1. Mareeliho taani makina nnapuhaahu vaavaa nnapakaahu makupa a marehereryo a Yehova?

 NINNAREELIHIWA mweeparipari moorweela wa opaka makupa mmarehereryo a Yehova variyari va mahiku yaala ookuchula ni oovila. Ovinyerya vaavaa mikhalelo sa elapo sinaamviraaya sinanaraka, Yehova onnanivahererya emusi yawiiwanana yoomunepani ya anna ni arokora. (Sal. 133:1) Owo onnanikhaviherya okhalano emusi yoohakalalihaxa ni yoolipa. (Aef. 5:33–6:1) Nave owo onnanivaha wiiwexexa ni miruku seiyo nnachunaahu wi nikhaleno murecele weeparipari wa mpuwa.

2. Tiheeni nnaphwanelaahu weera nave ntakhara heeni?

² Mwawiihiiha, nnaphwanela olapa mwakuru wi ntitelele omurumeelaka Yehova moororomeleya. Ntakhara heeni? Nthowa nawi ikwaha ikina nnanwerya onyeenyeya nthowa na ohiphaameya wa akina. Nave tho nnanwerya okhalano nikacamiho wa ovilela soohesa sahu, xaxaxa wakhala wi noopaka soocheka imohamoha mu ikwaha sincipale. Nnaphwanela ovilela mmuteko wa Yehova (1) vaavaa nthamwene a munroromelo onannyenyeiheiye, (2) vaavaa oothelana ahu onannyeenyeiheiye, ni (3) vaavaa nnakhalaahu oonyeenyeya wa hiyo mukhatiihu. Mwaha yoola, nnahaala othokororya mmoha ti mmoha wa mikhalelo seiya. Nave tho nnahaala othokorora yeeyo nnahuseryaahu ni yaweereya ya muchu oororomeleya yoowo onalociwa Mpiipiliyani.

MVILELE VAAVAA MUNNA ONOONYEENYEIHEIYENI

3. Makacamiho taani achu a Yehova anahoolelaaya?

³ Nikacamiho. Anna akina a munroromeloni ananwerya okhalano mukhalelo woomuchu yoowo onannyeenyeiha. Akina ananwerya opaka echu yeeyo enahaala oninyeenyeiha naari onikhaliha mmukhalelo woonanara. Yaawo tho arino murici woohoolela ananwerya tho ohesa. Mikhalelo seiha sinanweeriha akina okhwaaka minikwa  waakhanle wi ala marehereryo a Muluku. Ohiya otitelela omurumeelaka Muluku ni “murima mmoha” ni anna ni arokora, awo ananwerya omaala okhala vamoha ni yaale yaanyeenyeihale naari tho ophiyerya ohiya ophiya mmithukumano. (Sof. 3:9, PMM) Apwanne eyo ti yamiruku? Muthokororye yeeyo nnahaalaahu ohuserya ni yaweereya ya muchu yoowo onalociwa Mpiipiliyani aahoolenle makacamiho oolikana.

4. Nikacamiho taani murummwa Paulo aahoolenleiye?

⁴ Yootakiherya ya Mpiipiliyani. Paulo aanasuwela wi anna ni arokora awe yaari oohiphaameya. Ntoko yootakiherya, owo aahithorihiwa moonanara vaavaa aapacenryeiye okhala vamoha ni muloko. (Saw. 9:26) Voocharela, achu akina yaanamuloca mmukhalelo woonanara wi eweerihe akina oyeleela nroromelo wa yoowo. (2 Ako. 10:10) Paulo aahimoona munna yoowo aari muhooleli apakaka yoolakelela yoonanara yeeyo yaahaala oweeriha akina okwaculiwa. (Aka. 2:11, 12) Mmoha a asinthamwene awaacameleya a Paulo, awiichaniwa Marku, aahimunyeenyeiha vancipale. (Saw. 15:37, 38) Paulo aanwerya weemererya wi mikhalelo vyakala sa seiha simweerihe ohiya okhala vamoha ni yaawo yaamunyeenyeiha. Naamwiihiiha, owo aahititelela waavaha esisapo anna ni arokora awe nave aahititelela omurumeela Yehova moororomeleya. Tiheeni yaamukhavihenrye Paulo ovilela?

5. Tiheeni yaamukhavihenrye Paulo ohinyeenyeya ni anna ni arokora awe? (Akolose 3:13, 14) (Moone tho eruku.)

⁵ Paulo aanaasivela anna ni arokora awe. Osivela wa Paulo ntakhara akina waahimukhaviherya otikitheryeya ohiya mu ohiphaameya waya, nyenya mmikhalelo saya saphaama. Osivela tho waahimukhaviherya Paulo opaka yeeyo owo orempeiye, ntoko erempwaaya mu Akolose 3:13, 14. (Mwaalakhanye.) Moone mukhalelo Paulo aamulevelenleiye Marku. Naamwi Marku aamuchanwe Paulo variyari va mukwaha awe woopacerya woomisiyonaariyu, Paulo haatitelenle okhala oonyeenyeya. Ohoolo waya, vaavaa Paulo aarempeiye ekaarata yoolipiha wa muloko wo Kolose, owo aahimuthamalela Marku ntoko nthamwene amuteko oochuneya, “ehime ya nihakararyo.” (Ako. 4:10, 11) Vaavaa aareiye mukariposo o Roma, Paulo aahiveka mooluluwanya wi Marku arwe amukhaviherye. (2 Tim. 4:11) Ti yawooneya wi, Paulo haawivalaannye ni anna awe. Tiheeni nnahuseryaahu orweela wa Paulo?

6-7. Ti mwawiihai nnahaalaahu ovilela ni wooniherya osivela wa anna ni arokora ahu, moohipwacha ohiphaameya waya? (1 Yohani 4:7)

⁶ Nihusiheryo. Yehova onachuna wi nivileleke moorweela wa wooniherya osivela wa anna ni arokora ahu. (Mwaalakhanye 1 Yohani 4:7.) Vaavaa anna ni arokora ahu ahinanikhalihaaya mmukhalelo yoowo Mukristu aaphwaneleiye weera, nnaphwanela ororomela wi awo hiyaarino  yoolakelela ya onikwaculiha nave wi awo anneererya opaka yeeyo Yehova analoceiye wi eyo ti yaphaama. (Mas. 12:18) Muluku onnaasivela alapeli awe oororomeleya, moohipwacha ohiphaameya waya. Naamwi nipakaka soohesa, owo onnatitelela okhala nthamwene ahu nave hananyeenyeya ni hiyaano. (Sal. 103:9) Ti woochuneyaxa omutakiherya Tiithi ahu oolevelela!—Aef. 4:32–5:1.

⁷ Muupuwele tho wi, vaavaa makuchuwelo anaacamelaaya, ninnachuna otitelela okhala awaacameleya wa anna ni arokora ahu. Nnanwerya owehererya wi wiikariwa otepe. Ophiyerya tho wi nnanwerya okhala vamoha mukariposo nthowa na nroromelo nahu. Wakhala wi eyo yoheereya, nnamwaachuna anna ni arokora ahu opwaha khalai. (Mas. 17:17) Muthokororye yeeyo yeeren’ye ni Jose, a mutokweene a muloko yoowo onakhala o Espanya. Owo vamoha ni anna akina yaahiwaleliwa vamoha mukariposo nthowa na ohipaka makupa a elapo. Owo ooloca: “Mukariposo, oothene ahu naakhala vamoha, mwawiihiiha ikwaha ikina naananyeenyeihana. Mwa yeeyo naaphwanela olevelelanaka mukina ni mukhwaawe moomalela. Eyo yaahinikhaviherya otitelela okhala awiiwanana ni ookhapeleleya. Naarukureryiwe ni alipa oophariwa yaawo yahaamurumeela Yehova. Mu ekwaha emoha, kaahiphoreya nave nwono aka waahiipa, mwawiihiiha nkaawerya opaka ichu meekhaaka. Nyenya mmoha a asinnaka aahicapa soowara saka nave aahikikhapelela mmikhalelo sawooneya. Kaahoona osivela weeparipari yoowo kaachunaaka.” Chiryene nookhalano mathowa aphaama a orehererya makacamiho ahu wa mukina ni mukhwaawe hiihano!

MVILELE VAAVAA OOTHELANA ANYU ONOONYENYEIHEIYENI

8. Nikacamiho taani atheli anahoolelaaya?

⁸ Nikacamiho. Othela woothene onnakhalano makacamiho. Piipiliya onnacicimiherya wi achu yaawo eri atheli enamukhalano “sookacamiha mookumini.” (1 Ako. 7:28) Ntakhara heeni? Nthowa nawi mulopwana ni muthiyana toohiphaameya nave aakhalano mikhalelo ni ichu soohiyanahiyana seiyo sinaasivela ni sihinaasivela. Alipa oothelana ananwerya orweela mu sookhovelela ni mayareliwo oohiyanahiyana. Awo tho, moovira wa elukuluku ananwerya wooniherya mikhalelo seiho khalai ehaakumve othelana yahooniheryaaya. Mmukhalelo vyakala wa ichu seiha inanwerya oruuha ohiiwanana. Awo ananwerya okhupanyana mukina ni mukhwaawe wa makacamiho yaawo anakhumelela mu othela, naamwi oopiili ehesaka nave ephwanelaka wiilipixerya wi erehererye makacamiho aya. Ophiyerya wi awo ananwerya woonaka omwalamwala naari omwalana okhala ntoko mukhalelo mmoha wa oreherya makacamiho. Apwanne omwalamwala naari omwalana mukhalelo mmoha wa orehererya makacamiho? b Nnahaala ohuserya ni yaweereya ya muchu onalociwa Mpiipiliyani yoowo aavilenle ni makacamiho oovilaxa a moothelana.

9. Nikacamiho taani Apikayeli aahoolenleiye?

⁹ Yootakiherya ya Mpiipiliyani. Apikayeli owo aatheliwe ni Napali, yoowo Piipiliya onamuloceiye wi aari muchu oonanara murima ni oowali. (1 Sam. 25:3) Ti yawooneya wi waari woovila wa Apikayeli okhalaka ni mulopwana a mukhalelo yoola. Apwanne Apikayeli aahikhalano ekari ya omaliha othela wawe? Owo aahikhalano ekari yeela vaavaa Tavite mwene oocharela o Isarayeli, aayeiye omwiipha iyawe moorweela wa omuruwana vamoha ni alopwana awe. (1 Sam. 25:9-13) Akhweya Apikayeli aanwerya ochawa, amvahaka ekari Tavite wi amwiiphe Napali. Ohiya yeeyo, owo aahimuthikirerya Tavite nave amulekecha wi ahimwiiphe Napali. (1 Sam. 25:23-27) Tiheeni yaamuceenyenrye weerano yeeyo?

10. Tiheeni xaxaxa yaamuceenyenrye Apikayeli ovilela mu othela yoowo waari woowalamela?

 ¹⁰ Apikayeli aanamusivela Yehova nave aanacicimiherya malakihero avasulu vooloca sa othela. Moohikhwa minikwa owo aanuupuwelela yeeyo Muluku aalonceiye wa Atamu ni Eva, vaavaa owo aatikithenryeiye othela woopacerya. (Map. 2:24) Apikayeli aanasuwela wi Yehova oona marehereryo a othela ntoko avameekhaaya. Owo aachuna omuhakalaliha Muluku, nave eyo yaahimuceenyerya opaka yeeyo aaweryeiye wi aavuluxe achu avaate vawe, ophitaanyerya aiyawe. Owo aaheeravo echu mwawaakuveya wi eerihe wi Tavite ahimwiiphe Napali. Nave owo tho aari ooreheryeya oveka nikhurumuwelo wa yoocheka yeeyo aahipankeiye. Mweeparipari, Yehova aanamusivela muthiyana yoola oolipa murima ni a ikharari. Tiheeni athiyana atheliwe ni alopwana athenle anahuseryaaya ni yootakiherya awe?

11. (1) Tiheeni Yehova onaweheryeiye wa achu ethelanne? (Aefesu 5:33) (2) Tiheeni nyuwaano muhusenryaanyu mmukhalelo Karmeni iilipixenryeiye wi avuluxe othela wawe? (Moone tho eruku.)

¹¹ Nihusiheryo. Yehova onnavaha ohoolela wa achu athelanne wi ecicimiheke marehereryo a othela, naamwi okhalaka woovila okhala vamoha ni mmoha a oothelana ahu. Yehova onnakhala oohakalala vancipale vaavaa onawooneiye achu athelanne yiilipixeryaka vancipale wi erehererye makacamiho aya ni wooniherya osivela, ncicimiho ni ikharari wa mukina ni mukhwaawe. (Mwaalakhanye Aefesu 5:33.) Moone yootakiherya ya Karmeni. Sivinre iyaakha thanu nammoha ohoolo waya emanle othelana, Karmeni aapacerya omuhuserya Piipiliya ni Anamoona a Yehova nave ohoolo waya aahipatisiwa. Karmeni ooloca: “Aiyaka hiyaasiveliwe ni yoolakelela aka. Awo hiyaachuna wi kimurumeeleke Yehova. Awo yaanakiruwana nave yaanakoopopiha wi yaahaala okihiya.” Naamwihiiha, Karmeni aahivilela mu othela wawe. Variyari va iyaakha 50, owo aahiilipixerya vancipale wi akhaleno othela yoowo waathipeleya mu osivela ni ncicimiho. “Moovira wa iyaakha, koohuserya okhala oopwachaxa ni oloca ni aiyaka mmukhalelo waphaama. Osuwela wi othela ti waweela vamithoni va Yehova, kaapaka soothene kaaweryaaka wi kikhapelele yoowo. Nkintoko omaliha othela waka, nthowa nawi kinnamusivela Yehova.” c Wakhala wi aakhumelela makacamiho mu othela wanyu, nyuwaano munaphwanela omuroromela Yehova wi onamookhaviheryaani ovilelano.

MVILELE VAAVAA MUNAKHALAANYU OONYEENYEYA WA NYUWO MUKHATIINYU

12. Nikacamiho taani nnahaalaahu ohoolela wakhala wi noopaka yoocheka etokweene?

¹² Nikacamiho. Nnanwerya okhala ooceecheya vancipale vaavaa nnapakaahu yoocheka etokweene. Piipiliya onnathariha wi soocheka sahu inanneeriha okhala ‘oophweeya ni oonyaanyeya.’  (Sal. 51:17, TNM) Munna mmoha awiichaniwa Ropertu, aahilapa iyaakha sincipale wi aphwanelele okhala ntoko murummwa oorumeela. Nyenya, owo aahipaka yoocheka etokweene yeeyo yaamweerinhe wiiwexexa wi owo aahimmwareela Yehova. Owo ooloca: “Yawuupuxerya ya murima aka yaanakihokola ntoko ohokola wa itixolu etonelaata emoha. Voocharela, kaahoona oriirya mmirimani mwaka. Kaahinla nave kaahivekela wa Yehova. Kinnuupuwela vaavaa kuupuwenlaaka wi Muluku haahaala tho wuukhuwa ni miyaano naari okiiwa. Ntakhara heeni kuupuwenlaaka hiiha? Miyaano kaahimunyeenyeiha.” Wakhala wi noopaka yoocheka etokweene, nnanwerya wiisoona wi nri oovalaanyeya nave nnampacerya wuupuwela wi Yehova ooninyanyala nave hinaano mathowa a omurumeela yoowo. (Sal. 38:4) Waakhanle wi mwiisoonne hiiha, muthokororye yaweereya ya muchu oororomeleya onalociwa Mpiipiliyani yoowo aavilenle mu omurumeela Yehova naamwi aapanke yoohesa etokweene.

13. Yoocheka taani murummwa Petru aapankeiye, nave tiheeni yaamweerinhe weerano yeeyo?

¹³ Yootakiherya ya Mpiipiliyani. Mu ohiyu Yesu ahaakumve okhwa, murummwa Petru aahipaka soohesa soohiyanahiyana seiho saamweerinhe okhala ooceecheya mu okumi awe. Voopacerya, Petru aahiiroromela iirumihaka wi aahaala okhala oororomeleya, naamwi arummwa akina emuchanwe Yesu. (Mar. 14:27-29) Voocharela, vaavaa yaaryaaya mu emaca ya Ketsemani, Petru wiiliwiili aahihesa moorweela wa ohikhala oolipelela. (Mar. 14:32, 37-41) Mwawiihiiha, Petru aamuchawa Yesu veeri va muloko. (Mar. 14:50) Vookuchula, Petru aahimukhooca Yesu mu ikwaha raru, ophiyerya olipela mu yawootha. (Mar. 14:66-71) Ti mwawiihai Petru aakhulenleiye vaavaa iiwexenxeiye wunnuwa wa Yoocheka awe? Owo aahinla moososeya murima, akhweya iisoonaka okhalano nthowa ni ohooxeya. (Mar. 14:72) Mwaanyiherye wiiniwa murima wa Petru, elukuluku yeeyo nthamwene awe Yesu iiphiweiye. Ntoko Petru nnanwerya wiisoona ohikhala echu enevo!

14. Tiheeni yaamukhavihenrye Petru ovilela mu omurumeela wawe Yehova? (Moone eruku ya ekaapa.)

¹⁴ Petru aahiwerya ovilela mu omurumeela Yehova ni mathowa oohiyanahiyana. Owo haawiivalaannye; aawaacamela asinnawe oomunepani, nyenya moohikhwa minikwa awo yaamuhakararya. (Luka 24:33) Ohiya yeeyoru, Yesu aviihiweene mookhwani aahooneya wa Petru mwawooneya wi amulipihe. (Luka 24:34; 1 Ako. 15:5) Voocharela, ohiya Yesu wiimmusamela Petru ntakhara soohesa sawe, owo aamuleela nthamwene awe wi aahaala waakhela mirici mitokotoko. (Yoh. 21:15-17) Petru aahisuwela wi aapaka yoocheka etokotoko, nyenya haaceechen’ye wa yoowo mukhateiye. Ntakhara heeni? Nthowa nawi  owo aahilekecheya wi Pwiya awe, Yesu, haamunyanyanle yoowo. Nave asinnawe a Petru oomunepani yaatitelela omukhaviherya. Tiheeni nnahuseryaahu ni yootakiherya ya Petru?

15. Tiheeni Yehova onachuneiye wi nroromele? (Salmu 86:5; Aroma 8:38, 39) (Moone tho eruku.)

¹⁵ Nihusiheryo. Yehova onachuna wi nikhale oolekecheya wi owo onnanisivela nave tho ari ooreheryeya wi anikhurumuwele. (Mwaalakhanye Salmu 86:5; Aroma 8:38, 39.) Vaavaa nnachekaahu, ninniikuherya mathowa. Eparipari wi eyo enneereya. Nyenya, hannaphwanela wuupuwela wi Yehova hananisivela, naari harwa anikhurumuwela. Ohiya yeeyo, nnaphwanela waavya nikhaviheryo nawaakuveya. Ropertu yoowo olociwe woopaceryani ooloca: “Kaamorela mu yoocheka nthowa nawi kaahiroromela ikuru saka wi kaahaala ovootha yaweeha.” Owo aahiiwexexa wi aanaphwanela oloca ni atokweene. Owo ooloca: “Vaavaa kaaloncaaka ni atokweene, awo yaakikhaviherya woona osivela wa Yehova ntakhara miyo. Nave tho kaahoona wi atokweene yaanakisivela. Awo yaakikhaviherya woona wi Yehova haakinyanyanle.” Hiyaano tho nnaphwanela ororomela wi Yehova onnanisivela mwawiixeela, onnanlevelela wakhala wi noocharuwa soocheka sahu, ni naavya nikhaviheryo nave tho neererya ocharuwa ni ohikookela soocheka sahu. (1 Yoh. 1:8, 9) Olekecheya wuuwu onnaneeriha hiyo mukhatiihu ohikhala ooceecheya vaavaa nnakwaculiwaahu nave tho nnathoowaahu.

16. Ntakhara heeni nyuwaano muri oolakelela ovilela mmuteko wa Yehova?

¹⁶ Yehova onnatepa ovaha esisapo wiilipixerya wahu wi nimurumeele variyari va mahiku yaala ookuchula ni oovila. Nnikhaviheryo na Yehova, nnanwerya ovilela moohipwacha soonyenyeiha. Nnaphwanela wunnuwiha osivela wa anna ni arokora ahu ni waakhurumuwela naamwi awo ennyeenyeihaka. Nnaphwanela wooniherya osivela wawiixeela wa Muluku ahu ni ncicimiho moorweela wa marehereryo awe, neerakano yoothene yeeyo nnaweryaahu wi nivoothe makacamiho yaawo anahaala okhumelela mu othela wahu. Nave wakhala wi noopaka yoocheka, nnaphwanela waavya nikhaviheryo na Yehova, weemererya osivela wawe nnikhurumuwelo ni otitelela oya vahoolo mmuteko awe. Nnaphwanela ororomela wi nnahaala ohepha mareeliho ‘wakhala wi hanivelavenle weera yeeyo eri yaphaama.’—Aka. 6:9.