YAWEEREYA YA OKUMI
“Kaanachuna olapa ntakhara Yehova”
NAAHILAANYA nikhuuru nikhaani na achu yaawo naaxekunryaahu waacamela muceche wa Granbori, yaakhala variyari va ntakhwa ntokweene na Suriname. Voocharela naahinwela mwaaceya aapakiwe ni miri nave nnachara muhice Tapanahoni. Ohoolo waya vaavaa naavinraahu vachu maahi yaachimakaayavoxa, mwaaceya ahu aahimana nluku. Mwawaakuveya, mwaaceya ni hiyaano naahineela. Murima aka waahikichimaka. Naamwi kapakaka mikwaha ni mwaaceya mu iyaakha sincipale ntoko ooweherya a ekulucu, nkaasuwela weekha!
Kihaakumve oloca sa yeeyo yeeren’ye voocharela, voopaceryani kinahaala wooleelaani mukhalelo kaapacenryaaka muteko wa elukuluku yoothene.
Kiyariwe mu 1942 mu evilivili yooreera yo Karipe o Curaçao. Apapa aka eyariwe o Suriname, nave yaahithaamela o evilivili ntakhara muteko. Iyaakha vakhaani kihaakumve oyariwa, awo yaahikhala mmoha a Anamoona a Yehova yaapatisiwe o Curaçao. a Awo yaanamuhuserya Piipiliya ni hiyaano isumana soothene, naamwi hiihaa, tahi wi ilukuluku soothene naanachuna ohuserya. Vaavaa kaaryaakano iyaakha 14, naahithaamela o Suriname wi naakhapeleleke amama aya awuuluvala.
ONTHAMWENE WAPHAAMA WAAHIKIKHAVIHERYA
O Suriname kaahipacerya waapaka asinthamwene mmulokoni yaawo yaari amvai mu omurumeela Yehova. Awo yaarino iyaakha vakhaani okipwaha miyo nave yaanarumeela ntoko mapiyoneero a elukuluku yoothene. Vaavaa yaalocaaya saweereya saya vooloca sa muteko woolaleerya, kaanoona wi awo yaari oohakalala. Imanle mithukumano, asinthamwene aka ni miyaano naanavaanela vooloca sa miyaha sa Mpiipiliyani—ikwaha ikina, naanakiraathi vaate niwehaka itheneeri wirimu. Asinthamwene yaale, yaahikikhaviherya wiiwexexa yeeyo kaachunaaka mookumini; kaachuna olapa ntakhara Yehova. Mwawiihiiha, kaahipatisiwa kirino iyaakha 16. Voocharela, kirino iyaakha 18, kaahipacerya orumeela ntoko Piyoneero a elukuluku yoothene.
OHUSERYA MAHUSIHERYO OOCHUNEYA
Kiri piyoneero o Paramaripo
Kaahihuserya mahusiheryo mancipale ntoko piyoneero, nave yaawo yaahikikhaviherya variyari va muteko aka wa elukuluku yoothene. Ntoko yootakiherya, nimoha na mahusiheryo yaawo kihusenryaaka waari ochuneya waya waavyakiha akina. Vaavaa kaapacenryaaka orumeela ntoko piyoneero, misiyonaario awiichaniwa Willem van Seijl aahooniherya opwacha wa miyo. b Owo aahikihusiha vancipale mukhalelo wa okhapelela mirici mmulokoni. Mu ikwaha ikina, nkuupuwela wi kaanachuna ovyakihiwa vancipale. Eyaakha yoocharela kaahithanliwa ntoko piyoneero avameekheiye nave kaahipacerya ohoolela makhuuru yaaphwanyeya variyari va ntakhwa na Suriname. Kinnathamalela vancipale ovyakiha yoowo anna ntoko Willem yaakivahaaya vaavaa kaachunaaka yoowo! Ovinyerya vaavale, kinneererya ochariha yootakiherya aya, kipharihelaka elukuluku wi kaavyakihe akina.
Nihusiheryo nanaawiili kihusenryaaka naari ochuneya waya okhalano okumi wookhweya ni wooreheryeya. Omapacereryo wa mweeri ti mweeri, nthamwene aka a empa yoowo aari Piyoneero avameekheiye ni miyaano, naaneererya olakelela yoolya naachunaahu ntakhara isumana soocharela. Mwawiihiiha , mmoha a hiyo aanapaka mukwaha mutokweene wa oya opooma wi athume ichu seiho naachunaahu. Naaphwanela opharihela mwamiruku ikhorowa naakhaviheryiwaahuno va mweeri ni wuupuwelela phaama ichu naachunaahu wi nimaliheno mweeri. Waakhanle wi noothoiwa yoolya nri variyari va ntakhwa, achu a vakhaani, wakhala woowererya, yanwerya onikhaviherya. Kinnaroromela wi ohuserya kiri mmiravo okhalano okumi wookhweya ni wooreheryeya, waahikikhaviherya otikitheryeya mmuteko wa Yehova variyari va okumi aka.
Nihusiheryo naneeraru kihusenryaaka naari ochuneya waya waahusiha achu mu elocelo aya yooyariwano. Kinnunwe kilocaka elocelo yo Olanta, Enklesi, Papiamento ni Sranantongo (elocelo yeeyo tho esuweliwe ntoko Sranan), elocelo yeeyo eri yawunlaana wa Asuriname. Nyenya variyari va ntakhwa, kaanoona wi achu yaanaakhulela phaama michaka saphaama vaavaa naalaleeryaahu mu elocelo aya yooyariwano. Waanakhala woovila wa miyaano oloca ilocelo ikina ntoko Saramaccan, yeeyo enapharihela masu oovuwa ni avathivathi. Nyenya, wiilipixerya waahikumiherya miphurelo. Moovira wa iyaakha, kaari ooreheryeya waahusiha achu ancipale eparipari nthowa nawi kaanawerya oloca elocelo aya yooyariwano.
Mweeparipari, kaahikhalano saweereya sawuuliha muru. Ntoko yootakiherya, mu ekwaha emoha kaanachuna omukoha oohuserya mmoha a Piipiliya amwaamuthiyana yoowo aaloca Esaramaccan mukhalelo iisooneiye, woona wi niphuuni naanamwiicela. Nyenya mweeparipari echu kaamukonhaaka waari waakhanle wi owo oorupala! Chiryene, nikoho nle naahimuhaleeliha yoowo. Naamwi kahilocaka phaama nave kipakaka soohesa ntoko seiha, ilukuluku soothene kaaneererya oloca elocelo yooyariwano ya achu mu orummwa aka.
WEEMERERYA MIRICI SAWAACEERERYA
Mu 1970, kaahithanliwa ntoko ooweherya a ekulucu. Mu eyaakha yeele, kaanamooniha prokrama va nikalaasi yoowo aarino muru “Nxekuryaka Nipuro Ntokweene na Anamoona a Yehova” mu makhuuru mancipale oovalaanyeya yaari variyari va ntakhwa ntokweene. Wi naasekurye yaawo, miyaano ni anna akina naanampharihela mwaaceya oorakama ni a mwiri wi nipake mikwaha ncharaka mihice. Mwaaceya ahu aahimuteexa xiratore, kasolina, alampata yaalapa ni kasolina ni ikaruma naapharihelaahu wi nimooniheno prokrama. Vaavaa naaphiyaahu, naanateexa ikaruma soothene nikerihaka weiwo naayaahuwo omoonihawo prokrama. Nyenya,
echu kinuupuwelaakaxa vooloca sa mikwaha seihe, ti mukhalelo achu yaasiveliwaaya ni aprokrama yaale. Kaari oohakalala waahusiha achu vooloca sa Yehova ni makupa a marehereryo awe a veelaponi yavathi. Woona mukhalelo achu yaamwaacamenlaaya Yehova yaahikeeriha okhala oohakalala nthowa na opaka owetha waka mmuteko wa Yehova.KIRUTHAKA MIKOYI MIRARU
Ethel ni miyaano naathelanne mu Setempuru a 1971
Naamwi koonaka okhala wookhweya okhwaaniherya murici aka kiri muciye, kaanachuna othela. Mwawiihiiha, kaapacerya ovekela wi kimphwanye murokora yoowo aahaala ovilela moohakalala ni makacamiho a mmuteko wa elukuluku yoothene mu ntakhwa ntokweene. Eyaakha emoha ohoolo waya, kaapacerya omvarerya murokora Ethel, piyoneera avameekheiye yoowo aari ooreheryeya olapa mwakuru ntakhara Yehova naamwi wahiri wookhweya wa yoowo. Ovinyerya ari nahano, Ethel aanamutikhina vancipale murummwa Paulo nave aanachuna opaka echu vyakala aaweryeiye mmuteko woolaleerya ntoko yoowo. Naahithelana mu Setempuru a 1971 nave naahipacerya orumeela mmuteko wa weecelela ikulucu ntoko mutheli.
Ethel aaphwiiwale mu emusi yeeyo yaahirino ichu sincipale soomwiilini, mwawiihiiha, owo aahiikhoveleliha phaama mmuteko waweecelela mu ntakhwa ntokweene. Ntoko yootakiherya, vaavaa niirehereryaahu wi naxekurye miloko soorakamela mu ntakhwa nenle ntokweene, hinaakuxa ichu sincipale. Naanacapa soowara ni orapa oluusi. Hiyaano tho naanalya yeeyo anna yaanivahaaya—ntoko iguana (axinama analikana ni namanriya), ihoopa naari echu vyakala yaasayaaya naari yaamesaaya. Vaavaa saahikhalaayavo iparatho, naanalyela va nikukhu na nwopo. Vaavaa saahikhalaayavo ikuyeri ni ikarfu, naanalya ni mata. Naahoona wi olapa vamoha ntakhara Yehova yaahinikhaviherya okhala mikoyi miraru sooruthiwa phaama. (Ekl. 4:12, PMM) Hiyaavo yaahaala onivaha ohakalala opwaha muteko yoola!
Nihiku nimoha, nikookaka weiwo naaxekuryaahu anna o ntakhwa ntokweene, naahikhalano yaweereya yeele kiloncaaka woopaceryani. Woona wi
mwaaceya aahivolowa vachu waachimakavoxa maahi, owo mwawaakuveya aahineela nyenya tho mwawaakuveya aahiwelela. Moohakalala, naahaawara akuleti awoopola ikumi nave hinaavinnyemo mmwaaceyani. Mwawiihiiha, mmwaaceyani waahisareyamo maahi. Naahiviihamo yoolya mpasiyani nave nipharihela ipasiya seiho wi niviihemo maahi mmwaaceyani.Ovinyerya vaavaa naayelenlaahu yoolya ahu, naahipacerya omesa nivano nipakaka mukwaha ahu. Nyenya hinaapararu echu. Mwawiihiiha, naahivekela wa Yehova wi anivahe yoolya ya nihiku nenne. Nimanle ovekela, mmoha a anna aahivonya mulapa nave aphara ehopa etokweene yeeyo yaanaakhwanne wa hiyo athanu naari mmwaaceyani.
MUTHELI, TIITHI NI OOWEHERYA A EKULUCU
Nimalinhe iyaakha thanu nri mmuteko wa weecelela ikulucu vamoha, Ethel ni miyaano, naahaakhela mareeliho oohiwehereryeya—naahaala okhala asitiithi. Kiiwalaaka yeela kaahihakalala vancipale, nyenya nkaasuwela mukhalelo yaahaalaaya ovolowela okumi ahu. Ethel ni miyaano naanachuna otitelela okhala mmuteko wa elukuluku yoothene, waakhanle wooweryeya. Mu 1976, mwanihu Ethniël aahiyariwa. Ivinrevo iyaakha piili ni emeya, mwanihu anaawiili Giovanni aahiyariwa.
Koonaka opatiso mmuhice Tapanahoni waacamela o Godo Holo makupa onakhumawo nsuwa o Suriname—1983
Woona wi elukuluku yeele o Suriname waahikhalawo othowa, efiliyale yaahipaka marehereryo wi kititelele orumeela ntoko ooweherya a ekulucu naaphuwaka anamwane ahu. Vaavaa aniihu yaaryaaya amiravo, kaahithanliwa wi keeceleleke mu ikulucu seiho saarino miloko vakhaani. Nyenya eyo yaaheeriha okhala wooweryeya wa miyo orumeela ntoko ooweherya a ekulucu mu isumana vakhaani vamweeri ni orumeela mu isumana saahalela ntoko piyoneero mmuloko naathanleliwaahu. Ethel ni aniihu aasilopwana yaanawerya okihoola vaavaa kaaxekuryaaka miloko saakhala waacamela weiwo naakhalaahuwo. Nto kaanapaka mikwaha mukhataaka vaavaa kaayaaka oxekurya miloko ni opaka mithukumano sa muceche o ntakhwa ntokweene.
Mmuteko wa weecelela ikulucu, miyaano wiiliwiili kaanapaka mikwaha ni mwaceya wi kaxekurye miloko soovalaanyeya
Kaaphwanela orehererya miyaha saka mwa miruku wi kaakhwaniherye mirici saka soothene. Kaanapaka owetha waka wi nipakeke malapelo a echoko esumana eri yoothene. Vaavaa keecelelaaka miloko ontakhwani, Ethel aaneciha malapelo a echoko ni anamwane ahu owaani. Ilukuluku soothene waakhalaaya wooweryeya, naanapaka ichu vamoha ntoko echoko. Ethel ni miyaano wiiliwiili naanathata ni anamwane ahu—naanaavonya axooku naari naanaxekurya mapuro ooreera yaawo yaari waacamela owaani. Wiiliwiili kaanakhala ophiyerya ohiyu eriyari kirehereryaka ichu soomunepani. Nave Ethel yoowo aari muthiyana oowerya onalociwa mu Masiposipo 31:15, aanavinya oyaaka nuuxa wi apake marehereryo wi naalakhanye yoorepa ya nihiku vamoha ni onwurya chaaya ntoko echoko aniihu ehaakumve oya oxikola. Kinnathamalela vancipale nthowa na okhalano mwaaraka awiilipixerya, ilukuluku soothene aakikhaviherya waakhwaniherya mirici soothene seiho Yehova aakivaheiye!
Ntoko asitiithi, naanalapa mwakuru wi naakhaviherye aniihu omusivela Yehova ni miteko Seekristu. Naanachuna wi aniihu ethanle orumeela mmuteko wa elukuluku yoothene, ohiya nthowa nawi hiyaano naanachuna wi awo yeereno, nyenya nthowa nawi eyo yaari yoothanla aya. Wiiliwiili naanaloca ni yaawo ohakalala muteko wa elukuluku yoothene onaruuhaaya. Nihikhunwe makacamiho, naanaaleela mukhalelo Yehova aanikhavihenryeiye ni onreeliha ntoko echoko. Naanapaka tho owetha wahu wi aniihu epake onthamwene ni Anamoona a Yehova akhwaaya, yaawo yaamukuha Yehova mu nipuro noopacerya mu okumi aya.
Yehova aanavahererya soothene naachunaahu ntoko echoko. Mweeparipari, kaanapaka yeeyo kaaweryaaka wi kikhaviherye echoko aka. Yaweereya aka kiri muciye mu ntakhwa ntokweene ntoko piyoneero avameekheiye yaahikihusiha okhapelela ikhorowa ntakhara ichu kaachunaaka. Naamwi napakaka owetha wahu, ikwaha ikina hinaakhalano ichu naachunaahu. Mu ilukuluku seiho, kaanaroromela wi Yehova aahala onikhaviherya. Ntoko yootakiherya, variyari va omakuchuwelo wa eyaakha ya 1980 ni omapacereryo wa eyaakha ya 1990, waahikhalawo owanawana o Suriname. Mu iyaakha seihe, waari woovila ophwanya ichu soochuneya. Naamwi hiihaa, Yehova ananikhaviherya.—Mat. 6:32.
KUUPUWELELAKA VOOLOCA SA OKUMI AKA
Opacerya moono woothiyana n’yaaka omoono woolopwana: Ni mwaaraka, Ethel
Mwanihu oopacerya, Ethniël ni mwaariye, Natalie
Mwanihu Giovanni ni mwaariye, Christal
Variyari va okumi ahu, Yehova aananikhapelela ni onikhaviherya okhala oohakalala ni awaakhwaneliwa. Aniihu yaari mareeliho matokweene, nave waaphuwa yaawo wi emurumeeleke Yehova yaari ekari etokweene wa hiyaano. Hiyaano naanaaceenyerya awo opharihela okumi aya mmuteko wa elukuluku yoothene. Ethniël ni Giovanni yaahivolowa mu ixikola sa marehereryo nave awo hiihaano anarumeela o efiliyale yo Suriname vamoha ni asaaraya.
Ethel ni miyaano hiihaano nootepa wuuluvala, nyenya naamwi hiihaa nri ooweiwa mmuteko wa Yehova nrumeelaka ntoko mapiyoneero avameekhaaya. Mweeparipari, nri ooweiwaxa ophiyerya wi nihinaphwanya elukuluku yavakhaani wi nihuserye weekha! Nyenya nkaanono ekeerelani. Kaawehaka muculi, yoolakelela kaapankaaka kiri mmiravo ya opharihela okumi aka mmuteko wa elukuluku yoothene, yaari yoolakelela yaphaamaxa.
b Yaweeryeya ya okumi ya Willem van Seijl, “Realidades Que superaram minhas Expectativas,” evonyiwe mu erevista Vinyani! a 8 a Otupuru a 1999.