APWANNE munniilipixerya opaka yoohuserya ya Piipiliya ya muchu mukhateiye moohihiyererya ni weeriha okhala yoohakalaliha? Vakina vaya, oothene ahu onanwerya okhala woovila. Nyenya, muupuwelele ichu ikina seiho nnapakaahu moohihiyererya ntoko orapa. Ocapa onnamaliha elukuluku ni ikuru, nyenya ninniisoona okhala phaama wakhaala wi noheerano yeeyo! Yoohuserya ya Piipiliya tho enanwerya okhala nihakararyo ntoko “ovasa ni orapiha ni maahi moorweela wa masu.” (Aef. 5:26) Muthokororye ichu sa vakhaani seiho inahaala wookhaviheryaani:

• Mpake yoochariha. Yoohuserya ya Piipiliya ya muchu mukhateiye ennapaka makupa a “ichu soochuneyaxa” seiho Mukristu onaphwaneleiye opwachaka. (Afi. 1:10) Wi yookhaviheryeni ochara yoocharihaanyu, munoona hai okuha yoocharihaanyu va nipuro nawooneyavo ntoko vaxirini naari vanseleni? Naari nyuwaano munanwerya woona okhala yaphaama omureya alaarme mu telefoni anyu ehaakumve waakhwana ewora ya yoohuserya anyu.

• Muupuwele yeeyo enahaala wookhaviheryaani okhala ootikitheryeya. Apwanne wa nyuwaano ti wookhweya otikitheryeya mu elukuluku yincipale ekwaha emoha, akhweya elukuluku vakhaani mu ikwaha sincipale? Nyuwaano moosuwela phaama mikhalelo sanyu. Tiheeni eri yookhweya wa nyuwaano? Wakhala wi munnoona wi hamunakhalano nchuno vaavaa enaacamelaaya ewora ya yoohuserya ya muchu mukhateiye, munoona hai olakelela ohuseryaka pahiru aminutu khumi? Moorweela wa ohuserya mu elukuluku yeela ya vakhaani, nyuwaano munanwerya opaka sincipale opwaha seiho mwaahaalaanyu opaka mmukhalelo mukina. Nave emanle aminutu khumi akhweya munanwerya osiveliwaxa ochuna otitelela ohuseryaka opwaha mu aminutu yaala.—Afi. 2:13.

• Muthanle miru sa ohuserya woosiilo ene. Wakhala wi nyuwaano munaweherya elukuluku anyu ya ohuserya wi mulakelele yeeyo munahaalaanyu ohuserya, nyuwaano munanwerya ‘ohipharihela phaama elukuluku anyu.’ (Aef. 5:16) Munoona hai okhalano elista ya miyaha naari miru seiyo mwaahaalaanyu osiveliwa ohuserya? Vaavaa nikoho nnarwaaya mmuupuweloni mwanyu, murepeleke. Nave wookuchulani wa yoohuserya ti yoohuserya, nyuwaano munanwerya waaceererya miyaha mikina mu elista anyu seiyo mwaahaalaanyu osiveliwa ohuserya.

• Mpake matorokelo oochuneya. Mweererye ophitaanyeryavo matorokelo makina mu yoochariha anyu, ntoko waaca wa elukuluku yeeyo munamalihaanyu muhuseryaka miyaha seiho muthanlilaanyu. Echu yoochuneya tahi waaca wa elukuluku naari yeeyo munahuseryaanyu, nyenya ohuserya moohihiyererya.

Hiyaano ninnaphura chiryene orweela wa yookhovelela ya ohuserya moohihiyererya. Ninnamwaacamela Yehova, ninnahuserya weerano ichu mwa miruku nave ninniisoona okhala oomaaleleya.—Yos. 1:8.