Paul: Hiyaano naari oohakalalaxa! Waari mweeri wa Novempuru a 1985, naari mphironi mu ekwaha ahu yoopacerya ya omisiyonaariyu—o Liberia, Onaneela Nsuwa wa Afrika. Aviyawu nanwelaahu eemenle o Senegal. Anne ooloca: “Ehalaka ewora emoha pahi wi niphiye o Liberia!” Voocharela yaahirwa yoolokoha: “Oothene yaale anaya o Liberia ekithe mu aviyawu. Achu akina aamwareela olamulelo wa weiwo nthowa na yeeyo haniwerya ophiya o Liberia.” Waacamela mahiku khumi hiyaano naakhala ni mamisiyonaariyu o Senegal, naahiiwa wi achu ancipale yaahiiphiwa nave wi alamuleli hiyaaweemererya achu okhuma mmavaate mwaya wi eneeca mphironi ohiyu, mwawiihiiha, yaahaala woopeliwa.

Anne: Hanri ntoko achu anapaka mikwaha. Opacerya kiri mwaana kaasuweliwe ntoko Anninha oothanana. Kinakhala oonyeenyeya ophiyerya noolupha wene etila! Nyenya naari oolakelela oya o Liberia namwi waari wawoopiha.

Paul: Oothene ahu niyariwe o Inglaterra Makupa onaneela nsuwa nave niphwiiwe mukuma mmoha yoowo. Oothene ahu naapacenrye orumeela ntoko mapiyoneru vaavaa naamalinhaahu exikola, oothene ahu naahaakhela nceenyeryo wa miyaano ni asitiithi aka, wa yene ni amama awe. Awo yaahikhaviherya nchuno nahu na opaka muteko wa elukuluku yoothene. Kaahikhalano ekari ya orumeela o Peteli kirino iyaakha 19, nave Anne aahivolowa o Peteli nimanle othelana mu 1982.

Anne: Hiyaano naanasiveliwa ni muteko wo Peteli, Nyenya naahikhalano nchuno na orumeela weiwo waariwo othowa. Olapa vamoha ni anna yaawo yaari mamisiyonaariyu khalai o Peteli waahinnuwiha nchuno nenla. Naahivekela vooloca sa yeela ohiyu ori woothene mu iyaakha raru nave naahihakalala vancipale vaavaa naakhenlaahu nwopelo wi navolowe mu eturma 79 ya Exikola ya Kiliyati mu 1985! Naahirumihiwa o Liberia, Onaneela Nsuwa wa Afrika.

Paul: Naahinwela Aviyawu oopacerya yoowo eemereryinwe ovolowa o Liberia. Achu yaanatepa woova nave hiyaaphwanela okhumela vaate naari weeca ohiyu. Achu yaahitepa otuthuwa vaavaa ekaaro yaarummaaya  moonyakula ni mootutuxa awo yaanakhuwela echawaka! Wi nikhale oomaaleleya mu wuukhuwa wahu, naanaalakhanya oothene ahu makupa mamoha a Salmu ohiyu ori woothene. Nyenya hiyaano naanasiveliwa ni muteko ahu. Anne aalapa mmuteko woolaleerya ntoko misiyonaariya, nave miyaano kaalapa o Peteli, vamoha ni munna John Charuk. a Saweereya sawe ni owiiwexexa wawe anna ni arokora ahu waari ovyakiha otokweene wa miyaano.

Anne: Ntakhara heeni mu elukuluku vakhaani naahipacerya osiveliwa ni Liberia? Nthowa na anna ni arokora ahu. Awo yaari oosivela ni oororomeleyaxa. Naahikhala awaacameleya ni yaawo; nave yaari emusi ahu evyaani. Masu a ekano aya yaahinlipiha omunepani. Muteko woolaleerya yaari yoolakelela ahu. Aneene a vaate yaanakhala oonyeenyeya wakhala wi nohaakuvela olaanya! Achu yaavaanela vooloca sa Piipiliya mmuxeweni. Pahiru muchu aamphiya ni opaceriha ovaanela. Nave naahikhalano soohuserya sincipale, nyenya hiwaari wookhweya weeciha soothene seihe. Nla naari nikacamiho naaryaahuno!

Paul: Sivinrevo iyaakha xexe sa murecele mu 1989 yaahikhalavo matorokelo ootutuxa—nthowa na ekhoco. Anakhoco oomwareya yaahihiphela mukuma orukurerya Epeteli mu 2 a Yulyu, a 1990. Variyari va miyeeri miraru naahiyeleela opakela ichu vamoha ni anna a ilapo ikina ophitaanyerya amusi ahu vamoha ni anna o nipuro ntokweene. Waahikhalawo waakanyereya, orama wa yoolya, ni ophareliwa mararuwo. Makacamiho yaala yaahititelela mu iyaakha 14, nyenya yaahivolowela elapo yoothene.

Anne: Achu a mahimo makina yaanawana yiiphanaka nihimo nnihimo nikina. Mu iphiro soothene yaahikhalamo anakhoco yaawo yaarino akapuchi ancipale ewanre soowara soohisuwanyeya, awo yaanavolowa empa ni empa ekuxaka soothene yaaphwanyaaya. Wa akina wiipha hiwaari echu enevo, mwawiiwanana ni yeeyo yaalocaaya, “waakhala ntoko owiipha anakhu.” Anakhoco yaahiciyelela ephiro yaavareryaka achu yaawo yaavira nave yaanawiipha enuukelela miruchu sene mphironi, ophiyerya tho eyo yaaneereya waacamela va efiliyaali. Alapeli oororomeleya a Yehova yaahiiphiwa ophitaanyerya mamisiyonaariyu meeli.

Ehiyaka va yawoopiha ikumi saya Anamoona a Yehova yaahaavitha Anamoona akina yaawo yaari a nihimo nenlo naavyiwa wi niiphiwe. Mamisiyonaariyu ni Mapetelita yaaheerano emohamoha. O Peteli, Anamoona akina oochawa yaakhala mu empa yavathi nave akina yaakhala ni hiyaano mu ikwartu sahu mu empa yoosulu. Naahuuka ekwaartu ahu ni emusi ya achu 7.

Paul: Mahiku oothene anakhoco yaaneererya ovolowa wi yoone naawaavinthe achu. Naahikhalano marehereryo a olipelela wa achu axexe: Apiili yaanavareryela va xanela, akina va mulako wa vaate. Oopiili  yaawo yaakhala vamukhora, yookola moono aya ewehiha ohoolo yaataphulela wi ichu sookhala phaama. Nyenya wakhala wi yookolonle moono aya ewehihaka ochuli yaataphulela wi anakhoco yaari oowali, nave ale yaalipelela vaxanela yaanachimaka wi yaavithe annihu.

Anne: Ovinrevo isumana sincipale nikhuuru na anakhoco oowali naahiwerya ovolowa o Peteli. Miyaano kaahiiwalela ni murokora mmoha okaasa tepaanyu mummo waarimo munanikhuku a wiipithamo vathi va arumaariyu. Murokora aaphwanela wiiwomaanya mpuwa muumule. Anakhocho yaahikichara ophiyerya empa yoosulu. Yaahimana nsele nahu moowali. Paul aahi: “Amwaaraka anamurusa.” Kiiwalaka nipuro nenlo iipinthevo murokora waahiiweya onyakula, nyenya kaaphwanela okookiheryamo ichu soothene mu arumaariyu, nave eyo yaahimaliha elukuluku, mweeparipari kaanoova wi anakhoco yaahaala okohanaka echu kaapakaaka, nave kaahituthuwa ophiyerya mwiili aka woothene onathukumela. Kaahaala ohula hai mukhora? Kaahipaka nivekelo na vathivathi kimvekaka Yehova nikhaviheryo. Miyaano kaahihula mukhora nave mmukhalelo woomaaleleya kahaaxeleliha. Akivirelaka mmoha aayaawo aavirenle khuluwi amuhula arumaariyu. Owo haaweemererye wi haaphwannyemo echu. Voocharela owo nnikhuuru nawe yaahivarerya ikwartu soothene ophitaanyerya ekwartu ya vathi. Nyenya wanaawiili hiyaaphwannyemo echu.

Paul:Naahikhalano othowa wa yoolya mu miyeeri mincipale. Nyenya yoolya ahu yoomunepani waari mukoi wa nivuluxo. Malapelo ahu a wooxiixelo o Peteli yaari “kafe ahu” nave yaari yoolya yoomunepani, hiyaarivo echu ekina.

Hiyaano naanasuwela wi waakhanle wi hinaarinoru yoolya ni maahi, oothene naahaala okhumawo ofiliyali, anna yaawo yiipinthe woonaru yaahaala wiiphiwa. Ikwaha ikina, mukhalelo ni elukuluku ya soovaha sa Yehova yaakhala ntoko echu yootikhiniha! Yehova aahikhapelela soothowa sahu nave aahinikhaviherya ovootha sawuukhula sahu.

Vaavaa elapo yaasareyaaya epiiphi, eparipari yaanaaryaxa. Wiiliwiili annihu yaaphwanela ochawa wi evuluxe okumi aya, nyenya yaahititelela okhala oororomeleya ni oomaaleleya. Akina elonce wi ohoolela waya ekhoco waari “ovyakihiwa waya ntakhara yoohooxa etokotoko.” Atokweene oolipa murima vamoha ni anna yaawo yaari amiravo yaahipaka soothene wi yaakhaviherye anna. Vaavaa anna yaakhummaaya mmukuma aya, anna ni arokora yaatitelela okhala awiiwanana, nave yaapacerya olaleerya mu ekulucu evyaani ni opaka mithukumano mu Ipa sa Omwene saatekiwe ntoko mucheko mutakhwani. Mithukumano saari ntoko parataiso oolipiha mu elukuluku yeele yookacamiha, nave muteko woolaleerya waahaakhaviherya anna ovootha makacamiho yaale. Vaavaa naalapaahu muteko wookhaviherya, naahitannyeya murima owoona anna evekaka mirupa wi ehelekemo soolaleeryiwa ntakhara muteko woolaleerya ohiya oveka soowara! Achu ancipale yaawo yaahoolenle makacamiho mancipale mu ekhoco, yaahiwerya wiiwa michaka saphaama. Awo yaari ootikhiniheya owoona Anamoona a Yehova eri oohakalala ni oosivela; awo yaanaarya veeri va epiiphi yeele!  (Mat. 5:14-16) Mvai wa anna waaheeriha wi anakhoco akina ooweryaxa ehuserye eparipari ni okhala annihu.

Paul: Vakina vaya, naanaphwanela okhuma mu elapo yeele ikwaha raru mu elukuluku vakhaani, nave ilukuluku ikina ikwaha piili mu eyaakha emoha. Murokora mmoha misiyonaariya aahithariha phaama mwa mukwasu mukhalelo niisoonaahu: “O Kiliyati, hiyaano naahihuserya okuha murima ahu mu etesikinasau ahu, nave yaari yeeyo naapankaahu. Mwawiihiiha, waahiya annihu mmikhalelo seiha waaheeriha murima ahu okhala woonyaanyeryeya!” Nyenya naahihakalala wi, naamwi nri mu ilapo sawaacamela naanwerya otitelela waakhaviherya anna o Liberia.

Anne: Mu Maiyu a 1996, naahikhuma achu axexe ni ekaaro esaren’ye ni itukumentu soochuneya sa efiliyali. Yoolakelela ahu waari weeca mukwaha mu akilometuru 16 n’yaaka mmukuma wookhapeleleya mu makupa makina a epooma. Mu elukuluku yeele, mukuma ahu waahihipheliwa. Anakhoco moowali yaahopela musulu nave yaahineemexa enikumiherya vaate hiyo araru nave yaapwahano ekaaro Paul ari mwemmo. Naatepa okhala awoova. Mootutuxa, naahimoona paul arwaaka akhumaka nikhami vayuucini. Woopaceryani, nuupuwela wi aarimoopeliwa nyenya voocharela nahoona wi waakhanle wi tiyeeyo, haahaala owerya weeca! Nakhoco aarimummana vaavaa aamukakhenleiye vathi. Yoohakalaliha ti yawi naari nikhwaca nikhaani.

Vakhiviru vahu yaakhalavo ekaaro ya anakhoco esaren’yemo achu eryeene awoova. Hiyaano niithomen’ye mukhipi mwa ekaaro, nyenya hinaarino vachu voophareelavo. Motorista aaheeciha ekaaro mwawiitukiha ophiyerya hiyaano nnahala vakhaani omora. Naapacerya okhuwela wa yoowo wi eemele nyenya owo aari awoova naari mano ahinachuna weemela. Wookuchulani, naawerya woona voophareelavo nyenya naaphin’ye oovelavela nave misiphe sahu sithukumelaka nthowa na ikuru seiho naapharihenlaahu wi niilipihe.

Paul: Naasareya nchupi, ni soowara sahu sawaahuwa, naanakohana mukina ni mukhwaawe mukhalelo nikophonlaahu. Naakonne waacamela va elikopeteru yoowo aasaren’ye ineneeru sa itiiru, nave aari yoowo naahaalaahu onwela n’yaaka o Serra Leyowa mu nihiku noocharela. Naatepa othamalela woona wi naari akumi, nyenya naari awuukhuwaxa ni annihu.

Anne: Vaavaa naaphin’yaahu Opeteli mu epooma yo Freetown, o Serra Leyowa, naahiisoona okhala ookhapeleleya nave naatepa ookhapeleliwa phaama. Nyenya wiiliwiili, saanakirweela mmuupuweloni ichu soonanara seiyo seeren’ye. Variyari va nihiku, kaakhala awoova ni oohitaphuwa, kihiweryaka wuupuwela mookwakwaleya, yaakhala ntoko wi echu yeeren’ye hiyaari yeeparipari. Ohiyu, kaavinya ooriryiweene ni kithukumelaka, kuupuwelaka wi yookhala echu yoonanara yaahaala weereya. Waari woovila omumula. Paul aanakikhupaarela nave anavekela ni miyaano. Naaniipa macipo ophiyerya miyaano omaala othukumela. Kuupuwela wi kaahaala osavuwa nave wi nkaahaala okhala misiyonaariya.

Nkirwa kicuwala yeeyo yeeren’ye voocharela. Mu esumana ene yeele naahaakhela soolaleeryiwa piili. Emoha aari Vinyani!, a 8 aYunyu a 1996. Aarino muru wawi “Como Lidar Com a Síndrome do Pânico.” Ovinyerya vaavaa, kaahiiwexexa yeeyo yeereya ni miyaano. Yoolaleeryiwa yanaawiili aari Mulipeleli, a 15 a Maiyu a 1996, yoowo aarino muru wawi “Como Obtêm Essa Força?” Mulipeleli ola aahikhalano eruku ya nikuruthu naarino nikhwaca. Mwaha yoola waanathariha wi hiiha ntoko nikuruthu nnaweryaaya otitelela wiilyiha ni ovava, naamwi makuphelo aya erino makhwaca, hiyaano tho nnanwerya otitelela waakhela munepa wa Yehova wi naakhaviherye akina naamwi vaavaa nnakhalaahu awuukhuwa mmuupuweloni. Miyaha seiya saahikivaha ikuru nave saari yoolya yoorweela wa Yehova mu elukuluku yoophwanelela. (Mat. 24:45) Echu yaakikhavihenrye waari otholathola miyaha seiha inaloca sa mwaha ene yoowo ni okhalano soolaleeryiwa seiya mmurupani mwaka. Moovira wa elukuluku, wuukhuwa waka wa mmuupuweloni waahivukuwa.

Paul: Vaavaa mikhalelo seemerenryaaya wi nikookele owaani o Liberia, naahitepa ohakalala. Wookuchulani wa eyaakha ya 2004, hiyaano neera nihalaka vakhaani waakhwaniha iyaakha 20 mmurici ahu. Ekhoco yaahimala. Yaahikhalavo marehereryo wi etekiwe efiliyali evyaani. Nyenya mu elukuluku vakhaani, naahiwompwa ntakhara etesikinasau evyaani.

Ela yaari yoovila wa hiyaano. Naari awaacameleyaxa ni emusi ahu yoomunepani—vano ti mwawiihai  naahaalaahu ohoolela mukhalelo yoola? Voocharela naahuupuwela wi vaavaa naakelaahu o Kiliyati, naaphwanela ohiya imusi sahu ni waakhela mareeliho mancipale a Yehova. Mu etesikinasau ahu evyaani naaya mu elapo yawaacamela, o Gana.

Anne: Naahinla vancipale vaavaa naakhummaahuwo o Liberia. Naahitikhiniheya vaavaa Frank munna awuuluvala ni amiruku, aalonceiye wi: “Nyuwaano munaphwanela onicuwala!” Voocharela owo aathariha: “Eparipari wi nyuwaano hamurwa municuwala, nyenya munaphwanela oveleela murima mmurici anyu muvyaani. Owo ti wa Yehova, mwawiihiiha mutikitheryeye wa anna ni arokora a weiwo.” Yeeyo munna aalonceiye yaahinikhaviherya okhala ooreheryeya wi naapake asinthamwene avyaani mu elapo yeeyo naasuweliwaahuwo ni achu avakhaani nave tho weiwo soothene saaryaaya ivyaani wa hiyaano.

Paul: Nyenya hiwaavinrevo elukuluku yincipale, anna o Gana yaahikhala emusi ahu evyaani. Yaakhalawo Anamoona a Yehova ancipale! Naahihuserya ichu sincipale ni anna yaala awiichwelavo ni oolipa omunepani. Nimanle orumeela iyaakha 13 mu elapo yo Gana, naahaakhela nwopelo mukina. Naahiwompwa wi narumeele o Peteli yo Keniya o Afrika. Naamwi naarino munkhela muncipale ni anna mmurici ahu wakhalai, mwawaakuveya naahiisoona okhala awaacameleya wa anna yaala oororomeleya o Keniya. Nave nlelo ninniisoona okhala oophariheleya mu orumeela mu ekulucu etokweene, yeeyo erino othowa otokweene.

Anne: Mu iyaakha sincipale, koohoolela mikhalelo mincipale soovila, nave ikwaha ikina kaanakhala awoova. Mikhalelo soonyeenyeiha ni sa mmuupuweloni inanwerya onivolowela omwiilini ni mmuupuweloni. Hannakhapeleliwa mootikhiniha wa ichu seiha. Wakhala wi kohiiwa itiiru, kinnoona wiicela wa murima nave mata aka annathukumela. Nyenya koohuserya oweherya nikhaviheryo noothene nenlo Yehova onavaheiye wi anilipihe, ophitaanyerya nikhaviheryo na annihu. Nave kaahoona orweela mu yaweereya aka, wi wakhala wi nootitelela okhalano yookhovelela yoomunepani, Yehova onanwerya onikhaviherya okhala mmurici ahu.

Paul: Akina ananwerya okoha: “Apwanne munnasiveliwa ni murici anyu?” Elapo enanwerya okhala yaphaama, nyenya tho enanwerya okhala nipuro noohiphwanelela ni nawoopiha. Mwawiihiiha, tiheeni nnatepaahu osiveliwano opwaha elapo? Annihu oochuneya, emusi ahu. Moohipwacha masuwelelo ni sookhovelela soohiyana, hiyaano nnuupuwela mmukhalelo mmohamoha. Nuupuwela wi naarumihiwe wi naalipihe anna, nyenya mweeparipari yeeyo yeeren’ye yaari yoohiyana.

Ilukuluku soothene vaavaa onakhalaayawo otoroka wa murici ahu, ninnoona yootikhiniha: onnahu wa elapo yoothene. Vaavaa nnapakaahu makupa a muloko niinnakhalano emusi nnipuro nenlo nahaalaahu wiisoona okhala owaani. Ninnaroromela wi wakhala wi nootitelela omuroromela Yehova owo onahaala onivaha ikuru soothene seiyo nnachunaahu.—Afi. 4:13.