?

¹¹ Muhuserye wiica yeeyo Yehova oniiceiye. (Sal. 97:10) Piipiliya onnooniherya wi Yehova onniica “oweha wawisona, nlumi nawotha, mata anawipha atxhu òhitxheka.” (Masi. 6:16, 17, BNM) Owo tho ‘onnananariwa ni alipa oowoka ni awiipha.’ (Sal. 5:6) Yehova onniica mikhalelo ni saweera seiha ophiyerya wi owo aawiipha achu oothene a mmahiku a Nowa woona wi awo yaasareiha elapo ni nlala. (Map. 6:13) Muthokororye yootakiherya ekina. Moorweela wa mulipa a miririmu Malakiya Yehova aaloca wi onnawiica yaale anaavya nthowa wi emwalane ni oothelana aya. Yehova onnakhooca malapelo aya nave onahaala waathoriha awo nthowa na meecelo aya.—Malak. 2:13-16; Ahe. 13:4.

12. Enataphulela eheeni ‘wiica yoonanara?’

¹² Yehova onachuna wi ‘niicaneno yoonanara.’ (Aro. 12:9) Masu awi ‘wiicanano’ ennathariha moonelo woolipa; enataphulela wiica echu moomalela, nthowa nawi ti yoothanyeya. Mwaanyiherye wi mooleeliwa wi mulye yoolya yeeyo yuucale. Wuupuwelaru sa yeeyo akhweya waanweerihaani orapheya. Mmukhalelo woolikana, wuupuwelaru yeeyo Yehova onaloceiye wi ti yoonanara onaphwanela onnanara.

13. Ntakhara heeni ninnaphwanela ovareryela muupuwelo ahu?

¹³ Mukhapelele muupuwelo anyu. Muupuwelo ahu onnavolowela saweera sahu. Ti nthowa nene Yesu onihusinheiye okhooca muupuwelo yoowo onaneeriha opaka soocheka itokweene. (Mat. 5:21, 22, 28, 29) Hiyaano ninnachuna omuhakalaliha Tiithi ahu a wirimu, tahi yeeyo? Mwa yeeyo, ti woochuneya okhooca mwawaakuveya muupuwelo woothene woonanara yoowo onarwa mmuupuweloni mwahu!

14. Masu ahu anooniherya eheeni, nave makoho taani nnaphwanelaahu waakhula?

¹⁴ Mvareryele malocelo anyu. Yesu ooloca: “Inakhuma mwano, inarwa mmurimani, nave ti seiha inanvirikanya mutxhu.” (Mat. 15:18, BNM) Chiryene, masu ahu annooniherya mukhalelo oryaaya omuchu ahu wa mpuwa. Mwawiihiiha mwiipakele makoho ntoko ala: ‘Mpwanne kinnakhooca wootha naamwi oloca eparipari ehaalaka okiruuhela makacamiho? Ntoko muchu othenle naari otheliwe, apwanne kinnakhalano ephoole wi kihaakareeleke yaale ari a mwiikho woohiyana? Apwanne kinnasepa masu oohiphwanelela? Apwanne kinnaakhula moomaaleleya vaavaa muchu mukina onakinyeenyeiheiye?’ Nyuwaano munahaala okhaviheryeya moorweela  wa wuupuwelela makoho yaala. Masu anyu ananwerya okhala ntoko osona yoowara. Wakhala wi munnapaka owetha wanyu wi muhiye masu oophuca, awootha ni oohiphwanelela mu ochekula wanyu, onahaala okhala wookhweya omurula muchu akhalai.

15. Enataphulela eheeni othomeya omuchu ahu wakhalai vamwirini?

¹⁵ Mukhale ooreheryeya opaka echu vyakala yeeyo eri yoochuneya. Murummwa Paulo aapharihela niphwanaphwaniho wi anihusihe echu eri yoochuneyaxa wi nipake matorokelo mu okumi ahu. Owo oorepa wi nnaphwanela othomeya “omuchu ahu wakhalai” va mwiri. (Aro. 6:6) Mmasu makina, hiyaano nnaphwanela ochariha yootakiherya ya Kristu. Hiyaano nnaphwanela wiipha miyuupuwelo ni saweera seiho ihinamuhakalaliha Yehova. Pahiru wakhala wi noheerano yeela nnanwerya okhalano yawuupuxerya-ya-murima yaphaama ni okhalano ewehereryo ya okumi woohimala. (Yoh. 17:3; 1 Ped. 3:21) Muupuwele wi Yehova hatoroka malamulo awe wi anihakalalihe. Moohiyana, hiyaano nnaphwanela otoroka omuchu ahu ni wiiwelela malakiheryo awe.—Isa. 1:16-18; 55:9.

16. Ntakhara heeni nnaphwanelaahu okhala oolakelela otitelela owaniha ni minkhela soonanara sa mwiili?

¹⁶ Mutitelele owaniha ni minkhela sa mwiili. Naamwi mmanle opatisiwa, nyuwaano munaphwanela otitelela owaniha ni minkhela sa mwiili. Moone yaweereya ya mulopwana oniichaniwa Maurício. Vaavaa aareiye mmiravo, owo aapacerya opaka mararuwo ni achu oolikana mwiikho. Voocharela, owo aahaasuwela achu a Yehova nave aapacerya omuhuserya Piipiliya. Amanle opaka matorokelo mu okumi awe, owo aapatisiwa mu 2002. Naamwi amurumeelaka Yehova mu iyaakha sincipale, Maurício ooloca: “Kinaphwanela weemererya wi ilukuluku ikina kinnawaniha minkhela soonanara.” Owo haneemererya wi ela emuceecheihe. Moohiyana owo ooloca: “Kinnahakalala nthowa na osuwela wi vaavaa kinathanlaaka ohichariha minkhela seiha, kinnamuhakalaliha Yehova.” *

17. Tiheeni yoolipinheeni mu yaweereya ya Nabiha?

¹⁷ Mvekele wa Yehova mvekaka nikhaviheryo, nave muroromele munepa awe, ohiya ikuru sanyu. (Gal. 5:22; Fil. 4:6) Nnaphwanela wiilipixerya wakhala wi ninnachuna omurula muchu akhalai ni ohikookela onwara. Muthokororye yaweereya ya muthiyana mmoha awiichaniwa Nabiha. Atiithi awe yaahimuchawa vaavaa owo aareiyeno pahiru iyaakha thanu nammoha.  Owo ooloca: “Eyo yaakitannyerya wiicela otokweene wa mmuupuweloni.” Vaavaa unnunweiye, Nabiha aakhala oonyeenyeya ni oowali. Owo aapacerya olya mirece, aawaleliwa nave aamaliha iyaakha mu kariposo. Anamoona a Yehova yaalaleerya mu kariposo yaapacerya omuhuserya Piipiliya ni yoowo. Nabiha aapacerya opaka matorokelo matokweene. Owo ooloca: “Sookhovelela saka sikina soonanara saari sookhweya ohiya. Nyenya ohiya omulya soona waari woovilaxa.” Nabiha aahiilipixerya opwaha eyaakha emoha nave voocharela aawerya ohiya omulya soona. Owo aawenrye hai weerano yeeyo? Owo ooloca: “Echu yoochuneyaxa yaakikhavihenrye ohiya waari ovekela wa Yehova moohihiyererya.” Owo vano onnaaleela akina: “Koolekecheya wi waakhanle wi koowerya opaka matorokelo wi kimuhakalalihe Yehova, muchu ori oothene onanwerya!” *

18. Mwawiiwanana ni 1 Korinto 6:9-11, tiheeni alapeli ancipale a Muluku awenryaaya opaka?

¹⁸ Mu nsana noopacerya, achu akina yaawo yaathanliwe ni Yehova wi yalamulele ni Kristu woopaceryani yaanapaka ichu soonanara. Ntoko yootakiherya, awo yaari oocapaheya, yaanapaka mararuwo ni achu a mwiikho woolikana nave yaaniiya. Nyenya nnikhaviheryo na munepa waweela, awo yaawerya otoroka omuchu aya. (Mwaalakhanye 1 Korinto 6:9-11.) Moolikana olelo, Piipiliya onnaakhaviherya macikhwi aachu opaka matorokelo mu okumi aya. * Awo aawerya ohiya sookhovelela saya soonanara seiho saari soovila ohiya. Sootakiherya saya sinnooniherya wi nyuwaano tho munanwerya opaka matorokelo mu omuchu ni ovootha sookhovelela soonanara wi mphwanelele opatisiwa.

19. Tiheeni nnahaalaahu othokororya mmwaha onacharela?

¹⁹ Ohiya pahiru wiilipixerya omurula muchu akhalai, yaale anachuna opatisiwa anaphwanela tho wiilipixerya wi enware muchu ahiihaano. Mwaha onacharela onahaala othokororya mukhalelo wa weerano yeela ni mukhalelo akina aneeraaya enikhaviherye.