1. Nnasuwela hai wi Yehova onnachuna onaacamela?

 YEHOVA onnaniwopa wi nimwaacamele yoowo. (Tiy. 4:8) Owo onachuna okhala Muluku ahu, Tiithi ahu ni Nthamwene ahu. Owo onnaakhula mavekelo ahu nave onnanikhaviherya variyari va ilukuluku soovila. Nave owo onnapharihela marehereryo awe wi anihusihe ni onikhapelela. Vano tiheeni nnaphwanelaahu weera wi nimwaacamele Yehova?

2. Nni niwerye hai omwaacamela Yehova?

² Hiyaano nnanwerya omwaacamela Yehova moorweela wa ovekela wa yoowo ni moorweela wa waalakhanya Masu awe ni wuupuwelela sa yeeyo nnaalakhanyaahu. Vaavaa nneeraahuno yeela, ninnamusivela ni omuthamalela vancipale yoowo. Ninnaceenyeryeya omwiiwelela yoowo ni omvaha ncicimiho owo onaphwaneleiye. (Wup. 4:11) Vaavaa nnamusuwelaahu phaama Yehova, ninnamuroromela vancipale yoowo ni marehereryo yaawo onivaherenryeiye wi enikhaviheryeke.

3. Ti mwawiihai Musaserya oneereryeiye onimwalanya ni Yehova, nave tiheeni enahaala onikhaviherya ohimunyanyala Yehova ni marehereryo awe? (Salumu 31:13, 14)

³ Musaserya onneererya onimwalanya ni Yehova xaxaxa vaavaa nnahoolelaahu makacamiho. Owo oneerano hai yeela? Owo onneererya oneeriha vakhaani-vakhaani ohiya omuroromela Yehova ni mareheryo awe. Nyenya hiyaano nnanwerya wiisaakiha ntakhara wa ohiphela wawe. Wakhala wi nroromelo nahu ti noolipa nave omuroromela wahu Yehova ti woohicikinyeya, hiyaano hinimunyanyala Muluku ahu ni marehereryo awe.—Mwaalakhanye Salmu 31:13, 14, PMM.

4. Tiheeni nnahaalaahu othokororya mmwaha yoola?

⁴ Mmwaha yoola, nnahaala othokororya makacamiho mararu yaawo ahinarweela mmulokoni; nave nimoha ti nimoha nnanwerya onanariha omuroromela wahu Yehova ni marehereryo awe. Ti mwawiihai makacamiho yaawo eneeraaya enimwalanye  ni Yehova? Nave tiheeni nnaphwanelaahu weera wi niwanihe ni wiilipixerya wa Satana?

5. Ti mwawiihai makacamiho aneeraaya enanarihe omuroromela wahu Yehova ni mareheryo awe?

⁵ Ikwaha ikina ninnahoolela makacamiho oovila ntoko wiiciwa wa veemusini naari oyeleela muteko. Ti mwawiihai makacamiho si yaala aneeraaya enanarihe ororomela wahu marehereryo a Yehova ni onimwalanya ni yoowo? Vaavaa nnahoolelaahu makacamiho mu elukuluku yincipale, nnanwerya oyeleela ewehereryo ni okhala ooceecheya. Satana onnapharihela ilukuluku seiha wi aneerihe wuupuwela wi Yehova hananisivela. Musaserya onachuna wi nuupuweleke wi Yehova ni marehereryo Awe tanatannya makacamiho ahu. Echu emohamoha yaaheereya ni Aisarayeli akina o Yikuputu. Woopaceryani awo yaaneemererya wi Yehova aahimuthanla Mose ni Aroni wi yaataphule yaawo mookapuroni. (Muk. 4:29-31) Nyenya voocharela, vaavaa Farawo aakacaminheiye okumi aya, awo yaahimukuherya mathowa Mose ni Aroni wa makacamiho aya, elocaka wa yaawo eriki: “Ntakhara a nyuwo noheeriwa oothanyeya wa farawo ni wa anamuteko awe. Mohaannya nivaka mmatatani mwaya wi eniiphe.” (Muk. 5:19-21, PMM) Awo yaahaakuherya mathowa alapeli oororomeleya a Muluku. Eyo yaari yoothananiha! Waakhanle wi munnahoolela makacamiho oovila mu elukuluku yincipale, ti mwawiihai muneeraanyu mutitelele omuroromela Yehova ni marehereryo awe?

6. Tiheeni nnahuseryaahu orweela wa mulipa a miririmu Apakuki vooloca sa mukhalelo wa ovilela ni makacamiho ahu? (Hapakuki 3:17-19)

⁶ Muhule murima anyu wa Yehova mu nivekelo, nave nweherye nikhaviheryo nawe. Mulipa a miririmu Apakuki aahihoolela makacamiho mancipale. Mu ilukuluku ikina, owo aanakhwa minikwa waakhanle wi Yehova aanamukhapelela. Mwawiihiiha, owo aahimuleela Yehova mukhalelo iisooneiye mu nivekelo. Owo aaloca: “Khoo Apwiya, ophiyerya liini kinlelaka wi munikhaviherye, nyuwo muhinakaakhula? . . . Ntakhara heeni munamuweharu seereyaka sootakhala?” (Hap. 1:2, 3, PMM) Yehova aahaakhula nivekelo noorweela vathi va murima na mulapeli awe oororomeleya. (Hap. 2:2, 3) Apakuki amanle wuupuwelela mwawiiseela mukhalelo Yehova aawooponleiye achu awe, owo aahikookela okhala oohakalala. Aahilekecheya wi Yehova aanamukhapelela nave aahaala omukhaviherya ovilela nnikacamiho vyakala. (Mwaalakhanye Hapakuki 3:17-19, PMM.) Tiheeni nnahuseryaahuvo? Vaavaa munahoolelaanyu makacamiho, mvekele wa Yehova nave mmuleele yoowo mukhalelo muniisoonaanyu. Voocharela, munweherye owo wi ookhaviheryeeni. Vaavaa muneeraanyu yeela, munaphwanela ororomela wi Yehova onahaala woovahaani ikuru seiho munachunaanyu wi mvilele. Nave vaavaa munoonaanyu nikhaviheryo nawe, nroromelo nanyu wa yoowo nnahaala okhala noolipa.

7. Tiheeni mmusi mmoha a Shirley eerenryeiye omulekecha nave tiheeni yaamukhavihenrye ohiyeleela nroromelo mwa Yehova?

⁷ Mutitelele okhapelela makupa anyu oomunepani. Muthokororye mukhalelo weerano yeeyo waamukhavihenryaaya Shirley, murokora onakhala o Papua Nova Kine, vaavaa aahooleleiye makacamiho. b Emusi ya Shirley yaari yoohaawa, nave ikwaha ikina waanakhala woovila ophwanya yoolya yawaakhwanela.  Mmusi awe mmoha aaheererya onanariha omuroromela wawe Yehova. Owo aanaloca: “Weyaano onaloca wi munepa waweela wa Muluku onnookhaviherya, vano nri woowi nikhaviheryo nene? Emusi aa nlelo ti yoohaawa. Weyaano onamaliha elukuluku aa olaleeryaka.” Shirley onneemererya: “Kaaniikoha: ‘Apwanne Muluku onnanikhapelela naari hooye?’ Nyenya mwawaakuveya kaanavekela wa Yehova nave kaanamuleela ichu soothene kuupuwelaaka. Kaatitelela omwaalakhanya Piipiliya ni soolaleeryiwa sahu nave kaatitelela olaleerya ni ophiya mmithukumanoni.” Mwawaakuveya owo aahipacerya ororomela wi Yehova aanakhapelela emusi awe. Emusi awe hiyantonko othoiwa yoolya, nave awo yaari oohakalala. Shirley ooloca: “Miyaano kaanoona wi Yehova aanaakhula mavekelo aka.” (1 Tim. 6:6-8) Wakhala wi munnakhapelela makupa anyu oomunepani, nyuwaano tho himurwa mweemererya wi makacamiho naari minikwa soomwalanyeeni ni Yehova.

8. Tiheeni akhweya enahaala weereya ni anna anahoolela mmareheryo a Yehova?

⁸ Moorweela wa iyornali ni a aplikativo a michaka, amwiicani ahu annamwaryamwaxa sawootha vooloca sa yaale anahoolela mmarehereryo a Yehova. (Sal. 31:13) Anna akinaaku annawaleliwa mu kariposo nave annathorihiwa ntoko achu oonanara murima. Akristu a mu nsana noopacerya yaahihoolela nikacamiho noolikana vaavaa Paulo aathorihiweiye moohookololowa nave awaleliwa mu kariposo. Awo yaakhulenle hai?

9. Ti mwawiihai Akristu akina yaakhulenlaaya vaavaa murummwa Paulo aawaleliweiye?

⁹ Akristu akina a mu nsana noopacerya yaahiya omukhaviherya murummwa Paulo vaavaa owo aawaleliweiye mu kariposo o Roma. (2 Tim. 1:8, 15) Ntakhara heeni? Apwanne awo yuuliheya muru nthowa nawi achu yaamoona Paulo ntoko muchu oonanara murima? (2 Tim. 2:8, 9) Naari akhweya yoova wi  awo tho yaahaala wiikariwa? Moohipwacha mathowa ene, mwaanyiherye mukhalelo Paulo iisooneiye. Owo aahivilela ni makacamiho mancipale nave opwaha soothene, aahela okumi awe va yawoopiha ntakhara yaawo. (Saw. 20:18-21; 2 Ako. 1:8) Hiyaano nihirwe nikhale ntoko achu yaawo yahaamukhavihenrye Paulo vaavaa owo aachuneiye nikhaviheryo! Tiheeni nnaphwanelaahu wuupuwelaka vaavaa anna yaawo anahoolela aniikariwaaya?

10. Tiheeni nnaphwanelaahu wuupuwela vaavaa anna yaawo anahoolela aniikariwaaya, nave ntakhara heeni?

¹⁰ Muupuwele ntakhara heeni nniikariwaahu nave taani onatannya. Timotiyu anawiili 3:12 oni: “Oothene yaale anachuna omulapa Muluku, mwawiiwanana ni Kristu Yesu, enarwa tho yiikariwa.” Mwawiihiiha, hannaphwanela ootikhiniheya wi Satana onaahiphela xaxaxa anna yaale anahoolela. Owo onachuna wi anna yaala ehiye okhala oororomeleya wa Yehova, nave tho onachuna onoopopiha.—1 Pet. 5:8.

11. Tiheeni nnahuseryaahu orweela wa yootakiherya ya Onesiforu? (2 Timotiyu 1:16-18)

¹¹ Mutitelele waakhaviherya ni okhala oororomeleya wa anninyu. (Mwaalakhanye 2 Timotiyu 1:16-18.) Mukristu a mu nsana noopacerya awiichaniwa Onesiforu ahaakhulela mmukhalelo woohiyana vaavaa Paulo aawaleliweiye. Owo “huuliwe muru wa nthowa na ophariwa [wa Paulo].” Ohiya yeeyo, Onesiforu aahimwaaxa Paulo, nave vaavaa amphannyeiye, owo aanaavya mikhalelo soophara muteko wi amukhaviherye owo. Mu weerano yeela, Onesiforu aahihela okumi awe vayawoopiha. Tiheeni nnahuseryaahuvo? Hiyaano hannaphwanela owoova achu yaawo ananoopopiha naari onihiiha waakhaviherya annihu yaawo aniikariwa. Mweeparipari, ninnapaka yeeyo nnaweryaahu wi naakhaviherye. (Mas. 17:17) Awo annachuna osivela nnikhaviheryo nahu.

12. Tiheeni nnahuseryaahu orweela wa anna ni arokora ahu o Rusiya?

¹² Muthokororye mukhalelo anna ni arokora ahu o Rusiya yaakhavihenryaaya akhwaaya oosiveliwa a munroromeloni yaawo yaawaleliwe. Vaavaa akina anathorihiwaaya, ancipale a anna ni arokora annaya otripunaale wi yaakhaviherye. Tiheeni nnahuseryaahuvo? Vaavaa anna yaawo anahoolela anaphuciwaaya, ophariwa, naari wiikariwa, hannaphwanela woova. Mwaavekelele, mukhapelele imusi saya nave mwaavye mikhalelo mikina soophara muteko wi mwaakhaviherye.—Saw. 12:5; 2 Ako. 1:10, 11.

13. Ti mwawiihai oruwaniwa oneeraaya onanarihe omuroromela wahu Yehova ni marehereryo awe?

¹³ Amusi ahu ahiri Anamoona a Yehova, asinthamwene oomutekoni naari oxikola, ananwerya onruwana ntakhara muteko ahu woolaleerya naari nthowa na okhala mwawiiwanana ni malakiheryo a Yehova. (1 Pet. 4:4) Awo ananwerya oloca: “Miyaano kinnatepa woosivela. Nyenya ekerexa aa ti yoovila ochariha nave tho yoovireliwa.” Akina ananwerya onloca moonanara nthowa na mukhalelo nnaakhalihaahu yaale aniikariwa mmulokoni, elocaka: “Onaweryeya hai oloca wi munnaasivela achu?” Masu ntoko yaala ananwerya onruuhela minikwa. Nnampacerya wiikoha: ‘Apwanne Yehova hanakiveka ichu sincipale? Apwanne marehereryo awe tahi oovila?’ Waakhanle wi munnahoolela mukhalelo yoola, ti mwawiihai muneeraanyu mutitelele omwaacamela Yehova ni marehereryo awe?

14. Ti mwawiihai nnaphwanelaahu waakhulela vaavaa akina ananruwanaaya nthowa na okhala mwawiiwanana ni malakiheryo a Yehova? (Salmu 119:50-52)

¹⁴ Mukhale oolakelela otitelela opaka yeeyo  Yehova onaloceiye wi ti yaphaama. Yupu aari mulopwana yoowo aachariha malakiheryo a Yehova naamwi aaphuciwa nthowa na weerano yeeyo. Mulopwana mmoha yoowo aachuna okhala nthamwene a Yupu, aaheererya omulekecha wi Muluku haamukhapelela naamwi owo aapaka ichu saphaama. (Yupu 4:17, 18; 22:3) Nyenya Yupu aahikhooca weemererya sawootha seiho. Owo aahisuwela wi malakiheryo a Yehova vooloca sa yeeyo eri yaphaama ni yoonanara yaari awookololowa, nave owo aahilakelela ochariha. Owo heemerenrye wi akina enanarihe ororomeleya wawe. (Yupu 27:5, 6) Tiheeni nnahuseryaahuvo? Muheemererye wi ophuciwa wooruuheleeni minikwa vooloca sa malakiheryo a Yehova. Muupuwele vooloca sa yeeyo yeeren’ye variyari va okumi anyu. Mwawooneya, mohoona wi munnahakalala vaavaa munapakaanyu yeeyo Yehova onaloceiye wi ti yaphaama. Mukhale oolakelela okhaviherya marehereryo yaawo anaakiha malakiheryo yaawo. Moohipwacha mukhalelo achu ananruwanaaya, hinrwa nihiya omurumeela Yehova.—Mwaalakhanye Salmu 119:50-52, PMM.

15. Ntakhara heeni Brizit aahiruwaniwa?

¹⁵ Muthokororye yaweereya ya Brizit, murokora mmoha onakhala o Intiya. Owo aanaphuciwa ni amusi awe nthowa na nroromelo nawe. Mu elukuluku vakhaani amanle opatisiwa mu 1997, aiyawe yaahaari Namoona a Yehova yaahiyeleela muteko. Mwawiihiiha, yaahilakelela wi awo, Brizit ni anaaya aasiithiyana yaaphwanela othaamela weiwo yaariwo asitiithi aya, yaawo yaakhala mu epooma ekina. Nyenya Brizit aahihoolela makacamiho matokweene. Woona wi aiyawe hiyaalapa, owo aaphwanela olapaka elukuluku yoothene wi akhaviherye echoko awe. Mwawaaceererya, muloko aacamenleiye waari wa mukwaha wa akilometuru 350. Moothananiha, emusi ya aiyawe yaanamwiica owo nthowa na nroromelo nawe. Wiica yoowo waahitepa ophiyerya wi emusi ya Brizit yaahithaama wanaawiili. Voocharela, aiyawe yaahikhwa moohiwehereryeya. Ohoolo waya, mwanawe  aneeraru amwaamuthiyana yoowo aarino iyaakha 12 aakhwa ni ereca ya kanser. Opwaha soothene, emusi ya Brizit yaanamukhupanya nthowa na saweereya seiha. Awo yaanaloca wi waakhanle wi owo haari Namoona a Yehova, makacamiho oothene yaale hiyi yeereye. Naamwi hiihaa, owo aatitelela omuroromela Yehova ni marehereryo awe.

16. Ti mwawiihai Brizit oreelihiweiye nthowa na otitelela okhala awaacameleya ni Yehova ni marehereryo awe?

¹⁶ Ovinyerya vaavaa Brizit aakhaleiye ociiwene wa muloko, ooweherya a ekulucu aamuceenyerya owo olaleerya weiwo aakhaleiyewo ni weeciha mithukumano owannyawe. Woopaceryani, eyo yaari yoovila wa yoowo. Nyenya owo aahichariha ohoolela. Aanakawana michaka saphaama ni akina, aaneeciha mithukumano owannyawe nave aahitikitherya malapelo a echoko ni anaawe aasithiyana. Teevi yaari yookhumelela? Brizit aari ooreheryeya opaceryiha ni weeciha soohuserya sincipale sa Piipiliya, nave ancipale a oohuserya yaala yaahipatisiwa. Mu 2005, owo aahipacerya orumeela ntoko piyoneera a elukuluku yoothene. Omuroromela wawe Yehova ni marehereryo awe, waahichuweliwa. Anamwanaawe aasithiyana vano alapeli oororomeleya a Yehova, nave mmuceche yoole, hiihava sookhalawo miloko miili! Brizit aari oolekecheya wi Yehova aahimvaha ikuru wi aahoolele makacamiho ni ovilela oruwaniwa orweela wa emusi awe.

17. Tiheeni nnaphwanelaahu olakelela opaka?

¹⁷ Satana onachuna wi neemererye wi Yehova onnaninyanyala variyari va makacamiho ahu, nave wi nikhaviheryo na marehereryo a Yehova, pahiru nnahaala waaceererya makacamiho mu okumi ahu. Satana onachuna wi nikhaleke awoova vaavaa anna yaawo anahoolela anootheriwaaya, aniikariwaaya naari anawaleliwaaya. Nave moorweela wa onyemuliwa, owo onachuna wi nnanarihe ororomela wahu malakiheryo a Yehova ni marehereryo Awe. Nyenya, hiyaano noosuwela phaameene miraakho sawe, nave hananiwoka. (2 Ako. 2:11) Mukhale oolakelela okhooca sawootha sa Satana nave mutitelele okhala oororomeleya wa Yehova ni marehereryo Awe. Muupuwele, Yehova harwa oohiyaani. (Sal. 28:7) Mweerano yeela, hiyaavo enahaala woomwalanyaani ni Yehova!—Aro. 8:35-39.

18. Tiheeni nnahaalaahu othokororya mmwaha onacharela?

¹⁸ Mmwaha yoola, noothokororya makacamiho yaawo nnahoolelaahu ahinarweela mmulokoni. Nyenya omuroromela wahu Yehova ni marehereryo awe onanwerya tho weehiwa ni makacamiho yaawo nnahoolelaahu orweela mmulokoni. Ti mwawiihai nneeraahu niwerye okhumelela phaama ni makacamiho yaawo? Nnahaala othokororya yeela mmwaha onacharela.