1-2. Mareeliho taani muchu onakhaleiyeno amanle opatisiwa?

 NINNAHAKALALA vaavaa nnapatisiwaahu ni opaka makupa mu emusi ya Yehova. Yaale erino ekari ene yeela, enamweemererya masu a mulipa oomurepa salmu Tavite, yaawo alonceiye wi: “Ooreeriwa muchu yoowo munamuthanlaanyu, mmuruuha wi akhaleke mpa mwanyu vamoha ni nyuwo [Yehova].”—Sal. 65:4, PMM.

² Yehova hanamwiichanela muchu vyakala mpa mwawe. Ntoko ethokororyiwaaya mmwaha ovirale, owo onawaacamela yaale anooniherya wi annachuna okhalano onthamwene wawaacameleya ni Yoowo. (Tiy. 4:8) Vaavaa nyuwaano muniiveleelaanyu wa Yehova ni opatisiwa, munnamwaacamela Yehova mmukhalelo wa vameekhaaya. Munanwerya ororomela wi, ovinyerya vaavaa, owo ‘onamooyeeheryaani mareeliho, ophiyerya tho esareye moopwahaxa.’—Mal. 3:10; Yer. 17:7, 8.

3. Akristu awiiveleela ni oopatisiwa, murici taani aryaayano woochuneya? (Eklesiyaste 5:4, 5)

³ Opatiso mapacereryo a okumi anyu ntakhara Yehova. Mmanle weerano yeela, nyuwaano munanwerya opaka owetha wanyu wi mukhaleke mwawiiwanana ni nlakano nanyu na wiiveleela, naamwi mu ilukuluku sa saweeha naari weereryiwa nroromelo. (Mwaalakhanye Eklesiyaste 5:4, 5.) Ntoko oohuserya a Yesu, nyuwaano munahaala ochariha yootakiherya ni malamulo a Yesu moohihiyererya. (Mat. 28:19, 20; 1 Pet. 2:21) Mwaha yoola onahaala wookhaviheryaani weerano yeeyo.

‘MUTITELELE OMUCHARA’ YESU MOOHIPWACHA SAWEEHA

4. Mmukhalelo taani oohuserya a Yesu anateexaaya ‘mwiri woohooxiwavo’? (Luka 9:23)

⁴ Muhuupuwele wi mmanle opatisiwa, okumi anyu onahaala okhala wookhweya. Mweeparipari, Yesu oohiya mookwakwaleya  wi oohuserya awe yaahaala oteexa ‘mwiri woohooxiwavo’. Mweeparipari, awo yaahaala weerakano “nihiku ti nihiku.” (Mwaalakhanye Luka 9:23.) Apwanne Yesu aaloca wi oomuchara awe yaahaala ohooxeyaka ilukuluku soothene? Hooye. Owo pahiru aaceenyerya wi, ohiya mareeliho yaawo yaahaalaaya okhalano, awo tho yaahaala ohoolela makacamiho. Makacamiho makina ananwerya okhala awiicelaxa.—2 Tim. 3:12.

5. Mareeliho taani Yesu ororomelinheiye wa yaale aniilipixerya?

⁵ Akhweya nyuwaano moohoolela waakaahiwa wa achu a emusi anyu, naari wi mohiilipixerya wi muhiye ichu ikina soomwiilini ntoko waavya muhakhu wi mukuhe mu nipuro noopacerya Omwene wa Muluku. (Mat. 6:33) Wakhala wi ti hiihaa, Yehova oosuwela soothene moonihenryaanyu mmuteko awe. (Ahe. 6:10) Mwawooneya, nyuwaano moolawiha masu eeparipari a Yesu awi: “haavo ohin’ye empa awe, naari asinnawe, naari arokorawe, naari amama awe, naari apapa awe, naari anamwane awe, naari imaca sawe, vanthowa naka ni vanthowa na michaka saphaama oni ahaakhele opwaha ikwaha nsana hiihaano, mu elukuluku yeela, ipa, asinnawe, arokorawe, asimamaawe, anamwanaawe, imaca sawe, ni wiikariwa, nave muhoolo, ekumi yoohimala.” (Mar. 10:29, 30) Mareeliho yaawo munaakhelaanyu matokweenexa ni eeparipari opwaha wiilipixerya yoowo mwaapakaanyu.—Sal. 37:4.

6. Ntakhara heeni nyuwaano munnachuna otitelela owaniha ni “soochunachuna sa mwiili” mmanle opatisiwa?

⁶ Nyuwaano munaphwanela owaniha ntakhara “soochunachuna sa mwiili” mmanle opatisiwa. (1 Yoh. 2:16) Eyo enneereya woona wi nyuwaano mwa muchu oohiphaameya. Ikwaha ikina munamwiisoona hiiha ntoko murummwa Paulo. Owo oorepa: “Miyaano chiryene kinnahakalalela nlamulo na Muluku mwawiiwanana ni omuchu wa mpuwa mwaka, nyenya kinnoona mmwiilini mwaaka nlamulo nikina niwanaka ni nlamulo na mmuupuweloni mwaka, nave nikikerihaka wookapuroni wa nlamulo na yoocheka nenlo nri mmwiilini mwaka.” (Aro. 7:22, 23) Nyuwaano munamwiisoona okhala ooceecheya nthowa na mathitimanelo anyu a yoocheka. Mwawiihiiha, wuupuwelela soororomeliha mpankaanyu ntakhara Yehova vaavaa mwiiveleenlaanyu wa yene, enahaala olipiha yoolakelela anyu ya otitelela ovilela saweeha. Mweeparipari nlakano nanyu na wiiveleela nnamukhweiha okumi anyu vaavaa munahoolelaanyu saweeha. Mwawiihai?

7. Ti mwawiihai wiiveleela wa Yehova, onahaalaaya wookhaviheryaani otitelela okhala oororomeleya wa yoowo?

⁷ Vaavaa muniiveleelaanyu wa Yehova, nyuwaano munniikhooca mukhatiinyu. Eyo enataphulela wi nyuwaano munnathanla okhooca soochunachuna ni soolakelela sanyu seiho saahaala omuhiciha Yehova. (Mat. 16:24) Mwawiihiiha, vaavaa munahoolelaanyu yaweeha, himuchuna omaliha elukuluku yincipale muupuwelelaka echu yaweera. Muni mweereke mulakelenle woosiilo ene yeeyo munahaalaanyu weera—wi mutitelele okhala oororomeleya. Nyuwaano munamutitelela okhala oolipa ni yoolakelela ya omuhakalaliha Yehova. Mmukhalelo yoowo, munamukhala ntoko Yupu. Naamwi aahoolenle saweeha soovilaxa, owo aaheemererya sookhumelela sene: “Nkirwa kihiya ororomeleya waka!”—Yupu 27:5.

8. Ti mwawiihai wuupuwelela nivekelo nanyu na wiiveleela nnanwerya wookhaviheryaani ovootha yaweeha?

⁸ Muupuwelelaka vooloca sa nivekelo nanyu na wiiveleela wa Yehova, nyuwaano munanwerya ophwanya ikuru wi nwerye ovilela mu yaweeha eri yoothene. Ntoko yootakiherya, apwanne mwaampacerya omooseelela mwaara a mwaneene? Mweeparipari hooye! Moopaka nlakano ni Yehova wi himwaahaala weerano echu ntoko yeeyo. Mwawiihiiha, nyuwaano munamoopowa wa makacamiho yaawo mwaahaalaanyu ohoolela ni miyoonelo soohiphwanelela imanle iho otikitheryeya. Munahaala ‘orapela’ “ephiro ya oonanara murima.”—Mas. 4:14, 15.

9. Ti mwawiihai wuupuwelela nivekelo nanyu na wiiveleela onamookhaviheryaani tho okuha mu nipuro noopacerya miteko soomunepani?

 ⁹ Hanka wakhala wi muchu mukina ohoovahaani muteko yoowo waahaala owooceelihakaani ophiya mmithukumano Seekristu moohihiyererya? Mwahaala osuwela echu yaweera. Ehaakumve opakiwa yoovaha eyo, nyuwaano mwaari oolakelela oheemererya muteko yoowo waahaala owaakanyeryaani ohipaka makupa mmithukumano. Mwawiihiiha, himwaavyaavya osuwela wakhala wi moopaka yoothanla yoonanara munamukhumelela phaama. Wuupuwelela yootakiherya ya Yesu enanwerya onikhaviherya, owo aari oolakelela omuhakalaliha Tiithi awe, hiihaa ntoko Yesu, mukhale oolakelela omwiiwelela Muluku wa yoowo mwiiveleenlaanyu.—Mat. 4:10; Yoh. 8:29.

10. Ti mwawiihai Yehova onahaaleiye wookhaviheryaani “otitelela omuchara” Yesu mmanle opatisiwa?

¹⁰ Eparipari ti yawi, saweeha sinnoovahaani ekari yawooniherya wi muri oolakelela “otitelela omuchara” Yesu. Va weerano yeela, munaphwanela ororomela wi Yehova onamookhaviheryaani. Piipiliya onii: “Muluku toororomeleya, owo hoohiyaani wi mweehiwe opwaha munaweryelaanyuvo; nyenya mwakumanano yaweeha, owo onamookhaviheryaani wi nwerye ovilela.”—1 Ako. 10:13.

TIHEENI MUNAPHWANELAANYU WEERA WI MUTITELELE OMUCHARA YESU?

11. Tuuvi ori mukhalelo mmoha waphaama wa otitelela omucharaka Yesu? (Moone tho eruku.)

¹¹ Yesu aari amvai nave aanatitelela okhala awaacameleya wa Yehova moorweela wa nivekelo. (Luka 6:12) Mweeparipari, mukhalelo mmoha waphaamaxa wa mikhalelo sinahaala wookhaviheryaani otitelela omuchara Yesu mmanle opatisiwa, ori winnuwiha opaka ichu seiho inahaala owaacamelihaani wa Yehova. Piipiliya onii: “Moohipwacha oya wahu vahoolo, nititelele ochara meecelo yaala mamohamoha.” (Afi. 3:16) Wiiliwiili, nyuwaano munahaala wiiwaka saweereya  sa anna ni arokora yaawo yaalakelenle opaka sincipale mmuteko aya wa Yehova. Akhweya awo yaahivolowa mu Exikola ya Alaleeryi a Omwene naari othaamela weiwo waariwo othowa otokweene. Waakhanle wi mikhalelo sanyu sinnaweemereryaani, ela yoolakelela yaphaama munaphwanelaanyu okhalano. Achu a Yehova annaavyaavya mikhalelo wi yaacererye muteko aya woolaleerya. (Saw. 16:9) Hanka wakhala wi nyuwaano hiihaano hamunawerya weerano yeeyo? Muhuupuwele wi nyuwaano muri oohiphwanelela. Echu eri yoochuneya, eri wi nyuwaano mutitelele ovilela. (Mat. 10:22) Muhicuwale ovaha esisapo ya omurumeela Yehova mwawiiwanana ni mavyakelo anyu ni mikhalelo sanyu. Ola mukhalelo mmoha woochuneya wi mutitelele omuchara Yesu mmanle opatisiwa.—Sal. 26:1.

12-13. Ti heeni nyuwaano munaphwanelaanyu weera wakhala wi mohoona wi mvai anyu woopacerya ovukuwa? (1 Akorintu 9:16, 17) (Moone tho ekaaxa “ Mutitelele mu Ochimaka.”)

¹² Tiheeni munaphwanelaanyu weera wakhala wi mohoona wi hamunavekela okhumela vathi va murima, naari wi hamunasiveliwa ni muteko woolaleerya ntoko mweerelaanyu khalai? Hanka wakhala wi hamunasiveliwa omwaalakhanya Piipiliya ntoko mweerelaanyu khalai? Wakhala wi mikhalelo seiha sohunnuwa mmanle opatisiwa, muhiphiyerye makuchuwelo wi nyuwaano mooyeleela munepa wa Yehova. Ntoko muchu oohiphaameya, Muupuwelo anyu onanwerya otorokeya moovira wa elukuluku. Wakhala wi mvai anyu woopacerya ovukuwa, muupuwele vooloca sa yootakiherya ya murummwa Paulo. Naamwi eereryaka omutakiherya Yesu, Paulo aanasuwela wi, ikwaha ikina, haahaala okhalano nchuno noolipa na opaka yeeyo aachuneiye weera. (Mwaalakhanye 1 Akorintu 9:16, 17.) Owo ooloca: “Naamwi keenreno moohilakelela, naamwi hiiha kohinnyereryiwa murici.” Mmasu makina, Paulo aari oolakelela waakhwaniherya muteko awe woolaleerya moohipwacha mukhalelo aahaaleiye wiisoona mu elukuluku yeeyo.

 ¹³ Mmukhalelo mmohamoha, muheemererye wi miyoonelo sanyu soohiphaameya soopakiheeni soolakelela ntakhara nyuwaano. Mukhale oolakelela weera yeeyo eri yaphaama, moohipwacha mwaahichunne weerano yeeyo. Wakhala wi nyuwaano mootitelela weerano yeeyo eri yaphaama, moovira wa elukuluku miyoonelo sanyu inanwerya otorokeya. Mmukhalelo vyakala, okhalano muupuwelo waphaama woomunepani onamookhaviheryaani otitelela omuchara Yesu mmanle opatisiwa. Vaavaa anna ni arokora anyu enahaalaaya woona ovilela wanyu mu omurumeela Yehova, awo enamulipiheya.—1 Ate. 5:11.

“MUTITELELE WIIVARERYA . . . MUTITELELE WIISAALIKHELA”

14. Tiheeni nyuwaano munaphwanelaanyu waalikhelaka moohihiyererya, nave ntakhara heeni? (2 Akorintu 13:5)

¹⁴ Nave tho enamukhala yaphaama wa nyuwaano mmanle opatisiwa wiisaalikhelaka moohihiyererya. (Mwaalakhanye 2 Akorintu 13:5.) Elukuluku yoothene, mwiivareryeleke mu okumi anyu ni sookhovelela wi moone waakhanle wi munnavekela nihiku ti nihiku, omwaalakhanya ni omuhuserya Piipiliya, opaka makupa mmithukumano ni mmuteko woolaleerya. Mweererye ophwanya ikari ni miphurelo wa miteko sene seiha. Ntoko yootakiherya, mwiipakele makoho ntoko ala: ‘Kinanwerya othariha mahusiheryo a Mpiipiliyani wa achu akina? Apwanne sookhalavo mikhalelo mikina saweeriha muteko aka okhala woohakalaliha? Apwanne mavekelo aka ooluluwanya ennooniherya omuroromela waka Yehova moomalela? Apwanne kinnapaka makupa mmithukumano Seekristu moohihiyererya? Kini kiwerye hai orehererya mukhalelo aka wa owiriyana ni opaka makupa mmithukumano?’

15-16. Tiheeni munahuseryaanyuvo ni yaweereya ya munna mmoha vooloca sa ovootha yaweeha?

¹⁵ Nyuwaano tho munamweerano phaama wiivareryela moororomeleya opwaha sooceecheiha sanyu. Munna awiichaniwa Ropertu ooloca yaweereya emoha yeeyo enooniherya epontu ene: “Vaavaa kaaryaakano iyaakha 20, miyaano kaakhalano muteko wa elukuluku ya vakhaani. Nihiku nimoha nimanle olapa, nthamwene aka oomutekoni a mwaamuthiyana aahikiwopa wi kiye owannyawe. Owo aahiloca wi naanwerya okhalawo mukhatiihu nave wi ‘nipake yeeyo nnachunaahu.’ Woopaceryani nkaakhoonce moolipa, nyenya wookuchulani kaahikhooca moolipa nave kaahimutharihela ntakhara heeni.” Ropertu aahivootha yaweeha yeele, nave eyo ti yoothamaleleya. Nyenya ohoolo waya aahuupuwela wa yeeyo yeeren’ye ni iiwexexa wi aaphwanela waakhulela mmukhalelo woohiyana. Owo onneemererya: “nkaakhonce moolipa naari mwawaakuveya hiihaa ntoko Yosefe eenreiye ni mwaara a Potifare. (Map. 39:7-9) Mweeparipari, kaahikhala oohaleeliheya ni mukhalelo waaryaaya woovila wa miyaano okhooca. Yaweereya yeeyo yookikhaviherya  woona wi kaanaphwanela olipiha onthamwene aka ni Yehova.”

¹⁶ Nyuwaano munanwerya ophuravo vaavaa muniivareryaanyu hiihaa ntoko Ropertu eenreiye. Naamwi nyuwaano nweryaka ovootha yaweeha, mwiikohe: ‘Ilukuluku kavi kimalinhaaka wi kikhooce?’ Wakhala wi nyuwaano munnoona makupa munaphwanelaanyu orehererya, muhiisoone okhala ooceecheya. Vano munaphwanela ohakalala vaavaa musuwenlaanyu yooceecheiha anyu. Mvekele wa Yehova vooloca sa yooceecheiha anyu, nave mpake ichu seiho sinahaala olipiha nchuno nayu na omwiiwelela yoowo.—Sal. 139:23, 24.

17. Ti mwawiihai nsina na Yehova naavoloweliwaaya mu yaweereya ya Ropertu?

¹⁷ Yookhalavo tho echu ekina nnahuseryaahu ni yaweereya ya Ropertu. Owo onnatitelela: “Kimanle okhooca nwopelo yoole wa nthamwene aka oomutekoni, owo ahi: ‘Nyuwaano moovootha yaweeha!’ Kaahimukoha yeeyo aachuneiye oloca. Owo aahiloca wi nthamwene aka, yoowo iiseera okhala Namoona a Yehova, aahikileela wi amiravo oothene a Anamoona a Yehova moovitheya ennapaka yeeyo eri yoonanara wakhala wi aakhalano ekari ene yeeyo. Aahikileela wi owo aahimuleela nthamwene awe wi aahaala okeeha miyaano. Kaahiiwexexa mukhalelo kaaryaaka oohakalala osuwela wi kaahicicimiha nsina na Yehova.”

18. Vano tiheeni mulakelenlaanyu weera mmanle opatisiwa? (Moone tho ekaaxa “ Yaweereya Yeeyo Munahaalaanyu Osiveliwano.”)

¹⁸ Vaavaa nyuwaano muniiveleelaanyu wa Yehova ni opatisiwa, nyuwaano munooniherya wi munnachuna weeliha nsina nawe, moohipwacha yeeyo enahaala weereya. Nyuwaano munaphwanela ororomela wi Yehova oosuwela saweeha seiho munahoolelaanyu nave munavilelaanyu. Owo onamureeliha wiilipixerya wanyu woothene wi mutitelele okhala oororomeleya. Mmuroromele Yehova, moorweela wa munepa awe waweela, owo onanwerya woovahaani ikuru wi nwerye weerano. (Luka 11:11-13) Nnikhaviheryo na Yehova, nyuwaano munanwerya otitelela omucharaka Yesu mmanle opatisiwa.