1. Moonelo tani alapeli akina oororomeleya a Yehova anahaalaaya ovootha?

 TIYOOHAKARARYA vancipale osuwela wi Yehova onnaweemererya achu awe ntoko nikhuuru nimoha! Piipiliya oni: “Apwiya annahakalalano achu aya.” (Sal. 149:4, PMM) Vakina vaya, akina annakhala ooceecheyaxa ophiyerya wiikoha: ‘Apwanne Yehova onnakeemererya?’ Alapeli ancipale oororomeleya a mu elukuluku ya khalai, yaawo analociwa Mpiipiliyani, yaanoona okhala woovila weemererya wi Yehova aanahakalala ni yaawo.—1 Sam. 1:6-10; Yupu 29:2, 4; Sal. 51:11.

2. Taani oneemereryiwa ni Yehova?

² Piipiliya onnooniherya wi achu oohiphaameya enanwerya weemereryiwa ni Yehova, naari okhala ootaphuwa. Mwawiihai? Nnaphwanela omuroromela Yesu Kristu ni opatisiwa. (Yoh. 3:16) Mwawiihiiha, ninnooniherya vanlakani vene wi noocharuwa soocheka sahu, nave wi noopaka nlakano ni Muluku na weera yookhwela awe. (Saw. 2:38; 3:19) Yehova onnahakalala vancipale vaavaa hiyaano nneeraahuno yeeyo wi nimwaacamele yoowo. Vaavaa nnatitelelaahu opaka owetha wahu wi naakhwaniherye nlakano nahu na wiiveleela, Yehova onnaneemererya nave onnanthokororya ntoko asinthamwene awe awaacameleya.—Sal. 25:14.

3. Tiheeni nnahaalaahu othokororya hiihaano?

³ Vano, ntakhara heeni vakina vaya akina annuupuwela wi Yehova hanahakalala ni yaawo? Tiheeni Yehova onapakeiye wi ooniherye wi onnaneemererya? Nave ti mwawiihai nnahaalaahu olipiha ororomela wahu wi Yehova onnahakalala ni hiyaano?

NTAKHARA HEENI AKINA ANANWERYA WOONA WI YEHOVA HANAWEEMERERYA?

4-5. Naamwi nrino moonelo woothanana, tiheeni nnaphwanelaahu ororomela ?

⁴ Ancipale a hiyo aakhalano mooneelo woothanana ovinyerya eri mwaana. (Sal. 88:15) Munna awiichaniwa Atriyano ooloca: “Ilukuluku  soothene kiisoona okhala oohichuneya. Wa ichu savakhaani kinuupuwelaaka, waari ovekela wi emusi aka evolowe mu elapo evyaani, naamwi miyaano kaalekechen’ye wi nkaari oophwanelelaxa wi kivolowe mu elapo eyo.” Toni munna yoowo ohipwiiwale mu eparipari, ooloca: “Asitiithi aka hayintonko oloca wi ennakisivela naari enniirumiha ni miyaano. Eyo yaanakeeriha wiisoona wi hiyaavo echu kaapakaaka yeeyo yaahaala waahakalaliha.”

⁵ Wakhala wi ikwaha ikina munniisoona okhala oohichuneyaxa, muupuwele wi ti mwaneene Yehova, ohiya muchu mukina oothanlileeni wi mmurumeeleke yoowo. (Yoh. 6:44) Owo onnoona yaphaama wa hiyaano akhweya yeeyo nihinaweryaahu woona wa hiyo mukhatiihu, nave oosuwela murima ahu. (1 Sam. 16:7; 2 Math. 6:30) Mwawiihiiha, nnaphwanela omuroromela owo vaavaa onaloceiye wi na achu oochuneya.—1 Yoh. 3:19, 20.

6. Ti mwawiihai murummwa Paulo iisooneiye vooloca sa soocheka sawe sakhalai?

⁶ Nihaakumve ohuserya eparipari, akina a hiyo noopaka ichu seiho nlelo inahaala oneeriha wiiphwanyerya mathowa. (1 Pet. 4:3) Naari tho Akristu yaawo eri oororomeleya ennawaniha ni sooceecheiha. Apwanne murima anyu onnoothorihaani? Waakhanle wi ti hiiha, mulipiheye mu osuwela wi alapeli oororomeleya a Yehova annawaniha ni miyoonelo soolikana. Ntoko yootakiherya, murummwa Paulo aahikhala oothanana vaavaa uupuweleiye vooloca sa ohiphaameya wawe. (Aro. 7:24) Eparipari wi, Paulo aahicharuwa soocheka sawe ni aahipatisiwa. Naamwiihiiha, owo aahiiloca mwaneene ntoko ‘mukhaani wa arummwa’ nave ‘mulipa oopaka soocheka itokotoko’.—1 Ako. 15:9; 1 Tim. 1:15.

7. Tiheeni nnaphwanelaahu wuupuwelaka vooloca sa soocheka sahu sakhalai?

⁷ Tiithi ahu a wirimu ooniroromeliha onikhurumuwela soocheka sahu wakhala wi noocharuwa. (Sal. 86:5) Mwawiihiiha, wakhala wi noocharuwa mweeparipari wa soocheka seiyo nipankaahu, nnanwerya ororomela wi Yehova onaloca eparipari—owo oonikhurumuwela.—Ako. 2:13.

8-9. Nni nivoothe hai muupuwelo wawi hanirwa nipaka sincipale wi nimuhakalalihe Yehova?

⁸ Oothene ahu nnachuna omurumeela Yehova ophiyerya vaavaa nnaweryelaahuvo. Mwawiihiiha, akina ananwerya wiisoona wi herwa epaka sincipale mwawaakhwanela wi ekhaleno weemereryiwa wawe. Murokora mmoha awiichani Amanta ooloca: “Miyaano kinoona wi omvaha Yehova owetha waka onathaphulela wi kinaphwanela opaka sincipale. Mwawiihiiha kinneererya opaka sincipale opwaha yeeyo kinaweryaaka. Nave vaavaa kinahesaaka, kinnakhala oonyeenyeya mukhataaka nave kinoona wi Yehova tho oonyeenyeya.”

⁹ Ti mwawiihai nnahaalaahu ovootha moonelo wawi hanirwa nipaka sincipale wi nimuhakalalihe Yehova? Muupuwele wi Yehova tahi ookhinyererya naari oowalamela. Owo harwa aniveka yeeyo nihinaweryaahu opaka. Owo onnavaha esisapo wa soothene nnapakaahu ntakhara yoowo, wakhala wi nneerano yeeyo nipakaka owetha wahu. Ohiya yeeyoru, muupuwelele sootakiherya sa Mpiipiliyani sa yaale amurumeenle Yehova ni okumi aya woothene. Mmuupuwele Paulo. Owo aahiilipixerya mwa mvai mu iyaakha sincipale, eecaka ikilomeetru sincipale nave atikitheryaka miloko. Mwawiihiiha, vaavaa mikhalelo sawe saamukwatelenlaaya opaka makupa mmuteko woolaleerya, apwaanne owo aahiyeleela weemereryiwa ni Muluku? Hooye. Owo aahititelela opaka yeeyo aaweryeiye, nave Yehova aahimureeliha. (Saw. 28:30, 31) Mmukhalelo mmohamoha, yeeyo nnaweryaahu omvaha Yehova, enanwerya okhala yoohiyana ikwaha ikina. Nyenya echu eri yoochuneya wa yoowo ari mathowa ananeeriha weerano yeeyo. Vano nnahaala woona mukhalelo yoowo Yehova onaniroromeliheiye wi onnaneemererya.

 TI MWAWIIHAI YEHOVA ONOONIHERYEIYE WI ONNANEEMERERYA?

10. Nni niwerye hai “omwiiwa” Yehova ooniheryaka oneemererya wawe? (Yohani 16:27)

¹⁰ Moorweela wa Piipiliya. Ilukuluku soothene Yehova onnaavya mikhalelo sa owooniherya alapeli awe wi onnaasivela nave wi onnahakalala vancipale ni yeeyo awo anapakaaya. Soorepa sinnathariha saweereya piili vaavaa Yehova aalonceiye wa Yesu wi aari Mwana Awe oosiveliwa nave yoowo aamweemereryeiye. (Mat. 3:17; 17:5) Apwanne mwaamusiveliwa omwiiwa Yehova alocaka echu ntoko yeela wa nyuwaano? Olelo Yehova hanaloca ni achu mooluluwanya, nyenya owo onaloca moorweela wa Masu awe Piipiliya. Nnanwerya wiiwa nsu na Yehova vaavaa nnaalakhanyaahu masu a Yesu mu a liivru a Michaka. (Mwaalakhanye Yohani 16:27.) Yesu aahitakiherya moophaameya mukhalelo wa Atiithi awe. Mwawiihiiha vaavaa nnaalakhanyaahu masu aphaama a Yesu yaawo owo aalonceiye wa oomuchara oohiphaameya, hiyaano nnanwerya waanyiherya wi ti mwaneene Yehova onaloca masu ene yaale wa hiyaano.—Yoh. 15:9, 15.

11. Ntakhara heeni ohoolela makacamiho ohinataphulelaaya wi nnamuhemereryiwa ni Yehova? (Tiyaku 1:12)

¹¹ Moorweela wa meerelo awe. Yehova ari ooreheryeya wi anikhaviherye, ntoko yootakiherya, anivahereryaka soothowa sahu soomwiilini. Ikwaha ikina Yehova onamweemererya wi nihooxeye nnikacamiho vyakala, hiiha ntoko yeeren’yaaya ni Yupu. (Yupu 1:8-11) Saweeha hasinooniherya wi nooyeleela weemereryiwa ni Muluku. Moohiyana ni yeeyo, ela ekari etokweene yawooniherya osivela wahu wawiixeela wa Muluku ni omuroromela wahu yoowo. (Mwaalakhanye Tiyaku 1:12.) Nave hiyaano nnanwerya woona osivela nnikhaviheryo na Yehova, vaavaa nnoonaahu nikhaviheryo nenlo owo onanivaheiye wi nivilele.

12. Tiheeni nnahuseryaahu ni yaweereya ya Timitri?

¹² Moone yeeyo yeeren’ye ni munna awiichaniwa Timitri yoowo onakhala o Asiya. Owo aayeleela muteko awe nave aahikhala mu miyeeri mincipale ahiphwannye muteko. Mwawiihiiha owo aahilakelela waaceererya muteko awe woolaleerya, ooniheryaka ororomeleya wawe wa Yehova. Miyeeri saanavira, nave owo nlelo haaphwanya muteko. Voocharela, aahihoolela nikacamiho na okumi ophiyerya wi aapaxaariwa. Owo aahipacerya wiisoona ohikhala echu enevo ntoko mulopwana othenle naari tiithi, nave aaniikoha waakhanle wi ooyeleela weemereryiwa ni Yehova. Mu ohiyu okina, mwana awe amwaamuthiyana aahimprimiira ekaarta erivo masu anaphwanyeya mu Yesaya 30:15, PMM yaawo ani: “Mwakookela wa miyo, muniichuwa mwa miyo munamvulushiwa. Mwiichaala mwa miyo ni okiroromela.”  Owo aahikuxa ahiya waamuru waya nave aloca: “Papa, vaavaa munakhalaanyu oothanana, munaphwanela wuupuwelaka yoorepa yeela.” Timitri aahoona wi nnikhaviheryo na Yehova, echoko awe nlelo yaahikhalano yoolya, soowara ni yawiikhuneelano yoophwanelela. Owo ooloca: “Echu kaaphwanelaaka weera, waari otitelela okhala oomaaleleya ni otitelela omuroromela Muluku aka.” Wakhala wi nyuwaano munnahoolela yaweeha yoolikana, munanwerya ororomela wi Yehova onnuukhuwa ni nyuwaano nave wi onamookhaviheryaani ovilela.

13. Taani Yehova onaaphariheleiye wi ooniherye oneemererya wawe, nave mwawiihai?

¹³ Moorweela wa annihu. Yehova onnaapharihela anna ni arokora ahu wi ooniherye oneemererya wawe. Ntoko yootakiherya, owo onanwerya waaceenyerya achu akina wi eloce masu oolipiha mu elukuluku yoophwanelela. Ti yeeyo yeeren’ye ni murokora onakhala o Asiya, owo aahihoolela elukuluku yincipale ya soonyeenyeiha. Owo aahiyeleela muteko awe nave tho aahiiceliwa vancipale. Voocharela aiyawe yaahipaka yoocheka etokweene nave yaahihiya orumeela ntoko mutokweene a muloko. Owo ooloca: “Miyaano nkaawerya wiiwexexa ntakhara heeni iho seereyaaya. Kuupuwela wi akhweya kaahipaka echu yooheseya nave kiyeleela weemereryiwa ni Yehova.” Murokora ahu aahivekela wa Yehova avekaka wi amooniherye waakhanle wi owo onnamusivela. Tiheeni Yehova eenreiye? Owo onnathariha: “Atokweene a muloko yaahichekulela ni miyaano nave ekiroromeliha wi Yehova annakisivela vancipale.” Voocharela, owo aahiveka wanaawiili nikhaviheryo na Yehova. Owo ooloca: “Nihiku nene nenlo kaahaakhela ekaarata ya nikhuuru na anna ni arokora a mmulokoni. Vaavaa kaalakhanyaaka masu aya oohakararya, kaahoona wi Yehova aahikiwiriyana.” Chiryene, ikwaha sincipale Yehova onnooniherya wi onnaneemererya moorweela wa masu aphaama yaawo akina analocaaya ntakhara hiyo.—Sal. 10:17.

14. Tuuvi ori mukhalelo mukina wa Yehova onooniherya oneemererya wawe?

 ¹⁴ Yehova tho onnooniherya oneemererya wawe aapharihelaka anna akina wi enivahe ekano yeeyo nnachunaahu. Ntoko yootakiherya mu nsana noopacerya, Yehova aahimpharihela murummwa Paulo wi arepe ikaarata 14 soovereliwa wa miloko. Mu ikarata seiya, Paulo aahiphitaanyera ikano soolipa, nyenya soosivela. Ntakhara heeni Yehova amveerenleiye murummwa Paulo ophitaanyeryamo ikano seiya? Nthowa nawi Yehova Tiithi aphaama, nave annaalaka anamwane awe ‘yaawo anaakhweleiye.’ (Mas. 3:11, 12, PMM) Mwawiihiiha, vaavaa nnaakhelaahu ikano sinathipeleya Mpiipiliyani, eyo henataphulela wi nooyeleela weemereryiwa ni Yehova, moohiyana ni yeeyo, enooniherya wi owo onnanisivela vancipale. (Ahe. 12:6) Mukhalelo taani mukina Yehova onooniheryeiye wi onnaneemererya?

MIKHALELO MIKINA SEIYO YEHOVA ONANEEMERERYEIYE

15. Taani Yehova onaavaheiye munepa awe waweela, nave ororomela taani eyo enanivahaaya?

¹⁵ Yehova onnaavaha munepa awe waweela wa yaale onaweemereryeiye. (Mat. 12:18) Nnanwerya wiikoha: ‘Apwanne miyaano kinnawerya wooniherya mukhalelo mukina wa yawiima ya munepa wa Muluku mu okumi aka?’ Apwanne nyuwaano munnoona wi munnapixa murima ni akina opwaha vaavaa muhaakumve omusuwela Yehova? Vaavaa nyuwaano munannuwihaanyu mikhalelo saphaama sa munepa waweela wa Muluku, munanwerya okhalano ororomela wi Yehova onnaweemereryaani!—Moone ekaaxa “ Yawiima ya Munepa ti . . . ”

16. Taani Yehova onaaphariheleiye wi elaleerye michaka saphaama, nave nyuwaano muniisoona hai wa osuwela yeeyo? (1 Atesalonika 2:4)

¹⁶ Wi waakhwanele muteko woochuneya wa olaleerya michaka saphaama, Yehova onaaroromela pahiru yaale owo onaweemereryeiye. (Mwaalakhanye 1 Atesalonika 2:4.) Moone ti mwawiihai murokora mmoha awiichaniwa Jocelyn aakhaviheryiweiye mmuteko woolaleerya. Nihiku nimoha, Jocelyn aavinnye ari awuukhuweene. Owo onnathariha: “Miyaano kaahiisoona oohikhalano ikuru ni oohikhala echu enevo. Nyenya kaari piyoneera nave naari nihiku naka na muteko woolaleerya. Mwawiihiiha kaahipaka nivekelo nave kikhuma kiyaaka mmuteko woolaleerya.” Mu wooxixelo ene yoole Jocelyn aahimusuwela Mariya, muthiyana mmoha aphaama yoowo eemerenrye yoohuserya ya Piipiliya. Miyeeri vakhaani ohoolo waya, Mariya aahimuleela owo wi aanavekela wa Muluku avekaka nikhaviheryo, vaavaa Jocelyn aamaneiye mukhora awe. Tiheeni Jocelyn ohusenryeiyevo ni yaweereya yeela? Owo ooloca: “Kaahiisoona ntoko wi Yehova  aakileela ariki: ‘Miyaano kinnaweemererya weyaano.’” Ti yawooneya wi, tahi achu oothene anamweemererya muteko ahu woolaleerya. Nyenya nnaphwanela ororomela wi Yehova onnahakalala vancipale vaavaa nnapakaahu owetha wahu wi naaleele akina vooloca sa michaka saphaama.

17. Tiheeni nyuwaano muhusenryaanyu wa yeeyo Vicky olonceiye vooloca sa woopola? (Salmu 5:12)

¹⁷ Yehova oovahererya woopola wi aakhaviherye yaale onaweemereryeiye. (1 Tim. 2:5, 6) Nyenya, hanka wakhala wi nyuwaano hamunalekecheya wi Yehova onnaweemereryaani, naamwi murino nroromelo mu mukucho ni mpatisiwe? Muupuwele ela: Hannaphwanela wiiroromela mukhatiihu, nyenya moohiyana nnaphwanela omuroromela Yehova. Wa Yene, yaale enaroromela mukucho onnaweera eekhaikhai va miithoni vawe, nave Owo onnaaroromeliha waareeliha. (Mwaalakhanye Salmu 5:12; Aro. 3:26) Murokora mmoha awiichaniwa Vicky nihiku nimoha aahiiwexexa mukhalelo waaryaaya waphaama wa yoowo wuupuwelela mwawiiseela esisapo ya mukucho. Owo ooloca: “Yehova aari oopisa murima ni miyaano mu elukuluku yincipale. . . . Nyenya mweeparipari, yaakhala ntoko wi kaaloca ni yoowo kiriki: ‘Osivela wanyu tahi otokweene wi mukaakhwanihe. Mukucho wa mwaninyu hiwaanceru wi owerye oxipiha soocheka saka.’” Wuupuwelela vooloca sa yamahala yeela etokweene ya mukucho, owo aapacerya woona wi Yehova aanamusivela yoowo. Hiyaano tho moorweela wa wuupuwelela mukucho yoola, nnahaala woona wi Yehova onnanisivela nave tho wi owo onnaneemererya.

18. Tiheeni nnaphwanelaahu ororomela wakhala wi nootitelela omusivelaka Tiithi ahu a wirimu?

¹⁸ Eparipari wi, naamwi mwiilipixeryaka opharihela soothene noonnaahu mmwaha yoola, ti yawooneya wi ikwaha ikina munamwiisoonaka okhala oothanana ni okhwa minikwa weemererya wa Yehova. Wakhala wi eyo yoheereya muupuwele wi Yehova onaweemererya “yaale anatitelela omusivela Yoowo.” (Tiy. 1:12) Mwawiihiiha, mutitelele omwaacamelaxa Yehova nave mweererye woona mikhalelo soothene owo onooniheryeiye wi onnaweemereryaani. Nave muhirwe mucuwale wi Yehova “hari ocai wa mmoha ti mmoha a hiyo.”—Saw. 17:27.