1. Nthowa na yoocheka, alapeli akina a Muluku anoona hai?

MURUMMWA PAULO aarepa “miyo kòtakhaliwa.” (Aroma 7:24) Olelo alapeli ancipale oororomeleya a Muluku annakhala ooceecheya ni awuukhuwa hiiha ntoko yeeren’yaaya ni Paulo. Ntakhara heeni? Nthowa nawi naamwi nichunaka omuhakalaliha Yehova, oothene ahu noorava yoocheka nave naachu oohiphaameya. Mwawiihiiha nnakhala ooceecheya vaavaa nnahesaahu omuhakalaliha. Akristu yaawo yaapanke yoocheka etokotoko yoona wi Yehova haki aalevelele.

2. (1) Salumu 34:23 onooniherya hai wi arummwa a Muluku hanaphwanela wiisoona okhalano nthowa? (2) Tiheeni nnahaalaahu ohuserya mmwaha yoola? (Moone ekaaxa “ Soohuserya Naari Soosiphela sa Ineneeryo?”)

² Soorempwa sinnaniroromeliha wi wakhala wi ninnachawela wa Yehova, hannaphwanela wiisoona okhalano nthowa. (Mwaalakhanye Salumu 34:23.) Nyenya enataphulela eheeni ochawela wa Yehova? Tiheeni nnaphwanelaahu weera wakhala wi ninnachuna wi Yehova animorele ikharari ni onikhurumuwela? Nnanwerya ophwanya maakhulo a makoho yaala moorweela wa ohuserya vooloca sa marehereryo a ipooma sa nchawelo mu ilukuluku sa Aisarayeli akhalai. Marehereryo awo  yaaphwanyeya mu Nlamulo na nlakano, nenlo naaraceelihiwe mu Pentekoste a eyaakha ya 33. Nyenya nlamulo naarwiile wa Yehova. Mwawiihiiha, orweela wa marehereryo a ipooma sa nchawelo, ninnahuserya mukhalelo Yehova onooneiye yoocheka, alipa oocheka, ni yaale anacharuwa. Voopacerya, hankooni nsuwele ntakhara heeni Aisarayeli yaakhalano ipooma sa nchawelo ni ophariheliwa waya muteko.

3. Tiheeni Aisarayeli yaamweerelaaya yoole omwiiphale muchu?

³ Yehova aanatepa othanana vaavaa aamooneiye muchu iiphiwaka. Wakhala wi Muisarayeli oomwiipha muchu, mmusi a muchu ole iiphiwe, yoowo iichaniwa “mulipa omwinlela ikuhu,” aaphwanela omwiipha tho namaahita ole. (Namarepela 35:19) Mmukhalelo yoowo mulipa awiipha aaphwanela oliva ekumi ya muchu oohicheka omwiiphaleiye mwaayiini. Wakhala wi mulipa awiipha hiiphiwe mwawaakuveya, Elapo ya Nlakano yaahaala okhala yooriipiheya, naari wi yoothanyeya. Yehova aahilamulela: “Muhiravihe mwìkho elapo muneranyu mmake.”—Namarepela 35:33, 34.

4. Tiheeni yeereya Muisarayeli amwiipha muchu moohilakelela?

⁴ Nyenya tiheeni yeereya vaavaa Muisarayeli aamwiipheiye muchu moohilakelela? Naamwi wiipha iwo waari woohilakelela, mulipa awiipha nlelo aanakhalano mulacu wa omwiipha muchu oohicheka. (Maphatxuwelo 9:5) Mmukhalelo yoowo, Yehova aahiloca wi ikharari saanaphwanela wooniheryiwa. Mulipa awiipha moohilekela aaphwanela omuchawa mulipa a winla ikuhu nave achawele mu emoha ya ipooma thanu nammoha sa nchawelo. Vaavaa eemereryiweiye okhala mu epooma yeeyo, owo aanakhala ookhapeleleya. Nyenya owo aaphwanela otitelele okhala weiwe ophiyerya mutokweene a anamukucho akhwile.​—Namarepela 35:15, 28.

5. Ntakhara heeni marehereryo a ipooma sa nchawelo annanikhaviherya omwiiwexexa Yehova mookwakwaleya?

⁵ Marehereryo a ipooma sa nchawelo hiyaari a muchu vyakala. Yaarweela wa Yehova. Owo aahimulamulela Yosuwa: “Walèle ana a Isarayele. Muthanle ipoma sotxhawelamo.” Ipooma iho saavahiwe mwawiiwanana ni mahimo. (Yosuwa 20:1, 2, 7, 8) Yehova aahilakelela  wi ipooma iho sinaphwanela ovalaanyiwa. Mwawiihiiha, moorweela wa marehereryo yaala nnanwerya ohuserya sincipale vooloca sa Yehova. Ntoko yootakiherya, ennanikhaviherya wiiwexexa phaama vooloca sa ikharari sa Yehova. Nave ennanihusiha vooloca sa mukhalelo nneeraahu nchawele wa Yehova olelo.

6, 7. (1) Mutharihe muteko wa asitokweene wa omuthoriha muchu iipha moohilakelela. (Moone eruku yoopacerya.) (2) Ntakhara heeni yaaryaaya ya miruku mulipa awiipha oloca ni asitokweene?

⁶ Vaavaa muchu aamwiipheiye muchu moohilakelela owo aaphwanela ‘othariha vamithoni va asitokwene a epoma mulatxu awe’ nave asitokweene awo yaaphwanela omwaakhela. (Yosuwa 20:4) Ikwaha ikina, awo yaaphwanela omukookiherya muchu yoowo weiwo iiphaleiyewo wi athorihiwe ni asitokweene a epooma. (Mwaalakhanye Namarepela 35:24, 25.) Wakhala wi asitokweene aahoona wi nookhwa owo eeren’ye moohilakelela, voocharela yaaphwanela omukookiherya mulipa awiipha o epooma ya nchawelo.

⁷ Ntakhara heeni mulipa awiipha aanaphwanela oloca ni asitokweene? Asitokweene yaaphwanela weeriha wi muloko wa Aisarayeli otitelele okhala waweela nave yaaphwanela omukhaviherya muchu iiphale ahilakelen- le ophura ikharari sa Yehova. Namahuserya mmoha a Piipiliya aahirepa wi wakhala wi muchu iiphale moohilakelela hakele wa asitokweene, owo aaphwanela wiiphiwa. Owo ahaaceererya wi aahaala okhwa nthowa nawi haacharinhe yeeyo Muluku aalamulenleiye. Mulipa awiipha moohilakelela aaphwanela oveka nikhaviheryo nave eemererye nenlo wi akhale mukumi. Wakhala wi owo hachawenle mu emoha ya ipooma sa nchawelo, mmusi a muchu ole iiphiwe aakhala ootaphuwa omwiiphatho.

8, 9. Ntakhara heeni Mukristu yoowo apanke yoocheka etokotoko onnaphwanela oloca ni atokweene?

⁸ Olelo, wi arehererye onthamwene waphaama ni Yehova, Mukristu yoowo opanke yoocheka etokotoko onaphwanela oya wa asitokweene wi emukhaviherye. Ntakhara heeni eryaaya yookhweleya? Yoopacerya, ti Yehova aareherenrye atokweene wi ethoriheke milacu sa soocheka itokotoko. (Tiyako 5:14-16) Yanaawiili, atokweene akhanlevo wi yaakhaviheryeke yaale anacharuwa soocheka saya wi yeemereryiwe ni Muluku ni osepa wuuluula soocheka saya. (Galasya 6:1; Ahebri 12:11, Nlakano Nahihano) Yaneeraru, atokweene yeemereryiwe nave avyakihiwe wi yaahakararye yaale anacharuwa soocheka saya ni waakhaviherya omaliha wiicela ni wuukhuwa waya. Yehova onawiichana atokweene ntoko “ntxhawelo elukuluku enopaya etxheku.” (Isaiya 32:1, 2) Marehereryo yaala mukhalelo mmoha yoowo Yehova onooniheryeiye ikharari sawe ntakhara hiyaano.

⁹ Alapeli ancipale a Muluku ahoona woopowa moorweela wa oloca ni atokweene ni waakhela nikhaviheryo naya. Ntoko yootakiherya, munna oniichaniwa Taniyeli aahipaka yoocheka etokotoko, nyenya mu miyeeri min- cipale owo haakele wa atokweene. Owo ooloca: “Evinre elukuluku yincipale, kuupuwela wi hiyaavoru naari echu emoha mano atokweene yaahaalaaya opaka ntakhara miyaano.” Nlelo, owo aanakhala awoova wi muchu aahaala osuwela yoocheka awe, nave aahoona wi aaphwanela opacerya opaka nivekelo wi amveke Yehova nlevelelo. Vookuchula, owo aahaaveka atokweene nikhaviheryo. Uupuwelaka muculi, owo ooloca: “Mweeparipari, kaanoova owaacamela atokweene. Nyenya kimanle  olokoha, yaakhala ntoko wi kaariha mwiri mutokotoko yoowo waakiwonyonle makhata.” Taniyeli anwerya wanawiili oloca ni Yehova mootaphuwa. Vano ookhalano yawuupuxerya-ya-murima yaweela, nave hiihaanoru onarumeela ntoko murummwa oorumeela.

10. Wi aleveleliwe, tiheeni mulipa awiipha moohilakelela aaphwaneleiye weera?

¹⁰ Wi aleveleliwe, mulipa awiipha moohilakelela aaphwanela ochawela mu emoha ya ipooma sa nchawelo ya waacamela. (Mwaalakhanye Yosuwa 20:4.) Okumi awe waahaala woopowa wakhala wi otitelela okhala weiwe ophiyerya mutokweene a anamukucho akhwile. Namacheka aaphwanela wiilipiserya. Owo aanahiya ophara miteko sawe, empaawe yaphaama, ni otaphuwa wawe wa opaka mikwaha. * (Moone masu avathi.) (Namarepela 35:25) Nyenya eyo yaari yoophwanelela. Wakhala wi mulipa oochawa ookhuma mu epooma ya nchawelo ehaakumve elukuluku awe, owo aahaala wooniherya wi echu opankeiye tahi mwaha mutokweene, nave aahaala ohela vawoopiha okumi awe.

11. Mukristu ocharunwe oni ooniherye hai wi onnathamalela mahala a Yehova?

¹¹ Olelotho mulipa oocharuwa onaphwanela opaka ichu ikina wi aleveleliwe ti Muluku. Owo onaphwanela ohiya saweera sawe soonanara. Eyo enaphitaanyerya osepa ichu seiho sinahaala omweeriha opaka soocheka itokotoko. Murummwa Paulo aahithariha yeeyo Akristu oocharuwa o Korinto yeenraaya. Owo oorepa: “Mone saphama winiwa wanyu murima mwa Muluku wooruhenlayani: wakuveya wanyu, wakiha wanyu mulatxu, onanariwa wanyu ni itxhu sonanara, omova wanyu Muluku, munkhela anyu ni miyo, othokorerya wanyu, nave onvaha wanyu ekoi ole enre sonanara.” (2 Korinto 7:10, 11) Mwawiihiiha wakhala ninnapaka soothene nnaweryaahu wi nihiye yoocheka, nnahaala omooniherya Yehova wi ninnathanana vatokovene ntakhara yoocheka ahu nave wi hannuupuwela wi nnahaala waakhela mahala awe siiyo ene.

12. Tiheeni Mukristu onaphwaneleiye ohiya wi atitelele waakhela ikharari sa Yehova?

¹² Tiheeni Mukristu onaphwaneleiye ohiya wi atitelele waakhela mahala a Yehova? Owo onaphwanela okhala ooreheryeya ohiya ichu inamusivela wakhala wi sinahaala omweeriha opaka yoocheka. (Mateu 18:8, 9) Ntoko yootakiherya, wakhala wi asinthamwene anyu annookhinyereryaani weera ichu seiho sinamunyemula Yehova, apwanne munahaala ohiya weecano? Wakhala wi mohoona wi munnatepa owuryaxa eviinyu, apwanne munahaala osepa mikhalelo inahaala oweerihaani owuryaxa? Wakhala wi mohoona wi ti yoovila wa nyuwaano wiihiiha ntakhara minkhela sa ocapaheya, apwanne munahaala osepa woona epwitikiri, isite, naari saweera seiho sinahaala oweerihaani wuupuwela soocapaheya? Muupuwele, wiilipixerya vyakala nnapakaahu wi niiwelele malamulo a Yehova ti woophwanelela. Hiyaavo echu yoothananihaxa opwaha osuwela wi Yehova oonihiya. Navetho hiyaavo echu yaphaamaxa opwaha woona ‘okhwela wohimala’ wa Yehova.​—Isaiya 54:7, 8.

13. Mutharihe ntakhara heeni mulipa oochawa aanakhala ookhapeleleya, awaakiheya, ni oohakalala mu epooma ya nchawelo.

¹³ Vaavaa mulipa awiipha aachaweleiye o ipooma sa nchawelo, owo aanakhala ookhapeleleya.  Yehova aahiloca sa ipooma seiho: “Ipoma iho ti sotxhawelamo” wa nyuwo. (Yosuwa 20:2, 3) Yehova haachuna wi mulipa oochawa athorihiwe wanawiili ntakhara mulacu mmohamoha. Navetho, mulipa oomunlela ikuhu heemereryiwa ovolowa mu epooma ele ya nchawelo wi amwiiphe namacheka. Vaavaa mulipa oochawa aayeiye o epooma ya nchawelo, owo aakhala ookhapeleleya ni naakiho na Yehova. Tahi wi owo aakhala mukalaposo. Owo aanawerya olapa muteko, waakhaviherya akina, ni omulapela Yehova mmureceleni. Aai, owo anwerya ohakalala ni okhalano okumi waphaama!

14. Mukristu yoole ocharunwe, tiheeni onaphwaneleiye ororomela?

¹⁴ Alapeli akina a Muluku yaawo yaapanke soocheka itokotoko nlelo anniisoona okhala awuukhuwa naamwi echarunwe. Akinatho annuupuwela wi Yehova hani aalevelele moomalela wa yeeyo apankaaya. Wakhala wi nyuwaano munnoona mmukhalelo yoola, khwoo muroromele wi vaavaa Yehova oolevelenleiyeeni, eenreno eyo moomalela. Hamunaphwanela wiisoona okhalano nthowa vyakala. Ela ti yeeyo yeeren’ye ni Taniyeli, yoole nimuloncaahu woopaceryani. Atokweene emanle omookolola ni omukhaviherya wi akhaleno yawuupuxerya-ya-murima yaphaama wanawiili, owo aahikhalano woopowa otokweene. Owo ooloca: “Nkaarinotho oothanana naari mano. Vaavaa yoocheka enamweecaaya, eyo henakooka. Hiiha ntoko Yehova olonceiye, onnakakhela ociiwene wa hiyo soocheka sahu. Nave muchu hanawerya woona iho wanaawiili.” Mulipa oochawa amanle ovolowa mu epooma ya nchawelo,  owo haakhala awoova wi mulipa awuunla ikuhu aahaala orwa wi amunyoke. Moolikana, Yehova alevelela yoocheka ahu, hannaphwanela okhala awoova wi onahaala onikookiherya naari onthoriha ntakhara yeeyo naapankaahu.​—Mwaalakhanye Salumu 103:8-12.

15, 16. Osuwela wi Yesu ooliva yawoopola nave wi owo Mutokweene a Anamukucho, enalipiha hai ororomela wanyu ikharari sa Muluku?

¹⁵ Mweeparipari, nookhalano mathowa mancipale wi nroromele ikharari sa Yehova waapwaha Aisarayeli. Murummwa Paulo amanle oloca wi aaniisoona okhala muchu ‘otakhaliwa’ nthowa na ohimwiiwelela Yehova moophaameya, owo aahiloca: “Muluku athamaliwe mwa Yesu kristu pwiya ahu.” (Aroma 7:25) Tiheeni owo aachuneiye oloca? Naamwi Paulo aawaninhe minkhela sawe soocheka, nave aachenke khalai, owo aahicharuwa. Mwawiihiiha owo aahiroromela wi Yehova aahimulevelela moomalela moorweela wa woopola wa mukucho wa Yesu. Woona wi Yesu ooliva yawoopola, nnanwerya okhalano yawuupuxerya-ya-murima yaphaama ni murecele wa mpuwa. (Ahebri 9:13, 14) Ntoko namukucho ahu mutokotoko, Yesu “onnawerya wavulusa atxhu othene anamwatxamela Muluku mwa yowo, wona wi onakhala wavekelela yawo mahiku othene.” (Ahebri 7:24, 25) Mu ilukuluku sa khalai, mutokweene a anamukucho aanaakhaviherya Aisarayeli ororomela wi Yehova oolevelela soocheka saya. Ni Yesu ntoko Namukucho ahu Mutokotoko, nlelo nookhalano mathowa awaaca a ororomela wi ‘nnanvahiwa ikharari ni wi niphwanye mahala a nikhaviheryo wa elukuluku yophwanelela.’​—Ahebri 4:15, 16.

¹⁶ Wi nchawele mwa Yehova, nnaphwanela okhalano nroromelo mwa mukucho wa Yesu. Hamunaphwanela wuupuwela wi yawoopola enaphariheleya pahiru wa achu oothene. Muroromele wi nyuwaano moophura orweela wa yawoopola. (Galasya 2:20, 21) Muroromele wi nthowa na woopola, Yehova oolevelela soocheka sanyu. Navetho, muroromele wi woopola yohoovahaani ewehereryo ya okumi woohimala. Chiryene mukucho wa Yesu yoovaha ya Yehova ntakhara nyuwo!

17. Ntakhara heeni munnachuna ochawela mwa Yehova?

¹⁷ Ipooma sa nchawelo sinnanikhaviherya wiiwexexa ikharari sa Yehova. Marehereryo yaala a Muluku annanihusiha wi okumi ti wasisapo. Ennooniheryatho mukhalelo atokweene eneeraaya enikhaviherye, yootaphulela ya ocharuwa weeparipari, nave ntakhara heeni nnaphwanelaahu okhala oororomela moomalela wi Yehova oonilevelela. Apwanne munnachawela mwa Yehova? Hinaavovo nipuro nikina na omakavo! (Salumu 91:1, 2) Mmwaha onacharela, nnahaala woona mukhalelo ipooma sa nchawelo ineeraaya inikhaviherye omutakiherya Yehova, yoowo ori yootakiherya etokotoko ya wookololowa ni ikharari.