1. Tiheeni nnaweheryaahu, nave nroromelo taani nryaahuno?

 NINNAWEHERYA ohoolela wiiciwa vaavaa nnaakhwaniheryaahu muteko ahu woolaleerya. Wiica yoola onanwerya waaceereryeya omwaahiyu. (Tan. 11:44; 2 Tim. 3:12; Wup. 16:21) Naamwi hiihaa, ninnaroromela wi Yehova onahaala onivaha nikhaviheryo nnachunaahu. Ntakhara heeni? Yehova ilukuluku soothene onnaakhaviherya alapeli awe wi yaakhwaniherye mirici saya, moohipwacha mukhalelo iho iryaaya soovila. Wi niphwanaphwanihe, hankooni nthokororye saweereya savakhaani sa mu okumi wa mulipa a miririmu Esekiyeli, yoowo aalalenrye Ayuta yaawo yaari wookapuroni o Papulu.

2. Ti mwawiihai Yehova aatharinheiye achu a mu ekulucu ya Esekiyeli, nave tiheeni nnahaalaahu othokororya mmwaha yoola? (Esekiyeli 2:3-6)

² Achu a mu ekulucu Esekiyeli aalaleeryeiye yaari a mukhalelo taani? Yehova aahiloca wi awo yaari “aciyamaaru,” “awiikhoma” ni ‘oohileeleya.’ Awo yaari oonanaraxa ntoko miiwa ni awoopihaxa ntoko walisi. Ti nthowa nene Yehova aalonceiye ni Esekiyeli ilukuluku sincipale: “Ohoove!” (Mwaalakhanye Esekiyeli 2:3-6, PMM.) Esekiyeli aari ooreheryeya waakhwaniherya murici awe woolaleerya nthowa nawi owo (1) aarumihiwe ni Yehova, (2) munepa wa Muluku waahimvaha nlipiho owo aachuneiye, ni (3) Masu a Muluku yaahilipiha nroromelo nawe. Ichu seiha raru saamukhavihenrye hai Esekiyeli? Nave ti mwawiihai sinanikhaviheryaaya olelo?

3. Masu taani yaamulipinhe Esekiyeli nave ti mwawiihai Yehova aamuroromelinheiye wi Owo aahaala omukhaviherya?

³ Yehova aaloca wa Esekiyeli: “Miyo kinnooruma.” (Ese.  2:3, 4, PMM) Masu yaala yaahimulipiha Esekiyeli. Ntakhara heeni? Moohikhwa minikwa owo aahuupuwela wi Yehova aahipharihela masu mamohamoha vaavaa Owo aamuthanlileiye Mose ni Isaiya ntoko alipa a miririmu Awe. (Muk. 3:10; Yes. 6:8) Esekiyeli tho aahisuwela mukhalelo Yehova aakhavihenryeiye alipa a miririmu yaale eeli ovootha makacamiho aya. Mwawiihiiha, vaavaa Yehova aalonceiye ni Esekiyeli ikwaha piili: “Miyo kinnooruma,” mulipa a miririmu aakhalano mathowa aphaama a ororomela nikhaviheryo na Yehova. Nave tho Esekiyeli aahirepa ikwaha sincipale: “Yaarwa wa miyo masu a Apwiya [Yehova].” (Ese. 3:16) Ohiya yeeyoru, owo mu ikwaha sincipale aaloca: “Yaarwa [wanaawiili] masu a Apwiya wa miyo.” (Ese. 6:1) Mweeparipari, Esekiyeli aari oolekecheya wi owo aarumihiwe ni Yehova. Mwawaaceererya, apapa awe yaari mulipa a mukucho. Akhweya awo yaahimuhusiha Esekiyeli wi Yehova wiiliwiili aanaloca ni alipa a miririmu Awe wi Owo aahaala waakhaviherya yaawo. Ntoko yootakiherya, Yehova aahiloca ni Isaki, Yakopo ni Yeremiya: “Miyo kiri ni weyo.”—Map. 26:24; 28:15; Yer. 1:8, PMM.

4. Masu taani oolipiha yamvanhe ikuru Esekiyeli?

⁴ Ti mwawiihai Aisarayeli ancipale yaahaalaaya waakhulela michaka sa Esekiyeli? Yehova aaloca: “Achu a Isarayeli hekachuna woowiriyana ntakhara awo hanchuna okiwiriyana miyo.” (Ese. 3:7, PMM) Moorweela wa omukhooca Esekiyeli, achu yaamukhooca Yehova. Masu yaala yaamuroromeliha Esekiyeli wi moorweela wa achu omukhooca, eyo hiyaataphulela wi owo aari mulipa a miririmu oonanara. Yehova tho aamuroromeliha Esekiyeli wi vaavaa yeeraaya yaakhwanele masu a othoriha owo aalalenryeiye, achu yaahaala ‘osuwela wi mwa yaawo aakhalamo mulipa a miririmu.’ (Ese. 2:5; 33:33) Moohikhwa minikwa, masu yaala oolipiha yaahimvaha Esekiyeli ikuru aachuneiye wi aakhwaniherye orummwa awe.

5. Mwawiiwanana ni Yesaya 44:8, tiheeni enanlipiha?

⁵ Hiyaano tho ninnakhala oolipiheya moorweela wa osuwela wi nrumihiwe ni Yehova. Owo onnancicimiha moorweela wa oniichana “anamoona awe.” (Yes. 43:10, PMM) Ela ekari etokweene! Hiihaa ntoko Yehova aalonceiye ni Esekiyeli: “Ohoove,” Yehova onnaloca ni hiyo: “Muhituthuwe!” Ntakhara heeni nihinaphwanelaahu owoova amwiicani ahu? Hiihaa ntoko Esekiyeli hiyaano nrumihiwe ni Yehova nave nookhalano nikhaviheryo Nawe.—Mwaalakhanye Yesaya 44:8, PMM.

6. (1) Ti mwawiihai Yehova onaniroromelinheiye wi onahaala onikhaviherya? (2) Tiheeni enanlipiha?

⁶ Yehova ooniroromeliha wi onahaala onikhaviherya. Ntoko yootakiherya, elukuluku vakhaani Yehova ahaakumve oloca: “Nyuwo, . . . muri anamoona aka,” owo aahi: “Waalapuwaka mihice, kiri ni weyo; maahi herwa yoomirya. Waaviraka mmooroni, hovya; makalume herwa eweeyela.” (Yes. 43:2, PMM) Vaavaa nnalaleeryaahu, ilukuluku ikina ninnahoolela ichu soovila ntoko maahi awaaca ni makacamiho matokweene ari ntoko mooro. Naamwi hiihaa, nnikhaviheryo na Yehova ninnatitelela olaleerya. (Yes. 41:13) Ntoko mmahiku a Esekiyeli, ancipale olelo annakhooca michaka. Nyenya ela henataphulela wi hiyaano hannalaleerya phaama. Ninnakhala oolipiheya nthowa nawi Yehova onnasiveliwa vaavaa nnatitelelaahu olaleerya michaka sawe moororomeleya. Murummwa Paulo ooloca: “Muchu ti muchu onahaala waakhela nchuwelo nawaweene mwawiiwanana ni muteko awe.” (1 Ako. 3:8; 4:1, 2) Murokora mmoha onarumeela ntoko piyoneera mu iyaakha sincipale ooloca: “Osuwela wi Yehova onnachuwela wiilipixerya waka, eyo ennakivaha ohakalala.”

7. Ti mwawiihai Esekiyeli isooneiye vaavaa uupuweleleiye vooloca sa yawoona yeeyo oonihiweiye? (Moone eruku ya ekaapa.)

⁷ Esekiyeli aahoona mukhalelo munepa wa Muluku waaryaaya woowerya. Mu yawoona, owo aaheerela onamoona munepa waweela olapaka variyari va soopatuxiwa soowerya soomunepani ni variyari va maroota matokweene ya ekaaro ya wirimu. (Ese. 1:20, 21) Esekiyeli aakhulenle hai? Owo aahirepa yeeyo yeeren’ye: “Koonnaaka yeela kaathipela eyuuci vathi.” Nthowa na otikhiniheya, Esekiyeli aahuuwela vachayani. (Ese. 1:28, PMM) Voocharela, vaavaa Esekiyeli uupuwelenleiye vooloca sa yawoona yeele yootikhiniha, eyo yaahilipiha nroromelo nawe nawi, nnikhaviheryo na munepa wa Muluku, owo aanwerya okhwaaniherya orummwa awe.

8-9. (1) Tiheeni yeeren’ye ni Esekiyeli vaavaa Yehova aamurummeiye wi ‘avinye?’ (2) Ti mwawiihai Yehova aamulipinheiye Esekiyeli wi alaleerye mu ekulucu yeele yoovila?

⁸ Yehova aahimuruma Esekiyeli: Mwaana a muchu, “nkavinya weemele, kinchuna oloca ni weyo.” Nlamulo nenla vamoha ni munepa wa Muluku waahimvaha Esekiyeli ikuru aachuneiye wi awerye ovinya. Esekiyeli aarepa: “Munepa waakivolowa miyo okeemesha.” (Ese. 2:1, 2, PMM) Ohoolo waya nave mu orummwa awe woothene, Esekiyeli aahoona ohoolela moorweela wa “moono” wa Muluku, ela tiwi, munepa waweela wa Muluku. (Ese. 3:22; 8:1; 33:22; 37:1; 40:1, PMM) Munepa wa Muluku waahimulipiha Esekiyeli ntakhara murici aakhenleiye wa waalaleerya achu yaari ‘aciyamaaru ni oohileeleya’ a mu ekulucu awe. (Ese. 3:7, PMM) Yehova aahiloca ni Esekiyeli: “Nto miyo kinamoovaha nthiti ntoko yaawo, kuumihe murimaa ntoko tho wawaya. Kinamoolipiha opwaha mwala woolipasha.  Ohiwoove, nari otuthuwa vamiithoni vaya.” (Ese. 3:8, 9, PMM) Mweeparipari, yaari ntoko wi Yehova aaloca wa Esekiyeli ariki: ‘Oheemererye wi ohileeleya wa achu wooceecheihe. Kinamoolipiha.’

⁹ Ohoolo waya munepa wa Muluku waamukhapelela Esekiyeli variyari va olaleerya mu ekulucu awe. Esekiyeli oorepa: “Ikuru sa moono wa Apwiya saakilipiha.” Mulipa a miririmu aahimaliha esumana emoha wi aahuserye ni wiiwexexa moomalela michaka aaphwaneleiye olaleerya wi awerye olaleerya mwamvai. (Ese. 3:14, 15, PMM) Voocharela, Yehova aahiloca wa yoowo wi aye opopani, weiwo ‘munepa waahimvolowa yoowo.’ (Ese. 3:23, 24, PMM) Esekiyeli aari ooreheryeya wi apacerye orummwa awe.

10. Nikhaviheryo taani nnachunaahu wi naakhwaniherye muteko ahu woolaleerya nave ntakhara heeni?

¹⁰ Nikhaviheryo taani nnachunaahu wi naakhwaniherye muteko ahu woolaleerya? Wi naakhule, muupuwele yeeyo yeeren’ye ni Esekiyeli. Ahaakumve opacerya olaleerya, Munepa wa Muluku waahimvaha ikuru seiho owo aachuneiye. Hiihaa ntoko Esekiyeli, olelo hiyaano tho ninnalaleerya pahiru nthowa nawi munepa wa Muluku onnanikhaviherya. Ntakhara heeni? Nthowa nawi Satana onnawana ni hiyo wi amaalihe muteko ahu woolaleerya. (Wup. 12:17) Achu ancipale anuupuwela wi Satana tooweryaxa ophiyerya wi hinni niwerye omvootha. Nyenya moorweela wa muteko ahu woolaleerya, ninnawerya omvootha yoowo! (Wup. 12:9-11) Mmukhalelo taani? Vaavaa nnalaleeryaahu ninnooniherya wi hinnoopopiheya ni Satana. Ilukuluku soothene nnalaleeryaahu, ninnamvootha Satana. Mwawiihiiha, makuchuwelo taani nnaphiyeryaahu nthowa na osuwela wi nnanwerya waakhwaniherya muteko ahu woolaleerya naamwi niiciwaka? Nnanwerya ophiyerya makuchuwelo awi munepa waweela onnanivaha ikuru nave nookhalano weemereryiwa ni Yehova.—Mat. 5:10-12; 1 Pet. 4:14.

11. Tiheeni munepa wa Muluku oneeraaya wa hiyo, nave ti mwawiihai nnahaalaahu otitelela waakhela yoowo?

¹¹ Echu taani ekina nnahuseryaahu vaavaa nnuupuwelelaahu mukhalelo Yehova amvanheiye Esekiyeli ikuru aachuneiye wi alaleerye? Munepa wa Muluku onanwerya onivaha ikuru nnachunaahu wi nivoothe nikacamiho vyakala nnakumanaahuno mmuteko woolaleerya. (2 Ako. 4:7-9) Vano echu taani nnaphwanelaahu weera wi nroromele wi nnahaala otitelela waakhela munepa wa Muluku? Nnaphwanela ovekela vooloca sa yeeyo moohihiyererya, nroromelaka wi Yehova onahaala wiiwa mavekelo ahu. Yesu aahaahusiha oohuserya awe: “Titelelani oveka, . . . titelelani waavya, . . . titelelani omana nsele.” Ntoko yookhumelela, Yehova onahaala ‘waavaha munepa waweela yaale anamveka.’—Luka 11:9, 13; Saw. 1:14; 2:4.

12. Mwawiiwanana ni Esekiyeli 2:9–3:3, eroolu yaarweenle woowi nave tiheeni yaaphwanyeyamo?

¹² Esekiyeli haalipihiwe pahiru moorweela wa munepa wa Muluku nyenya tho aahilipihiwa moorweela wa masu a Muluku. Mu yawoona, Esekiyeli aahoona ntata nipharenle eroolu. (Mwaalakhanye Esekiyeli 2:9–3:3, PMM.) Eroolu eyo yaarwenle woowi? Tiheeni yaaphwanyeyamo? Ti mwawiihai eyo yaamulipinhaaya Esekiyeli? Hankooni noone. Eroolu yaarwenle omunyukhuni wa Muluku. Akhweya Yehova aahimpharihela munkeelo mmoha a ankeelo yaale axexe Esekiyeli aawonneiye khalai wi amunnyererye eroolu. (Ese. 1:8; 10:7, 20) Mu eroolu yaaphwanyeya masu a Muluku, ela tiwi, muchaka mutokweene wa othoriha wi Esekiyeli aaleele achu oomwaryeya yaari wookapuroni. (Ese. 2:7) Muchaka yoole waahirempwa mu makupa oomeeli a eroolu.

13. Tiheeni Yehova aamulenleiye Esekiyeli wi eerele eroolu, nave ntakhara heeni eyo yaanalyoolyowa?

¹³ Yehova aaloca wa mulipa a miririmu awe wi alye eroolu nave “erukulu [awe] evone” ni yeeyo. Esekiyeli aahiiwelela nave alya eroolu moomalela. Makupa yaala a yawoona enataphulela eheeni? Esekiyeli aaphwanela wiiwexexa phaama muchaka yoowo aayeiye olaleerya. Wi akhaleno nchuno na olaleerya, owo aaphwanela ororomela muchaka yoole. Voocharela, echu yootikhiniha yaaheereya. Esekiyeli aahoona wi eroolu ‘yaanalyoolyowa ntoko enuwi.’ (Ese. 3:3, PMM) Ntakhara heeni? Wa Esekiyeli, ekari ya omweemelela Yehova yaari yaweereya yoolyoolyowa naari yaphaama. (Sal. 19:8-11) Owo aamuthamalela Yehova nthowa na omuthanla ntoko mulipa a miririmu awe.

14. Tiheeni yaamukhavihenrye Esekiyeli okhala ooreheryeya wi eemererye murici awe?

¹⁴ Voocharela, Yehova aamuleela Esekiyeli: “Owiriyane masu oothene kinooleelaaka, okhapelele mmurimani mwaa.” (Ese. 3:10, PMM) Ni sooleeliherya seiha, Yehova aahimuleela Esekiyeli wi ahuserye masu yaarempwe mu eroolu yeele ni wuupuwelela vooloca sa yeeyo. Vaavaa Esekiyeli eenreiyeno yeele, nroromelo nawe naahilipa. Ohiya yeeyoru, owo aahimvahererya michaka sakuru wi aalaleerye achu. (Ese. 3:11) Vaavaa Esekiyeli iiwexenxeiye phaama ni ororomela masu a Muluku, owo aari ooreheryeya opacerya olaleerya ni otitelela ophiyerya omakuchuwelo wa murici awe.—Mulikanyihe ni Salmu 19:14.

15. Wi nivilele, tiheeni nnaphwanelaahu ‘okhapelela mmurimani mwahu?’

¹⁵ Wi nivilele mmuteko ahu woolaleerya, nnaphwanela tho weemererya wi masu a Muluku etitelele olipiha nroromelo nahu. Nnaphwanela  ‘okhapelela mmurimani mwahu’ ichu soothene Yehova onanleeleiye. Olelo, Yehova onaloca ni hiyo moorweela Mmasu awe, Piipiliya. Tiheeni nnaphwanelaahu weera wi Masu a Muluku evolowele muupuwelo, moonelo ni murima ahu?

16. Tiheeni nnaphwanelaahu weera ni Masu a Muluku nave ti mwawiihai nneeraahu nikhapelele mmurimani mwahu?

¹⁶ Vaavaa nnalyaahu ni wiichuuwa vakhaani, mwiili ahu onnakhala woolipa. Nave vaavaa nnahuseryaahu Masu a Muluku ni wuupuwelela, nroromelo nahu ninnakhala noolipa. Nla nihusiheryo nenlo Yehova onachuneiye wi nihuserye. Yehova onachuna wi “erukulu [ahu] evone,” ela tiwi, niiwexexe phaama Masu awe. Nnanwerya weerano yeela moorweela wa ovekela, waalakhanya ni wuupuwelela. Woopaceryani, ninnavekela wi nrehererye murima ahu wi naakhele muupuwelo wa Muluku. Voocharela, ninnamwaalakhanya Piipiliya. Ohoolo waya, ninnuupuwelela mwawiiseela vooloca sa yeeyo naalakhannyaahu. Ni yookhumelela taani? Wakhala wi ninnuupuwelela mwawiiseela, nnahaala wiiwexexa Masu a Muluku nave nroromelo nahu nnahaala okhala noolipa.

17. Ntakhara heeni ti woochuneya wuupuwelela yeeyo nnaalakhanyaahu Mpiipiliyani?

¹⁷ Ntakhara heeni ti woochuneya omwaalakhanya Piipiliya ni wuupuwelela vooloca sa yeeyo? Weerano yeeyo onnanivaha ikuru nnachunaahu wi nlaleerye michaka sa Omwene hiihaano ni wi nlaleerye michaka soovila sa othoriha omwaahiyu. Nave tho vaavaa nnuupuwelelaahu mikhalelo sootikhiniha sa Yehova, onthamwene ahu ni yoowo onamvira okhalaka woolipa. Ntoko yookhumelela, nnahaala okhalano echu yoolyoolyowa, naari yaphaamaxa, ela tiwi, murecele ni ohakalala.—Sal. 119:103.

18. Tiheeni achu a mu ekulucu ahu anahaalaaya osuwela, nave ntakhara heeni?

¹⁸ Esekiyeli aari mulipa a miririmu, nyenya hiyaano hooye. Mwawiihiiha, nri oolakelela otitelela olaleerya michaka sooveereliwa seiho Yehova okhapelenleiye Mpiipiliyani ophiyerya elukuluku yeeyo muteko woolaleerya oneeraaya okhwaanele. Vaavaa elukuluku ya othoriha eneeraaya ephiye, achu a mu ekulucu ahu hekhalano mathowa a oloca wi hiyaakhenle yoolokoha naari wi Muluku ori mwaakhooca. (Ese. 3:19; 18:23) Ohiya yeeyo, awo anahaala osuwela wi michaka naalaleeryaahu saarweela wa Muluku.

19. Tiheeni enahaala onivaha ikuru wi naakhwaniherye orummwa ahu?

¹⁹ Tiheeni enahaala oonivaha ikuru wi naakhwaniherye orummwa ahu? Ichu raru seiho saamulipinhe Esekiyeli. Hiyaano ninnatitelela olaleerya nthowa nawi noosuwela wi nrumihiwe ni Yehova, munepa waweela wa Muluku onnanlipiha nave Masu a Muluku annalipiha nroromelo nahu. Nnikhaviheryo na Yehova, ninnaceenyeryeya okhwaaniherya orummwa ahu ni ovilela ophiyerya “omakuchuwelo.”—Mat. 24:13.