METEROLOXISTA mmoha (mulipa onavareryela elukuluku) onnoona va nikalasi eruku yaaceereryeyaka. Owo onnoona epahu yawoopiha eyaaka mmuceche yoowo oriwo achu ancipale. Nthowa nawi onnuukhuwa ni okhapeleleya wa achu, owo mwawaakuveya onnaalopola achu epahu eyo ehaakumve okhumelela.

Mmukhalelo woolikana, hiihaano Yehova onnaalopola achu a veelaponi yavathi ntakhara “epahu” yawoopihaxa opwaha echu eri yoothene yaahaalaaya wiiwa elokohiwaka vooloca sa epahu ya maphacuwelo. Yehova oneerano hai eyo? Nave nni nroromele hai wi owo onnaavaha achu elukuluku yawaakhwanela wi yeerevo echu? Wi naakhule makoho yaala, voopacerya hankooni nthokororye olopola okina yoowo Yehova aavanheiye khalai.

Mu elukuluku yakhalai, Yehova aahilopola ntakhara “ipahu” soohiyanahiyana, naari meerelo a othoriha, yaawo aahaaleiye oruuha wa achu yaale yaahiiwelela malamulo awe. (Masi. 10:25; Yer. 30:23) Mu ikwaha soothene, owo aanaalopola woosiilo achu oohiiwelela, nave aanaaleela yeeyo yaaphwanelaaya opaka wi emwiiwelele. (2 Mam. 17:12-15; Neh. 9:29, 30) Wi aaceenyerye achu opaka matorokelo, ilukuluku soothene Yehova aanaaruma alapeli awe oororomeleya a veelaponi yavathi wi elaleye othoriha wawe ni waakhaviherya achu opaka matorokelo mwawaakuveya.—Amo. 3:7.

Nowa yootakiherya emoha wa yoowo Muluku aampharihenleiye wi alokohe othoriha wawe. Mu iyaakha sincipale, moohoova owo aahaalopola achu oocapaheya ni a nlala a mmahiku awe vooloca sa Maahi Mancipale. (Map. 6:9-13, 17) Owotho aahaaleela echu yeeyo yaaphwanelaaya weera wi evuluwe. Nowa aahilaleerya vancipale ophiyerya wi ohoolo waya aahiichaniwa “mulipa oolaleya a sawookololowa.”—2 Ped. 2:5.

Moohipwacha wiilipiserya wa Nowa, achu a elukuluku yeele yaakhooca muchaka awe yoowo aavahereryiweiye ti Muluku. Awo yaahooniherya wi hiyaarino nroromelo mwa Muluku. Ntoko yookhumelela, awo yaahikhwa vaavaa ‘maahi yaale yaatolonshaaya achu oothene.’ (Mat. 24:39; Ahe. 11:7) Vaavaa makuchuwelo aya yaacamelaaya, awo hiyaaphwanela wiikhupanyerya wi Muluku haaloponle.

Mu ilukuluku ikina, Yehova aanamulopola muchu ti muchu mu elukuluku vakhaani ehaakumve opacerya “epahu” ya othoriha wawe. Naamwiihiiha, Yehova aanaroromela wi yaale eni evoloweliwe ni othoriha evahiwe elukuluku yawaakhwanela wi yeerevo echu. Ntoko yawooniherya, owo aahivahererya ekano ya olopola variyari va Ipahu Khumi seiho achu o Yikuputu akhalai yaahooxen’yaayano. Ntoko yootakiherya emoha, Yehova aahimurumiha Mose ni Aroni wi yamulopole Farawo ni alapeli awe vooloca sa epahu yaneethanu napiili, echeku ya maralala yeeyo yaapahunle vancipale. Vano woona wi echeku eyo yaahaala opacerya mu nihiku noocharela, apwanne Muluku aahaavaha elukuluku yawaakhwanela wi ephwanye nipuro noophwanelela wi esepe maralala? Piipiliya onnavaha naakhulo: “Anamuteko akina a Farawo yoova masu a Apwiya, yahaachawiherya mpa anamuteko aya ni inama saya. Yaawo yahaathokorerya masu a Apwiya, yaahiya vanlakani anamuteko aya ni inama saya.” (Muk. 9:18-21) Mwawooneya, Yehova aahivaha olopola wookwakwaleya, ophiyerya wi yaale yeenrevo echu mwawaakuveya yaahikophola mu epahu yeele yawoopiha.

Mukhalelo woolikana, Farawo ni alapeli awe yaahilopoliwa ntakhara epahu yaneekhumi. Naamwiihiiha, awo moololo yaahikhooca olopola iwo. (Muk. 4:22, 23) Ntoko yookhumelela, awo yaahiwoona anamwane aya oopacerya oyariwa ekhwaaka. Yaari yoothananihaxa! (Muk. 11:4-10; 12:29) Apwanne yanwerya wiiwa olopola owo mu elukuluku yoophwanelela? Aai! Mwawaakuveya Mose aahaalopola Aisarayeli vooloca sa epahu yaneekhumi yeeyo yaahaala  orwa nave aahaahusiha mukhalelo yeeraaya evuluxe imusi saya. (Muk. 12:21-28) Yaari achu akavi yaakhulenle olopola wa Mose? Mwawiiwanana ni sawooniherya ikina, achu awaakhwana amilyawu araru, ophitaanyerya Aisarayeli, nave “yaapwesheheryana tho ni achu akina” yaawo yahaari Aisarayeli ni Ayikuputu, yaahirapela othoriha wa Muluku nave yaakhuma o Yikuputu.—Muk. 12:38.

Ntoko sootakiherya seiya sinooniheryaaya, ilukuluku soothene Yehova aaheeriha wi achu ekhaleno elukuluku yawaakhwanela wi ewiriyane olopola wawe. (Malam. 32:4) Tiheeni yaamuceenyenrye Muluku weerano yeeyo? Murummwa Petro oothariha vooloca sa Yehova ariki: “Hanachuna wi mmoha a nyuwo atholowe, nto wi oothene ephiye wuucharuwani.” (2 Ped. 3:9) Aai, Muluku onnatepa waapwacha achu. Owo onachuna wi oothene echaruwe nave epake matorokelo anachuneya othoriha wawe ohaakumve ophiya.—Isa. 48:17, 18; Aro. 2:4.

Olelo tho, achu oothene anaphwanela wiiwa olopola wawaakuveya yoowo onalokohiwa veelaponi yoothene. Ari veelaponi yavathi, Yesu aahilopola wi elapo ela yoonanara enahaala otoloxiwa variyari va “ekoi etokotoko.” (Mat. 24:21, BNM) Vooloca sa othoriha yoowo wa muhoolo, owo oovaha yooloherya yeeyo mookwakwaleya enathariha yeeyo oomuchara awe yaahaalaaya woona ni weeravo echu elukuluku eyo yaacamelaka. Yesu aahithariha saweereya itokotoko soochuneya seiyo nnoonaahu seereyaka mmahiku ahu.—Mat. 24:3-12; Luka 21:10-13.

Mwawiiwanana ni yooloherya yeela, Yehova onnamuceenyerya muchu ti muchu wi athanle omurumeela ni omwiiwelela. Yehova onachuna wi achu awiiwelela epuhe okumi waphaama hiihaano nave muhoolo ekhaleno mareeliho oohimala mu elapo awe evyaani yawookololowa. (2 Ped. 3:13) Wi alipihe nroromelo naachu mu soororomeliha sawe, Yehova oovahererya michaka soovuluxa—“michaka . . . ya omwene,” seiyo Yesu aalohenryeiye wi saahaala ‘olaleiwa mweelapo yoothene yookhalamo achu wi iweerele onamoona maloko oothene.’ (Mat. 24:14) Muluku ohaarehererya alapeli awe eeparipari wi evahe “onamoona,” naari wi elaleerye michaka soorweela wa yoowo mu ilapo 240. Yehova onachuna wi achu ancipale wakhala wooweryeya yiiwe olopola wawe nave yeerevo echu wi ekophole mu “epahu” ya othoriha wawe wawookololowa yoowo onoorwa.—Sof. 1:14, 15; 2:2, 3.

Echu yookhweleya, tahi waakhanle wi Yehova onnaavaha achu elukuluku yawaakhwanela wi yaakhulele olopola wawe. Saweereya sinnooniherya wi elukuluku yoothene onneerano. Ohiya yeeyo, nikoho nookhweleya ti nawi: Apwanne achu anahaala owiriyana olopola wa Yehova nlelo erivo elukuluku? Ntoko anamichaka a Muluku nnaphwanela otitelela waakhaviherya achu ancipale anaweryeya wi evuluwe o makuchuwelo wa elapo yeela yoonanara.