MWAHA WOOHUSERYA 48
Mukhapelela Mavyakelo Anyu Awuupuwela Vaavaa Ororomeleya Wanyu Oneehiwaaya
‘Okhapelele mavyakelo aa awuupuwela mu ichu soothene.’ —2 TIM. 4:5.
NCIPO 123 Ninnamwiiwelela Yehova ni Marehereryo Awe
YEEYO NNAHAALAAHU OHUSERYA a
1. Okhapelela mavyakelo ahu awuupuwela enataphulela eheeni? (2 Timotiyu 4:5)
VAAVAA nnahoolelaahu makacamiho, ororomeleya wahu wa Yehova ni marehereryo awe onanwerya weehiwa. Nni niwerye hai ovootha makacamiho yaala? Nnaphwanela okhapelela mavyakelo ahu awuupuwela ni awiivareryela, niithipenle mu nroromelo. (Mwaalakhanye 2 Timotiyu 4:5.) Ninnakhapelela mavyakelo ahu awuupuwela moorweela wa otitelela okhala oomaaleleya, wuupuwela mmukhalelo woophwanelela, ni weererya woona mwaha mmukhalelo Yehova onooneiye. Wakhala wi ninneerano yeela, muupuwelo ahu hovoloweliwa ni mukhalelo nniisoonaahu.
2. Tiheeni nnahaalaahu othokororya mmwaha yoola?
2 Mmwaha ovirale, noothokororya makacamiho mararu nnahoolelaahu yaawo ahinarweela mmulokoni. Mmwaha yoola, nnahaala othokororya makacamiho mararu anarweela mmulokoni yaawo akhweya anahaala weeha ororomeleya wahu wa Yehova. (1) vaavaa nnakhalihiwaahu moonanara ni Mukristu mukhwiihu, (2) vaavaa nnalakiwaahu, ni (3) vaavaa anakhumelelaaya matorokelo mmarehereryo. Ti mwawiihai nneeraahu ntitelele okhapelela mavyakelo ahu a wuupuwela ni okhala oororomeleya wa Yehova ni marehereryo awe vaavaa nnahoolelaahu makacamiho yaala?
VAAVAA NNAKHALIHIWAAHU MOONANARA NI MUKRISTU MUKHWIIHU
3. Ti mwawiihai nnaphwanelaahu waakhulela wakhala wi nookhalihiwa moonanara ni Mukristu mukhwiihu?
3 Apwanne mohintoko onyeenyeihiwa ni munna naari murokora, akhweya yoowo orino mirici, ntoko mutokweene a mmulokoni? Mwawooneya, munna owo haarino yoolakelela ya woonyeenyeihaani. (Aro. 3:23; Tiy. 3:2) Naamwi hiihaa, saweera sawe sohoonyeenyeihaani. Nyuwaano akhweya mwaahiyeleela ikhove muupuwelaka sa mwaha yoowo. Nyuwaano akhweya mwaaniikoha: ‘Waakhanle wi munna onnapaka ichu mmukhalelo yoola, apwanne chiryene owo ori mmarehereryo a Muluku?’ Ela ti yeeyo ene Satana onachuneiye wi nuupuweleke. (2 Ako. 2:11) Wakhala wi ninnuupuwela mmukhalelo yoola, nnanwerya ohiya omurumeela Yehova ni okhuma mmarehereryo awe. Vano wakhala wi nohoona wi munna naari murokora oonikhaliha moonanara, ti mwawiihai nneeraahu ntitelele okhapelela mavyakelo ahu a wuupuwela ni osepa wuupuwela mmukhalelo Satana onachuneiye wi nuupuweleke?
4. Ti mwawiihai Yosefe aakhapelenleiye mavyakelo awe awuupuwela vaavaa aakhalihiweiye moonanara, nave tiheeni nnahuseryaahu orweela wa yootakiherya awe? (Mapacereryo 50:19-21)
4 Muhikuheke mathowa. Vaavaa Yosefe aareiye mmiravo, asinna awe yaahimukhaliha yoowo moonanara. Awo yaanamwiica yoowo, ophiyerya wi akina a yaawo yaanachuna omwiipha. (Map. 37:4, 18-22) Mwawooneya, awo yaahimutumiha owo ntoko kapuro. Ntoko yookhumelela, Yosefe aahihoolela makacamiho matokweene mu iyaakha 13. Yosefe aanwerya wiikoha waakhanle wi Yehova aanamusivela yoowo chiryene. Nave akhweya owo aanwerya wiikoha waakhanle wi Yehova aahimunyanyala yoowo mu elukuluku aachuneiye nikhaviheryo. Nto Yosefe haakunhe mathowa. Mweeparipari, owo aahikhapelela mavyakelo awe awuupuwela moorweela wa otitelela okhala oomaaleleya. Vaavaa owo aareiyeno ekari ya wunla ikuhu ntakhara anna awe, owo haaweenreno yeeyo nave aahooniherya osivela ntakhara yaawo ni aahaakhurumuwela yaawo. (Map. 45:4, 5) Yosefe aaheerano yeeyo nthowa nawi aaniilipixerya wuupuwela mmukhalelo woophwanelela. Owo huupuwela vooloca sa makacamiho awe, nyenya aahititelela wuupuwelela vooloca sa yeeyo Yehova aachuneiye. (Mwaalakhanye Mapacereryo 50:19-21, PMM.) Tiheeni nnahuseryaahuvo? Waakhanle wi nyuwaano mookhalihiwa moonanara, hamunaphwanela omukuherya mathowa Yehova naari wuupuwela wi owo ohoonyanyalaani. Ohiya yeeyo, muupuwelele mukhalelo Yehova onookhaviheryeiyeni wi mvilele ni makacamiho. Mwawaaceererya, vaavaa akina anookhalihaayani moonanara, mweererye wuuheela ohiphaameya waya ni osivela.—1 Pet. 4:8.
5. Ti mwawiihai Mikeya aakhapelenleiye mavyakelo awe awuupuwela vaavaa oonneiye wi aahikhalihiwa moonanara?
5 Muthokororye yaweereya ya mmahiku ahu ya mutokweene mmoha a mmulokoni onakhala o Amerika oohico awiichaniwa Mikeya. b Owo onnuupuwela elukuluku yeeyo aakhalihiweiye moonanara ni anna akina yaawo yaarino mirici mmareheryo a Yehova. Owo ooloca: “Nkaawintonko onyeenyeihiwa mmukhalelo yoowo khalai. Kaahikhala awuukhuwa. Ohiyu nkaawerya orupa, nave kaaninla nthowa nawi kaari oohaleeliheya.” Naamwi hiihaa, Mikeya aahikhapelela mavyakelo awe awuupuwela nave aahiilipixerya ovareryela miyoonelo sawe. Owo aanavekela moohihiyererya, amvekaka Yehova munepa waweela ni ikuru wi avilele. Owo tho aanaavya sooleeliherya mu soolaleeryiwa sahu seiho saahaala omukhaviherya. Tiheeni nnahuseryaahuvo? Wakhala wi moonyeenyeihiwa ni munna naari murokora, mutitelele okhala oomaaleleya nave mwiilipixerye ovareryela miyoonelo vyakala soohiphwanelela muryaanyuno. Akhweya nyuwaano hamusuwenle yeeyo yeeren’ye ni munna naari murokora emweerinhe oloca naari opaka echu mmukhalelo yoowo. Mwawiihiiha muloce ni Yehova mu nivekelo, nave mumveke owo wi ookhaviheryeeni woona mwaha mmukhalelo owo onooneiye. Weerano yeeyo enahaala wookhaviheryaani ohuupuwela wi munna naari murokora owo eenreno mwaayiini echu yoonanara ntakhara nyuwo nave munahaala omukhurumuwela yoowo. (Mas. 19:11) Muupuwele, Yehova onnoona mukhalelo anyu nave owo onahaala woovahaani ikuru munachunaanyu wi mvilele.—2 Math. 16:9; Ekl. 5:8.
VAAVAA NNALAKIWAAHU
6. Ntakhara heeni ti woochuneya woonaka olaka wa Yehova ntoko yawooniherya ya osivela wawe? (Ahepri 12:5, 6, 11)
6 Vaavaa nnalakiwaahu ni Yehova, nnanwerya okhala oothanana. Nyenya wakhala wi pahiru nnuupuwela mmukhalelo woohiphwanelela nniisoonaahu, nnampacerya wuupuwela wi olaka owo tahi wawookololowa, honaphariheleya wa hiyo naari wi wootepiwano. Ntoko yookhumelela, nnanwerya oyeleela echu yoochuneya—woonaka olaka ntoko yawooniherya ya osivela wa Yehova ntakhara hiyo. (Mwaalakhanye Ahepri 12:5, 6, 11.) Nave wakhala wi noheemererya wi miyoonelo sahu sinihooleleke, nnahaala omvaha Satana ekari ya onihiphela. Owo onachuna wi nikhooceke olaka nave opwaha soothene, vakhaani-vakhaani nihiye omurumeela Yehova nave nikhume mmulokoni. Vano wakhala wi moolakiwa, ti mwawiihai muneeraanyu mukhapelele mavyakelo anyu awuupuwela?
Nthowa nawi Petru aari awiiyeviha nave aaheemererya ekano, owo aahiphariheliwa vancipale ni Yehova (Moone eparakrafo 7)
7. (1) Ntoko enooniheryiwaaya va eruku, ti mwawiihai Petru aaphariheliweiye ni Yehova amanle weemererya olaka? (2) Tiheeni muhusenryaanyu orweela wa yootakiherya ya Petru?
7 Mweemereryeke olaka, nave mpakeke matorokelo oochuneya. Mu ikwaha ikina, Yesu aahimusamela Petru ohoolo wa arummwa akina. (Mar. 8:33; Luka 22:31-34) Mwawooneya ela yaari yawuuliha muru wa Petru! Naamwi hiihaa, Petru aahititelela okhala oororomeleya wa Yesu. Owo aaheemererya olaka nave aahihuserya orweela wa soohesa sawe. Ntoko yookhumelela, Yehova aahichuwela ororomeleya wa Petru nave aahimvaha mirici soochuneya mmulokoni. (Yoh. 21:15-17; Saw. 10:24-33; 1 Pet. 1:1) Tiheeni nnahuseryaahu orweela wa yootakiherya ya Petru? Hiyaano ni akina ninnaphura vaavaa nihinatikitheryeyaahu mu wuuliheya muru nyenya opwaha soothene, ninneemererya olaka nave ninnapaka matorokelo oochuneya. Vaavaa nneerahuno yeela, ninnaphariheleya wa Yehova ni wa annihu.
8-9. Amanle olakiwa, ti mwawiihai Pernarto iisonneiye wuupaceryani, nyenya tiheeni yaamukhavihenrye otoroka muupuwelo awe?
8 Muthokororye yeeyo yeeren’ye ni munna awiichaniwa Pernarto onakhala o Mosampike. Owo aahiyeleela murici awe ntoko mutokweene a mmulokoni. Ti mwawiihai owo iisonneiye wuupaceryani? Owo ooloca: “Kaahikuha mathowa nthowa nawi nkaasiveliwe ni olaka kaakhenlaaka.” Owo aari awuukhuwa vooloca sa mukhalelo akina mmulokoni yaahaalaaya omoonaka. Owo onneemererya: “Kaahimaliha miyeeri savakhaani wi kikhaleno moonelo woophwanelela vooloca sa nikacamiho ni ochikela omuroromela Yehova ni marehereryo awe.” Tiheeni yaamukhavihenrye Pernarto otoroka mukhalelo awe?
9 Pernarto aahitoroka muupuwelo awe. Owo oothariha: “Vaavaa kaarumeelaaka ntoko mutokweene a mmulokoni, kaanapharihela yoorepa ya Ahepri 12:7 wi kaakhaviherye akina okhalano moonelo woophwanelela vooloca sa olaka wa Yehova. Vano kaahiikoha: ‘Taani onaphwanela opharihela yoorepa yeela?’ Alapeli oothene a Yehova—ophitaanyerya miyaano.” Voocharela Pernarto aahipaka matorokelo makina wi akookele okhala oororomeleya wa Yehova ni marehereryo awe. Owo aanapharihela elukuluku yincipale amwaalakhanyaka Piipiliya nave uupuwelelaka mwawiiseela vooloca sa yeeyo aalakhanyeiye. Naamwi akhalaka awuukhuwa vooloca sa mukhalelo anna ni arokora yaahaalaaya omoonaka, owo aanalaleerya ni yaawo nave aanapaka makupa mmithukumano sa muloko. Ohoolo waya, Pernarto aahithanliwa wanaawiili ntoko mutokweene a mmulokoni. Hiihaa ntoko Pernarto, wakhala wi moolakiwa mweererye ohuupuwelaxa vooloca sa wuuliheya muru, mweemererye ekano, nave mpake matorokelo oochuneya. c (Mas. 8:33; 22:4) Wakhala wi moheerano yeela, munaphwanela ororomela wi Yehova onahaala woochuwelaani nthowa na otitelela okhala oororomeleya wa yoowo ni marehereryo awe.
VAAVAA ANAKHUMELELAAYA MATOROKELO MMAREHERERYO
10. Matorokelo taani a mmarehereryo akhweya yeenhe ororomeleya wa Aisarayeli akina?
10 Matorokelo a mmarehereryo ananwerya weeha ororomeleya wahu. Wakhala wi hinaanono ephoole, opwaha soothene, nnanwerya weemererya wi awo enimwalanye ni Yehova. Ntoko yootakiherya, muthokororye mukhalelo matorokelo a mmarehereryo vathi va Nlamulo na Mose yaavolowenlaaya Aisarayeli akina. Yehova ahaakumve waavaha Nlamulo, miru sa ichoko saanapaka ichu seiho anamukucho yaaphwanelaaya opaka. Awo yaanaapaka a altari nave yaanavaha mikucho wa Yehova ntakhara imusi saya. (Map. 8:20, 21; 12:7; 26:25; 35:1, 6, 7; Yupu 1:5) Nyenya vaavaa Nlamulo naatikitheryiwaaya, miru sa ichoko hiseemereryiwa opaka ichu seiha. Yehova aahaathanla alipa a mikucho orweela wa emusi ya Aroni wi evaheke mikucho. Opacerya vaavale,waakhanle wi muru wa echoko yoowo wahaari wa muyareriwo wa Aroni oovaha mukucho, owo aaphwanela wiiphiwa. d (Onam. 17:3-6, 8, 9) Apwanne akhweya yaari matorokelo yaala yaamweerinhe Kora, Tatani, Apiramu, vamoha ni asitokweene 250 omwareela otokweene wa Mose ni Aroni? (Nam. 16:1-3) Hannaphwanela oloca mookwakwaleya wi ti yeeyo. Nyenya noosuwela wi Kora ni alopwana akina yaawo yaari ni yoowo, hiyaawenrye otitelela okhala oororomeleya wa Yehova. Waakhanle wi matorokelo a mmarehereryo anneeha ororomeleya wanyu, tiheeni munaphwanelaanyu weera?
Vaavaa Akehate yaakhenlaaya matorokelo mu mirici, awo moohakalala yaaheemererya olapa ntoko alipa a wiipa, achu oolipelela mikhora nari ntoko achu oolipelela mapuro yaakhapeleliwamo soolya (Moone eparakrafo 11)
11. Tiheeni nnahuseryaahu orweela wa Akehate akina yaari a nihimo na Alevi?
11 Mukhaviheryeke matorokelo vyakala a mmarehereryo. Variyari va mukwahaaya eri mutakhwani, Akehate yaanakhapelela murici wavameekhaaya. Ikwaha soothene Aisarayeli yaathaamaaya, Akehate akina yaanamuteexa arka a nlakano achu oothene ehaakumve ocimula. (Nam. 3:29, 31; 10:33; Yos. 3:2-4) Ela yaari ekari etokweene! Nyenya, ichu saahitorokeya wa yaawo vaavaa Aisarayeli yaaphin’yaaya mu Elapo ya Nlakano. Hiwaari woochuneya omuthaamiha Arka wiiliwiili. Nyenya vaavaa Solomoni aarumeeleiye ntoko mwene, Akehate akina yaahithanliwa wi ekhale alipa awiipa, akina yaarumeela ntoko alipeleli a mikhora nave akina yaalipelela mapuro yaawo yaakhapeleliwamo soolya. (1 Math. 6:31-33; 26:1, 24) Hiyaavo yoorepa enooniherya wi Akehate yaanaceenya naari ochuna ovahiwa muteko woochuneya nthowa nawi yaarino ekari yavameekhaaya khalai. Tiheeni nnahuseryaahuvo? Mukhaviherye ni murima anyu woothene matorokelo vyakala anapakiwa mmarehereryo a Yehova, ophitaanyerya yaawo anavolowela murici anyu. Mphwanye ohakalala moohipwacha murici mvahiwaanyu. Muupuwele wi tahi murici anyu onaweerihaani okhala oochuneya wa Yehova. Yehova onavaha esisapo wiiwelela wanyu ohiya murici vyakala.—1 Sam. 15:22.
12. Ti mwawiihai Zaina iisonneiye vaavaa aathanliweiye wanaawiili orumeela ntoko piyoneera avameekheiye?
12 Muthokororye yootakiherya ya Zaina murokora yoowo aakhenle matorokelo nave ayeleela ekari awe yoochuneya. Owo aahithanliwa wanaawiili wi akhale piyoneera avameekheiye amanle orumeela o Peteli mu iyaakha opwaha 23. Owo ooloca: “Vaavaa kaakhenlaaka matorokelo kaahikhala oohaleeliheyaxa. Kaaniisoona ohikhala echweenevo nave kaaniikoha: ‘Echu taani yoonanara kipankaaka?’” Moothananiha, anna ni arokora akina mmulokoni yaanaaceererya wiicela wawe moorweela wa oloca wi: “Waakhanle wi wa muchu oophwanelela chiryene, marehereryo hiyi etoroke murici aa.” Ilukuluku ikina, Zaina aanakhala awuukhuwaxa ophiyerya wi aaninla ohiyu ori woothene. Nyenya owo ooloca: “Miyaano nkaantonko weemererya wi mukhalelo kiisoonaaka okiruuhele minikwa vooloca sa marehereryo ni osivela wa Yehova.” Ti mwawiihai Zaina aakhapelenleiye mavyakelo awe awuupuwela?
13. Tiheeni Zaina eenreiye wi avoothe miyoonelo sawe soohiphwanelela?
13 Zaina aahiwerya ovootha miyoonelo sawe soohiphwanelela. Mwawiihai? Owo aanaalakhanya miyaha sa mu soolaleeryiwa sahu seiho saaloca sa yeeyo aahooleleiye nave saahimukhaviherya owo ovilela. Mwaha wa mu erevista ya Mulipeleli a 1 a Fevereru a 2001 waarino muru “Você pode vencer o desânimo!” waahimukhaviherya vancipale yoowo. Mwaha ola waahithariha mukhalelo mulipa oomurepa Piipiliya Marku aawaneiye ni miyoonelo soolikana vaavaa aakhenleiye matorokelo a murici. Zaina onnuupuwela: “Yootakiherya ya Marku yaari yeeyo ene kaachunaaka wi kihiye okhala ooceecheya.” Zaina tho aahipacerya owaacamela asinthamwene awe. Owo haahin’ye okhala ni anna ni arokora naari olaleerya vamoha ni yaawo nave tho haakunhe mathowa. Owo aanaroromela wi munepa waweela waanahoolela soolakelela sa marehereryo a Yehova, nave wi anna yaawo yaahoolela yaanamukhapelela phaama yoowo. Nyenya aahiroromela tho wi marehereryo a Muluku annapaka owetha waya wi muteko wa Yehova oyeeke vahoolo.
14. Matorokelo taani a mmarehereryo yaari oovila wa Vlado wiikhoveleliha, nave tiheeni yaamukhavihenrye?
14 Vlado, mutokweene a mmulokoni yoowo orino iyaakha 73 onakhala Oxilovenia, muloko awe waahiphitaanyeryiwa ni muloko mukina nave Empa ya Omwene yaathukumanaayamo yaahiwaliwa, nyenya eyo yaari yoovila wa yoowo. Owo ooloca: “Miyaano nkiiwexexa ntakhara heeni Empa ya Omwene yooreeraxa ntoko yeele yaaphwanelaaya owaliwa. Eyo yaahikiicela woona wi niiha nreherenrye Empa ya Omwene mu elukuluku ya vakhaani. Miyaano kakarpinteeru, nave kaahipaka ichu ikina ivyaani sa mu Empa ya Omwene. Nave tho nthowa na ophitaanyerya yoole, waanachuneya opaka matorokelo mancipale nave hiwaari wookhweya wa hiyaano alaleeryi awunnuwelavo.” Tiheeni yaamukhavihenrye Vlado ochariha ohoolela? Owo onnathariha: “Wiikhoveleliha ni matorokelo anarweela mmarehereryo a Yehova, ilukuluku soothene onnaruuha mareeliho. Iho saahinirehererya ntakhara matorokelo matokweene oomwaahiyu.” Apwanne muloko anyu woophitaanyeryiwa ni muloko mukina naari murici anyu wootorokeya? Muroromele wi Yehova onniiwexexa miyoonelo sanyu. Vaavaa munakhaviheryaanyu matorokelo vyakala nave mutitelela okhala oororomeleya wa Yehova ni marehereryo owo onaphariheleiye, mweeparipari nyuwaano munamureelihiwa.—Sal. 18:25.
MUKHAPELELE MAVYAKELO ANYU AWUUPUWELA MU ICHU SOOTHENE
15. Ti mwawiihai nneeraahu ntitelele okhala awiisuwela vaavaa nnahoolelaahu makacamiho oorweela mmulokoni?
15 Vaavaa mukhalelo ola wa ichu onaacamelaaya omakuchuwelo, ninnaweherya ohoolela makacamiho yaawo anarweela mmulokoni. Makacamiho yaala ananwerya weeha ororomeleya wahu wa Yehova. Nyenya nnanwerya okhapelela mavyakelo ahu awuupuwela. Waakhanle wi mookhalihiwa moonanara ni Mukristu mukhwiinyu, muheemererye wi miyoonelo sanyu siweeriheeni okhala muchu oowali. Wakhala wi moolakiwa, muhitikitheryeye mu wuuliheya muru, mweemererye ekano, nave mpake matorokelo oochuneya. Nave vaavaa marehereryo a Yehova anapakaaya matorokelo yaawo anoovolowelaani, mweemererye yaawo ni murima woothene nave mucharihe ohoolela.
16. Muni nwerye hai otitelela omuroromela Yehova ni marehereryo awe?
16 Nyuwaano munanwerya otitelela omuroromela Yehova ni marehereryo awe vaavaa nroromelo nanyu nneehiwaaya. Nyenya wi mweereno yeeyo, munaphwanela okhapelela mavyakelo anyu awuupuwela, ela tiwi, okhala oomaaleleya, wuupuwela mwawiiseela, ni woona miyaha mmukhalelo Yehova onooneiye. Mukhale oolakelela ohuserya vooloca sa achu a Mpiipiliyani yaawo yaakhumelenle phaama nnikacamiho noolikana ni nawinyu nave muupuwelele yootakiheryaaya. Mvekele wa Yehova wi ookhaviheryeeni. Nave muhirwe mwiivalaanye ni muloko. Ntoko yookhumelela, Satana hawerya woomwalanyaani ni Yehova naari marehereryo Awe.—Tiy. 4:7.
NCIPO 126 Nikhale Oolipelela ni Oolipa
a Ororomeleya wahu wa Yehova ni marehereryo awe onanwerya weehiwa, xaxaxa vaavaa nnahoolelaahu makacamiho mmulokoni. Mmwaha yoola onahaala othokororya mararu a makacamiho yaawo, ni tiheeni nnaphwanelaahu weera wi ntitelele okhala oororomeleya wa Yehova ni marehereryo awe.
b Masina makina aatorokiwa
c Munanwerya ophwanya sooleeliherya inahaala wookhaviheryaani mmwaha “Já teve privilégios de serviço no passado? Poderá recuperá-los?” mu erevista ya Mulipeleli a 15 a Akostu a 2009, epaax. 30.
d Nlamulo naalamulela wi miru sa ichoko seiho saachuna omwiipha mwaaxinama wi emukhuure yaaphwanela omukeriha mwaaxinama owo mu nipuro naweela. Nlamulo nenla hinaaphariheleya pahiru wa miru sa ichoko seiho saakhala ociiwene wa nipuro naweela.—Malam. 12:21.