1-2. Mmukhalelo taani nneeraahu nikhalihiwe moohookololowa?

 YESU aahiloca niphwanaphwaniho nimoha vooloca sa naamukhwele yoowo aaveka mootitelela wi muthoriha athorihe mwaha awe mweekhaikhai. Moohikhwa minikwa, yaweereya yeela yaahitannya mirima sa oohuserya a Yesu nthowa nawi mu elukuluku yeele yaari yawunlaana achu okhalihiwa moohookololowa. (Luka 18:1-5) Niphwanaphwaniho nenla nnawerya okhalano yootaphulela etokweene wa hiyaano olelo, nthowa nawi hiyaano tho vakina vaya ninnakhalihiwa moohookololowa.

² Mmahiku ahu yaala, nthalu, ohiyana ni ohooxiwa ti sawunlaana, va nthowa na yeeyo, henantikhiniha vaavaa nnakhalihiwaahu moohookololowa. (Ekl. 5:8) Echu nihinaweheryaahu ori okhalihiwa moonanara ni munna naari murokora, nyenya eyo enanwerya weereya. Eparipari wi annihu hari ntoko achu yaawo ananikhaliha moonanara. Awo pahiru toohiphaameya. Nnawerya opharihela yootakiherya ya Yesu mukhalelo aakhulenleiye ohookololowa wi nihuserye mukhalelo wa ovootha mikhalelo sene seiha. Waakhanle wi ninniilipixerya okhala oopixa murima ni achu yaawo ahinamurumeela Yehova ananikhaliha moonanara, nnaphwanela wiilipixerya vancipale wi nikhaleno opixa murima ni annihu! Yehova onoona hai vaavaa owo onanooneiye nikhalihiwaka moonanara mmulokoni naari ni achu akina? Apwanne owo onnapwacha?

3. Apwanne Yehova onnuukhuwa ni ohookololowa nnahoolelaahu, nave ntakhara heeni?

³ Yehova onnuukhuwaxa ni mukhalelo achu ananikhalihaaya. “Tiwi Yehova onnasivela ekhaikhai.” (Sal. 37:28) Nave Yesu onnanroromeliha wi Yehova “onahaala weeriha wi . . . yeereliwe ekhaikhai mwawaakuveya” vaavaa enahaalaaya ophiya elukuluku yoophwanelela. (Luka 18:7, 8) Nave moohilekela Yehova onahaala  omaliha sookhumelela soonanara sa makacamiho ahu ni otoloxa mikhalelo soothene soohookololowa.—Sal. 72:1, 2.

4. Nikhaviheryo taani Yehova onanivaheiye olelo?

⁴ Mwa hiihaano, nnaphwanela oweherya elukuluku yeeyo Yehova onahaaleiye omaliha makacamiho, nyenya mu elukuluku yeela, Yehova onnanikhaviherya osuwela echu yaweera vaavaa nnakhalihiwaahu moonanara. (2 Pet. 3:13) Owo onnanihusiha mukhalelo nnaphwanelaahu waakhulela wi nsepe opaka echu yeeyo yaahaala waaceererya makacamiho. Ohiya yeeyoru, orweela wa mwanawe Yesu, Yehova oonivaha yootakiherya yaphaama ya mukhalelo nnahaalaahu ovootha ohookololowa. Owo tho onnanivaha ikano sa Mpiipiliyani sinanooniherya echu yaweera vaavaa nnakhalihiwaahu moonanara.

MUKHALENO EPHOOLE NI MUKHALELO MUNAAKHULELAANYU OHOOKOLOLOWA

5. Ntakhara heeni ninnaphwanela okhalano ephoole mukhalelo nnaakhulelaahu ohookololowa?

⁵ Hiyaano nnawerya okhala oosooseyaxa ni wuukhuwa nthowa na ohookololowa. (Ekl. 7:7) Ophiyerya tho alapeli oororomeleya ntoko Yupu ni Hapakuki, yaahiisoona hiiha. (Yupu 6:2, 3; Hap. 1:1-3) Naamwi mikhalelo seiha siri sawunlaana, nnaphwanela okhalano ekaasoope ni moonelo ahu wi nihipake ichu soololo.

6. Tiheeni yootakiherya ya Apisalawu enanihusihaaya? (Moone tho eruku.)

⁶ Vaavaa nnakhalihiwaahu moonanara naari nnamoonaahu muchu yoowo nnamusivelaahu ahooxiwaka, akhweya nnanwerya ochuna omukookiherya yoonanara muchu yoowo mmukhalelo mukina. Nave weerano yeeyo onanwerya otepiha ichu. Moone yootakiherya ya Apisalawu mwaana a mwene Tavite. Owo aahitepa onyeenyeya vaavaa murokora awe aaphareliweiye ni munnawe Aminoni. Mwawiiwanana ni nlamulo na Mose, Aminoni aanaphwanela wiiphiwa wa nthowa na yeeyo aapankeiye. (Onam. 20:17) Apisalawu aahikhalano mathowa oothene a weerano yeeyo, nyenya owo haarino owerya wa weerano yeeyo ni mata awe.—2 Sam. 13:20-23, 28, 29.

7. Ti mwawiihai ohookololowa yoowo mulipa oomurepa Salmu ooneiye wamvolowenlaaya?

⁷ Ikwaha ikina nnanwerya woona ntoko wi achu yaawo aneera ichu moohookololowa hanalakiwa, wa nthowa na yeeyo, nnanwerya opacerya okhwa minikhwa waakhanle wi mweeparipari ti waphaama opaka yeeyo eri yawookololowa. Moone yeeyo yeeren’ye ni mulipa oomurepa Salmu yoowo aapacenrye waavarerya achu yaawo yaapaka ichu soonanara wi yaanakhumelela phaama, eniiha aweera saphaama ilukuluku soothene yooneyaka ntoko wi yaanahooxeya. Owo aahi: “Ala achu oonanara murima,  yaawo ilukuluku soothene ahinuukhuwa.” (Sal. 73:12) Owo aanakhala awuukhuwaxa nthowa na ohookololowa yoowo ooneiye, ophiyerya apacerya okhwa minikhwa waakhanle wi omurumeela Yehova yaari echu yaphaama, ophiyerya aloca wi: “Vaavaa keerenryaaka wiiwexexa soothene seiha kaahihaleeliheya.” (Sal. 73:14, 16) Ophiyerya wi aaloca: “Wa miyo, inaani saka saahanle vakhaani ohuwela; saahanle vakhaani oserekuwa.” (Sal. 73:2) Yaaheereya echu yoolikana ni munna oniichaniwa Alberto.

8. Mmukhalelo taani ohookololowa waamvolowenlaaya Alberto?

⁸ Alberto aahootheriwa wi aahiiya ikhorowa sa muloko. Nthowa na yeeyo, owo aahiyeleela mirici soothene nave tho aahiyeleela ncicimiho na anna a mmulokoni yaawo yaasuwenle mwaha yoowo. Owo ooloca: “Miyaano kaakhala oonyeenyeya, oosooseya ni awuuliheya muru.” Wa nthowa na yaweereya yeela, Alberto aahikhala oonyeenyeya ni ooceecheya mmukhalelo woomunepani ophiyerya iyaakha thanu. Yaweereya yeela, ennooniherya echu yeeyo enahaala weereya wakhala wi nri onyeenyeya nthowa na ohookololowa.

MMUTAKIHERYE YESU VAAVAA MUNAHOOLELAANYU OHOOKOLOLOWA

9. Ohookololowa taani yoowo Yesu aahoolenleiye? (Moone tho eruku.)

⁹ Yesu ootikitherya yootakiherya yoophaameya ya mukhalelo nnahaalaahu ovootha ohookololowa. Muupuwele ikwaha ohooxen’yeiye ni ohookololowa  wa amusi awe ni achu akina. Amusi awe akina yaanaloca wi owo aarimusavuwa, nyenya ahooleli amalapelo yaanaloca tho wi orino masololo nave anakhoco o Roma yaanamphuca, emukhaliha moonanara voocharela emwiipha. (Mar. 3:21, 22; 14:55; 15:16-20, 35-37) Naamwiihiiha, Yesu ahiwerya ovootha ohookololowa woothene ahikookihenrye yoonanara ni yoonanara. Ti heeni nnahuseryaahu ni yootakiherya yeela?

10. Ti mwawiihai Yesu aahoolenleiye ohookololowa? (1 Petru 2:21-23)

¹⁰ Mwaalakhanye 1 Petru 2:21-23. a Yesu oohiya yootakiherya yoophaameya ya mukhalelo wa waakhulela vaavaa akina annikhalihaaya moohookololowa. Owo aanasuwela elukuluku yoophwanelela ya oloca ni elukuluku ya omaala. (Mat. 26:62-64) Owo hiisaakiha wa mwaha ti mwaha yoowo ootheriweiye. (Mat. 11:19) Nave vaavaa aaloceiye, owo haaruwana naari owoopopiha achu. Yesu aaniivareryela nthowa nawi owo “aanaveleela soothene wa Yoole onathoriha mwawookololowa.” Yesu aahisuwela wi mukhalelo Yehova ooneiye ichu ti waari woochuneya. Owo aanaroromela wi Yehova onahaala omaliha ohookololowa woothene mu elukuluku yoophwanelela.

11. Ti mwawiihai nnahaalaahu ovareryelaka yeeyo nnalocaahu? (Moone tho iruku.)

¹¹ Nnanwerya omutakiherya Yesu moorweela wa ovareryela yeeyo nnalocaahu vaavaa nnakhalihiwaahu moohookololowa. Okhalihiwa moonanara okina ti wooveyaveya, nave nnanwerya ohipwacha. Mmukhalelo mukina, nnanwerya othanla ohiloca echu nthowa nawi naloca echu nnanwerya otepiha mwaha. (Ekl. 3:7; Tiy. 1:19, 20) Ti yawooneya wi ikwaha ikina nnanwerya ochuna omwaakiha muchu yoowo onakhalihiwa moonanara naari nnanwerya ochuna oloca eparipari nchunaka waakiha nroromelo nahu. (Saw. 6: 1, 2) Nave vaavaa nneeraahuno yeela, nnaphwanela opaka owetha wahu wi neereno mmukhalelo woomaaleleya ni wa ncicimiho.—1 Pet. 3:15. b

12. Tiheeni nnaphwanelaahu weera wi nimuroromele Yehova ‘Yoowo onathoriha mwawookololowa’?

¹² Nave tho nnanwerya omutakiherya Yesu moorweela wa omuroromela Yehova, ‘Yoowo onathoriha mwawookololowa.’ Vaavaa akina ananthorihaaya naari onikhaliha moonanara, hiyaano ninnaroromela wi Yehova onnasuwela yeeyo eri yeeparipari. Nroromelo nenla ninnanikhaviherya otitelela ovilela okhalihiwa moonanara yoola, nthowa nawi noosuwela wi omakuchuwelo waya Yehova onahaala wookolola mwaha woothene yoowo. Vaavaa nnamuhiyeryaahu ichu soothene Yehova, ninnataphuwa mu onyeenyeya ni okuha mathowa, ohiya weemeryerya wi miyoonelo seiha suuceke mmurimani mwahu. Miyoonelo seiha soonanara sinanwerya oneeriha opaka echu yoohiphwanelela, oneeriha oyeleela ohakalala wahu ni onanariha onthamwene ahu ni Yehova.—Sal. 37:8.

13. Tiheeni enahaala onikhaviherya ovilela moopixa murima vaavaa nnakhalihiwaahu moohookololowa?

¹³ Eparipari wi hanni niwerye ochariha moophaameya yootakiherya ya Yesu. Ikwaha ikina, nnanwerya oloca naari weera echu vahoolo vaya nikhaleno ekeerelani. (Tiy. 3:2) Ikwaha ikina, ohookololowa onanwerya onihiyerya maharipa a mmupuweloni ni omwiilini yaawo ari oovila oxipiha. Waakhanle wi mookhalihiwa moonanara, muroromele wi Yehova oosuwela yeeyo nyuwo munahoolelaanyu. Nave tho Yesu yoowo ohoolenle ohookololowa, onnawerya wiiwexexa moophaameya miyoonelo sanyu. (Ahe. 4:15, 16) Ohiya pahiru onivaha yootakiherya yoophaameya ya Yesu wi ncharihe, Yehova tho onnanivaha malakiheryo yaawo mweeparipari anaphara muteko ni onikhaviherya ovilela ni ohookololowa. Hankooni nthokororye iversikulu piili sa liivuru a Aroma seiho sinahaala onikhaviherya.

“MMUHIYERYE MULUKU ESARA”

14. Enataphulela eheeni ‘omuhiyerya Muluku isara’? (Aroma 12:19)

¹⁴ Mwaalakhanye Aroma 12:19. Vaavaa murummwa Paulo aavanheiye Akristu ekano yawi ‘muhiye esara,’ ni yeela tiheeni owo aachuneiye oloca? Mwawiiwanana ni yoorepa, Paulo aaloca wi yaaphwanela omuhiyerya Yehova esara. Hiyaano ninnamuhiyerya Yehova isara vaavaa nnahiyaahu wi owo eeravo echu wi aruuhe wookololowa mu elukuluku onachuneiye ni mukhalelo owo onahaaleiye olakelela. Munna mmoha awiichaniwa John yoowo aakhalihiwe moohookololowa, onnathariha: “Miyaano kaanaphwanela ovareryela esara aka wi kiheererye orehererya ichu miyo mwaneene, nyenya eyo hiyaari yookhweya. Aroma 12:19 aahikikhaviherya otitelela onweherya Yehova.”

15. Ntakhara heeni ti yaphaama omuhiyerya Yehova wi arehererye mwaha?

¹⁵ Sookhalavo miphurelo mincipale sa onweherya Yehova wi ookolole ohookololowa. Vaavaa nnerahuno yeela, hiyaano ninnataphuwa mmurici wa okhala oothanana ni weererya othokoryorya makacamiho meekhiihu. Yehova onniivaha wi anikhaviherye. Vaavaa nnahoolelaahu ohookololowa, ori ntoko owo onaloca ni hiyo ariki: ‘Okihiyerye miyaano kinamurehererya.’ Wakhala wi hiyaano noheemererya yoororomeliha ya Yehova yawi “kinarwa kaakookiherya.” Nnanwerya omuhiyerya Yehova mwaha nsuwelaka wi onahaala weerano ichu mmukhalelo waphaama. Ti yeeyo yaamukhavihenrye John yoowo olociwe woopaceryani. Owo ooloca: “Wakhala wi koomuhiya Yehova wi arehererye makacamiho aka, yookhumelela ene enahaala okhala yaphaamaxa opwaha orehererya miyo mukhataaka.”

“MUTITELELE OVOOTHA YOONANARA NI YAPHAAMA”

16-17. Ti mwawiihai nivekelo nnahaalaaya onikhaviherya ‘otitelela ovootha yoonanara ni yaphaama’? (Aroma 12:21)

¹⁶ Mwaalakhanye Aroma 12:21. Paulo tho aahaavaha Akristu malakiheryo a ‘otitelela ovootha  yoonanara ni yaphaama.’ Mu mwaha awe wa vamwaakoni, Yesu aahi: “Mutitelele waasivela amwiicani anyu ni waavekelela yaale anoohooxaani.” (Mat. 5:44) Nave yaari yeeyo ene Yesu eenreiye. Apwanne mohintoko wuupuwela ekoyi yeeyo oonneiye vaavaa aakhomeliweiye va mwirini ni anakhoco yaale o Roma? Hannawerya waanyiherya wiicela yoowo oonneiye ni okhalihiwa moonanara hiiha tho ntoko ohicicimihiwa yoowo aavilenleiye.

¹⁷ Yesu haavoothiwe ni ohookololowa yoowo aahoolenleiye. Ohiya omveka Yehova wi aalake anakhoco, owo aavekela: “Tiithi, mwaalevelele yaawo, woona wi hanasuwela yeeyo aneeraaya.” (Luka 23:34) Vaavaa hiyaano nnaavekelelaahu achu yaawo anikhalinhe moonanara, ninnavukula miyoonelo sahu sa esara ni okuha mathowa ophiyerya tho wi nnanwerya otoroka mukhalelo nnawoonaahu achu yaawo aneerenle yoonanara.

18. Ti mwawiihai nivekelo naamukhavihenryaaya Alberto ni John ovootha ohookololowa?

¹⁸ Nivekelo nohaakhaviherya anna yaawo aromoliwe woopaceryani wa mwaha yoola ovootha ohookololowa yoowo ahoolenlaaya. Alberto ooloca: “Miyaano kaanaavekelela anna yaawo yaakikhalinhe moohookololowa. Miyaano kaanamveka Yehova ikwaha sincipale wi akikhaviherye ohiya muculi soothene seiho seeren’ye.” Moohakalaliha, Alberto aahikookela omurumeela Yehova moororomeleya. John ooloca: “Ikwaha sincipale, kaanamvekelela munna yoowo aakiphunce. Wa nthowa na mavekelo yaala, Yehova aahikikhaviherya omulevelela ni ohikhala oonyenyeya ni yoowo, naari omuthoriha. Mavekelo yaala tho yaahikikhaviherya okhalano murecele wa mmuupuweloni.”

19. Tiheeni nnaphwanelaahu weera ophiyerya omakuchuwelo wa mukhalelo yoola wa ichu? (1 Petru 3:8, 9)

¹⁹ Hannawerya waanyiherya ohookololowa yoowo nlelo nnahaalaahu ohoolela, ohaakumve mukhalelo yoola wa ichu omala. Moohipwacha ichu inahaala weereya muhoolo, hanrwa nihiya ovekela wa Yehova nivekaka nikhaviheryo. Ohiya yeeyoru, mutitelele opharihela malakiheryo a Mpiipiliyani nave muhicuwale omutakiherya Yesu vaavaa munaakhulelaanyu ohookololowa. Wakhala wi moheerano yeeyo, munanwerya olekecheya wi Yehova onahaala wooreelihaani okhala wookhala.—Mwaalakhanye 1 Petru 3:8, 9.