Akina yaawo yaalakhannye yaweereya yeela mwawaakuveya anniipakela nikoho nenla. Nyenya mu iversikulu seiya aakhalavo alopwana eeli oohiyana yaawo yiichaniwa Mefiposeti, nave nnanwerya ohuseryavo echu ekina moorweela mwa waalakhanya yeeyo yeeren’ye.

Mwene Sawuli o Isarayeli aahikhalano anamwane aasilopwana athanu ni aasithiyana apiili. Mwaana oopacerya a Sawuli aari Yonata. Nave voocharela mwene aahikhalano mwaana yoowo iichaniwa Mefiposeti, yoowo Sawuli aamuyanreiye ni mwaariye mukina iichaniwa Risipa. Yonata tho aahikhalano mwaana yoowo iichaniwa Mefiposeti. Mwawiihiiha, Mwene Sawuli aahikhalano mwaana yoowo iichaniwa Mefiposeti vamoha ni musulwawe yoowo tho iichaniwa Mefiposeti.

Mu elukuluku ekina, Mwene Sawuli aahipacerya owiica Akipiyoni nave aaheererya owiipha yaawo. Mwawooneya, ancipale a yaawo yaahiiphiwa. Mweeparipari ela yaari echu yoonanara. Ntakhara heeni? Nthowa nawi mu elukuluku ya Yosuwa, asitokweene a Aisarayeli yaahipaka nlakano na murecele ni Akipiyoni.—Yos. 9:3-27.

Nlakano nenle nlelo naanaphara muteko mu elukuluku ya Mwene Sawuli. Moohiyana ni yeeyo nlakano naalocaaya, mwene aaheererya owiipha Akipiyoni. Weererya wuuwu waahikumiherya ‘yoocheka wa Sawuli ni a ethxeko awe.’ (2 Sam. 21:1, BNM) Vookuchula vaya, Tavite aahikhala mwene. Akipiyoni yaawo yaakophonle, yaahimuleela yene vooloca sa echu yoonanaraxa yeeyo yeeren’ye. Tavite aahaakoha yaawo mukhalelo yaahaalaaya oliva wa nthowa na ohooxa yoowo waatannyiwe ni Sawuli nave wi ehuleye ephiro wi Yehova areelihe elapo. Ohiya oveka ikhorowa, Akipiyoni yaahiveka wi anamwane athanu napiili a mulopwana yoowo ‘aatolonshe’ ethoriheryiwe okhwa. (Nam. 35:30, 31) Tavite aaheemererya yooveka aya.—2 Sam. 21:2-6.

Moorweela wa yeeyo, voocharela, Sawuli ni Yonata yaahikhwa okhoconi, nyenya mwaana a Yonata Mefiposeti aari mukumi. Owo aari oorakala, nenlo naari nikacamiho nawe ovinyerya woonamwaneni wawe, nave ti yawooneya wi owo haapakile makupa vaavaa ataata awe yaawiiphaaya Akipiyoni. Tavite aapaka nlakano na murecele ni Yonata, nenlo naahaala okumiherya mphurelo nloko nawe, ophitaanyerya mwaana a Yonata Mefiposeti. (1 Sam. 18:1; 20:42) Yoorepa eni: “Mwene [Tavite] aamuhiya Mefiposeti mwaana a Yonata, musulwawe Sawuli, wa nthowa na olipela weiwo Tavite eenreiyeno ni Yonata, vamiithoni va Apwiya.”—2 Sam. 21:7.

Mwawiihiiha, Tavite aahicicimiha yooveka ya Akipiyoni. Owo aahaakuxa anamwane eeli a Sawuli, mmoha a yaawo iichaniwa Mefiposeti, ni asisulwaawe athanu a Sawuli. (2 Sam. 21:8, 9) Meerelo a Tavite yaahimaliha nthowa na nikhami mweelaponi.

Yaweereya yeela eri yoopwahasha ni yaweereya ekina. Nlamulo na Muluku naari nookwakwaleya. Nno naaloca wi: “Anamwane ehikhwe wa nthowa na alipa awaayara.” (Malam. 24:16) Yehova haahaala weemererya wiiphiwa wa anamwane eeli ni asisulwawe athanu a Sawuli waakhanle wi awo hiyaarino nthowa. Nlamulo tho naanaloca wi: “Mmoha ni mmoha athorihiweke ni mulacu eenreiye.” Enakhala wi alopwana athanu napiili a nloko na Sawuli yaawo yaakhwile yaahipaka makupa vaavaa Sawuli eereryeiye owiipha Akipiyoni. Ntoko yookhumelela, anamwane athanu napiili yaalivela soohesa saya.

Yaweereya ela enooniherya wi muchu hanaphwanela wiikuphelela moorweela mwa weera yoonanara uupuwelaka naari alocaka wi pahiru aachariha sooleliherya. Namiruku omurempe Masiposipo aaheemererya: “Orapelihe wa soonanara inaani saa.”—Masi. 4:24-27; Éfe. 5:15.