1. Wiipa onanikhaviherya opaka eheeni?

NAMAREPA mmoha a macipo ooloca: “Masu annaneeriha wuupuwela. Ncipo ninnanikhaviherya weera echu. Vaavaa nniiwananihaahu ichu seiya piili, ninnakhalano muusika onaneeriha wuupuwela.” Macipo ahu annooniherya ncicimiho ni osivela ntakhara Atiithi ahu a wirimu, Yehova. Macipo yaawo annaneeriha woona ntoko wi nri vakhiviru va Yehova. Eyo ti yookhweya wiiwexexa ntakhara heeni wiipa wookhalano makupa ookhweleya mmalapelo eeparipari, moohipwacha waakhanle wi nniipa mukhatiihu naari vamoha ni anna ni arokora.

2, 3. (1) Akina anoona hai vooloca sa wiipa moovuwa ni muloko? (2) Makoho taani nnahaalaahu othokororya mmwaha yoola?

² Munoona hai vooloca sa wiipa moovuwa vamoha ni muloko? Apwanne ti yawuuliha muru wa nyuwaano? Mu ilapo ikina, alopwana ananwerya wuuliwa muru wiipa vachu waaciwevo. Moonelo yoola onanwerya ovolowela muloko woothene mmukhalelo woonanara, xaxaxa wakhala wi atokweene annoovelela wiipa naari annakhala ooweiwa ni ichu ikina elukuluku ya macipo.​—Salumu 30:13.

 ³ Wiipa makupa a omulapela wahu Yehova. Mwawiihiiha, hinnachuna weeceeca vaavaa anna aniipaaya naari oyeleela makupa yaala a mithukumano. Mwawiihiiha, nnaphwanela wiikoha mukhatiihu: ‘Miyaano kinoona hai vooloca sa wiipa mmithukumano? Tiheeni kinaphwanelaaka weera waakhanle wi kinnoovelela wiipa variyari va achu? Nave kini kiipe hai macipo ni murima woothene?’

4, 5. Taavi yaari marehereryo awiipa mu empa ya Muluku wa Aisarayeli khalai?

⁴ Ovinyerya khalai, alapeli a Yehova yaanapharihela macipo ooruma wi emucicimiheno. Echu yookhweleyaxa, vaavaa Aisarayeli yaaryaaya oororomeleya wa Yehova, wiipa yaari makupa ookhweleya mmalapelo aya. Ntoko yootakiherya, vaavaa Tavite aapankeiye marehereryo a empa ya Muluku, owo aahaathan- la Alevi 4.000 wi emuhakalaliheke Yehova ni macipo ooruma. Wa yaala, yaathanliwa 288 “othene yasuwelano phama wipa wi yipeke ovuwa w’Apwiya.”​—1 Matharihelo 23:5; 25:7.

⁵ Ncipo nooruma ni wiipa saari makupa ookhweleya mu olepula empa ya Muluku. Piipiliya onnanleela: “Alipa awòpa mapetxa vamoha ni alipa awipa yahavuwiha Apwiya. Hiha, elukuluku yarumaya mapetxa, apankwe ni ikoma, awo yanàvuwiha Apwiya . . . ovuwa w’Apwiya wàsareya mpa mwaya.” Nkaanyiheryani mukhalelo yaaweereya ela yaalipinhaaya nroromelo na Aisarayeli!​—2 Matharihelo 5:13, 14; 7:6.

6. Marehereryo taani a macipo ooruma ni wiipa Nehemiya aapankeiye vaavaa owo aareiye mulamuleli o Yerusalemu?

⁶ Nehemiya, yoowo aarehenrye Aisarayeli wi eteke isiri so Yerusalemu, owotho aahaathanla Alevi wi yiipeke nave erumiheke macipo. Muteko aya wa wiipa waaheriha olepula isiri okhala woohakalaliha vancipale. Nehemiya aahithanla “makhùru meli a alipa awipa.” Alipa awiipa yaaneeca vasulu va isiri sa epooma mmakupa oohiyana nave yaanakumana va exiri yaacamenle muceche waarivo empa ya Muluku. Onyakula waya waanatepa ovuwaxa oophiyerya wi achu yaari ocai yaaniiwa. (Nehemiya 12:27, 28, 31, 38, 40, 43) Ninnaroromela wi Yehova aahihakalala owiiwa alapeli awe emwiipelaka macipo yaawo yaamucicimiha.

7. Yesu oonihenrye hai wi wiipa waaphwanela okhala makupa ookhweleya a malapelo a Akristu?

⁷ Mu elukuluku ya Yesu macipo ooruma yaatitelela okhala makupa ookhweleya a malapelo eeparipari. Nkuupuwelani vooloca sa yeeyo yeeren’ye mu ohiyu wookhweleya mu mwaha wa achu. Yesu amanle opaka Mukonelo wa Apwiya ni amuhuseryaawe, awo yaahiipa macipo oomucicimihano Yehova.​—Mwaalakhanye Mateu 26:30.

8. Akristu oopacerya atikithenrye hai yootakiherya ya omucicimiha Muluku ni macipo?

⁸ Akristu oopacerya aatikitherya yootakiherya yaphaama ya omucicimiha Muluku ni macipo. Moohiyana ni Aisarayeli yaawo yaaya mu empa ya Muluku wi yamulapele Yehova, Akristu awo yaathukumana mu ipa vyakala. Naamwi ipa iho sahaari sooreera ni soophwaneliwa ntoko empa ya Muluku, anna yaanatitelela wiipa moolocuwa. Mwawiihiiha murummwa Paulo aahaaleela annawe Eekristu ariki: “Muhusihanaka ni mulipihanaka ni miruku sothene, mmwipelaka mmurimani mwanyu Muluku vomuthamala ni masalmo, mathamalelo ni matxipo ammunepani.” (Kolosi 3:16) Mweeparipari, macipo  yaawo ari mu liivuru ahu a macipo anaphwanela wiipiwa ni “mathamalelo.” Awo makupa a “yolya mwa elukuluku yophwanelela” yeeyo “mulapeli òroromeleya ni awisuwela” onanivaheiye.​—Mateu 24:45.

9. (1) Ntakhara heeni akina annoovelela wiipa ni murima woothene mmulokoni ni mmithukumano sa ekulucu? (2) Nni nimwiipele hai Yehova ncicimiho nave taani anaphwanela ohooleela wiipa? (Moone eruku yoopacerya.)

⁹ Taavi ari mathowa makina yaawo anahaala oweerihaani woovelela wiipa? Akhweya wiipa tahi wawunlaana mu emusi naari mu yookhovelela anyu. Akhweya mookhovelela waawiriyana achu arino mavyakelo a wiipa mu raatiyu naari mu televisau, nave mwaawiiwananihaka wiipa waya ni wannyu, munnuuliwa muru naari ohaleeliheya. Nyenya oothene ahu nookhalano murici wa omwiipela ncicimiho Yehova. Mwawiihiiha mmucukhulele osulu liivuru anyu a macipo, mweemese muru anyu phaama, nave mwiipe moohakalala! (Esdra 3:11; mwaalakhanye Salumu 147:1.) Mmahiku ahu Ipa sa Omwene sincipale sookhalano ikhankoonya seiho sinooniha masu a macipo ahu, nave ela enamunikhaviherya wiipa moovuwa. Ti yookhweleya osuwela wi wiipa macipo a Omwene makupa a Exikola ya Orummwa wa Omwene ya atokweene. Ela ennaceenyerya okhweleya waya atokweene ohooleela wiipa mmithukumano sa muloko.

10. Tiheeni nnaphwanelaahu wuupuwelela waakhanle wi ninnoova wiipa mmasu oovuwa?

¹⁰ Ancipale annoova wiipa ni masu oovuwa nthowa nawi anuupuwela wi annatepa onyakula yaawiipaka naari wi haanono nsu naphaama. Mwawiihiiha, muupuwele ela. “Ntakhara tinnakwachuliwahu othene hi va itchu sinchipale.” (Tiyako 3:2, Nlakano Nahihano) Ntakhara heeni hannaphwanela weemererya  wi nsu nahu noohiphaameya nnihiihe omwiipela Yehova macipo anamucicimiha?

11, 12. Nni nrehererye hai wiipa wahu?

¹¹ Akhweya ninnoova wiipa nthowa nawi hannasuwela mukhalelo wa wiipa. Naamwi hiiha sookhalavo ichu ikina sookhweya nnaphwanelaahu opaka wi nrehererye mukhalelo ahu wa wiipa. *​—Moone masu a vathi.

¹² Nyuwaano munanwerya wiipa mwakuru ni nsu noovuwa orweela mwa ohuserya mukhalelo wa wiicha miwiya moophwanelela. Hiiha ntoko enerxiya enavahaaya ikuru makeesi, nwiya anyu onnalipiha nsu nanyu vaavaa munalocaanyu naari muniipaanyu. Munaphwanela wiipa moovuwa hiiha ntoko munalocaanyu. * (Moone masu avathi.) Mweeparipari, Piipiliya ikwaha ikina onnaaleela alapeli a Yehova ‘okhuwela mohakalala’ vaavaa aniipaaya macipo omvuwiha.​—Salumu 33:1-3, NN.

13. Mutharihe mukhalelo nneeraahu niipe ni nroromelo.

¹³ Variyari va malapelo anyu a echoko naari yoohuserya ya muchu mukhateiye, mweererye ochariha sooleeliherya iha: Muthanle ncipo nimoha nnoosivelaani mu liivuru ahu a macipo. Mwaalakhanye masu ni nsu nawiiweya. Voocharela, muhivukunle nsu, muloce masu muhiichuuwenle. Voocharela, mwiipe esentensa emoha ni nsu nakuru. (Isaiya 24:14) Nsu nanyu na wiipa nnahaala okhala nakuruxa, nave ela echu yaphaama. Muheemererye wi eyo ewoopopiheeni naari ewuuliheeni muru.

14. (1) Mmukhalelo taani waathama wawaakhwanela onakhaviheryaaya wiipa wahu? (Mooone ekaaxa “ Muni nwerye hai wiipa phaama?”) (2) Sooleeliherya taani vooloca sa ovootha makacamiho a wiipa munoonaanyu wi sinnakhaviherya?

¹⁴ Mmukhalelo mukina, wi mukhaleno nsu nakuru vaavaa muniipaanyu, munaphwanela waathama mwawaakhwanela. Mwawiihiiha vaavaa muniipaanyu, mwaathame opwaha vaavaa munaathamaanyu mwaalocaka. Nyenya tiheeni munaphwanelaanyu weera wakhala wi munnoona wi nsu nanyu hinnavuwa naari wi ti noovuwaxa? Munahaala ophwanya sooleeliherya sookhaviherya mu ekaaxa “Como superar problemas específicos” yeeyo enaphwanyeya mu Beneficie-se da Escola do Ministério Teocrático va epaaxina 184.

15. (1) Yoolokoha taani yaapakiwe va muthukumano wa eyaakha ya 2016? (2) Mathowa taani yeerinhe wi liivuru a macipo atorokiwe?

¹⁵ Muchu ti muchu aaphwanyen’ye va muthukumano wa eyaakha ya 2016 aahitepa ohakalala vaavaa munna Stephen Lett a Nikhuuru Noolamulela aalokonheiye sa liivuru a macipo muvyaani orino muru “Mmwiipele Yehova Moohakalala.” Ntoko munna Lett aatharinheiye, nthowa nimoha nnamuchunelaahu liivuru a macipo muvyaani waari wuuluuleliwa otaphuleliwa wa Piipiliya Tradução do Novo Mundo. Masu makina yaaphwanyeya mu Tradução do Novo Mundo akhalai aavihiwamo. Navetho ahaaceereryiwa macipo mavyaani vooloca sa muteko woolaleerya ni woopola. Mwawaaceererya, nthowa nawi wiipa makupa ookhweleya a malapelo ahu, Nikhuuru Noolamulela naachuna ompaka liivuru a macipo a mukhalelo wa vasulu. Mwawiihiiha ekaapa awe emohamoha ni ya Piipiliya Tradução do Novo Mundo.

16, 17. Matorokelo taani apakiwe mu liivuru muvyaani a macipo?

¹⁶ Wi liivuru a macipo akhale ookhweya ompharihela, macipo ene arehereryiwe mmukhalelo wawiiwanana. Ntoko yootakiherya, macipo 12 oopacerya anamuloca Yehova, macipo 8 anacharela analoca sa Yesu ni woopola, ni miyaha mikina. Yookhalavo elista ya miru sa macipo omapacereryo wa liivuru a macipo. Ela enamutepa okhaviherya, xaxaxa  vaavaa munna onachuneiye othanla ncipo na mwaha wa vanlakani.

¹⁷ Wi emukhaviherye muchu ti muchu wiipa ovinyerya vathi va murima, masu makina aatorokiwa wi muchaka wa ncipo okhale wookwakwaleya. Ntoko yootakiherya Masu awi “retidão” ni “dar graças” hanaphariheliwa wiiliwiili olelo. Ti nthowa nene ahiphariheliwaaya mu liivuru a macipo muvyaani. Yootakiherya ekina ti ncipo “Longanimidade”, nenlo ntorokiwe nikhala “Seja paciente”. Eyo enniiwanana ni masu anaphwanyeya mu Tradução do Novo Mundo awuuluuleliwa. Ncipo nikina ntorokiwe muru ene ni eleetera ti nawi “Ore a Deus sem cessar”, nenlo hiihaano nri ni muru “Sempre a Deus vou orar”. Ntakhara heeni eyaaka opakiwa matorokelo yaala? Nthowa nawi khalai, vaavaa muchu iipeiye ncipo nenla, yaakhala wi aaleela akina echu yaweera. Nyenya mmithukumano sahu, nookhalano ancipale yaawo ahirino murici wa ovaha ikano ntoko amiravo, arokora, oohuserya a Piipiliya ni akina. Vaavaa niipaahu ncipo nenla akhweya akina yaanakhala awuukhuleya. Mwawiihiiha muru ni masu a ncipo nenla sootorokiwa.

18. Ntakhara heeni ninnaphwanela ohuserya macipo mu liivuru ahu muvyaani? (Moone masu avathi.)

¹⁸ Macipo mancipale anarweela mu “Mmwiipele Yehova Moohakalala” analikana ni mavekelo. Macipo yaala ananwerya wookhaviheryaani omuleela Yehova moonelo anyu. Macipo makina anahaala onikhaviherya “mokhwelani ni mwa miteko saphama.” (Ahebri 10:24) Nnachuna osuwela ncipo nooruma, eriitimu, ni masu a macipo ahu. Mukhalelo mmoha onahaala onikhaviherya weerano yeela ori owiriyana macipo ookaravaariwa anna ni arokora aniipaaya. Macipo ookaravaariwa yaala annaphwanyeya mu jw.org. Wakhala wi munniikhoveleliha wiipa macipo owaani, munanwerya ohuserya wiipa ni nroromelo ni murima woothene. *—Moone masu avathi.

19. Oothene mmulokoni eni emulapele hai Yehova?

¹⁹ Muupuwele wi wiipa makupa okhweleya a malapelo ahu. Ola mukhalelo wookhweleya wa omooniherya Yehova wi ninnamusivela navetho wi ninnathamalela soothene opankeiye ntakhara hiyo. (Mwaalakhanye Isaiya 12:5.) Vaavaa muniipaanyu moohakalala, munnaaceenyerya tho akina weera emohamoha. Oothene mmulokoni, moohipwacha yaari maponkwe, awunnuwelavo, naari yaale ari avyaani mu eparipari, ananwerya omuhakalaliha Yehova mmukhalelo yoola. Mwawiihiiha muhemererye wi echu vyakala yoohiiheeni wiipa ovinyerya vathi va murima. Mwiiwelele malakiheryo a mulipa a salumo yoowo aalonce: “N’wipele Apwiya [Yehova]” Aai mwiipe mmasu oohakalala!​—Salumu 96:1.