1-2. (1) Paulo aari mmukhalelo taani vaavaa aarepenleiye Aefesu ekaarata nave ntakhara heeni aarepenleiye? (2) Makoho taani nnahaalaahu othokororya?

 VAAVAA aareiye mukariposo o Roma, Murummwa Paulo aanachuna waalipiha asinthamwene awe a mu nroromeloni. Owo haawerya waaxekurya, mwawiihiiha aanaarepela ikaarata. Owo aahirepa seiha wa Aefesu variyari va eyaakha ya 60 naari 61 E.K.—Aefesu 1:1; 4:1.

² Variyari va iyaakha khumi, Paulo aahimaliha elukuluku o Efesu alaleeryaka ni ahusihaka michaka saphaama. (Saw. 19:1, 8-10; 20:20, 21) Owo aanaasivela vancipale annawe nave aanachuna waakhaviherya otitelela okhala ororomeleya wa Yehova. Ntakhara heeni Paulo aarepenleiye Akristu vooloca sa epiiphi ni omwaleela? Nihuseryo taani Akristu oothene anahuseryaaya wa ekano yeela? Hankooni nthokororye maakhulo a makoho yaala.

OVINYA MWEEPIIPHINI OYA MU OMWALEELA

3. Olikanyiha taani Paulo aapharihenleiye mu ekaarata awe wa Aefesu?

³ Paulo aahaarepela Akristu o Efesu: “Khalai mwaari epiiphi, nto vano mwa omwaleela.” (Aef. 5:8) Paulo aahipharihela masu yaala awi epiiphi ni omwaleela wi ooniherye mukhalelo a Efesu yaatoroken’yaaya. Nnahaala othokororoya ntakhara heeni Paulo aalonceiye wi Aefesu ‘khalai yaari epiiphi.’

4. Mmukhalelo taani Aefesu yaaryaaya mu epiiphi mmalapelo?

⁴ Epiiphi mmalapelo. Ehaakumve ohuserya eparipari ni okhala Akristu, Aefesu yaawo Paulo aarepenleiye yaari akapuro a miruku sawootha sa malapelo ni onamulosiwe. Mu muceche wo Efesu yaahikhalawo empa ya muluku oosuweliwa Artemis, yoowo achu a ilukuluku sakhalai yaamoonaaya ntoko emoha ya ichu sootikhiniha thanu napiili sa veelaponi. Achu yaalapela  mwemmo yaathipelen’ye pahiru mu soophwaniherya. Opakiwa ni okulihiwa mapuro a malapelo a muluku a mwaamuthiyana Artimis aari nakoso aaruuha ikhorowa. (Saw. 19:23-27) Mwawaaceererya, epooma yaatepa osuweliwa nthowa na masica.—Saw. 19:19.

5. Mmukhalelo taani Aefesu yaaryaaya mu epiiphi mmeecelo?

⁵ Meecelo eepiiphi. Achu o Efesu meecelo aya yaari oonanara nave hiyuuliwano muru. Ochekula wa wuuliha muru waari wawunlaana owiriyanawa mu mathatelo a epooma nave tho ophiyerya mu ifesta sa malapelo. (Aef. 5:3) Ancipale yaakhala weiwo yaari “eyelenle makhalelo oothene aphaama,” masu yaawo anataphulela “ohiya woona wiicela.” (Aef. 4:17-19) Ehakumve ohuserya yeeyo yaari yeeparipari naari yeeyo yaari yoonanara, Aefesu hiyoona wiicela wa yawuupuxerya-ya-murima aya naari wuupuwela wi yaahikhalano nthowa vyakala vamithoni va Yehova. Paulo anwerya orepa wi yaari ntoko wi “mupuwelo aya ori mweepiiphi nave aarakamelana ni okumi onarwa wa Muluku.”

6. Ntakhara heeni Paulo aanwerya oloca wi vano Aefesu yaari ntoko “omwaleela”?

⁶ Aefesu akina, hiyaatitelenle okhala mu epiiphi. Paulo oorepa wi awo vano yaari “omwaleela mwawiiwanana ni Apwiya.” (Aef. 5:8) Awo vano yaanakhala mwawiiwanana ni masu a Yehova, yeeyo yaari ntoko omwaleela yoowo waahoolela. (Sal. 119:105) Aefesu yaala yaahihiya sawera saya satheru sa malapelo ni meecelo aya oonanara. Awo yaahikhala “oomutakiherya Muluku” nave yaanapaka owetha waya wi emulapele Yehova ni omuhakalaliha.—Aef. 5:1.

7. Ti mwawiihai mukhalelo ahu onalikanaaya ni wa Akristu ancipale o Efesu?

⁷ Mmukhalelo mmohamoha, nihaakumve ohuserya eparipari, naari mu ephiiphi ya malapelo ni meecelo. Akina a hiyaano naanachapela ifesta sa malapelo; akina a hiyaano tho naanachariha mukhalelo wa meecelo oonanara. Nyenya vaavaa nihusenryaahu malakiheryo a Yehova vooloca sa yaphaama ni yoonanara noopaka matorokelo. Naahipacerya opharihela okumi ahu mwawiiwanana ni yookhwela awe. Nave ntoko yookhumelela ninnapuha  mareeliho mancipale. (Yes. 48:17) Vano, ninnahoolela makacamiho ootitelela. Nnaphwanela okhala ocai wa epiiphi yeeyo nihin’yaahu muculi ni “otitelela weeca ntoko anamwane a omwaleela.” Nni neereno hai?

MUSEPE EPIIPHI

8. Mwawiiwanana ni Aefesu 5:3-5, tiheeni Aefesu yaaphwanelaaya opaka?

⁸ Mwaalakhanye Aefesu 5:3-5. Wi ekhale ocai wa epiiphi ya meecelo, Akristu o Efesu yaaphwanela otitelela okhooca meecelo yaawo yahaamuhakalaliha Yehova. Eyo yaaphitaanyerya ohiya pahiru opaka ocapaheya nyenya malocelo awuuliha muru. Paulo aahiwuupuxerya a Efesu wi yaanaphwanela osepa ichu sene seiha wakhala wi annachuna okhalano “makupa mu yoohiyeriwa mu omwene wa Kritstu ni wa Muluku.”

9. Ntakhara heeni nnaphwanelaahu okhooca yaweeha vyakala ya ocapaheya?

⁹ Nnaphwanela tho otitelela owaniha ntakhara “miteko ihinavaha sawiima seiyo iri sa epiiphi.” (Aef. 5:11) Eparipari wi vaavaa muchu onooneiye, oniiweiye naari oloca ichu seiho sooriipiheya naari meecelo oonanara, onnakhala wookhweya weera yeeyo eri yoonanara. (Map. 3:6; Tiy. 1:14, 15) Mu elapo emoha, anna ancipale yaanakhala “asinthamwene” mu nikhuuru na ochekulela mu interneti. Ancipale a yaawo yaapaceriha ochekulela waya elocaka ichu soomunepani. Nyenya vakhaani-vakhaani, awo yaapacerya oloca ichu seiho saahimuhakalaliha Yehova. Vano ochekula waya waari vooloca sa ocapaheya. Ancipale a anna yaala ohoolo waya yaahoona wi ochekulela yoola wooripiheya waahiweeriha opaka ocapaheya.

10. Ti mwawiihai Satana oneereryeiye oniwoka? (Aefesu 5:6)

¹⁰ Elapo ya Satana enachuna oniwoka, oneeriha weemererya wi yeeyo Yehova onaloceiye vooloca sa meecelo oonanara ni ooriipiheya tahi echu yoonanara. (2 Pet. 2:19) Eyo henantikhiniha! Mmoha wa miraakho seiyo Musaserya onaphariheleiye opacerya khalai, ori waavirikanya achu wi awo ehiweryeke wiiwexexa yeeyo eri yaphaama ni yeeyo eri yoonanara. (Yes. 5:20; 2 Ako. 4:4) Tahi yootikhiniha wi ixilema, aprokrama a mu televisau ni isaaiti sinnaruuhela miruku seiho sihiniiwanana ni malakiheryo awookololowa a Yehova! Satana onachuna oneeriha wuupuwela wi meerelo ooriipiheya ni mukhalelo wa okumi woocapaheya yoowo ori wawunlaana mu elapo yeela tahi yoonanara, nyenya ti yoochekuleleya ni okhapeleleya.—Mwaalakhanye Aefesu 5:6.

11. Ti mwawiihai yaweereya ya Anxela enooniheryaaya ochuneya waya opharihela ekano enaphwanyeya mu Aefesu 5:7? (Moone tho eruku.)

¹¹ Satana onachuna wi nikhaleke vamoha ni achu yaawo anahaala oneeriha okhala woovila wa hiyaano ochara malakiheryo a Yehova. Mwawiihiiha, Paulo aahaaceenyerya Aefesu: “Muhuukeno ichu seiya ni yaawo,” ela tiwi, aneera yeeyo eri yoonanara vamiithoni va Muluku. (Aef. 5:7) Nnaphwanela wuupuwelela wi waataana wahu honakwateleleya ni yaale nnakhalahuno vamoha. Mwawiihiiha, nnaphwanela okhalano ekaasoope waapwaha Aefesu, nthowa nawi mmahiku ahu yaala nnanwerya omaliha elukuluku ni achu ohiya pahiru ethoi ni ethoi, nyenya tho mu ochekula wa mu interneti. Anxela, a yoowo onakhala o Asiya, ohoona wi makhuuru a mu interneti ananwerya okhala awoopiha. Owo onneemererya: “Onanwerya okhala muraakho, yeerihaka vakhaani-vakhaani otoroka muupuwelo. Yaaphiyerya elukuluku yeeyo kaahoonelaakavo echu okhala ni ‘asinthamwene’ yaawo yaahicicimiha malakiheryo a Mpiipiliyani. Mwawiihiiha, kaahipacerya wuupuwela wi hinaari  nikacamiho okhalano mukhalelo wa okumi yoowo ohinamuhakalaliha Yehova.” Moohakalaliha, atokweene oosivela yaamukhaviherya Anxela opaka matorokelo ookhweleya. Owo ooloca: “Vano kinnasareiha muupuwelo aka ni ichu soomunepani ohiya ni sa mmakhuuru a mu interneti.”

12. Tiheeni enahaala onikhaviherya okhapelela malakiheryo vooloca sa yeeyo eri yaphaama ni yeeyo eri yoonanara wa Yehova?

¹² Nnaphwanela owaniha ni muupuwelo wa elapo yeela wawi meecelo oocapaheya taweemereryeya. Hiyaano noosuwela wi ti yoonanara. (Aef. 4:19, 20) Ti waphaama wiikoha: ‘Apwanne kinnakhalano ephoole ya waapaka asinthamwene oohichuneya ntoko asinthamwene oomutekoni, ooxikola naari mano asinthamwene akinaaku yaawo ahinacicimiha malamulo awookololowa a Yehova? Apwanne kinnaakiha moolipa murima malakiheryo a Yehova, naamwi akina ekiichanaka ntoko mulolo mu weerano yeeyo?’ Ntoko etharihiwaaya mu 2 Timotiyu 2:20-22, nnaphwanela tho okhalano ekaasoope vaavaa nnaathanlaahu asinthamwene awaacameleya mpuwa mwa muloko Weekristu. Nnaphwanela wuupuwela wi akina akhweya hewerya onikhaviherya otitelela okhala oororomeleya mmuteko ahu wa Yehova.

MWEECEKE “NTOKO ANAMWANE A OMWALEELA”

13. Enataphulela eheeni ‘otitelela weeca ntoko anamwane a omwaleela?’ (Aefesu 5:7-9)

¹³ Paulo aahaaceenyerya tho Akristu o Efesu ohiya pahiru okhooca ichu sa mweepiphi, nyenya tho ‘otitelela weecaka ntoko anamwene a omwaleela.’ (Mwaalakhanye Aefesu 5:7-9.) Eyo enataphulela eheeni? Wi nikhweihe, eyo enataphulela okhala awiisuumaaliha ntoko Akristu eeparipari mu ilukuluku soothene. Mukhalelo mmoha wa waakhwaniherya yeela ori omwaalakhanya ni omuhuserya phaama Piipiliya vamoha ni soolaleeryiwa sahu seiho inathipeleya Mpiipiliyani. Ti yaphaama ni yoochuneyaxa okhala oowiriyana yootakiherya ni mahusiheryo a Yesu Kristu, “ekamaama ya elapo.”—Yoh. 8:12; Mas. 6:23.

14. Ti mwawiihai munepa waweela onahaalaaya onikhaviherya?

¹⁴ Nave tho ninnachuna nikhaviheryo na munepa waweela wa Muluku wi niwerye otitelela weeca “ntoko anamwane a omwaleela.”  Ntakhara heeni? Nthowa nawi tahi wookhweya otitelela okhala aweela mu elapo yeela yoonanara. (1 Ate. 4:3-5, 7, 8) Munepa waweela onanwerya onikhaviherya owaniha ni muupuwelo wa elapo, ophitaanyerya afilosofiya ni miyoonelo seiho ihiniiwanana ni muupuwelo wa Muluku. Munepa waweela tho onanwerya onikhaviherya winnuwiha ‘eri yoothene yaphaama ni yawookololowa.’—Aef. 5:9.

15. Mmukhalelo taani nnahaalaahu waakhela munepa waweela? (Aefesu 5:19, 20)

¹⁵ Mukhalelo mmoha wa waakhela munepa waweela ori ovekela ntakhara yoowo. Yesu aahiloca wi Yehova ‘onahaala waavaha munepa waweela yaale anamveka.’ (Luka 11:13) Nave vaavaa nnamvuwihaahu Yehova vamoha mmithukumano Seekristu, ninnaakhela tho munepa waweela. (Mwaalakhanye Aefesu 5:19, 20.) Ovolowela waphaama yoowo munepa wa Muluku oryaayano mwa hiyaano, onahaala onikhaviherya okhalaka mmukhalelo yoowo onamuhakalaliha Muluku.

16. Tiheeni enahaala onikhaviherya opaka yoolakelela mwa miruku? (Aefesu 5:10, 17)

¹⁶ Vaava nnakhalahuno soolakelela soochuneya wi nipake, ti woochuneya wiiwexexa “tiivi eri yookhwela ya Yehova” nave voocharela neereno mwawiiwanana ni yeeyo. (Mwaalakhanye Aefesu 5:10, 17.) Vaavaa nnaphwanyaahu malakiheryo a Mpiipiliyani yaawo anaphariheleya muteko wa mukhalelo nikhanlaahu, mweeparipari, ninnaavya muupuwelo wa Muluku vooloca sa mwaha yoowo. Mwawiihiiha, vaavaa nnapharihelaahu malakiheryo awe, mweeparipari nnahaala opaka soolakelela saphaama.

17. Tiheeni enavolowelavo opharihela elukuluku ahu mwa miruku? (Aefesu 5:15, 16) (Moone tho eruku.)

¹⁷ Paulo tho aahaavaha ekano Akristu o Efesu ya opharihela mwa miruku elukuluku aya. (Mwaalakhanye Aefesu 5:15, 16.) “Mulipa oonanara owo,” mwiicani ahu Satana, onachuna wi nikhale ooweiwaxa ni miteko sa elapo yeela ohiya okhala ooweiwa mmuteko ahu wa Muluku. (1 Yohani 5:19) Mukristu aanwerya  opacerya otikitheryeya mu muhakhu, ohuserya wavasulu naari mmuteko, ohiyana mu ikari sincipale sa omurumeela Yehova. Wakhala wi owo oheerano yeeyo, aahaala wooniherya wi onnapacerya wuupuwela ntoko achu a elapo. Ti yaawooneya wi ichu seiha tahi soonanara wa hiyaano, nyenya ihirwe ikhale mu nipuro noopaceya mu okumi ahu. Wi neece “ntoko anamwane a omwaleela” ‘nnaphwanela opharihelaka phaama elukuluku [ahu]’ niilipixeryaka weerano yeeyo eri yookhweleya.

18. Tiheeni Tonaltu enreiye wi apharihele phaama elukuluku awe?

¹⁸ Mwaavyeke ekari eri yoothene wi mmurumeele Yehova mwawookololowa. Ti yeeyo enreiyeno Tonaltu yoowo onakhala o Afrika tu Suli. Owo ooloca: “Kaahivarerya mukhalelo aka nave kaahivekela wa Yehova wi akikhaviherye opaka sincipale mmuteko woolaleerya. Kaahivekela wi kikhaleno muteko yoowo waahaala okeemererya okhalakano elukuluku yincipale ya olaleerya. Nnikhaviheryo na Yehova kaahiphwanya muteko woophwanelela. Mwaaraka ni miyaano naahipacerya orumeela mmuteko wa elukuluku yoothene vamoha.”

19. Ti mwawiihai nnahaalaahu otitelela weeca “ntoko anamwane a omwaleela”?

¹⁹ Ekaarata ya Murummwa Paulo wa Aefesu ti yaawooneya wi yaahaakhaviherya otitelela okhala oororomeleya wa Yehova. Nave tho ekano yeela yooveereliwa enanwerya onikhaviherya. Ntoko nihusenryaahu, enanwerya onikhaviherya othanla mathatelo ahu ni asinthamwene ahu mwa miruku. Eyo enanwerya onceenyerya otitelela omuhuserya Piipiliya moohihiyererya, wi omwaleela weeparipari otitelele onihoolela mu ichu soothene seiho nneeraahu. Nave onnaceenyerya ochuneya waya munepa waweela, wi onanwerya wunnuwiha mikhalelo saphaama wa hiyaano. Opharihela yeeyo Murummwa Paulo orempeiye onahaala onikhaviherya opaka soolakelela saphaama, seiho iri mwawiiwanana ni muupuwelo wa Yehova. Naaneerano ichu seiha, nnanwerya osepa epiiphi ya elapo yeela ni otitelela okhala mu omwaleela!