1-2. (1) Ntakhara heeni atheli avyaani anaphwanelaaya omuroromela Yehova? (Salumu 37:3, 4) (2) Tiheeni nnahaalaahu othokororya mmwaha yoola?

APWANNE munnachuna othela, naari muthenle hiihaanoru? Waakhanle wi ti hiihaa, moohikhwa minikwa munnaweherya opuha okumi ni muchu yoowo munamusivelaanyu vancipale. Nyenya, atheli annakumanano makacamiho, nave sookhalavo soolakelela soochuneya seiho anaphwanelaaya opaka. Yeeyo munapakaanyu vaavaa munakumanaanyu ni makacamiho ni soolakelela munapakaanyu sinahaala ovolowela ohakalala wanyu mu iyaakha sincipale. Wakhala wi munnamuroromela Yehova, munahaala opaka soolakelela mwa miruku, othela wanyu onahaala okhala woolipa, nave munahaala okhala oohakalala. Wakhala wi himunachariha ohoolela wa Muluku, mwawooneya munahaala okhalano makacamiho mu othela wanyu, nave hamunahaala okhala oohakalala.—Mwaalakhanye Salumu 37:3, 4.

² Naamwi mwaha ola oyaaka wa atheli avyaani, owo onahaala othokororya makacamiho yaawo atheli oothene anakumanaayano. Onahaala tho othokororya yeeyo nnahuseryaahu orweela wa sootakiherya itikitheryiwe ni alopwana ni athiyana oororomeleya analociwa Mpiipiliyani. Sootakiherya seiha sa Mpiipiliyani sinahaala onihusiha mahusiheryo yaawo nneeraahu nipharihele mmikhalelo soohiyanahiyana mu okumi, ophitaanyerya mu othela wahu. Nnahaala tho woona yeeyo nnahuseryaahu orweela wa saweereya sa atheli akina a mmahiku ahu.

3-4. Makacamiho taani atheli avyaani anaweryaaya okumanano?

³ Achu akina ananwerya waaceenyerya atheli avyaani wi ekhaleke ntoko achu akina anakhalaaya olelo. Ntoko yootakiherya, asitiithi ni amusi akina enanwerya waakhinyererya atheli  wi epacerye okhalano anamwane mwawaakuveya. Naari asinthamwene ni amusi enanwerya waaceenyerya atheli avyaani wi ethume empa ni ichu sincipale wi ekhale ookhapeleleya.

⁴ Wakhala wi hiyaanono ekaasoope, mutheli onanwerya opaka soolakelela seiho sinahaala omweeriha okhalano ivaale sincipale. Voocharela, ooweeli mulopwana ni mwaariye ananwerya olapaka iwora sincipale wi elive ivaale seiho. Muteko vyakala onanwerya omalihaka elukuluku yeeyo yaahaalaaya opharihelaka mu yoohuserya ya muchu mukhateiye, malapelo a echoko, ni mmuteko woolaleerya. Ophiyerya wi mutheli onanwerya ocompelaka mithukumano alapaka iwora sawaacererya wi akhaleno ikhorowa sincipale naari wi aroromeliweke va mutekoni. Ntoko yookhumelela, awo anahaala oyeleela ekari ya waaceererya orummwa aya wa Yehova.

5. Tiheeni nnahuseryaahu orweela wa yootakiherya ya Klaus ni Marisa?

⁵ Sootakiherya sincipale sinnooniherya wi wakhala wi echu yoochuneyaxa mu okumi ahu ori okhalano ichu sincipale, hinikhala oohakalala. Muthokororye yeeyo Klaus ni Marisa ahusenryaaya. * Vaavaa yaathelannaaya, awo yaanalapa mu iwora sincipale wi ekhaleno ikhorowa ni ichu sincipale. Nyenya awo hiyaarino ohakalala weeparipari. Klaus onneemererya: “Naakhalano ichu sincipale opwaha seiho naachunaahu, nyenya hinaarino soolakelela soomunepani. Oloca eparipari, okumi ahu waari woovila nave naanakhala awuukhuwa.” Akhweya nyuwaano tho mohoona wi otikitheryeya mu ichu soomwiilini honaruuha ohakalala weeparipari. Waakhanle wi ti hiihaa, muhiceecheye. Othokororya sootakiherya saphaama sa akina enanwerya wookhaviheryaani opaka matorokelo oochuneya. Voopaceryani, hankooni nthokororye yeeyo alopwana athenle anaweryaaya ohuserya orweela wa yootakiherya etikitheryiwe ni Mwene Yosafati.

6. Ti mwawiihai Yosafati aapharihenleiye nlakiheryo nnaphwanyeya mu Masiposipo 3:5, 6, vaavaa anakhoco ancipale yaaruulaaya owana ni achu awe?

⁶ Alopwana nyu muthenle, apwanne munnakhala awuukhuwa nthowa na mirici sanyu? Waakhanle wi ti hiiha, munanwerya ohuserya orweela wa yootakiherya ya Mwene Yosafati. Ntoko mwene, Yosafati aakhalano murici wa okhapelela nloko noothene! Tiheeni owo eenreiye wi awerye waakhwaniherya murici yoola woovila? Yosafati aapaka soothene aaweryeiye wi aakhapelele achu awe. Owo aalipiha ipooma so Yuta nave aahaathukumanya anakhoco apwaha 1.160.000. (2 Math. 17:12-19) Ohoolo waya, Yosafati aakumanano nikacamiho noovilaxa. Akhoco ancipale a Amooni, Amowapi, ni alopwana a omwaako Seir yaarwa owana ni yoowo, emusi awe, ni achu awe. (2 Math. 20:1, 2) Tiheeni Yosafati eenreiye? Owo aamveka Yehova wi amukhaviherye ni omulipiha. Ela enniiwanana ni nlakiheryo na miruku nenlo nnaphwanyeya mu Masiposipo 3:5, 6. (Mwaalakhanye.) Nivekelo na wiiyeviha na Yosafati, nnaphwanyeya mu 2 Matharihelo 20:5-12, ninnooniherya mukhalelo owo  aamuroromeleiye Tiithi awe oosivela a wirimu. Ti mwawiihai Yehova aakhunleiye nivekelo na Yosafati?

7. Ti mwawiihai Yehova aakhunleiye nivekelo na Yosafati?

⁷ Yehova aaloca wa Yosafati moorweela wa Muleevi awiichaniwa Yahasiyeli. Yehova aaloca: “Mukhale vaava, mweemele, munawoona Apwiya waavootha waya mu nipuro nanyu.” (2 Math. 20:13-17) Mweeparipari ola tahi mukhalelo wawunlaana wa owaniha ekhoco! Nyenya, sooleeliherya seiha hisaarweenle wa muchu; iho saarweenle wa Yehova. Amuroromelaka Muluku awe moomalela, Yosafati aahiiwelela sooleeliherya seiha. Vaavaa owo ni achu awe yaakelaaya okumana ni amwiicani, owo aaheemela ohoolo wa anakhoco awe, ohiya ntoko anakhoco amavyakelo, nyenya ntoko alipa a wiipa ehirino ikaruma sa owanano ekhoco. Yehova aahaakhwaniherya yoolaiherya awe wa Yosafati; Owo aawana ni amwiicani yaale ooreheryeya.—2 Math. 20:18-23.

8. Tiheeni alopwana athenle anaweryaaya ohuserya orweela wa yootakiherya ya Yosafati?

⁸ Alopwana nyu muthenle, munanwerya ohuserya orweela wa yootakiherya ya Yosafati. Nyuwaano mookhalano murici wa okhapelela emusi anyu, olapa moowetha wi mwaakihe ni okhaviherya emusi anyu. Vaavaa munahoolelaanyu makacamiho, nyuwaano munamuupuwela wi munanwerya orehererya makacamiho yaawo mukhatiinyu. Nyenya munaphwanela ovootha mathitimanelo a wiiroromela mukhatiinyu. Moohiyana, mvekele wa Yehova wi ookhaviheryeeni. Mwawaaceererya, mvekele ni murima woothene vamoha ni mwaarinyu. Mwaavye ohoolela woorweela wa Yehova moorweela wa omuhuserya Piipiliya ni soolaleeryiwa sinavahereryiwa ni marehereryo a Muluku, nave mpharihele miruku seiho mphwannyaanyu. Akina ananwerya oheemererya soolakelela seiho mpankaanyu sinathipeleya Mpiipiliyani, ophiyerya wi awo ananwerya oloca wi moolosowa. Awo ananwerya wooleelaani wi ikhorowa ni ichu munaphwanelaanyu okula sinanwerya ovahererya okhapeleleya woophwanelela wa emusi anyu. Nyenya muupuwele yootakiherya ya Yosafati. Owo aamuroromela Yehova nave aahooniherya yeela mu saweera sawe. Yehova haamuhin’ye mulopwana yoola oororomeleya, nave owo harwa tho oohiyaani. (Sal. 37:28; Ahe. 13:5) Echu taani ekina atheli anaphwanelaaya weera wi eroromele wi awo anahaala okhala oohakalala mu okumi aya woothene vamoha?

9. Tiheeni nnaweryaahu oloca vooloca sa mulipa a miririmu Isaiya ni mwaariye?

⁹ Echu yoochuneyaxa wa Isaiya ni mwaariye waari omurumeela Yehova. Isaiya aari mulipa a miririmu, nave mwaariye akhweya aakhalano murici awe wa oloca sa miririmu, woona wi owo iichaniwa “mulipa a miririmo mwaamuthiyana.” (Isa. 8:1-4) Ntoko mutheli, Isaiya ni mwaariye yaatikitheryen’ye mu omulapela waya Yehova. Ela yootakiherya yaphaama wa atheli olelo!

10. Ti mwawiihai ohuserya sooloherya sa Piipiliya onaakhaviheryaaya atheli olakelela opaka sincipale anaweryaaya ntakhara Yehova?

¹⁰ Atheli olelo enanwerya omutakiherya Isaiya ni mwaariye moorweela wa opaka soothene anaweryaaya mmuteko wa Yehova. Awo ananwerya olipiha omuroromela waya Yehova moorweela wa ohuserya soolaiherya sa Mpiipiliyani vamoha ni woona mukhalelo iho saakhwaniheryen’yaaya. * (Tito 1:2) Awo ananwerya wuupuwela vooloca sa yeeyo anaphwanelaaya  weera wi ekhaviherye waakhwaniheryeya wa sooloherya sammoori sa Mpiipiliyani. Ntoko yootakiherya, awo ananwerya opaka makupa wi ekhaviherye mu waakhwaniheryeya wa yooloherya ya Yesu yawi michaka yaphaama sinaphwanela olaleeryiwa mu elapo yoothene ehaakumve ophiya makuchuwelo. (Mat. 24:14) Vaavaa atheli anoonaaya wi yooloherya yammoori ya Mpiipiliyani yohaakhwanela, awo anahaala olakelela opaka sincipale anaweryaaya ntakhara Yehova.

11. Tiheeni Akula ni Priskila yaaweryaaya weera, nave ntakhara heeni?

¹¹ Atheli ari amiravo ananwerya ohuserya moorweela wa Akula ni Priskila, mutheli Muyuta yoowo aakhala mu epooma yo Roma. Awo yaahiiwa michaka yaphaama vooloca sa Yesu nave ekhala Akristu. Moohikhwa minikwa, awo yaanasiveliwa ni mikhalelo saya. Nyenya, okumi aya waahitorokeya moohiwehereryeya vaavaa Mulamuleli Kalawutiyu aalamulenleiye wi Ayuta oothene ekhumewo o Roma. Muthokororye yeeyo yeeren’ye wa Akula ni Priskila. Awo yaaphwanela waahiya amusi yaawo yaarukurenrye, ophwanya empa evyaani, ni opacerya ompaka nakoso aya a opaka misakala mu nipuro nenlo yaathaamenlaayawo. Apwanne mikhalelo seiha mivyaani ni soovila saaweeriha omaala opaka sincipale seiho yaaweryaaya ntakhara Yehova? Mwawooneya nyuwaano moosuwela naakhulo na nikoho nenla. Mu empa aya evyaani o Korinto, Akula ni Priskila yaapacerya okhaviherya muloko wa vanipuroni ni olapa vamoha ni murummwa Paulo yaalipihaka anna a weiwo. Ohoolo waya, awo yaathaamela ipooma ikina weiwo waariwo othowa wa alaleeryi. (Saw. 18:18-21; Aro. 16:3-5) Okumi aya waari wooweiwa ni woohakalaliha!

12. Ntakhara heeni atheli annaphwanela otikitherya soolakelela soomunepani?

¹² Atheli a mmahiku ahu ananwerya omutakiherya Priskila ni Akula moorweela wa okuha soochuna sa Omwene mu nipuro noopacerya. Elukuluku yoophwanelela wa atheli ovaanela vooloca sa soolakelela saya ori vaavaa awo anuuryanaaya. Vaavaa mutheli onatikitheryeiye soolakelela sa mmuteko aya wa Yehova ni olapa mwakuru vamoha wi yaakhwaniherye soolakelela seiho, awo anahaala okhalano ikari sa woona Yehova aakhaviheryaka. (Ekle. 4:9, 12) Muthokororye yaweereya ya Russell  ni Elizabeth. Russell ooloca: “Variyari va wuuryana, hiyaano naanavaanela vooloca sa soolakelela sahu soomunepani.” Elizabeth ooloca: “Naanavaanela seiho nave vaavaa ohoolo waya naapakaahu soolakelela soohiyanahiyana, naanaroromela wi soothanla sahu iho hisaahaala onihiiha okhwaaniherya soolakelela sahu.” Mikhalelo sa Russell ni Elizabeth saahiweemererya awo othaamela o Mikronesiya wi yarumeele weiwo waariwo othowa otokweene wa alaleeryi.

13. Mwawiiwanana ni Salumu 28:7, tiheeni enahaala weereya wakhala wi ninnamuroromela Yehova?

¹³ Moolikana ni Russell ni Elizabeth, atheli ancipale annalakelela okhweiha okumi aya wi emaliheke elukuluku yincipale mmuteko woolaleerya ni ohusiha michaka saphaama. Vaavaa mutheli onatikitheryeiye soolakelela mmuteko wa Yehova ni wiilipixerya waakhwaniherya seiho annakhalano sookhumelela sincipale saphaama. Awo anahaala woona mukhalelo Yehova onahaaleiye waakhapelela, nroromelo naya wa yoowo nnahaala winnuwa, nave anahaala okhalano ohakalala weeparipari.—Mwaalakhanye Salumu 28:7.

14. Ti mwawiihai murummwa Pedro ni mwaariye yoonihenryaaya wi yaanaroromela yoolaiherya enaphwanyeya mu Mateu 6:25, 31-34?

¹⁴ Atheli ananwerya ohuserya tho orweela wa yootakiherya etikitheryiwe ni murummwa Pedro ni mwaariye. Ivinrevo miyeeri 6 mu eyaakha yeeyo aakumanneiye ni Yesu mu ekwaha yoopacerya, murummwa Pedro aaphwanela opaka yoolakelela yoochuneyaxa. Pedro aapaka muteko wa ototha ihopa wi avakulele emusi awe. Mwawiihiiha vaavaa Yesu aawompeiye Pedro wi akhale oomuchara awe mu elukuluku yoothene, Pedro aaphwanela wuupuwela vooloca sa mwaariye vaavaa aapakeiye yoolakelela yeela. (Luka 5:1-11) Pedro aathanla omuchara Yesu mmuteko awe woolaleerya. Owo aapaka yoothanla ya miruku! Nave hiyaano nookhalano mathowa aphaama a weemererya wi amwaariye Pedro yaakhaviherya yoolakelela yeela. Piipiliya onnooniherya wi Yesu amanle oviihiwa mookhwani, owo aaneeca ni Pedro mu ilukuluku ikina. (1 Kor. 9:5) Moohikhwa minikwa, nthowa nawi owo aari muthiyana aphaama Eekristu, Pedro aawerya ooloca mootaphuwa vaavaa aavanheiye ekano wa atheli Eekristu. (1 Ped. 3:1-7) Mweeparipari, Pedro ni mwaariye yaanaroromela yoolaiherya ya Yehova yawi Owo aahaala ovahererya soothowa saya wakhala wi aakuha Omwene mu nipuro noopacerya mu okumi aya.—Mwaalakhanye Mateu 6:25, 31-34.

15. Tiheeni muhusenryaanyu orweela wa yaweereya ya Tiago ni Esther?

¹⁵ Waakhanle wi muthenle mu iyaakha sa hiihaanoru, ti mwawiihai muneeraanyu mutitelele wunnuwiha nchuno nanyu na waaceererya orummwa anyu? Mukhalelo mmoha ori moorweela wa ohuserya saweereya sa atheli akina. Ntoko yootakiherya, munanwerya ophwanya saweereya soolipiha mu soolaleeryiwa sahu mu miyaha inii “Yaweereya ya Okumi.” Miyaha ntoko seiha saahimukhaviherya Tiago ni Esther, mutheli o Prasili, wunnuwiha nchuno naya na orumeela weiwo waariwo othowa otokweene. Tiago onnathariha: “Vaavaa naalakhanyaahu saweereya sooniherya wi Yehova onnaakhapelela alapeli awe a mmahiku ahu, hiyaano tho naanachuna woona ntata na Yehova nnihoolelaka ni onikhapelela.” Vookuchulani awo yaahithaamela o Parakwayi, weiwo enarumeelaayawo mu ekulucu ya ekunya ovinyerya mu eyaakha ya 2014. Esther ooloca: “Yoorepa emoha nnasiveliwaahuno vancipale ti Éfeso 3:20. Mu ikwaha sincipale, ninnoona masu yaala yaakhwanelaka mmuteko ahu wa Yehova.” Mu  ekaarata yeela wa Aefeso, Paulo aalaiherya wi Yehova aahaala ovahererya sincipale opwaha seiho nnamvekaahu. Yoolaiherya yeela ennaakhwanela mu ikwaha sincipale!

16. Miruku taani atheli yaawo ari amiravo anaphwanelaaya waavya vaavaa anuupuwelelaaya vooloca sa soolakelela saya mookumini?

¹⁶ Atheli yaawo ari amiravo olelo ananwerya ophuravo orweela wa saweereya sa akina yaawo yaahusenrye omuroromela Yehova. Atheli akina ananwerya omaliha iyaakha sincipale erumeelaka mmuteko wa elukuluku yoothene. Mwaakohe miruku yaawo waakhanle wi munnuupuwela otikitherya soolakelela. Ola mukhalelo mukina wa wooniherya wi nyuwaano munnamuroromela Yehova. (Masi. 22:17, 19) Atokweene a mmulokoni tho ananwerya waakhaviherya atheli yaawo ari amiravo otikitherya ni waakhwaniherya soolakelela soomunepani.

17. Tiheeni yeeren’ye ni Klaus ni Marisa, nave tiheeni nnahuseryaahu orweela wa yaweereya aya?

¹⁷ Mu ilukuluku ikina nnanwerya ochuna opaka sincipale ntakhara Yehova mmukhalelo mmoha, nyenya owo onanwerya onihoolela wi nimurumeele mmukhalelo mukina. Ela ti yeeyo yeeren’ye ni Klaus ni Marisa, yaawo aromoliwe woopaceryani. Emalinhe iyaakha raru mu othela, awo yaahithaama owannyaya nave yiiveeleela mmuteko wa oteka mu Efiliyale yo Finlantiya. Nyenya, awo yaahoona wi hiyaahaala weemereryiwa okhala weiwo opwaha miyeeri 6. Woopaceryani, awo yaahuukhuwa. Nyenya elukuluku vakhaani emanle weereya yeela, yaawompwa wi yapake ekursu ya elocelo Arape, nave vano ari oohakalala orumeela mu ekulucu ya elocelo Arape mu elapo ekina. Uupuwelaka sa muculi, Marisa onneemererya: “Kaahikhala awoova opaka echu yeeyo kaahintonkaaka opaka nave kaanachuna omuroromela Yehova moomalela. Nyenya vano kohoona wi Yehova ilukuluku soothene onnanikhaviherya mmikhalelo soohiwehereryeya. Yaweereya yeela, yoolipiha nroromelo naka wa Yehova.” Hiiha ntoko yaweereya yeela yoonihenryaaya, munaphwanela ororomela wi Yehova onahaala wooreelihaani ilukuluku soothene wakhala wi munnamuroromela yoowo moomalela.

18. Tiheeni atheli anaphwanelaaya opaka wi etitelele omuroromela Yehova?

¹⁸ Othela yamahala yoorweela wa Yehova. (Mat. 19:5, 6) Owo onachuna wi atheli epuhe yamahala yeela. (Masi. 5:18) Atheli nyu muri amiravo, muthokororye yeeyo munahaalaanyu weera mu okumi anyu. Apwanne munnapaka soothene munaweryaanyu wi mooniherye wa Yehova mukhalelo munathamalelaanyu samahala seiho oovanheiyeni? Muloce ni Yehova mu nivekelo. Mwaavye mmasu awe malakiheryo yaawo anaphariheleya wa mukhalelo anyu. Voocharela mucharihe miruku seiho Yehova onoovaheiyeeni. Munaphwanela ororomela wi munahaala okhalano ohakalala ni mareeliho mu okumi anyu wakhala wi moolipiha othela wanyu mu omurumeela Yehova!