1. Tiheeni asitiithi anachunaaya wa anamwanaaya?

 ASITIITHI, hiyaano ninnasuwela wi nyuwaano munnachuna waakhaviherya aniinyu omusuwela ni omusivela Yehova. Nyenya Muluku toohooneya. Muni mwaakhaviherye hai aniinyu omoonaka yoowo ntoko muchu okhanle ni omwaacamela yoowo?—Tiy. 4:8.

2. Ti mwawiihai asitiithi aneeraaya yaahusihe anaaya vooloca sa mikhalelo sa Yehova?

² Mukhalelo mmoha woochuneya wa waakhaviherya anamwanaanyu omwaacamela Yehova, ori moorweela wa omuhuserya Piipiliya ni yaawo. (2 Tim. 3:14-17) Mweeparipari, Piipiliya onnooniherya mukhalelo amiravo eneeraaya ehuserye vooloca sa Yehova. Mu liivuru a Masiposipo, mwawooneya, tiithi mmoha onnamuupuxerya mwanawe wi hanaphwanela oyeleela woona mikhalelo sa Yehova sinooniheryiwa mu soopatuxiwa. (Mas. 3:19-21) Nnahaala othokororya mikhalelo savakhaani asitiithi aneeraaya epharihele soopatuxiwa wi yaakhaviherye anaaya ohuserya vooloca sa omuchu wa Yehova.

3. Nikhaviheryo taani asitiithi anaphwanelaaya waavaha anaaya?

³ Piipiliya onnaloca wi “mikhalelo [sa Muluku] soohooneya, . . . sinnooneya mookwakwaleya ovinyerya opatuxiwa wa elapo, ntakhara sinnasuweliwa moorweela wa ichu sipatuxiwe.” (Aro. 1:20) Asitiithi, akhweya munnasiveliwa omaliha elukuluku ni anamwanaanyu mmapuro ooreera. Mphariheleke ilukuluku seiho wi mwaakhaviherye aniinyu woona wiiwanana orivovo variyari va “ichu sipatuxiwe” ni mikhalelo sootikhiniha sa Yehova. Vano hankooni noone yeeyo asitiithi anahuseryaaya orweela wa mukhalelo Yesu aahusiheiye.

4. Ti mwawiihai Yesu aapharihenleiye soopatuxiwa wi aahusihe oohuserya awe? (Luka 12:24, 27-30)

 ⁴ Moone mukhalelo Yesu aapharihenleiye soopatuxiwa wi ahusihe. Mu ekwaha emoha owo aahaaveka oohuserya awe wi yaavarerye anakhuku ni ithutu. (Mwaalakhanye Luka 12:24, 27-30.) Yesu aanwerya oloca sa mwaaxinama vyakala naari mwiri, nyenya owo aahimuthanla palame ni ithutu seiho oohuserya awe yaasuwenlaaya phaama. Oohuserya akhweya yaanawoona anakhuku ni ithutu ithapuruwaka mmacani. Apwanne munnawerya omoona Yesu athoonyaka ichu seiha vaavaa aaloceiye? Nave tiheeni owo aapankeiye amanle oloca sootakiherya seiha? Owo aahaahusiha oohuserya awe nihusiheryo nakuru vooloca sa mahala ni oreera murima wa Tiithi aya a wirimu: Yehova aahaala waavakulela ni waawariha alapeli awe oororomeleya hiihaa ntoko eereiye ni anakhuku vamoha ni ithutu.

5. Sootakiherya taani inaphwanyeya mu soopatuxiwa asitiithi aneeraaya epharihele wi yaahusihe anaaya vooloca sa Yehova?

⁵ Asitiithi, mwanwerya otakiherya mukhalelo wa ohusiha wa Yesu? Nyuwaano munanwerya waaleela aniinyu vooloca sa mukhalelo mmoha sa soopatuxiwa munasiveliwaanyuno, ntoko mwaaxinama naari mwiri onoosivelaani vancipale. Vaavaa muneeraanyuno yeela, mwiilipixerye wi mwaatharihele yeeyo yootakiherya eyo enooniheryaaya vooloca sa Yehova. Voocharela, munaphwanela waakoha anamwanaanyu vooloca sa mwaaxinama naari mwiri onaasivela vancipale. Wakhala wi munnapharihela ichu seiho inaatikhiniha anamwanaanyu, awo akhweya anahaala woowiriyanaani moomaaleleya vaavaa muneereryaanyu waahusiha awo vooloca sa mikhalelo sa Yehova.

6. Tiheeni nnahuseryaahu orweela mu yootakiherya etikitheryiwe ni amamaawe Kristofa?

⁶ Apwanne asitiithi anaphwanela omaliha elukuluku yincipale epakaka otholathola vooloca sa mwaaxinama vyakala naari mwiri ehaakumve oloca yeeyo yoopatuxiwa enanihusihaaya vooloca sa Yehova? Tahi woochuneya. Yesu havanhe othariha otokweene vooloca sa mukhalelo ipalame inalyaaya naari mukhalelo ithutu sinannuwaaya. Naari wakhala wi aniinyu annasiveliwa ohuserya mwawiiseela ichu Yehova opatunxeiye, ilukuluku ikina masu naari nikoho nookhweya ti nawaakhwana wi mwaakhaviherye aniinyu wiiwexexa epontu ene. Moone yeeyo munna awiichaniwa Kristofa onuupuweleiye vooloca sa onamwane awe: “Amama aka yaanaloca ichu sookhweya wi enikhaviherye ovaha esisapo soopatuxiwa saanirukurenrye. Ntoko yootakiherya, vaavaa naacamelaahu miyaako, awo yaanaloca: ‘Moone mukhalelo iryaaya mitokweene ni sooreera miyaako iha! Apwanne Yehova tahi ootikhiniha?’ Naari vaavaa naakhalaahu waacamela wa ephareya, awo yaanaloca: ‘Moone mukhalelo macumuxa aryaaya oowerya! Apwanne Muluku tahi ooweryaxa?’” Kristofa ooloca: “Masu yaale ookhweya, yaanivolowela vancipale.”

7. Ti mwawiihai muneeraanyu mwaavyakihe aniinyu wuupuwelela soopatuxiwa?

⁷ Vaavaa aniinyu aninnuwaaya, mwaavyakihe yaawo opacerya wuupuwelela vooloca sa soopatuxiwa ni ohuserya yeeyo enahusihaaya vooloca sa Yehova mukhataaya. Munanwerya oloca pahiru sa echu emoha Yehova opatunxeiye ni waakoha aniinyu: “Tiheeni yeela enanihusihaaya vooloca sa Yehova?” Akhweya munahaala otikhiniheya owiriyana yeeyo awo anahaalaaya oloca.—Mat. 21:16.

8. Ikari taani asitiithi yaari Aisarayeli yaaryaayano ‘mumphironi’ vaavaa yaapakaaya mikwaha?

⁸ Asitiithi Aisarayeli yaahileeliwa wi yaaphwanela waahusiha anaaya masu a malamulo a Yehova vaavaa yeecaaya ‘mumphironi.’ (Malam. 11:19, TNM) Saahikhalavo miphiro mincipale o Isarayeli. Asinama, asipalame ni ithutu soohiyanahiyana saanawerya wooniwa. Vaavaa imusi  sa Aisarayeli yaapakaaya mikwaha, asitiithi yaanakhalano ikari sa oloca ni anaaya vooloca sa ichu seiho Yehova aapankeiye. Nyuwaano asitiithi mookhalano ikari soolikana sa opharihela soopatuxiwa wi mwaahusihe aniinyu. Muthokororye ti mwawiihai asitiithi akina aneerano yeela.

9. Tiheeni muhusenryaanyu orweela mu yootakiherya ya Punitha ni Katia?

⁹ Maayi mmoha awiichaniwa Punitha, onakhala mu epooma etokweene yo Intiya, ooloca: “Vaavaa nnaasekuryaahu amusi anakhala ociiwene wa epooma, ninnoona mikwaha iho ntoko ikari sa waakhaviherya aniihu ohuserya vooloca sa soopatuxiwa sootikhiniha sa Yehova. Kinoona wi anamwanaaka anniiwexexa phaama soopatuxiwa vaavaa anakhalaaya ocai wa achu ancipale ni epooma.” Asitiithi, aniinyu herwa ecuwala ilukuluku mmalinhaanyu ni yaawo mmapuro oreera. Murokora mmoha onakhala o Moltovia awiichaniwa Katia ooloca: “Ichu soonamwanaaka kinuupuwelaaka ti elukuluku yeeyo kimalinhaaka ni asitiithi aka kiri ocai wa epooma. Kinnaathamalela vancipale yaawo nthowa na okihusiha kiri mwaana omaala ni ovarerya yeeyo Yehova opankeiye ni omoona owo mu soopatuxiwa sawe.”

10. Tiheeni asitiithi anaphwanelaaya weera wakhala wi ti woovila wa yaawo oya ocai wa epooma? (Moone ekaaxa “ Nikhaviheryo wa Asitiithi.”)

¹⁰ Tiheeni munaphwanelaanyu weera wakhala wi tahi wooweererya wa nyuwo opaka mukwaha muyaaka ociiwene wa epooma? Amol, yoowo tho onakhala o Intiya, ooloca: “Ochu kinakhalaakawo, asitiithi annalapa iwora sincipale, nave opaka mukwaha n’yaaka ociiwene wa epooma onnamaliha ikhorowa sincipale. Nyenya nyuwaano munanwerya woona soopatuxiwa sa Yehova ni oloca mikhalelo sawe vaavaa munakhalaanyu mu ntakhwa nikhaani naari muri mpithela mwa epereetiyu.” Vaavaa munavareryaanyu moopwacha, munanwerya woona soopatuxiwa sincipale waacamela owaanyu seiho munaphwanelaanyu owooniha aniinyu. (Sal. 104: 24) Nyuwaano akhweya munanwerya ophwanya ipalame, asiichu, miri ni sincipale. Karina yoowo onakhala o Alemanya ooloca: “Amamaaka annasiveliwa ni ithutu, nyenya vaavaa kaaryaaka nahano, awo yaanathoonya ithutu sooreeraxa mu ilukuluku soothene neecaahu vamoha.” Asitiithi, nyuwaano tho munanwerya opharihela ixilema sincipale ni soolaleeryiwa sinavahereryiwa ni marehereryo ahu seiho sinaloca sa soopatuxiwa wi mwaahusihe aniinyu. Chiryeene, moohipwacha mikhalelo sanyu, munanwerya waakhaviherya aniinyu woona yeeyo Muluku opankeiye. Vano hankooni nthokororye mikhalelo savakhaani sa Yehova seiho munaphwanelaanyu waahusiha aniinyu.

11. Ti mwawiihai asitiithi anaakhaviheryaaya anaaya woona osivela wa Yehova?

¹¹ Wi mwaakhaviherye aniinyu woona osivela wa Yehova, munanwerya othokororya mukhalelo axinama ancipale anaakhapelelaaya asaanaaya. (Mat. 23:37) Munanwerya tho oloca ichu soohiyanahiyana sooreera nnapuhaahu mu soopatuxiwa. Karina, yoowo oromoliwe wuupaceryani, ooloca: “Vaavaa neecaahu, amamaaka yaanakiceenyeerya weemela ni ovarerya mukhalelo ethutu ti ethutu yaaryaaya yoohiyana nave mukhalelo oreera waya wooniheryaaya osivela wa Yehova. Moovira wa iyaakha, nivano kinnavarerya moopwacha ithutu nave kinnoona mukhalelo ikoore ni mapakeliwo a ethutu ti ethutu eryaaya oohiyana. Iho sinnatitelela okuupuxerya mukhalelo Yehova onansiveleiye vancipale.”

12. Ti mwawiihai asitiithi aneeraaya yaakhaviherye anaaya woona miruku sa Muluku? (Salmu 139:14) (Moone tho eruku.)

¹² Mwaakhaviherye aniinyu woona miruku sa Muluku. Mweeparipari Yehova tamirukuxa onipwaha hiyo. (Aro. 11:33) Ntoko yootakiherya, nyuwaano mwaanwerya oloca ni aniinyu mukhalelo maahi enawelaaya osulu wi ekhale meeku ni mukhalelo meeku yaawo anamwaramwaxaaya maahi mookhweya mmapuro oothene. (Yupu 38:36, 37) Munanwerya tho oloca sa mukhalelo wootikhiniha mwiili ahu opakiwaaya. (Mwaalakhanye Salmu 139:14.) Muthokororye mukhalelo tiithi mmoha awiichaniwa Vilatimir opankeiye yeela. Owo ooloca: “Nihiku nimoha, mwanihu aahithoowa ni ecika nave aphoreya. Emanle mahiku avakhaani, nikhwaca naahivola. Miyaano ni mwaaraka naahimutharihela wi  Yehova opanke mwiili ahu ni owerya wa ovoliha makhwaca mukhataaya. Naahiloca wi hannawerya woona echu ntoko yeela mu ichu achu apankaaya. Ntoko yootakiherya, ekaaro henawerya wiirehererya mukhataaya muchu amanle ompakano asitenti. Yaweereya yeela yaahimukhaviherya mwanihu wiiwexexa miruku sa Yehova.”

13. Ti mwawiihai asitiithi aneeraaya yaakhaviherye anaaya woona owerya wa Muluku? (Yesaya 40:26)

¹³ Yehova onnaniwopa wi niwehe osulu ni wuupuwela vooloca sa mukhalelo owerya wawe wootikhiniha onatikitheryaaya itheneeri mmapuro aya. (Mwaalakhanye Yesaya 40:26, PMM.) Munanwerya waaceenyerya aniinyu oweha erimu ni wuupuwelela sa yeeyo anoonaaya. Moone yeeyo Tinkitinki murokora yoowo onakhala o Taiwan onuupuweleiye vooloca sa onamwane awe: “Nihiku nimoha, amamaaka yaahikikuxa n’ya o nipuro noorakamela ni epooma, nave ohiyu naahivarerya erimu esaren’ye itheneeri nihaakanyeryiwaka ni maliixo oopooma. Ele yaari elukuluku kaaryaaka awuukhuwa nthowa na otitelela okhinyereryiwa oxikola nave kaaniikoha waakhanle wi kaahaala owerya otitelela omurumeela Yehova moororomeleya. Amamaaka yaahikiceenyerya wuupuwela vooloca sa owerya Yehova aapharihenleiye wi apake itheneeri soothesene seihe nave yaahikuupuxerya wi owo chiryeene aanwerya opharihela owerya yoowo wi akikhaviherye ohoolela yaweeha eri yoothene. Nimanle ovarerya soopatuxiwa mmukwaha yoole, kaari ooceenyeryeya omusuwela phaameene Yehova, nave yoolakelelaaka ya omurumeela yoowo yaahilipa.”

14. Ti mwawiihai asitiithi aneeraaya epharihele soopatuxiwa wi yaakhaviherye anaaya omoona Yehova ntoko Muluku oohakalala?

¹⁴ Ichu Yehova opankeiye sinnooniherya wi owo toohakalala nave onachuna tho wi hiyaano nihakalaleke. Masiyentista ahoona wi axinama ancipale annathata, ophitaanyerya ipalame ni ihopa. (Yupu 40:20) Apwanne aniinyu annatheya vaavaa anawoonaaya axinama ethataka? Akhweya awo aamoona puusi iikaraka mukoi onyikanleiye naari aawoona ewanaka. Ekwaha yoocharela awo anahaalaaya otheya vaavaa anoonaaya ichu sootheiha sa axinama, munoona hai owuupuxerya wi nnamurumeela Muluku oohakalala?—1 Tim. 1:11.

15. Tiheeni enaakhaviherya asitiithi orika muupuwelo wa anaaya? (Masiposipo 20:5) (Moone tho eruku.)

¹⁵ Ikwaha ikina onnakhala woovila wa asitiithi oweeriha anaaya oloca makacamiho anahoolelaaya. Waakhanle wi ela enneereya ni nyuwaano, akhweya munaphwanela orika muupuwelo aya. (Mwaalakhanye Masiposipo 20:5.) Asitiithi akina ahoona okhala wookhweya weerano yeela vaavaa anapuhaaya soopatuxiwa ni anaaya. Ntakhara heeni? Nthowa nimoha ti nawi asitiithi ni anamwane hanakhalano sawaakanyerya sincipale. Tiithi mmoha o Taiwan awiichaniwa Masahiko ooloca nthowa nikina: “Vaavaa nnamalihaahu elukuluku ni aniihu mmapuro ooreera—neecaka mmiyaakoni naari muxerexere wa ephareya—awo annakhala ootaphuwa. Hiihaa onnakhala wookhweya wa hiyo oweeriha oloca yeeyo anuupuwelaaya.” Katia, yoowo oromoliwe woopaceryani, ooloca: “Kimanle woorowa oxikola, amamaaka annakikuxa wi n’ye mu ntakhwa nikhaani nooreera. Mmapuro yaawo oomaaleleya onnakhala wookhweya wa miyo waaleela amamaaka yeeyo ekeerenle oxikola ni yeeyo enakuukhula.”

16. Ti mwawiihai ichoko inakhalaaya sootaphuwa ni othata vaavaa inapuhaaya soopatuxiwa sa Yehova vamoha?

¹⁶ Vaavaa ichoko inapuhaaya soopatuxiwa sa Yehova, iho sinnakhala sootaphuwa ni othata vamoha. Ela ennaakhaviherya osivelana vancipale mukina ni mukhwaawe. Piipiliya onnaloca wi iho ‘ilukuluku sootheya’ ni ‘ilukuluku sa weeliwa murima.’ (Ekl. 3:1, 4, BNM.) Yehova oopaka mapuro ooreeraxa mweelaponi yavathi, yaawo nnapakaahumo ichu inanisivela. Ichoko sincipale sinnasiveliwa okhala vamoha mmatakhwa ooreera, mmapuro woohaaciwamo, mmiyaakoni ni mphareya. Anamwane akina annasiveliwa othata ni ochimaka mmapuro ooreera, waavarerya axinama naari weekha mmihice naari mphareya. Nookhalano ikari sincipale wi nipuhe soopatuxiwa sa Yehova!

17. Ntakhara heeni asitiithi anaphwanelaaya waakhaviherya anaaya opuha soopatuxiwa sa Muluku?

¹⁷ Mu elapo evyaani ya Muluku, asitiithi ni anamwane anampuha soopatuxiwa sa Yehova opwaha hiihaano. Moohiyana ni olelo, hinikhalano mathowa a owoova axinama, naari mano awo onoova hiyo. (Yes. 11:6-9) Nnamukhalano elukuluku yoohimala wi nipuhe soopatuxiwa sa Yehova. (Sal. 22:26) Nto asitiithi, muhiweherye elukuluku yeeyo wi mwaakhaviherye aniinyu opacerya opuha soopatuxiwa. Mpharihele soopatuxiwa wi mwaahusihe aniinyu vooloca sa Yehova, nave akhweya awo anahaala weemererya yeeyo Mwene Tavite olonceiye: ‘Apwiya [Yehova] hiyaavovo miteko ntoko yawinyu.’—Sal. 86:8, PMM.