Wiiwanana iwo waahipaceryiha marehereryo mavyaani yiichaniwa Maloko Awiiwanana. Marehereryo awo yaarino yoolakelela ya “ovahererya wiiwanana wa elapo yoothene ni ophwanyiwa murecele ni ohuukhuwa veelaponi yoothene.” Malapelo mancipale yaahikhaviherya marehereryo a Maloko Awiiwanana. Alipa a Malamulo a malapelo Eekristu o Amerika yaahicicimiherya marehereryo awo ntoko “yawooniherya ya olamulelo wa Omwene wa Muluku veelaponi yavathi.” Alipa a malamulo yaahooniherya okhaviherya waya marehereryo a Maloko Awiiwanana moorweela wa waarumiha achu oya o Paris ntakhara Muthukumano wa Murecele. Mulopwana mmoha a yaawo yaarummwe oya o Paris aahiloca wi muthukumano owo “yaari mapacereryo a elukuluku evyaani mmiyaha sa elapo.”

Elukuluku evyaani yaahipacerya, nyenya eyo hiyaaphwanela otannyiwa ni alopwana yaawo yiivoliihenrye mmuthukumano yoowo wa murecele. Mu 1919 yaahipacerya elukuluku evyaani mmuteko woolaleerya vaavaa Yehova aavanheiye ikuru akapuro awe wi elaleerye vancipale opwaha khalai. Nyenya ela ehaakumve weereya, echu yookhweleya yaaphwanela otorokeya mu Oohuserya a Piipiliya.

Namuthanli a vayaakhani a ahooleli a Sociedade Torre de Vigia de Bíblias e Tratados aahaala opakiwa Nawoorowa, 4 a Yaneru a 1919. Mu elukuluku yeele, Joseph F. Rutherford, yoowo aarino olamulelo variyari va achu a Yehova, aahiwaleliwa mukalaposo o Atlanta Xeyorxiya, Estatu Unitu, vamoha ni akina athanu napiili. Nikoho naakhumelela ti: Apwanne anna yaawo yaawaleliwe yaanaphwanela othanliwa wi ekhale ahooleli? Naari apwanne yaanaphwanela oraceeliwa?

Ari mukalaposo, Munna Rutherford aanoova vooloca sa muhoolo wa marehereryo. Owo aahisuwela wi anna akina yuupuwela wi yaahaala okhala yaphaama omuthanla muchu mukina wi akhale muhooleli. Asuwelaka yeela, munna Rutherford aahirepa ekaarata wa nikhuuru, alocaka wi athanliwe Evander J. Coward ntoko muhooleli. Rutherford aahimuloca Coward ntoko “oomaala,” “amiruku,” ni “oororomeleya wa Pwiya.” Nyenya, anna ancipale yaarino moonelo woohiyana, ophiyerya wi yaahiloca wi muthukumano opakiwe ivinrevo miyeeri  mithanu nammoha. Nikhuuru nenlo naakiha owaleliwa wa anna yaaheemererya. Vaavaa yuupuwelaaya echu yoopaka, akina yaari oohaleeliheya.

Voocharela yaaheereya echu yeeyo Richard H. Barber ohoolo waya aatharinheiye ntoko ‘oyeeherya makhurwa mmaahini ootannyeyasa.’ Munna mmoha mu nikhuuru aahiloca moovuwa ariki: “Miyaano nkiri mulipa a malamulo, nyenya, vooloca sa wookololowa wa mwaha, koosuwela echu vooloca sa nlamulo na oororomeleya. Ororomeleya ti yeeyo Muluku onachuneiye. Nkinuupuwela nroromelo nikina ntokweene naahaalaahu wooniherya opwaha opaka namuthanli nave nimuthanle wanawiili Munna Rutherford ntoko muhooleli.”—Sal. 18:25.

Alexander Macmillan, yoowotho aawaleliwe, ooloca yeeyo yeeren’ye nihiku noocharela na namuthanli. Rutherford aahimana exiri ya ekalaposo awe nave aloca: “Okumiherye ntata vaate.” Munna Rutherford voocharela aahimunnya muchaka. Macmillan aahoona muchaka wookhuveya nave mwawaakuveya aahisuwela yootaphulelaaya. Muchaka waarino masu ala: “RUTHERFORD WISE VAN BARBER ANDERSON BULLY E SPILL AHOOLELI ARARU OOPACERYA ALAMULELI NINNOOSIVELAANI OOTHENE.” Ela enataphulela wi ahooleli oothene yaahithanliwa wanawiili nave Joseph Rutherford, ni William Van Amburgh yaahikookela orumeela ntoko alamuleli. Nyenya Munna Rutherford aahaala otitelela orumeela ntoko mulamuleli.

Elukuluku anna athanu nachaaru yaawaleliwaaya, Oohuserya a Piipiliya yaahaaveka achu wi erepele ekaarata wa alipa oolamulela yeeyo yaaveka wi anna ehuleliwe. Anna ni arokora yaale oolipa murima yaahiwerya ophwanya orepela wa waakhwana 700.000. Nihiku Naneesese, 26 a Marsu a 1919 yooveka ehaakumve operekhiwa, Munna Rutherford ni anna akina yaarino murici, yaahuleliwa.

Alocaka wa yaawo yaamwaakhenle owaani, Munna Rutherford aahiloca: “Koolekecheya wi yaweereya ela nihoolenlaahu erino yoolakelela ya onirehererya ntakhara ilukuluku soovila . . . owaniha wanyu hiwaari pahiru waakumiha anna mukalaposo. Ela hiyaari yoolakelela yeeparipari ya muteko yoola . . . Owaniha mpankaanyu orino yoolakelela ya ovaha onamoona ntakhara Eparipari, nave yaale apanke makupa mu owaniha wuuwu annaakhela mareeliho matokweene.”

Mikhalelo saavolowenle othorihiwa wa annihu saahivaha eneneeryo wi Yehova aanahoolela miyaha. Mu 14 a Maiyu a 1919 etripunali yookhaviherya yaahithariha: ‘Alipa awootheriwa mmwaha yoola heereliwe othoriha yoowo yahaaphwanelaaya, nave mwa nthowa nenlo, mulacu aya woomalihiwa.’ Anna yaahootheryiwa miyaha sawoopiha. Waakhanle wi pahiru arimuleveleliwa naari waakhanle wi ivukuliwe iyaakha, miyaha sawoopiha yootheriwaaya hisahaala omala. Nyenya mulacu waahimalihiwa nave hiwaavo wootherya okina waapakiwe. Mwa yeeyo, Muthoriha Rutherford haayelenle ophwanelela wawe ntoko muthoriha nave amanle okumihiwa mukalaposo, aahiwaakiha achu a Yehova ikwaha sincipale mu Nipuro Ntokweene Noothoriha no Estatu Unitu.

Munna Macmillan onnuupuwela: “Hiyaano hinaahaala okhuna miwono ni ohipaka echu niweheryaka orwa wa Pwiya wi anikerihe wirimu. Naahisuwela wi naaphwanela opaka echu wi nsuwele tiivi yaari yookhwela ya Pwiya.”

Nyenya anna o nipuro nahu ntokweene hiyaahaala otitelele opaka muteko yoowo yaapankaaya mu iyaakha. Ntakhara heeni? Woona wi variyari va owaleliwa waya, ikaruma soothene saaphariheliwe wi simprimiriwe soolaleeryiwa saahinyaanyeya. Ela yaari yooceecheiha, nave anna akina yuupuwela wi muteko woolaleerya waahimala.

Apwanne nlelo aahikhalavo muchu aarino nchuno mu muchaka woolaleerya yoowo waapakiwa ni Oohuserya a Piipiliya? Wi naakhuliwe nikoho nenla, Munna Rutherford aahilakelela operekha mwaha. Muchu ti muchu aahaala owompwa. Munna Macmillan aahiloca: “Waakhala wi haavo oruule va muthukumano yoola nnahaala osuwela wi muteko woolaleerya woomalihiwa.”

Mwawiihiiha, Namurunku, 4 a Maiyu a 1919, naamwi aatempe wiiceliwa, Munna Rutherford aahiperekha mwaha “A Esperança Para a Humanidade Angustiada” o Los Anxeles, o Kaliforniya. Achu waacamela 3.500 yaahiphiya va muthukumano, nave achu masaneene yaahirwa nave hiyaawenrye owiriyana mwaha woona wi hiwaarivo mpuro woophwanelela. Mu nihiku noocharela, akina 1.500 yaahiwiriyana mwaha. Anna yaahikhalano naakhulo naya—achu yaahikhalano nchuno!

Yeeyo anna yaapankaaya voocharela ennavolowela mukhalelo Anamoona a Yehova anapakaaya muteko ophiyerya olelo.

Mulipeleli 1 a Akostu a 1919, aahilokoha wi omapacereryo wa Setempuru, muthukumano wa muceche waahaala opakiwa o Setar Point Ohio. “Muchu ti muchu pahiru uupuwela wi aaphwanela oyawo,” onnuupuwela Clarence B. Beaty, Oohuserya a Piipiliya yoowo aari mmiravo o Missouri. Anna ni arokora  opwaha 6.000 yaahiphwanyeya va muthukumano, opwaha nuumuru nenlo naaweheryiwa. Echu yeerinhe wi muthukumano wa muceche okhale woohakalalihasa yaari wi, achu opwaha 200 yaahipatisiwa Mmuhice Eriye.

Mu 5 a Setempuru a 1919, nihiku na neethanu naya na muthukumano, munna Rutherford aahipaka mwaha “Comunicado aos colaboradores.” Mmwaha yoowo, aahilokoha erevista evyaani, yiichaniwa The Golden Age (A Idade de Ouro). * yoolakelela ya erevista yeeyo yaari “oruuha michaka sookhweleya ni sahiihaano, evahereryaka otharihiwa wa Piipiliya vooloca sa ntakhara heeni saweereya iho itokweene saakhumelelaaya.”

Oohuserya a Piipiliya oothene yaahiceenyeryiwa olaleerya moolipa murima epharihelaka yoolaleeryiwa yeela evyaani. Ekaarata yeeyo yaathariha mukhalelo muteko waaphwanelaaya oreheryiwa: “Haya muchu ti muchu [oopatisiwa] uupuwele wi ela eri ekari etokweene orumeela, nave athamalele ekari yeela hiihaano nave akhaleno nikupa na ovaha onamoona yoola mutokweene veelaponi.” Achu ancipale yaaheemererya nwopelo wa olaleerya! Mu Tesempuru, alaleeryi yaale a Omwene amvai yaahiphwanya soorepela amiile 50 sa erevista yeela evyaani.

Omakuchuwelo wa eyaakha ya 1919, achu a Yehova yaahirehereryeya nave yaalipiheya wanaawiili. Mwawaaceererya, sooloherya sincipale sookhweleya vooloca sa mahiku ookuchula saahikhwaanela. Yaweeha ni weelihiwa wa achu a Muluku yoowo onalociwa mu Malakiya 3:1-4 waahaakhwanela, achu a Yehova yaahoopoliwa mu okapuro aya woosiphela mu “Paapulu Mutokotoko,” nave Yesu aahimuthanla “namuteko oororomeleya ni amiruku.” * (Wup. 18:2, 4; Mat. 24:45) Vano, Oohuserya a Piipiliya yaari ooreheryeya ntakhara muteko yoowo Yehova aachuneiye wi awo epake.