1-2. Wakhala wi hamuri ooreheryeya wi mpatisiwe, ntakhara heeni muhinaphwanelaanyu oceecheya? (Moone eruku va ekaapa.)

 WAAKHANLE wi munnachuna opatisiwa, mootikitherya yoolakelela yaphaamaxa. Apwanne mooreheryeya wi mpatisiwe hiihaano vaavaa? Waakhanle wi munnaroromela wi mooreheryeya nave atokweene anneemererya, muhoovelele opatisiwa mu ekari enacharela. Mweerano, munahaala okhalano okumi woohakalaliha mmuteko wa Yehova.

² Hanka wakhala wi muchu ohooleelaani wi munaphwanela opaka matorokelo matokweene muhaakumve opatisiwa? Naari wi nyuwaano aneene munnoona wi munaphwanela opaka matorokelo? Waakhanle wi ti hiihaa, muhiceecheye. Munanwerya oya vahoolo ni waakhwaniherya yoolakelela yeela, moohipwacha mwaari mmiravo naari awunnuwelavo.

3. Tiheeni mulopwana Mutiyope aamvenkeiye Filipi, nave nikoho taani nnakhumelela? (Saw. 8:36, 38)

³ Mwaalakhanye Saweeriwa ti Arummwa 8:36, 38. Mutokweene a empa ya mwene a Etiyopiya aahimukoha Filipi mulaleeryi, ariki: “Tiheeni enakihiiha opatisiwa?” Mulopwana yoole Mutiyope aahipatisiwa, nyenya apwanne owo aari ooreheryeya chiryeene wi apatisiwe?

4. Ti mwawiihai mulopwana Mutiyope oonihenryeiye wi aari oolakelela otitelela ohuserya?

⁴ Mulopwana Mutiyope “aakele o Yerusalemu omulapela Muluku.” (Saw. 8:27) Mwawiihiiha, owo akhweya aaheemererya malapelo a Ayuta. Moohikhwa minikwa, owo aahihuserya vooloca sa Yehova moorweela wa soorepa saweela sa Soorempwa sa Ehepiri. Naamwi hiihaa, owo aari ooreheryeya ohuserya sincipale. Muupuwele ela: Vaavaa Filipi aamphwannyeiye mulopwana ole, tiheeni  owo aapakeiye? Owo aalakhanya eroolo sa soorempwa sa mulipa a miririmu Yesaya. (Saw. 8:28) Eyo yaari yoolya yoomunepani yoolipa. Mutokweene ole haakhwaneliwe pahiru ni mahusiheryo avakhaani oopacerya, nyenya aanachuna otitelela ohuserya.

5. Tiheeni mulopwana Mutiyope aapakeiye ni yeeyo aahuseryeiye?

⁵ Mulopwana ole aari mutokweene oochuneya a Kantake, yoowo aari mwene amwaamuthiyana a Etiyopiya, nave ti yoowo ‘aavarerya muhakhu awe woothene.’ (Saw. 8:27) Mwawiihiiha, owo aari mulopwana awaaceliwa ni mirici mincipale. Naamwi hiihaa, owo aanaavya elukuluku wi amulapele Yehova. Owo hoona ohuserya eparipari, nyenya tho aanapharihela yeeyo aahuseryeiye. Mwawiihiiha, aahipaka mukwaha ovinya o Etiyopiya wi amulapele Yehova mu empa ya Muluku o Yerusalemu. Mukwaha ole waanavolowela omaliha ikhorowa ni elukuluku yincipale, nyenya mulopwana ole aanachuna omulapela Yehova moohipwacha yeeyo yaavolowela.

6-7. Ti mwawiihai osivela wa Mutiyope ntakhara Yehova waatitelenlaaya wunnuwa?

⁶ Mulopwana Mutiyope aahihuserya iparipari savakhaani soochuneya orweela wa Filipi. Emoha sa seiho waari wi Yesu aari Mesiya. (Saw. 8:34, 35) Mutokweene ole aahitannyeya vancipale nthowa na ohuserya yeeyo Yesu aapankeiye ntakhara yoowo. Ti mwawiihai owo aakhulenleiye? Owo aanwerya otitelela okhala ntoko aareiye, muchu aacicimiha malapelo a Ayuta. Ohiya yeeyo, osivela wawe ntakhara Yehova ni Mwanawe waahinnuwa. Aahiceenyeryeya opaka matorokelo matokweene mu okumi ni yoolakelela ya opatisiwa ntoko oomuchara a Yesu Kristu. Vaavaa onneiye wi mulopwana ole aari ooreheryeya, Filipi aahimpatisa yoowo.

⁷ Wakhala wi moochariha yootakiherya ya Mutiyope, munanwerya okhala ooreheryeya wi mpatisiwe. Munanwerya tho okoha ni nroromelo muriki: “Tiheeni enakihiiha opatisiwa?” Vano hankooni nthokororye mukhalelo muneeraanyu mpake ichu imohamoha mulopwana Mutiyope aapankeiye: Owo aahititelela ohuserya, aanapharihela yeeyo aahuseryeiye nave aanatitelela wunnuwiha osivela wawe ntakhara Muluku.

8. Ti mwawiihai Yohani 17:3 onaphariheleyeiye wa nyuwo?

⁸ Mwaalakhanye Yohani 17:3. Apwanne masu yaala a Yesu ahookhaviheryaani olakelela omuhuserya Piipiliya? Ela yoheereya ni ancipale a hiyo. Nyenya apwanne masu mamohamoha annanceenyerya otitelela ohuserya? Aai. Hiyaano hinrwa nihiya ‘omusuwela . . . Muluku mmoharu eeparipari.’ (Ekl. 3:11, TNM) Nnahaala otitelela ohuserya okhala wookhala. Vaavaa nnahuseryaahu sincipale, nnahaala omwaacamela vancipale Yehova.—Sal. 73:28.

9. Tiheeni nnaphwanelaahu weera nimanle ohuserya mahusiheryo oopacerya a Mpiipiliyani?

 ⁹ Vaavaa nnapaceryaahu ohuserya vooloca sa Yehova, nnahuserya pahiru mahusiheryo oopacerya a Mpiipiliyani. Mu ekaarata awe yoopacerya wa Aheepiri murummwa Paulo aahiichana yaawo ntoko “ichu soopacerya.” Owo haaloca wi “mahusiheryo oopacerya” tahi oochuneya. Ohiya yeeyo, owo ooniherya wi mahusiheryo oopacerya yaalikana ni nipele nnaakhaviherya anamwane. (Ahe. 5:12; 6:1) Nyenya owo tho ohaaceenyerya Akristu oothene wi etitelele ohuserya opwaha mahusiheryo yaawo oopacerya ni ohuserya iparipari sawiiseela sa Masu a Muluku. Apwanne mookhalano nchuno na ohuserya mahusiheryo awiiseela a Mpiipiliyani? Muri ooreheryeya otitelela wunnuwa wi mutitelele ohuserya vooloca sa Yehova ni yoolakelela awe?

10. Ntakhara heeni akina annoona okhala woovila ohuserya?

¹⁰ Wa ancipale a hiyo, ohuserya nikacamiho. Hanka vooloca sa nyuwo? Oxikola, apwanne moowerya ohuserya waalakhanya ni otholathola miyaha phaama? Apwanne munnasiveliwa ohuserya nave munnoona wi ti wamphurelo wa nyuwo? Naari moophiya makuchuwelo a wi hamunaphuravo vaavaa munaahuseryaanyu aliivuru? Waakhanle wi ti hiihaa, hamuri mukhatiinyu. Nyenya, Yehova onanwerya wookhaviheryaani. Owo toophaameya ni Muhusiha aphaamaxa okhanle.

11. Ti mwawiihai Yehova onooniheryeiye wi “Muhusiha” Mutokotoko?

¹¹ Yehova onniisuwanyeiha ntoko “Muhusiha” anyu Mutokotoko. (Yes. 30:20, 21, PMM) Owo toopixa murima, tooreera murima, ni Muhusiha yoowo onawiiwexexaani phaama. Owo onatikitheryeya mmikhalelo saphaama sa oohuserya awe. (Sal. 130:3) Nave harwa aweherya sincipale wa hiyo opwaha yeeyo nnaweryaahu opaka. Muupuwele wi owo oonivaha ocoopare, yamahala yaphaamaxa. (Sal. 139:14) Nookhalano nchuno nooyariwano na ohuserya. Mpatuxa ahu onachuna wi ntitelele ohuserya okhala wookhala ni ophura orweela wa yeeyo. Mwawiihiiha, ti waphaama ‘wunnuwiha nchuno noolipa’ ntakhara iparipari sa Mpiipiliyani hiihava. (1 Pet. 2:2) Mutikitherye soolakelela munahaalaanyu owerya waakhwaniherya nave mmwaalakhanyeke ni omuhuserya Piipiliya moohihiyererya. (Yos. 1:8) Nnikhaviheryo na Yehova, munanwerya osiveliwano waalakhanya ni ohuserya sincipale vooloca sa yoowo.

12. Ntakhara heeni nnaphwanelaahu ohuserya okumi ni orummwa wa Yesu?

¹² Mmaliheke elukuluku wiiliwiili muupuwelelaka okumi ni orummwa wa Yesu. Ti woochuneya omutakiherya Yesu waakhanle wi ninnachuna omurumeela Yehova, xaxaxa mu ilukuluku seiha soovila. (1 Pet. 2:21) Yesu aahaaleela oomuchara awe wi yaahaala ohoolelaka makacamiho. (Luka 14:27, 28) Naamwi hiihaa, owo aanaroromela wi oomuchara awe yaahaala okhumelelaka phaama, hiihaa ntoko owo aakhumelenleiye. (Yoh. 16:33) Muhuserye mwawiiseela vooloca sa okumi wa Yesu, nave mutikitherye soolakelela wi mmutakiherye yoowo mu okumi anyu nihiku nnihiku.

13. Tiheeni munaphwanelaanyu otitelela omveka Yehova, nave ntakhara heeni?

¹³ Okhalano masuwelelo pahiru honaakhwana. Nthowa nimoha nnaneeriha ochuna masuwelelo ti nawi nnanwerya ohuserya sincipale vooloca sa Yehova ni wunnuwiha mikhalelo ntoko omusivela yoowo ni okhalano nroromelo mwa yoowo. (1 Ako. 8:1-3) Vaavaa munatitelelaanyu ohuserya, mutitelele omveka Yehova wi ookhaviheryeeni okhalano nroromelo nawaaca. (Luka 17:5) Mwa mahala, owo onnaakhula mavekelo ntoko yaala. Nroromelo neeparipari nnathipeleya mu masuwelelo eeparipari a Muluku nnamookhaviheryaani oya vahoolo.—Tiy. 2:26.

14. Ti mwawiihai murummwa Petru aalonceiye ochuneya waya opharihela yeeyo nnahuseryaahu? (Moone tho eruku.)

¹⁴ Murummwa Petru aahiloca mukhalelo oryaaya woochuneya wa oomuchara a Kristu otitelela opharihela yeeyo anahuseryaaya. Owo aahipharihela yaweereya ya Mpiipiliyani vooloca sa Nowa. Yehova aahimuleela Nowa wi moorweela wa maahi mancipale, owo aahaala waatoloxa achu ootakhala a mmahiku yaale. Pahiru osuwela wi maahi mancipale yaahaala orwa, hiwaari wawaakhwana wi emusi ya Nowa evuluxiwe. Moone wi Petru aahiloca sa elukuluku ehaakumve maahi “atekiwaka mwaaceya.” (1 Pet. 3:20) Chiryeene, Nowa ni emusi awe yaahipharihela yeeyo yaahusenryaaya ni Muluku moorweela wa omuteka mwaaceya. (Ahe. 11:7) Voocharela, Petru aahilikanyiha opatiso ni yeeyo Nowa aapankeiye, vaavaa aarempeiye: “Opatiso, yoowo onalikanela ni yeela, onnoovuluxaani tho hiihaano.” (1 Pet. 3:21) Mwawiihiiha, nnanwerya olikanyiha wiilipixerya munapakaanyu wi mwiirehererye ntakhara opatiso ni muteko Nowa ni emusi awe yaapankaaya mu iyaakha sincipale wi emuteke mwaaceya. Muteko taani munaphwanelaanyu opaka wi mwiirehererye ntakhara opatiso?

15. Ocharuwa weeparipari onavolowela heeni?

¹⁵ Echu yoopacerya nnaphwanelaahu weera ori ocharuwa mweeparipari soocheka sahu. (Saw. 2:37, 38) Ocharuwa weeparipari onamunikhaviherya opaka matorokelo eeparipari. Apwanne moohiya opaka ichu seiho sinamuhiciha Yehova, ntoko ocapaheya, omulya soona naari opharihela masu oophuca naari oophoreiha? (1 Ako. 6:9, 10; 2 Ako. 7:1; Aef. 4:29) Waakhanle wi himwenreno yeela, mutitelele weererya opaka matorokelo. Muloce ni muhusiha anyu a Piipiliya, naari mwaaveke atokweene a mmulokoni wi yookhaviheryeeni ni woohoolelaani. Waakhanle wi mwa mmiravo nave munakhala ni asitiithi anyu, mutitelele waaveka yaawo wi yookhaviheryeeni ohiya opaka yookhovelela vyakala yoonanara yeeyo yaahaala woohiihaani opatisiwa.

16. Tiheeni enavolowelavo okhalano yookhovelela yaphaama yoomunepani?

¹⁶ Ti woochuneya tho otikitherya yookhovelela yoomunepani yaphaama. Eyo enaphitaanyerya ophiya mmithukumano Seekristu ni  opaka makupa. (Ahe. 10:24, 25) Vaavaa muneemereryiwaanyu ntoko mulaleeryi oohipatisiwa, mulaleeryeke moohihiyererya. Wakhala wi munnaweiwaxa mmuteko anyu woolaleerya, munahaala opuha vancipale. (2 Tim. 4:5) Waakhanle wi mwa mmiravo nave munakhala ni asitiithi anyu, mwiikohe: ‘Apwanne asitiithi aka anaphwanela okuupuserya wi kiye mmithukumano naari mmuteko woolaleerya? Naari wi kinnapacerya mukhataaka?’ Moorweela wa weerano ichu seiha mukhatiinyu, munnooniherya nroromelo, osivela ni omuthamalela wanyu Yehova Muluku. Iho miteko ‘saweela soomucicimihano Muluku,’ samahala seiho munamvahaanyu Yehova. (2 Pet. 3:11; Ahe. 13:15) Samahala soothene nnamvahaahu Yehova moolakelela, sinnamuhakalaliha Yoowo. (Mulikanyihe ni 2 Akorintu 9:7.) Ninneerano ichu seiha nthowa nawi ninnakhala oohakalala vaavaa nnamvahaahu Yehova owetha wahu.

17-18. Mukhalelo taani woochuneya onahaala wookhaviheryaani oya vahoolo wi mpatisiwe, nave ntakhara heeni? (Masiposipo 3:3-6)

¹⁷ Vaavaa munatitelelaanyu oya vahoolo wi mpatisiwe, munahaala ohoolela makacamiho. Achu akina ananwerya wooruwanakaani nthowa na nroromelo nanyu mvyaani, ophiyerya tho wi owiicaani naari owiikaraani. (2 Tim. 3:12) Vaavaa muniilipixeryaanyu ovootha sookhovelela soonanara, ikwaha ikina akhweya munanwerya okookela weerano seiho. Naari wi munanwerya wiisoona okhala oonyeenyeya ni oohipixa murima nthowa nawi ti woovila waakhwaniherya yoolakelelaanyu. Tiheeni enahaala wookhaviheryaani ovilela? Mukhalelo woochuneyaxa ori omusivela Yehova.

¹⁸ Omusivela wanyu Yehova, mukhalelo wooreera ni waphaamaxa muryaanyuno. (Mwaalakhanye Masiposipo 3:3-6.) Omusivela vancipale Yehova onanwerya wookhaviheryaani ohoolela makacamiho ookumi moohakalala. Piipiliya wiiliwiili onnaloca sa osivela woororomeleya wa Yehova ntakhara alapeli awe. Osivela woororomeleya onataphulela wi owo harwa aanyanyala alapeli awe naari ohiya waasivela yaawo. (Sal. 100:5) Nyuwaano mpatuxiwe moophwanaphwana ni Muluku. (Map. 1:26) Muni mooniherye hai mukhalelo yoola wa osivela?

19. Tiheeni enahaala wookhaviheryaani omuthamalela Yehova ntakhara ichu soothene onapakeiye wa nyuwo? (Akalatiya 2:20)

¹⁹ Mukhale oothamalela. (1 Ate. 5:18) Nihiku nnihiku mwiikoheke: ‘Ti mwawiihai Yehova oonihenryeiye wi onnakisivela?’ Voocharela,  mmuthamalele Yehova mmavekelo anyu, mulocaka ichu sooluluwanya owo onapakeiye ntakhara nyuwo. Mwiiwexexe wi Yehova onapaka ichu saphaama wa nyuwo nthowa nawi onnoosivelaani hiihaa ntoko murummwa Paulo aaroromenleiye. (Mwaalakhanye Akalatiya 2:20.) Mwiikohe: ‘Apwanne kinnachuna wooniherya osivela omohamoha ntakhara Yehova?’ Omusivela Yehova onahaala wookhaviheryaani otitelela okhooca saweeha ni ovilela makacamiho moohakalala. Eyo enahaala wookhaviheryaani omurumeela Yehova moohihiyererya, mmooniheryaka Tiithi anyu wi munnamusivela yoowo mahiku oothene.

20. Wiiveleela wa Yehova onavolowela eheeni, nave ti mwawiihai yoolakelela yeela eryaaya yoochuneya?

²⁰ Moovira wa elukuluku, omusivela wanyu Yehova onahaala wooceenyeryaani opaka nivekelo navameekhaaya. Munahaala oveleela okumi anyu wa Muluku. Muupuwele, vaavaa muniiveleelaanyu wa Yehova, munnakhalano ewehereryo ela yootikhiniha: Munahaala okhala awawe okhala wookhala. Vaavaa muniiveleelaanyu wa Yehova, munnamuroromeliha omurumeela yoowo mu ilukuluku saphaama ni sookacamiha. Tahi woochuneya opaka yoororomeliha yeela wanaawiili. Mweeparipari, vaavaa nniiveleelaahu wa Yehova, ninnapaka yoolakelela etokweene. Muupuwele ela: Munahaala opaka soolakelela sincipale mu okumi anyu, ikina sa seiho ti saphaama, nyenya hamurwa mpaka yoolakelela yaphaamaxa opwaha oveleela okumi anyu wa Yehova. (Sal. 50:14) Satana onahaala weererya oceecheiha osivela wanyu ntakhara Tiithi anyu, aweheryaka wi munahaala ohiya okhala oororomeleya. Muhirwe mweemererye wi Satana avoothe! (Yupu 27:5) Osivela wanyu woolipa ntakhara Yehova onahaala wookhaviheryaani okhala mwawiiwanana ni wiiveleela wanyu ni omwaacamela vancipale Tiithi anyu a wirimu.

21. Ntakhara heeni nnalocaahu wi opatiso tahi makuchuwelo nto mapacereryo?

²¹ Mmanle wiiveleela wa Yehova, muloce ni atokweene a muloko anyu vooloca sa opaka echu yoocharela yoochuneya. Mwawiihiiha, ilukuluku soothene muupuweleke wi opatiso tahi makuchuwelo, nto mapacereryo. Mapacereryo a okumi woohimala wa omurumeela Yehova. Mwawiihiiha, mulipihe osivela wanyu ntakhara Tiithi anyu hiihava. Mutikitherye soolakelela seiho sinahaala olipiha osivela wanyu nihiku nnihiku. Ichu seiha sinahaala wooceenyeryaani opatisiwa. Nlo nni nikhale nihiku noohakalalihaxa. Nyenya ala mapacereryo pahi. Osivela wanyu ntakhara Yehova ni Mwanawe onahaala otitelela wunnuwa okhala wookhala!