1. Tiheeni nnaphwanelaahu ohuserya wa awuuluvala?

 OOTHENE ahu ninnachuna ohooleliwa wi nipake soolakelela soochuneya mu okumi. Nnanwerya okhalano ohoolela yoola orweela wa atokweene ni Akristu akina awiichwelavo. Wakhala wi awo tawunnuwelavoxa onipwaha hiyaano, hannaphwanela ohipwacha ikano saya noonaka wi tisoovireliwa. Yehova onachuna wi nihuserye orweela wa awuuluvala. Awo aakhala mu elukuluku yincipale onipwaha hiyaano, wi niphwanye saweereya, masuwelelo ni miruku.—Yupu 12:12.

2. Tiheeni nnahaalaahu ohuserya mmwaha yoola?

² Mu ilukuluku sa khalai Yehova aanaapharihela awuuluvala oororomeleya wi yaalipihe ni waahoolela achu awe. Ntoko yootakiherya, nkuupuwelani vooloca sa Mose, Tavite ni murummwa Yohani. Awo yaakhanle mu ilukuluku soohiyana, nave mikhalelo saya saari soohiyana vancipale. Vaavaa okumi aya waayaaya omakuchuwelo, awo yaanavaha ikano sa miruku wa amiravo. Mmoha ti mmoha a alopwana yaala awuuluvala oororomeleya, aanacicimiherya ochuneya waya omwiiwelela Muluku. Yehova aahikhapelela masu aya a miruku wa hiyaano olelo. Moohipwacha naari amiravo naari awuuluvala, nnanwerya ophuravo nuupuwelelaka ikano saya. (Aro. 15:4; 2 Tim. 3:16) Mmwaha yoola, nnahaala woona masu makina ookuchula a alopwana yaala ni woona tiheeni nnahaalaahu ohuserya.

‘MUNAMUKHALA MU ELUKULUKU YINCIPALE’

3. Mmikhalelo taani Mose aamurumeenleiye Muluku ni achu awe?

³ Mose aahilapa mwakuru ntakhara Yehova variyari va okumi awe woothene. Owo oorumeela ntoko mulipa a miririmu, muthoriha, muhooleli ni namarepa. Mose aahikhalano saweereya sincipale  sa okumi! Owo oohoolela nloko na Isarayeli okhuma wookapuroni o Yikuputu nave ohoona sootikhiniha sincipale sa Yehova. Yehova aahimpharihela wi aarepe alivuru athanu oopacerya a Mpiipiliyani, Salmu 90, nave akhweya tho Salmu 91. Owo tho woonaru tamurempe livuru a Yupu.

4. Taani Mose aavanheiye nlipiho, nave ntakhara heeni?

⁴ Ahalaka vakhaani okhwa vaavaa aareiyeno iyaakha 120, Mose aawiichana Aisarayeli oothene wi awuupuxerye ichu soothene seiho yoonaaya ni yaalawinhaaya. Mu iyaakha sincipale muculi, Aisarayeli akina yaahoona sootikhiniha seiyo Yehova aapankeiye ni mukhalelo owo aalankeiye a Yikuputu. (Muk. 7:3, 4) Awo yaaheeca veeri va maahi ookawanyeya a eniya yooxeerya nave yaahoona otoloxiwa wa anakhoco a Farawu. (Muk. 14:29-31) Nave mutakhwani Yehova aahaakhapelela yaawo. (Malam. 8:3, 4) Vano, vaavaa nloko naahanlaaya vakhaani ovolowa mu Elapo ya Nlakano, Mose aaphwanya ekari ya waalipiha achu. a

5. Masu ookuchula a Mose enaphwanyeya mu Malamulo 30:19, 20 yaavanhe hai nceenyeryo Aisarayeli?

⁵ Tiheeni Mose aalonceiye? (Mwaalakhanye Malamulo 30:19, 20.) Nloko na Isarayeli naahikhalano ewehereryo ya omwaahiyu wootikhiniha. Ni mareeliho a Yehova, Aisarayeli yaanwerya okhala mu ilukuluku sincipale mu elapo yeeyo owo aaroromelinheiye. Nave elapo yeele yaari yooreera nave yaanakumiha soolya sincipale! Mose aahaatharihela yaawo wi: “Ipooma sitokotoko ni sooreera seiyo ohikhanlaa otenke. Ipa sene soosareyamo, ohikhanle weyo ohenlemo; ihime soothimpwa phaama, ohikhanle weyo othimpemo; miri inavaha sawiima ohikhanle weyo waanlemo.”—Malam. 6:10, 11, PMM.

6. Ntakhara heeni Muluku aaheemererya wi maloko makina yaavoothe Aisarayeli?

⁶ Mose tho aahaavaha sawuupuxerya Aisarayeli. Wi etitelele okhala mu elapo yeele yaphaama, awo yaaphwanela omwiiwelelaka Yehova. Mose aahaaceenyerya ‘othanla okumi’ moorweela wa omwiiwelela ni ‘omwaakeelela owo.’ Nyenya, Aisarayeli hiyaamwiiwelenle Yehova. Mwawiihiiha, moovira wa elukuluku Muluku aaheemererya wi Asiriya, nave tho voocharela Apapulu yaavoothe ni waakeriha wookapuroni.—2 Mam. 17:6-8, 13, 14; 2 Math. 36:15-17, 20.

7. Tiheeni nnahuseryaahu ni masu a Mose? (Moone tho eruku.)

⁷ Tiheeni nnahuseryaahu? Wiiwelela onnaruuhela okumi. Hiiha ntoko Aisarayeli yaacamelaaya ovolowa mu Elapo ya Nlakano, hiyaano tho nihanle vakhaani ovolowa mu elapo evyaani eroromelihiwe ni Muluku, weiwo nnahaalaahu woona elapo ekhalaka parataiso. (Yes. 35:1; Luka 23:43) Musaserya ni masololo awe enamucakanela. (Wup. 20:2, 3) Malapelo atheru herwa yaahuweliha achu a Yehova. (Wup. 17:16) Olamulelo wa achu horwa waahooxa yaale onaalamulelaaya. (Wup. 19:19, 20) Mparataiso hokhalamo nipuro na achu oomwaryeya. (Sal. 37:10, 11) Achu mmakupa oothene anahaala wiiwelelaka nlamulo nawookololowa na Yehova, nenlo nnaruuha wiiwanana ni murecele. Mwawiihiiha, awo enamusivelanaka ni ororomelanaka mukina ni mukhwaawe. (Yes. 11:9) Ela ewehereryo yoohakalaliha! Ohiya yeeyoru, wakhala wi ninnamwiiwelela Yehova nnanwerya okhala mu parataiso veelaponi yeela yavathi ohiya pahiru mu iyaakha masana masaneene, nyenya okhala wookhala.—Sal. 37:29; Yoh. 3:16.

8. Ti mwawiihai yoororomeliha ya okumi woohimala yaamukhavihenryaaya misiyonariyu mmoha? (Yuta 20, 21)

⁸ Wakhala wi nookhapelela mmupuweloni mwahu yoororomeliha ya Muluku ya okumi woohimala, nnahaala omwiiwelelaka owo  moohipwacha saweeha nnahaalaahu ohoolela. (Mwaalakhanye Yuta 20, 21.) Yoororomeliha yeela tho enanwerya onivyakiha owaniha vooloca sa sooceecheiha sahu. Misiyonaariyu mmoha omalinhe iyaakha sincipale mu Afrika, yoowo aawaniha ni oceecheya woomwiilini wootitelela, ooloca: “Wiiwexexa wi ewehereryo aka ya okhala ni okumi okhala wookhala yaahoopopiheya, yaahikeeriha okhala oolakelela owaniha nikacamiho naka ni ovekela wa Yehova moohihiyererya. Nnikhaviheryo nawe kaahiwerya ovootha.”

“IWEECELEKE PHAAMA”

9. Saweeha taani Tavite aahoolenleiye mu okumi awe?

⁹ Tavite aari mwene mutokweene. Aari mulipa awiipa, mulipa oorepa, nakhoco ni mulipa a miririmu. Owo aahoolela saweeha sincipale. Variyari va iyaakha ikina, owo aari mulipa oochawa amuchawaka Mwene Sawuli anrima. Amanle okhala mwene, wanaawiili Tavite aaphwanela ochawiha okumi awe vaavaa mwanawe Apusalawu eereryeiye okuxa omwene awe. Moohipwacha makacamiho awe ni soohesa sawe, Tavite aahooniherya okhala oororomeleya wa Muluku ophiyerya makuchuwelo a okumi awe. Yehova oomuloca ntoko “muchu a vamurimani [Vawe].” Mweeparipari, nnaphwanela owiriyanaka ekano ya miruku ya Tavite!—Saw. 13:22; 1 Mam. 15:5.

10. Ntakhara heeni Tavite aahimvaha ikano mwanawe Solomoni ahaakumve okhala mwene?

¹⁰ Ntoko yootakiherya, muthokororye ekano yeeyo Tavite amvanheiye mwanawe Solomoni yoowo aahaala okhala muraceeli awe. Mmiravo aathanliwe ni Yehova wi atitelele oruuha malapelo aweela ni otekiwa empa ya Muluku wi emucicimiheke Yoowo. (1 Math. 22:5) Solomoni aahaala ohoolela makacamiho. Tiheeni Tavite aalonceiye wi amukhaviherye Solomoni? Hankooni noone.

11. Mwawiiwanana ni 1 Mamwene 2:2, 3, yoororomeliha taani Tavite amvanheiye Solomoni, nave ti mwawiihai masu yaala enooniheryaaya wi teeparipari? (Moone tho eruku.)

¹¹ Tiheeni Tavite aalonceiye? (Mwaalakhanye 1 Mamwene 2:2, 3.) Tavite aamuleela mwanawe wi, wakhala wi oomwiiwelela Yehova aahaala okhumelela phaama mu okumi awe. Nave mu iyaakha sincipale, Yehova aahimvaha Solomoni ichu sincipale saphaama nave aahimukhaviherya mmikhalelo mincipale. (1 Math. 29:23-25) Solomoni aateka Empa ya Muluku yaphaama nave masu awe mancipale aarempwa mu alivuru akina a Mpiipiliyani. Aahikhala oovuwa nthowa na miruku sawe ni muhakhu. (1 Mam. 4:34) Nyenya ntoko Tavite aalonceiye, Solomoni pahiru aahaala okhumelela phaama waakhanle wi aanamwiiwelela Yehova Muluku. Moothananiha, vaavaa Solomoni uuluvanleiye aapacerya waalapela amiluku akina. Yehova haasiveliwe ni yeela nave aahiya omvaha miruku Solomoni sa waalamulela achu mmukhalelo waphaama ni wawookololowa.—1 Mam. 11:9, 10; 12:4.

12. Tiheeni nnahuseryahu ni masu a Tavite?

 ¹² Tiheeni nnahuseryaahu? Wiiwelela onnaruuha mareeliho. (Sal. 1:1-3) Eparipari wi Yehova haniroromelinhe onivaha muhakhu ni ncicimiho hiiha ntoko eenreiye ni Solomoni. Nyenya wakhala wi ninnamwiiwelela Muluku ahu, owo onahaala onivaha miruku seiyo inahaala oneeriha opaka soolakelela saphaama. (Mas. 2:6, 7; Tiy. 1:5) Malakiheryo awe ananwerya onihoolela mmikhalelo sawooneya ntoko muteko, mahusiheryo, mathatelo ni ikhorowa. Wakhala wi noochariha ikano sawe, nnahaala okhapelela onthamwene ahu ni yoowo nave nnamukhalano ekumi yoohimala. (Mas. 2:10, 11) Nnanwerya okhalano onthamwene waphaama. Nave tho nnahaala osuwela echu nnahaalaahu weera wi niwerye okhalano emusi yoohakalala.

13. Tiheeni yaamukhavihenrye Carmen okhumelela phaama?

¹³ Carmen, yoowo onakhala o Mosampiki uupuwela wi mahusiheryo a vasulu ti yaawo yaahaala omweeriha okhalano okumi waphaama. Owo aahirempwa mu exikola ya vasulu wi ahuserye oteka ipa itokweene. Owo ooloca: “Kanasiveliwa ni yeeyo kaahuseryaaka. Nyenya eyo yaanamaliha elukuluku ni ikuru saka. Kaakhala oxikola opacerya ewora ya 7:30 ophiyerya ewora ya 18:00. Waakhala woovila ophiya mmithukumano, nave okumi aka woomunepani waanahooxeya. Mpuwa mwaka, kaahiiwexexa wi keererya waalapa asipwiya eeli.” (Mat. 6:24) Owo aahivekela vooloca sa mukhalelo awe nave aahitholathola mu soolaleeryiwa sahu. Owo ohaaceererya: “Kimanle waakhela ikano saphaama sa anna awiichwelavo ni amama aka, kaahilakelela ohiya exikola ya vasulu wi kimurumeele Yehova mmuteko wa elukuluku yoothene. Ela yookikhaviherya opaka soothanla saphaama mu ekumi aka, nave nkaano ekeerelani.”

14. Tuuvi waari muchaka woochuneyaxa wa Mose ni Tavite?

¹⁴ Mose ni Tavite yaanamusivela Yehova ni omuthamalela vatokweene nave yaanasuwela wi tiwoochuneyaxa omwiiwelelaka yoowo. Mwawiihiiha, awo yaahaalipiha achu akina ochariha yootakiherya aya wi etitelele okhala oororomeleya wa Yehova. Mose ni Tavite yaahaalopola wi yaawo yaahaala omuhiya Yehova yaahaala oyeleela weemereryiwa ni yoowo, ophitaanyerya mareeliho yaawo owo aaroromelinheiye. Ikano saya ti soochuneyaxa wa hiyaano olelo. Iyaakha masaneene ohoolo waya, mulapeli mukina a Yehova aahooniherya ochuneya waya okhala oororomeleya wa Muluku.

 “NKAANO OHAKALALA OTOKOTOKO OPWAHA OLA”

15. Ichu taani murummwa Yohani oonneiye variyari va okumi awe?

¹⁵ Yohani aari murummwa oosiveliwa a Yesu Kristu. (Mat. 10:2; Yoh. 19:26) Yohani aahimaliha elukuluku yincipale ni Yesu variyari va muteko awe woothene woolaleerya veelaponi yeela yavathi, aamoona apakaka sootikhiniha nave aahikhala ni yoowo mu ilukuluku soovila. Owo aahimoona Yesu iiphiwaka nave aahimoona owo amanle oviihiwa mookhwaani. Owo aahoona tho muloko Weekristu winnuwaka mu nsana noopacerya ovinyerya nikhuuru nikhaani na Akristu oororomeleya ophiyerya vaavaa michaka saphaama saahaalaaya ‘olaleeryiwa wa soopatuxiwa soothene vathi va erimu.’—Ako. 1:23.

16. Taani yaaphunrevo orweela wa ikaarata sa Yohani khalai nave taani enaphuravo olelo?

¹⁶ Vaavaa Yohani uuluvanleiye, owo aahikhalano ekari ya omurepa liivuru aphaama a Wupulula, yoowo onaloca sa “wuupulula wa Yesu Kristu.” (Wup. 1:1) Yohani oorepa muchaka yoowo onakuxa nsina nawe. Owo tho oorepa ikaarata raru sooveereliwa. Owo aahirepa ekaarata awe yaneeraru wa Mukristu oororomeleya awiichaniwa Kaiyu, yoowo Yohani aamooneiye ntoko mwaana oosiveliwa oomunepani. (3 Yoh. 1) Mwawiihiiha, ti yawooneya wi yaakhalawo achu ancipale yaawo Yohani aawooneiye ntoko anaawe oomunepani. Yeeyo mulopwana yoola awuuluvala ni oororomeleya orempeiye yohaalipiha oomuchara oothene a Yesu ophiyerya mmahiku ahu.

17. Mwawiiwanana ni 3 Yohani 4, tiheeni enaruuha ohakalala otokweene?

¹⁷ Tiheeni Yohani orempeiye? (Mwaalakhanye 3 Yohani 4.) Yohani aarepa vooloca sa ohakalala yoowo omwiiwelela Muluku onaruuhaaya. Vaavaa Yohani aarempeiye ekaarata awe yaneeraru achu akina yaanamwaramwaxa mahusiheryo awootha ni etannyaka okawanyeya. Nyenya, akina yaahititelela “weeca mu eparipari.” Awo yaanamwiiwelela Yehova ni “weeca mwawiiwanana ni malamulo awe.” (2 Yoh. 4, 6) Akristu yaala oororomeleya yaahiruuha ohakalala ohiya pahiru wa Yohani, nyenya tho wa Yehova.—Mas. 27:11.

18. Tiheeni nnahuseryaahu ni masu a Yohani?

¹⁸ Tiheeni nnahuseryaahu? Ororomeleya onnaruuha ohakalala. (1 Yoh. 5:3) Ntoko yootakiherya, ninnahakalala osuwela wi ninnamweeriha Yehova okhala oohakalala. Yehova onnahakalalaxa vaavaa nnasepaahu opaka yeeyo eri yoonanara ni wiiwelela malamulo awe. (Mas. 23:15) Ankeelo tho wirimu ennahakalala. (Luka 15:10) Nave tho ninnakhala oohakalala vaavaa nnawoonaahu anna ni arokora ahu etitelelaka  okhala oororomeleya vaavaa anahoolelaaya wiikariwa naari saweeha. (2 Ate. 1:4) Mwawiihiiha, vaavaa mukhalelo yoola wa ichu onahaalaaya otoloxiwa, nnahaala okhala oohakalala osuwela wi nohooniherya ororomeleya wahu wa Yehova mu elapo yeeyo yaalamuleliwa ni Satana.

19. Tiheeni murokora mmoha awiichaniwa Rachel oolonceiye vooloca sa waahusiha akina eparipari? (Moone tho eruku.)

¹⁹ Ninnahakalala xaxaxa vaavaa nnaaleelaahu akina vooloca sa eparipari. Rachel, yoowo onakhala o Republika Dominikana, onnoona wi ekari etokweene waahusiha akina vooloca sa Muluku ahu Yehova. Owo ohaakhaviherya achu ancipale opacerya omulapela Yehova, owo ooloca: “Ti woovila othariha ohakalala kinakhalaakano vaavaa kinawoonaaka yaale kaahusinhaaka emusiveleka Yehova, ehuseryaka omuroromela ni epakaka matorokelo mu ikumi saya wi emuhakalalihe yoowo. Ohakalala yoola onnakhala otokweene opwaha wiilipixerya vyakala yoowo kipankaaka wi kaahusihe.”

MPHUREVO ORWEELA WA MASU OOKUCHULA A ALOPWANA OOROROMELEYA

20. Mmukhalelo taani nnalikanaahu ni Mose, Tavite ni Yohani?

²⁰ Mose, Tavite ni Yohani, yaakhanle mu ilukuluku ni mikhalelo soohiyana ni sawihu. Nyenya nookhalano ichu soolikana ni yaawo. Awo yaahimurumeela Muluku eeparipari, emohamoha tho ni hiyaano. Hiiha ntoko awo, ninnavekela wa Yehova, ninnamuroromela yoowo nave ninnaavya ohoolela wawe. Nave ntoko alopwana yaala akhalai ninnaroromela wi Yehova onnaareeliha vancipale yaale enamwiiwelela.

21. Mareeliho taani yaale anachariha ikano sa Mose, Tavite ni Yohani anahaalaaya waakhela?

²¹ Hankooni nchare ekano ya alopwana yaala awuuluvala ni wiiwelela malamulo a Yehova. Vaavaa nnamwiiwelelaahu Yehova, owo onahaala onireeliha ni onikhaviherya. Nnahaala okhalano okumi nave ‘nnamukhala mu miyakha mintxipale,’ chiryene okhala wookhala! (Malam. 30:20, BNM) Nave nnahaala okhalano ohakalala nthowa na omuhakalaliha Tiithi ahu oosivela a wirimu, yoowo onaakhwaniherya soororomeliha sawe mmikhalelo mincipale opwaha echu vyakala yeeyo nnaweheryaahu naari nnaanyiheryaahu.—Aef. 3:20.