1-2. Tiheeni muchu onaphwaneleiye opaka ahaakumve opatisiwa?

 VARIYARI va iyaakha thanu ivirale, macikhwi mancipale aachu aapatisiwa ntoko Anamoona a Yehova. Ancipale a yaawo, ntoko oohuserya a mu nsana noopacerya Timotiyu, yaahihuserya eparipari ‘ovinyerya eyemve.’ (2 Tim. 3:14, 15) Akina ehusenrye vooloca sa Yehova yunnunwe, akina yuuluvanleene. Hiihaanoru, muthiyana mmoha amuhusenrye Piipiliya ni Anamoona a Yehova oopatisiwa arino iyaakha 97!

² Waakhanle wi nyuwaano mwa oohuserya a Piipiliya naari munaphwiiwa ni asitiithi anyu yaawo eri Anamoona a Yehova, apwanne munnuupuwela opatisiwa? Ela yoolakelela yaphaamaxa! Muhaakumve opatisiwa, nyuwaano munaphwanela wiiveleela wa Yehova. Mwaha yoola onahaala othariha tiheeni enavolowelavo wiiveleela. Nave tho onahaala wookhaviheryaani woona ntakhara heeni muhinaphwanelaanyu woova oveleela okumi anyu wa Muluku ni opatisiwa vaavaa munahaalaanyu okhala ooreheryeya weerano yeeyo.

WIIVELEELA TIHEENI?

3. Mvahe sootakiherya sa Mpiipiliyani sa achu yaawo yiiveleenle wa Yehova.

³ Mpiipiliyani, wiiveleela onataphulela wiivalaanya ntakhara muteko wavameekhaaya. Aisarayeli, naari nloko niiveleenle wa Yehova. Nyenya achu akina a munloko na Aisarayeli yaahiiveleela wa Yehova mmukhalelo wavameekhaya. Ntoko yootakiherya, Aaroni aanawara ‘eneneeryo yaweeliheya yawiiveleela’—ncemo na ewooru yawaarya vayuuci vawe. Ncemo nenla na ewooru naanooniherya wi owo aahithanliwa wi arumeeleke mmurici wavamekhaaya—ntoko mulipa a mukucho mutokotoko a Aisarayeli. (Onam. 8:9) Anasiri tho yaahiiveleela wa Yehova mmukhalelo wavameekhaaya. Masu awi “Nasiri,” enarweela mu masu Ehepiri nazir,  enataphulela ‘Oovalaanyiwa,’ naari “awiiveleela.” Anasiri yaaphwanela okhalaka mwawiiwanana ni soohiiha seiho yaavahereryiwaaya mu Nlamulo na Mose.—Nam. 6:2-8.

4. (1) Mmukhalelo taani yaale aniiveleela wa Yehova aryaaya oovalaanyeya wi yeereno yookhwela yavameekhaaya? (2) Enataphulela heeni masu awi “iikhooce” mukhateiye? (Moone tho eruku.)

⁴ Vaavaa nyuwaano muniiveleelaanyu wa Yehova, munnathanla okhala oohuserya a Yesu Kristu ni opaka yookhwela awe okhala yoochuneyaxa mu okumi anyu. Tiheeni enavolowela wiiveleela ntoko Mukristu? Yesu ooloca: “Yoole onachuna okichara, iikhooce mukhateiye.” (Mat. 16:24) Masu yaala ataphuleliwe mu Ekiriki awi: “iikhooce mukhateiye” ananwerya tho otaphuleliwa ntoko “owo onaphwanela oloca wi hooye mukhateiye.” Ntoko mulapeli awiiveleela a Yehova, nyuwaano munaphwanela okhooca echu vyakala yeeyo enahaala onanariha onthamwene anyu ni Yehova. (2 Ako. 5:14, 15) Eyo enaphitaanyerya okhooca “miteko sa mwiili,” ntoko ocapaheya. (Aka. 5:19-21; 1 Ako. 6:18) Apwanne soohiiha seiya inamukacamiha okumi anyu? Hooye, wakhala wi munnamusivela Yehova nave mulekecheya ni malakiheryo awe munanwerya woona wi malakiheryo awe tamphurelo wa nyuwaano. (Sal. 119:97; Yes. 48:17, 18) Munna mmoha awiichaniwa Nikolawu ooloca: “Nyuwaano munanwerya woona malakiheryo a Yehova okhala ntoko ekariposo yoolipihiwa yeeyo enaweerihaani ohipaka yeeyo mwaachunaanyu opaka naari ntoko nikhola noolipihiwa na amwaco nenlo nnakhapelela wa yawoopiha.”

5. (1) Ti mwawiihai nyuwaano muniiveleelaanyu wa Yehova? (2) Ohiyana taani orivovo variyari va wiiveleela ni opatisiwa? (Moone tho eruku.)

⁵ Ti mwawiihai nyuwaano munahaalaanyu wiiveleela wa Yehova? Nyuwaano munnamuroromeliha Yehova munivekelo wi munahaala omulapelaka pahiru yoowo, nave wi munahaala okuha mu nipuro noopacerya yookhwela awe mu okumi anyu. Nyuwaano munnamuroromeliha Yehova wi munahaala otitelela omusivela ‘ni  murima anyu woothene, ni okumi anyu woothene ni muupuwelo anyu woothene vamoha ni ikuru sanyu soothene.’ (Mar. 12:30) Wiiveleela wanyu oneereya wiiphiini, variyari va nyuwaano ni Yehova. Moohiyana, opatiso ti wavanlakani; onnooniherya wa akina wi nyuwaano mohiiveleela. Wiiveleela wanyu nri nlakano noochuneyaxa, yoolakelela aya ori waakhwaniherya yoororomeliha yeela, nave Yehova onnaweherya wi mweereno yeeyo.—Ekl. 5:4, 5.

NTAKHARA HEENI WIIVELEELA WA YEHOVA?

6. Tiheeni enamuceenyerya muchu wiiveleela wa Yehova?

⁶ Nthowa ntokweene nnaweerihaani nyuwaano wiiveleela wa Yehova tiwi nyuwaano munnamusivela. Osivela wanyu honathipeleya pahiru mmoonelo. Moohiyana ni yeeyo, osivela wanyu onathipeleya mu “masuwelelo awaakhwanela” ni mu “wiiwexexa woomunepani”—ichu seiyo muhusenryaanyu vooloca sa Yehova seiyo seerinhe osivela wanyu ntakhara yoowo winnuwa. (Ako. 1:9) Ohuserya wanyu soorempwa wohoolekechaani (1) wi Yehova teeparipari, (2) wi masu awe Piipiliya tooveereliwa, ni (3) wi owo onnapharihela marehereryo awe wi aakhwaniherye yookhwela awe.

7. Tiheeni nnaphwanelaahu weera nihaakumve wiiveleela wa Muluku?

⁷ Yaale aniiveleela wa Yehova anaphwanela osuwela mahusiheryo oochuneyaxa anaphwanyeya mu Masu a Muluku nave enakhala mwawiiwanana ni malakiheryo awe. Awo annaaleela akina sa nroromelo naya vaavaa mikhalelo saya sinaweemereryaaya. (Mat. 28:19, 20) Omusivela wanyu Yehova wohinnuwa, nave yoolakelela anyu etokweene ori omulapelaka yoowo pahiru. Nyuwaano hamuneemererya? Okhalano osivela wa mukhalelo yoola, nyuwaano hamoonaka wiiveleela ni opatiso ntoko echu munapakaanyu muchunaka wi mmuhakalalihe muhusihaanyu a  Piipiliya naari asitiithi anyu; naari nyuwaano hamunoona ntoko echu munapakaanyu wi mwaahakalalihe asinthamwene anyu.

8. Ti mwawiihai othamalela oneeraaya wookhaviheryeeni mu yoolakelela anyu ya wiiveleela wa Yehova? (Sal 116:12-14)

⁸ Vaavaa munuupuwelaanyu ichu soothene Yehova opankeiye wa nyuwaano, munahaala wooniherya othamalela nave tho munahaala ochuna oveleela okumi anyu wa yoowo. (Mwaalakhanye Salmu 116:12-14.) Piipiliya onnamwiichana Yehova mookwakwaleya ntoko namavaha a “Yamahala yoothene yaphaama ni yoovaha yoothene yoophaameya.” (Tiy. 1:17) Etokweene wa soovaha seiya ori mukucho wa mwanawe Yesu. Pahiru muupuwele! Woopola woheeriha okhala wooweryeya wi nyuwaano mukhaleno onthamwene wawaacameleya ni Yehova. Nave owo ohoovahaani ewehereryo ya okhala okhala wookhala. (1 Yoh. 4:9, 10, 19) Wiiveleela wa Yehova ori mukhalelo mmoha wawooniherya othamalela wa osivela yoowo Yehova oonihenryeiye, ophitaanyerya tho ni mareeliho makina oothene yaawo Yehova oovanheiyeni. (Malam. 16:17; 2 Ako. 5:15) Othamalela yoola onnalociwa mu liivuru Mpuhe Okumi Okhala Wookhala!, mmwaha 46 epontu 4, yoowo onaphitaanyerya exilema ya aminutu araru enooniherya Samahala sa Muluku.

APWANNE NYUWAANO MURI OOREHERYEYA WIIVELEELA NI OPATISIWA?

9. Ntakhara heeni muchu hanaphwanela wiisoona okhala ookhinyereryeya vaavaa oniiveleeleiye?

⁹ Nyuwaano munanwerya wiisoona wi hamuri ooreheryeya ntakhara wiiveleela ni opatisiwa. Akhweya nyuwaano munnachuna opaka matorokelo mookumini mwanyu wi mphwanelele ni malakiheryo a vasulu a Yehova, naari akhweya munnachuna elukuluku yincipale wi mulipihe nroromelo nanyu. (Ako. 2:6, 7) Tahi wi oohuserya oothene a Piipiliya ennaya vahoolo mmukhalelo woolikana, naari tho amiravo oothene okhala ooreheryeya wiiveleela ni opatisiwa mu iyaakha soolikana. Mweererye ovareryela oya wanyu vahoolo omunepani mwawiiwanana ni yeeyo munaweryaanyu opaka ohiya wiilikanyiha ni achu akina.—Aka. 6:4, 5.

10. Tiheeni nyuwaano munaphwanelaanyu weera wakhala wi moophiyerya makuchuwelo awi hamuri ooreheryeya wi mwiiveleele ni opatisiwa? (Moone tho ekaaxa “ Wa Yaale Anaphwiiwa mu Eparipari.”)

¹⁰ Naamwi nyuwaano moonaka wi nlelo hamuri ooreheryeya wiiveleela wa Yehova, mutitelele ni yoolakelela yeela muhiceechen’ye. Mvekele wa Yehova mvekaka mareeliho vooloca sa wiilipixerya wanyu wi nwerye opaka matorokelo yaawo anachuneya. (Afi. 2:13; 3:16) Muroromele wi owo onamwiiwa mavekelo anyu nave onamookhaviheryaani.—1 Yoh. 5:14.

NTAKHARA HEENI AKINA ANOOVELELAAYA?

11. Ti mwawiihai Yehova onahaaleiye onikhaviherya otitelela okhala oororomeleya wa yoowo?

¹¹ Akina yaawo ari ooreheryeya wiiveleela ni opatisiwa nlelo annoovelela. Akina ananwerya wiikoha: ‘Hanka wakhala wi koopaka yoocheka etokweene ni wiikariwa mmulokoni?’ Wakhala wi nyuwaano mookhalano woova yoola, mukhale oolekecheya wi Yehova onahaala woovahaani soothene seiyo nyuwaano munachunaanyu “wi mweeceke mmukhalelo woophwanelela wa [yoowo], ni yoolakelela ya omuhakalaliha.” (Ako. 1:10) Owo tho onamoovahaani ikuru wi mpake yeeyo eri yaphaama. Owo ohaakhaviherya akina opaka yeeyo eri yaphaama. (1 Ako. 10:13) Nla nthowa nimoha na mathowa yaawo anaweeriha achu akina wiikariwa mmulokoni. Yehova onnaarehererya achu awe wi etitelele okhala oororomeleya.

12. Ti mwawiihai nnahaalaahu osepa wivoliiherya opaka soocheka itokweene?

¹² Achu oothene oohiphaameya anneehiwa wi yeereno ichu soonanara. (Tiy. 1:14) Nyenya, munaphwanela othanla yeeyo nyuwaano munaphwanelaanyu weera—vaavaa muneehiwaanyu. Ela tiwi, vookuchulani, nyuwaano  munaphwanela ovareryelaka mukhalelo munahaalanyu okhalaka. Achu akina aneemererya wi haniwerya ovareryela mukhalelo nnoonaahu ni yeeyo nnapakaahu, nyenya eyo tahi eparipari, nyuwaano munanwerya ohuserya ovareryela soochunachuna sanyu soonanara. Mwawiihiiha, naamwi mweehiwaka, nyuwaano munanwerya othanla ohipaka echu yoonanara. Mwa yeeyo, mvekeleke mahiku oothene. Mukhaleno yookhovelela ya opaka yoohuserya ya muchu mukhateiye. Mpakeke makupa mmithukumano Seekristu. Mwaaleeleke akina sa nroromelo nanyu. Weerano ichu seiya moohihiyererya onamoovahaani ikuru wi mutitelele okhala oororomeleya wa Yehova. Nave muhirwe mucuwale wi Yehova onahaala wookhaviheryaani weerano yeeyo.—Aka. 5:16.

13. Yootakiherya taani yaphaama Yosefe onivanheiye?

¹³ Onamukhala wookhweya otitelela okhala oororomeleya wa Yehova wakhala wi nyuwaano moolakelela woosiilo ene yeeyo munahaalaanyu weera wakhala wi munneehiwa. Piipiliya onnanleela achu oohiyanahiyana mwawooneya yeenreno yeeyo, naamwi awo tho yaari achu oohiphaameya. Ntoko yootakiherya, mwaara a Potifare aaheererya mwawuuluulela omulekecha Yosefe. Nyenya owo aanasuwela mukhalelo aahaaleiye waakhulela. Piipiliya onnanleela wi “Yoosefe aakhooca,” nave owo aaloca: “Kinii kiwerye hai weera echu yoonanarasha yawihiihaa, wi kimuchekele Muluku?” (Map. 39:8-10, PMM) Yosefe aanasuwela phaameene echu aahaaleiye weera naamwi mwaara a Potifare ahaakumve omweeha. Eyo yaahimukhaviherya Yosefe opaka echu yaphaama vaavaa owo eehiweiye.

14. Ti mwawiihai nnahaalaahu ohuserya okhooca saweeha?

¹⁴ Ti mwawiihai nyuwaano munahaalaanyu omutakiherya Yosefe ni opaka yeeyo eri yaphaama vaavaa muneehiwaanyu? Nyuwaano munanwerya opaka yoolakelela hiihaano echu munahaalaanyu weera wakhala wi yookhumelela yaweeha. Muhuserye okhooca mwawaakuveya ichu seiyo Yehova oniiceiye ni okhooca wuupuwela seiyo. (Sal. 97:10; 119:165) Mmukhalelo yoola nyuwaano hamucheka vaavaa muneehiwaanyu. Nyuwaano munahaala osuwela mukhalelo wa waakhulela. Nyuwaano muni mweereke mpanke yoolakelela anyu woosiilo.

15. Ti mwawiihai muchu onahaaleiye wooniherya wi ‘onnamwaavya mweeparipari’ Yehova? (Ahepri 11:6)

¹⁵ Akhweya nyuwaano, munanwerya osuwela wi moophwanya eparipari nave wi munnachuna omurumeela Yehova ni murima anyu woothene, nyenya munoona wi nlelo hamuri ooreheryeya  wiiveleela ni opatisiwa. Nyuwaano munanwerya weera yeeyo Mwene Tavite aapankeiye. Munanwerya ovekela wa Yehova: ‘Muluku, mukivarerye, musuwele murima aka. Mukeererye, nave musuwele sawaanyiherya saka. Moone kaaweecaka moonanara nave mukihoole mphiro wooyano wookumini woohimala.’ (Sal. 139:23, 24, PMM) Yehova onnaareeliha yaale “anamwaavya mweeparipari.” Wiilipixerya wanyu mwawiiwanana ni yoolakelela ya wiiveleela ni opatisiwa, onnamooniherya Yehova wi nyuwaano muneerano yeeyo ene enamuhakalaliha.—Mwaalakhanye Ahepri 11:6.

MUTITELELE OMWAACAMELA YEHOVA

16-17. Ti mwawiihai yaale anaphwiiwa mu eparipari ananwerya wiichaniwa ni Yehova? (Yohani 6:44)

¹⁶ Yesu olonce wi oohuserya awe enaruuhiwa ni Yehova. (Mwaalakhanye Yohani 6:44.) Muupuwele mukhalelo eyo eryaaya yootikhiniha nave tiheeni eyo enataphulelaaya wa nyuwaano. Yehova onnoona echu yaphaama wa muchu ti muchu yoowo oniiruuheleiye. Owo onnamoona muchu ntoko ‘awawe enesha’ naari ‘nloko noochuneyaxa.’ (Malam. 7:6; PMM, moone enoota mu ekunya.) Ti hiiha Yehova onawooneiyeni tho.

¹⁷ Akhweya, nyuwaano mwa mmiravo yoowo ophwiiwale mu eparipari. Akhweya nyuwaano munamwiisoona wi munamurumeela Yehova nthowa nawi asitiithi anyu anneerano yeeyo, ohiya nthowa nawi Yehova orimwiiruuhela wa yene. Mwawiihiiha, Piipiliya ooloca: “Mmwaacamele Muluku, nave owo onarwa awaacamelaani.” (Tiy. 4:8; 1 Math. 28:9) Vaavaa nyuwaano munapaceryaanyu omwaacamela Yehova, owo onnaakhulela awaacamelakaani nyuwaano. Yehova hanawoonaani nyuwaano pahiru ntoko mmoha a munikhuuruni. Owo onniiruuhela muchu ti muchu—ophitaanyerya ni yaale enaphwiiwa mu eparipari. Wa muchu yoowo onapacerya omwaacamela Yehova, Owo onnamwaakhula hiiha ntoko noonnaahu mu Tiyaku 4:8.—Mulikanyihe ni 2 Atesalonika 2:13.

18. Tiheeni nnahaalaahu othokororya mmwaha onacharela? (Salmu 40:8)

¹⁸ Vaavaa nyuwaano muniiveleelaanyu wa Yehova ni opatisiwa, munnooniherya mukhalelo wa Yesu. Owo aahiiveleela mmukhalelo waphaama ni woophwanelela wa Atiithi awe wi eereno yookhwela awe. (Mwaalakhanye Salmu 40:8; Ahe. 10:7) Mwaha onacharela, munahaala ohuserya tiheeni enahaala wookhaviheryaani otitelela omurumeela Yehova moororomeleya mmanle opatisiwa.