1, 2. Murici taani mutokweene Yosuwa aareiyeno Mose amanle okhwa?

YEHOVA aahimuleela Yosuwa: “Mose, mulapeli aka, òkhwa. Vinya, olapuwe muhitxe Yordano, weyano ni nloko nothene, nave ovolowe mwa elapo kineraka kàvahe ana a Isarayele.” (Yosuwa 1:1, 2) Ala yaari matorokelo wa Yosuwa, yoowo aari mulapeli a Mose mu iyaakha waacamela makhumi masese!

² Mose aahaahoolela Aisarayeli mu elukuluku yincipale, nyenya vano Yosuwa taahaala waahoolela. Mwawiihiiha owo akhweya aaniikoha waakhanle wi achu yaahaala omweemererya yene ntoko muhooleli aya. (Malamulo 34:8, 10-12) Atharihaka vooloca sa Yosuwa 1:1, 2, liivuru mmoha yoowo onamuthariha Piipiliya olonce wi echu yoovilaxa ni yawoopiha wa nloko, moohipwacha waakhanle mahiku akhalai naari olelo, enakhala elukuluku yeeyo muhooleli onaraceeliweiye ni mukina.

3, 4. Muluku aamureelinhe hai Yosuwa wa nthowa na ororomela mwa yoowo, nave nikoho taani nnahaalaahu wiikoha?

 ³ Yosuwa aahikhalano nthowa naphaama na okhala awuukhuwa. Nyenya owo aahimuroromela Yehova nave aanachariha mwawaakuveya ohoolela wawe. (Yosuwa 1:9-11) Muluku aahimureeliha Yosuwa nthowa na omuroromela wawe nave aahimpharihela munkeelo mmoha wi amuhoolele Yosuwa ni Aisarayeli. Munkeelo yoola aari oolikanaxa ni Nsu, Mwaana oopacerya oyariwa a Muluku.—Mukwaha 23:20-23; Yohani 1:1.

⁴ Yehova aahikhaviherya nloko na Aisarayeli wiirehererya phaama ntakhara matorokelo yaahaala orwa ni Yosuwa ntoko muhooleli aya muvyaani. Mmahiku ahu, aakhalavotho matorokelo mancipale yaawo aneereya. Akhweya nnamwiikoha, ‘Vaavaa marehereryo a Muluku anayaaya vahoolo, Apwanne nookhalano mathowa aphaama a omuroromela Muhooleli ahu oothanliwa, Yesu?’ (Mwaalakhanye Mateu 23:10.) Wi naakhule nikoho nenla, nnahaala othokororya mukhalelo Yehova aahoolenleiye achu khalai variyari va ilukuluku sa matorokelo.

5. Yaweereya taani yootikhiniha Yosuwa aareiyeno waacamela o Yeriko? (Moone eruku yoopacerya.)

⁵ Vahilekenle Aisarayeli emanle olapuwa muhice Yortano, Yosuwa aahikhalano yaweereya yootikhiniha. Waacamela epooma yo Yeriko, owo aahikumana ni mulopwana yoowo aarino nsipaaca. Yosuwa aahimukoha mulopwana: “Weyano wa àhu, nari wa àmwitxana ahu?” Yosuwa aatuthuwa vaavaa mulopwana owo aalonceiye ariki “ka mutokwene a akhotxo a Apwiya [Yehova],” munkeelo yoowo aari ooreheryeya owaakiha achu a Muluku. (Mwaalakhanye Yosuwa 5:13-15.) Naamwi mmapuro makina miyaha sooniheryaka wi Yehova taaloca mooluluwanya ni Yosuwa, enooneya wi Muluku aahimpharihela munkeelo wi aloce ni Yosuwa hiiha ntoko eerenleiye muculi.—Mukwaha 3:2-4; Yosuwa 4:1, 15; 5:2, 9; Saweriwa T’arummwa 7:38; Galasya 3:19.

6-8. (1) Ntakhara heeni sooleeliherya ikina sa munkeelo saakhalaaya ntoko soohiphwanelela? (2) Nnasuwela hai wi sooleeliherya iho saari samiruku nave wi saaphin’ye mu elukuluku yoophwanelela? (Moone masu a vathi.)

⁶ Munkeelo aahimuleela Yosuwa soothene aaphwaneleiye opaka wi avoothe epooma yo Yeriko. Voopacerya, sooleeliherya ikina sooneya okhala ntoko soohiphwanelela. Ntoko yootakiherya, munkeelo aahimuleela Yosuwa wi aathikile akhoco awe oothene. Eyo yaataphulela wi awo hiyaahaala owerya owaniha mu mahiku vakhaani. Apwanne chiryene eyo yaari elukuluku yoophwanelela ya waathikila alopwana awo?—Maphatxuwelo 34:24, 25; Yosuwa 5:2, 8.

⁷ Akhweya akhoco awo yaanikoha ‘Nnahaala okhapelela hai imusi sahu wakhala wi amwiicani aavolowa vanipuroni vahu?’ Nyenya voocharela echu yoohiwehereryeya yaaheereya! Ohiya waahiphela Aisarayeli, alopwana o Yeriko yaahikhala awoova ntakhara yaawo. Ninnaalakhanya wi: “Milako sa epoma [yo] Yerikò sàwaliwa ni olipihiwa wa nthowa na owova ana a Isarayele, havo àwerya ovolowa nari okhumamo mpoma.” (Yosuwa 6:1) Mwaha yoola waahiweeriha Aisarayeli ororomela ohooleela wa Muluku moopwasa!

⁸ Munkeelo aahimuleela Yosuwa wi Aisarayeli hiyaahaala ohiphela epooma yo Yeriko. Ohiya yeeyo, yaaphwanela orukurerya epooma ekwaha emoha vanihikuni ophiyerya mahiku mathanu nanimoha nave voocharela ikwaha thanu napiili mu nihiku naneethanu napiili. Akhoco akhweya yaanuupuwela,  ‘Tiheeni nnamaliheryaahu elukuluku ni ikuru sahu!’ Nyenya muhooleli a Aisarayeli oohooneya aanasuwela phaama yeeyo owo aapakeiye! Pahiru ochariha ohoolela wawe, waahilipiha nroromelo na Aisarayeli, nave hiyaawanne naari vakhaani ni akhoco o Yeriko.—Yosuwa 6:2-5; Ahebri 11:30. * (Moone masu avathi.)

9. Ntakhara heeni ninnaphwanela ochariha sooleeliherya vyakala nnaakhelaahu orweela mu marehereryo a Muluku? Mvahe yootakiherya.

⁹ Tiheeni nnahuseryaahu orweela wa yaweereya yeela? Marehereryo a Yehova ilukuluku ikina annapaka ichu mmukhalelo muvyaani, nave ikwaha ikina hannawerya wiiwexexa mathowa ene. Ntoko yootakiherya, wa akina a hiyo, ompharihela taplete naari telefone mu yoohuserya ya muchu mukhateiye, mmuteko woolaleerya naari mmithukumano hiwaari mukhalelo woophwanelela. Nyenya hiihaano akhweya ninnoona mphurelo wa weerano yeeyo wakhala wooweryeya. Vaavaa nnoonaahu sookhumelela saphaama sa matorokelo ntoko yaala, nroromelo nahu ninnakhala noolipa nave ninnakhala awiiwanana ni anna ni arokora ahu.

10. Taani aareherenrye muthukumano woochuneya wa nikhuuru noolamulela o Yerusalemu vooloca sa othikiliwa?

¹⁰ Mu iyaakha khumi nararu Muyuta mmoha oohithikiliwa nsina nawe Korneliyu amanle okhala Mukristu, Akristu akina yaawo yaari Ayuta nlelo yaanaloca wi othikiliwa waari woochuneya. (Saweriwa T’arummwa 15:1, 2) Mu epooma yo Antiyokeya, anna yaanaakhulana vooloca sa yeela. Mwawiihiiha atokweene  yaahimuthanla Paulo wi aye o Yerusalemu wi aakohe anna a nikhuuru noolamulela vooloca sa yeeyo. Nyenya taani aamurumme Paulo oyawo? Paulo aahithariha: “Kàkelelewo wa ikuru sa yawupululiwa.” Mwa wooneya, aari Kristu yoowo aahoolenle miyaha wi nikoho naakhuliwe nnikhuuru noolamulela.—Galasya 2:1-3.

11. (1) Nikacamiho taani vooloca sa othikiliwa nlelo naarivo variyari va Akristu yaari Ayuta (2) Paulo oonihenrye hai mwawiiyeviha wi aanaakhaviherya atokweene o Yerusalemu? (Moone tho masu avathi.)

¹¹ Kristu aahihoolela nikhuuru noolamulela weeriha eyo okhala yookwakwaleya wi Akristu yaawo yaahaari Ayuta hiyaaphwanela othikiliwa. (Saweriwa T’arummwa 15:19, 20) Nlelo, iyaakha ohoolo waya, Akristu yaawo yaari Ayuta yaahititelela waathikila anaaya. Voocharela atokweene o Yerusalemu yaahiiwa elociwaka wi Paulo haacicimiha Nlamulo na Mose. Mwawiihiiha atokweene awo yaahimveka Paulo opaka echu vyakala yeeyo yaahaala wooniherya ocicimiha wawe Nlamulo. * (Moone masu avathi.) (Saweriwa T’arummwa 21:20-26) Awo yaahimuleela Paulo waakeriha alopwana asese mu empa ya Muluku wi achu yoone wi Paulo aanacicimiha nlamulo. Paulo aanwerya oloca: ‘Eyo hiyaanono muteko! Ntakhara heeni munakivekaanyu opaka yeela? Akristu yaawo ari Ayuta ahiniiwexexa mwaha wa othikiliwa ti yaawo arino nikacamiho.’ Nyenya Paulo aahiiwexexa wi atokweene awo yaachuna wi Akristu oothene ekhale awiiwanana, mwawiihiiha mwawiiyeviha aahichariha sooleeliherya saya. Akhweya nnamwiikoha ntakhara heeni Yesu aaheemererya othikiliwa otitelela okhala nikacamiho mu elukuluku yawaaca, naamwi Nlamulo na Mose naamanle vaavaa Yesu aakhwileiye.—Kolosi 2:13, 14.

12. Ntakhara heeni Kristu aaheemererya oviravo elukuluku yincipale ahaakumve omaliha moomalela mwaha wa othikiliwa?

¹² Ennachuneya elukuluku yawaaca wi muchu apake matorokelo ntakhara wiiwexexa ovyaani. Ayuta akina yaawo yaari Akristu yaanachuna elukuluku yincipale wi yeemererye eparipari yawi awo hiyaari vathi va Nlamulo na Mose. (Yohani 16:12) Awo yaapharihela muupuwelo wawi othikiliwa yaari eneneeryo ya onthamwene wavameekhaaya ni Muluku. (Maphatxuwelo 17:9-12) Akina yoova wi yaahaala wiikariwa mmuceche aya wa Ayuta nthowa na okhala oohiyana. (Galasya 6:12) Nyenya mu elukuluku, Kristu aahaavaha ohoolela wawaaca orweela mu ikaarata sa Paulo.—Aroma 2:28, 29; Galasya 3:23-25.

13. Tiheeni eni enikhaviherye ochariha mukhalelo Kristu onanihooleleiye olelo?

¹³ Nlelo Kristu tori muhooleli a muloko Weekristu mmahiku ahu. Mwawiihiiha wakhala wi marehereryo aapaka matorokelo yaawo muhiniiwexexaanyu, muupuwele mukhalelo Kristu aahoolenleiye achu a Muluku khalai. Moohipwacha mmahiku a Yosuwa naari mu elukuluku ya arummwa, ilukuluku soothene Kristu onnavaha ohoolela wa miruku wi aakhapelele achu a Muluku, olipiha nroromelo naya, ni waakhaviherya yaawo okhala awiiwanana.—Ahebri 13:8.

14-16. Ohoolela wa “mulapeli òroromeleya ni awisuwela” onooniherya hai wi Kristu onachuna onikhaviherya otitelela okhalano nroromelo noolipa?

 ¹⁴ Olelo, “mulapeli òroromeleya ni awisuwela,” onnanivaha ohooleela nnachunaahu xaxaxa mu elukuluku nnachunaahu ohoolela owo. (Mateu 24:45) Ohoolela yoola onnooniherya wi Yesu onnanipwacha. Marko, yoowo orino anamwane asese, ooloca: “Satana onneererya oceecheiha muloko moorweela mwa ohiphela imusi. Vano ni nceenyeryo na opaka malapelo eechoko esumana ti esumana, muchaka ori wookwakwaleya wa miru sa imusi—mukhapelele emusi anyu!”

¹⁵ Vaavaa nnoonaahu mukhalelo Kristu onanihooleleiye, nnahaala wiiwexexa wi owo onachuna onikhaviherya otitelela okhalano nroromelo noolipa. Ntoko yootakiherya, mutokweene mmoha oniichaniwa Patrick ooloca: “Wuupaceryani, akina yaanoona okhala yooceecheiha othukumana mmakhuuru makhaani ntakhara muteko woolaleerya omakuchuwelo wa esumana.” Nyenya owo olonce wi matorokelo yaala annooniherya mukhalelo Yesu onampwacheiye muchu ti muchu mmulokoni. Ntoko yootakiherya, anna ni arokora akina yaawo ari awuuliwa muru naari yaale ahinaya mmuteko woolaleerya wiiliwiili vano anniisoona okhala ookhweleya. Ela ennaalipiha nroromelo naya.

¹⁶ Kristu onnanikhaviherya tho otikitheryeya mmuteko ahu woolaleerya, yoowo ori muteko woochuneyaxa onapakiwa veelaponi olelo. (Mwaalakhanye Marko 13:10.) Antere, yoowo ori mutokweene muvyaani, onneererya ochariha ohoolela ovyaani vyakala onarweela mmareheryo a Yehova. Owo ooloca: “Ovukuliwa wa achu mu ifiliyale onnanuupuxerya waakuveya wa elukuluku ni ochuneya waya otikitherya ikuru sahu mmuteko woolaleerya.”

17, 18. Ntakhara heeni ninnaphwanela opharihela mikhalelo sinaniphwanyiha mphurelo orweela wa wiikhoveleliha matorokelo?

¹⁷ Ohoolela yoowo nnaakhelaahu orweela wa Yesu Kristu, Mwene ahu yoowo onalamulela,  onahaala onikhaviherya hiihaano ni omwaahiyu. Mweererye wuupuwelela mikhalelo seiyo siweerinheeni ophwanya mphurelo nthowa na wiikhoveleliha matorokelo ahiihaano. Variyari va malapelo anyu eechoko, munaphwanela othokororya mukhalelo matorokelo mmithukumano naari mmuteko woolaleerya akhavihenryaaya emusi anyu.

¹⁸ Wakhala wi ninnuupuwela wi ochariha sooleeliherya inarweela mmarehereryo a Yehova onnanihoolela mu sookhumelela sincipale saphaama, onamukhala wookhweya ochariha ohoolela owo nave nnamukhala oohakalala. Ntoko yootakiherya, woona wi hannimprimiiri soolaleeryiwa ntoko neeraahu khalai, ninnakhapelela ikhorowa. Nave woona wi ninnapharihela ikhankoonya sa mutano, ninnawerya waaphwanyiha achu ancipale michaka yaphaama. Apwanne nanwerya opharihela soolaleeryiwa mu ekhankoonya ahu ni mikhalelo mikina? Ola ori mukhalelo mmoha nneeraahu nimukhaviherye Kristu, yoowo onachuna wi nipharihele muhakhu sa marehereryo mwa miruku.

19. Ntakhara heeni ninnaphwanela okhaviherya ohoolela wa Kristu?

¹⁹ Vaavaa nnakhaviheryaahu ohoolela wa Kristu, ninnakhaviherya anna ni arokora ahu okhalano nroromelo noolipa ni okhala awiiwanana. Antere ooloca sa matorokelo ahiihaanoru ntakhara emusi yo Peteli: “Munepa waphaama onooniheryiwa ni yaawo yaari Mapetelita aneererya wiikhoveleliha matorokelo ntoko yaala, ennakeeriha okhalano nroromelo ni ncicimiho. Awo annakhapelela murecele ni ekaaro ya Yehova moorweela mwa okhala oohakalala mmuteko vyakala anavahiwaaya.”

20, 21. (1) Ntakhara heeni ninnaphwanela ororomela mwa kristu, Muhooleli ahu? (2) Nikoho taani nnahaalaahu waakhula mmwaha onacharela?

²⁰ Voohilekela muhooleli ahu, Yesu Kristu, onahaala “òvotha” nave ‘ikuru sawe inamwàwerya amwitxana awe.’ (Wupulula 6:2; Salumu 45:4) Nyenya naamwi opacerya hiihaano owo onnanirehererya ntakhara ekumi yoohimala mu elapo evyaani ni muteko yoowo nnahaalaahu olapa mummo, vaavaa nneeraahu naahusihe alipa ooviihiwa mookhwani ni waakhaviherya weeriha elapo okhala parataiso.