Nyuwaano Mwaanasuwela?
Tiheeni yeeren’ye ni Ninevi emanle mahiku a Yona?
VARIYARI va eyaakha 670 E.E.K., Asiriya waari olamulelo otokweene wa elapo yoothene. Yooleeliherya ya Musewu Britanico elonce wi “makupa awe yaapacenrye o Xipre, makupa onaneela nsuwa ophiyerya o Irã makupa onakhuma nsuwa, nave mu elukuluku ekina yaaphitaanyerya Yikuputu.” Ninevi, yaari epooma etokweene ya elapo yoothene. Owo anniirumiha nthowa na okhalano ipa itokweene, mapuro mancipale yaawo yaarimo kapinka, ipa sa mamwene saphaama ni ipipiliyoteka itokweene. Soorempwa sa vasirini sa Ninevi akhalai sinnooniherya wi Mwene Asurbanipal, hiihaa ntoko mamwene makina a wa Asiriya, iiseera ntoko “mwene a elapo yoothene.” Mu elukuluku yeele, Asiriya ni Ninevi sooneya ntoko ipooma sahaahaala owerya omwaryiwa.
Epooma etokweene ya wa Asiriya yaari yoowerya ya elapo yoothene mu elukuluku yeele
Nyenya, vaavaa Asiriya nivano aalamuleleiye, mulipa a miririmu a Yehova, Sofoniya, aahiloherya: “Apwiya anamwatolosa atxhu aw‘Asiriya nave Nínive onamukhala milepe, onamukhala ntakhwa nawuma.” Nave mulipa a miririmu Nahumi aaloherya tho ariki: “Mukuse eprata, mukuse eworo!” . . . Yale eni ewoneke eni enàmutxhawa eriki: ‘Nìnive omwaryiwa.’” (Sof. 2:13; Nah. 2:9, 10; 3:7, BNM) Va wiiwa sooloherya seiha, achu yaanwerya wiikoha: ‘Apwanne ela chiryene enanwerya weereya? Apwanne nihiku naya Asiriya onanwerya omwaryiwa?’ Ela yooniwa okhala yoohiweryeya.
Ninevi aahimwariwa
Naamwiihiiha, yoohiweryeya yaaheereya! Variyari va eyaakha 600 E. E. K., Asiriya aamwaryiwa ni a Papulu ni a Meto. Vookuchulani, achu yaachawa mu epooma ya o Ninive nave aacuwaliwa! Mwawiiwanana ni yoolaleeryiwa elaleeryiwe ni Musewu Metropolitano de Arte de Nova York, yooloca wi epooma yaahimwariwa, nave achu yaasuwenle pahiru vooloca sa Ninive moorweela wa Piipiliya. Esaiti ya Sociedade de Arqueologia Bíblica yooloca, ovinyerya mu eyaakha ya 1800, “haavo muchu mmoharu mano aasuwenle waakhanle wi epooma etokotoko ya Asiriya yaahikhala chiryene.” Nyenya mu 1845, mulipa ootholathola Austen Henry Layard aahipacerya okaca epooma ya o Ninevi. Milepe saaphwanyiwe sinnooniherya wi Ninive aahikhalano mapacereryo oovuwa.
Sooloherya vooloca sa Ninevi saahaakhwanela chiryene nave eyo ennalipiha nroromelo nahu yawi sooloherya sa Mpiipiliyani vooloca sa okuchuwa wa owerya wa ipoliitika sa mmahiku ahu sinahaala waakhwanela tho.—Dan. 2:44; Wup. 19:15, 19-21.
