1-2. Tiheeni eneereya wiiliwiili vaavaa achu anapatisiwaaya, nave tiheeni munaphwanelaanyu othokororya?

 APWANNE mohintoko woona nikhuuru na achu awiiveleela ntakhara opatiso? Moowerya woona nroromelo mmasu aya vaavaa yaakhulaaya makoho meeli ehaakumve opatisiwa. Mwaahoona imusi ni asinthamwene aya yiirumihaka ni yaawo. Vaavaa yaakhumaaya mmaahini, mwaahiwoona achu yoopaka makuphi nave eri oohakalala. Neerenka, amilyawu aachu isumana ti isumana, anneerano yeela, moorweela wa oveleela okumi aya ni opatisiwa ntoko Anamoona a Yehova Muluku.

² Hanka vooloca sa nyuwo? Waakhanle wi munnuupuwela opatisiwa, mwa muchu asisapoxa mu elapo yeela yootakhala, woona wi ‘munnamwaaxa Yehova Muluku.’ (Sal. 14:1, 2, PMM.) Mwaha yoola orepeliwe ntakhara nyuwaano moohipwacha mwaari mmiravo naari awunnuwelavo. Nyenya oothene hiyo nipatisiwe ninnachuna tho olipiha yoolakelela ahu ya omurumeela Yehova okhala wookhala. Mwawiihiiha hankooni nthokororye mararu a mathowa mancipale yaawo ananeeriha ochuna omurumeela Yehova.

3. Ntakhara heeni alapeli a Yehova annasivela eparipari ni wookololowa? (Salmu 119:128, 163)

³ Yehova aahaalamulela achu awe wi ‘esiveleke eparipari.’ (Sak. 8:19, PMM) Yesu aahaaceenyerya oomuchara awe wi yaavyeke wookololowa. (Mat. 5:6) Ela enataphulela wi ti woochuneya okhalano nchuno noolipa na weerano yeeyo eri yawookololowa, yaphaama ni yaweela vamiithoni va Muluku. Apwanne munnasivela eparipari ni wookololowa? Hiyaano ninnaroromela wi munnasivela. Nyuwaano munniica sawootha ni ichu soothene siri soonanara ni sootakhala. (Mwaalakhanye Salmu 119:128, 163, PMM.) Muchu yoowo onootha onamutakiherya Satana, mulamuleli a elapo yeela. (Yoh. 8:44; 12:31) Yoolakelela emoha ya Satana ori onanariha nsina naweela na Yehova Muluku. Satana  onnamwaramwasa sawootha vooloca sa Muluku ahu ovinyerya mu omwareya wawe o Eteni. Satana onneererya weeriha wi achu yuupuweleke wi Yehova toonanara murima ni oohiroromeleya, Mulamuleli yoowo onawooceeliha achu opuha ichu saphaama. (Map. 3:1, 4, 5) Sawootha sa Satana vooloca sa Yehova sinnatitelela ovolowela muupuwelo ni mirima sa achu. Vaavaa achu anathanlaaya ‘ohisivela eparipari,’ Satana onnaweeriha yaawo weerano ichu soothene soohookololowa ni sootakhala.—Aro. 1:25-31.

4. Ti mwawiihai Yehova onooniheryeiye wi “Muluku a eparipari”? (Moone tho eruku.)

⁴ Yehova “Muluku a eparipari,” nave mwamahala onnaahusiha eparipari yaale anamusivela yoowo. (Sal. 31:5, TNM) Moorweela wa weerano yeela, onnaakhaviherya yaawo wi ehiwokiwe ni sawootha sa Satana. Yehova onnaahusiha tho alapeli awe okhala oororomeleya ni awookololowa. Eyo ennaakhaviherya yaawo okhala awiicicimiha ni okhalano murecele wampuwa. (Mas. 13:5, 6) Apwanne owo oheerano yeela vaavaa mwaamuhuseryaanyu Piipiliya? Moohuserya wi iphiro sa Yehova ti saphaama wa achu oothene, ophitaanyerya tho nyuwaano. (Sal. 77:13) Mwawiihiiha, munnachuna weeravo echu wi mpake yeeyo Muluku onaloceiye wi ti yaphaama. (Mat. 6:33) Munnachuna waakiha eparipari ni okhaviherya mu wooniherya wi yeeyo Satana onaloceiye sa Muluku ahu, Yehova, ti sawootha. Muni mweereno hai yeela?

5. Muni mukhaviherye hai eparipari ni wookololowa?

⁵ Mweeparipari, nyuwaano munanwerya othanla mukhalelo wa okumi waphaama ni oloca: “Kinnakhooca sawootha sa Satana, nave kinnaakiha eparipari. Kinnamuchuna Yehova ntoko Mulamuleli aka nave kinnachuna weerano yeeyo owo onaloceiye wi ti yaphaama.” Muni mweereno hai yeela? Mmwaacamele Yehova mu nivekelo ni oveleela okumi anyu wa yoowo nave voocharela mooniherye wiiveleela wanyu wa akina moorweela wa opatisiwa. Osivela yeeyo eri yaphaama ni yawookololowa nceenyeryo nakuru wi muthanle opatisiwa.

6. Mathowa taani Salmu 45:4 onoovaheiyeeni wi mmusiveleke Yesu Kristu?

⁶ Ntakhara heeni munnamusivela Yesu Kristu? Moone mathowa aphaama avakhaani anaphwanyeya mu Salmu 45:4, PMM. (Mwaalakhanye.) Yesu aanasivela eparipari, wiiyeviha ni wookololowa. Waakhanle wi munnasivela eparipari ni wookololowa, nyuwaano munnamusivela tho Yesu Kristu. Muupuwele mukhalelo Yesu moolipa murima aakinheiye yeeyo yaari yeeparipari ni  yawookololowa. (Yoh. 18:37) Vano, ti mwawiihai Yesu aaceenyenreiye akina okhala awiiyeviha?

7. Tiheeni enootikhinihaani vooloca sa wiiyeviha wa Yesu?

⁷ Yesu aahaaceenyerya akina okhala awiiyeviha moorweela wa otikitherya yootakiherya. Ntoko yootakiherya, owo aanakeriha ncicimiho noothene wa Tiithi awe, ohiya wa yene. (Mar. 10:17, 18; Yoh. 5:19) Muniisoona hai vooloca sa wiiyeviha wa Yesu? Apwanne ela henooceenyeryaani omusivela Mwaana a Muluku ni omuchara yoowo? Mweeparipari ela ennooceenyeryaani. Ntakhara heeni Yesu ta wiiyeviha? Nthowa nawi owo onnamusivela ni omutakiherya Tiithi awe, yoowo tho ori awiiyeviha. (Sal. 18:35; Ahe. 1:3) Apwanne hamunatikhiniheya ni Yesu, yoowo onooniherya mikhalelo sa Yehova moophaameya?

8. Ntakhara heeni ninnamusivela Yesu ntoko Mwene ahu?

⁸ Ninnamusivela Yesu ntoko Mwene ahu nthowa nawi owo Mulamuleli aphaamaxa. Yehova mwaneene oomuvyakiha Mwanawe nave amuthanla ntoko mulamuleli. (Yes. 50:4, 5) Muupuwele osivela otokweene Yesu oonihenryeiye. (Yoh. 13:1) Ntoko Mwene anyu, Yesu onnaphwanela osivela wanyu otokweene. Owo oothariha wi yaale anamusivela yoowo mweeparipari—yaawo onawiichaneiye asinthamwene awe—annooniherya osivela waya moorweela wa wiiwelela malamulo awe. (Yoh. 14:15; 15:14, 15) Ekari etokweene okhala nthamwene a Mwaana a Yehova!

9. Ti mwawiihai opatiso wa Akristu onalikanaaya ni opatiso wa Yesu?

⁹ Nimoha na malamulo a Yesu ti nawi oomuchara awe epatisiweke. (Mat. 28:19, 20) Owo ootikitherya yootakiherya. Mmikhalelo mikina, opatiso awe ti woohiyana ni opatiso wa oomuchara awe. (Moone ekaaxa “ Mmukhalelo Taani Opatiso wa Yesu Onahiyanaaya ni wa Oomuchara Awe?”) Nyenya mmikhalelo mikina, ti woolikana. Vaavaa aapatisiweiye, Yesu aahiiveleela wi eereno yookhwela ya Atiithi awe. (Ahe. 10:7) Moolikana, vaavaa oomuchara Akristu anapatisiwaaya, eyo ennooniherya wa akina wi awo aaveleela okumi aya wa Yehova Muluku. Vano, echu yoochuneya mu okumi aya ori opaka yookhwela ya Muluku, ohiya yawaya. Mwawiihiiha awo anachariha yootakiherya ya Pwiyaya.

10. Ntakhara heeni omusivela Yesu onnooceenyeryaani opatisiwa?

¹⁰ Nyuwaano munnamweemererya Yesu ntoko Mwaana ooyariwa meekheiye a Yehova nave ntoko Mwene yoowo Muluku omuthanlileiye wi anilamuleleke. Moosuwela wi Yesu ta wiiyeviha nave onnooniherya mikhalelo sa Atiithi awe moophaameya. Moohuserya wi owo aahaalyiha oovoliwa, aahaahakararya ooceecheya nave ophiyerya tho wi aahaapenuxa areca. (Mat. 14:14-21) Nyuwaano tho munnawerya woona mukhalelo owo onahooleleiye muloko awe olelo. (Mat. 23:10) Nave moosuwela wi owo onahaala opaka sincipale omwaahiyu ntoko Mwene a Omwene wa Muluku. Mano muni mooniherye hai wi munnamusivela yoowo? Moorweela wa ochariha yootakiherya awe. (Yoh. 14:21) Echu emoha munaphwanelaanyu weera wi mucharihe yootakiherya awe ori oveleela okumi anyu wa Yehova ni opatisiwa.

11. Nthowa taani noochuneyaxa nnaneeriha opatisiwa, nave ntakhara heeni?

¹¹ Nthowa taani noochuneyaxa nnaneeriha opatisiwa? Yesu ohooniherya nlamulo ntokweene na Muluku vaavaa aalonceiye: “Omusiveleke Yehova Muluku aa ni murima aa woothene, ni okumi aa woothene ni muupuwelo aa woothene vamoha ni ikuru saa soothene.” (Mar. 12:30) Apwanne masu yaala annathariha ophiyerya mweeryo taani munamusivelaanyu Muluku?

12. Ntakhara heeni munnamusivela Yehova? (Moone tho eruku.)

¹² Nookhalano mathowa mancipale ananeeriha  omusivela Yehova. Ntoko yootakiherya, moosuwela wi owo “ehime ya okumi” nave wi Namavaha a “yamahala yoothene yaphaama ni yoovaha yoothene yoophaameya.” (Sal. 36:9, PMM; Tiy. 1:17) Ichu soothene saphaama munapuhaanyu sinarweela wa Muluku ahu a mahala ni oosivela.

13. Ntakhara heeni mukucho wa woopola oryaaya yamahala yaphaamaxa?

¹³ Mukucho wa woopola yamahala yaphaama yeeyo Yehova onivanheiye. Ntakhara heeni nnalocaahu yeela? Muthokororye vooloca sa onthamwene woolipa Yehova oreiyeno ni Mwanawe. Yesu ooloca: ‘Atiithi annakisivela’ ni “kinnaasivela Atiithi.” (Yoh. 10:17; 14:31) Onthamwene aya waakhala woolipa vaavaa yaakhalaaya vamoha mu iyaakha apilyawu. (Mas. 8:22, 23, 30) Muupuwele mukhalelo Muluku aareiye oothanana vaavaa aamooneiye Mwanawe ahooxeyaka ni okhwa. Yehova onnaasivela achu—ophitaanyerya nyuwaano—ti nthowa nene owo aareiye ooreheryeya omvaha Mwanawe ntoko mukucho wa woopola wi eerihe okhala wooweryeya wa nyuwo ni akina waakhela okumi woohimala. (Yoh. 3:16; Aka. 2:20) Nla nthowa ntokweene nryaahuno wi nimusivele Muluku.

14. Yoolakelela taani yaphaamaxa munaphwanelaanyu opaka mu okumi anyu?

¹⁴ Osivela wanyu ntakhara Yehova waahunnuwa vaavaa mwaahusenryaanyu sincipale vooloca sa yoowo. Mweeparipari munnachuna omwaacamela yoowo hiihaano ni okhala  wookhala. Nave nyuwaano munanwerya. Owo mooreera murima onnooceenyeryaani wi muhakalalihe murima awe. (Mas. 23:15, 16) Munanwerya weerano yeela ohiya pahiru mmasu nyenya tho mu saweera. Mukhalelo munapharihelaanyu okumi anyu onahaala wooniherya wi munnamusivela Yehova mweeparipari. (1 Yoh. 5:3) Eyo yoolakelela yaphaamaxa munaphwanelaanyu opaka.

15. Muni mooniherye hai osivela wanyu ntakhara Yehova?

¹⁵ Ti mwawiihai muneeraanyu mooniherye osivela wanyu ntakhara Yehova? Woopaceryani, nyuwaano munnapaka nivekelo navameekhaaya mveleelaka okumi anyu wa Muluku mmoharu eeparipari. (Sal. 40:8) Voocharela munnooniherya wiiveleela wanyu vanlakani moorweela wa opatisiwa. Ntoko nonnaahu woopaceryani wa mwaha yoola, opatiso anyu echu yoochuneya ni yoohakalaliha mu okumi anyu. Munnapacerya okumi ovyaani ohiya ntakhara nyuwaano, nto ntakhara Yehova. (Aro. 14:8; 1 Pet. 4:1, 2) Eyo yoolakelela etokweene wi mpake. Eyo enanwerya ohula ephiro ya okumi woohakalalihaxa. Mwawiihai?

16. Mwawiiwanana ni Salmu 41:12 tiheeni Yehova onahaaleiye weera ni achu anamurumeela yoowo?

¹⁶ Yehova Muchu a mahalaxa. Moohipwacha yeeyo munamvahaanyu, owo ilukuluku soothene onahaala wookookiheryaani ichu sincipale. (Mar. 10:29, 30) Onamoovahaani ekumi yaphaama ni yoohakalaliha, naamwi mukhalaka mu elapo yeela yootakhala. Nyenya ala pahiru mapacereryo. Okumi mpacenryaanyu moorweela wa opatisiwa hiwaano makuchuwelo. Munanwerya omurumeela Tiithi anyu oosivela okhala wookhala. Osivela orivovo variyari va nyuwaano ni Tiithi anyu onahaala otitelela wunnuwa, nave munahaala okhalaka hiihaa ntoko owo onakhaleiye, okhala wookhala.—Mwaalakhanye Salmu 41:12.

17. Tiheeni munaweryaanyu omvaha Yehova yeeyo owo ohireiyeno owerya wa okhalano mukhateiye?

¹⁷ Vaavaa munaveleelaanyu okumi anyu wa Muluku ni opatisiwa, munnakhalano ekari ya omvaha Tiithi anyu echu yoochuneya wa yoowo. Owo onnoovahaani ichu soothene saphaama, ilukuluku soohakalaliha seiho munapuhaanyu. Moothamalela, hiyaano nnanwerya omvaha Mwaneene a erimu ni elapo yavathi echu yeeyo  owo ohireiyeno owerya wa okhalano mukhateiye—muteko anyu woororomeleya. (Yupu 1:8; 41:11; Mas. 27:11) Ola chiryene mukhalelo waphaama wa opharihela okumi anyu! Moohikhwa minikwa, osivela wanyu ntakhara Yehova nthowa naphaamaxa wi mpatisiwe.

18. Makoho taani munaphwanelaanyu wiipakela?

¹⁸ Mwawiihiiha, apwanne munahaala opatisiwa? Pahiru nyuwaano murino ophwanelela wa waakhula. Nyenya wiipakela nikoho nla onanwerya wookhaviheryaani: ‘Ntakhara heeni oweherya?’ (Saw. 8:36) Muupuwele mathowa mararu nthokoronryaahu. Noopacerya, munnasivela eparipari ni wookololowa. Mwiikohe: ‘Apwanne kinnachuna woona nihiku nenlo achu oothene anahaalaaya olocaka eparipari ni weera yeeyo eri yawookololowa?’ Nanaawiili, munnamusivela Yesu Kristu. Mwiikohe: ‘Apwanne kinnamuchuna Mwaana a Muluku ntoko Mwene aka, nave kinachuna ochariha yootakiherya awe?’ Naneeraru, opwaha soothene nyuwaano munamusivela Yehova. Mwiikohe: ‘Apwanne kinnachuna ohakalaliha murima wa Yehova moorweela wa omurumeela yoowo ntoko Muluku aka?’ Waakhanle wi moohaakhula makoho yaala ni aayi, ntakhara heeni muhinapatisiwaanyu? Ntakhara heeni oweherya?—Saw. 16:33.

19. Ntakhara heeni muhinaphwanelaanyu woovelela opatisiwa? Mphwanaphwanihe. (Yoh. 4:34)

¹⁹ Wakhala wi munnoovelela opatisiwa muthokororye niphwanaphwaniho nimoha Yesu opankeiye. (Mwaalakhanye Yohani 4: 34.) Moone wi Yesu oolikanyiha opaka yookhwela ya Atiithi awe ni yoolya. Ntakhara heeni? Woona wi olya echu yaphaama wa hiyo. Yesu oosuwela wi soothene Yehova onanivekeiye wi nipake ti saphaama wa hiyo. Yehova hanachuna wi nipake echu vyakala yeeyo enahaala onihooxa. Apwanne yookhwela ya Yehova ennaphitaanyerya opatisiwa? Aai. (Saw. 2:38) Mwawiihiiha munanwerya ororomela wi wiiwelela nlamulo na opatisiwa onahaala okumiherya mphurelo wa nyuwo. Waakhanle wi hamunoovelela opuha yoolya yaphaamaxa, ntakhara heeni munoovelelaanyu opatisiwa?

20. Tiheeni nnahaalaahu othokororya mmwaha onacharela?

²⁰ Ntakhara heeni oweherya? Achu ancipale ananwerya waakhula mmukhalelo ola: “Nkiri ooreheryeya.” Eparipari wi oveleela okumi anyu wa Yehova ni opatisiwa yoolakelela yoochuneyaxa munahaalaanyu opaka. Mwawiihiiha, munaphwanela wuupuwela mwawiiseela nave onnaviravo elukuluku ni wiilipixerya otokweene wi mukhale ooreheryeya. Nyenya wakhala wi mookhalano nchuno noolipa na opatisiwa, tiheeni munaphwanelaanyu weera hiihava wi mwiirehererye? Nnahaala othokororya naakhulo na nikoho nenla mmwaha onacharela.