MWAHA WOOHUSERYA 46
Ti Mwawiihai Yehova Onanikhaviheryeiye Ovilela Moohakalala?
“Yehova onnawehererya moopixa murima wi awooniheryeeni mahala, Nave onamvinya wi oomoreleeni ikharari.”—Yes. 30:18, TNM.
NCIPO 3 Yehova Onnanivaha Ikuru ni Ewehereryo
YEEYO NNAHAALAAHU OHUSERYA a
1-2. (1) Makoho taani nnahaalaahu othokororya? (2) Tiheeni enooniherya wi Yehova onnachuna onikhaviherya chiryene?
YEHOVA onanwerya onikhaviherya ovilela makacamiho ahu ni okhala oohakalala mu omurumeela wahu yoowo. Mmikhalelo taani owo onanikhaviheryeiye? Nni niphure hai phaama nikhaviheryo Yehova onanivaheiye? Makoho yaala anahaala waakhuliwa mmwaha yoola. Nyenya nihaakumve waakhula makoho yaala, hankooni nthokororye nikoho nla noochuneya: Apwanne Yehova onnachuna onikhaviherya chiryene?
2 Masu murummwa Paulo opharihenleiye mu ekaarata wa Aheepiri enanwerya onikhaviherya ophwanya naakhulo. Paulo oorepa: “Yehova tonakikhaviherya; Nkirwa koovaru echu. Tixeeni muchu oneereiye akeerele?” (Ahe. 13:6) Mpiipiliyani, masu awi ‘mukhaviheryi’ aphariheliwe mu eversikulu yeela, enalociwa sa muchu yoowo onaakuvela omukhaviherya muchu mukina yoowo oninla ntakhara nikhaviheryo. Nkaanyiheryani Yehova achimakaka wi amukhaviherye muchu yoowo ori va yawoopiha. Mwawooneya nyuwaano munneemererya wi othariha yoola onnooniherya wi Yehova onnachuna onikhaviherya chiryene. Vaavaa Yehova onanikhaviheryeiye, nnanwerya ovilela ni makacamiho ahu moohakalala.
3. Mikhalelo taani miraru Yehova onanikhaviheryeiye ovilela makacamiho ahu moohakalala?
3 Taavi ari makhalelo makina yaawo Yehova onanikhaviheryeiye ovilela ni makacamiho moohakalala? Wi naakhule, hankooni naalakhanye makupa a liivuru a Yesaya. Ntakhara heeni? Nthowa nawi sooloherya sincipale seiho Yehova aamveerenleiye Yesaya orepa, sinnaphariheleya wa alapeli a Muluku olelo. Nave tho wiiliwiili Yesaya aanamuthariha Yehova ni masu yaawo ari okhweya wiiwexexa wa hiyo. Mu Yesaya ekapitulu 30 sinnaphwanyeyamo sootakiherya ikina. Mu ekapitulu yeela, Yesaya onnapharihela maphwanaphwaniho aphaama wi atharihe mukhalelo Yehova onaakhaviheryeiye achu awe. Owo oorepa wi Yehova onnanikhaviherya (1) moorweela wa owiriyana moopwacha ni waakhula mavekelo ahu, (2) moorweela wa onivaha ohoolela, ni (3) moorweela wa onivaha mareeliho hiihaano ni omwaahiyu. Hankooni nthokororye mikhalelo seiha miraru Yehova onanikhaviheryeiye.
YEHOVA ONNANIWIRIYANA
4. (1) Ti mwawiihai Yehova aatharinheiye Ayuta a mmahiku a Yesaya, nave tiheeni Owo eemerenryeiye wi yeereye? (2) Ewehereryo taani Yehova aavanheiye achu oororomeleya? (Yesaya 30:18, 19)
4 Masu oopacerya a Yesaya ekapitulu 30, Yehova onnaathariha Ayuta ntoko “anamwane oohileeleya” yaawo ‘yiisuukelela soocheka vasulu va soocheka.’ Owo onnatitelela oloca: ‘Ola muloko woohiiwelela, . . . yoowo ohinakhwelaru wiiwa mahusiheryo a Apwiya.’ (Yes. 30:1, 9, PMM) Nthowa na achu okhooca owiriyana, Yesaya aahiloherya wi Yehova aahaala weemererya wi awo ehoolele epahu. (Yes. 30:5, 17; Yer. 25:8-11) Nave eyo ti yeeyo yeeren’ye vaavaa Apapulu yaakunxaya awo wi yakhale akapuro. Nyenya mwa yaawo yaakhalamo Ayuta akina oororomeleya, nave Yesaya aahaavaha michaka sa ewehereryo. Owo aahaaleela yaawo wi Yehova nihiku nimoha aahaala weemererya wi awo ekookele o Yerusalemu. (Mwaalakhanye Yesaya 30:18, 19, TNM.) Nave ela ti yeeyo yeeren’ye chiryene. Yehova aahaataphula yaawo wookapuroni o Papulu. Nyenya, iyaakha sincipale saahivira Yehova ahaakumve waataphula yaawo. Masu awi “Yehova onnawehererya moopixa murima wi awooniheryeeni mahala” yooniherya wi yaamviravo elukuluku achu oororomeleya ehaakumve otaphuliwa. Mweeparipari, Aisarayeli yaamaliha iyaakha 70 eri wookapuroni o Papulu akina a yaawo ehaakumve weemereryiwa wi ekookele o Yerusalemu. (Yes. 10:21; Yer. 29:10) Vaavaa Aisarayeli yaaryaaya wookapuroni o Papulu awo yaaninla nthowa nawi yaari oothananaxa, nyenya vaavaa awo yaakookenlaaya owannyaya awo yaahinla nthowa nawi yaahihakalala vancipale.
5. Yoororomeliha taani Yesaya 30:19 enanivahaaya?
5 Olelo nnanwerya olipiheya moorweela wa masu ala: “Wakhuwelaru wa Apwiya, chiri awo anamoomorela ikharari.” (Yes. 30:19, PMM) Yesaya ooniroromeliha wi Yehova onahaala oniwiriyana moomaaleleya vaavaa nninlaahu wa Yoowo, nave onahaala waakhula mavekelo ahu mwawaakuveya. Yesaya ohaaceererya: “Yiiwaru, anamwaakhula.” Masu yaala oororomeliha annanuupuxerya wi Tiithi ahu chiryene onnachuna waakhaviherya yaale anamveka nikhaviheryo. Osuwela yeela ennanikhaviherya ovilela moohakalala.
6. Ti mwawiihai masu a Yesaya enooniheryaaya wi Yehova onnawiriyana mavekelo a mmoha ti mmoha a alapeli awe?
6 Echu taani ekina eversikulu yeela enanihusihaaya vooloca sa mavekelo ahu? Yehova onnawiriyana mavekelo a mmoha ti mmoha a hiyo. Ntakhara heeni nnalocaahu yeela? Makupa oopacerya a Yesaya ekapitulu 30, masu awi “nyuwaano” enaphariheliwa wi elociwe sa achu ancipale yooniheryaka wi Yehova onnaapwacha achu awe ntoko nikhuuru. Nyenya, mu eversikulu 19 BNM masu awi “nyuwano” enaphariheliwa elociwaka sa muchu mmoha, yooniheryaka wi owo onnampwacha mmoha ti mmoha. Yesaya oorepa: “Nyuwano . . . himurwatho mwinla. Apwiya anamomorelani ikharari ni anamokhaviheryani nyuwano mwawitxhanaru.” Ntoko tiithi oosivela, Yehova hanaloca wa mwanawe ooceecheya: “Weyaano onaphwanela okhala oolipa ntoko munnaa naari murokoraa.” Mweeparipari, owo onnanikhapelela ni owiriyana mavekelo a mmoha ti mmoha a hiyo moopwacha.—Sal. 116:1; Yes. 57:15.
Tiheeni Yesaya aachuneiye othariha vaavaa aalonceiye: ‘Muhimuhiye Yehova wi ichuuwe?’ (Moone eparakrafo 7)
7. Ti mwawiihai Yesaya ni Yesu yoonihenryaaya ochuneya waya otitelela ovekela?
7 Vaavaa nnavekelaahu wa Muluku ahu nave nimuleela echu vyakala yeeyo enanuukhula, woopaceryani Yehova onnanivaha ikuru seiyo nnachunaahu wi nivilele nnikacamiho. Nave wakhala wi nikacamiho nahu hinimanle mwawaakuveya ntoko naaweheryaahu, nnaphwanela otitelela omveka Yehova ikuru wi nivileleno nenlo. Owo onnaniwopa wi neereno yeeyo. Ela ti yawooneya moorweela wa masu a Yesaya: ‘Muhimuhiye Yehova wi ichuuwe.’ (Yes. 62:7, PMM) Ela enataphulela eheeni? Mavekelo ahu wa Yehova enaphwanela okhala ootitelela ntoko wi hinnachuna omweemererya Yehova wi iichuuwe. Masu a Yesaya annanuupuxerya maphwanaphwaniho a Yesu vooloca sa mavekelo anaphwanyeya mu Luka 11:8-10, 13. Mu yoorepa yeela Yesu onceenyerya ovekela ‘mootitelela’ ni ‘otitelela oveka’ munepa waweela. Hiyaano nnanwerya tho omveka Yehova ohoolela yoowo nnachunaahu wi nipake soolakelela saphaama.
YEHOVA ONNANIVAHA OHOOLELA
8. Mmahiku a khalai, ti mwawiihai masu a Yesaya 30:20, 21 yaakhwanenlaaya?
8 Mwaalakhanye Yesaya 30:20, 21, PMM. Vaavaa Apapulu yaamurincaaya Yerusalemu eyaakha emoha ni emeya, achu yaahihoolela makacamiho matokweene yaawo yaari awunlaana ntoko yoolya ni maahi. Nyenya mwawiiwanana ni eversikulu 20 ni 21, Yehova aahiroromeliha wi waakhanle wi Ayuta aacharuwa ni otoroka moonelo aya, owo aahaala waavuluxa. Amulocaka Yehova ntoko “Muhusiha” aya mutokotoko, Yesaya aahaaroromeliha achu wi Yehova aahaala waahusiha omulapela Owo mmukhalelo waweemereryeya. Masu yaala yaahaakhwanela vaavaa Ayuta yaataphuliwaaya wookapuroni. Yehova aahooniherya wi aahikhala Muhusiha Mutokotoko ntakhara yaawo, nave mu ohoolela wawe, achu awe yaahikhumelela phaama mu okookiherya malapelo aweela. Hiyaano ninnahakalala okhalano Yehova ntoko Muhusiha ahu Mutokotoko olelo.
9. Mmukhalelo taani mmoha nnaakhelaahu ohoolela wa Yehova olelo?
9 Mu iversikulu seiha, Yesaya ooloca wi hiyaano nri ntoko oohuserya yaawo enahusihiwa ni Yehova mmikhalelo miili. Yesaya ooloca: ‘Onammoona ni miitho aa Muhusiha aa Mutokotoko.’ Mu niphwanaphwaniho nenla, Yesaya olonce wi Muhusiha eemenle ohoolo wa oohuserya awe. Hiyaano nookhalano ekari ya ophura mahusiheryo awe olelo. Ti mwawiihai Yehova onanihusiheiye? Owo onneerano yeela moorweela wa marehereryo awe. Hiyaano ninnathamalela vancipale ntakhara ohoolela wookwakwaleya nnaakhelaahu moorweela wa marehereryo a Yehova! Mahusiheryo nnaakhelaahu mmithukumano sahu sa muloko, sa muceche, sa ekulucu, soolaleeryiwa, ixilema ni mikhalelo mikina, sinnanikhaviherya ovilela moohakalala variyari va ilukuluku sookacamiha.
10. Mmukhalelo taani nniiwaahu “nsu, oculi [wahu]”?
10 Yesaya oothariha mukhalelo wanaawiili Yehova onanihusiheiye, owo ooloca: “Onarwa wiiwa nsu, oculi waa.” Mu eversikulu yeela, mulipa a miririmu oomuthariha Yehova ntoko muhusiha oopwacha yoowo oneeca oculi wa oohuserya awe, aathoonyeryaka ephiro yoochara ni aavahaka ohoolela. Olelo ninnawiriyana nsu na Muluku oculi wahu. Mwawiihai? Masu ooveereliwa a Muluku annaphwanyeya Mpiipiliyani ovinyerya khalai, nihaakumve okhala. Mwawiihiiha, vaavaa nnamwaalakhanyaahu Piipiliya, enakhala ntoko wi nnawiriyana nsu na Muluku orweela oculi wahu.—Yes. 51:4.
11. Wi nivilele moohakalala, mikhalelo taani miili nnaphwanelaahu ochariha, nave ntakhara heeni?
11 Ti mwawiihai nneeraahu niphure vancipale ohoolela Yehova onavahereryeiye orweela wa marehereryo ni Masu awe. Moone wi Yesaya ooloca mikhalelo miili. Yoopacerya, ‘ti yoola mphiro.’ Yanaawiili, ‘muchareke.’ (Yes. 30:21) Honaakhwana pahiru osuwela “ephiro.” Nnaphwanela tho ‘ocharaka.’ Moorweela wa Masu a Yehova ni othariha onavahereryiwa mmarehereryo awe, ninnahuserya yeeyo Yehova onachuneiye wi nipake. Hiyaano tho ninnahuserya mukhalelo wa opharihela yeeyo nnahuseryaahu. Wi nivilele moohakalala mmuteko ahu wa Yehova, nnaphwanela ochariha mikhalelo seiha miili. Pahiru neerano hiihaa nnahaala oreelihiwa ni Yehova.
YEHOVA ONNANREELIHA
12. Mwawiiwanana ni Yesaya 30:23-26, ti mwawiihai Yehova onaareeliheiye achu awe?
12 Mwaalakhanye Yesaya 30:23-26, PMM. Ti mwawiihai yooloherya yeela yaakhwanenlaaya wa Ayuta yaawo yaakookenle o Isarayeli emanle otaphuliwa wookapuroni o Papulu? Awo yaahaakhela mareeliho mancipale mmikhalelo soomiili—woomwiilini ni woomunepani. Yehova aahaavaha achu awe yoolya yincipale. Echu yoochuneyaxa, owo aahaavaha ichu sincipale yaachunaaya wi elipihe onthamwene aya ni yoowo ni opacerya omurumeela yoowo mmukhalelo woophwanelela wanaawiili. Mareeliho oomunepani achu a Muluku yaapunhaaya mu elukuluku yeele yaanapwaha echu vyakala awo yaapunhaaya khalai. Eversikulu 26, ennooniherya wi Yehova aahaavaha waarya otokweene, ela tiwi, aahaakhaviherya yaawo wiiwexexa Masu awe. (Yes. 60:2) Mareeliho a Yehova yaahaakhaviherya alapeli awe otitelela omurumeela yoowo moohakalala ni ophwanya ikuru “wanthowa na weeliwa murima.”—Yes. 65:14, TNM.
13. Ti mwawiihai yooloherya ya okookiheryiwa malapelo aweela anaakhwanelaaya mmahiku ahu?
13 Apwanne yooloherya vooloca sa okookiheryiwa malapelo aweela annaphariheleya wa hiyaano olelo? Aai chiryene! Mmukhalelo taani? Ovinyerya mu 1919 E.K., mamilyawu a achu annataphuliwa wookapuroni a Papulu Mutokotoko, yaawo ari malapelo atheru a elapo yoothene. Awo aahooleliwa mu nipuro naphaamaxa opwaha Elapo ya Nlakano ya Aisarayeli. Awo aahooleliwa o parataiso oomunepani. (Yes. 51:3; 66:8) Parataiso yoola oomunepani tiheeni?
14. Parataiso oomunepani tiheeni, nave taani anakhala mu parataiso yoowo olelo? (Moone Masu Atharihiwe.)
14 Ovinyerya mu 1919 E.K., oothanliwa annapuha okumi mu parataiso oomunepani. b Moovira wa elukuluku, oothanliwa ni yaale arino ewehereryo ya okhala veelaponi yavathi, ela tiwi, “ipucepuche ikina,” annavolowa tho mu elapo yeela yoomunepani nave annapuha mareeliho mancipale a Yehova.—Yoh. 10:16; Yes. 25:6; 65:13.
15. Ti woowi parataiso oomunepani onaphwanyeyeiyewo?
15 Ti woowi elapo yoomunepani, naari parataiso onaphwanyeyeiyewo olelo? Alapeli a Yehova ananwerya ophwanyeya mmakupa oothene a elapo. Mwawiihiiha, parataiso oomunepani awo anakhalaayamo onnaphwanyeya mu elapo yoothene. Olelo, moohiphwacha weiwo nnakhalaahuwo, nnanwerya opaka makupa a parataiso oomunepani vaavaa nnakhaviheryaahu malapelo eeparipari.
Tiheeni mmoha ti mmoha a hiyo onaphwaneleiye weera wi aaceererye oreera wa parataiso oomunepani? (Moone eparakrafo 16-17)
16. Ti mwawiihai nneeraahu ntitelele woona oreera wa parataiso oomunepani?
16 Wi ntitelele opaka makupa mparataiso oomunepani, opwaha soothene, nnaphwanela otitelela othamalela onna ahu Weekristu wa elapo yoothene. Nni neereno hai yeela? Moorweela wa otikitheryeya mu ichu saphaama sa anna ni arokora ahu ohiya mu ohiphaameya waya. (Yoh. 17:20, 21) Ntakhara heeni ela ti yoochuneyaxa? Muupuwele olikanyiha wu. Hiyaano ninnaweherya woona miri soohiyanahiyana mmatakhwa ooreera. Moolikana, mmiloko sahu olelo, aakhalamo achu oohiyanahiyana yaawo analikanyihiwa ni miri. (Yes. 44:4; 61:3) Nnaphwanela opaka owetha wahu wi ntitelele otikitheryeya mu oreera wa “ntakhwa,” ohiya mu mahoonya anaphwanyeya mu “miri” sinaacamenle. Hannaphwanela weemererya wi oohiphaameya wahu naari wa akina mmulokoni onanarihe woona wahu oreera wa wiiwanana wa onna ahu Weekristu wa elapo yoothene.
17. Tiheeni mmoha ti mmoha a hiyo onaphwaneleiye weera wi aaceererye wiiwanana mmulokoni?
17 Tiheeni mmoha ti mmoha a hiyo onaphwaneleiye weera wi muloko otitelele okhala wawiiwanana? Nnaphwanela okhala achu oopaka murecele. (Mat. 5:9; Aro. 12:18) Elukuluku ti elukuluku nnapaceryihaahu opaka murecele mmulokoni ni akina, ninnaaceererya oreera wa parataiso oomunepani. Noosuwela wi Yehova oomuthanla mmoha ti mmoha a yaawo eri mparataiso oomunepani wi eye mmalapelo aweela. (Yoh. 6:44) Mwaanyiherye mukhalelo Yehova onakhaleiye oohakalala vaavaa onooneiye wiilipixerya wahu wi nlipihe murecele ni wiiwanana wa yaale onawooneiye okhala oochuneyaxa—alapeli awe!—Yes. 26:3; Axeu 2:7.
18. Ichu taani nnaphwanelaahu wuupuwelela wiiliwiili, nave ntakhara heeni?
18 Ti mwawiihai nneeraahu niphure vancipale orweela wa mareeliho yaawo nnaakhelaahu ntoko alapeli a Muluku? Nnaphwanela wuupuwelela mwawiiseela vooloca sa yeeyo nnahuseryaahu Mmasu a Muluku ni mu soolaleeryiwa sahu inathipeleya Mpiipiliyani. Mwawiihiiha, ohuserya ni wuupuwelela onahaala onikhaviherya wunnuwiha mikhalelo Seekristu seiho sinahaala onceenyerya wooniherya “osivela wa onna” ni ‘okhalano niphwanya mukina ni mukhwaawe’ mmulokoni. (Aro. 12:10) Vaavaa nnuupuwelelaahu mareeliho nryaahuno hiihaano, ninnalipiha onthamwene ahu ni Yehova. Vaavaa nnuupuwelelaahu mareeliho yaawo Yehova oniroromelinheiye onivaha omwaahiyu, ewehereryo ahu ya omurumeela yoowo okhala wookhala ennakhala yoolipa. Opwaha soothene, ela enahaala waaceererya ohakalala wahu mu omurumeela Yehova olelo.
NRI OOLAKELELA OVILELA
19. (1) Mwawiiwanana ni Yesaya 30:18, tiheeni nnaphwanelaahu ororomela? (2) Tiheeni enahaala onikhaviherya ovilela moohakalala?
19 Yehova “onamvinya” mu nsina nahu vaavaa onahaaleiye oruuha makuchuwelo a elapo yeela yootakhala. (Yes. 30:18) Noosuwela wi Yehova ti “Muluku eekhaikhai” nave wi owo heemererya wi elapo ya Satana etitelele okhala mu elukuluku yincipale opwaha vaavaa enaphwanelaaya. (Yes. 25:9) Hiyaano ninnawehererya moopisa murima ni Yehova wi nihiku na otaphuliwa wahu nnahaala ophiya. Mwawiihiiha, nri oolakelela otitelela ovaha esisapo ekari ahu ya ovekela, ohuserya ni opharihela Masu a Muluku ni wuupuwelela mareeliho ahu. Vaavaa nneerahuno yeela, Yehova onahaala onikhaviherya ovilela moohakalala mu omurumeela wahu yoowo.
NCIPO 142 Ewehereryo Ennanivaha Olipa Murima
a Mwaha yoola onahaala othokororya ichu raru seiho Yehova onapakeiye wi aakhaviherye alapeli awe ovilela makacamiho moohakalala. Nnahaala omuthokororya Yesaya ekapitulu 30 wi nihuserye sincipale vooloca sa ichu seiho. Vaavaa nnathokororyaahu ekapitulu yeela, nnahaala woona ochuneya waya ovekela wa Yehova, ohuserya Masu awe ni wuupuwelela ichu saphaama Yehova onanivaheiye hiihaano ni onahaaleiye onivaha omwaahiyu.
b MASU ATHARIHIWE: Hiyaano ninnakhala mu “parataiso oomunepani” vaavaa nnamurumeelaahu Yehova mwawiiwanana. Mwawiihiiha, nookhalano yoolya yoomunepani yincipale yeeyo enanitaphula wa sawootha sa malapelo atheru nave nookhalano muteko mutokweene ni woohakalaliha wa olaleerya michaka saphaama sa Omwene wa Muluku. Hiyaano ninnapuha onthamwene wawaacameleya ni Yehova, nave ninnakhala mmureceleni ni anna ni arokora ahu oosivela, yaawo ananikhaviherya ovilela moohakalala ni makacamiho ahu a mookumini. Ninnavolowa mu parataiso oomunepani vaavaa nnapaceryaahu omulapela Yehova mmukhalelo waweemereryeya ni vaavaa nnapakaahu wiilipixerya wahu wi nimutakiherye yoowo.