1. Murummwa Paulo aawoona hai arummwa oorumeela?

 ARUMMWA oorumeela annakhaviherya vacipale mmulokoni. Murummwa Paulo aanawoona okhala oochuneyaxa alopwana yaala oororomeleya. Ntoko yootakiherya, vaavaa aarepenleiye Akristu o Filipi, owo aahaaxeleliha arummwa oorumeela vamoha ni atokweene.—Afi. 1:1.

2. Ti mwawiihai munna awiichaniwa Luis oniisooneiye nthowa na okhala murummwa oorumeela?

² Anna ancipale oopatisiwa, a iyaakha soohiyanahiyana annakhala oohakalala vancipale moorweela wa okhaviherya mmulokoni ntoko arummwa oorumeela. Ntoko yootakiherya, Devan aarino iyaakha 18 vaavaa aathanliweiye ntoko murummwa oorumeela. Nave munna Luis aathanliwe arino iyaakha opwaha 50. Owo ooloca: “Wa miyaano ekari etokweenexa okhaviherya mmulokoni ntoko murummwa oorumeela xaxaxa vaavaa kinuupuwelaaka osivela woothene yoowo anna anakooniheryaaya!” Arummwa oorumeela ancipale annooniherya moonelo ene yoola.

3. Makoho taani nnahaalaahu othokororya mmwaha yoola?

³ Waakhanle wi moopatisiwa nave nlelo tahi mwa murummwa oorumeela, apwanne mwaanwerya okhalano yoolakelela yeela? Tiheeni enahaala wooceenyeryaani weerano yeeyo? Nave tiheeni Piipiliya onaloceiye vooloca sa yeeyo munaphwanelaanyu weera wi mukhale murummwa oorumeela? Mu yoohuserya yeela nnahaala othokororya maakhulo a makoho yaala. Nyenya nihaakumve, nnahaala woona muteko taani murummwa oorumeela onapakeiye.

 TIHEENI ARUMMWA OORUMEELA ANAPAKAAYA?

4. Miteko taani arummwa oorumeela anapakaaya? (Moone tho eruku.)

⁴ Murummwa oorumeela, munna opatisiwe yoowo othanliwe ni munepa waweela wi aakhaviherye atokweene okhapelela ichu ikina soochuneya mmulokoni. Arummwa oorumeela akina annakhapelela ikulucu sa muloko ni soolaleeryiwa seiyo nnapharihelaahu mmuteko woolaleerya. Akina annakhaviherya mu ompaka limpeesa ni orehererya Empa ya Omwene. Awo tho ananwerya othanliwa wi ekhale athoonyeryi nave tho wi ekhapeleleke ikhankoonya sa autiyu ni vitiyu variyari va mithukumano. Miteko mincipale sinapakiwa ni arummwa oorumeela ti soophwanelela. Nyenya, arummwa oorumeela yaala opwaha soothene, alopwana oomunepani; awo annamusivela Yehova nave annakhala mwawiiwanana ni malakiheryo awe awookololowa. Nave awo aakhalano osivela wawiixeela wa anna ni arokora aya Eekristu. (Mat. 22:37-39) Tiheeni munna opatisiwe onaphwaneleiye weera wi akhale murummwa oorumeela?

5. Tiheeni enahaala wookhaviheryaani waakhwaniherya murici wa okhala murummwa oorumeela?

⁵ Piipiliya onnathariha ichu soochuneya seiho munna onaphwaneleiye opaka wi athanliwe ntoko murummwa oorumeela. (1 Tim. 3:8-10, 12, 13) Wakhala wi munnachuna okhala murummwa oorumeela, muhuserye sooleeliherya seiha nave mwiilipixerye winnuwiha mikhalelo seiho. Nyenya woopaceryani, nyuwaano munaphwanela wiikoha ntakhara heeni munachunaanyu okhala murummwa oorumeela.

NTAKHARA HEENI MUNACHUNAANYU OKHALA MURUMMWA OORUMEELA?

6. Tiheeni enahaala woocenyeryaani ophara muteko vyakala wi mwaakhaviherye anna ni arokora? (Mateyu 20:28; moone tho ekaapa.)

⁶ Yootakiherya ahu etokweene, Yesu Kristu, owo aaceenyeryiwe ni osivela, osivela wa Atiithi awe ni osivela wa achu. Osivela yoola waahimuceenyerya olapa mwakuru ni opaka miteko mwawiiyeviha ntakhara achu akina. (Mwaalakhanye Mateyu 20:28; Yoh. 13:5, 14, 15) Wakhala wi nyuwaano munaceenyeryiwa ni osivela, Yehova onahaala wooreelihaani ni wookhaviheryaani waakhwaniherya yoolakelela anyu ya okhala murummwa oorumeela.—1 Ako. 16:14; 1 Pet. 5:5.

7. Ntakhara heeni munna onnaphwanela osepa okhala awiirumiha ni anrima?

⁷ Mweelaponi, achu ancipale annaatikhina achu awiirumiha ni yaale aniiseera wi toochuneyaxa. Nto ela heneereya mmarehereryo a Yehova. Munna yoowo onaarumeela akina hiiha ntoko  Yesu hanaavya owerya, waalamulela akina naari okhala oochuneyaxa waapwaha akina. Wakhala wi mulopwana anrima oothanliwa ntoko murummwa oorumeela, ti yawooneya wi owo aanwerya okhooca opaka miteko mikina mwawiiyeviha seiho siri soochuneya mu okhapelela ipucepuche soochuneya sa Yehova. Akhweya owo onamwiisoona wi toophwanelelaxa opaka miteko mikina. (Yoh. 10:12) Yehova harwa aareeliha achu yaawo anapaka ichu mwawiirumiha naari ntakhara wi anachuna okhala oochuneyaxa.—1 Ako. 10:24, 33; 13:4, 5.

8. Ekano taani Yesu aavanheiye arummwa awe 12?

⁸ Ikwaha ikina asithamwene awaacameleya a Yesu, yaaheererya ochuna okhalano murici ni yoolakelela yoonanara. Moone yaweereya ya arummwa eeli, Tiyaku ni Yohani. Awo yaahimveka Yesu wi aavahe nipuro noochuneyaxa mu Omwene. Yesu haawathamalenle nthowa na nchuno nenla na okhala oochuneyaxa waapwaha akina. Ohiya yeeyo, owo aahaaleela arummwa oothene 12 wi: “Yoole onachuna okhala mutokweene variyari vanyu, onaphwanela okhala namuteko anyu, nave yoole onachuna okhala oopacerya variyari vanyu, onaphwanela okhala kapuro a oothene.” (Mar. 10:35-37, 43, 44) Vaavaa munna onachuneiye okhala murummwa oorumeela ni yoolakelela yoophwanelela, eyo tiwi waarumeela akina, owo onnakhala mareeliho wa muloko.—1 Ate. 2:8.

MUNI MWAACEERERYE HAI NCHUNO NANYU NA OKHALA MURUMMWA OORUMEELA?

9. Muni mwaaceererye hai nchuno nanyu na waarumeela akina?

⁹ Moohikhwa minikwa, munnamusivela Yehova nave munnachuna waarumeela akina. Naamwiihiiha, akhweya nyuwaano hamukhalano nchuno na okhala murummwa oorumeela nthowa nawi moosuwela wi onnavolowelavo miteko mincipale. Vano, muni mwaaceererye hai nchuno nanyu na waarumeela akina? Mukhalelo mmoha ori wuupuwelela ohakalala yoowo nnakhalaahuno vaavaa nnaakhaviheryaahu anna ni arokora ahu. Yesu ooloca: “Wookhalavo ohakalala wawaaca mu ovaha, opwaha mu waakhela.” (Saw. 20:35) Okumi wa Yesu waari yootakiherya wa yeeyo. Owo aahikhalano ohakalala weeparipari nthowa nawi aanaarumeela akina, nave eyo enanwerya weereya ni nyuwaano tho.

10. Tiheeni enooniherya wi Yesu aanakhala oohakalala mu waarumeela akina? (Marku 6:​31-34)

¹⁰ Moone yootakiherya emoha ya mukhalelo Yesu oonihenryeiye wi aari oohakalala mu waarumeela akina. (Mwaalakhanye Marku 6:31-34.) Mu ekwaha emoha, Yesu ni arummwa awe yaatepa ovelavela. Awo yaaya o nipuro noomaaleleya wi yiichuuwe vakhaani. Nyenya muloko wa achu waahiphiya va nipuro nlo awo ehaakumve ophiya nave onanweherya Yesu, awo yaachuna owiriyana mahusiheryo a Yesu. Owo aanwerya okhooca. Woona wi owo ni oohuserya awe ‘hiyaarino elukuluku yawiichuuwa naari mano ya olya.’ Naari Yesu aanwerya waahusiha eparipari mu elukuluku tonto, nave voocharela aaleele achu wi eroweke. Nyenya Yesu aanaasivela achu, nthowa na yeeyo owo “aapacerya waahusiha ichu sincipale.” Nave owo aatitelela waahusiha ophiyerya ‘wiila.’ (Mar. 6:35) Owo aaheerano yeeyo ohiya nthowa na okhinyereryiwa, nyenya nthowa nawi “aamoriwano ikharari.” Owo aachuna waahusiha nthowa nawi aanaasivela. Weerano yeeyo waanamweeriha Yesu okhala oohakalala.

11. Tiheeni Yesu eenreiye wi akhaviherye muloko wa achu? (Moone tho eruku.)

¹¹ Ohiya ohusiha ichu sincipale, Yesu aahirumeela tho muloko wa achu yoole mmikhalelo mikina. Owo aahikhapelela soothowa soomwiilini sa achu. Owo mootikhiniha aahireeliha yoolya, nave aaruma oohuserya awe wi yaakawele achu. (Mar. 6:41) Mmukhalelo yoola, Yesu aahaahusiha oohuserya awe waarumeela akina. Owo tho aahooniherya wi tiwoochuneya waakhaviherya akina mmukhalelo wawooneya, nave tiyeeyo ene arummwa oorumeela anaphwanelaaya weera. Mwaanyiherye mukhalelo oohuserya yaaryaaya oohakalala omukhaviherya Yesu okawela yoolya yeele ophiyerya wi “oothene awo yaalya evona”! (Mar. 6:42) Ela tahi ekwaha yoopacerya yeeyo Yesu aakunheiye mu nipuro noopacerya soothowa sa akina. Owo  aaheerano yeeyo variyari va okumi awe woothene veelaponi ya vathi. (Mat. 4:23; 8:16) Yesu aahiphwanya ohakalala otokweene mu waahusiha akina ni okhapelela soothowa saya mwa wiiyeviha. Moohikhwa minikwa, nyuwaano tho munahaala okhala oohakalalaxa wakhala wi mookuha mu nipuro noopacerya soothowa sa akina ni wiilipixerya wi mukhale murummwa oorumeela.

12. Ntakhara heeni haavo orino mathowa a oloca wi tahi oochuneyaxa mmulokoni?

¹² Achu akina anoona wi hiyaanono mavyakelo avameekhaaya yaawo anahaala owerya ophariheliwa mmulokoni, waakhanle wi muniisoona hiiha, muhiceecheye. Moohikhwa minikwa, nyuwaano mookhalano mikhalelo soochuneyaxa sinahaala waakhaviherya anna ni arokora. Munoona hai waalakhanya masu a Paulo mu 1 Akorintu 12:12-30, nave mvekele vooloca sa yeeyo? Mu yoorepa yeela, Paulo oohiya mookwakwaleya wi mulapeli ari oothene a Yehova, eyo enaphitaanyeryavo nyuwaano, tasisapoxa ni oochuneya wa muloko. Mwawiihiiha, waakhanle wi himwaakhwanihenrye soovekeya wi mukhale murummwa oorumeela muhivelavele. Ohiya yeeyo, munoona hai opaka yeeyo munaweryaanyu wi mmurumeele Yehova ni waakhaviherya anna? Nave muroromele wi atokweene anahaala owuupuwelelaani wi yoothanleni ntakhara mirici seiho munaweryaanyu opaka.—Aro. 12:4-8.

13. Tiheeni eri yoochuneya vooloca sa soovekeya wa yaale anachuna okhala arummwa oorumeela?

¹³ Moone nthowa nikina nnahaala wookhaviheryaani wiilipixerya wi mukhale murummwa oorumeela: Soovekeya sincipale seiyo munaphwanelaanyu okhalano, ichu seiho Mukristu ori oothene onaphwaneleiye opaka. Ntoko yootakiherya, Akristu oothene anaphwanela olipiha onthamwene aya ni Yehova, okhala ooreheryeya waarumeela akina moohakalala ni ovaha yootakiherya yaphaama mmeecelo aya. Nyenya soovekeya taani xaxaxa, seiyo munna onaphwaneleiye weera wi akhale murummwa oorumeela?

TIHEENI MUNAPHWANELAANYU WEERA WI MUKHALE MURUMMWA OORUMEELA?

14. Enataphulela eheeni “okhala oocicimiherya”? (1 Timotiyu 3:8-10, 12)

¹⁴ Nnahaala woona soovekeya ikina seiyo Piipiliya onathariheiye mu 1 Timotiyu 3:8-10, 12. (Mwaalakhanye.) Arummwa oorumeela anaphwanela “okhala oocicimiherya.” Masu yaala tho ananwerya otaphulela “ophwanelela ncicimiho na akina” “okhala muhooleli,” naari “waakhulela mmukhalelo yoowo achu anacicimihaaya.” Eyo henataphulela wi nyuwaano hamunaphwanela okhala muchu ootheya naari ootheiha. (Ekl. 3:1, 4) Nyenya echu yoochuneya tiyawi, nyuwaano munaphwanela ocicimiherya mirici sanyu.  Wakhala wi mookhalano meecelo a wiilipixerya ni okhala oororomeleya, nyuwaano munanwerya ophura ncicimiho na muloko woothene.

15. Enataphulela eheeni okhala “oohootha” ni “oohichukuruwela muhakhu”?

¹⁵ “Oohootha” enataphulela wi nyuwaano mwa muchu eeparipari, oororomeleya nave wi ilukuluku soothene munaloca eparipari. Nyuwaano munnaakhwaniherya masu anyu nave hamunaawoka akina. (Mas. 3:32) “Oohichukuruwela muhakhu” enataphulela wi nyuwaano mwa muchu oororomeleya mu nakoso anyu ni mukhalelo munoonaanyu ikhorowa. Nyuwaano himwaahaala wiiphwanyerya wa asinthamwene anyu akina Eekristu wi mukhaleno ikhorowa sincipale.

16. (1) Enataphulela eheeni okhala “oohiwuryaxa eviinyu”? (2) Enataphulela eheeni okhalano “yawuupuxerya-ya-murima yaweela”?

¹⁶ “Oohiwuryaxa eviinyu” enataphulela wi nyuwaano hamunapwaha mphimo vaavaa munawuryaanyu soowurya soowaawa nave wi hamusuweliwe ntoko muchu oowuryaxa. Okhalano “yawuupuxerya-ya-murima yaweela” enataphulela wi nyuwaano munnacicimiha yeeyo Yehova olonceiye wi ti yaphaama naari wi ti yoonanara. Eparipari wi nyuwaano tahi mwa muchu oophaameya, nyenya mookhalano onthamwene waphaama ni Yehova, mwawiihiiha munnakhala a murecele.

17. Enataphulela eheeni “ovareryiwa ophwanelela waya”? (1 Timotiyu 3:10; moone tho eruku.)

¹⁷ “Ovareryiwa ophwanelela waya” enataphulela wi atokweene ahoona wi nyuwaano munnakhapelela phaama mirici sanyu nave wi awo ananwerya woororomelaani. Mwawiihiiha, vaavaa atokweene anoovekaayani wi mukhapelele muteko wammori, mucharihe moopwacha sooleeliherya saya ni ohoolela yoowo onavahereryiwa mmarehereryo. Mweererye osuwela soothene inavolowelavo mmuteko anyu, nave ti liini munaphwanelaanyu okwaaxa. Vaavaa nyuwaano munakhapelelaanyu phaama mirici sanyu mmulokoni, oothene a mmulokoni anahaala woona wi mwa muhooleli nave tho anahaala woona winnuwa wanyu. Atokweene, muhihiye waavyakiha anna yaawo epatisiwe. (Mwaalakhanye 1 Timotiyu 3:10.) Apwanne mmulokoni mwanyu aakhalamo anna oopatisiwa arino iyaakha 10 ophiyerya 14 naari vakhaani? Apwanne awo aakhalano yookhovelela ya opaka yoohuserya ya muchu mukhateiye enniirehererya phaama ntakhara mithukumano? Awo annavaha maakhulo mmithukumano nave annaya mmuteko woolaleerya moohihiyererya? Waakhanle wi naakhulo na makoho yaala ti nawi aai, mwaavahe mirici seiho awo anahaalaaya owerya okhapelela, moohipwacha okhalano iyaakha vakhaani. Mmukhalelo yoola, amiravo yaala anahaala  “ovareryiwa ophwanelela waya.” Voocharela, vaavaa awo anakhalaayano iyaakha variyari va 17 naari 18, awo akhweya ananwerya othanliwa ntoko arummwa oorumeela.

18. Enataphulela eheeni ‘ohikhalano nthowa’?

¹⁸ “Yaahikhalano nthowa” enataphulela wi ahikhalevo oni akhaleno mathowa oophwanelela a owootheryaani wi moheerano echu yoonanara. Eparipari wi Akristu ananwerya wootheryiwa. Ela yoheereya ni Yesu, nave owo ooloca wi oomuchara awe tho yaahaala ohoolela yeeyo. (Yoh. 15:20) Nyenya wakhala wi mookhalano meecelo aweela hiiha ntoko Yesu, nyuwaano munahaala okhalano meecelo aphaama variyari va muloko.—Mat. 11:19.

19. Enataphulela eheeni okhala “alopwana a muthiyana mmoha”?

¹⁹ “Alopwana a muthiyana mmoha.” Nyuwaano munaphwanela okhalano mooneelo mmohamoha wa Yehova vooloca sa othela—naari wi, nimakelo variyari va mulopwana mmoha ni muthiyana mmoha. (Mat. 19:3-9) Mukristu ahirwe acapaheye. (Ahe. 13:4) Nyenya sinnavolowelavo sincipale. Nyuwaano munaphwanela okhala oororomeleya wa amwaarinyu nave muhirwe mooniherye nchuno wa athiyana akina.—Yupu 31:1.

20. Ti mwawiihai mulopwana ‘onahooleleiye phaama echoko awe’?

²⁰ “Yaahooleleke phaama anamwane aya ni echoko aya ene.” Waakhanle wi nyuwaano mwa muru wa echoko, munaphwanela wakhwaniherya phaama murici anyu. Mpakeke malapelo a echoko moohihiyererya. Mukhumeke mmuteko woolaleerya ni amwaarinyu vamoha ni anamwane anyu ophiyerya vaavaa munaweryelaanyuvo. Mwaakhaviherye anamwane anyu winnuwiha onthamwene woolipa ni Yehova. (Yes. 6:4) Mulopwana yoowo onakhapelela phaama echoko awe onnooniherya wi ori ooreheryeya okhapelela muloko.—Mulikanyihe ni 1 Timotiyu 3:5.

21. Tiheeni munaphwanelaanyu weera wakhala wi nlelo tahi mwa murummwa oorumeela?

²¹ Anna, waakhanle wi nyuwaano tahi mwa murummwa oorumeela, khwoo, muthokororye mwaha yoola moopwacha nave mvekele vooloca sa yeeyo. Muhuserye soovekeya sa Mpiipiliyani wa arummwa oorumeela nave mwiilipixerye wi mwaakhwaniherye seiho. Mwaalikhele mukhalelo munamusivelaanyu Yehova nave tho anna ni arokora a muloko anyu. Eyo enahaala waaceererya nchuno nanyu na waarumeela yaawo. (1 Pet. 4:8, 10) Vaavaa nyuwaano munahaalaanyu okhala murummwa oorumeela, munahaala okhalano ohakalala wootikhiniha yoowo onarwa mu waarumeela anna ni arokora mmulokoni. Muroromele wi Yehova onahaala oreeliha wiilipixerya wanyu wi mukhale murummwa oorumeela!—Afi. 2:13.