1. Tiheeni enaatikhiniha achu ancipale arino nchuno vaavaa anaphiyaaya mmithukumano sahu mu ekwaha aya yoopacerya? (Moone tho eruku.)

 MMWAANYIHERYE mutheli mmoha aphiyaka mmithukumano mu Empa ya Omwene ya Anamoona a Yehova mu ekwaha yoopacerya. Mutheli ori ootikhiniheyaxa vaavaa onawooneiye anna ni arokora eri oonthamwene ni mukhalelo enooniheryaaya osivela mukina ni mukhwaawe. Imanle mithukumano ekookelaka owaani, mwaariye onnaloca: ‘Achu yaale toohiyana ni akina kaasuwenlaaka nave miyaano chiryeene koosiveliwa okhala ni yaawo.’

2. Ntakhara heeni akina annakwaculeya?

² Osivela orivovo variyari va achu a Yehova ti wavameekhaaya. Chiryene, Anamoona a Yehova tahi oophaameya. (1 Yoh. 1:8) Mwawiihiiha, vaavaa nnaasuwelaahu phaama yaawo mmulokoni, mookhweya ninnasuwela tho soohesa saya. (Aro. 3:23) Moothananiha, akina anneemererya wi oohiphaameya wa akina oweerihe awo ohiya omurumeela Yehova.

3. Tiheeni enaasuwanyeiha oomuchara eeparipari a Yesu? (Yohani 13:34, 35)

³ Moone wanaawiili yoorepa eri mathipelo wa muru wa mwaha yoola. (Mwaalakhanye Yohani 13:34, 35.) Ti mwawiihai achu yaahaalaaya waasuwela Akristu eeparipari? Yaahaala waasuwela nthowa na osivela waya, ohiya ophaameya. Moone tho wi Yesu halonce wi: ‘Nyuwaano munarwa musuwela wi mwa oohuserya aka moorweela mwa ela.’ Nto owo oriye: “Oothene enarwa esuwela wi mwa oohuserya aka moorweela mwa ela.” Mwawiihiiha, Yesu ohooniherya wi ohiya pahiru oomuchara awe, nyenya tho achu yaawo ahinapaka makupa mmuloko Weekristu yaahaala waasuwela oomuchara awe eeparipari moorweela wa osivela weeparipari awo aryaayano mukina ni mukhwaawe.

4. Tiheeni akhweya akina anachunaaya osuwela vooloca sa Akristu eeparipari?

 ⁴ Achu yaawo ahiri Anamoona a Yehova ananwerya wiikoha: ‘Ti mwawiihai osivela onaasuwanyeihaaya oomuchara eeparipari a Yesu? Ti mwawiihai Yesu oonihenryeiye osivela wa arummwa awe? Nave ti mwawiihai oryaaya wooweryeya olelo ochariha yootakiherya ya Yesu? Ti woochuneya tho Anamoona a Yehova wuupuwelela maakhulo a makoho yaala. Weerano yeela onahaala onikhaviherya wooniherya osivela wawaaca, xaxaxa vaavaa nnahoolelaahu ohiphaameya wa mukina ni mukhwaawe.—Aef. 5:2.

5. Mutharihe masu a Yesu anaphwanyeya mu Yohani 15:12, 13.

⁵ Yesu oothariha wi oomuchara awe yaahaala wooniheryaka osivela mukina ni mukhwaawe mmukhalelo wavameekhaaya. (Mwaalakhanye Yohani 15:12, 13.) Moone wi Yesu aahaalamulela yaawo ariki: “Musivelaneke mukina ni mukhwaawe, hiihaa ntoko miyo koosivenlaakaani nyuwo.” Ela enataphulela heeni? Ntoko Yesu otharinheiye, enataphulela waasivela akina opwaha wiisivela mwaneene, naari mukhalelo wa osivela onamweeriha Mukristu weemererya okhwa ntakhara akhweiye a munroromeloni waakhala woochuneya. b

6. Ti mwawiihai Masu a Muluku anaceenyeryaaya ochuneya wa osivela?

⁶ Masu a Muluku annanihusiha wi osivela ti woochuneyaxa. Ntoko yootakiherya, wa achu ancipale iha iversiikulu sa Mpiipiliyani savakhaani inaasivela vancipale: “Muluku ti osivela.” (1 Yoh. 4:8) “Omusiveleke mwaacamani aa ntoko oniisivelaawe weyo mwaneene.” (Mat. 22:39) “Osivela onnakhuneela waaca wa soocheka.” (1 Pet. 4:8) “Osivela honamalaru.” (1 Ako. 13:8) Iversikulu seiha ni ikina sinnahiya mookwakwaleya wi ti woochuneya wunnuwiha ni wooniherya mukhalelo yoola wooreeraxa.

7. Ntakhara heeni Satana harwa awuuraanya achu mu osivela weeparipari?

 ⁷ Achu ancipale annakoha: ‘Onaweryeya hai osuwela malapelo eeparipari? Ikerexa soothene inaloca wi inahusiha eparipari, nyenya emoha ti emoha enahusiha ichu soohiyana vooloca sa Muluku.’ Satana ootikitherya malapelo mancipale atheru nave eyo enneeriha okhala woovila wa achu osuwela malapelo taani ari eeparipari. Nto owo harwa awerya opaka marehereryo a onna a veelaponi yoothene ya Akristu yaawo anasivelana mukina ni mukhwaawe. Pahiru Yehova tonawerya weerano yeeyo. Noosuwela yeela woona wi osivela weeparipari onarweela wa Yehova. Pahiru yaale arino munepa wa Yehova ni mareeliho awe tanawerya okhalano osivela weeparipari variyari va yaawo. (1 Yoh. 4:7) Ti nthowa nene Yesu aalonceiye wi pahiru oomuchara awe yaahaala okhalano osivela weeparipari mukina ni mukhwaawe.

8-9. Ti mwawiihai achu ancipale anavoloweliwaaya vaavaa anoonaaya osivela orivovo variyari va Anamoona a Yehova?

⁸ Hiihaa ntoko Yesu aalonceiye, ancipale annaasuwela oomuchara awe eeparipari moorweela wa woona osivela weeparipari aryaayano mukina ni mukhwaawe. Ntoko yootakiherya, munna mmoha awiichaniwa Iani onnuupuwela vooloca sa ekwaha awe yoopacerya ophiya mmuthukumano wa muceche yoowo waapakiwe mu ekampu yoomvonya mphirya waacamela owannyawe. Mu miyeeri savakhaani muculi Iani aahiphiya mu ekampu yeele wi amoone xooku. Owo ooloca: “Achu yaari va muthukumano wa muceche yaari oohiyanaxa ni yaale kaaryaakano vamoha nimoonaka xooku. Anamoona a Yehova yaari a meecelo aphaama ni a mawarelo aphaama, nave anamwanaaya yaari oomaaleleya.” Owo ohaacererya: “Opwaha soothene, achu yaale yaari oohakalala ni a murecele. Ti yeeyo kaachunaka mu okumi aka. Nkinuupuwela mwaha vyakala waaperekhiwe mu nihiku nenle, nto nivano kinnuupuwela mukhalelo Anamoona a Yehova yaaryaaya.” c Mweeparipari, meecelo ntoko yaala ti yookhumelela ya osivela weeparipari nryaahuno mukina ni mukhwaawe. Woona wi ninnaasivela anna ni arokora ahu, ninnaakhaliha yaawo mooreera murima ni mwa ncicimiho.

⁹ Munna mmoha awiichaniwa John aahiisoona mmukhalelo woolikana vaavaa aapacenryeiye othukumana ni Anamoona a Yehova: “Kaari otikhiniheya moorweela wa oonthamwene  . . . wa oothene yaari weiwo. Awo yaari aphaamaxa ophiyerya wi kinuupuwela wi yaari oophaameya. Osivela waya weeparipari wahiikilekecha wi kaahiphwanya malapelo eeparipari.” d Saweereya seiha ni sikina sinnooniherya wi achu a Yehova Akristu eeparipari.

10. Ti liini xaxaxa nnakhalaahuno ekari ya wooniherya osivela Weekristu? (Moone tho enoota.)

¹⁰ Ntoko elociwaaya wuupaceryani, akhwiihu a munroromeloni oothene toohiphaameya. Ikwaha ikina, awo anahaala oloca naari opaka echu enahaala oninyeenyeiha. e (Tiy. 3:2) Xaxaxa mu ilukuluku seiho, ninnakhalano ekari yawooniherya osivela wahu Weekristu mmukhalelo nnaakhulelaahu. Vooloca sa yeela, tiheeni nnahuseryaahu oorweela wa yootakiherya etikitheryiwe ni Yesu?—Yoh. 13:15.

11. Mukhalelo taani woonanara Tiyako ni Yohani yoonihenraaya? (Moone tho eruku.)

¹¹ Yesu haaweherya oophaameya wa oomuchara awe. Moohiyana, owo aanaakhaviherya  yaawo wi yiilipixerye owaniha sooceecheya saya ni opaka matorokelo wi emuhakalaliheke Yehova. Mu ekwaha emoha, arummwa eeli, Tiyako ni Yohani, yaahaaleela amamaaya wi emveke Yesu wi aavahe mapuro oochuneya mu Omwene. (Mat. 20:20, 21) Yeeyo Tiyako ni Yohani yeenraaya yaahooniherya wi awo yaari awiirumiha nave yaanachuna okhala ookhweleyaxa wapwaha akina.—Mas. 16:18.

12. Apwanne pahiru yaari Tiyako ni Yohani yoonihenrye mikhalelo soonanara? Mutharihe.

¹² Tiyako ni Yohani hiyaari yaaworu pahi yoonihenrye mikhalelo soonanara mu elukuluku yeele. Moone mukhalelo arummwa akina yaakhulenlaaya: “Vaavaa akina khumi yiiwalaaya yeela, yaatepa onanariwa ni ale eeli yaawo yaari onna.” (Mat. 20:24) Nnanwerya waanyiherya wi Tiyako ni Yohani, ni arummwa akina yaahaakhulana moolipa mukina ni mukhwaawe. Akhweya akina yaanaloca ichu ntoko iha: ‘Onuupuwela wi we waani wi oveke mapuro ochuneya mu Omwene? Holampe moowetha mukhataa ni Yesu. Hiyaano tho ninnaphwanela waakhela mapuro oochuneya hiihaa ntoko weyo!’ Moohipwacha yeeyo yuupuwenlaaya naari eloncaaya, mu ekwaha yeele awo yaahicuwala wi yaaphwanela wooniherya osivela ni oreera murima mukina ni mukhwaawe ilukuluku soothene.

13. Ti mwawiihai Yesu aakhulenleiye mikhalelo soohiphwanelela sa arummwa awe? (Mateyu 20:25-28)

¹³ Tiheeni Yesu eenreiye? Owo haanyeenyen’ye. Owo haalonce wi ahaala owaavya  arummwa aphaamaxa, alopwana yaari awiiyevihaxa ni yaawo anaakhaliha akina moosivelaxa ilukuluku soothene. Ohiya yeeyo, Yesu aahiloca ni yaawo moopixa murima nthowa nawi aanasuwela wi awo yaanachuna opaka yeeyo eri yaphaama. (Mwaalakhanye Mateyu 20:25-28.) Ilukuluku soothene Yesu aanaakhaliha arummwa awe moosivela naamwi awo mwawuuluulela yaavaanela vooloca sa taani ari mutokweene variyari va yaawo.—Mar. 9:34; Luka 22:24.

14. Tiheeni arummwa a Yesu yaahusihiwaaya vaavaa yinnuwaaya?

¹⁴ Moohikhwa minikwa Yesu ahiisuwela wi mukhalelo arummwa yaaphwiiwalaaya waahaavolowela. (Yoh. 2:24, 25) Alipa oorepa ni Afarisi yaahusiha wi achu yaakhala oochuneya pahiru wakhala wi aakhalano murici wa vasulu. (Mat. 23:6; mulikanyihe ni exilema Primeiros assentos na sinagoga mu enoota ya ohuserya ya Mateyu 23:6.) Ahooleli a malapelo a Ayuuta yuupuwela tho wi yaari aphaama waapwaha akina. f (Luka 18:9-12) Yesu aahiiwexexa wi muupuwelo ntoko yoola waanwerya ovolowela mukhalelo arummwa awe yiisoonaaya ni mukhalelo yaawonaya akina. (Mas. 19:11) Owo haaweherya wi oohuserya awe hiyi epake soohesa, nave aari oopixa murima ni yaawo vaavaa yaahesaaya. Owo aanasuwela wi awo yaanachuna opaka yeeyo yaari yaphaama. Mwawiihiiha, moopixa murima owo aahaahusiha yaawo okhala awiiyeviha ni wooniherya osivela mukina ni mukhwaawe, ohiya ilukuluku soothene weererya okhala mutokweene waapwaha akina.

15. Tiheeni nnahuseryaahu oorweela mu yaweereya ya Tiyako ni Yohani?

¹⁵ Hiyaano nnanwerya ohuserya sincipale moorweela wa yaweereya ya Tiyako ni Yohani. Awo yaahihesa vaavaa yaavenkaaya mapuro ochuneya mu Omwene. Nave arummwa akina yaahihesa tho nthowa na weemererya wi mukhalelo yoole waakanyerye wiiwanana waaya. Naamwi hiihaa, Yesu aahaakhaliha mooreera murima ni moosivela arummwa oothene 12. Tiheeni nnahuseryaahuvo? Echu yoochuneya tahi pahiru yeeyo akina anapakaaya, nyenya tho mukhalelo nnaakhulelaahu soohesa saya. Tiheeni enahaala onikhaviherya? Vaavaa nnanyenyeihiwahu ni mukhwiihu a munroromeloni, nnaphwanela wiikoha: ‘Ntakhara heeni owo okinyeenyeihaleiye? Apwanne ela ennooniherya mukhalelo woonanara kinaphwanelaaka orehererya? Apwanne muchu okinyeenyeihale, onnahoolela makacamiho? Naamwi kirino mathowa aphaama a onyeenyeya apwanne kanwerya wooniherya osivela ni omukhurumuwela muchu yoowo?’ Waakhala wi ninnaakhaliha akina moosivelaxa, nnahaala wooniherya wi na oomuchara eeparipari a Yesu.

16. Echu taani ekina nnahuseryaahu oorweela mu yootakiherya ya Yesu?

¹⁶ Yootakiherya ya Yesu ennanihusiha tho weererya owiiwexexa asinthamwene ahu a munroromeloni. (Mas. 20:5) Chiryeene, Yesu aanawerya waalakhanya mirima. Nyenya hiyaano hannawerya. Nto nnanwerya okhala oopixa murima vaavaa anna ni arokora anannyeenyeihaaya. (Aef. 4:1, 2; 1 Pet. 3:8) Ti wookhweya weerano yeela wakhala wi noohasuwela phaama yaawo. Muthokororye yootakiherya emoha.

17. Ti mwawiihai ooweherya a ekulucu aaphunreiye moorweela wa waasuwela phaama akhweiye a munroromeloni?

¹⁷ Ooweherya a ekulucu mmoha onnamuupuwela  munna yoowo aari mmuloko mmoha orumenleiye o Afrika. Woopaceryani ooweherya a ekulucu uupuwela wi munna ole haari oosivela. Tiheeni ooweherya a ekulucu aapankeiye? Owo ooloca: “Ohiya omusepa munna ole, kaahilakelela omusuwela owo phaama.” Moorweela wa weerano yeela, ooweherya a ekulucu aahiisuwela ichu ikina sa mukhalelo munna owo aphwiiwaleiye seiyo saavolowenle omuchu awe. Ooweherya a ekulucu onnatitelela: “Vaavaa kaasuwenlaaka mukhalelo waaryaaya woovila wa yene opaka matorokelo oochuneya wi akhaleke phaama ni akina, ni mukhalelo aatoroken’yeiye, kaahitikhiniheya ni yoowo. Naahikhala asinthamwene aphaama.” Mweeparipari vaavaa nneereryaahu waasuwela phaama anna ni arokora ahu, wiiliwiili onnakhala wookhweya wa hiyo wooniherya osivela wa yaawo.

18. Makoho taani nnaphwanelaahu wiipakela wakhala wi noonyeenyeihiwa ni mukhwiihu a munroromeloni? (Masiposipo 26:20)

¹⁸ Ikwaha ikina nnamoona wi ti woochuneya ovaanela ni nthamwene ahu a munroromeloni yoowo oninyeenyeihale. Muhaakumve olocano, yaamukhala yaphaama wiipakela makoho ntoko ala: ‘Apwanne kohiiwexexa phaama yeeyo yeeren’ye?’ (Mas. 18:13) ‘Apwanne yaari yoolakelela awe okinyeenyeiha?’ (Ekl. 7:20) ‘Apwanne kohintoko opaka yoohesa emohamoha?’ (Ekl. 7:21, 22) ‘Wakhala wi kooloca ni muchu yoowo vooloca sa yeeyo apwanne eyo enahaala weeriha wi nikacamiho ntepe?’ (Mwaalakhanye Masiposipo 26:20.) Vaavaa nniipakelaahu makoho ntoko yaala nnawerya ophiyerya makuchuwelo awi osivela wahu ntakhara munna onanwerya onceenyerya omukhurumuwela yoowo.

19. Tiheeni mulakelenlaanyu weera?

¹⁹ Ntoko nikhuuru, Anamoona a Yehova ahooniherya wi oomuchara eeparipari a Yesu. Muchu ti muchu onnooniherya wi oomuchara eeparipari a Yesu vaavaa onooniheryeiye osivela weeparipari wa anna ni arokora naamwi epakaka soohesa. Mmukhalelo yoola ninnaakhaviherya akina osuwela malapelo eeparipari ni okhala ni hiyo mu omurumeela Yehova, Muluku oosivela. Hankooni nikhale oolakelela otitelela wooniherya osivela yoowo onaasuwanyeiha Akristu eeparipari.