1. Tuuvi waari mukhalelo mmoha wa Yupu omusuwela phaama Yehova?

 YUPU aahichekula ni achu ancipale variyari va okumi awe, nyenya ochekula wootikhiniha aareiyeno waari ni Yehova Muluku. Mu ochekula yoowo Yehova aahiloca ni Yupu wi avarerye ichu savakhaani sooreera seiho owo aapatunxeiye. Ela yaahimukhaviherya Yupu osuwela mukhalelo Yehova aareiye a miruku nave naahilipiha nroromelo na Yupu nawi Yehova aanwerya ovahererya echu eri yoothene alapeli awe anachunaaya. Ntoko yootakiherya, Muluku aahimuupuxerya Yupu wi Owo aanaavakulela axinama, mwawiihiiha, aahaala tho omukhapelela Yupu. (Yupu 38:39-41; 39:1, 5, 13-16) Moorweela wa othokororya sootakiherya sa soopatuxiwa, Yupu aahihuserya sincipale vooloca sa mikhalelo sa Muluku awe.

2. Ntakhara heeni ilukuluku ikina onnakhala woovila wa hiyo waalikhela soopatuxiwa sa Yehova?

² Hiyaano tho nnanwerya ohuserya sincipale vooloca sa Muluku ahu vaavaa nnaalikhelaahu soopatuxiwa sawe. Nyenya mu ilukuluku ikina onanwerya okhala woovila wa hiyo weerano yeela. Waakhanle wi nnakhala opooma, akhweya hannawerya woona mahiku oothene ichu sincipale Yehova opankeiye. Ophiyerya tho wi waakhanle wi hannakhala opooma, akhweya nnanwerya woona wi hinaano elukuluku yawaakhwanela wi naalikhele soopatuxiwa. Vano hankooni nthokororye ntakhara heeni ti woochuneya waavya elukuluku ni opaka owetha wahu wi nihuserye soopatuxiwa. Nnahaala othokororya ti mwawiihai Yehova ni Yesu apharihenlaaya soopatuxiwa wi ehusihe nave tiheeni nnaphwanelaahu weera wi nihuserye sincipale orweela mu soopatuxiwa.

3. Tiheeni yooniherya wi Yehova aanachuna wi Atamu apuhe soopatuxiwa?

³ Yehova aachuna wi mulopwana oopacerya apuhe soopatuxiwa Sawe. Vaavaa Muluku aampatunxeiye Atamu, aahimvaha parataiso ooreera wi akhalekemo ni muteko wooreera wa okhapelela ni ommwaramwaxa parataiso. (Map. 2:8, 9, 15) Mwaanyiherye mukhalelo Atamu aareiye ootikhiniheya vaavaa ooneiye mimiso simelaka ni ithutu ithapuruwaka. Yaari ekari etokweene wa Atamu okhapelela emaca ya Eteni! Yehova tho aahimveka Atamu wi aavaheke masina axinama oohiyanahiyana. (Map. 2:19, 20) Yehova aanwerya waachuwa axinama, nyenya ohiya yeeyo, owo aahimvaha muteko owo Atamu. Moohikhwa minikwa, ahaakumve olakelela masina aya, Atamu aanaahuserya axinama mwawiiseela avareryaka mukhalelo yaapakiwaaya ni weera ichu. Atamu aanahakalala moorweela wa weerano yeela. Ela chiryeene yaahimukhaviherya owo wiiwexexa mukhalelo Yehova aareiye a miruku ni mukhalelo aapankeiye ichu sootikhiniha ni sooreera.

4. (1) Ntakhara heeni nnaphwanelaahu waalikhela soopatuxiwa? (2) Muteko taani wa soopatuxiwa onoosivelaanixa?

⁴ Nnaphwanela waalikhela soopatuxiwa nthowa nawi Yehova onachuna wi neereno yeeyo. Owo onnaniwopa wi: ‘Niwehe osulu, noone ni miitho ahu!’ Voocharela owo onnakoha: “Taani opatunshe mithuko seiya?” Naakhulo ti nookwakwaleya. (Yes. 40:26, PMM) Yehova oopatuxa ichu soothene iri wirimu, veelaponi yavathi ni mu iphareya nave soothene iho sinnanihusiha vooloca sa yoowo. (Sal. 104:24, 25) Nave pahiru muupuwele mukhalelo Muluku onipankeiye. Owo onipatunse wi nipuhe moorweela wa woona ichu sooreera opankeiye. Owo tho oheeriha okhala wooweryeya wa hiyo opuha soopatuxiwa sawe soohiyanahiyana moorweela wa mikhalelo sahu mithanu—woona, owiriyana, waapareya, olawiha ni winkhererya.

5. Mwawiiwanana ni Aroma 1:20, ti mwawiihai nnaphuraahu moorweela wa ohuserya soopatuxiwa sa Yehova?

⁵ Piipiliya onnanleela nthowa nikina noochuneya na waalikhela soopatuxiwa. Iho sinnanihusiha vooloca sa mikhalelo sa Yehova. (Mwaalakhanye Aroma 1:20.) Ntoko yootakiherya, muthokororye ichu soothene Yehova opatunxeiye, nave moone wi iho ti sooreeraxa. Apwanne iho hisinooniherya miruku sa Muluku? Nave muupuwele vooloca sa soolya soohiyanahiyana nnapuhaahu. Iho sinnooniherya mookwakwaleya osivela wawe ntakhara achu oothene. Vaavaa nnoonaahu mikhalelo sa Yehova mu ichu seiho opankeiye, ninnamusuwela phaameene yoowo nave ninnakhala ooceenyeryeya omwaacamela yoowo. Vano hankooni noone mikhalelo savakhaani seiho Yehova opharihenleiye soopatuxiwa  wi aahusiheno achu mahusiheryo oochuneya.

6. Echu taani nnahuseryaahu orweela wa ovarerya othaama wa ipalame?

⁶ Yehova ootikitherya elukuluku enahaalaaya waakhwanela saweereya. Iyaakha soothene omakuchuwelo wa Fevereru ni variyari va Maiyu, Aisarayeli yaanawoona anapipi evavaka ethaamelaka makupa oomoko a elapo. Muluku aahaaleela Aisarayeli wi “napipi a wirimu òsuwela elukuluku yothama.” (Yer. 8:7, BNM) Yehova ootikitherya elukuluku wi anapipi ethaameke. Mmukhalelo woolikana, owo ootikitherya elukuluku onahaaleiye opaka othoriha wawe. Olelo, vaavaa nnawoonaahu anapipi ethaamaka, ninnuupuxeryeya wi nnanwerya ororomela wi Yehova ‘oosuwela elukuluku’ ya oruuha makuchuwelo a elapo yeela yootakhala.—Hap. 2:3, BNM.

7. Tiheeni nnahuseryaahu orweela wa owoona apalame evavaka? (Yesaya 40:31)

⁷ Yehova onnaavaha ikuru alapeli awe. Moorweela wa Yesaya, Yehova aahiroromeliha wi aahaala waalipiha achu Awe wi ewerye ‘ovavela osulu ntoko enaka’ vaavaa awo anakhalaaya ooceecheya naari ookotakota. (Mwaalakhanye Yesaya 40:31, TNM.) Aisarayeli yaahikhovelela woona inaka ivavaka ihaaka osulu naamwi variyari va echeku etokweene nave ehiilipixenrye vancipale. Ela ennanuupuxerya wi Yehova onahaala onivaha ikuru, hiihaa ntoko onaavaheiye inaka! Vaavaa munamoonaanyu palame akuru avavaka ayaaka osulu ahiilipixenrye vancipale, muupuwele wi Yehova onanwerya woovahaani ikuru wi mvoothe makacamiho anyu.

8. Tiheeni Yupu aahusenryeiye moorweela wa othokororya miteko sa soopatuxiwa sa Muluku, nave tiheeni nnaweryaahu ohuserya?

⁸ Yehova onnaphwanela ororomeliwa ni hiyo. Yehova aahimukhaviherya Yupu waaceererya omuroromela wawe Yene. (Yupu 32:2; 40:6-8) Mu ochekulela ni Yupu, Muluku aahiloca mikhalelo mincipale sa soopatuxiwa, ophitaanyerya itheneeri ni itari. Yehova aahiloca tho sa axinama, ntoko enari ni kavalo. (Yupu 38:32-35; 39:9, 19, 20) Ichu soothene iho sinnooniherya ohiya pahiru owerya otokweene wa Muluku, nyenya tho osivela wawe otokweene ni miruku. Athamalelaka ochekulela yoola, Yupu aahimuroromela vancipale Yehova opwaha khalai. (Yupu 42:1-6) Moolikana, vaavaa nnahuseryaahu soopatuxiwa, ninnuupuxeryeya wi Yehova tamirukuxa ni akuruxa onipwaha hiyo. Owo tho onanwerya nave onahaala omaliha makacamiho ahu oothene. Eparipari yeela ennanikhaviherya olipiha omuroromela wahu yoowo.

9-10. Tiheeni nsuwa ni epula enanihusihaaya vooloca sa Yehova?

⁹ Yesu aahisuwela phaama soopatuxiwa. Ntoko “kapara ooteka,” owo aahikhalano ekari ya olapa ni Atiithi awe vaavaa yaapatuxaaya erimu ni elapo yavathi. (Mas. 8:30, TNM) Voocharela, vaavaa Yesu aareiye veelaponi yavathi, aahipharihela soopatuxiwa wi aahusihe oohuserya awe vooloca sa Atiithi awe. Muthokororye mahusiheryo avakhaani owo ohusinheiye.

¹⁰ Yehova onnooniherya osivela wa achu oothene. Mmwaha awe wa vamwaakoni, Yesu aahiloca ni oohuserya awe vooloca sa nsuwa ni epula, ichu seiho achu ancipale yaahuupuwenlaaya mwawiiseela. Ichu seiha piili ti soochuneyaxa wa hiyo mookumini. Yehova aanwerya olakelela ohaavaha ichu seiha achu ahinamurumeela yoowo. Ohiya yeeyo, owo moosivela onnaavaha achu oothene nsuwa ni epula. (Mat. 5:43-45) Yesu aahipharihela nihusiheryo nenla wi aahusihe oohuserya awe wi Yehova onachuna wi hiyaano nooniheryeke osivela wa achu oothene. Moohipwacha waakhanle wi nnoona oneela wa nsuwa naari epula yoomaaleleya,  nnanwerya wuupuwela sa osivela wa Yehova ntakhara achu oothene. Yootakiherya awe ennanceenyerya wooniherya osivela omohamoha moorweela wa waalaleerya oothene.

11. Ti mwawiihai ovarerya ipalame onanlipihaaya?

¹¹ Yehova onnavahererya soothowa sahu soomwiilini. Mmwaha mmohamoha wa vamwaakoni, Yesu tho aahiloca: “Mvarerye phaama ipalame soosulu; iho hasinamisa naari ohaca naari othukumanya mmakhupini, nyenya Atiithi anyu a wirimu annavaha yoolya.” Mwawooneya, achu yanwiriyana Yesu yaanoona ipalame sivavaka osulu vaavaa owo aakonheiye: “Apwanne nyuwo hamuri oochuneyaxa opwaha ipalame seiho?” (Mat. 6:26) Mmukhalelo yoola woosivela, Yesu oonikhaviherya woona wi Yehova onahaala onikhapelelaka! (Mat. 6:31, 32) Mahusiheryo yaawo nnahuseryaahu orweela mu soopatuxiwa sinnatitelela waalipiha alapeli oororomeleya. Murokora mmoha yoowo ori piyoneera onakhala o Espanya aari oothanana woona wi haawerya ophwanya nipuro noophwanelela wi akhalekevo. Nto amanle woona ipalame ithupaka mimiso nave elyaaka sawiima samutakhwani, aahikhala oolipiheya. Owo ooloca: “Ipalame seihe saahikuupuxerya wi Yehova onnaakhapelela yaawo nave wi aahaala tho okikhapelela.” Moohilekela, ohoolo waya, murokora ole aahiphwanya nipuro na okhala.

12. Mwawiiwanana ni Mateyu 10:29-31, tiheeni iphera inanihusihaaya vooloca sa Yehova?

¹² Yehova onnamvaha esisapo mmoha ti mmoha a hiyo. Ahaakumve waarumiha arummwa awe wi yalaleerye, Yesu aahaakhaviherya yaawo wi ehiwooveke achu yaahaala owiicaka. (Mwaalakhanye Mateyu 10:29-31.) Owo aaheerano yeela moorweela wa oloca sa apalame awunlaana a Isarayeli: Iphera. Apalame yaale hiyaarino esisapo yawaaca mmahiku a Yesu. Nyenya owo aahiloca ni oohuserya awe: “Hiyaavo emoharu mano enamorela vathi Atiithi anyu ehisuwenle.” Voocharela, owo aahaaceererya: “Nyuwo muri ookhweleyaxa waapwaha asipalame ancipale.” Mweeparipari, Yesu aahaaroromeliha oohuserya awe wi Yehova aanaavaha esisapo mmoha ti mmoha a yaawo, mwawiihiiha, awo hiyaarino mathowa a woova wiikariwa. Mweeparipari, oohuserya yaanuupuwela masu a Yesu vaavaa yoonaaya iphera eri mmuteko woolaleerya mpooma ni mmawaani. Vaavaa munoonaanyu epalame ekhaani, muupuwele wi Yehova onnoovahaani esisapo nthowa nawi nyuwaano “muri ookhweleyaxa waapwaha asipalame ancipale.” Nnikhaviheryo nawe, munanwerya ohoolela wiiciwa ni nroromelo.—Sal. 118:6.

13. Tiheeni enahaala onikhaviherya ohuserya mahusiheryo orweela mu soopatuxiwa?

¹³ Nnanwerya ohuserya mahusiheryo makina mancipale vooloca sa Yehova orweela mu soopatuxiwa. Mwawiihai? Yoopacerya, nnaphwanela waavyaka elukuluku wi nivarerye soopatuxiwa. Voocharela, nnaphwanela wuupuwela yeeyo enanihusihaaya vooloca sa Yehova. Tahi wi ilukuluku soothene onamukhala wookhweya weerano yeeyo. Murokora mmoha awiichaniwa Xerartina onakhala o Kamaroes, ooloca: “Kinnunwe mu epooma etokweene, mwawiihiiha,  kaaphwanela wiilipixerya wi kivareryeke soopatuxiwa.” Mutokweene mmoha awiichaniwa Alfonso oothariha: “Koohoona wi ti woochuneya opaka marehereryo wi kikhale mukhataaka ni yoolakelela ya ovarerya soopatuxiwa sa Yehova ni wuupuwelela yeeyo enakihusihaaya vooloca sa yoowo.”

14. Tiheeni Tavite aahusenryeiye vaavaa uupuweleleiye soopatuxiwa sa Muluku?

¹⁴ Tavite aanuupuwelela mwawiiseela vooloca sa soopatuxiwa sa Muluku. Alocaka sa Yehova, owo oriye: ‘Kaavareryaka erimu, muteko wa mata anyu, mweeri ni itheneeri, seiho mwaapankaanyu, kinnuupuwela: Muchu, tisheeni, wi nyu munamuupuwelela?’ (Sal. 8:3, 4, PMM) Chiryeene, vaavaa Tavite aawenheiye erimu ohiyu esaren’ye itheneeri, owo aahipaka sincipale opwaha pahiru ovarerya itheneeri. Owo tho aahuupuwelela yeeyo itheneeri saamuhusihaaya vooloca sa Muluku. Aahihuserya mukhalelo Yehova aareiye oowerya. Ikwaha ikina, Tavite aanuupuwelela mukhalelo mwiili awe wunnuwaaya mmirima mwa amannya. Vaavaa owo uupuweleleiye ichu seiha sootikhiniha, othamalela wawe ntakhara miruku sa Yehova waaninnuwa.—Sal. 139:14-17.

15. Mvahe sootakiherya sa mikhalelo sa Yehova munoonaanyu mu soopatuxiwa. (Salmu 148:7-10)

¹⁵ Akhweya onamukhala wookhweya wa hiyo, hiihaa ntoko waaryaaya wa Tavite, ophwanya echu vyakala mu soopatuxiwa wi nuupuwelele mwawiiseela vooloca sa yeeyo. Vaavaa munavareryaanyu ichu seiho soorukurenryeeni, munanwerya woona mikhalelo mincipale sa Yehova. Ntoko yootakiherya, moone owerya wa Yehova vaavaa munoonaanyu oviha wa nsuwa mmwiili anyu. (Yer. 31:35) Muupuwele vooloca sa miruku sa Yehova vaavaa munamvareryaanyu palame apakaka epuuru awe. Moone mukhalelo Yehova oreiye oohakalala vaavaa munamoonaanyu mwanapwa athataka ni mwiila awe. Nave mmuthamaleleke Yehova ntakhara osivela wawe vaavaa munamoonaanyu maayi athataka ni mwanawe. Nookhalano ikari sincipale soohuserya vooloca sa Yehova nthowa nawi soopatuxiwa sawe soothene moohipwacha saari itokweene naari ikhaani, iri vakhiviru naari ociiwene, sinnamvuwiha yoowo.—Mwaalakhanye Salmu 148:7-10.

16. Tiheeni nnaphwanelaahu olakelela weera?

¹⁶ Muluku ahu tamiruku, oosivela, oowerya, nave ichu soothene opankeiye ti sooreeraxa. Nnanwerya ohuserya vooloca sa mikhalelo seiha ni sincipale wakhala wi ninnavarerya mwawiiseela soopatuxiwa soothene inirukurenrye. Nnaphwanela waavya elukuluku moohihiyererya wi nipuhe soopatuxiwa ni wuupuwelela yeeyo enanihusihaaya vooloca sa Yehova. Moorweela wa weerano yeela, nnahaala okhala awaacameleya ni Mpatuxa ahu. (Tiy. 4:8) Mmwaha onacharela, nnahaala woona ti mwawiihai asitiithi aneeraaya epharihele soopatuxiwa wi yaakhaviherye anamwanaaya omwaacamela Yehova.