1, 2. (1) Tuuvi waari muteko wookhweleyaxa mu okumi wa Yesu, nave ntakhara heeni? (2) Tiheeni nnaphwanelaahu opaka wi nikhumelele phaama ntoko “amulapeli ni Muluku”?

YESU KRISTU aari kalapinteero nave ohoolo waya aahikhala muhusiha. (Marko 6:3; Aroma 15:8) Owo aahipaka miteko soomiili mwawaakhwanela. Ntoko kalapinteero, owo aahihuserya mukhalelo wa opharihela ikaruma sawe wi apake echu yoophwaneliwa orweela wa ithaapwa. Nave ntoko muhusiha, owo aahipharihela osuwela wawe Soorempwa wi aakhaviherye achu wiiwexexa eparipari yoorweela Mmasu a Muluku. (Mateu 7:28; Luka 24:32, 45) Vaavaa Yesu aareiyeno iyaakha makhumi mararu, aahiya okalapinteero nave akhala muhusiha nthowa nawi aahisuwela wi owo waari muteko woochuneyaxa aaphwaneleiye opaka. Owo aahiloca wi olaleerya michaka saphaama sa Omwene wa Muluku naari nthowa nenlo Muluku aamurummeiye veelaponi yavathi. (Mateu 20:28; Luka 3:23; 4:43) Yesu aatikithenrye ekumi awe mu olaleerya michaka saphaama, nave aanachuna wi akina epake emohamoha.—Mateu 9:35-38.

² Ancipale a hiyo hanri makalapinteero, nyenya oothene ahu na alaleeryi yaawo anaahusiha akina michaka saphaama. Muteko yoola ti wookhweleyaxa ophiyerya omvolowela Muluku. Mweeparipari, nniichaniwa “amulapeli ni Muluku” (1 Korinto 3:9;  2 Korinto 6:4) Ninneemererya masu a namarepa a Salumu yoowo aalonce: “Masu anyu t’eparipari.” (Salumu 119:159, 160) Masu a Yehova teeparipari. Ti nthowa nene nnaphwanelaahu ororomela wi nri “óluluwelano phama masu éparipari” mmuteko ahu woolaleerya. (Mwaalakhanye 2 Timóteo 2:15, NN.) Mwawiihiiha ninnatitelela okhala achu amavyakelo mu ompharihela Piipiliya, ikaruma sahu sincipale wi naahusihe akina vooloca sa Yehova, Yesu, ni Omwene. Wi nikhaviheryeye okhumelela phaama mmuteko woolaleerya, marehereryo a Yehova annanivaha ikaruma soophara muteko, nave nnaphwanela osuwela mukhalelo wa opharihela seiyo. Ikaruma seiya sinnaphwanyeya mu Ikaruma sa Ohusihano.

3. Nnaphwanela otikitheryeya mwa eheeni mmuteko ahu woolaleerya, nave Saweriwa T’arummwa 13:48 onanikhaviherya hai weerano yeela?

³ Akhweya munamwiikoha ntakhara heeni nniichanaahu Ikaruma sa Ohusihano, nave ohiya Ikaruma sa Olaleeryano. Ti nthowa nawi ‘olalerya’ onataphulela olokoha muchaka, nto ‘ohusiha’ onataphulela othariha muchaka ophiyerya muchu wiiwexexa yeeyo oniiweiye nave voocharela emweerihe weeravo echu orweela wa yeeyo ohusenryeiye. Variyari va elukuluku ya mukhalelo yoola wa ichu, nnaphwanela otikitheryeya mu opaceryiha soohuserya sa Piipiliya ni waahusiha achu eparipari wi ekhale amuhuserya a Kristu. Ela enataphulela wi nnaphwanela owaavya mwamvai ‘atxhu othene athanleliwe ekumi yohimala’ ni waakhaviherya yaawo opacerya omurumeela Yehova.—Mwaalakhanye Saweriwa T’arummwa 13:44-48.

4. Nni naaphwanye hai ‘atxhu othene athanleliwe ekumi yohimala’?

⁴ Nni naaphwanye hai ‘atxhu othene athanleliwe ekumi yohimala’? Wa Akristu oopacerya, mukhalelo mmoha wa waaphwanya achu yaawo waari olaleerya. Yesu aahaaleela amuhuserya awe: “Mpomani nari mmutxetxheni muneranyu nvolowemo, mukoheke ariwo mutxhu onaphwanela.” (Mateu 10:11) Nnaphwanela weerano emohamoha tho olelo. Mweeparipari, wakhala wi achu hanachuna owiriyana, tawiirumiha, naari hanapwacha chiryene vooloca sa Muluku, hinnaweherya wi awo ananwiriyana masu a Muluku. Nnawaavya achu arino nchuno, awiiyeviha, nave yaale anachuna osuwela eparipari chiryene. Nnanwerya olikanyiha owaavya wahu achu ni yeeyo Yesu aapankeiye elukuluku aareiye kalapinteero. Ahaakumve opaka echu vyakala ya ethaapwa ntoko nsele, meesa, ni ichu ikina, voopacerya owo aaphwanela ophwanya ekhukulu yoophwanelela. Voocharela owo anwerya okusa ikaruma sawe, opharihela mavyakelo awe, nave opaka echu vyakala. Moolikana olelo, voopacerya nnaphwanela waaphwanya achu yaawo arino nchuno, nave voocharela nnanwerya opharihela ikaruma sahu ni mavyakelo ahu wi naakhaviherye okhala amuhuserya a Kristu.—Mateu 28:19, 20.

5. Tiheeni nnaphwanelaahu osuwela vooloca sa Ikaruma sa Ohusihano? (Moone eruku yoopacerya.)

⁵ Ekaruma ti ekaruma yookhalano yoolakelela ya vameekhaaya. Ntoko yootakiherya, nkuupuwelani vooloca sa ikaruma Yesu aapharihenleiye ntoko kalapinteero. * (Moone masu avathi.) Owo aanachuna ikaruma wi aphimeno, acekeno, othikila, othorola, osema ethaapwa, ni okumaniha ithaapwa. Moolikana, ekaruma ti ekaruma eri mu Ikaruma sa Ohusihano yookhalano yoolakelelaaya. Vano hankooni nsuwele mukhalelo wa opharihela ikaruma seiya soochuneya.

6, 7. (1) Nyuwaano munaapharihela hai Akartau onaphwanyeyavo jw.org? (2) Ntakhara heeni nnapharihelaahu nwopelo wa mithukumano?

⁶ Akartau onaphwanyeyavo jw.org. Akartau ala akhaani nyenya aakhalano ovolowela otokotoko ophiyerya waakhaviherya achu onisuwela ni waakeriha mu site ahu jw.org. Mu site ahu, achu annahuserya sincipale vooloca sa hiyo nave ophiyerya oveka yoohuserya ya Piipiliya. Achu opwaha macikhwi masana masese aaveka yoohuserya ya Piipiliya eri ocai wene orweela mu jw.org, nave masana a achu anneerano yeeyo nihiku ti nihiku! Munanwerya waakuxa akartau awo nave waapharihela mu nihiku noothene vaavaa munalocaanyu ni achu yaawo munakumanaanyuno.

⁷ Nwopelo. Nwopelo wa mithukumano sahu oni: “Nyuwaano munnawompwa wi mmuhuserye Piipiliya ni Anamoona a Yehova.” Voocharela owo onnaloca wi munanwerya weerano eyo “va mithukumano sahu sa vanlakani” “naari ni muhusiha anyu.” Mwawiihiiha nwopelo onnaakhaviherya onisuwela nave onnaawopa yaale “anasuwela soothowa saya soomunepani” omuhuserya Piipiliya ni hiyo. (Mateu 5:3, TNM) Mweeparipari, achu annaakheliwa vaavaa anarwaaya omithukumano sahu moohipwacha waakhanle wi aaheemererya yoohuserya ya Piipiliya naari hooye. Vaavaa awo anaphiyaaya mmithukumano sahu, ananwerya woona ophiyerya mweeryo taani aneeraaya ehuserye vooloca sa Piipiliya.

8. Ntakhara heeni eryaaya yookhweleya achu ophiya mmithukumano sahu mu ekwaha aya yoopacerya? Mvahe yootakiherya.

⁸ Ti woochuneya otitelela waawopa achu wi ephiye va mithukumano sahu mu ekwaha yoopacerya. Ntakhara heeni? Nthowa nawi vaavaa awo anarwaaya, anahaala woona wi Anamoona a Yehova annahusiha eparipari orweela Mpiipiliyani nave annaakhaviherya achu omusuwela Muluku, eniiha ahooleli a malapelo oowoka eheerakano yeeyo. (Isaiya 65:13) Ntoko yootakiherya, mutheli mmoha o Estatu Unitu aniichaniwa Ray ni Linta yaahoona ohiyana wuuwu mu iyaakha sa muculi. Awo yaanamuroromela Muluku nave yaanachuna omusuwela phaama. Mwawiihiiha awo yaahilakelela oxekurya ikerexa soothene mmuceche aya ni waavya ichu piili ehaakumve ovolowa mmalapelo vyakala. Yoopacerya, awo yaaphwanela ohuserya echu emoha mu ekerexa, nave yanawiili, achu a mukerexa yaaphwanela owara ntoko achu anamurumeela Muluku. Yaahimaliha iyaakha sincipale woona wi ikerexa saahaaca. Nyenya awo yaahitepa wuukhuwa. Awo hiyaahusenrye echu, nave achu a ekerexa yaawara moohicicimiha. Emanle oxekurya ekerexa yookuchula wa seiyo yaarepenlaaya, Linta aahiya omutekoni nave Ray aahiya owaani. Akookelaka owannyawe, owo aahiphwanya Empa ya Omwene. Owo aahuupuwela, ‘Kinamvolowa wi koone echu eneereya mwemmo.’ Mweeparipari, ela yaweereya yaphaama wa oothene. Muchu ti muchu mu Empa ya Omwene aari ooreera murima ni oonthamwene nave aahiwara moophwanelela. Ray aahikiraathi va mpaco wa ohoolo nave aahisiveliwano yeeyo aahusenryeiye! Ela ennanuupuserya masu a murummwa Paulo ntakhara muchu yoowo onarwa mmithukumano mu ekwaha yoopacerya nave aahiloca: “Muluku ori epariparyene veri vanyu.” (1 Korinto 14:23-25) Ovinyerya vaava Ray aanaphiya mmithukumano Mirunku soothene. Voocharela aanaphiya mmithukumano sa veeri va esumana. Linta aahipaceryatho ophiya mmithukumano, nave naamwi awo yaarino iyaakha opwaha  makhumi mathanu napiili, awo yaahimuhuserya Piipiliya nave epatisiwa.

9, 10. (1) Ntakhara heeni ti wookhweya opharihela ifolyeto? (2) Mutharihe mukhalelo wa opharihela efolyeto Omwene wa Muluku Tiheeni?

⁹ Ifolyeto. Ifolyeto thanu nararu nryaahuno sinnapaka makupa a ikaruma sahu. Iho ti sookhweya opharihela, nave sinnaphariheleya phaama ntakhara opaceryiha ochekula. Woona wi ifolyeto soopacerya sa seiya saavonyiwe mu 2013, ipilyawu thanu sa seiyo sohimprimiiriwa! Ifolyeto soothene seiya sipakiwe mmukhalelo woolikana. Mwawiihiiha wakhala wi moosuwela opharihela emoha wa seiya munanwerya opharihela soothene! Muni mpharihele hai efolyeto wi mpaceryihe ochekula ni muchu?

¹⁰ Akhweya munachuna opharihela efolyeto Omwene wa Muluku Tiheeni? Mmoonihe muchu nikoho nenlo nri ohoolo wa efolyeto nave mmukohe: “Apwanne mohintoko wiikoha wi Omwene wa Muluku Tiheeni? Munahaala wi . . . ?” Voocharela mmukohe wa maakhulo mararu tinivi aahaaleiye othanla. Opwaha oloca waakhanle wi naakhulo nawe ti neeparipari naari nooheseya, pahiru muhule efolyeto eyo makupa ani “Piipiliya oni” nave mwaalakhanye soorepa sinooniheryiwa vaavo, Daniyeli 2:44 ni Isaiya 9:6. Omakuchuwelo wa ochekula wanyu, mumpakele nikoho nri oculi wa efolyeto vathi va muru “Wi muupuwele” “Okumi onahaala okhala hai vathi va olamulelo wa Omwene wa Muluku?” Nyuwo munanwerya waakhula nikoho nenla mu oxekurya wanyu. Elukuluku munakumanaanyu wanawiili, munanwerya opharihela mwaha 7 wa eproxura Michaka Yaphaama Yoorweela wa Muluku! yeeyo eri emoha ya ikaruma sahu sa opaceryiha soohuserya sa Piipiliya.

11. Irevista sahu sinapakiwa ni yoolakelela taani, nave tiheeni nnaphwanelaahu osuwela vooloca sa seiyo?

¹¹ Irevista. Mulipeleli ni Vinyani! siri ikaruma seiyo sinakumihiwa nave inataphuleliwa vancipale orukurerya elapo! Woona wi achu mu ilapo sincipale annaalakhanya irevista seiya, muru yoowo onakhala va ekaapa onathanliwa wi okhale wookhweleya wa achu oothene. Nnaphwanela opharihela irevista seiya wi naakhaviherye achu otikitheryeya mwa yeeyo eri yoochuneyaxa mu okumi. Nyenya voopacerya, nnaphwanela osuwela erevista ela orepeliwe muchu a mukhalelo taani.

12. (1) Erevista Vinyani! opakeliwe taani, nave tiivi eri yoolakelela ene? (2) Saweereya taani saphaama sahiihaanoru muryaanyuno orweela wa ekaruma yeela?

¹² Vinyani! Onapakeliwa achu yaale anasuwela vakhaani naari ahinasuwelaru echu vooloca sa Piipiliya. Awo hanasuwela echu vooloca sa mahusiheryo a Kristu, akhweya hanaroromelaxa malapelo, naari akhweya hanasuwela wi Piipiliya onanwerya waakhaviherya mu okumi aya. Yoolakelela etokweene ya Vinyani! eri omweeriha mulipa awaalakhanya ororomela wi Muluku ookhala. (Aroma 1:20; Ahebri 11:6) Elatho enneererya omukhaviherya mulipa awaalakhanya wi Piipiliya nri “nsu na eparipari na Muluku.” (1 Tesalónika 2:13) Irevista raru sa eyaakha ya 2018 sookhalano miru iha: “O Caminho Para a Felicidade” “Ichu 12 Sinahakalaliha Ichoko” ni “Nikhaviheryo wa Yaale Akhweliwe.”

13. (1) Mulipeleli a vanlakani onarepeliwa taani? (2) Saweereya taani saphaama sahiihaanoru muryaanyuno orweela wa ekaruma yeela?

¹³ Yoolakelela etokweene ya Mulipeleli a vanlakani ori othariha mahusiheryo a Mpiipiliya wa achu yaawo arino masuwelelo a vakhaani vooloca sa Muluku ni Piipiliya. Awo  akhweya aasuwela ichu ikina vooloca sa Piipiliya, nyenya awo haniiwexexa phaama yeeyo Piipiliya onahusiheiye. (Aroma 10:2; 1 Timóteo 2:3, 4) Irevista raru sa eyaakha ya 2018 sinnaakhula makoho ala: “Será que a Bíblia ainda é útil?” “Tiheeni eni yeereye omwaahiyu?” ni “Apwanne Muluku Onnoopwachaani?”

14. (1) Ixilema sese seiyo inapaka makupa a Ikaruma sa Ohusihano sipakiwe ni yoolakelela taani? (2) Saweereya taani saphaama muryaanyuno orweela wa wooniha ixilema seiya?

¹⁴ Ixilema. Mmahiku a Yesu, kalapinteero pahiru aakhalano ikaruma sa mmatani. Nyenya olelo, makalapinteero tho annakhalano ikaruma seiyo inalapela enerxiya ntoko seroti, kepekepe, eliixa, iwalelo sa iparafusu ni ikina. Mmahiku ahu vaavaa nnalaleeryaahu, mu waaceererya soolaleeryiwa sa wimprimiriwa, nookhalano ixilema sooreera wi niwoonihe achu. Ixilema sese sa seiyo sinnapaka makupa a ikaruma sahu: Ntakhara Heeni Omuhuserya Piipiliya?!, Tiheeni Eneereya mu Yoohuserya ya Piipiliya?!, Tiheeni Eneereya mu Empa ya Omwene?! ni Anamoona a Yehova—Taani?! Ixilema sookhuveya inanwerya orumihiwa waacamela aminutu apiili nave sinnaphariheleya phaama mu ekwaha yoopacerya. Ixilema soorekama sinanwerya ophariheliwa mu oxekurya naari ni yaale arino elukuluku yawaaca. Ixilema seiya ikaruma sooreeraxa, woona wi inanwerya waaceenyerya achu omuhuserya Piipiliya ni ophiya mmithukumano sahu.

15. Yookhumelela taani enakhalavo vaavaa nnawoonihaahu achu ixilema mu elocelo aya? Mvahe sootakiherya.

¹⁵ Ntoko yootakiherya emoha, murokora mmoha aahikumana ni muthiyana mmoha yoowo athamme o Mikronesiya nave elocelo awe yoopacerya yaari Eyapese. Murokora aahimooniha muthiyana ole exilema Ntakhara Heeni Omuhuserya Piipiliya? mu elocelo ya Eyapese. Vaavaa exilema yaapacenryaaya, muthiyana aahiloca: “Ela elocelo aka. Enakhala ntoko wi kinamuloha! Kinoona wi mukhalelo onaloceiye ta makupa oowaani. Owo onaloca elocelo aka!” Voocharela, owo aahiloca wi aahaala waalakhanya ni woona soothene mu elocelo awe mu jw.org. (Mulikanyihe ni Saweriwa T’arummwa 2:8, 11.) Yootakiherya ekina ti ya murokora mmoha o Estatu Unitu yoowo musulwa awe onakhala mu elapo ekina. Owo aahimurumihela Link a exilema emohamoha mu elocelo awe. Owo aahoona exilema nave aahimurepela murokora ole michaka: “Xaxaxa makupa ani mutakhali oowerya tonalamulela elapo aakitannya murima. Miyaano kooveka yoohuserya ya Piipiliya mu site.” Ela yoohakalaliha ya vameekhaaya woona wi owo onakhala mu elapo yeeyo muteko ahu onakhwatiihiwaayawo!

16. Mutharihe yoolakelela ya eproxura ti eproxura: (1) Mmuwiriyane Muluku nave Mukhale Okhala Wookhala. (2) Michaka Yaphaama Yoorweela wa Muluku! (3) Taani Aneera Yookhwela Ya Yehova Olelo?

¹⁶ Iproxura. Nni nimuhusihe hai eparipari muchu yoowo ohinawerya waalakhanya phaama naari yoowo ohirino yoolaleeryiwa ya Piipiliya mu elocelo awe? Nnanwerya opharihela eproxura Mmuwiriyane Muluku nave Mukhale Okhala Wookhala. * (Moone masu avathi.) Ekaruma ekina yoopaceryihano soohuserya sa Piipiliya ti eproxura Michaka Yaphaama Yoorweela wa Muluku! Nyuwo munanwerya omooniha miru khumi nasese iri  va ekaapa yooculi ya eproxura nave mmukohe muru taani osiveliweiyeno. Voocharela mpacerye ohuserya muru yoowo othanlileiye. Mohintoko weererya yeela mu oxekurya wanyu? Eproxura yaneeraru ya ikaruma sahu sa soolaleeryiwa ti Taani Aneera Yookhwela Ya Yehova Olelo? Ela ereheryiwe wi ehusihiwe oohuserya a Piipiliya vooloca sa marehereryo ahu. Wi muhuserye mukhalelo wa opharihela eproxura mu yoohuserya ya Piipiliya eri yoothene, moone Okumi Ahu Weekiristu ni Orummwa—Yoochariha ya Mithukumano ya Marsu a 2017.

17. (1) Tiivi eri yoolakelela ya liivuru ti liivuru oomuhuserya? (2) Oothene yaale apatisiwe tiheeni anaphwanelaaya opaka, nave ntakhara heeni?

¹⁷ Aliivuru. Mmanle opacerya ohuserya ni muchu mpharihelaka eproxura, elukuluku vyakala munanwerya olucelela ni liivuru Tiheeni Piipiliya Onanihusiheiye? Ekaruma ela enamwaakhaviherya achu ancipale ohuserya mathipelo mancipale a mahusiheryo a Piipiliya. Wakhala wi oohuserya onnaya vahoolo nave ommaliha liivuru yoola, nyuwo munaphwanela otitelela omuhuserya liivuru Mwikhapelele mu Osivela wa Muluku. Ekaruma ela enammukhaviherya oohuserya mukhalelo wa opharihela malakiheryo a Piipiliya mu okumi awe. Muupuwele, naamwi amanle opatisiwa, owo nlelo onaphwanela otitelela yoohuserya awe ophiyerya waamaliha aliivuru oopiili. Ela enammukhaviherya okhalano nroromelo noolipa wa Yehova ni otitelela ororomeleya wa yoowo.—Mwaalakhanye Kolosi 2:6, 7.

18. (1) 1 Timóteo 4:16 onanceenyerya opaka eheeni ntoko ahusiha a eparipari, nave ni yookhumela taani? (2) Tiivi eri yoolakelelaahu vaavaa nnapharihelaahu Ikaruma sa Ohusihano?

¹⁸ Ntoko anamoona a Yehova, nookhalano murici wa waahusiha achu “nsu neparipari na Mutxhaka Waphama” nenlo nnahaala waahoolela mu ekumi yoohimala. (Kolosi 1:5; mwaalakhanye 1 Timóteo 4:16.) Wi nikhaviheryeye weerano yeela, nookhalano Ikaruma sa Ohusihano seiyo nnachunaahu. (Moone “ Ikaruma sa Ohusihano.”) Hankooni nipharihele phaama ikaruma seiha ntoko nnaweryelaahuvo. Muchu ti muchu a hiyo onanwerya olakelela ekaruma taani enapaka makupa a Ikaruma sa Ohusihano onahaaleiye opharihela nave elukuluku taani. Nyenya muupuwele, yoolakelela ahu tahi pahiru okawa soolaleeryiwa, nave hinnachuna waakawela soolaleeryiwa sahu achu yaale ahirino nchuno ni muchaka ahu. Yoolakelela ahu ori waapaka oohuserya wa achu yaawo arino nchuno, ari awiiyeviha, nave yaawo anachuna omusuwela Muluku chiryene, achu yaawo ‘athanleliwe ekumi yohimala.’—Saweriwa T’arummwa 13:48; Mateu 28:19, 20.