1. Nceenyeryo taani Yehova onanivaheiye?

OSIVELA woororomeleya ti woochuneyaxa wa Yehova. (Ose. 6:6) Owo onnaaceenyerya alapeli awe weerano emohamoha. Moorweela wa mulipa a miririmu Mikeya, Muluku ahu onnanceenyerya ‘okhalano osivela woororomeleya.’ (Mik. 6:8) Nyenya nihaakumve weerano yeela, nnaphwanela osuwela osivela woororomeleya tiheeni.

2. Ti sivi siri mikhalelo mikina sa osivela woororomeleya?

² Osivela woororomeleya tiheeni? Masu awi “osivela woororomeleya” annaphwanyeya ikwaha 230 mu Tradução do Novo Mundo das Escrituras Sagradas. Enataphulela eheeni? Wakhala wi muchu ookhalano osivela woororomeleya, owo onnamusivela muchu mukina nave onahaala otitelela omusivela yoowo ni moororomeleya onnakhala mmakupa awe. Yehova yootakiherya yaphaama ya wooniherya osivela woororomeleya. Mmwaha yoola, nnahaala othokororya mukhalelo Yehova onooniheryeiye osivela woororomeleya wa achu. Mmwaha onacharela, nnahaala othokororya mukhalelo alipeleli a Muluku eneeraaya emutakiherye Yehova moorweela wa wooniherya osivela woororomeleya wa mukina ni mukhwaawe.

3. Tiheeni Yehova aamuleenleiye Mose vooloca sa yoowo mukhateiye?

³ Elukuluku vakhaani ohoolo waya Aisarayeli emanle okhuma Oyikuputu, Yehova aamuleela Mose ichu ikina vooloca sa nsina nawe ni mikhalelo sawe. Owo aaloca: “Apwiya [Yehova] Muluku, a ikharari, a mahala, oohaakuva onanariwa, oosivelasha ni oororomeleya. Osivela waka oniikhalelaru wa achu ancipale. Kinakhurumuwela opahuwa, ohiiwelela ni ocheka.” (Muk. 34:6, 7) Ni  masu yaala aphaama ni ootannya murima, Yehova aamuleela Mose echu ekina yoochuneya vooloca sa osivela Wawe woororomeleya. Teevi yeeyo?

4-5. (1) Ti mwawiihai Yehova oniithariheiye mwaneene? (2) Makoho taani nnahaalaahu othokororya?

⁴ Yehova onniiloca mukhateiye ohiya pahiru okhalano osivela woororomeleya nyenya tho “oosivelasha.” Masu yaala annaphwanyeya ikwaha 6 Mpiipiliyani. (Nam. 14:18; Neh. 9:17; Sal. 86:15; 103:8; Yow. 2:13; Yona 4:2) Mu ikwaha soothene, masu yaala anamuloca pahiru Yehova, ohiya achu. Moone wi Yehova onniithariha mwaneene mmukhalelo yoola Mpiipiliyani. Moohikhwa minikwa, osivela woororomeleya ti woochuneya wa yoowo. * Ti nthowa nene Mwene Tavite aalonceiye: “Muluku osivela wanyu onnaphiya wirimu . . . Osivela wanyu ti wooreerasha opwaha. Mmuurushi wa muuphelo anyu, nnaphwanyaahumo woopoliwa, achu oothene.” (Sal. 36:5, 7) Moolikana ni Tavite, mpwanne ninnavaha esisapo osivela woororomeleya wa Muluku?

⁵ Wi niiwexexe phaama enataphulela eheeni osivela woororomeleya nnahaala othokororya makoho meeli: Taani Yehova onawooniheryeiye osivela woororomeleya? Nave ti mwawiihai nneeraahu niphurevo orweela wa mukhalelo yoola wa osivela woororomeleya wa Yehova?

6. Taani Yehova onawooniheryeiye osivela woororomeleya?

⁶ Taani Yehova onawooniheryeiye osivela woororomeleya? Piipiliya onnathariha wi hiyaano nnanwerya osivela ichu sincipale, ntoko “olima,” “eviinyu ni makhurwa,” “olakiwa,” “ohuserya,” “miruku”—iha ichu savakhaani itharihiwe. (2 Math. 26:10; Masi. 12:1; 21:17; 29:3) Nyenya osivela woororomeleya honooniheryiwa wa ichu; owo onooniheryiwa pahiru wa achu. Nave Yehova hanooniherya osivela woororomeleya wa muchu ori oothene. Owo onooniherya wa yaale arino onthamwene wavameekhaaya ni yoowo. Muluku ahu toororomeleya wa asinthamwene awe. Owo ookhalano yoolakelela yootikhiniha wa yaawo, nave owo harwa ahiya waasivela yaawo.

7. Ti mwawiihai Yehova oonihenryeiye osivela wa achu oothene?

⁷ Yehova onnooniherya osivela wa achu oothene. Yesu aaloca wa mulopwana awiichaniwa Nikotemu: “Muluku okhwela wawesha elapo ya vathi [achu] aarino hiiha: aamvaha mwanawe mmoharu, wi oothene yaawo anaroromela ehirimeele, nto ekhaleno okumi woohimala.”—Yoh. 3:1, 16; Mat. 5:44, 45.

8-9. (1) Ntakhara heeni Yehova onnooniherya osivela wawe woororomeleya wa akapuro awe? (2) Tiheeni nnahaalaahu othokororya voocharela?

 ⁸ Ntoko elociwaaya woopaceryani, Yehova onooniherya osivela wawe woororomeleya pahiru wa yaale arino onthamwene woolipa ni yoowo—alapeli awe. Ela ennooniheryiwa ni masu yaawo yaalociwe ni Mwene Tavite vamoha ni mulipa a miririmu Taniyeli. Ntoko yootakiherya, Tavite aaloca: “Muhihiyererye wooniha osivela wanyu wa yaawo anoosuwelaani.” “Osivela wa Apwiya wa yaawo anawoova, ori okhala wookhala.” Nave Taniyeli oothariha: ‘Pwiya Muluku, . . . yaale anookhwelaani ni aniiwelela malamulo anyu munnawooniha waakhwela wanyu.’ (Sal. 36:10; 103:17; Dan. 9:4, BNM) Mwawiiwanana ni masu yaala ooveereliwa, Yehova onnooniherya osivela wawe woororomeleya wa akapuro awe woona wi awo annamusuwela yoowo, annamoova yoowo, annamusivela yoowo, nave annakhapelela malamulo awe. Yehova onnooniherya osivela woororomeleya pahiru wa yaale anamurumeela yoowo mmukhalelo woophwanelela.

⁹ Nihaakumve opacerya omurumeela Yehova, hiyaano naanaakhela osivela yoowo Muluku onooniheryeiye wa achu oothene. (Sal. 104:14) Nyenya, ntoko alapeli awe, ninnaphura tho osivela wawe woororomeleya. Chiryene, Yehova onnaaroromeliha alapeli awe: “Osivela waka ni weyo horwa waakakhanyeya.” (Isa. 54:10) Mweeparipari, Tavite aahoona yeela mu ekumi awe, nave aaloca: “Apwiya annaakhwela yaawo ari oororomeleya.” (Sal. 4:3) Ti mwawiihai nnaphwanelaahu waakhulela okhapelela yoola wavameekhaaya Yehova onooniheryeiye wa hiyo? Mulipa a masalumu ooloca: “Orino miruku, athokororye soothene iha, nave aroore osivela wa Apwiya.” (Sal. 107:43) Ni yeela mmuupuweloni, hankooni nthokororye mikhalelo miraru seiho akapuro a Yehova anaphuraaya orweela wa saweera sawe sa osivela woororomeleya.

10. Nnakhaviheryeya hai osuwela wi osivela woororomeleya wa Muluku honamala? (Salumu 31:7)

¹⁰ Osivela woororomeleya wa Muluku honamala. Mukhalelo yoola woochuneyaxa wa osivela woororomeleya onnalociwa ikwaha 26 mu Salumu 136. Mu eversikulu yoopacerya ninnaalakhanya: “Mwaathamaleeni Apwiya vawi taphaama! Osivela waya honamalaru.”  (Sal. 136:1) Mu eversikulu 2 ophiyerya 26, ninnaalakhanya masu awuuluuleliwa “osivela wawe honamalaru!” Vaavaa nnamwaalakhanyaahu salumu yoola, ninnatikhiniheya vooloca sa mikhalelo mincipale seiho Yehova onooniheryeiye osivela wawe woororomeleya moohihiyererya. Masu yaala awuuluulela “osivela wawe honamalaru” annanroromeliha wi osivela wa Muluku ntakhara achu awe honatorokeya. Ennanlipiha vancipale osuwela wi Yehova hanahiya waasivela achu awe mwawaakuveya. Ohiya yeeyo vaavaa owo onapaceryeiye wooniherya osivela wawe wa muchu yoowo onamurumeela, owo hanamuhiya, xaxaxa mu ilukuluku sookacamiha. Mukhalelo nnaphuraahu: Osuwela wi Yehova hanaphweeleya ni hiyaano ennanivaha ohakalala ni ikuru seiho nnachunaahu wi nivilele ni makacamiho ahu ni otitelela omurumeela yoowo.—Mwaalakhanye Salumu 31:7.

11. Mwawiiwanana ni Salumu 86:5, tiheeni enamuceenyerya Yehova okhala ookhurumuwela?

¹¹ Osivela woororomeleya wa Muluku onnamuceenyerya owo okhala oolevelela. Vaavaa Yehova onamooneiye namacheka yoowo ocharunwe nave oniica yoocheka awe, osivela woororomeleya onnamuceenyerya Owo omukhurumuwela. Mulipa oomurepa salumu Tavite onnathariha vooloca sa Yehova: “Hananlaka ntoko mwa soocheka sahu, nari onikookiherya ntoko wa soonanara sahu.” (Sal. 103:8-11) Tavite aahoona mukhalelo eniicelaaya ni ohooxa vaavaa yawuupuxerya-ya-murima enoosomelaaya. Owo aanasuwela wi Yehova ‘toolevelela.’ Tiheeni enamuceenyerya Yehova okhala oolevelela? Naakhulo nnaphwanyeya mu Salumu 86:5. (Mwaalakhanye.) Chiryene, ntoko Tavite olonceiye mu nivekelo, Yehova onnakhurumuwela woona wi owo toosareya osivela woororomeleya wa oothene yaale anamwiichana.

12-13. Wakhala wi ninniiphwanyerya mathowa nthowa na soocheka seiho nipankaahu khalai, tiheeni enahaala onikhaviherya?

¹² Vaavaa nnapaakaahu yoocheka, ti yoophwanelela nave ti yaphaama othanana wa yeeyo nipankaahu. Ela enanwerya onceenyerya ocharuwa ni opaka matorokelo. Alapeli akina a Muluku, nlelo annathanana ni wiiphwanyerya mathowa nthowa na soocheka seiho apankaaya khalai. Awo anuupuwela wi Yehova harwa aakhurumuwela, naamwi evenke nikhurumuwelo nave ehin’ye opaka ichu soonanara. Wakhala wi chiryene mohiiwexexa  wi Yehova mweeparipari onnachuna owooniheryaani osivela wawe woororomeleya eyo enahaala wookhaviheryaani ovootha moonelo yoola.

¹³ Mukhalelo nnaphuraahu: Moohipwacha ohiphaameya wahu, nnanwerya ohakalala mu omurumeela wahu Yehova ni yawuupuxerya-ya-murima yaphaama. Ela ti yooweryeya nthowa nawi, “nikhami na Yeesu, ori mwanawe, ninnanrapiha wa soocheka soothene.” (1 Yoh. 1:7) Vaavaa munaceecheyaanyu ni ohiphaameya wanyu, munaphwanela wuupuwela wi Yehova onnachuna wookhurumuwelaani mweeparipari wakhala wi moocharuwa. Moone wiiwanana yoowo Tavite aapankeiye variyari va osivela woororomeleya ni okhurumuwela. Owo aarepa: “Waaca waya osivela wa Apwiya, onaphwanaphwana ni orekamelana waya wa erimu ni elapo ya vathi wa yaawo anawoova. Ntoko onarekamelaya onakhumawo nsuwa ni weiwo nnaneelaayawo, hiihaa Apwiya taviihalaayavo soocheka sahu erihela ociiwene.” (Sal. 103:11, 12) Mweeparipari, Yehova onnachuna ‘woomorelaani ikharari.’—Isa. 55:7.

14. Ti mwawiihai Tavite otharinheiye mukhalelo osivela woororomeleya wa Muluku onanikhapelelaaya?

¹⁴ Osivela woororomeleya wa Muluku onnanikhapelela omunepani. Avekelaka wa Yehova, Tavite aaloca: “Nyuwo mwa voochawelavo vaka, munarwa mukishophola mu sawuukhula. Nyuwo mwa ookaakiha aka; munarwa mukivulusha nave mukikhapelela. . . . Osivela wa Apwiya onnaarica yaawo anaaroromela.” (Sal. 32:7, 10) Hiihaa ntoko ixiri saakhapelelaaya epooma ni achu mmahiku akhalai, miteko sa Yehova sa osivela wawe woororomeleya sinnanrukurerya, sinivahaka okhapeleleya woomunepani orweela wa sawoopiha seiho saahaala weeha ororomeleya wahu. Mwawiihiiha, osivela woororomeleya wa Yehova onnanceenyerya omwaacamela owo.—Yer. 31:3.

15. Olikanela taani orivovo variyari va osivela woororomeleya wa Yehova ni nchawelo ni nlipiho?

¹⁵ Tavite aapharihela masu makina wi atharihe okhapelela yoowo achu a Muluku anapuhaaya. Owo aarepa: “Nyuwano, . . . mwa ikuru saka, Muluku onakikhwela.” Tavite tho aaloca vooloca sa Yehova: “Awo tari oororomeleya aka, empa aka yoolipihiwa, voochawelavo vaka, ni moopoli aka. Tanakaakiha nave kinaaroromelaaka.” (Sal. 59:17, BNM; 144:2) Ntakhara heeni Tavite oolikanyiha osivela woororomeleya wa Yehova ni voochawelavo ni nlipiho? Moohipwacha weiwo nnakhalaahuwo, naari elukuluku nimalinhaahu nri alapeli awe, Yehova onahaala ovahererya okhapelela woothene nnachunaahu wi nihiyeleele onthamwene ahu woochuneya ni yoowo. Yoororomeliha emohamoha ennaphwanyeya mu Salumu 91. Mulipa oomurepa salumu yoola onnathariha: “Kinii kiloce wa Apwiya: ‘Nyuwo muri voochawelavo vaka, moopoli aka, [naari ikuru saka].’” (Sal. 91:1-3, 9, 14) Mose aapharihela masu oolikana vooloca sa nchawelo. (Sal. 90:1) Mwawaaceererya, omakuchuwelo wa okumi awe, Mose aaloca echu ekina yoolipiha. Owo aarepa: “Muluku ti ntxhawelo nanyu mahiku othene; Apwiya Muluku, ni miyono saya annopharelani.” (Malam. 33:27, BNM) Masu yaala awi “ni miyono saya annopharelani” ananleela eheeni vooloca sa Yehova?

16. Ti mwawiihai Yehova onanikhaviheryeiye? (Salumu 136:23)

¹⁶ Vaavaa nnaroromelaahu wi Yehova onahaala onikhapelela, nnanwerya okhala ookhapeleleya. Nyenya mu ilukuluku ikina, nnanwerya okhala ooceecheya nave nihiweryeke wuupuwela mmukhalelo yoola. Mu ilukuluku seiha, tiheeni Yehova onahaaleiye weera wa hiyaano? (Mwaalakhanye Salumu 136:23.) Owo onahaala onipharela ni miwono sawe, onilipiha, ni onikhaviherya wi nihiye okhala awuukhuwa. (Sal. 28:9; 94:18) Mukhalelo nnaphuraahu:  Osuwela wi nookhalano nikhaviheryo na Muluku ilukuluku soothene, ennanikhaviherya mmikhalelo miili. Woopacerya, moohipwacha weiwo nnakhalaahuwo, noosuwela wi Yehova onahaala onikhapelelaka ilukuluku soothene. Yanaawiili, Tiithi ahu oosivela a wirimu onnanipwacha.

17. Nthowa na osivela woororomeleya wa Muluku, tiheeni nnaphwanelaahu ororomela? (Salumu 33:18-22)

¹⁷ Ntoko nihusenryaahu, moohipwacha makacamiho taani nnahoolelaahu, nnaphwanela ororomela wi Yehova onahaala onikhaviherya otitelela okhalano onthamwene waphaama ni yoowo. (2 Kor. 4:7-9) Mulipa a miririmu Yeremiya ooloca: “Osivela woororomeleya wa Apwiya honamalaru, ikharari saya hinnakuchuwa.” (Wik. 3:22) Nnaphwanela ororomela wi Yehova onahaala otitelela onooniherya osivela woororomeleya nthowa nawi Piipiliya onnaloca ariki: “Nitho na Yehova n’ri va yawo enamova Yowo. Va yawo enaweheryerya ikharari sawe.”—Mwaalakhanye Salumu 33:18-22, NN.

18-19. (1) Tiheeni nnaphwanelaahu wuupuwelaka? (2) Tiheeni nnahaalaahu othokororya mmwaha onacharela?

¹⁸ Tiheeni nnaphwanelaahu wuupuwelaka? Nihaakumve opacerya omurumeela Yehova, hiyaano naanaakhela osivela yoowo Muluku onawooniheryeiye achu oothene. Ntoko alapeli awe ninnaphura tho orweela wa osivela wawe woororomeleya. Aceenyeryiwaka ni osivela yoola, Yehova onnanikhupaarela ni onikhapelela ni miwono sawe. Owo ilukuluku soothene onahaala otitelela onaacamela nave onahaala waakhwaniherya yoolakelela awe ntakhara hiyo. Owo onachuna wi nikhale asinthamwene awe okhala wookhala! (Sal. 46:1, 2, 7) Mwawiihiiha, moohipwacha makacamiho taani nnahaalaahu ohoolela, Yehova onahaala onivaha ikuru nnachunaahu wi ntitelele okhala oororomeleya wa yoowo.

¹⁹ Nohoona mukhalelo Yehova onooniheryeiye osivela woororomeleya wa alapeli awe. Mwawiihiiha, owo onaweherya wi nooniheryeke osivela woororomeleya wa mukina ni mukhwaawe. Nni neereno hai yeela? Mwaha onacharela onahaala othokororya mwaha yoola woochuneya.