Kiyariwe mu 1983. Mmahiku oopacerya a akumi aka, kaahikhalano okumi waphaama, nyenya vaavaa kaaryaakano iyaakha khumi, kaahipacerya woona wiicela mwiili woothene. Mu iyaakha piili ohoolo waya, nihiku nimoha kaavinya wooxiixelo, nyenya nkaaweryaru wiitannya. Naamwi keererya otannya meco saka, iho saari sooceecheya nkaaweryaru otannya. Ovinyerya nihiku nenle nkinaweryaru weeca. Ereca aka yoheeriha wi kihiweryeru winnuwa. Ophiyerya olelo, nkinaweryaru winnuwa kinakhala ntoko mwaana.

Mu miyeeri vakhaani ovinyerya vaavaa kaapacenryaaka wiiceliwa nave kihinawerya weeca, Anamoona a Yehova eeli yaaphiya owaani. Vaavaa aleco yaaphiyaaya owaani, wiiliwiili kaaneererya wiipitha. Nyenya mu nihiku nenle, kaahiweemererya athiyana ale eeli, wi eloce ni miyo. Vaavaa yaaloncaaya sa Parataiso, kaahuupuwela yeeyo kiiwalaaka elukuluku kaaryaakano iyaakha thanu. Mu elukuluku yeele, misiyonaariyo iichaniwa Jethro, yoowo aakhala o Suriname anaxekurya evilivili ahu ekwaha emoha mweeri ti mweeri nave aanamuhuserya Piipiliya ni apapa. Jethro aanakikhaliha mooreera murima, nave kaanasiveliwaxa ni yoowo. Nave asivovo aka, yaanakikuxa vaavaa yaayaaya mmithukumano sa Anamoona a Yehova seiho seereya mu evilivili ahu. Mwawiihiiha, Florence mmoha a athiyana yaale yaaphin’ye owaani vaavaa aakikonheiye wi kaamusiveliwa otitelela omuhuserya Piipiliya, kaahaakhula wi aai.

Florence, aakooka ni iyawe Justus, nave oopiili yaahipacerya okihusiha Piipiliya. Vaavaa yaasuwenlaaya wi nkaasuwela mukhalelo wa waalakhanya, yaakikhaviherya ohuserya waalakhanya. Moovira wa elukuluku, kaanawerya waalakhanya mukhataaka. Mu nihiku nimoha, mutheli owo aakileela wi yaarumihiwa o Suriname wi yarumeeleke weiwo. Moothananiha, o Orealla haariwo muchu ahaala opwahiherya yoohuserya aka ya Piipiliya. Nyenya moohakalaliha, Yehova haakicuwanle.

Nave vahilekenle, piyoneero avameekheiye iichaniwa Floyd aphiya o Orealla, nave aakiphwanya vaavaa aalaleeryeiye empa ni empa. Vaavaa aakilenleiye wi nimuhuseryeke Piipiliya, kaahitheya. Nave owo aakikoha: “Ntakhara heeni onatheyaawe?” Kaahimuleela wi kaakwaaxa eproxura Muluku Ontchuna Eheni Wahiyano? Nave wi kaapacerya omuhuserya liivuru Conhecimento Que Conduz à Vida Eterna. * Kaahithariha ntakhara heeni yoohuserya yaamanlaaya. Floyd aakwaaxa okihusiha liivuru Conhecimento, nave voocharela, owo tho aarumihiwa  mu elapo ekina. Wanaawiili nkaarino muchu ahaala okihusihaka Piipiliya.

Mwawiihiiha mu 2004, Granville ni Joshua, mapiyoneero meeli avameekhaaya, yaarumihiwa o Orealla. Awo yaanalaleerya empa ni empa, nave yaakiphwanya. Vaavaa yaakikonhaaya waakhanle wi kaamusiveliwa omuhuserya Piipiliya, kaahitheya. Kaahaaveka wi nipacerye omuhuserya liivuru Conhecimento, ovinyerya woopaceryani. Kaachuna woona waakhanle wi yaahaala okihusiha ichu imohamoha seiho ahusiha aka oopacerya, yaakihusinhaaya. Granville aakileela wi mithukumano sahaala weereya mu evilivili ahu. Naamwi kahiwerya weeca, waacamela iyaakha khumi muculi, kaanachuna ophiya mmithukumano. Mwawiihiiha, Granville aakiteexa, akikiraathiha va ekarinya ya maroota anakeeciha niyaaka o Empa ya Omwene.

Mu elukuluku yeele, Granville aakiceenyerya ovolowa mu Exikola ya Orummwa Woomuluku. Owo aaloca ariki: “Weyo wa muchu oorakala, nyenya onanwerya oloca. Nihiku nimoha, onahaala operekha mwaha wa vanlakani. Ela enahaala weereya.” Masu yaala olipiha yaalipiha nroromelo naka.

Kaahipacerya oya mmuteko woolaleerya ni Granville. Mwawiihiiha, miphiro mincipale sa evilivili ahu, saahitepa okhalano malici ophiyerya wi ekarinya ya maroota hiyaawerya weeca phaama. Wa nthowa na yeeyo, kaahimveka Granville wi akiteexerye mu ekarinya ya nroota nimoha nave akeeciheke. Marehereryo yaale yaahiphara muteko phaameene. Mu Apirili a 2005, kaahipatisiwa. Vahilekenle, anna yaakivyakiha wi kikhapeleleke soolaleeryiwa, nave tho wi kilapeke ni ikhankoonya inavuwiha nsu, mu Empa ya Omwene.

Moothananiha, ohoolo waaya, mu 2007 apapa yaahikhwa va asitenti a mwaaceya. Emusi ahu yaahitepa othanana. Granville aahivekela vamoha ni hiyo nave aanivaha nlipiho noorweela Mpiipiliyani. Mu iyaakha piili ohoolo waya, naahikhala oothanana ni epahu ekina—Granville aakhwa va asitenti a mwaaceya.

Muloko ahu mukhaani, yoowo tho waari woothanana, hiwaarino mutokweene naari mmoha, nyenya waarino murummwa oorumeela mmoharu pahi. Okhwa wa Granville waakihoma murima, woona wi owo aari nthamwene aka ookhweleyaxa. Granville aakikhaviherya moororomeleya okhapelela soothowa saka soomunepani, ni soomwiilini. Mmithukumano, owo amanle okhwa, kaahithanliwa wi kaalakhanye iparakrafo sa Mulipeleli. Pahiru kaawenrye waalakhanya iparakrafo piili soopacerya, nyenya voocharela, kaahipacerya winla nave nkaawerya omaala. Voocharela, kaapwahawo o tripuna.

Kaahipacerya wiisoona okhala ookhapeleleya vaavaa anna a muloko mukina yaarwiilaaya wi ekhaviherye o Orealla. Nave tho efiliyale yaahimurumiha Kojo piyoneero avameekheiye. Yoohakalaliha, amama ni munnaka mukhaani yaahipacerya omuhuserya Piipiliya nave epatisiwa. Voocharela, mu Marsu a 2015, kaahithanliwa okhala murummwa oorumeela. Moovira wa elukuluku, kaahiperekha mwaha aka woopacerya wa vanlakani. Mu nihiku nenle, kaahuupuwela masu yaawo Granville aalonceiye mmahiku a muculi ariki: “Nihiku nimoha, onahaala operekha mwaha wa vanlakani. Ela enahaala weereya.”

Orweela mu ixilema sa JW Broadcasting,^® kaahisuwela wi anna ni arokora akina, ari mmukhalelo woolikana ni wawaka. Naamwi yiiceliwaka awo annawerya waakhwaniherya sincipale ni okhala oohakalala. Miyo tho, kinanwerya waakhwaniherya ichu ikina. Nchuno naka na omvaha Yehova ikuru vyakala kiryaakano naahikiceenyerya okhala piyoneero ookilaatheya. Nave mmweeri wa Setempuru a 2019 kaahaakhela echu yoohiwehereryeya! Mmweeri yoole kaahithanliwa orumeela ntoko mutokweene mmulokoni mwahu mummo waarimo alaleeryi 40.

Kinnaathamalela vancipale anna ni arokora yaawo yaakihusinhe nave tho yaakikhavihenrye omurumeela Yehova. Opwaha soothene, kinnamuthamalela vancipale Yehova woona wi haakicuwanle.