Ntakhara heeni mulopwana iichaniwa “Nexe” aahiloca wi aahaala ‘opahula’ yoohiyeryiwa awe waakhanle wi oomuthela Ruti? (Ruti 4:1, 6)

Wakhala wi mulopwana aathenle mu elukuluku yakhalai ookhwa ahirino anamwane, yaanakhumelela makoho: Tiheeni yaahaala weereya ni emaca awe? Apwanne nsina nawe naahaala ocakanela okhala wookhala? Nlamulo na Mose ninnakhaviherya waakhula makoho yaala.

Tiheeni yeereya ni emaca ya mulopwana aakhwa naari sa muchu yoowo aakhala oohaawa nave nthowa na yeeyo atumiha emaca awe? Munnawe naari mmusi awaacameleya aanwerya woopola naari othuma wanaawiili emaca eyo. Mwawiihiiha, emaca eyo yaanwerya otitelela okhala ya emusi.—Onam. 25:23-28; Nam. 27:8-11.

Ti mwawiihai naahaalaaya okhapeleliwa nsina na emusi na mulopwana ookhwa? Naamukhwele aaphwanela otheliwa ni mulamu awe nave ti marehereryo yaala yaaphariheliwe ni Ruti. Mulamu yoowo aahaala omuthela naamukhwele a munna awe aaphwanela omuyara mwaana yoowo aahaala okuxa nsina na mulipa ookhwa ni yoohiyeryiwa awe. Marehereryo yaala oosivela yaanamukhapelela tho naamukhweli.—Malam. 25:5-7; Mat. 22:23-28.

Muthokororye yootakiherya ya Nowemi. Owo aatheliwe ni mulopwana awiichaniwa Elimeleki. Vaavaa Elimeleki ni anamwanaawe eeli yaakhwilaaya, haarivo mulopwana a echoko ya Nowemi aahaala omukhapelela yoowo mmukhalelo ori woothene. (Ruti 1:1-5) Vaavaa Nowemi ni pwiyamwaana awe Ruti yaakookenlaaya o Yuta, owo aahimuleela Ruti wi amveke Powasi woopola emaca aya. Owo aari mmusi awaacameleya a Elimeleki. (Ruti 2:1, 19, 20; 3:1-4) Nto Powasi aahisuwela wi mmusi mukina yoowo Piipiliya onamwiichaneiye “Nexe” aari awaacameleleyaxa. Mwawiihiiha, owo aahikhalano ekari ya olakelela woopaceryani waakhanle wi aanachuna okhala moopoli.—Ruti 3:9, 12, 13.

Woopaceryani, “Nexe” aari ooreheryeya okhaviherya. (Ruti 4:1-4) Owo aanasuwela wi aahaala omaliha ikhorowa sincipale wi athumeno emaca, nyenya tho aanasuwela wi Nowemi aari awuuluvala wi akhaleno mwaana yoowo aahaala okuxa emaca ya Elimeleki. Nexe aahaala othuma emaca nave eyo yaahaala okhala makupa a yoohiyeryiwa awe, nave owo oona wi ahaala ophura.

Nyenya Nexe aahilakelela wi haahaala woopola emaca vaavaa aasuwenleiye wi aaphwanela omuthela tho Ruti. Owo aahiloca: “Nkiwerya woopola, wi kihipahule muyareriwo aka.” (Ruti 4:5, 6) Ntakhara heeni owo aahitoroka muupuwelo awe?

Waakhanle wi Nexe naari muchu mukina oomuthela Ruti nave emuyara mwaana, mwaana owo taahaala okhala mwaneene a emaca ya Elimeleki. Ti mwawiihai Nexe aahaaleiye ‘opahula’ “muyareriwo” awe? Piipiliya hanaloca, nyenya ala akhweya mathowa avakhaani.

• Noopacerya, owo aahaala oyeleela ikhorowa athumaka emaca ya Elimeleki, nthowa nawi, emaca eyo mwawooneya hiyaahaala otitelela okhala yawawe. Eyo yaahaala okhala ya mwaana a Ruti.

• Nanaawiili, owo aahaala okhalano murici wa waavakulela ni waakhapelela ooweeli, Nowemi ni Ruti.

• Naneeraru, waakhanle wi Ruti ohaayara anamwane akina ni Nexe, awo yaahaala okawana yoohiyeryiwa ni anamwane vyakala owo aareiyeno.

• Naneexexe, waakhanle wi Nexe haarino anamwane akina, anamwane Ruti aahaaleiye waayara yaahaala okhala ooreela, woona wi yaahaala okuxa imaca sa Elimeleki ni sa Nexe. Vaavaa owo aahaaleiye okhwa, emaca awe yaahaala okhala ni mwaana yoowo ii akhaleno nsina na Elimeleki, ohiya nsina nawe. Nexe haachuna okuha va yawoopiha muyareriwo awe wi amukhaviherye Nowemi. Owo aahithanla wi moopoli oocharela, Powasi aakhwaniherye murici yoowo. Powasi aaheerano yeela woona wi aanachuna ‘okookiha nsina na mulopwana yoole okhwile ni muyareriwo awe.’—Ruti 4:10.

Mwawooneya Nexe aahikhalano nchuno ntokweene na okhapelela nsina nawe ni muyareriwo awe. Owo aari awiichuna mukhateiye. Nto ohiya okhapelela nsina nawe, nno noocakanela. Owo tho ooyeleela ekari yavameekhaaya yeeyo Powasi aakhenleiye, okhala mmoha a nikholo na Mesiya, Yesu Kristu. Woona wi Nexe aari awiichuna mukhateiye haari oorehereya waakhaviherya achu yaachuna nikhaviheryo nave aahikhalano sookhumelela soowaawa!—Mat. 1:5; Luka 3:23, 32.