1. Tiheeni Yehova onaneemereryeiye opaka?

YEHOVA onnaneemererya wi nlakeleleke mukhalelo nnachunaahu okhala. Owo onnanihusiha mukhalelo wa opaka soothanla saphaama, nave onnanikhaviherya okhumelela phaama vaavaa nnapakaahu soolakelela seiyo sinamuhakalaliha. (Sal. 119:173) Elukuluku nnapharihelaahu miruku seiyo sinaphwanyeya Mmasu a Muluku, ninnapaka soolakelela saphaama.—Ahe. 5:14.

2. Nikacamiho taani nnahoolelaahu nimanle opaka yoolakelela?

² Naamwi nipanke yoolakelela mwa miruku, nnanwerya owaniha okhwaaniherya yeeyo naapacenryaahu opaka. Muthokororye yootakiherya emoha: Munna yoowo ori mmiravo onnalakelela omwaalakhanya Piipiliya anteero. Owo onneerano phaama mu isumana vakhaani, nyenya ohoolo waya onnahiya omwaalakhanya ni mathowa makina. Murokora onnalakelela okhala piyoneera, nyenya nlelo onanvira aaceereryaka mahiku onahaaleiye opacerya opiyoneera. Nikhuuru na atokweene ninnalakelela okukhula muhuwo moopwahaxa nyenya sinnaviravo miyeeri mincipale ehikhwaaniheryaka yoolakelelaaya. Mikhalelo iha ti soohiyana, nyenya oothene yaala aakhalano echu emoha yoolikana. Oothene yaala hawenrye okhwaaniherya yoolakelela aya. Akristu a nsana noopacerya o Korinto yaahihoolela nikacamiho sintoko nenla. Moone yeeyo nnahaalaahu ohuserya orweela wa yaawo.

3. Yoolakelela taani Akorinto yaapankaaya, nyenya tiheeni yeeren’ye?

³ Mu eyaakha ya 55 E.K., Akorinto yaahipaka yoolakelela yoochuneyaxa. Awo yaahisuwela wi annaya o Yerusalemu ni o Yuteya, yaanahooseya ni othoiwa nave miloko mikina saahithukumanya ikhorowa wi yaakhaviherye yaawo. Opwaha oreera waya murima ni mahala,  Akorinto yaahilakelela opaka sooveleela wi yaakhaviherye asinnaya, mwa yeeyo yaahimukoha murummwa Paulo mukhalelo yeeraaya ekhaviherye. Owo aahaavahererya sooleeliherya nave aahimuthanla Tito wi akhaviherye othukumanya ikhorowa saaveleeliwa. (1 Kor. 16:1; 2 Kor. 8:6) Mu miyeeri vakhaani ohoolo waya, Paulo aahisuwela wi hiyaacharinhe ohoolela aavanheiye. Ntoko yookhumelela, ikhorowa saya hisaari sawaakhwanela mu elukuluku yoophwanelela wi ikerihiwe o Yerusalemu vamoha ni ikhorowa sa miloko mikina.—2 Kor. 9:4, 5.

4. Hiiha ntoko yooniheryiwaaya mu 2 Korinto 8:7, 10, 11, tiheeni Paulo aaceenyenreiye Akorinto opaka?

⁴ Akorinto yaahipaka yoolakelela yaphaama, nave Paulo aahaathamalela nthowa na nroromelo naya noolipa ni nchuno naya na okhala amahala. Nave owo aahaaceenyerya wi ekhwaaniherye muteko yaapacenryaaya. (Mwaalakhanye 2 Korinto 8:7, 10, 11.) Yaweereya aya ennanihusiha wi naamwi Akristu eri oororomeleya, annawaniha wi ekhwaaniherye yeeyo alakelenlaaya opaka.

5. Makoho taani nnahaalaahu waakhula?

⁵ Moolikana ni Akorinto, nnamoona okhala woovila okhwaaniherya yoolakelelaahu. Ntakhara heni? Nthowa na ohiphaameya, akhweya nnamukhalano yookhovelela ya ohipaka ichu mweelukuluku aaya. Naari echu yoohiwehereryeya enamukhumelela ophiyerya onooceeliha opaka echu yeeyo naalakelenlaahu. (Ekle. 9:11; Aro. 7:18) Nni naalikhele hai yoolakelela ni osuwela waakhanle wi onnachuneya otoroka? Nave nni nroromele hai wi nookhwaaniherya yeeyo naapacenryaahu opaka?

6. Elukuluku taani onachuneyaaya otoroka yoolakelela ahu?

⁶ Soolakelela ikina soochuneya hannaphwanela otoroka. Ntoko yootakiherya, ninnatitelela mu yoolakelela ahu ya omurumeela Yehova, nave nri oolakelela okhala oororomeleya wa oothelana ahu. (Mat. 16:24; 19:6) Nave soolakelela ikina, onamuchuneya otoroka. Ntakhara heeni? Nthowa nawi mikhalelo sinnatorokeya. Ichu taani inahaala onikhaviherya opaka soolakelela saphaama?

7. Nnaphwanela ovekela wa echu taani, nave ntakhara heeni?

⁷ Mumveke Yehova miruku. Yehova aahimveerela Tiyako orepa: “Mukina a nyuwo athowiwa miruku, amveke Muluku . . . , yoowo onnaavaha oothene moolakelela.” (Tiy. 1:5) Mmikhalelo mikina, oothene ahu ‘ninnathowiwa miruku.’ Mwawiihiiha mmuroromele Yehova mmakupa oomeeli vaavaa munapakaanyu yoolakelela ni elukuluku munatorokaanyu yoolakelela eyo. Yehova onahaala wookhaviheryaani opaka yoothanla yaphaama.

8. Otholathola taani nnaphwanelaahu opaka nihaakumve opaka yoolakelela?

⁸ Mpake otholathola. Mutholathole Mmasu a Muluku, mwaalakhanye soolaleeryiwa sa marehereryo a Yehova, nave mwaaleele achu yaawo munaaroromelaanyu. (Masi. 20:18) Otholathola wa mukhalelo yoola ti woochuneya muhaakumve opaka yoolakelela ya otoroka muteko, othaama, naari othanla mahusiheryo yaawo anahaala wookhaviheryaani ophwanya muteko yoowo oni woolivekeeni ikhorowa sawiikhaviheryano wi mutitelele omurumeela Yehova.

9. Nni niphure hai wakhala wi naachu oororomeleya wa hiyo mukhatiihu?

⁹ Mwaalikhele mathowa anaweerihaani opaka yoolakelela. Yehova onnathokororya mathowa ananeeriha opaka echu yammoori. (Masi. 16:2) Owo onachuna wi nikhale oororomeleya mu ichu soothene. Elukuluku nnapakaahu soolakelela, nnaphwanelatho okhala oororomeleya wa hiyo, ni wa akina vooloca sa mathowa ananeeriha opaka echu. Wakhala wi hanri oororomeleya moomalela, onamukhala woovila waakhwaniherya yoolakelela ahu. Ntoko yootakiherya, munna yoowo ori mmiravo akhweya onamulakelela okhala piyoneero. Mu elukuluku vakhaani ohoolo waya, owo onnoona okhala woovila okhwaaniherya iwora sa opiyoneero nave onnakhala oohihakalala mmuteko woolaleerya. Enamweereya wi mmiravo owo uupuwela wi yoolakelela awe ya okhala opiyoneero  yaari omuhakalaliha Yehova. Nyenya akhweya yoolakelelaawe yeeparipari ya okhala piyoneero naari nchuno na waahakalaliha asitiithi awe naari muchu vyakala yoowo onamucicimiheiye.

10. Tiheeni enachuneya wi muchu apake matorokelo?

¹⁰ Muthokororye yaweereya ya oohuserya a Piipiliya yoowo onalakelela ohiya omulya soona. Wuupaceryani, owo onniilipiserya nave hanamulya soona mu esumana emoha naari piili, nave voocharela, onnamulya soona wanaawiili. Vookuchula, owo onnakhumelela phaama! Omusivela wawe Yehova ni nchuno nawe na omuhakalaliha Yoowo ninnamukhaviherya owaniha ni yookhovelela awe.—Kol. 1:10; 3:23.

11. Ntakhara heeni munnaphwanela okhalano soolakelela sooluluwanya?

¹¹ Mukhale ooluluwanya. Wakhala wi mwa muchu ooluluwanya, munanwerya okhwaaniherya yoolakelelaanyu. Ntoko yootakiherya, akhweya munamulakelela omwaalakhanya Piipiliya wiiliwiili, nyenya wakhala wi hampanke marehereryo ooluluwanya, hamuni nwerye opaka yeeyo mwaachunaanyu. * Naari atokweene mmulokoni anamulakelela okukhula muhuwo moopwahaxa, nyenya mu elukuluku ohoolo waya, awo hanachariha nlakano yaapankaaya. Wi ekhumelele phaama, awo anaphwanela wiipakela makoho ntoko ala: “Apwanne noopaka elista ya anna ni arokora yaawo yaahaala ophura ni oxekurya wahu? Apwanne nootikitherya elukuluku yoophwanelela wi naasekurye yaawo?”

12. Tiheeni nnaphwanelaahu opaka, nave ntakhara heeni?

¹² Mukhale oophimelela. Haavo wa hiyo muchu orino elukuluku, mavyakelo, naari ikuru sa opaka echu vyakala yeeyo nnachunaahu. Mwawiihiiha mukhale oophimelela ni ooluluwanya. Wakhala wooweryeya, munamuchuna otoroka yoolakelela mwaapankaanyu muhinaweryaanyu okhwaaniherya. (Ekle. 3:6) Mwaanyiherye wi mohaalikhela yoolakelela anyu, nave mpaka matorokelo anachuna nave moona wi munanwerya okhwaaniherya.. Muthokororye meerelo mathanu anahaala wookhaviheryaani okhwaaniherya yeeyo mpacenryaanyu.

13. Muni nwerye hai ophwanya ikuru munachunaanyu wi mukhwaaniherye yoolakelela anyu?

¹³ Mumveke Yehova ikuru. Muluku onamoovahaani “owerya” wi mukhwaaniherye yoolakelelaanyu. (Fil. 2:13) Mwawiihiiha mumveke Yehova munepa waweela wi woovaheeni owerya yoowo munachunaanyu. Mutitelele ovekela naamwi ekhalaka ntoko wi naakhulo na yooveka anyu ninnalekela. Mweere hiiha ntoko Yesu aalonceiye: ‘Mutitelele oveka nave [munepa waweela] munamvahiwa.’—Luka 11:9, 13.

14. Nlakiheryo nnaphwanyeya mu Masiposipo 21:5 nni nookhaviheryeeni hai okhwaaniherya yoolakelela anyu?

¹⁴ Mpake marehereryo. (Mwaalakhanye Masiposipo 21:5.) Wi mwaakhwaniherye muteko yoowo mpacenryaanyu, munaphwanela opaka marehereryo. Voocharela munaphwanela wiilipixerya olapa mwawiiwanana ni marehereryo yaawo. Mmukhalelo woolikana, vaavaa munapakaanyu yoolakelela, mpake elista ya ichu munachunaanyu opaka wi mwaakhwaniherye yoolakelela anyu. Wakhala wi muteko anyu wohinnuwa mweererye okawanya mmakupa makhaani nave mpakeke vakhaani vakhaani, eyo enamookhaviheryaani. Paulo aahaaceenyerya Akorinto wi yiikuheryeke echu ekhaani orweela wa sooveleela saya mu “nihiku noopacerya na esumana” ohiya oweherya naari weererya othukumanya elukuluku owo aaphiyeiye. (1 Kor. 16:2) Okawanya muteko mmakupa makhaani enamookhaviheryaani ohikhala oohaleeliheya.

15. Mmanle opaka marehereryo, tiheeni munaphwanelaanyu weera?

¹⁵ Wakhala wi moorepela yeeyo munachunaanyu opaka, onamukhala wookhweya okhwaaniherya. (1 Kor. 14:40) Ntoko yootakiherya, makhuuru a  atokweene mmulokoni aaceenyeryiwa omuthanla mutokweene mmoha wi arepeleke echu vyakala yeeyo atokweene analakelelaaya opaka, ophitaanyerya muchu othanliwe wi apake muteko owo, vamoha nnihiku anahaalaaya okuchula opaka soothene. Atokweene yaawo anachariha ohoolela yoola, annawerya okhwaaniherya soolakelela saya. (1 Kor. 9:26) Munanwerya weererya opaka emohamoha mu okumi anyu wa nihiku ti nihiku. Ntoko Yootakiherya, munanwerya orepela ichu seiho munachunaanyu opaka nihiku ti nihiku, nave murepe echu yoopacerya opaka vasulu va elista anyu. Wakhala wi moheerano, onamukhala wookhweya wa nyuwo okuchula yeeyo mpacenryaanyu.

16. Tiheeni eri yookhweleya wi mukhwaaniherye yoolakelela anyu, nave Aroma 12:11 onakhaviherya hai yeela?

¹⁶ Mwiilipiserye. Onnachuneya wiilipiserya wi mucharihe elista anyu ni okhwaaniherya yeeyo mpacenryaanyu. (Mwaalakhanye Aroma 12:11.) Paulo aahimuleela Timoteo wi ‘iiveleele’ nave ‘atitelele’ wi akhale muhusiha aphaama. Ekano yeela ennaphariheleya mu soolakelela soomunepani.—1 Tim. 4:13, 16.

17. Nni nimpharihele hai Éfeso 5:15, 16 mu waakhwaniherya yoolakelela ahu?

¹⁷ Mpharihele elukuluku anyu mwamiruku. (Mwaalakhanye Éfeso 5:15, 16.) Muthanle elukuluku ya okhwaaniherya yoolakelela anyu nave muhitoroke elukuluku yeeyo. Musepe oweherya elukuluku yawaakhwanela wi mweerevo echu, akhweya hamurwa mukhalano elukuluku yawaakhwanela wi mpake echu yammoori. (Ekle. 11:4) Mukhaleno ekaasoope, muheemererye ichu soohichuneyasa omaliha elukuluku anyu naari wiiya ikuru sanyu seiyo mwaahaalaanyu opharihela mu ichu soochuneyaxa. (Fil. 1:10) Wakhala wooweryeya, muthanle elukuluku yeeyo akina eneeraaya ehiwaakanyeryeeni. Mweerihe wi akina esuwele wi munnachuna elukuluku wi mukhale ootikitheryeya mu echu. Mmurehererye telefoni wi ahiwaakanyeryeni nave michaka munaakhelaanyu naari e-mail mwaalakhanye elukuluku ekina. *

18-19. Echu taani enahaala wookhaviheryaani okhala oohivelavela vaavaa munaphwanyaanyu sookwaculiha?

¹⁸ Muupuwele vooloca sa sookhumelela saphaama. Yookhumelela naari mphurelo wa yoolakelela anyu, eri ntoko vachu onakotelavo mukwaha anyu. Wakhala wi chiryene munnachuna ophiya wammoori, nyuwaano munahaala otitelela weeca, naamwi mphiro ene owaliwe munahaala ovira mphiro mukina. Mmukhalelo woolikana, wakhala wi ninnuupuwelela mphurelo wa muteko ahu, hinni nivelavele mwawaakuveya vaavaa nnaphwanyaahu sookwaculiha naari makhulukano.—Gal. 6:9.

¹⁹ Opaka soolakelela saphaama ti woovila, nave okhwaaniherya seiho tahi wookhweya. Nyenya nnikhaviheryo na Yehova, munanwerya ophwanya miruku ni ikuru munachunaanyu wi mukhwaaniherye yeeyo mpacenryaanyu.