1. Makoho taani akhweya nniipakelaahu?

APWANNE ilukuluku ikina munnuukhuwa vaavaa munuupuwelaanyu saweereya seiho nnawehereryaahu ntoko otoloxiwa wa malapelo atheru, ohiphela wa Koki ni Makoki, ni ekhoco ya Armaketo? Akhweya nyuwo munniikoha ‘Vaavaa elukuluku yeeyo enahaalaaya ophiya, mpwanne kinahaala otitelela okhala oororomeleya vaavaa ichu seiho sawoopiha sinahaalaaya weereya?’ Waakhanle wi munnuupuwela vooloca sa makoho yaala, othokororya yeeyo Yesu aalonceiye mu yoorepa ya mwaha ahu enahaala wookhaviheryaani. Yesu aaloca wa oohuserya awe: ‘Murima ohiwiineni. Muroromeleke.’ (Yoh. 14:1, BNM) Olipiha nroromelo onahaala onikhaviherya ohoolela makacamiho omwaahiyu moororomeleya.

2. Nni nlipihe hai nroromelo nahu, nave tiheeni nnahaalaahu othokororya mmwaha yoola?

² Nnanwerya olipiha nroromelo nahu wi nivilele makacamiho yaawo oomwaahiyu moorweela wa othokororya mukhalelo nnavilelaahu ni saweeha sa nroromelo nahu olelo. Wakhala wi ninnuupuwela mukhalelo nnaakhulelaahu vaavaa nnahoolelaahu saweeha hiihaano, nnanwerya osuwela makupa anachuneya olipiha nroromelo nahu. Ekwaha ti ekwaha nnavilelaahuno saweeha, nroromelo nahu ninnakhala noolipa. Ela enahaala onikhaviherya ovilelano makacamiho a muhoolo. Mmwaha yoola, nnahaala wuuluulela mikhalelo mixexe seiho oohuserya a Yesu yaahoolenlaaya seiho soonihenrye wi wa yaawo waanachuneya okhalano nroromelo noolipa. Voocharela nnahaala othokororya mukhalelo nneeraahu nivilele ni makacamiho oolikana olelo ni mukhalelo awo ananrehereryaaya wa yeeyo enahaala weereya omwaahiyu.

3. Ti mwawiihai Mateu 6:30, 33, onanikhaviheryeiye woona makupa yaawo nnaphwanelaahu olipiha nroromelo nahu?

³ Ti yawunlaana wa muru wa echoko ochuna ovahererya yoolya yawaakhwanela, soowara, ni okhapeleleya wa mwaariye  ni wa anaawe. Ilukuluku soothene ela tahi yookhweya weerano xaxaxa mu ilukuluku seiha sookacamiha. Anna ni arokora ahu akina aayeleela muteko aya nave naamwi yiilipixeryaka vancipale, hanawerya ophwanya mukina. Akina anaphwanela okhooca muteko yoowo ohineemereryiwa wa Akristu. Vaavaa ichu ntoko seiha sineereyaaya, nnaphwanela ororomela wi Yehova onahaala ovahererya soothowa soomwiilini wa amusi ahu. Yesu aahooniherya yeela mookwakwaleya wa oohuserya awe Mmwaha awe wa Vamwaakoni. (Mwaalakhanye Mateu 6:30, 33.) Vaavaa nnalekecheyaahu moomalela wi Yehova hani anihiye, nnanwerya otikitheryeya mu omurumeela Yehova. Nave vaavaa nnoonaahu mukhalelo Yehova onanikhaviheryeiye ni soothowa sahu soomwiilini, nnahaala omwaacamela vancipale Yehova nave nroromelo nahu nnahaala okhala noolipa.

4-5. Tiheeni yaakhavihenrye emusi emoha ovilelano wuukhuwa vooloca sa soothowa saya soomwiilini?

⁴ Muthokororye mukhalelo emusi emoha yo Venesuwela yoonnaaya nikhaviheryo na Yehova vaavaa yaavilelaaya ni wuukhuwa vooloca sa soothowa saya soomwiilini. Khalai, emusi ya Castro yiivakulela moorweela wa olima. Voocharela mulopwana yoowo aarino kapuchi aawaakha emaca aya nave aakhinyererya wi ehiye olima. Miguel yoowo ori Tiithi, ooloca: “Vano naalima mapuro makhaani yaawo naapoleyaahu wa achu akina. Nihiku nnihiku kaapacerya omveka Yehova wi avahererye soothowa sa nihiku nenle.” Ekumi yaari yoovila wa emusi yeela, nyenya woona wi yaanaroromela moomalela mavyakelo a Tiithi ahu oosivela a ovahererya soothowa saya sa nihiku ti nihiku, emusi Castro yaanaphiya mmithukumano sa muloko moohihiyererya ni mmuteko woolaleerya. Awo yaanakuha mu nipuro noopacerya mu ekumi aya soothowa sa Omwene, nave Yehova aanavahererya soothowa saya.

⁵ Variyari va elukuluku yeela yoovila, Miguel ni amwaariye Yurai, yaatikitheren’ye mmukhalelo Yehova aakhaviheryeiye. Mu elukuluku yeele, Yehova aanaapharihela anna wi yaavahe ichu seiho awo yaachunaaya naari omukhaviherya Miguel ophwanya muteko. Ilukuluku ikina, Yehova aanapharihela Efiliyale wi evahererye ichu ikina seiho awo yaachunaaya. Yehova haawaanyanyanle. Ntoko yookhumelela, emusi yeela yaakhalano nroromelo noolipa. Emanle othariha vooloca sa mukhalelo Yehova aakhavihenryeiye, mwanaya a mutokweene a mwaamuthiyana Yoselin, ooloca: “Yaari yoolipiha woona mukhalelo Yehova aanikhavihenryeiye. Owo nthamwene aka nave kinnaroromela wi ilukuluku soothene onahaala okikhaviheryaka.” Owo ohaaceererya: “Saweeha seiho nihoolenlaahu ntoko emusi soonirehererya wa saweeha soovila soomwaahiyu.”

6. Nni nlipihe hai nroromelo nahu vaavaa nnahoolelaahu nikacamiho na ohikhalano ichu soomwiilini?

⁶ Apwanne munnahoolela nikacamiho na ohikhalano ichu soomwiilini? Waakhanle wi ti hiihaa, ela elukuluku yoovila wa nyuwaano. Nyenya munanwerya opharihela elukuluku yeela wi mulipihe nroromelo nanyu. Mvekele wa Yehova nave mwaalakhanye masu a Yesu anaphwanyeya mu Mateu 6:25-34 nave muupuwelele yaawo. Muthokororye saweereya sa mmahiku ahu sinooniherya wi Yehova onnaavahererya  soothowa saya yaale anateteiwa mmuteko awe. (1 Kor. 15:58) Wakhala wi moheerano yeela, munahaala olipiha nroromelo nanyu nawi Yehova onamookhaviheryaani hiihaa ntoko aakhavihenryeiye akina yaawo yaarino makacamiho oolikana ni awinyu. Owo oosuwela yeeyo munachunaanyu, nave oosuwela mukhalelo wa woovahereryaani. Vaavaa munoonaanyu Yehova ookhaviheryakaani mookumini mwanyu, nroromelo nanyu nnahaala okhala noolipa nave munanwerya ovilelano makacamiho matokweene oomwaahiyu.—Hab. 3:17, 18.

7. Mwawiiwanana ni Mateu 8:23-26, ti mwawiihai “echeku etokotoko” yeenhaaya nroromelo na oohuserya?

⁷ Vaavaa Yesu ni oohuserya awe yaakumannaayano echeku muniya, owo aapharihela yaweereya yeela wi aakhaviherye awo woona makupa yaawo yaaphwanelaaya olipiha nroromelo naya. (Mwaalakhanye Mateu 8:23-26.) Echeku yaari yakuruxa ophiyerya wi macumuxa a mphareya yaaheeriha wi mwaaceya aya asareyemo maahi, nyenya Yesu iiha arikimukona moomaaleleya. Vaavaa oohuserya yaaryaaya awoova yaahimviiha owo nave yaahimveka wi aavuluxe, mooreera murima Apwiya yaahaakoha: “Munoovelani nyuwo oororomela tonto?” Oohuserya yaala awoova yaaphwanela osuwela wi waahaala okhala wookhweya Yehova omukhapelela Yesu ni yaawo. Tiheeni nnahuseryaahuvo? Olipiha nroromelo enanwerya onikhaviherya ovilela ni echeku naari nikacamiho vyakala nenlo nnalikana ni echeku.

8-9. Ti mwawiihai nroromelo na Anel neehiwaaya, nave tiheeni yaamukhavihenrye?

⁸ Muupuwele mukhalelo nroromelo na murokora yoowo ori muciye o Porto Riko oniichaniwa Anel naalimpaaya nthowa na ovilela ni yaweeha yoovila. Yaweeha awe yaari ntoko echeku yawooneya. Yaweeha yaapacenrye mu 2017 vaavaa echeku yawuupa yawiichaniwa Maria yaamwanryaaya empa awe. nave tho, nthowa na echeku yeela, owo aahiyeleela muteko awe. Anel onneemererya: “Variyari va mahiku yaale oovila, kaari awuukhuwa, nyenya kaahuserya omuroromela Yehova moorweela wa ovekela ni oheemererya wi wuukhuwa okiceecheihe.”

⁹ Anel ooloca wi wiiwelela tho waamukhaviherya ovilelano makacamiho awe. Owo ooloca: “Ochariha ohoolela wa marehereryo a Yehova waakikhaviherya okhala oomaaleleya. Yehova aakikhaviherya moorweela wa waapharihela anna ni arokora. Awo yaanakilipiha nave yaanakivaha ichu seiho kaachunaaka wi kikhale.” Owo ohaaceererya: “Yehova aakivaha opwaha seiho kaamvenkaaka, nave nroromelo naka naalipa.”

10. Tiheeni munaphwanelaanyu opaka wakhala wi munnahoolela “echeku etokotoko”?

¹⁰ Apwanne munnahoolela “echeku etokotoko” mu okumi anyu? Akhweya munnahooxeya nthowa na epahu ya maphacuwelo naari mookhalano ereca etokweene yeeyo enaweerihaani okhala ooceecheya nave muhinasuwela echu yaweera. Akhweya nyuwaano mu elukuluku yeela munnuukhuwa, nyenya muheemererye wi wuukhuwa woohiiheeni omuroromela Yehova. Mmwaacamele yoowo orweela mu nivekelo nookhumela vathi va murima. Mulipihe nroromelo  nanyu moorweela wa wuupuwelela ilukuluku sakhalai seiho Yehova ookhavihenryeiyeni. (Sal. 77:11, 12) Munaphwanela ororomela wi Yehova harwa oohiyaani—hiihaano, naari muhoolo.

11. Ntakhara heeni nnaphwanelaahu olakelela owiiwelela yaale anahoolela?

¹¹ Echu taani ekina enahaala wookhaviheryaani ovilela ni makacamiho? Anel olonce wi wiiwelela. Ohuserya waaroromela yaale Yehova ni Yesu anaaroromelaaya. Mu ikwaha ikina, ananwerya ovahererya ohoolela yoowo onahaala wooneya ntoko honaphariheleya wa hiyo. Nyenya Yehova onnareeliha wiiwelela. Noosuwela moorweela mu Masu awe ni saweereya sa alapeli oororomeleya yaawo yaavulunse ikumi saya moorweela wa wiiwelela. (Muk. 14:1-4; 2 Math. 20:17) Muupuwelele sootakiherya ntoko seiha. Wuupuwela yeela onanwerya wunnuwiha nchuno nahu na ochariha ohoolela yoowo onarweela mmarehereryo a Yehova hiihaano ni omwaahiyu. (Ahe. 13:17) Mmukhalelo yoola nyuwaano himwaano mathowa a woova yoohooxa etokotoko enoorwa.—Masi. 3:25.

12. Wiiwanana taani yoorepa ya Luka 18:1-8 enalocaaya variyari va okhalano nroromelo ni ovilela ni ohookololowa?

¹² Yesu aahisuwela wi ohookololowa waahaala okhala yaweeha ya nroromelo wa oohuserya awe. Wi aakhaviherye ovilela ni yeela, owo aahiloca niphwanaphwaniho nnaphwanyeya mu liivuru a Luka. Yesu aaloca yaweereya ya naamukhweli yoowo aatitelenle omveka muthoriha oohookololowa wi amuthorihele mulacu awe. Owo aanaroromela wi aahaala omukhaviherya wakhala wi ootitelela omveka yoowo. Mweeparipari, muthoriha aahaakhula yooveka awe. Tiheeni nnahuseryaahuvo? Yehova tahi oohookololowa. Yesu ooloca: “Akhweya Muluku hawaakiha achu awe oothanliwa, yaawo anakhuwela wa yoowo othana ni ohiyu?” (Mwaalakhanye Luka 18:1-8.) Nave Yesu aahaaceererya: “Nto mwaana a muchu aakookaka, onamphwanyavo nroromelo veelaponi ya vathi?” Vaavaa nnahooxeyaahu ni oohookololowa, nnaphwanela wooniherya opisa wahu murima ni nthiti wi nlipihe nroromelo nahu hiihaa ntoko naamukhweli yoole. Ni nroromelo nenla, nnaphwanela olekecheya wi Yehova onahaala onikhaviherya ni weeravo echu mmakupa ahu. Hiyaano tho nnaphwanela ororomela owerya wa nivekelo. Mu elukuluku aya, mavekelo ahu anahaala waakhuliwa mmukhalelo nihinawehereryaahu.

13. Ti mwawiihai nivekelo naakhavihenryaaya emusi emoha vaavaa yaakhalihiwaaya moohookololowa?

¹³ Muthokororye yaweereya ya murokora oniichaniwa Vero, yoowo onakhala o Repuplika Temokratiku o Konko. Vero, aiyawe yaawo ahiri Namoona a Yehova, ni mwanawe amwaamuthiyana a iyaakha 15, yaachawa mu epooma yeeyo yaakhalaaya vaavaa anakhoco yaahiphenlaaya. Yeecaka, awo yaaphiya nipuro nenlo atoropa yaaraayavo nave atoropa yaanachuna owiipha yaawo. Vaavaa Vero aapacenryeiye winla, mwanawe amwaamuthiyana aaheererya waamaaliha amamaawe moorweela wa ovekela ni masu oovuwa apharihelaka nsina na Yehova mu nivekelo nawe. Vaavaa owo aakwaanxeiye, muhooleli a anakhoco aamukoha: “Mwali we, taani  oohusinhe ovekela?” Owo aahaakhula: “Amama aka tekihusinhe epharihelaka yootakiherya enaphwanyeya mu Mateu 6:9-13.” Muhooleli a anakhoco aaloca: “Mwali we, hawe ni asitiithi aa mmureceleni, nave Yehova Muluku anyu ookhapeleleeni!”

14. Tiheeni enahaala weeha nroromelo nahu, nave tiheeni enahaala onikhaviherya ovilela?

¹⁴ Saweereya seiha sinnanihusiha wi nihirwe ncuwale esisapo ya nivekelo. Nyenya hanka wakhala wi mavekelo anyu hanaakhuliwa mwawaakuveya naari mmukhalelo wootikhiniha? Moolikana ni naamukhweli a mu niphwanaphwaniho na Yesu, mutitelele ovekela, muroromelaka wi Muluku ahu harwa oohiyaani nave owo mu elukuluku aya ni mmukhalelo vyakala onahaala waakhula nivekelo nanyu. Mutitelele omveka Yehova wi oovaheeni munepa awe waweela. (Fil. 4:13) Muupuwele wi moohilekela Yehova onahaala wooreelihaani vancipale ophiyerya tho wi munahaala ocuwala makacamiho yaawo muhoolenlaanyu. Vaavaa munavilelaanyu ni makacamiho nnikhaviheryo na Yehova, munahaala okhala oolipa nave munahaala okhala ooreheryeya ovilelano saweeha sa muhoolo.—1 Ped. 1:6, 7.

15. Mwawiiwanana ni Mateu 17:19, 20, nikacamiho taani oohuserya a Yesu yaahoolenlaaya?

¹⁵ Yesu aahaahusiha oomuchara awe wi nroromelo nnanwerya waakhaviherya ovootha saweeha. (Mwaalakhanye Mateu 17:19, 20.) Mu ekwaha emoha, awo hiyaawenrye okumihamo nsololo, naamwi ilukuluku ikina yaakhumelenle phaama mu weerano yeela. Tinivi naari nikacamiho? Yesu aahaatharihela awo wi yaaphwanela okhalano nroromelo nawaaca. Owo aahaaleela wi nroromelo nawaakhwanela nnanwerya ovootha saweeha sinalikana ni mwaako. Olelo, hiyaano tho nookhalano makacamiho yaawo enalikana ni mwaako.

16. Ti mwawiihai nroromelo naamukhavihenryaaya Geydi ovilela aiyawe emanle wiiphiwa?

¹⁶ Moone yootakiherya ya Geydi, murokora o Guatemala. Aiyawe, Edi, yaahiiphiwa vaavaa awo yaakookelaaya owannyaya ekhumaka o mithukumano. Ti mwawiihai nroromelo na Geydi naamukhavihenryaaya ovilelano othanana yoola otokweene? Owo ooloca: “Nivekelo naakikhaviherya omvonyerya nikacamiho naka Yehova, nave eyo yaanakeriha okhalano murecele. Kaanoona Yehova akikhapelelaka moorweela wa amusi aka ni asinthamwene aka a mmulokoni. Oweiwa mmuteko wa Yehova waahikikhaviherya ohikhala oothanana ni awuukhuwa vooloca sa nihiku na omeelo. Orweela wa yaweereya yeela, koohuserya wi moohipwacha nikacamiho vyakala nnahaala okhumelela omwaahiyu, kinahaala owerya ovilela nnikhaviheryo na Yehova, Yesu, ni marehereryo awe.”

17. Tiheeni nnaphwanelaahu weera vaavaa nnahoolelaahu nikacamiho ntokweene nnalikana ni mwaako?

¹⁷ Apwanne munnathanana nthowa na omuyeleela oosiveliwaanyu mookhwani? Mmaliheke elukuluku mulipihaka nroromelo nanyu mu ewehereryo ya ovinya mookhwani moorweela wa waalakhanya saweereya sa Mpiipiliyani sa yaale yaaviihiwe mookhwani. Apwanne munnathanana nthowa na mmusi anyu yoowo iikariwe mmulokoni? Muhuserye wi mulekecheye wi olaka  wa Muluku ti woophwanelela. Vaavaa munahoolelaanyu nikacamiho, moone ntoko ekari wi mulipihe nroromelo nanyu. Mmuleele Yehova mukhalelo muniisoonaanyu. Muhiivalaanye, nyenya mutitelele okhala vamoha ni anna ni arokora anyu. (Masi. 18:1) Mulapeke miteko seiho sinahaala wookhaviheryaani ovilela, naamwi muupuwelaka ichu seiho siweerenleeni. (Sal. 126:5, 6) Mutitelele oya mmithukumano, mmuteko woolaleerya, ni omwaalakhanya Piipiliya. Nave mutitelele wuupuwelela vooloca sa ichu seiho sootikhiniha Yehova olaihenryeiye woovahaani omwaahiyu. Vaavaa munoonaanyu mukhalelo Yehova onookhaviheryeiyeni hiihaano, nroromelo nanyu wa yoowo nnahaala otitelela okhala noolipa.

18. Vaavaa munoonaanyu wi nroromelo nanyu nooceecheya, tiheeni munaphwanelaanyu weera?

¹⁸ Waakhanle wi makacamiho anyu akhalai naari ahiihaano, annaceecheiha nroromelo nanyu, muhiceecheye. Moone okhala ekari ya olipiha nroromelo nanyu. Mpake yooveka emohamoha arummwa a Yesu yaapankaaya, awo yaaloca: “Munachererye nroromelo.” (Luka 17:5, NN) Nave tho, muupuwele vooloca sa sootakiherya nthokoronryaahu mmwaha yoola. Ntoko Miguel ni Yurai, ilukuluku soothene muupuweleleke vaavaa Yehova onavahereryeiye nikhaviheryo. Ntoko mwaana a mwaamuthiyana a Vero ni Anel, mvekele ni murima woothene wa Yehova, xaxaxa vaavaa munahoolelaanyu makacamiho matokweene. Nave ntoko Geydi, musuwele wi Yehova onanwerya ovahererya nikhaviheryo moorweela wa amusi ni asinthamwene. Vaavaa muneemereryaanyu wi Yehova ookhaviheryeeni ni makacamiho anyu olelo, munahaala opacerya ororomela wi Yehova onahaala wookhaviheryaani ovilela ni makacamiho vyakala yaawo munahaalaanyu ohoolela omwaahiyu.

19. Tiheeni Yesu aaroromeleiye, nave tiheeni munaphwanelaanyu ororomela?

¹⁹ Yesu aahaakhaviherya oohuserya awe wi yoone makupa yaawo yaaphwanelaaya orehererya, owo hantonko okhwa minikwa wi awo yanwerya ovilela ni saweeha soomwaahiyu. (Yoh. 14:1; 16:33) Owo aanaroromela wi muloko mutokotoko onaahaala ovuluwa mu yoohooxa etokotoko wa nthowa na nroromelo naya noolipa. (Wup. 7:9, 14) Apwanne munahaala okhala ni yaawo? Nnikhaviheryo na Yehova nyuwaano munahaala opaka makupa wakhala wi munnapaka soothene munaweryaanyu hiihaano wi mulipihe nroromelo nanyu!—Ahe. 10:39.